رواية ولد الباشا للكاتبة فاطمة الأحمد الفصل الثامن والخمسون
وَسن
عافني وگام يضرب راسه بالحايط من ورا سماعه لِ أسم الله، ازحف للباب والبيت صاير شعلة من النار، الشموع مالية كل زاوية. گدرت اوگف على رجلي وأمشي للدرج. صعدت نص الدرج وصاح من جوا
لااااااااا تصعدسيييين.
استعجلت أكثر اصعد واحس روحي تريد تطلع من الخوف والرعب ركضت وهو اكيد لاحگني فتحت باب الغرفة اللي مرات من ابات اجي انام بيها. لگيته جوا واگفلي والدم نازل نطوله من جرح جبينه، هجم عليّه خانگني بإيده ويميل راسه ويا الحچي بصراخ، روحي تريد تطلع من نبرة صوته المُرعبة.
شسمها شسمهاااااا شسمهاااااا اااااححچييي.
وَسن: مااا ادررري.
شلووووون ما تعررررفين ااانتي حچيييتي بيهااا ذاااك اليوم گليلي شسمهااااا.
ارجف بين إيده وخايفه عليه أكثر من خوفي على نفسي، خايفه يخسر روحه اذا بقى هذا الشيطان متجسده.
أبچي واريده يعوفني ماكو قافل، صرت احچي واصرخ بأسمه فقدت الأمل يعوفني لو يموتني لو ياخذ اسم البنيه
وَسن: نَاااائل نَائل بداااعة بنتيي مو تحبهاااا بداااعتهه عوفني نَائل عوفني اااصحى على روووحك اااصحى.
تنطيييييين اااسمها لو ماااا تنطييين.
وَسن: نااائل اااصحى على روحك ااانت وعدتني ماااا تتصرف إلا بكلااامي.
شعلييييييچ بناااائل لاااااا تحاااولي تغيريه.
جرح جبينه ينزف والدم ملطخه ولطخ بلوزتي
وسع عيونه وينظرلي بطريقه مُرعبة گلبي وگع بين رجلية
غمضت عيوني وهو خانگني بإيده، رجع يكرر طلبه وبنبرة صوت شبه مُغايرة لصوت نائل
اسمهاااااا ااانطيني اسمهااااا. اسمهاااا. اسمها انطيني اسمها.
رخى إيده من رقبتي فتحت عيوني شفت ناجي واگف وراه ضارب الإبرة بكتف اخوه نائل، اللي فورا خسر قوته وگع بحظني، بس صوت شهگاته تنسمع، كنبصت وياه حاظنه راسه وابچي، ناجي كنبص يجر بيّه يريد يوخرني
ناجي: عوفييييي اخويه اااعتقييي خلييچ بعيده.
سحبه مني ويشوف وجهه الجرح ماكو اختفى والدم موجود.
ردت اساعده ما خلاني. گام و نائل بألف ويل واگف على رجله مشاه على غرفته ورجعلي، اجاني لزم ذراعي يجرني وياه برا الغرفة. ينزل الدرج ويجر بيّه
البيت والاضويه كلها رجعت ضاوية طبيعي
وگفنا بنص البيت ترك إيدي وراح جاب اغراضي من الصاله رجع، راح فتح الباب على وسعها شمر اغراضي وأشرلي. گال
ناجي: اطلعي برا...
عيونه احمر مثل الدم ويخوزرني، تقدمت ناحيته واحچي.
وَسن: ابات عنده ادير بالي عليه الله يخليك ناجي الله يخليك. ابات يمه
ناجي: اطلعي برا ما تسمعين؟
وَسن: عليك الله.
ناجي: اااااطلعي برااااا مااا تفهميييييييييين.
اجاني لزم إيدي يمرده مرد ويجرني برا
شال قمصلتي والموبايل من الگاع، شمرني برا باب البيت الخارجي، شمر قمصلتي بوجهي والموبايل خلاهه بإيدي
ناجي: اطلعيييي برااا حيااااته ااااعتقييييييه كله بسببكم وبسببب ااااابوچ اااخويه تسووووودن فقد عقله فقد نفسه.
وَسن: بس الليله ناااجي االله يخليك.
ناجي: بعددددچ تحچيييين لچ طلعي من حيااااته اااطلعي ااااعتقييييييه.
وَسن: مااا اااخليه ماااا اعوووفه هو بقى وياي ما عافني شلون آني ااااعوفه شلووون؟ ناجي الله يخليك خل نطب جوا نحچي
تخبل يصرخ ويضرب راسه بإيده روحه تريد تطلع من القهر والعصبية
ناجي: ااااالله لا يخليييني ااالله لا يخليييني روحي منااا
رووحي.
وَسن: ناجي لا تحچي هيج. خل نطب جوا. آني ما اعوف نائل بوحده هسه يگعد ويضل يبچي على حاله.
ناجي: يبچي على حاااله بسبب اابوچ.
دار ظهره ومغطي عيونه رحت گدامه وهو يظم دموعه عليّه
ناجي: روحي منا. روحي منا ما اريد نزعل من بعض اكثر من هيچ البيّه مكفيني. روحي منا لاااا اهد على هاااشم اخلي طلقة براااسه وارتاح.
لزمت ايده غصب وحچيت.
وَسن: إذا نعرف نائل يرجع طبيعي بقتل هاشم آني بإيدي اخلص عليه بإيدي اخلص الناس من شره احرر بنتي من إيده قبل لا يضحي بيها. بس ماكو فايده نائل بقتل هاشم ما يرجع طبيعي.
ناجي: انتي اسوء منه انتي اسوء.
وَسن: محد بينا مثالي كلنا سيئين لكن بِدرجات.
سحب إيده يمسح وجه وگال
ناجي: روحي للبيت سُعاد بوحدها
وَسن: سُعاد باقيه يم رُقيه لا تچذب اني ابقى يعني ابقى.
نظرلي واحسه يتغير من يحچي بيها گال.
ناجي: رجعت من عند رُقيه.
وَسن: رحتلها وحچيت شلونها رُقيه؟
ناجي: لا تغيرين الموضوع ويلا للبيت.
وَسن: اوگف دقيقه من صدگ اسأل ما سألتها عن رقيه؟
ناجي: وشعلية بيها حته اسأل؟ اجيت احچي وياچ بخصوص التحويلات المالية وما لگيتچ وصار إلى صار هنا. ما رحت لبيتكم حته اسأل سعاد عن حالة رُقيه.
وَسن: وانت شبيك تبرر الصار ليش خايف تبين؟
خوزرني يحچي بوجهي ومعصب
ناجي: اكتلچ يلا تولين لبيتكم؟
وَسن: انت دِ مد إيدك خل اكسرها.
دفعني بعيد عنه وگال
ناجي: دِ روووووحي منا لا انعل والديچ.
سد الباب الخارجي رديت دفرت الباب
وَسن: حيوااااااان لا تجيب طاري ااامي المرحومة.
ناجي: روووووحي منا لااا ااانعل ااااابوچ، هيچ تماام؟
وَسن: على فكررررة نائل يگول عليك واحد هيوان. يعني واحد حيوااان.
ناجي: ماخذ من اطباعكم. ولي منا لميتي الفرع علينا.
مشيت شويه ورجعت مره ثانيه دفرت الباب وحچيت.
وَسن: الفجر اجيك اذا زلمة ما تفتحلي الباب.
تسمع؟ هيوو تسمع؟ هيواان. بسرعة ركض طب جوا
خليت الموبايل بجيب الجينز ولبست قمصلتي خفيت بيها البلوزة اللي كلها دم نائل ومشيت بالفرع ساعه تقريبا راح تصير 1. مريت من يم بيت الجوارين الرجال توه يرد لبيته باوعلي فوگ تحت
وَسن: ما شايف بنيه؟
مثلچ ما شايف امچ روسيه لو شنهيه؟
وَسن: سكران طيح الله حظك وحظ چهرتك الخايسه يَبن الخايسه
شگلتي ي بنييية شگلتييييي؟
طنشته ومشيت لبيتنا، آني بنفسي مجاي استوعب شلون لساني تعلم عالسب والشتم انوب من منو سامعه كلمة ابن الخايسه وحچيتها.
وَسن: ينرادلي إعادة تأهيل مستحيل اختلط بالمجتمع المخملي واني بهذا اللسان الزفر. الله شگد فارغه حته ادخل إعادة تأهيل. هو آني ما صدگت خلصت منها.
دخلت لحوش بيتنا، حته مفتاح ما شايله وياي
دگيت الباب بلكت جنى البنيه اللي تشتغل عدنه تگوم تفتحلي او انجبر اروح لبيت جاسر. دگيت الجرس مره ثانيه.
وَسن: وگتچ تموتين بالنومه دگومي فتحيلي.
الحارس طلع من غرفته يركض للباب الخارجي عباله احد طب وما شايفني واگفه يم باب البيت
وَسن: تعال تعاال عود هذا انت الحارس؟ طاح حظ هاشم على هيچ زلم جايبهم زلم چيس حب.
اجا بإتجاهي طلع مفتاح من جيبه ومدنگ من الفشلة مدري من كلامي
اسف يا انسه خل افتح الباب عندي نسخه
وَسن: نايس حُبي، تعال افتح الباب.
فتحلي الباب وگف ينظرلي
وَسن: ما تروح تكمل نومتك؟
لا اگعد اناوب بس يا انسه.
وَسن: لا تخاف حُبي ما أگول لهاشم جايب حارس چيس حب مگضيها نوم. واذا تسمع الكلام بعد چم يوم نتعاون بشغله.
حاظر آني تأمرين
وَسن: لا من صدگ طاح حظ هاشم شلون بعته. روح حبي روح ناوب تناوب تنام ما يهمني.
دخلت للبيت وانداريت حته أسد الباب حچآ
لا تحچين اي؟ يطردني واني الديّانة واگفين سرا بباب بيتي.
وَسن: ههه والله حبيتك.
شلون شلون؟
رااشد.
انداريت وراي، شفته واگف الجگاره بين أصابع ايده اخذ نفس واشرله
هَاشم: مطرود منا للصبح يخلص وقتك.
وَسن: ديگول محتاج فلوس شنو تطرده راسد مدري راشد روح لمكانك ومعليك آني ابقيك.
راح هو وآني دخلت سديت الباب احرك عيوني بحيرة وانداريتله بملامح بارده. هو نظرلي فوگ تحت
هاشم: وين چنتي دايحه.؟
فتحت سحاب القمصلة نزعتها وفردت ذراعي شوفته الدم إلى نازل بطولي
وَسن: بين إيدين الشيطان اللي سلطته على اخويه.
هاشم: هم گالت اخويه مالچ اخو غير اخوچ AXR مالچ اخو غيره.
وَسن: واذا اخويه لييش ضام الموضوع عن العالم وخاصة خواتي؟
هاشم: وَسسسسن! هذا الموضوع مالچ علاقة بي
كلشي ينعرف بالوقت المناسب!
وَسن: اگدر بكل سهولة اسويلنا فحص الحمض النووي واكشف چذبك. بس حاليا لا احنه بنفس المدينة ولا فارغتلك انت وابنك العار.
هاشم: هو هذا نفسه ابني العار اللي عايف شغلنا ومگضيها يداري بنتچ ويفرفرها بالحدايق!
گلبت عيوني بعدم اكتراث، ورجعت على موضوع نائل
وَسن: إذا صار عليه شي. ما تلوم ألا حالك وتشوف شراح يجرالك بس اذا نائل الصبح ما يگعد طبيعي.
اخذ نفس من الجگاره وگال بكل برودة دم وضمير!
هاشم: ماكو شي تحت امري هذا المسمي نفسه لوسيفر هو متفرد بنائل. روحي تفاهمي وياه.
وسن: ااانتَ سلّطته علييه.
هاشم: صوتچ لا يعلّى.
وَسن: يعلّى يييعللللى شتسووووي.
هاشم: گتلچ صوتچ لا يعلى، و اصعدي لغرفتچ.
وَسن: ييييعلّى ومااا ااخاااف مننك اااسمعني هاشم اسمعني اذا. اااذا ما خليتك تضرب راسك بگاع الله متندم ما اطلع بنت امي. واطلع عارة مثلللللك.
دنگت راسي، إيدي على خدي غمضت عيوني بألم
اذني صوفرت من قوة الراشدي. هاي اول مره يمد إيده ويضربني.
هاشم: تتذكرين لمن اخذتچ من ذيچ المستشفى
عالجتچ ونضفتچ. عيشتچ ملكة وكلشي تحت رجليچ. حتى زواج زوجتچ من التحبيه رغم ما چنت راضي!
بلعت الغصة وشعورالخيبة بگلبي وفتحت اذاني عشرة على عشرة خليته يقبل حته اركز بكلامه وما انساه.
هاشم: بيچ خليته يرضى بوحده مريضه مثلچ وحده تريد بس تشوف الدم. گتله تتعالج وتصير زينه.
بس انتي جاي تخليني ارجعچ واخبلچ مثل ما چنتي. ارجعچ لنُقطة الصفر بابا؟
نزلت دمعه من عيوني عالگاع واني مدنگه اذا ارفع راسي
واخلي عيني بعينه اگوم أبچي من الخذلان اللي بكلامه.
وَسن: لا تگول بابا. ما عندي اب مثلك.
هاشم: ليش بابا؟ يأذيچ تحسين مخذوله لو خذلتچ؟
هاي انتي الما يكسرچ ولا يهمچ كلامي بقت على حچاية بابا؟
رفعت راسي ورجعت شعري الأشگر ويا الغرة ل ورا رتبتهن بغرور، مسحت مكان الكف مع ضحكة لإستهزاء. حچيت
وَسن: الحمد لله امي ماتت قبل لا تشوف هاشمها شلون صار.
وجهه صار باهت، ملامحه، وجبروته، ضُلمه، قساوته، والضمير الميت اليتعامل بيها ويانه. كلشي تبخر وتبدل بملامح الخيبة القهر الكسر والمخذول. كأن اليوم امي ماتت واليوم عزاها عند ابويه! حچآ بصوت هادئ مقهور
هاشم: وَسن!
وَسن: هههةههةهه. وَسن؟ كلما تريد تعيرني بمرضي وبحالتي الصحية والنفسيه وا وا وا. كلما تريد تكسرني؟ اجي اذكرك بكسرتك. اذكرك شلون اخذو ااامي منك وانت بعددددك وياااااهم. يگلي وَسن بابا، دروووح.
عفته بصفنته ومشيت بإتجاه الدرج وكل شويه انادرله اضحك مستهزئة بي
وَسن: هههةههةةهة. احچي گول وَسن بابا.؟
اوووه ما تحچي؟ تؤتتؤتؤ يلا يلا من تروحلهم ينطوك شدة شدتين ينطوك بيت لو سيارة ويتغير نفسيتك تعبانه. طيح الله حظك وحظ الساعه الصرت انت أبونا.
صعدت الدرج وبس اسمع صوت تكسير الاثاث البيت
عباله اذا كسر گلبي وحرگ روحي. ما اردله بالمَثل!
اليوم ليلته تنگلب نار جهنم وبئس المصير طالما تذكر جرحه وخسارته.
مستمر يكسر البيت وساكت مثل عادته ما يصرخ ولا يحچي. عباله اذا كسر وهَدم يطفي النار اللي شعلته بگلبه
حته حبوبه سُعاد طلعت من غرفتها وهي تناديني فقط تسأل عن حالي ما يهمها هاشم شيصير بي
سُعاد: بنتي انتي بخير؟
نظرتلها من فوگ
وَسن: اي حُبي اخبل شحلاتي رايحه انام، وانتي نامي عوفچ من النار خل تبقى مشتعله البيت بارد خل يدفى.
حبوبة باوعت بهاشم الگاعد بعدما كسر الصالة تكسر صار رُكام. ويدخن جگاره ورا جگاره. ما اهتمت وطبت لغرفتها. نظرتله هو هم نظرلي.
وَسن: هههةهةههة يگلي بابا وَسن.
درت وجهي وكملت طريقي لغرفتي دخلت وقفلت الباب
طلعت الموبايل من جيبي وفتحت النيت شفته مراسل
بس لايك؟ دزيتله قلب أحمر خليت النيت مفتوح وشمرته عالچرباية.
رحت سبحت ولبست روب الحمام. طلعت من الحمام لگيت الموبايل يدگ. شلته چآن جاسر يدگ واتساب مكالمة فيديو. فتحت الكاميرا وعفت الموبايل عالميز مال المرايا. رحت على جهه ما تبين بالكاميرا، ابدل
هسه هاي شني؟
وَسن: دا ابدل؟
احم وليش ما تبدلين گدامي؟
وَسن: اطفي الكاميرا؟
لا ابقي.
مديت إيدي شوفته تراكات ثنين بعقلي مخليه عليهن قرارات مصيرية
وَسن: التراك الأسود لو احمر طوخ بلون الدم؟
هسه شني هل حركات اسود واحمر ودم.
وَسن: چنت أگول ارجع وَسن القديمه الجديدة مو كيوت
ههه القديمه تگتل بينا ابقي عالجديده
سكتت ما انطيت رد فعل على كلامه، بسرعه ادرك نفسه حچا بصراحة مبالغة.
چنت اقصد القديمه شرسة وقوية اما الجديدة كيوت بعدما صارت ام جميلة ل إيمي.
وَسن: حُبي. شنو رأيك نجيب كوكب الأرض ونخلي فيونكه عليها، فيونكه چبيره حته كل المرضى النفسيين والسايكوباثيا يصيرون كيوت مثلي.
ما اقصد شي.
وَسن: طُز بيك حته لو تقصد.
شگلتي. لحظة شگلتييي؟
وَسن: حُبي طُز بيك حته لو تقصد. I don t care.
لا ما اقصدها بس طُز بيّه بدون طوط ونَجمة؟
وَسن: منين أجيبلك نجمة واحنه سمانا غيم وعتم؟
صفن على كلامي واني شايله التراكات گدام الكاميرا
وَسن: ديلا لا تُصفن ما اقصدها حُبي اختار من بينهن يعجبني ذوقك. اسود. لو احمر طوخ بلون الدم؟
الأسود لايگلچ ويا شگار الشعر يطلع يگش شگ.
وَسن: هههةهة ذكرتني چنت برا ورجعت للبيت ابو الدراجة تُعرفه.
اي شگال ابن الهذا؟
وَسن: ضل يباوعلي وگتله ما شايف بنيه؟
گال مثلچ ما شايف امچ روسيه لو شنهيه؟
هل حيوان ابن سبعطاعش حيوان. ذاك اليوم من رديت للبصرة تعاركت وياه
وَسن: السبب؟
مخلي ماطوره باب بيتنا.
وَسن: ما عنده باب بيت يجي على باب بيتك؟
بعدين ماطور شنو؟ گول دراجة.
ما نعجبچ؟ ههه.
وَسن: ههه لا اتس اوكي حُبي، بس هاشم اقنعك بكلشي ما عدى ألفاضك ما خلاك تقتنعك تحسن مُصطلحاتك. يعني حته تناسب الطبقه المخملية اللي نتعامل وياهم.
وسن صاير شي وياچ ليش هيچي تحاچيني؟
وَسن: لا حُبي ما صاير شي واذا صاير احلها بزودي.
شمرت التراك الأسود عالچربايه ولبست الأحمر الطوخ
أنتي گلتي ذوقك يعجبني! ليش تلبسين الأحمر الطوخ لونه ما حلو!
وَسن: أكو احلى من لون الدم؟
اي لون عيونچ.
ابتسمتله و اجيت گعدت مگابلة المرايا اسوي جلسة العناية
بالبشرة. وهو يتگلب بفراشه لو يسند راسه على ايده ويصفن عليّه. چنت ملتهية اخلي مرطب لإيدي وهو گال
وَسن ترا أحبچ حيل أحبچ ما اتخيل حياتي بلياچ
لو اگعد اگابلچ العمر كله ما أمل. بس الوگت والضروف ضالمنا.
عفت المرطب على جنب بقيت اباوعله وهو يتأملني
تقربت سندت راسي عالميز، الموبايل گدامي واحنه وجه بوجه.
وَسن: افكر بيك لحدما راسي يثگل واگول هو هم يفكر مثلي؟
االله شاهد افكر بيچ أكثر منچ. افكر بكل تفاصيلچ.
شراح تلبسين من تطلعين؟ الجُنطة راح تختارينه عشوائي؟ لو هم راح تحتارين مثل كل مره؟ هيچ احتار بلياچ واضل افكر بيچ.
وَسن: هااا چنت تراقبني واني محتارة يا جُنطة اختار؟
واراقب نومتچ. من تنامين، عندي واهس بيچ رومشچ اعددهن.
بقيت ساكتة وهو يسولفلي لحدما بلش يتثاوب ويكمل سوالف عن الشغل وشلون AXR عايف الشركة عليه
وهو يداري بنتنا.
الأفندي عاجبه الوضع عباله هاشم ما يرجع ويشوفه شلون مكنسل وساحب على الشركة.
وَسن: على الأقل من هو بالبيت وياها گلبي مرتاح على بنتي.
هم گالت بنتي. بنتنا بنتنا چا آنا وين وليت؟
وَسن: ما تدري بروحك وين وليت؟
بالقرآن لسانچ صاير سوقي وسيف يگص گص.
وَسن: سوقي لو مول؟
مول لو غامبول؟
وَسن: ههها دروح نام. ما ضل عندك حچي.
عندي هوايا حچي بس ما ينحچي لازم اعبر عنها گول وفعل.
واحد صافن عالثاني وفاهمين على بعض اجت عيني على الشحن صاير20
وَسن: خلص شحني2 خللصصص هسه تنطفي بوجهك.
عوفيها تخلص وتنطفي.
وَسن: انطفت انطفت ديلا باااي.
طفيتها وشمرت الموبايل، نظرت لنفسي بالمرايا رتبت شعري، تمعنت بملامح وجهي، اخذت الروج الأحمر الطوخ. فتحتها ورسمت شفايفي بيها، تأملت ملامحي، احب نفسي، احب قوتي، أحب عدم خضوعي لمشاعري
ابتسمت وحسيت ابتسامتي مثل قبل. حچيت
وَسن: إنتهاء الرغبة اشدُ مِن الكُره.
أتأملت ملامحي الثابتة الباردة، بعدها گمت جبت عُلبة الإسعافات الأولية، گعدت عالچرباية باوعت بالحرگ اللي صار برجلي. اثره صاير احمر خليت عليها مرهم حرگ
وتمددت بفراشي بدون لا اتغطى ما اريد انام لأن راح تصير الفجر. اريد اروح اطمئن على نائل. لكن ما ادري شوكت غفيت واخذتني النومه
فزيت على لمسات بارده گعدت لميت رجليّه لحظني بلعت ريگ وانظرله شلون دخل للغرفة وبنفس اللحظة أدركت نائل مستحيل يصعب عليه شي!
نَائل: شگره.
بقيت ساكته عين عليه وعين على الموبايل اللي بصفي بإيد ضويت الشاشة وبإيد اشد على رجلي وعين عليه سرقت نظرة شفت الساعة 5 الصبح. گام من مكانه واني اترقب يحچي ما معقولة يكون نائل يمكن لوسيفر! تقرب مني وگف بصفي.
نَائل: شلون احترگ رجلچ؟ وليش خايفه مني؟
وَسن: نئول؟
گعد عالچرباية سحب رجلي وفتح عصارة المرهم ضل يدهن منها على مكان الحرگ ويحچي
نَائل: اي نئول شبيچ من شوكت تخافين مني؟
بعدين احچيلي شلون حرگتي رجلچ.
وَسن: بگهوة.
بقيت اتمعن بملامح وجه ناسي كلشي صار البارحه
نَائل: آنا خلصته للشغل.
وَسن: بعدما حچينا بموضوع الشغلة وآني طلعت من الصالة شصار؟
نَائل: شصار يعني انتي رجعتي لبيتچ وآنا لغرفتي.
صار شي ثاني؟
بقيت ساكته نظر لرجلي وعافها گام
نَائل: صار شي؟
وَسن: لا ما صار شي. بس من رجعت للبيت اجيت اسوي گهوة وطش على رجلي
نَائل: زين البيت والصالة شكو ليش مكسر؟
هاشم مسوي شي؟ وسن جاوبي هاشم سوا شي عليچ هو حرگچ؟ احچيي
وَسن: نائل.
گمت حظنته وهو يگلي بقلق
نَائل: شگره احچي شبيچ؟
وَسن: ماكو شي صدگني البيت هاشم كسره لأن تجادلنا وآني گتله هم زين امي ماتت وما شافت هاشمها شلون صار. وانت تعرف هاشم يحرگ الدنيا بنار گلبه اذا احد گاله.
نَائل: وحرگچ؟
وَسن: انسسى.
ابتعدت ابتسم اريد يطمئن وهو يريد يباوع بعيوني
ما خليته و رحت عفت موبايلي عالشحن هو باقي ساكت.
شلت الملف اللي جابه وعايفه عالچرباية دققت بي
وَسن: عاشت إيدك حُبي.
اندارلي وعدل شعره اردف بتسأُل
نَائل: البارحه من لعبنة جولة شطرنج طلبت منچ اسم التضوي ضوي؟
وَسن: اسمها؟ لا
نَائل: وسن.؟
وَسن: حچينا قبل وگتلك اول ما نخلص ونسافر اني ارتب الموضوع. وانت گلت اگدر اعرف شوكت انت بوحدك يعني بدون هذاك. مو گلت عنده وقت معين؟
نَائل: اي گتلچ عنده وقت معين يجيني وگتلچ ااذ طلب اسمها لا تنطيه. والبارحه انطيتيييه اسم البنيه!
وَسن: لييش ما مصدگنييي ما انطيته اسم البنيه حاول يعرف اسمها وحاول يخوفني بس ما انطيت اسمها شلون اخليه يقتل ويطفي اخر شمعه ممكن تضوي طريقك وحياتك؟
أنهيت كلامي بنفس واحد وهو يخوزرني ويهز براسه
أدركت هو خلاني احچي بطريقته واسلوبه تراجع بخطوات عكسية وباوعلي ومبين مقهور من نفسه.
نَائل: غير الحرگ. شسويتلچ البارحه؟
وَسن: انت ما حرگتني آني حرگت رجلي بالگهوة
نَائل: لااااا تچذببببييين آنا حارگچ واحتمال ضاااربچ وخااانگچ شسويت انا ااحچيي؟
اريد اتقرب يبتعد
وَسن: ما سويتلي شييي اهدى.
نَائل: وهذاا الزررگ بنحررچ شنننو؟
خلى ايده حاجز بيني وبينه ويحچي
نَائل: آنا اذا ما رحمت بحالچ وهيچ مأذيچ شراح يصير اذا تقربت من التضوي ضوي؟ شراح يصير؟
وَسن: ما يصير شي نائل لا تحچي هيچي انت ما سويت شي انت چنت تحت سيطرة ذاك الكيان.
نَائل: احتمال اخنگها لو اخلي السچينه بگلبها لو اااطفييهااا وتروح آخر شمعة ضاوية من حياتي.
وَسن: نااااائل هسسسه شبيييك.
حظنت خصره، قيدت ايدي وهو رافض قُربي
وَسن: أنت مالك ذنب انت بريئ هذا اللي بداخلك شيطان يَجول براحته هو اللي يقتل هو اللي يطفي. نائل بريئ.
نَائل: خليچ بعيدا خلييييچ بعييدااا عني، وبعد اليوم حته اسم البنيه لا تحچيلي لا تذكرينها گدامي واذا فقد بسبب لوسيفر تروحين من يمي ما تقربيييلي، البنيه خليها مثل ما هي خلها بعيدا وعايشه حياتها ما اريد سوادي يطخ بياضها.
وَسن: نَائل!، نائل وين تطلع
فتح الباب وطلع برا لحگته لتحت بس ما وگف فورا طلع من البيت. صعدت لغرفتي والف تفكير براسي.
هلال
گعدت على أصوات عالية واحد يگول شسوي بهاي
والثاني يگول نأثثها من اول وجديد، عاينت بصفي هدآم ماكو
هِلال: ارد شي يوم اگعد وألگاك بصفي!
واااااانتوا نصوووو صوووااااتكم، لا انتوا ما تنصوون صوووتكم الا اگوووووملكم.
گمت من الفراش عدلت التراك لملمت شعري بقراصه
ومشيت بخطوات سريعه فتحت الباب وطلع بوجهي
عاينت بي فوگ تحت والجماعه مخبوصين برا
هَدآم: انطي مجال.
شايل صينية ريوگ وجايبها للغرفه والجگاره بحلگه.
انطيته مجال يفوت
هِلال: عبالي طالع من البيت
عاف الصينية عالميز يم التُخم اندارلي شافني اعاينله واحك شعري من يسويلي هيچي أمور بسيطة ما ادري شتصرف. عبن فكرت طالع من البيت
هَدآم: گلت نتريگ بالغرفه البيت گايم گاعد. شبيچ حبيبي؟
نزلت ايدي ورحت گعدت بصفه
هِلال: لا ماكو شي انسى.
هَدآم: شَنسى احچي شبيچ؟
هِلال: والله ما بيّه شي.
بديت بسم الله اتريگ وهو يعاينلي
هِلال: لا تعاينلي هيچي. اكُل وما ابقيلك ترا.
هَدآم: بالعافيه.
گال نتريگ ومگضيها صافن بوجهي ويدخن، بلعت اللُگمه ونظرتله ابتسملي ورديتها للإبتسامة. سويتله لُگمه وانطيته أخذها من إيدي واكلها بدون اعتراض
هِلال: چنك بيبي.
هَدآم: وانتي بيبي أكثر.
هِلال: حبيبي بيبي مو بيبي.
هَدآم: مثل سالفة الأنچب التاريخيه مال ابوچ.
هِلال: هههاههها ما تضحك.
لزم أيدي باس أناملي ولاحظ
هَدآم: وين اسوارة الخرز مال امچ؟
هِلال: مخليتها بالدُرج، البارحه انقطع اللاستيكة والخرزات اطشرن بالغرفة تخيل چآن واصل تحت ميزة المرايا چنت راح اوخر.
هَدآم: وخرتي الميزة. وخرتيها؟
هِلال: اههه شبيك انخطف لونك بس لا مخبي جثة وراها؟
هَدآم: جثة ايش دا احچي هيچي عبن ما اريدچ تتأذين او تتعبين.
هِلال: وين تگوم؟
هَدآم: مو گلتي واصل لتحت الميز اروح اطلعها الچ.
هِلال: مديت ايدي واخذتهن وين يمعود اخذتهن.
راح لميزة المرايا دنگ يعاين تحتها، لو گام وشوية يتفقدها ما ادري ليش حسيت عنده شي غاد. گمت وراه
هِلال: شكو وراها؟
اندارلي ونظراته غريبه
هَدآم: متأكده لگيتي كُل الخرزات خاف باقي خرزاية تحت الميزة علمود هيج.
هِلال: لگيتهن كلهن
هَدآم: متأكده ثلاثين؟
هِلال: والله ثلاثين عددتهن ثلاثين وواحد بإيد إيمار.
هَدآم: تمام هذا هوَ
لزمت إيده.
هِلال: اوگف آني ما اتذكر حاچيتلك اسوارتي چم خرزاية بيها. انت شلون عرفت ثلاثين خرزة؟
قربني منه يلامس خدودي ويلزم أيدي يبوس أناملي.
هَدآم: ذاك اليوم ما چنت نعسان وگعدت مگابلچ اعدد
بخرزات اسوارتچ و...
هِلال: وتعدد برموشي.
هَدآم: لا بشعر شواربچ.
هِلال: عزاا بعييينك وخر يلا وخررر. منينلي شوارب چذاااب.
ما عافني ولا يخليني ابتعد محكم عليّه ومقربني منه.
هَدآم: ماكو احترام للزوج مااكو؟
لااا تقاومين ما اعوفچ. عليمن تگولين چذاب.؟
هِلال: يمين عظيم انت چذاب اذا مو چذاب ليش تگول اعدد شواربچ؟
هَدآم: شوگت حچيت ما گايل اعدد انتي سبقتيني وآني فشلتچ.
هِلال: وليش تفشلني هاا؟ چآن گول اعدد رموشچ ليش تگول اعدد شواربچ؟
هَدآم: وحگ العباس ابو فاضل ما گايل هيچ!
هِلال: العباس يسطرك چا منو گال لا بشعر شواربچ؟
هَدآم: دِ خل نتأكد اذا عندچ شوارب لو لا.
هِلال: لااااا مااا اخلييييك وخررر وخررر اعضك والله.
كلشي صار بسرعه ما ندري شوكت دگ الباب وشوكت دخل بهل سرعه خو ما انتظرررر نسمحله
وَتان: عمي يري...
ابتعدت عنه ووتن بالباب ما يدري وين يعاين. وهدام راحله
هَدآم: ااااابن الهمممج شووويه استحي تداهم الغرفة وما تدگ الباب؟
وَتان: ااااحلف بگبر وَ گاااع احلف بترااااب گبره دگييت الباب بس انتوا.
هَدآم: ول احنه شنوو.
وَتان: انتوا. انتوا انزلو جوا. اجيت أگول عمي يريدك تروح للميناء ضروري.
هَدآم: تعااال.
هِلال: عوفه راح.
رگع الباب وسبه اندارلي وگال
هَدآم: اي وين چنت؟
مشيت بخطوات عكسية ناحية الحمام
هِلال: دروح على شغلك.
هَدآم: انتي الفرض والبقية سُنّة.
وگفت وهو تقرب يريد يحظني، اندگ الباب مره ثانيه
هَدآم: وَتن ااانعل اااابوك اذا انت!
آنا أبوه شخصياً.
ابتعدنا عن بعض وهدام يگول الصبر يا ربي
راح فتحله وعمو دخل شاف الريوگ وشافي واگفه نظر لهَدام
الأشتر: تنعل ياهو؟
هَدآم: ابونا الچبير مصنع الزلم المرحوم وگاع.
الأشتر: اخلاق ماكو واحترام ماكو على الأقل لا تچذب چنك ابوك.
هَدآم: چا عليمن اطلع.
هِلال: وينه ابيلو ويگول الما يطلع على والديه لعنة الله عليه.
ثنينهم نظرولي
هِلال: اههه اههه شبيكم باشاوات.
هَدآم: حلوة هاي مال باشاوات.
الأشتر: هاي تقصدني آنا.
هَدآم: الصبر يا ربي
الأشتر: دمشي الله اليصبرني آنا.
هَدآم: عمي بس ابدل واطلع.
الأشتر: ديلا انتظرك. عبن نطلع سوا.
هَدآم: اي اطلع برا الغرفه شوف الشباب اتفقد الشغل بالغرفة وهسه ابدل اللحگك.
نظرلي ونظر لهَدام
الأشتر: ما اطلع انت روح بدل. وانتي شكو صافنه.
هَدآم: هسه شبيك امل مزاعلتك تجي علينا شني ذنبنا؟
هلال: دقيقه دقيقه. اشتور صاير شي عبن مو بالعادة تكون نفسية ويانه، تعال اگعد واحچيلي
الأشتر: هدآم بدل خل نطلع. انسي الموضوع احله آنا
فتح الكنتور ياخذ ملابسه ويحچي عود شقا مدري يتشمت بس والله ذاب ميانة قوية ويا عمو.
هَدآم: الف مره اگلك اتزوجلك وحده ثانيه للإحتياط
يعني هسه اميله راحت لبيت ياسين العار شيرجعها.؟
والله ابويا ذكي ما يحتار. وحده تزاعله والثانيه اتراضيه.
الأشتر: لا انت تريد خوش گتله مال ايام زمان.
احچي عدل آنا عمك مو ربعك الهتلية.
هَدآم: نزوجك من رباب ونغنيلك صوت ربابة يبكيني.
عمو راد يگومله وهدام راح للحمام يضحك، رحت گعدت بصفه لزمت ايده
هِلال: اشتور ليش ساكت احچيلي او انزل احاچيها بنفسي؟
الأشتر: ياهي التحاچين راحت لبيت ياسين.
هِلال: شبيها عمه امل ليش؟
الأشتر: چنت احچي ويا رباب عالموبايل وسمعتنا.
هِلال: وين المشكله كلنا نعرف انت ورباب من زمااان مثل الاخوه مثلي اني ووگاع. بعدين هي رباب اخت عمة أمل يعني مو غريبة عليش تغار منها؟
الأشتر: غير سوالف النسوان. وهسه هي رايحه لبيت ياسين گالت ما ترجع. و رباب موجوده، تنلاص وتعال يا اشتر ابتلي.
هِلال: دقيقه بشني چنتوا تحچون؟ يعني نوع الحچي.
الأشتر: گلتلها أحبچ وانتي ربربتي گلبي.
واحد نظر للثاني اعرفه ما گايل هيچ ضحكت بوجهه
هِلال: امووت يعني شلون ربربت گلبك؟ ول اميله شلون ما موتتك شلون گاعد گبالي؟
الأشتر: تعاركت وياي وتگول انيمك بصف جدنا السابع
واطيح حظ رباب وياك وانيمها بصفك وبصف جدنا السابع
آنا هنا ضحكت بوجهها على الجفصة مالتها، چنت اريد احظنها وتعدي على خير، بس هي وتسودنت بالزايد شوفي شمسويه بنحري؟
وخر ياخة الجاكيت شوفني أثر اضافرها واضحه. نظرتله عدل ياخة الجاكيت واني احاول اكتم ضحكتي. گال ويبتسم عجيب هل اشتور
الأشتر: هي تعرف آنا اموت عليها ولو تنحرني عالقِبلة ما أگللها لأ.
هِلال: هي تحبك لو ما تحبك ما تغار عليك.
الأشتر: هذاك الحيوان اخوها ياسين. ديسوي روحه خوش اخو وبنفس الوقت يزرع الشك بگلبها على اساس احنه. أنا ورباب بينا شي.
هِلال: يعني هذا شنو من بشر؟ كل يوم فلم!
السنة الماضية ورط ولده بقضية تهريب وترويج وهسه يريد يخرب بيت اخته.
الأشتر: مشكلته آنا. واختهم رباب، رباب واگفه ضده بكلشي وهو ما عنده سُلطة عليها.
هِلال: غريبة هل بنيه فعلا قوية حته سيرا حچتلي گالت
رباب باركتلي وگالت ساعدت الأشتر.
الأشتر: هو هذا اللي حارگ دمهم. رباب بطرفنا ضد اخوانها عدنان، ياسين، الحسن لو يشربون من دمها ما يرتون.
چنت راح اسأله عن ام الولد وشصار عليها بس طلع هدآم سابح ومدبل حچآ.
هَدآم: اقترح تروحلها شايل بوكية ورد رمان وتغنيلها هيلا يا رمانه الحلوه زعلانه
الأشتر: انت شعليك بينا شعليك.؟
هِلال: اي نغنيييلها واروح ويا عمي ارجعها بإيدي
هَدآم: لاا ما اقبل تروحين غاد.
هِلال: إلا اروح وياه. غاد
هَدآم: شني تكسرين حچايه زوجچ؟
الأشتر: احسن ما تكسرك كسرتين تتذكر لو ناسي
هَدآم: رحم الله گبر جدي بفضلك ما اتخطى.
الأشتر: انچب واطلع گدامي.
هِلال: صحيح والله.
هَدآم: شني صحيح هلالة لا تسودنيني عليچ. عمي انت مزاعل مرتك آنا شكو؟
الأشتر: صدگ انت شكوو؟
وگف وتن بالباب ثلاثتنا عايناله هو حچآ
وَتان: عمي الباشا يگول خل ينزلون لا أنزلهم لگبر ابو ابو ابو وگاع يقصد جدنا الأسد.
هَدآم: وهذا منين طلعلنا توني اعرفه.
الأشتر: امشي اطلع بره.
طلعوا من الغرفه وهدام يريد يغث عمو اشتور اللي ااابد ماله خلگ التحشيش دام عمة امل مو بالبيت!
اخذت هدومي ودخلت اسبح ومن كملت طلعت چانت الساعة 9، حته شركة ما رحنه بسبب التجهيزات. اجتني مكالمة شلت الموبايل شفتها السكرتيرة جاوبتها فتحت السبيكر. ووگفت اشسور شعري.
هِلال: احچي نبأ.
الو؟ مدام ما اسمعچ بس خل احچي الانسه بتراء تگول شلون يعني انتي والأستاذ أبيل ماماخذين طلب اجازة؟
طفيت الشسوار واسمع صوتها وصوت جسار بقرب السكرتيرة
هِلال: خل تولي...
نبأ مدام بس هي.
هِلال: هي بصفچ ادري لذلك خل تولي. احنه الميدان ميدانا نُطب ونطلع براحتنا.
اجاني صوتها وهي تحچي من موبايل نبأ
بتراء: من باچر مفصولة من هل ميدان خل اشوف شلون تُطبين براحتچ.
هِلال: نسيتي القعد بقاله مُدة 10 أشهر حته ينتهي؟
بتراء: أگُلچ أنتي مقتنعه بروحچ؟ هسه اللغي العقد آني رئيسة مجلس الإدارة.
هِلال: على گولتچ أعلى ما بخليچ أُركبيه. لا قرار من مجلس الإدارة ولا قرار من الوزارة يلغي العقد الوضيفي اذا الطرفين ما وقعوا. قوانين شركتنا هيچي حته يكون عندچ معلومات بمأنه انتي بعدچ بالشط وما سابحة.
قفلت الخط بوجهها، كملت شعري وأخذت صينية الريوگ وياي نزلت جوا البيت گاعد گايم وحبوبه تفتر بالبيت ويا امي وتگللها
ناهد: اطيح حظظ حفيد الهمج اطيح حظه مزاعل چنتي مزاعل المعوشره وخلاها تروح لبيت اخوها العار.
آيدا: أمولة حبابة هسه ترجع.
ناهد: الله اعلم اشتر شمسوي
عفت الصينية بالمطبخ وَدق چانت موجوده تصب الچاي للعُمال. طلعت اشوف عُمال شركة الديكورات كومة واحد يطلع واحد يُطب يدخلون الاثاث الجديد لغرفة أبيل وإيمار. رحت يمهن گاعدات بالصالة المفتوحة. امي ابتسمت من شافتني گعدت يمها
وحچيت
هِلال: اشتور ما سوا شي هي شوية غارت وتنحل.
ناهد: وهي ليش تغار بلاية سبب اكيد اشتر مسوي شي!
هِلال: چآن يحاچي رباب.
عضت اصبعها وتحچي بعصبية مكتومه
ناهد: اااخ من هل فووصه رباااب حييية وحااارية سمررره.
آيدا: حارية شنو؟
هِلال: اههه آنّييم نوع من انواع الأفعى مدري الحية المهم هاي ربابة هيچ معروفه بالعشيرة.
آيدا: ليش هي مو زينه وحية؟
هِلال: لا هي حبابه بس من چانت طفلة لحد هسه تربي الافعى اللي نوعها حارية تربيها بالبيت.
ناهد: چانت شبر وهي تلعب الحية على متونها چا اكيد من تُكبر تهجم بيوت. اطيح حظها لو تخرب بين امل واشتر.
هِلال: حبوبة شلون هيچي تحچين هي ما سوت شي
بعدين هي وعمة امل خوات بيناتهن يتفاهمن اكيد رباب هسه گاعد وياها ومحلاهن.
ناهد: خوات محلاهن چا شبيها تحاچي اشتر.
هِلال: هسه آني لو وگاع يخابرني ما اجاوبه؟
لو اني اخابر وگاع ونسولف عادي تجي رُقيه تگول علينا ها بينكم شي؟
اصلآ كُلش احب علاقتكم وخوتكم هو دوم يسولف بيچ.
هِلال: هااا أها اجت اجت رُقرق گلب اخوناا.
اجت وهي مبتسمه شعرها بلش يطول تقريبا مغطي اذنها.
وكالعاده متأنقه اجت گعدت بصفنا
رُقيه: حبوبة هُدهُد عمو اشتور حيل يحب ماما امل ومستحيل مكالمة وسلام عليكم ويا رباب يغير هاي الحقيقة!
هِلال: هاي الناس التفهم.
ناهد: اااكلي راا بنت الحاروگه ليش احنه ما نفهممم؟
هِلال: ياااا عزا بعينك أبيل هاي اني اكل راا؟
ناهد: لچ اگووملچ.
امي حظنتني وتگول
آيدا: لا عمة ما اسمح تضربيها. أيهم من يطلع يأمني عليها.
هِلال: صُدگ يُمه؟ چا هو يجي يأمني عليچ ويطلع.
ناهد: چا ليش محد يأمن فلان عليّه.
رُقيه: يبوو هدهده تغااار.
رقيه گامت راحت بصفها تحظن حبوبه ومنا وَتن. وودق اجوا
وَتان: نزوووجچ شتگووولين؟
ناهد: ول اابن الهمج ما تستحي تحچيها؟
وَدق: حبوبة ديفكر بييچ.
ناهد: چنننچ ااامل من تدافع للأشتر.
مگرود آنا مرتي ما تدافعلي.
أنوب انداريناله چآن وگاع اجا گعد بصف رُقيه وحبوبه
وگاع: شلون ما تدافعيلي گدامهم.
رُقيه: حبيبي انت محامي إذا تحتاج دفاع.
يعني انت مرتكب خطأ. لو ضام شي.
وَتان: عميقه عميييقه اااعمق من گبر جدنا السابع.
وگاع: لا عميقه ولا شي هي اسلوب المُحامة هيچي
احنه دهن ودبس ما نتعارك على اليسار واليمين.
وَدق: هءحمم نسيت شغلة.
آيدا: ليش راحت. آني ما فهمت شنو يمين يسار؟
وتن احچيلي على شنو تتعاركون؟
وَتان: إيمار يصيحني اصعدله.
هِلال: اههه ألحگها ألحگها.
امي ما فاهمه ورقيه ووگاع يتهامسون وحبوبه حچت
ناهد: يعني شوكت يكبرون مو تزوجوا؟
رُقيه: حبوبة والله اختي عاقلة بس وتن مخبلها.
وگاع: وين أكو عاقلة تعاقب أخوية وتخليه ينام عالارض
رُقيه: واخوك ليش عاجبه الوضع.
وگاع: اخويه ما عاجبه الوضع بس ساكت ومتحمل.
آيدا: هسسه فهموووني شنو يتعاركون على اليسار واليمين؟
عاينالها ووگاع سبقني بالحچي
وگاع: ذاك اليوم ساعه بالثناعش گلت اطلع احچي مكالمة وچان اسمع وَدق تعارك أخوية تگول لو تنام بالگاع لو تنام عاليسار.
آيدا: ايهم يگول نامي على يساري يعني على جهة گلبه وتن ليش غبي وما يقبل؟
حبوبة تعاين بأمي، وگاع يرفعلي حواجبه
رُقيه بس تهمس يبووو يبوو وحچت
رُقيه: يبوو احم احم. عمة اختي تقصد باليسار يعني جهة اليسار من الچرباية.
هِلال: مو أكو جهة اليمين واليسار هي تنام باليمين وتريد وتن ينام باليسار بس وتن ينام باليمين وما متعود عاليسار.
ناهد: ااايييييه دوختوووونيييي يمين يسار يمين يسار
وگاع: فوگ. تحت. فوگ. تحت.
حبوبة دچته بالعكاز وهو يضحك بوجهها. ، امي حچت
آيدا: الما متعود يتعود ليش يتحجج.
رُقيه: عفيييه النساء للنساء.
گام وگال بصوت ناصي
وگاع: اللهم اصرف عنا كيد النساء.
ناهد: ويين تولي خابر ابوووك خل يرجع چنننتي
او اشمرك ااانت وابوك برا البيت وحگ العباس ابو فاااضل
وگاع: أهاا وتصير امي وياچن علينا، وتصيحن المجد للنساء والكيد العظيم.
رُقيه: هاااي وين راايح.
ناهد: لحگتتتته. الخبلة حفيدات سُعاد صارن همج مثل احفاد الهمج مالتنا.
هِلال: اهوو حبوبة فراگ امل شسوا بيچ
آيدا: تحبها أكثر منا.
هِلال: هههه لااااا كده السوالف حلت أكثر امي هم صارت تغار.
آيدا: لا ما اغار
هِلال: بلى بلى تغااارين.
بقيت اسولف وياهن للظهر العُمال كملو شغلهم وراحو. دخلت للمطبخ البنيه اللي تشتغل بالبيت اجت اليوم طبختلنا.
صبت الغدا. وابويا رجع ويا عمو اشتر. خطية حبوبة عيونها عالباب تريد تشوف عمة أمل طابة للبيت
گعدنه كلنا نتغدى وإيمار ياكل اعاينله ايده ما رايح منه صبغ الحايط عبن ساعد العُمال اما أبيل ضل مثل المقاول والمُشرف فوگ راسهم
اشتور ياكل بدون شهيه چا شگد البيت والگعده باهتة بلاية روحه الفرحة والإيجابية اللي عنده. حبوبه حست بحزنه
عافت الخاشوكه وكلنا نظرنالها عبن طلع صوت عالي. هي حچت.
ناهد: عاين بروحك شصاير بيك بلياها.
الباشا: عوفوها تبات يوم عدهم وترجع باچر.
الأشتر: خوية تبات شنيي العصر اروحلهم انع.
سكت ما كمل كلامه
ناهد: بس اريد افهم شني تسولف وياها؟
لييش ما تعوفها شني ناوي تهجم بيتك؟
الأشتر: يُمه تتذكرين من اجيتي تخطبين صديقة مرت اخويه شچان اسمها. نازلي. بهذاك الوقت ما چآن ينهجم بيتي؟
آيدا: وچان هسه احنه سويه. صدگ ايهم شوكت تاخذني لبيتهم اريد اشوفها واشوف امي.
الباشا: الله كريم.
ناهد: حچيت حچاية ما گلت إلا اجييبهاااا
أبيل: ريلاكس هدهده اشربي ماي اشربي وخل نتفاهم.
ناهد: ااشتر المساااا ترجعلي ااامل تفهممم؟
الأشتر: والله ارجعها والله وحق جدنا السابع.
وَتان: ابصم العشره يرجعلنا نبع الحنان بعد هذا الحلفان.
وگاع: وحق جدنا السابع ابصم وياك.
وَتان: خياي زلمة و مو حجي.
أبيل: ديلا انچب شگد منافق، چنت فوگ بالغرفه تگول وگاع فضحني. وگايل نتعارك عاليمين واليسار.
إيمار: خويا انت ما قصرت فضحته مره ثانيه.
عم الصمت بينا إيمار يبقى ساكت ساكت ومن يحچي يحچي حچي طرگاعي. واحد يعاين بالثاني وتن يخوزر ودق وودق تشد ايدها عالچطل ابوية يبتسم وياكل ويسوي روحه مو يم الموضوع
بعد الغدا الشباب رجعو للطابق الثاني يشتغلون بمأنه
الأسبوع الجاي العرس. صار العصر هدآم رجع من الميناء وچنا گاعدين مسوين أجواء عصرونيه. وعمو اشتر گال يروح لبيت ياسين كلمن من مكانه گام ويگول اروح اولهم آني.
هِلال: اجي وياكم والبقيه مَعلية بيكم.
هَدآم: شگلت آنا؟
هِلال: گلت شگلت آنا.
هَدآم: ماكو روحه.
هِلال: اروح ويا اشتور مستحيل اعوفه بوحده
هَدآم: ليش رايح يحرر القُددسس؟
وَتان: آنا ومرتي نجي بسيارتنا نرجع نبع الحنان.
وگاع: نبع الحنان متبرية منك ذاك اليوم مو اخذتها للسوگ وگالت توبة اصعد وياك؟
إيمار: لا تعاينلي هيچي. ما ادري شلون عرف بالموضوع
أبيل: داهي نَسل داهي.
الباشا: اشتر گوم آنا اجي وياك ومجد يلحگنا.
وگاع: آنا السايق مالتك عمي شلون تروح بليايّ.
هِلال: وآني يابه...
سويت روحي فقيرة ولا حول ولا قوة
الباشا: آنا وهلال واشتر نروح.
هَدآم: تمام ما دام انحذف اسم ابو وگعه من القائمة روحو.
أبيل: هم زين انطاكم الموافقة.
وَتان: خوية هدآم أبيل واگفلك على حچااية وحق جدنا السابع.
هَدآم: من علامات الإنسان الفارغ.
وگاع: ديلا شبابنة الطيبة اگوم وياهم
الأشتر: دگعد دگعد شني متعاجز اسوق؟
وگاع: ها هيچي صار الحچي.
أبيل: اي هيچي اگعد وانچب.
الباشا: خل يجي ويانه.
هَدآم: الشغلة مغثة بيّه يا عمي؟
گمنا احنه الثلاثة حته نطلع ومريت بصف هدآم غمزلته
وهو يتوعدلي، وگاع هم مر بصفه هدآم مد رجله راد يعرقله بس هذا ابن الداهي عبر فوگ رجله
وگاع: حظ اغبر مو اوفر.
طلعنا احنه ونسمع أصواتهم عاليه وهمه يسولفون.
متأكدة هدآم ما يسكت ولا يخاف من كلام ابويه هسه شوية ويطلع ورانا.
صعدنا بسيارة ابو وگعه عمو اشتر وياي بالكشن الخلفي وبابا گدام. ربع ساعة مشت السيارة والوضع لوز. إلى أن وگاع عاين بالمرايا رفعلي حاجبه ورديتله نفس الحركة بمعنى شكو أشر عالجامة درت وجهي للجامة وشفت سيارة هدآم بصف سيارته بينا متر واحد.
هِلال: عزا بعينك أبيل چنت اعرف.
ابويه نظرلي وگال شكو؟
هِلال: هدآم لحگنا، يابه ليش هيچي تستفزه وتالي تگول عليه همج.
الباشا: هو روحه بخشمه.
وگام: هذا المستودن شيسوووي؟
زاد السرعة وهدام يسابق ويعبر بين باقي سيارات
يريد يوصلنا وفعلا من وصلنا قريب من بيت ياسين منطقه شبه مفتوحة. عُبر سيارته وگفها گدام سيارة وگاع واشر من الجامة. اطبگ يلا.
الأشتر: اطبگ خل ياخذ مرته ويفضنا لا تأخروني أكثر.
الباشا: اطبگ خل اشوف. تاليها
هِلال: بابا بغلاة امي عندك لا تحاچيه هو هيچي طبعه.
وگاع: نزل الأخ والله ما ادري شحچي شگول هذا متسودن رسمي.
نزل من السياره والجگاره بحلگه ولبس نظارته.
اجا بإتجاه السيارة راح على جهة ابوية دگ على الجامة وابويه نزلها. عاين بينا واحد واحد اخذ نفس من الجگاره
وشمرها من ايده. اردف.
هَدآم: عمي آنا ترباتك موش تربات الأدهم فَليش تتحداني وانت تُعرف كُلش زين أخذها من حلگ السبع خاوه؟
ابويه بقى ساكت و منتظر هدآم يكمل كلامه اكيد بعدها يفشله ونمشي. لكن هدآم وكلامه واسلوب ألهن رأي اخر.
هَدآم: انت لشوكت تضل تعاملني مثل اللغم الخايف ينفجر تحت رجليك؟ انسجنت ضُلم وبعدها طلعت براءة لكن لحد هسه موش الكفو بعينك ولا بريئ. ليش؟
وگاع: شلون حچي عميييق خلى روحه بمكان اللُغم تحت رجلين الباشا.
هَدآم: انت انچب خل اكمل.
عمي آنا كُبرت تحت إيدك ومخاويك. شايل طبعك
انت مو اخذت بدر التِم من حلوگهم خاوه؟ آنا مثلك الأحبها أخذها من حلگ السبع خاوه. يعني لو أخذها لو أخذها.
ابويه نظرله ونظرلي. بقى ساكت شويه وگال.
الباشا: هِلال أنزلي
هِلال: اروح وياه؟
الباشا: شمنتظره؟
الأشتر: روحي واحنه بظهرچ.
ابتسم بوجه ابويه واجا هدآم فتحلي الباب
اني عين عليه وعين على بابا، مد إيده ولزمته نزلت من السياره مشيت وياه لحدما رجع وگف گدام جهة ابويه. رفع ايده اللي لازمة إيدي يشوفها لأبويه ابتسم بقثة
هَدآم: ترباتك آنا أخذها من حلگ السبع خاوه.
الباشا: انطيتك هلالة من بدر التِم لو يطخون شعره من راسها ياويلك.
هَدآم: اخليها بعيوني واغمض عليها.
وگاع: كفوو اخونا الغالي، وحق جدنا السابع حچاية ترباتك آنا، شفعتلك.
ابويه ما حچآ بعد. رفع الجامه وگال امشي. راحو هُمه واحنه بقينا واگفين أيدي بإيده بجانب الطريق سيارات قليلة تُمر وماكو ناس. سحبني لصدره اطلق زفير بالراحة لأول مره بحياتي هيچي احسه مرتاح البال، خلى حنجه على راسي ويضمني أكثر وأكثر لصدره.
هَدآم: چني اليوم طالع من السجن براءة.
هِلال: لا تحچي هيچي انت بريئ ومالك ذنب من يوم يومك.
هَدآم: وحق الزهره من لحگتچ گلت لو نتراضى آنا وابوچ لو نتوادع. بعد ها هي صارت بلا ملح.
هِلال: شو احس اليوم احبك اكثر من العادة.
ضحك بهدوء وياخذ نفس من شعري ويگول أحبچ يا نفس ريتي شوية وابتعد، گال امشي، صعدنا بسيارته وطول الطريق نسولف بأسلوبه وشلون هيچي طلع الحچي من عنده
هَدآم: ما ادري والله بس حچيت الحچيته.
هِلال: لا جديات حچاية ترباتك آنا الها مكانتها
هَدآم: چا غير هوَ رباني ويعرف شمربي. شبي يخلي راسه براسي.
هِلال: ايي غيرر هذا ابويه.
بعد مرور وقت وصلنا لمنطقة بيت ياسين يم القصر مالتهم. عاينت بالحدايق الخارجية كله أشجار الياسمين الموردة. هدام أشر عليها.
هَدآم: شجرة الياسمين حچاية ازلية عند هل عائلة.
هِلال: اشو احسه يحب ام الولد من صدگ!
هَدآم: هو يحبها مو ما يحبها بس حب ما مفهوم اليحب ما يسوي مثل ما هوَ سوا.
هِلال: راح نگدر نشوفها اليوم؟
هَدآم: ما اعتقد.
هِلال: زين هي ليش رافضه تشوف احد غير عمو اشتر؟
نظرلي وما جاوبني ولا آني لحيت. الحارس فتح الباب
گدام سيارتنا ودخلنا. بيتهم چبير مثل بيتنا بس طابقين
داير ما دايره حدايق واشجار الياسمين اللي ريحتها فوااحة
وطول السنة تُزهر. سيارة وگاع چانت بالگراج واكيد نازلين.
احنه هم نزلنا واجا واحد من الحرس أخذها للگراج
مشينا للباب كأن الكل جاهز على أتم الاستعداد ما لحگنا ننتظر، المساعدات فتحولنا الباب دخلنا وهمه يرحبون بينا. نمشي بالقصر واني اوزع نظراتي على تفاصيلها. الدرج اللي يؤدي للطابق الثاني صاير بوجه باب البيت
والبيت لونه واثاثه كله اوف وايت. بكل زاوية موجود مزهرية چبيره بيها شُجيرة الياسمين زغيرة وريحتها محتلة البيت.
لو سمحتوا تفضلوا بهاي الصالة گاعدين.
أشرتلنا على الصالة ورحنا وياها، فتحت الباب ودخلنا
ياسين گاعد وجه ما يگصه سيف ورباب چانت گاعده وياهم گامت وهي مبتسمة ترحب بينا
رباب: حيالله من جانا. اهلا وسهلا
صافحت هدآم وگالت تفضلوا واجت حظنتني ابتعدت
لازمة ايدي بين ايدها انتبهت على خاتمها اللي على ديزاين حية الحارية بالكرستال الأسود. ياسين والبقيه گاعدين وهي واگفه وياي
رباب: شلونچ؟
هِلال: الحمدلله.
رباب: تفضلي. حيالله من جانا نور البيت بيكم.
الأشتر: منور بوجودچ.
ياسين يفر السبحة وما يحچي بس يعاين بيها وبينا
وابويه وعمو اشتر گاعدين بصفه وما يحچون
هَدآم: شلونچ ربابة.
رباب: مثل ما تشوف الحمد لله
وگاع: الخالة الحلوة اخر العنقود. الحارية الحبابة مالتنا شلونچ؟
رباب: اسودن والله.
هَدآم: وين السمره مالتچ؟
رباب: تريد تشوفها؟
هَدآم: لا عوفيها.
ياسين: ممكن نعرف سبب هاي الزيارة؟
رباب: شلونك خويا الباشا؟
الباشا: نصير بخير لو ما تجبرونه نحرك المياه الراكدة.
رباب: كلشي محلولة.
ياسين: رباب!
ياسين چبير خواته واخوانه بس يم رباب كلشي مُغاير
نظرتله بإبتسامة غامضة ودارت وجهها نظرتلنا
أصلا رباب ماخذه انتباه الكل. جابو الضيافه وهي گامت
رباب: البيت بيتكم اخذو راحتكم ضيوف غاليين ولد العمام. آنا اروح شوف أمل.
ما ادري ليش تذكرت سيرا طرگاعه وقوة شخصيتها اتجاه ولد عمامها حسيت ماخذا هذا الطبع مُتوارث من رباب
هي رادت تروح وآني گمت وياها.
هِلال: عادي اجي وياچ؟
رباب: اي تعاي...
مشيت وياها طلعنا من الصالة اعاين بيها هي أصغر وحده من بين خواتها واخوانها الأربعه. اعاين بأناقتها بشخصيتها
الطاغية بنيه عزباء بعُمر ال 30 شايلة شخصية طرگاعه
بملامح حادة ب بشرة خمرية وعيون واسعه لونهن اصفر لا صدگ عيني بارده عليها. اندارتلي مبتسمه وحچت
رباب: نور البيت.
هِلال: اصلا البيت منور بيچ لو ما وجودچ محد يگابل ياسين.
رباب: ههه حبيبيتي ما عليكم منه هذا بيتي مثل ما هو بيته وضيوفي يخليهم على راسه ان يعجبه او لا. تجين وياي؟
هِلال: وين تروحين وصدك وين عمة امل؟
رباب: نروحلها. وها ترا عشاكم علينا ماكو روحه.
هِلال: ترا ابوية وعمي بقُدرة القادر گاعدين ناخذ عمة امل ونمشي
مشيت وياها طلعنا من البلكونه للحديقه الخلفية
الوقت مُغربية شويه تمشي وشويه تندارلي. وتاحچيني
رباب: شني بس تاخذون امل اصلا ما اقبل
آنا احاچي أشتر ويضل.
وصلنا يم مكان الگعده عمة امل گاعدة عالكرسي وتكرز حب شمس ما منتبهه علينا.
هِلال: اشش خل اخليها تفز
مشيت بهدوء وصلت وراها ورباب حچت وهي تبتسم
رباب: امل الحبايب اجوچ
هِلال: هاااي ليششش.
عمة امل نظرتلي ورباب اجت گعدت بصفها حچت
رباب: ما اقبل تفززين أملي.
أمل: الله رباب تحچي لو سمره.
رباب: افاااه يا اختاه، شايفه هلالة من الصُبح تگلي چنچ سمره تلتفين حولي حته ما اعصب.
أمل: اي انتي حيه.
گعدت وياهن ورباب تحظن امل وتبوس خدودها وتمسح أثر الحُمره بقت محاوطة اختها وهي تحچي
رباب: يعني ابنچ صار بطولچ ما شاء الله وتزوج وان شاء الله قريبا نفرح بخلفتهم وانتي بعدچ تغارين من الحب الاخوي اللي بيني وبين اشتر؟
أمل: وخري مني ما اغار.
رباب: حجية شني ما تغارين چآ هاي مني جايتني زعلانة؟
أمل: اجيت لبيت ابويه. و انچبي اني مو حجية لا تكبريني عشرين سنه.
هِلال: والله چنكم أريم وسيرا.
رباب: هذني اموت عليهن خو هاي سيرا طرگاعه احسها تشبهني بالطبع ما تبيع ولا تنطي بولد عمامها تطبق مقولة الدم يفزع للدم
عمة امل وخرت إيد رباب وگالت
أمل: سمره عوفيني.
رباب: اجيب سمره! اجيبها واخليها على متونچ والله!؟
أمل: هو انتي چنچ سمره على متوني. روحي اگعدي وكرزي حب شمس ويا اشتر.
هِلال: عمةةة شبيچ والله عمو اشتر من الصُبح ما شايفين ابتسامته ناصب چادر ومعزي كل أجواء البيت.
أمل: لچچ سمعته يگلهااا فدواتچ ربربة.
رباب: اي فدواتني شكو بيهاا اختچ آنا قبل لا يجون شني حچيت؟
اخذت من الحب شمس وتكرز ما جاوبت رباب عافتها وطبت جوا. رحت گعدت بصفها وخرت كاسة الحب شمس. لزمت ايدها
هِلال: معقولة تشكين بأختچ؟
أمل: ما اشك بيها ماا أشك بس هي تذب ميانة مبالغة وياه
صبح ومسا تختبره مدري هو يخابرها الله وعلم.
هِلال: يعني ترا احنه كلنا نعرف اشتور يموت بيچ والصبح حچيت وياه گال لو هي تذبحني عالقِبلة ما أگول لا.
أمل: آني لو ذابحته ما چآن هيچي قهرني. خل يولي
هِلال: يبوو اموله هذا اشتور شلون يولي هذا ابو الدواهي اشلون يولي.
أمل: ما ادري خل يولي وما ارجع وياه ابقى يوم يومين خل يُعرف قيمتي.
هِلال: لاااا لااالا عليچ الله لخاطر جدنا السابع هي من الصبح ما متحملين الوضع انوب يومين ما نگدر نتدمر اذا اشتور ما ينسمع صوته وسوالفه بالبيت وخاصه سوالفكم سوية. أمولة امييلة معوشرة الأشتر حبابة ارجعي ويانه.
أمل: ما ارجع خل ينقهر بعد.
يُمه عفتي جهالچ بإيد ااابو ضاالم لييش لييش؟
اندارينا شفنا رباب جابتهم واجت بس ياسين ما جاي.
وگاع اجا باس راسها وراح گعد، عمو اشتر يمشي وعيونه عليها گمت انطيته مجال گعد بمكاني واحنه التمينا على باقي الكراسي الموجودة.
البنات نقلو الضيافه للحديقه ورباب تأشرف على كلشيعمة امل تنظرله بطرف عينه وهو بصفها، اندار بكامل جسمه يعاين بيها
الأشتر: ام بيتي وأم جهالي شيخة النسوان خاتونة على الخاتونات أنتي. لا تكبرين الموضوع وارجعي لبيتچ.
وگاع: من الصبح داخلين حالة إنذار هدهده ما خلت حچاية ما حچته على أبويه. وگالت رباب هجامة بيوت.
هِلال: اههه اههه يتشااااقة. تتشاقة موو.
وگاع: والله ناهد گالت التربي حارية وتلعبها على متونها تهجم بيوت.
الباشا: انچب.
هَدآم: انچب.
رباب: والله ما ازعل منها
وگاع: حبابة انتي الخالة الحارية.
أمل: وگاع احچي عدل عن خالتك!
وگاع: يمه هي غير تهجم بيتچ يا خالتك. خالتي الحارية السمراء.
يحچي ويغمز عود شقا خل نشوف رد فعلها هي تعاين بينا
وعمو اشتر يعاين بيها اشو احسه يستحي گدامنا ما ادري شلون بس عيونه مليانة حچي وما يحچي. أما رباب تضيفنا حچت
رباب: عشاكم علينا وما تروحون إلا بعدما نتعلل
الباشا: لا خويه ناخذ مرت اخونا ونروح.
رباب: لا شلون. والله من زمان حابة نلتم تتذكرون الطفولة؟
الباشا: من اشوف سيرا شلون تركض وتفزع لولد عمامها اتذكرچ.
هِلال: ياا واني مثلك احس سيرا طرگاعه متوارثه طبعها.
وگاع: الخالة الحارية الحبابه كملي القصة بلكت الله.
رباب: چآن بيتنا بالريف بيت شرقي چبير وخواتي. امل و. آمال و. دلال يطلعن للبُستان يساعدن امي وابويه. ومنا اشتر وادهم والباشا يطلعون يروحون للگيعان مال عمو الباشا الله يرحمه
وگاع: الله وين انتي بالقصه.
رباب: امل ابنچ عليمن طالع هلگد غثيث ما يعوفني اكمل
أمل: طالع على ابوه.
رباب: ههه اي وين چنت.
الأشتر: انتي بالبيت واحنه بگيعان ابونا الله يرحمه.
بعدما نخلص زرع نروح للشط نتوضى ونصلي العصر والخاتونات يلمتن غاد.
رباب: خل نعبر ونحچي المفيد
بيوم من الايام أمل خلت العباية على راسها وغطت وجهها وهي طالعه من البيت بنص الظهر وبعز الصيييف بعز الصيف لحگتها چانت تمشي بين الگيعان وخايفه بيت عمو عبدالمحسن يشوفوها لحگتها لحدما وصلت للشط.
وگاع: دقيقة وهنا چانت تروح تتوضى بماي الشط وتصلي العصر غاد؟
هَدآم: لا تتغابى چانت تروح تگابل ابوك
وگاع: استغبي يا غبي.
هَدآم: الزم لسانك.
هِلال: اگوول ليش ما نعوفهم يگعدون بوحدهم؟
رباب: ايي أتفق. خويا أيهم حابة احچي بموضوع وياك.
الباشا: اي خويا امشي.
هي أخذت ابويه واني خليت الشباب يگومون وياي ابتعدنا عنهم نفتر بالحديقه وچنت بيناتهم هدآم سحبني على ايده اليسار عبن ابو وگعه على ايده اليمين بصفي
وگاع: انتوا ما مختنگين من هل ريحة حيل قوية؟
هِلال: لا اصلا حبيتها بس نرجع احنه هم تزرع هذا النوع من الياسمين.
هَدآم: أگول ولد الحسن وعدنان عايشين وياهم صحيح؟
وگاع: اي والناس تگول عليهم اخوة مو بس ولد عم. لكن علاقتهم ببيت خالي سالم مو تمام.
هَدآم: وانت علاقتك بولد القاضي تمام التمام!
وگاع: وحق جدنا السابع تجمعنا المصالح.
هِلال: سؤال وينها رحمة بنت ياسين؟
وگاع: ماادري انتي اسألي رباب واسأليها عن ام الولد.
هِلال: والله صحيح بس خاف تفشلني وما تجاوبني.
وگفنا لمن هدآم وگف يعاين فوگ على شباچ غرفة بسرعه شخص ابتعد من يم البرده وهدام حچآ.
هَدآم: عوفوها للوقت المناسب كلشي ينعرف.
هِلال: أكو شخص بالغرفة.
وگاع: يمكن البنيه.
هِلال: هدآم انت تعرف شي احنه ما نعرفه؟
ما جاوب ومشى اني وابو وگعة نعاين ببعض ولحگناه
هِلال: شني يعني شوكت هذا الوقت المناسب يجي وكلشي ينعرف؟
هَدآم: بسنة الما تزهر بيها الياسمين.
وگاع: الله عميقه بس هذا النوع يزهر بعز الصيف والشتا.
هِلال: دخلتني بالحيط والله.
هَدآم: ادخلچ بحيط صدري.
سحبني لحظنه ووگاع اسرع خطواته راح من يمنا
هِلال: عيب منا الكاميرات.
هَدآم: هسه تلگين ياسين البومة مگابل الكاميرات ويعض اصبعه شلون احنه احتلينا البيت وماخذين راحتنا
رجع وگاع وقاطع غصن من شجرة الياسمين بإيده وكلها ورود يلوح بيها
وگاع: نمونه اذا رُقرق حبته نزرع منها.
هَدآم: طاح حظك
هِلال: أگول نرجع طوفنا البيت كله ما بقينا شبر.
رجعنا لمكان الگعده شفناهم يسولفون والأجواء لوز
عمة امل تضحك وتسولف اكيد راضاها وبابا هم رجع ويا رباب وهي تگول
رباب: والله ما يصير ابقو للعشا.
الأشتر: خويه ما نگدر والله البيت گايم گاعد وامي متحلفة لو ارجعها لو ننطرد آنا وجهالي من البيت.
هَدآم: جهالك يروحولك فدوى
وگاع: وجهال اخوانك عالواهس يروحلك فدوى يابه.
گامت عمة أمل وتحاظنت ويا رباب. اللي تبتسم ورجعت حظنت اختها
رباب: حبيبتي انتي.
أمل: خوما زعلانة؟
رباب: علييش ازعل منچ انتي اختي وامي
اعرف اخابره هوايا بس احنه بينا شغل شغل سواء لمن تواصلنا علمود خطوبة البنات او علمود غير أمور. واحنه أكثر من هيچي ماكو ولا يصير بعدين اشتر بگد أخوية شايب ما يناسبني.
الأشتر: شفتي شلون.
أمل: اي ليش ما عاجبك الحچي انت شايب وبس اني باقية وياك علمود الجهال.
وگاع: اگوم من صدگ أبچي شني جهال وجهال.
هَدآم: شيب راسه وهو بعده مزعط بعيون اهله.
رباب: كلنا هيچي بعيون أهلها.
تحاظنن مره ثانيه وهل مره ردينا للبيت عود نطلع
دخلو الشباب ثلاثتهم. ابن عدنان ابنه الچبير لياسين وابنه الأصغر ابنه الچبير ستايل ستايل على سَند بزنس بإيده قلم يفرها بين أصابع ايده بمهارة عالية وملامحه غامضة لا معصب ولا مبتسم
والثاني اخوه الأصغر مبين ستايله مثله بس طبعه شقاوچي ويگول لأبن عمه
وضلع الزهره احتراما للمكان ما ضربته بوكس يوگع سنونه...
وگفو بمكانهم من شافونا ابن ياسين انطا الجنطة العملية للمساعده وخلى القلم ويا إيد وحده بجيبه. تقدم بإتجاهنا ومنا ياسين طلع من الصالة من شاف ابوه ابتسم بغموض مدري يتشمت بأبوه والله افتر عقلي. اجا صافح عمو وبابا واجا على هدآم يريد يصافح هدآم كذلك صافحه وگال
هَدآم: صافحتك عبن من الرجولة ما نرد اليمد إيده للزلم.
او غير هذا الكلام ما ناسي عمايلك.
ولا آنا أنسى اخويه شصار بيه من وراك. دامك انت تحت سگف بيتي تبقى معزز مكرم.
عاف إيده واجا وگف يم وگاع إيده للمصافحة تصافحوا
وابن عدنان واگف بصف اخوه الأصغر، فقط نظرللهم نظرة وحده بطرف عينه ثنينهم اجوا يرحبون بينا. چا شگد علاقتهم قوية ويمشون على كلمته. ياسين نظرللهم بنظرة تَوعد والابن الأكبر ما اهتم بالعكس
ابقو للعشا ليش ترحون؟
الباشا: الأحسن نروح. ما تقصرون.
انطانا مجال مرجع ايده ورا ظهره يحچي بكل رزانة
يا هلا بيكم.
ابويه طلع ويا وگاع وهدام. ابن ياسين گال لعمو اشتر يحچون على انفراد راحو غاد يحچون والشباب البقية ثنينهم راحو للصالة واحد يگول للثاني انت چآن افكر تسلم قبل لا يخوزرنا. رباب لزمت إيد امل ويحچن شوي واجا عمو گال امشن وفرد مره گال
الأشتر: لازم تجين للعرس ننتظرچ.
رباب: ان شاء الله.
أمل: انتظرچ ترا لا تتحججين.
اتفقت انه تجي وطول الوقت ابن ياسين ما عافنا بقى ويانه
وطلع للباب ورانا. أشر للحُراس گللهم افتحولهم البواب.
طلعنا من البيت وآني طول الطريق اسولف عنهم وهدام يتأفأف
هِلال: هذا الشفته مو نفسه ذاك النار خو حسيته عناد بياسين هيچي عاملنا.
هَدآم: كافي تحچين بيهم.
هِلال: بس والله احترمنا عبالي يعبر وما يسلم. تمام ريلاكس ما احچي.
رجعنا للبيت بوقت العشا وحبوبة فرحانه برجعة عمة امل.
لو وَتان ما تگول رجال وكبر گعد مگابلها ويبوس ايديها
يشاقيها وودق وياهم. بعد هل أجواء العائلية صارت الساعة بال9 هدآم اجاه اتصال من عزام وبعد طلع من البيت
و آني عفتهم وصعدت لغرفتي فتحت الدُرج طلعت الخرزات جبتهن وجبت بكيج مال مستلزمات الخياطة وبيها بكرة اللاستيك گعدت عالفراش متربعه اسوي بيها شويه واندگ الباب گلتله فوت عبالي هدآم. دخل للغرفه رفعت راسي شفته بابا.
هِلال: هذا انت بابا تفضل فوت. دقيقه اشيل هذني
لملمت البكيج واخلي بيها المطشر عالچربايه أبوي شاف اسوارة امي وگعد گال جيبيها. ما خلاني اشيلهن انطيته
واخذ يخلي بيهن الخرز، بقيت اراقبه اعرف جاي يحچي وياي بقى مدنگ يخلي الخرزات بلاستيك وحچا وياي
الباشا: شني حچيتو لمن نزلتي ورحتي ويا هدآم.
انطيته خرزاية وگلت
هِلال: هدآم گال چني اليوم طالع من السجن براءة.
الباشا: هو اعرفه بريئ.
هِلال: چا ليش هيچي تتعامل وياه؟ بالماضي وهسه؟
الباشا: چنت ما مستعد اخسرچ بسبب شخص متهور.
هِلال: بس هو ما تهور هو هدفه يحميني. وتالي كلشي چآن خطة من جسار وگع اخوه بيه.
بقى يخلي الخرز باللاستيكة ويرتبها، اردف
الباشا: گتلچ ما ردت اخسرچ خاصة بوگتها امچ ماكو واخوانچ بإزمير.
هِلال: بابا.
رفع راسه نظرلي تقربت حظنته بكل قوتي.
هِلال: ما تدري شگد فرحانه انتهى الخصام بينك وبين هدآم بابا هو فرحان فرحان وضل يگول اليوم طلع براءة.
الباشا: چا خليه يكون حذِر اذا زعلچ يَلگاني بوجه.
هِلال: والله ما يزعلني وأصلا يحبني مثل ما انت تحبني وأكثر.
الباشا: انچبي. مستحيل يحبچ أكثر مني.
هِلال: ياابه كلمة انچبي صارت مررهم بفضل اامي.
ضحك ويگول جيبي ايدچ انطيته معصم إيدي وشد الاسوار عليها. شدها بإحكام وگطع الزايد ومن قربها من شفته باسها ما گدرت ألزم دموعي حظنته واگول
هِلال: صدگني بأقرب وقت امي راح تتذكرنا وتتذكر كلشي يخصنا.
بقى گاعد وياي لحدما صار وگت ادويه امي، عافني وگال يروح بنفسه ينطيها. اخذت نفس عميق وزفرته ادعي من گلبي كلشي يكون بخير وامي تتحسن.
سيرا
صار الصُبح بعد ليلة طويلة من السهر واحنه نجهز جُنطنا
حته نرجع للبصرة. وهل مره نرجع رجعه ابديه كُلنا حته ماما يقين تجي للقصر ويانه، ونرجع عائلة وحده مترابطة
بس قبلهااا نقضي چم يوم ببيت المزرعه عود يعني نرجع للبيت واحنه عروسات. أريم خلت ايدها على خدها وحچت
أريم: راح نرجع للبصره ونرجع لبيتنا وهل مره احنه تحت لقب خاتونات ولد الباشا. عااا يبوو فراااشااات هوواااايش ببطني.
سيرا: تدرين راح اشتاق للنجف وللعتبة العلوية
أريم: ونزورها كل فترة واحنه خاتونات ولد الباشا االله والله مال اكتب قصتي.
شمرت عليها الشال
سيرا: استقري وين تكتبيها استقري.
أريم: اكتبها بالواتباد وين اكتبها يعني. الله ونسميها ولد الباشا.
گعدت وگابلتها
سيرا: تحچين صدگ انتي مستوعبة؟
أريم: والله مستوعبة قابل احنه اول بشر راح نكتب قصتنا. شني بعدچ ما قريتي الروايات إلى انيطتچ ياهن؟ تاروت وأجرام مُستباح ومصير دآمس؟
سيرا: اصلا ما نزلت التطبيق هذا اللي عليه دبليو.
أريم: سيروو تحچين صدگ حته اسمه ما تعرفيييية؟
سيرا: لچ بابا انتي شگد عندچ واهس. باچر عُگبة عندچ
دوام جامعة خل الواتباد ينفعچ.
اخذت الجنطة برا وهي تگول ولي منا شيفهمچ بالواتباد.
رجعت للغرفة وهي بعدها صافنه.
سيرا: أريممم ترا ابويه ينتظررر براا انزلي عاااد.
يا ربي دخيييلك.
أريم: نُكتبب قصتنا.
سيرا: گوومي.
أريم: ونخلي عزوزة تنظم وهلال والبقيه كلهن.
سيرا: اااني ستريكات چنت اسوي وعزوزة ترعد عليّه انوب مصايبنا تصير قصه الناس تقراها؟
أريم: والله انتي غبية ما تفهمين عليّه.
سيرا: اخابر أبيل اگله أريم تسودنت تعال ألحگ
أريم: ديلا انچبي خل نطلع، دقيقه اخذ نظرة وداع عالغرفه چانت خوش غرفة.
اخذت وحده من الجنط وطلعت اذا ابقى شوية ثانيه اتسودن نزلت هي من وراي والكل منتظرنا يم السيارة. سيارة ابويه يصعدن ماماتي والسياره الثانيه فاضل عود ياخذنا. واحنه نريد نصعد الشباب فتحوا الباب دخل إيمار بسيارة جديدة
وهلال گاعده گدام، نزل واجا ويا اخته سلومو وصافح ابويه. نظرلي وگال شلونچ گتله الحمد الله.
هِلال: اجينا ناخذ العروسات شخصياً.
أريم: انقذتي الوضع والله. چا وينه؟
إيمار: مسافر على إزمير. فاضل خويا جيب الجنط على سيارتي.
فاضل جاب الجنط على سيارة إيمار وأريم اتعكر مزاجها يبدو ما حاچيين وما گايل مسافر. سيارة ابويا مشو قبلنا واحنه الكل صعد بقيت اني چنت راح اصعد بس شفت فاضل يعاينلي.
سيرا: إيمار اروح اودعه واجي...
إيمار: ياهو؟
سيرا: فاضل.
إيمار: جاي ورانا للبصره شمعنى تودعيه بعدين شكو تودعيه؟
سيرا: اي صحيح شكو اودعه چا اگله على شغلة واجي بسرعه.
إيمار: سيرا!
نزلت من السياره، رحتله وگفت گدامه وهو يتجاهل النظر لعيوني
سيرا: فاضل. ممكن احچي شي؟
فاضل: تفضلي آنسه.
سيرا: شني آنسه ما آنسه وهل رسميات. فاضل. خل نصير أصدقاء وأخوه مثلا اني ووتن هيچي بمأنه هم تجي للبصره على البيت الچبير.
نظرلي مبتسم ابتعد خطوة واحدة، گال
فاضل: اجي للبصره أشتغل لنهاية السنة ببيتكم وبعدها اترك.
إيمار دگ هورن مرتين واني اشرتله اصبر.
سيرا: شوف اني وانت كلش زين افتهمنا على بعض. ودا أگول نصير اخوه واصدقاء
رجع ايديه ثنينهن ورا ظهره يبتسم بصمود امامي شويه دنگ راسه وبعدها نظرلي اردف بالحرف الواحد.
فاضل: سيرا خاتون. الصداقة يتحول للحب
بس الحب ما يتحول للصداقة.
عجزت انطق كلمة بعدما حچآ هيچي، إيمار رجع دگ هورن مره ثانيه واني اعاين بفاضل عيونه ونظراته طافيه بلعت ريگ اريد احچي هو أشر على سيارة. إيمار
فاضل: تفضلي.
رجع دگ هورن وهل مره نظرتله وگلت بصوت عالي
سيرا: داااا اااگووول ااااصببررررر...
نظرت لفاضل اريد احچي اي شي ما أريده ينكسر گلبه بسببي ويشيل بگلبه، لكن عافني وراح للباب ومنا إيمار يدوس بانزين حرك السيارة بإتجاهي انداريتله وتصنمت بمكاني بدون خوف، داس بريك قوي وما طخني باقي مسافة شبر واحد بيني وبين السيارة. اردف بصوت مليان غضب مكتوم
إيمار: اصعدي!
ضربت دفره عالتاير من المغثة وصعدت.
سيرا: دا ااگول ااصبرر شبيييك ددگ ددگ هوورن تدگ.
ما جاوبني عدل الشفقة على شعره وحرك السيارة فاضل فتح الباب وإيمار شخطها ما وگف منا لحد السيطره الحدودية بين المحافظات. لا هو حچآ ولا البقيه حچوا اربعتنه ساكتين. وصلنا لبيت المزرعة ودخل بالسياره
يخوزرني من الجامه، هلال حچت
هِلال: شبيكم عاد شصار.
سيرا: اسألي اخوچ المُبالغ.
إيمار: شهل اكلان ال وياه؟
سيرا: شعليييك؟
هِلال: سيرا شني شعليه.
بقى يخوزرني وما رد على كلمة شعليك رغم هلال حذرتني انه عود جفصت. نزلت من السياره اول وحده وأريم ويا هلال ورايه دخلت للبيت امي وابويه واصلين قبلنا وعمو اشتر طلع من الصالة من شافني فرد ذراعه يرحب بيّه بحظنه رحتله بخطوات سريعه من الموقف الصار واشتياقي اله حظنته وأبچي وهو يضمني لگلبه أكثر
الأشتر: طرگاعتي ياهو المزاعلچ خل اطيح حظه.
سيرا: محد بس اشتاقيتلك وفرحانة ألتمينا كلنا.
الأشتر: لاا انتي مزاعلچ شخص احچي واطيح حظه.
ابعدت امسح عيوني وإيمار دخل للبيت يخوزرني وراح
للصالة سمعته يگول لأهلي البيت بيتكم واخذو راحتكم
هلال وأريم هم طبوا للصالة. بقيت اني واگفه يم اشتور
لحدما هو طلع اني كبيت الأول والتالي گتله شصار وما صار. إيمار مر بصفنا، يريد يطلع اشتور وگفه بحچايتين
الأشتر: وين تولي.
اندار ويگلب عيونه خوزرني وگال.
إيمار: هاا اشتكيتي عليّه؟
وگفت بصف اشتور تشبثت بذراعه وحچيت اخر نقطة بالحديث واللي ترددت وهسه حچيت
سيرا: وگال شهل اكلان ال وياه. عود اني اكل را ويا فاضل
إيمار: عمي لا تصدگها هاي تحرگ بدمي وتذب الصوچ بيّه.
الأشتر: انت شايف اكلان الشلون راح يصير؟
إيمار: گول يا الله عمي شني تمشي بكلام النسوان.
الأشتر: تعال تعااال تاج راسك نسوانا. عليمن گلت شهل اكلان ال والبنية بچت من وراك؟
إيمار: اااي هي ليييش تااكل نعل وياااه؟
أنوب گالت شعليك وصيحت!
سيرا: اشتوررر ديگوول ماكلة نعل، دطييح حظظة.
إيمار: استحي شوية يطيح حظ من؟ وعيب هل حچي!
سيرا: انوب صرت مااا استحي؟
إيمار: سيراااا عدلي اللفاضچ وياي!
سيرا: ما گلت شي غلط انت السبيت وإذاا ما عاجبك طلگنييي.
إيمار: لااا انتي ناوووية اتسودن علييييچ.
البقية طلعوا من الصاله كلمن يگول شبيكم شصاير
ندى: سيرا شبيج نصي صوتچ!
يَقين: يعني والله مو مال تتعاركون شني أعداء لو شني.
أدهم احچي وياهم.
الأدهم: اشتر ينجاز هو يحلها.
الأشتر: خلاف بسيط وهسه إيمار يعتذر.
ابويه رجع للصالة والبقيه يعاينن بينا إيمار گال
إيمار: اعتذار واحد ما اعتذر.
الأشتر: اي هو انت تعتذر منها مرتين الأول على حچايه اكلان الوالثانيه على حچاية اكلان النعل. يلا
إيمار: چا هي علّت صوتها عادي وتگلك طيح حظة عادي وتگول طلگ عادي!
الأشتر: الإعتذار من شيم الرجال. النسوان كيدهن عظيم اعتذر منها وتنحل المشكله.
إيمار: عمي هي اذا تعتذر آنا اعتذر.
سيرا: اشتور آني ما اعتذر هو طلعني من طوري.
إيمار: واانتي طلعتييني من الإسلام ومن جلدي
وبعدها تحچيي.
الأشتر: إيمار تعتذر لو لا؟
نزع الشفقة ولبسها عدل يطگ رگبته وگال
إيمار: آنا آسف.
الأشتر: على شني؟
إيمار: آسف عبن گتلچ شهل اكلان الوياه.
الأشتر: والثاني على شني؟
إيمار: بويه الثانيه اسف على اكلان النعل الصوچ صوچي.
گال هيج وطلع.
سيرا: دقيقه. عمو لا تخليه يروح هذا يلمح عود ندمان عبن نتزوووج.
هِلال: إيمااارري. طاح حظج سيرا طرگاعه زعلتييي
عافتنا وراحت ورا اخوها.
أريم: اروح اطيح حظ أبيل شلون مسافر وما يحچيلي
أنوب هي هم طلعت فوگ تخابره، نظرت لأشتور عود شفت شصار وهو النرجسي خلى روحه الضحية.
الأشتر: الصوچ صوچي ما متت بذيچ الطلقة وارتاحيت من مصايبكم.
أنوب اشتور اخذ موقف مني ودخل للصالة، بس لحگته.
سيرا: اااشتوووووري الورد. عليمن تااخذ موقف.
گعدت بصفه احاول أراضيه واسحبه لطرفي، امي وماما يقين طبخوا للغدا، تغدينا وإيمار ما رجع للمسا بعد العشا
اندگ الجرس ورحت فتحت الباب بقيت واگفه ودق شمرت روحها بحظني لحدما اجتني لحظة إدراك وبادرتها وَتن وإيمار دخلو
وَدق: لچ سيراااا مشتااقة الچ هوااايا.
سيرا: يااي واني أكثر
وَتان: شهل تسلييك.
ابتعدت ودق وهي تگول شبيچ. صافحت وتن مثل ما متعودين على بعض بطريقتنا وإيمار يوزع نظراته بينا
إيمار: خلصتوا؟
وَتان: انتوا متعاركين ياهو شگ الفانيلة ياهو شد شعر ياهو، لا تگولون راحت عليّه المعركه الطاحنة؟
اجت أريم وهي ترحب بيهم
أريم: ولك هلااا وتووووني راحت علييك راااحت شلون عركة لفضييية طاحنه.
طبينا للصالة گاعدين نسولف وكل شويه اني وإيمار نعاين لبعضنا ونخوزر. انوب گام وگال ل وَتن ألحگني. طلعو ما ادري وين بس بالبيت يا اما بالسطح يا اما بغرفة البليارد. بقيت اسولف ويا ودق بالهمس واحچيلها الصار وهي تگلي
وَدق: لچ هذا شلون ما طيح حظچ وانتي هيچي مسويه بي.
سيرا: بس خليته يعتذر ما سويت شي.
وَدق: هنا البروبلم، إيمار صار يعتذر!
سيرا: جبرته يعتذر هو رافع خشمه بس مو عليّه.
وَدق: وشنو فائدة الإعتذار اذا چآن غصب؟
سيرا: ديري وجهج ولا تلعبين بأفكاري الاعتذار اعتذار شلون ما چآن
وَدق: لا والله أكو فرق بين الاعتذار بالإكراه والإعتذر بالحب.
سيرا: أگُلچ مو چنچ تقمصتي الحياة الزوجية بسرعة البرق.
وَدق: شبييج والله انتي ثووله.
سيرا: ووود.
نَدى: بنات نصن صواتچن.
وَدق: اعتذر خاله. انچبي يلا هاي ترزلنا.
سيرا: انتي انچبي اني ما غلطت.
دارت وجهها تقرا رسالة وصلتها ونظرتلي
وَدق: گومي.
سيرا: وين؟
وَدق: اول مره اجي هنا واني من الصبح واصله اكيد تعرفين كل زاوية بالبيت اخذيني فره بالبيت.
سيرا: دگعدي مالي خلگ.
گامت وجرتني وياها تگول الا تگومين وياي
أريم: وين تروحن اجي وياچن.
وَدق: نروح للحمام هي تدليني. انتي هم تجين؟
أريم: چآ ولن ما اجي.
تجرني وياها. وتگول بهمس الطابق الثاني ثالث غرفة
سيرا: شني الطابق الثاني ثالث غرفة اگعدي هااي غرفة البليارد.
وَدق: هاااا طبيتيلها.
سيرا: لا من الباب شفتها تخص إيمار ما طبيتلها.
اخذتني يم الغرفة البيها بليارد. طلع وَتن
وَتان: طيحو حظ بعض شكگو شما تشگگون
سيرا: طيح الله حظك شهل حچيي مااا ادخل.
وَدق دفعت بظهري ووتن سحبني من إيدي طببوني للغرفه
وقفلوا الباب علينا، الغرفه عمتة ما اشوف شي بيها اتعثرت بطاولة البليارد تلامست الطابات وگلت اندر وراي الباب
لكن انظربت بجسم اظخم مني صرت مُحاطة بذراعه.
انفاسه قريبه مني گلبي يريد يطلع من صدري هلگد يدگ بسرعة. انكتم صوتي اطرفي ما احس بيهن حته تفكير مَجاي اگدر افكر، شلون هيچي مقيدني بين ايده شلون باسني شلون آني متصنمه بمكاني.
طبگ جبينه على جبيني وفجأه الاضويه الخافتة أشتغلت
عيونه بعيوني اردف
تدرين اكلان شلون؟
يعني شلون ليش اگدر انطق واجاوبه بقيت صافنه بعيونه
وهو شفته قريبة مني ويحچي.
اكلان ال من تشعلين اابو ابو ابو وگاع بگبره. آنا مال اغار وانذبح من وراچ انتي وكيدچ النعل؟!
سيرا: ش وف.
اااشش انعل ابو اليشوف. والمايشوفن بعد.
عانقت رقبته بقوة وهو حاظني يشد ايده أكثر وأكثر
صار يبوسني بوسات طويله من يم اذني ومحتار شلون يبرد گلبه
شلون اطفي نار المغثة الغثيتيني بيها؟ تخليني آنا اعتذر؟
سيرا: تعود انت التعتذر بكل مره واذا ترفض اروح اشتكي يم اشتور، ول اااي شبييك.
شد شعري ونظرتله. وگعت الشفقه من راسه وخليت أيدي بشعره اجيت أشده تذكرت شگد يحبه عبن مثل شعر امه. بقى ينظرلي وگال
ها شعجب صفنتي.
سيرا: انت مو حرمت عليّه كلشي يخص امك.
نزلني للگاع وبقى مقربني منه ونسولف
شلون يعني ما اتذكر شني حرمت عليچ؟
سيرا: لمن اجيت لغرفتك ونظرتلي ذيچ النظرة كأن دخلت أرض مُحرمة وأكثر من مره تگول اي شي يخص امي محد يطخه.
بس آنا ما حرمتچ مني.
سيرا: بس شعرك حلو ويشبه شعر ماما آيدا.
يوجد تطورات ماما ومدري ايش دِتعلميلچ حچايتين تركي.
سيرا: اي صارت عندي ثلاث امهات بالمجموعة ماما ندى وماما يقين وماما آيدا.
ابتسم بقى يداعب وجهي تالي رجع خلى جبينه على جبيني.
شسويتي بيّه؟
سيرا: ما سويت شي. حته شعرك ما شديته
شني انتي فاهية لو غبية لو شني؟ اگللها شسويتي بيّه تگول ما سويت شي. شني ناوية تطيحين حظي؟
سيرا: محد يطيح نفسه آني حظك العظيم.
اي وبعد بعد؟
سيرا: والقرار الصائب بحياتك والاختيار الأمثل واا
واا طرگاعه على راسك يا إيمار.
سيرا: واحنه الخاتونات تاج راسك.
لا تخليني ااااتسودن علييچ.
بقينه شويه نتعارك وشويه نتغاازل انوب ضوا الغرفه
وگال
تعرفين تلعبين بليارد؟
سيرا: سهلة زلاطه. انطيني الطوبه والعصايه
بليارد موش لعبة كريكت.
جاب المثلث رتب الطابات وخلى واحد بمكان معين برم رأس العصاية وگال تعاي. رحت بين ايده حاوطني وكلش قريب عليّه اخذ نفس من شعري وگال احم. لزم إيدي وخلاها بمنتصف العصاية اللي هو لازمها بإيده الثانيه
سيرا: و. هسه؟
هسه هيچي.
إيده على أيدي ويشد ضرب الطوبة وطشر الباقي كلمن راحت بزاويه، واني بين ايده المحاوطتني اراقب تحركاتهن واحچي
سيرا: شلون لعبة تافهه ما بيها حظ شمعنى طشرتهن ومنتظر وحدة توگف.
شمعنى تحاچين فاضل تگليله خل نصير أصدقاء واخوان ومدري من هل خرط.
من وين عرف! انداريت وهو مخلي ايديه حاجز مثبتهن عالطاولة مال البليارد. عيونه تروح يُمنى ويُسرى منتظرني انطق.
سيرا: هو.
هو.؟
سيرا: ياهو الحچالك شلون عرفت؟
هو حچالي. وگال ما اريد يصير مشاكل بينكم بسببي
وسيرا بنيه حبابه تعتبرني حالي حال وتن.
سيرا: هو هيچي اعتبره بس هو ما قبل.
؟
سيرا: يعني من چنت احچي وياه وانت تلح حته اصعد هو گال انهي الموضوع. عود يعني هو ما حب انت تضوج منه او تعصب عليّه. ويكون سبب بأخيرنا
ما مرتاحله.
سيرا: شلون يعني؟
ابتعد عني ويلعب بليارد
احس عنده سالفة. ليش يصارحني ويبررلي تصرفچ الصبح؟
سيرا: ما. ادري
بيني وبين نفسي استغفرالله وإيمار ينظرلي، احس صاير يدقق بأصغر التفاصيل خاصة بعدما صار من زلمة اشتور. بسرعه شال طبع اشتور واسلوبه بالإستدراج.
إذا چانت عنده سوالف يمين يسار اطيح سلفاه.
سيرا: ها.
اي...
بقينا شوية واندگ الباب چآن وتن وإيمار گال فوت
فتحوا القفل هو وودق واحد يعاين بالثاني.
وَتان: يعني ما تعاركتو؟
إيمار: منتظر نتعارك عاليمين واليسار؟
وَتان: هاي تاليها تفضحنا؟
سيرا: شكو شصاير احچوولي.
وَدق: ماا صاير شي تعااي.
اخذتني وياها واني اعاين وراي على إيمار، طلعنا من الغرفة وافرك ايدي ببعضهن وأمشي وياها للحديقه
وَدق: احچيلي شصااار.
سيرا: ما ادري مااا ادري كلشي صار.
وَدق: شنووووووو.
موسعة عيونها وتخاف احد سمعنا
وَدق: شنووو كلشي صارر لا تخبليييني.
سيرا: طاح حظ تفكيرررج يعني اقصد سولفنا وكلشي ضمن الحدود يعني شني شني يصير أكثر من هيچي شني احنه همج خوما همج.
وَدق: اووكي. اي احچيلي شصار.
سيرا: شعليچ انتي ما احچيلچ شصار بينا انتي هسه تحچين شيصير بينج وبين وتوون؟
وَدق: ااحنه غيررر متزوجين بس انتوا بعدكم عاقدييين وبعدين احچيلچ بعدما تتزوجين، يلا حبابه.
گعدنه بالحديقة وافرك أيدي ببعضهن وهي تترقب احچي
نظرتلها لملمت شفايفي بحلگي وحچيت
سيرا: باسني وبسته وهاي هي. شبيچ صافنه.
وَدق: هااا لااا ما صافنه وَتن گال هسه سيرا تطيح حظه ما تخليه.
سيرا: شني ماااا عندي ااانوووثه خل اطب اطيييح حظ وتن بالأول.
وَدق: يمعووده اگعديييي.
رجعت گعدت نسولف واحچيلها احساسي وشلون حاوطني يعلمني البليارد. لحدما گامو راحو عالبيت وإيمار هم راح
رديت على غرفتي وأريم اجت گعدنه نسولف
وحچيتلها الصار وانه تصالحنا. ضلت تحچي وتسب بينا وتگول وَدق چذبت عليّه. من بعد هذا اليوم مرت الايام بسرعة بين التجهيزات للعرس. أبيل رجع من إزمير
ورحنه احنه الأربعة سجلنا عقد الزواج بالمحكمة.
طول هاي الفترة ماكو اخبار عن اخويه على سَند گالو مسافر عنده رحلة بحرية لأوروبا. وغير هذا الحچي محد يسولف بي ولا عن بتراء محد راضي نفتح موضوعهم ما ادري شنو الصاير!
حته رُقيه وودق ما يعرفن شي حته يگولن بتراء صار فترة طويلة ما تحاچينا! لحدما صار ليلة العرس بنفس الفندق اللي سوينا بيها عرس بتراء وعزوزة. چنا اربعتنه گاعدين بالكوشة. و المعازيم گرايبنا واصدقاء الشغل.
خاصة بيت الحجي يمان وابنه جايين. وياهم سيدة حلوة وانيقة إيمار همسلي وگال هاي نازلي
سيرا: يعني صديقة ماما آيدا؟
اي هيّه.
سيرا: زين اذا ما تعرفت عليها؟
بقى ساكت ما عنده اي فكرة عن رد فعلها من تشوفه
اجت السيدة للكوشة وباركتلنا بس بالتركي وإيمار يترجملي
الكلمات الما فاهمتن وأبيل يترجم ل أريم. تالي ياسر يمان مد ايده يريد يبارك ل أريم
يَاسر: واااخيرا قشمر الشلة تزوووج. مبروووك أريما.
أبيل شبك ايدها ما خلاهه تصافحه
أريم: ههه يَسورر الله يبارك بيك انت يومن الك.
يَاسر: آمين. بروو تتذكر قبل سنتين گتلك شراح اسوي بعرسك؟
أبيل: ياخي شلون انسى المديونلي
يَاسر: إيمار جيب عروستك وتعال.
اتفقوا احنه الخمسه نرگص الرگصة التركية الزيبك.
إيمار لزم إيدي وأبيل لزم إيد أريم رحنا وياهم للستيج والمعازيم يصفگولنا. الشباب نزعو جاكيت القوط وبقوا بالقميص الأبيض. منا آني وإيمار مگابلين بعض عالستيج ومنا أريم وأبيل مگابلين بعض.
اشتغلت موسيقى التركية تقليدية والشباب بلشو يدبكون مثل اللي بالأفلام والمسلسلات التركية. انظمينا ألهم ونقلد كل حركاتهم. أريم بسرعه اندمجت ويا أبيل وتعلمت الإ آني.
احتار ارفع الفستان لو ارگص، تقرب مني لزم إيدي وگال عوفي الفستان. وخلاني اتشبث برقبته رفعني من الگاع
وفرني وياي كلها گامت تصفگ. شوية وأريم طلبت من أبيل وهو سوا هيچي.
بهل اثناء دخلوا حبايبنا وزلمنا المعدله هلال ويا هدآم
عزام وعزه. وَدق ويا وتن. انظموا للرگصة التركيه.
ومنا لمحت على سَند دخل من بين المعازيم عيونه عليّه ويبتسم جاي بإتجاه الستيج عفت إيد إيمار ومن على سَند صعد شلت طرف الفستان بخطوات سريعه وصلنا لبعض
حظنته وهو يباركلي ويبوس بخدودي ابتعدت عنه
آني امسح طرف عيوني خاف تدمع وهو اصلا عيونه دمع
بس يمسحهن ويبتسم. راح لأريم مثل ما باركلي بارك ألها
وطلب اروحلهم رحت وهو حظنا ثنينا. عاين بولد الباشا وگال.
علي سَند: انطيتكم أغلى ما عندي بهل دنيا انطيتكم ثنين عيوني. أمانه عدكم وإذا بيوم تزعلوهن لو تكسرون خاطرهن. أكسر راسكم اطيح حظكم وما اسأل!
صارت هوشه وياهو يأمن على ياهو وإيمار يگول هي من عيونك لعيوني ما يطخها الهوا. ومنا ألتمو علينا ماماتي والبقيه عمو أيهم اجا هو ماما آيدا باركولنا بس ما شفت السيدة صديقتها نازلي! معقوله بعدهن ما ملتقيات.
هِلال اتعذرت وطلعت من القاعة تحت انظاري.
رحت يم إيمار وگتله.
سيرا: إيمار امك التقت بصديقتها لو بعد؟
إيمار: هلال راحت تجيبها.
سيرا: مو چانت موجوده بين المعازيم ماما آيدا ما شافتها؟
إيمار: لا ما شافتها او احنه گلنالها ما تخليها تشوفه إلا بآخر لحظات العرس.
سيرا: ليش؟
عاين بأمه ولزم إيدي
إيمار: ابويه گال خاف لا سمح الله تتخربط يصير شي هيچي يعني وتخرب الحفلة.
گتله تمام ورجعنا لأجواء الحفلة وبنفس الوقت ننتظر دخول هلال وهي جايه ويا نازلي.
هِلال
طلعت من قاعة الأعراس بالفندق ودخلت المصعد خابرت على ياسر
هِلال: وينك؟ يعني وصلوا للغرفه؟ بالمصعد هسه اجي.
قفلت الخط وياه وخابرت عمو اشتر، گال يجيب ابويه وامي ويصعد للغرفة. بقيت انتظر المصعد يوصل للطابق الثالث، انفتح الباب وطلعت امشي للغرفة اللي الكل منتظر بيها. وصلت ودگيت الباب لحظات وفتحلي ياسر
هِلال: موجودين؟
يَاسر: اي فوتي.
اخذت نفس عميق زفرته ودخلت للغرفه بگلبي گلت بسم الله ياسر سد الباب وآني اعاين بيهم خوالي ثنينهم ويا الحجي يمان اخو الخاله نازلي گامو. حبوبة بينار چانت گاعد وبس تبچي والخاله نازلي بصفها تهدي بيها.
من شافتني زادت بالبچي وتأشرلي اروحلها اسرعت خطواتي رحتلها كنبصت لميتها بحظني وابچي وياها
وهي تحچي بالتركي. وما مصدگة امي بعدها عايشه!
بينار: الله ما يخذل عباده سنين وانا ادعي لو اشوفها مره مره وحده وأخيرا قبل لا اموت.
ابتعدت امسح دموعها وابوس إيدها، وخالي أرغد حچآ بصوت مهضوم ومدنگ راسه.
أرغد: كلنا انصدمنا محد چآن متوقع اختي عايشه وترجع لبيتها وعائلتها
خالي دامير الشعره ولحيته شايب. گعد بمكانه مغطي عيونه يبچي سكتة وعمو يمان يگللهم
يمان: انتوا السويتوه مستحيل ننساه، ف ما بالكم ب آيدا.
دامير: يمان انت كلش زين تعرف شلون چآن الوضع.
وآنا الندم على خسارة اختي شيب راسي. حته امي ما محاچيتني صار 30 سنه!
هِلال: شيفيد الندم بعدما دمرتو سمعة أمي و. على كُلن احنه طلبنا حبوبة بينار تجي انتوا شجابكم.؟
أرغد: هلال بنتي شنو شجابنا؟
ما جاوبته ما اريد افتح الدفاتر القديمه بلايه استفادة.
عاينت بخالة نازلي اللي ملامحها أصغر من امي. مسحت عيونها وتحاول تبتسم. گالت
نازلي: بس گُليلي شوگت تجي آيدا.
نظرت لحبوبه اللي بالتزامن وياها، حچت وهي تبچي وتگول خل الباشا يجيب بنتي.
هِلال: ياسر خابر عليهم
گال يخابرهم راح بعيد يحچي شويه واجا گال خابرت أبيل هسه يجيبها ويصعد. من گال هيچي لزمت جبيني هسه هذا شحچي ويا
ياسر: شكو؟
هِلال: لك انت ليش تخابر أبيل وهسه إيمار يلحگه!
شگتله؟
ياسر: گتله خوالك وحبوتبك بالطابق الثالث الغرفة 25 جيب امك وتعال؟
يمان: آنا ليش خلفت جحش مثلك؟
يَاسر: هاي شبيك يابه.
هِلال: طرگاعة ترگعك خوش.
يَاسر: طرگاعه شنو تعال وين تروحي
عفتهم ورحت للباب اريد اطلع من الغرفه لكن وگفت بمكاني ابويه وعمو اشتر وماما واصلين.
الباشا: انطي مجال خل نفوت!
هِلال: بابا. هو أكو.
الباشا: انطي مجال خل نفوت اشتر حچالي العارات جايين.
آيدا: ايهم منو جاي؟ لگيتو بنتي؟
حاوطها وآني انطيت مجال ابويه وامي دخلوا الغرفه
وآني ويا عمو اشتر وراهم بقى الباب مفتوح. وامي
اختل توازنا لمن شافت حبوبة بينار گامت.
امي انهارت تبچي وتريد تطلع من ايد ابويه، تبچي وتگول امي بالتركيه ابويه عافها وهي راحت بخطوات سريعه
شمرت روحها بحظن حبوبه وتبچي. تبچي وبس تگول يمه
ومنا خالة نازلي حظنتهن وثلاثتهن يبچن أبيل وإيمار دخلوا للغرفه بقوا واگفين بصف عمو اشتر إلى ما خلاهم يتدخلون او يطردون خوالي. امي مكنبصه وخلت راسها بحظن حبوبة بينار. وبس تبچي تگول ما ناسيتكم.
خالي دامير گام وهو محمر من البچي راد يروحلها ابويه اشرله بإيده البيها سبحة وحچا وياه بالتركي
الباشا: أگعد. أگعد لا تگرب صوبها.
دامير: خويا هايه اختي.
الباشا: أنچب واگعد، لا آنا اخوك ولا مرتي أختك.
أرغد: آيدا.
امي ما اندارتله عبالي ما تتذكرهم لكن الصدمني لمن حظنت أمها أكثر وگالت.
آيدا: عندي اب واحد وهو عافني من الطفولة يُمه آنا بنتچ انتي وبابا الله يرحمه. ما عندي اب اسمه نِضال ما عندي اخ اسمه دامير ما عندي اخ اسمه أرغد، ما ظل عندي غيرچ انتي وايهم.
خوالي گعدو مدنگين ويبچون سكته وآني منا أبچي عمو اشتر تقرب حظني واخواني ثنينهم تقدموا ناحية أمي. كنبصوا وراها. إيمار ايده ترجف راد يخليها على ظهر أمي لكن وگف لمن امي شهگت وبچت تگول
آيدا: يمه اخذو بنتي مني. وما يرجعوها. حرموني منها.
أبيل نظر لإيمار. الگام، ومنا امي رفعت راسها واندارت شافت أبيل مكنبص بچت أكثر وأكثر گالت ابني. أبيل ما عرف شيحچي الكلمات ما تطلع من لسانه
أبيل: اب ابنچ؟
آيدا: أنت أبني الچبير أبني.
هي گالت الچبير وهو دنگ يبوس ايدها ويبچي اني ما ادري وين انطي وجهي من الفرحة وابچي أبچي واگول إيمار. إيمار طلع من الغرفة لحگته برا شفته ساند ظهره عالحايط وعيونه ينظر للسقف وتدمع يهز راسه ويگول.
إيمار: ما تعرفني. ما تعرفني أمي ما عرفتني ولا تعرفني.
نظرلي عيونه تذرف الدموع
إيمار: ما عرفتني ولا تتذكرني.
تقربت حظنته ونبچي سويه شويه وأبيل طلع للباب محمر وعيونه مليانة دموع أشر للغرفة. بألف يا على يحچي ويبلع بريگه
أبيل: أمي. امي تريدكم گالت. وين اختك الزغيره واخوك؟
هِلال: اختك. اختك الزغيره.؟
ابتسم من بين دموعه حرك راسه وگال
أبيل: گتلچ.
إيمار ابتعد عني ويمشي بخطوات مهدود حيله دخلت وياه للغرفة امي بمكانها عالارض مكنبصة وتبچي. من شافتنا
فتحت ذراعها تريدنا. تبچي وتگول إيماري روحم عُمرم.
إيمار وهو يروحلها تعثر بس وصل لحظن امي اطلق العنان لدموعه يبچي يبچي مثل الطفل بحظن امي واني حظنتها ما ادري شحچي شتصرف وهي تبوس بينا لزمت وجه إيمار وتبوسه من اليمين لليسار ردت تبوس ايده مثل لمن چآن طفل ما خلاهه وهو بقى لازم ايدها ويبوسها.
انوب گالت أبيل تعال. ألتمينا عليها وهي تبوس بينا وتگول سامحوني تعذبتوا بسببي واحنه بس نريدها تهدى ما تهدى إلى أن ابويه اجا كنبص انطيناه مجال. ولمها بحظنه هدءت بين إيده وهي تشهگ وتگول
آيدا: احلف براس إيمار عندنا بنت ثانيه عندنا بنت ثانيه
اخذوها مني مره أخذته مني، أشتر اشتر دور عليها جيبلي بنتي.
ابويه مسد على راسها ويمسح دموعها يگللها اهدي اهدي.
آني واخواني واحد يعاين بالثاني ونفكر معقولة امي ما تتوهم! بهل اثناء خوالي گامو مره ثانيه يريدون يتقربون منها امي احتمت بحظن بابا كأن احتلها خوف ذيچ الليلة المشؤمة من حياتها خاصة وهي تشوف خالي دامير گدامها
تبچي وتنتفض بين ايديه
آيدا: ايهمم لااا تخليه يقتلنيي لاااا تخلي داميرر يقتلني.
الباشا: اااشتر شمنتظررر اااشمرهم برااا الفندق كله اااخذووهم للمطااار هسه.
يمان: خويه الباشا!
الباشا: لا حجي يمان لهنا وانتهى الموضوع هي ما عدهه اخوااان عاراات مثلهم.
الأشتر: وإذا رادت أخواان آنا اخوها.
دخل عمو أدهم للغرفه ويا زلمتين. وگال بصوت رزن خلا ابويا يندار بنظراته
الأدهم: إذا رادت آخوان آحنه اخوانها، احنه نصيرللها سلف وسند. اختنا ما بحاجتكم. اطلعوا برجليكم لا تنسحلون. ويتكرر التاريخ. دامير
حجي يمان ابو ياسر افتخر بالصار وگللهم بالحرف الواحد.
يمان: اطلعوا برجليكم ذوله الأوتاد الثلاثة گول وفعل.
مدنگين وگالو هذا هوَ راح نمشي. عود ياخذون حبوبه وياهم!
الأشتر: دِيلا يلا تيَسروا بلياها الحجية بينار بضيافتنا منا للشهر الجاي ما نرجعها.
دامير: شنو منا للشهر الجاي؟
الأدهم: چآ منا لشهرين.
أرغد: ما نگدر تعذرونه يمه گومي ويانه.
الأشتر: وهاي صارن ثلاث اشهر الزلمه يُفك حلگه. وگاع.
دخل وگاع الغرفه اريد استوعب اشتور شلون اتلاحگ الأمور كلها وگاع جاب ملف وگال.
وگاع: كلشي جاهز منا لخمس أشهر حجية بينار تگدر تضل بالعراق وبالبصره وإذا لزم الأمر نسويلها إقامة.
دامير: هسسه ندري حقكممم بس هااايه اامنا.
إيمار: وهااايه ااامي وأمها. اااطلع منااا اااطلع.
أبيل: اطلعوا منا خل يرتاح راسنا منكم. اااطلعوااا. ولووو براا.
عمو ادهم انطا امر للزلم اخذوهم بالگوة ودامير يگول باشا لا تسوي هيچي! ويتوسلون بي. عمو اشتر وعمو ادهم ويا البقيه كلهم طلعوا ورجعوا للحفله. بقت بس حبوبه بينار
واحنه آني واخواني مگابلين أمي لو نبوس بيها لو نحظنها
ابويه تقرب كنبص يمنا مره ثانيه وهل مره لمنا احنه الاربعه بحظنه وبين ذراعه. باس راس امي وگال.