رواية وقار الغريب للكاتبة حوراء السعيدي الفصل الرابع والعشرون
وَهج.
فركت عيوني حيل حيل علمود أشوف إلى گدامي واقع لو أحلم
رجعت رفعت انظاري، ماكو شي يدل هذا حلم الواگف گدامي ظافر .
الشخص الوگفلي بكل صغيرة وجبيرة، نفسه إلى وَهج اليوم
بهذهِ القوة بسببه نهضت من مكاني أمشي بخطوات بطيئه
صدمتي معتليتني مامصدگة، عميد الدين لازمه من ياخته يرزل بي.
عميد الدين: اناااا شكاايلك موووو هل السالفة تبطلهااا تبقى كلب ابن سطعش كلب
ظافر: يولي فك عني.
عافه عميد الدين، واثنينهم أنظارهم صارت ناحيتي
بنص أستغرابي وصدمتي، عميد الدين وظافر؟
وَهج: انتم ش شلون واحد يعرف الثاني؟
عميد الدين: يُبا هسه تفهمين كلشي.
اتقدمت الظافر الواگف يباوعلي بدون ماينطق بالكلام
المنطقة إلى أحنا بيها ماكو بيها أحد، لو هسه أحد يلزمنا ويموتنه
محد يدري بينا، واگفين بالشارع العام وبس أضوية سيارتنا مشتغله.
ما گدرت أسيطر على نفسي دموعي نزلت بهدوء.
هذا الشخص اله مكانته بحياتي عزيته معزة الاخ بحياتي أردفت من بين دموعي
وَهج: وينن چنت ظافر؟ تدري شسويت بيَّ بروحتك ليش عفتني؟
خطى بخطواته مبتسم، بذاك طوله إلى يسوا عشيرة بأكملها
شهامته وشجاعته مزروعه بملامحه حچه بنبرة صوته
الحنينه إلى طول عمري أسمعها منه ما اتغيرت
ظافر: شلونها الذيبه ول خالي
وَهج: ظافر والله من رحت أحس نفسي ضعفت ليش عفتني.
أتسمعيني؟
هزيت براسي هزات متتاليه، دار ال عميد الدين الواگف مكتف ايديَّ يباوعلنا
ظافر: اخذها منك
عميد الدين: تخسى يُبا، الحجي ايصير گدامي
ظافر: اختي؟
عميد الدين: مررتي؟
لحد الان ما فاهمه هل الاثنين شلون يعرفون بعض دخت بالموضوع
صعدنا گلنا بسيارة عميد الدين وبدوا يحجولي كلشي، كلشي جان بمثابة صدمة الي.
ظافر: شوفي خيتي أم سَند
عميد الدين: عاشت ايدك خوش تحچي كله خيتي بارك الله بيك
ظافر: دانحجي الصم.
عميد الدين: باليعجبني شتسوي مثلاً.
وَهج: شبيكم انتم مو كافي صدماتي بيكم شبيكم تتناكرون عميد الدين ظافر.
سكتوا اثنينهم ورجع ظافر مكمل كلامه
ظافر: ادري بيج هسه اسئله اهوايَّ بعقلج صارت
ومن حقج تاخذين جواب الكلشي
وَهج: أتمنى تحچون كلشي وماتضمون شي عني.
عميد الدين: يُبا بالنسبة إلى ماعندي شي بعد الشي الوحيد
الي چنت ضامه عنج وخافي معرفتي بظافر.
رفعت حاجبي أباوعله.
وَهج: أنتَ حسابك بعدين لأن كلش كلش استغفلتني.
سكت ما رد عليَّ رجعت مركزة مسامعي ويا ظافر.
ظافر: تدرين بيَّ من زمان اشتغل ويا ابوچ مو محبتاً بي
لو محتاج شي، اني دخلت وياه بنص شغله وخليت أحد
يتوسطلي يمه علمود أگدر ادخل وياه، واخلي يأمن بيَّ
وفعلاً گدرت اخلي يثق خلال فترة قصيرة من خلال الشغل إلى جنت أساعده بي.
وَهج: شنو الدافع إلى خلاك تدخل وياه دائماً جان عندي اسئله
شنو السبب إلى يخليك اتساعدني وتشتغل
من وره ابوي؟
سحب نفس طويل قبل لا ينطيني الجواب.
ظافر: ابوچ سبب موت خيي يا أم سَند.
طبگت حواجبي مامفتهمه
اخوك؟ بَس أنتَ گلت أهلك كلهم ميتين
انجبرت اچذب أعذريني
عميد الدين: وَهج، يحيى نفسه أخو ظافر
اتجحظت عيوني مامصدگة الكلام.
لزمت راسي دايخة
وَهج: شجاي تحچون انتم
عميد الدين: كلشي چان مخطط مني ومن ظافر حتى شغله إلى دخل بي ويا أشرف چان من ضمن خططنا
رائد يدري بكلشي من گام يجي للعراق وقوت علاقتنا حچيتله كلشي
أحد أسباب موت رائد هوَ عنده معلومات عن شغل ابوچ.
واشرف من خوفه لا ابنه ايصير ضده محاه من غير سبب رونق
لأن ابوج چان رايد رائد يتزوج وحدة بنت أحد رجال الأعمال
الي يشتغل وياهم بالمختصر مثل ماسوا وياچ راد يسوي وياه
ابوچ مجرم طاغي عديم رحمه قاتل أكثر من شخص علمود مصالحه وفلوسه.
وَهج: ألي افتهمه أنتم من زمان واحد يعرف الثاني؟
ظافر: صديق يحيى الله يرحمه ومن خلاله أعرفه
يحيى چان عايش يم امي، لأن أبوي وامي منفصلين.
اني وأخوي حازم الضابط إلى جاي يساعدنا بكلشي واخواتي اثنين چنه عايشين يم ابوي بالانبار
وكل فترة نجي الها، امي بصراوية جدتي إلى اتصير امها
حالياً اني وحازم يمها، اخواتي اتزوجن واحنا اجينا يم جدتي
لأن عمامي نكرونا ومارادونا وحشاج احنا بنعال ما اعترفنا بيهم والحمدلله اخواتي طلعن للغربه مو الهم.
عميد الدين: ام سَند أدري بيج دختي بس رايدين نفهمج.
ابوچ انطلبه ثأرين مو ثأر واحد، الاول حگ موت يحيى، والثاني حگ رائد
وَهج: وظافر أنتَ ليش انسحبت وعفتني بنص الطريق
ظافر: علمود ترجعين هنا نادية تدري بكلشي
نعم؟ باجي نادية تعرف كلشي؟
اي المرة هم ساعدتنا، وظيفتها جانت تزرع الشكوك بعقلج وتأثر عليچ ترجعين لهنا.
لااا مستحيل انتم طلعتوا كلكم تستغفلون بيَّ واني مثل اللعبة بينكم تلعبون بيها
عميد الدين: يُبا شنو هالكلام، لو ماراجعه هنا يبقى أشرف.
يستغل بيج، ويلعب بكيفه بيج وبأختج ويحقق إلى يريده
كلشي اتخطط اله علمود ترجعن هنا واتصيرن بحمايتنا، لو بقيتن هناك محد يگدر ايسوي شي ويساعدچن.
نزلت من السيارة مختنگة الهوا ضاگ بصدري أسمعهم يصيحون ورايَّ
دموعي تنزل بغزارة ما اتوقفن، سحبني عميد الدين حاضني اشهگ بدموعي
عميد الدين: والله عرفت راح يكون موقفج هذا بس افهمي وفكري بيها
وَهج: أخجل أشرف ابوي، أخجل اجيت للدنيا واتسميت بأسمه.
هو ما ادري شلون طلعوا من نسله انتم رائد صفا انتِ مو يمه ولا حذاه بس عيسى من صنفه.
رفعت راسي يمسح بدموعي بأبهام أصبعه
عميد الدين
عيونه يُبا
أخجل أباوع بوجه ظافر، وأبوي سبب موت اخوه
ومو موت عادي لا جريمه بشعه چانت ظافر اهوايَّ ساعدني
ظافر عاقل، وعارف منين ياخذ ثأره بالضبط أنتِ ما الچ اي علاقة.
اجانه صوت ظافر يتحمحم أبتعد عميد الدين عني
نزلت عيوني ما أگدر اباوع بوجهه، أبوي خلاني اتفشل گدام الكل.
وصلت المرحلة أستصعب اگول أشرف ابوي واني بنته
ظافر: ام سَند، لا تخلين أبالج فكرة تخجلين مني
أنتِ ما الج ذنب، أني الرايدج تعذريني لأن مامنعتج من الزواج ب بشار ولا ساعدتچ رايدچ تعذريني بكل مرة ماكدرت ادافع بيها عنج وعن اختج
السبب چان إذا أدخل أكثر من اللازم ينشك بيَّ.
صفك عميد الدين أيد ب أيد
عميد الدين: هسه انكشف كلشي واتوضحت الج علاقتي بهذا الكديش.
أحنا ماراح انكن ولا نستقر ألا واخذين حگ دم يحيى ورائد ورب العرش
وابن امه إلى يوصلج لو يوصل الاختج انتن مسؤؤليتنا
وخليها ابالج ظافر عافج، بس ماعافج نهائياً.
مسحت دموعي أباوعله
وَهج: شلون
عميد الدين: هوَ صاحب الفيديو إلى اندز الج إلى بي بشار
خله وحدة تشتغله وهو سكران وخلته يحچي كلشي وصورته
واندز الفيديو الچ، لأن جنت خايف لا هذا الكلب ابن سطعش كلب يأثر على عاطفتج ويستغلج.
و باسل أيصير ابن خالة ظافر لذلك دخل بهذا المخطط
چانت وظيفته يخسر أشرف هذا المشروع ويطفر وسواها ابن الكفو
وَهج أحنا ما استغفلناج، أحنا ردنه حمايتج وحتى زواجنا گتلج أسبابه
ديري بالج تفكرين استغليناج مثل الناس إلى استغلوج.
وحتى عمتي نادية، ضحية الأشرف، كافي عذابها
أتشوف ابنها گدامه يكبر وما تگدر تتقرب اله مثل أي ام
والزاد عذابها وقهر گلبها، من رائد عرف هيَّ امه أنتِ ماتدرين.
شصار من كلام بينهم، رائد الله يرحمه حچه كلام صعب وحدة مثلها تتقبله ومع ذلك سكتت لأن تدري غلطها
أحنا ماندري إذا صدك هو مات وهوَ يكرهاا بس دائماً
يسمعها كلمة اكرهج ويخليها تموت الف موته.
عفتهم واگفين ورجعت للسيارة دايخه بكلشي عرفته
راسي انسطر سطر، غمضت عيوني رجعت راسي لوره
الدقائق أسمع صوت الباب انطبك فتحت عيوني شفته عميد الدين
وسيارة ظافر طلعت گدامنا، رجعت غمضت عيوني.
شگد جنت انتظر هذا اللقاء بلهفه، بس ماچنت متوقعه
هذا للقاء راح يخليني بهيچ صدمة بحيث أحاول أستوعب كلشي ومو گادره.
فزيت من مكاني من ذكرت الأمانة
وَهج: عميد الدين ظافررر ماگال منو الشخص إلى مخلي عنده الأمانة.
تحمحم عاض شفته السفليه
عميد الدين: مايحتاج
ليش؟
لأن گدامج صاحب الأمانة الموجودة عنده.
رمشت بعيوني اريد هالمرة صدك أستوعب
أنتِ؟
أي، وإذا تسئلين ليش ماسلمتها الچ ف انا اگلج.
بحال سلمتها الچ راح تسلمينها للقانون احتمال وانا ماريد هذا الشي هسه
أريد اشوف أشرف مذلول ذل بعدها يتسلم كلشي للقانون
وهو لليوم يدور على الأمانة بس بالخفاء مايريد احد يحس بي.
گتلي مو أستغفال؟
موو أستغفال ليش ماتفهمين يالعاقلة
كل هذا سويتوا وخططتوله واني ما أعرف بي شيسموه؟
مو كلشي ينحچي يا يُبا.
درت وجهي عنه ميته بقهري عتابي وياهم صح مأدري غلط
بَس إلى أعرفه هم ما اذوني أخذنا الطريق كله ساكتين.
ودموعي ما اتوقفت، بهل الليلة كل الذكريات حاوطتني
اني حياتي معقدة، ما حسيتها بيوم حياة هادئه
مثلنا مثل أي شخص عايش الحياة وجماليتها
أحنا إلى عشنا العمر كله بالتعب والجروح .
طلعت من قوقعه أفكاري على صوت كلمات أغنية أنفتحت.
بين جرفين العيون
غرگت والروجه رمش
تيهتني وردت اگلك
هاك أخذ گلبي وأمش
وانا اجيك بشوگ طافح
بين ألومك بين أسامح
يا ما چنت أسهر
واساچيك بدموعي
وانا الچاتلني، الچاتلني، الچاتلني العطش.
الكلمات أنحفرت بعقلي خصوصاً اللهجة بقت الأغنية
مشتغله طول الطريق، حد ما وصلنا للبيت نزلت گدامه
دخلت جوا، شفت صفا وزينب گاعدات نزل آدم من فوگ مبدل سمعت صوت عميد ورايَّ
عميد الدين: وين رايح بهالليل
آدم: سيارة أحمد صديقي تعرفه عطلانه ورايحله
آدم؟
والله العظيم شبيكم مووو كنالكم راح نتعالج
عافنه وطلع اجت صفا تسئل ب عميد الدين
صفا: مالگيتوا دكتور؟
عميد الدين: ذني الايام أن شاء الله.
وَهج: سَند نايم؟
صفا: أي نام، وين رحتوا انتم اتأخرتوا
صاعدة انام بعدين نحچي صفا
عفتهم واگفين وهم مو الكل گاعد جدي باجي سلمى ينامون من وگت
الولد يطلعون بالليل من وره العشاء صعدت الغرفتي
ذبيت جنطتي نزعت الحجاب ذبيت نفسي على السرير راسي يريد ينفجر من التفكير.
أنفتح الباب دخل ذب محفظته وشغلاته على الميز گعد بصفي
واني وجهي مايگصه السيف ضايجة ومختنگة
عميد الدين: زعلتي مني؟ وَهج
وَهج: ما ادري عميد الدين
فهمتج كلشي.
صح، بَس أحس نفسي مختنگة
الي سمعتي مو سهل ولا إلى مريتي بي سهل والكتمان مو سهل.
گلبت على جهته حطيت أيدي جوا راسي صارت بين راسي وخدي
أريد ازعل منك بَس ماجاي ينطيني گلبي
يعني استاهل تزعلين مني؟
أنتَ تستاهل كلشي حَلو.
أبتسم، حك طارف حاجبه، نهض من مكانه وگف يبدل نزع قميصه
جسمه مقسم مبين مهتم بنفسه من هالناحية.
عميد الدين: نامي يُبا مو تعبانة
وَهج: فرحانة رجع ظافر بس مقهورة من عرفت أبوي سبب موت اخوه.
عميد الدين: يجي يوم وياخذ عقابه
وَهج: ابوي شاك اكو احد جاي يتلاعب بي
واحد ولا ثلاثة، هو أريد اشوف شكله من يدري
بنته والشخص الچان مخلي منبع أسراره يشتغلون ضده
أما انا ما أستبعدها شكوكه من ناحيتي لأن يعرف عندي شغلات عنه.
خلي آدم يلزم نفسه ولا يتقرب الصفا أكثر گدام أبوي
أحسن مايشك بيهم وأيسوي شي مو بالحسبان
تدللين
اگلك عميد الدين
گولي أم سَند
عود أنتَ صدك هيچ اطباعك شخصيتك حيرتني
من أي ناحية
كلشي.
يجوز الفاگد الشي ينطي.
عدلت گعدتي افسر معنى جُملته
يعني
يجوز انحچالج قصتي ويا دُنيا
أي زينب سولفتلي، الله يرحمها كلش اتأثرت بيومها
بس اكو حلقة ناقصة محد يعرفها.
شنو؟
دُنيا ماحبتني مثل ما أحبها، ولا حاربت مثل ماحاربت انا
هسه راحت الدار حقها الله يرحمها وباريها الذمة دنيا وآخرة
بَس ماقدمتلي مثل ماقدمتلها.
نهضت من مكاني رحت وگفت بصفه
عادي تفهمني إذا تگدر
اتزوجتني بعد ما أمها القنعتها، أمها خوش مرة الله يرحمها.
وتعرف الأصول صدك بالاول عارضت بس بعدين
من شافت حبي البنتها أقتنعت، يمكن غلطتي چانت
ما اتأكدت من مشاعر الإنسانة إلى گلبي رادها
ويمكن هيَّ وهمتني بشي بس بداخلها شي.
يعني دُنيا ماحبتك
لا، حاولت تحبني، بس ما ادري شنو السبب إلى داخل الغرفة ينفرها مني
وبالخارج تمثل گدام الكل حبها إلى والكل كل ظنهم احنا
احلى اثنين عايشين حياتنا، چنت اتمنى نبقى خارج الغرفة وماندخل الها
يجوز تكولين هسه شبي هذا يفرح باهتمام تمثيل.
بس انا اگلج چنت افرح بي واگول يجوز يجي يوم وتبادلني نفس المشاعر وتحبني مثل ماحبيتها.
وياريت العلاقة إلى جانت بينه صدگيه دمروها المايخافون الله
وخلوها تنفر مني على الاخير راحت الاهلها وگلي أمل ترجع
ومتغيرة چنت ابني احلام وآمال خالي ببلاش لأن المكتوب مبين عنوانه.
الله يرحمها تبقى انسانة عزيزة على گلبي ماكرهتها بيوم وذكراها لليوم محترمه.
إذا هيَّ ماحبتك مثل ماتحبها ليش وافقت.
اخخ يا أم سَند دُنيا وهمتني بهواي شغلات وسامحتها عليهن
وگلت ميخالف أنتَ تحبها انطيها فرصة وانطيت
وحاولت وحاولت بس ماكو نتيجة من محاولاتي الشخص الوحيد الچان شاهد معاناتي يحيى .
مسح وجهه طابك حواجبه سحب تيشيرت لبسه
عميد الدين: راحت شهيدة ما اريد احچي أكثر عنها
مسامحها دنيا وآخره ما اريدها تتعذب بسببي خصوصاً اول
ما اتوفت تجيني اول ايام بالأحلام وتطلب مني اسامحها.
بس خلتني أفكر اهوايَّ للمستقبل يمكن زواجي هذا درس الي.
صفنت بي شكد هل الإنسان گلبه طيب وحنين رغم
كلشي چانت أتسوي إلا هوَ انطاها فرصة وچان
يأمل بنفسه تحبه مثل مايحبها، وفعلاً الميت مايجوز عليه غير الرحمه الله يرحمها ويسامحها.
عميد الدين: تعاي نفرش أسنانه علمود ننام
طلعت وياه للحمام إلى بالطابق الثاني صعد زيد يغني
زيد: هااا بلابل
عميد الدين: منين راجع بهذا الوگت
زيد: طالع ويا جماعتي.
عميد الدين: آدم صدك صاحبه أحمد مسوي حادث
اي حتى اخو أحمد چان گاعد ويانه اني والشله وخابره
خو مابي شي الولد
لا عرج ما طاگه، بس السيارة متأذيه وراحوله
يله تتعوض أن شاء الله.
مشى گدامي دخل للحمام، اجه زيد يمشي من يمي مقلص عيونه
زيد: هاا حيه
وَهج: يااا نوب أنتَ عليَّ
زيد: أحلى حيه وشرفي، خلي اطفر لا يجيني رجلج.
راح الغرفته ضحكت وراه والله عليهم سوالف هوَ وآدم.
أسمع عميد الدين يصيح ب أسمي رحتله دخلت للحمام.
واگف يفرش حاط فرشتي وبيها معجون أشرلي عليها
عميد الدين: فرشي إذا تبقين يم زيد للصبح مايعوفچ
اخذتها وگفت بصفه افرش هو غسل وكمل بقى واگف يباوعلي.
هاا
كملي يله
اي روح گدامي هسه اجي
انتظاري يضايقج؟
لا عادي.
بقى واگف ما اتحرك من مكانه بين ماكملت طلعنا اثنينه
ما ادري شبيه الابتسامة مرسومة على ثغري مو گادره اخفيها
دخلنا للغرفة امسح بوجهي اريدها تروح ما اتروح شافني
عميد الدين: شبيچ وَهج.
وَهج: هههههههه ما ادري غلس خلي ننام.
احچي ست وَهج عليمن تضحك
ههههههههه شوف يعني أنتَ اهوايَّ تدلل وتهتم
لادق التفاصيل ف ما اگول غير هنيالها الزوجتك بالمستقبل او بنتك عندهم شخص مثلك.
ليش مو هنيالچ الچ؟
اي اني هم جاي تهتم بيا بس أحنا واضحة نهايتنا
اني بس يخلص كلشي جاي نشتغل بي أخذ اسافر ما ابقى هنا.
بهتت ملامحه لزم جبينه بهدوء وهوَ يسئلني
تسافرين؟
أي
أهاا، براحتج.
أتمدد بمكانه وبعد ما باوع بوجهي منطيني ظهره.
نمت بصفه جانب مني مرتاح والجانب الآخر قلق.
ريم.
اجه يوم الامتحانات والتوتر ماكل گلبي رغم درست زين
بَس يبقى توتر الطالب من هذا الشي رغم هوَ موزين لأن مرات
يخلينا نفقد حتى الحافظينه، صار وقت الامتحان
واتوزعت الاسئلة علينا، ونگدر نگول الحمدلله تقريباً جانت لابأس بيها بالنسبة الي.
كملت وطلعت أمشي بالجامعة سُرى بعدها تمتحن
طلعت و وارث منتظرني صعدت وياه اول ماصعدت سئلني
وارث: برنسس شلون چان أول امتحان.
ريم: لا بأس بي
وارث: أن شاء الله خير، خلي نتغده بمطعم شنو رأيج
ريم: لا أريد ارجع للبيت تعبانة.
مارد عليه بقى يسوق ساكت حد ماباوعت للطريق
مو طريق بيتنا، باوعتله اتسائل
وين رايحين وارث
نتغده، امچ يم بيت جدي
گتلك أريد ارجع للبيت تعبانة شنو هالتصرفات
إذا نقارنها بتصرفاتج ف أهون بهواي.
وگف گدام مطعم دار من جهتي فتحلي الباب
وارث: انزلي برنسس
ريم: اني مو جوعانة
اني جوعان
ابقى بالسيارة، وأنتَ روح اكل.
انززلي بوية انززلي.
نزلت وياه دخلنا للمطعم گعدنا ب أحد الطاولات
شنو تاكلين
مو جوعانة
هسه شكو گالبه خلقتج
لأن گتلك موجوعانه وأنتَ جبرتني انزل وياك
ميخالف هسه تنفتح شهيتج من تشمين ريحة الاكل هذا المطعم اكله طيب.
اجه النادل قدملنا ال menu لزمته اقلب بي المشكلة
صدك ما أشتهي وهوَ معاند عباله عناد بي ما اكل بَس مو جوعانه صدگ
شقررتي تاكلين
ما قررت بكيفك أنتَ أطلب
تاكلين على ذوقي
أي.
گال للنادل طلبنا وراح، رن تليفونه رفعه باوعله ورجعه المكانه باوعلي
شبيج تخزرين
ليش ما اتجاوب
مو اتصال مهم
شمدريك مو مهم
زيد هذا
اي لعد متجاوبه
بعدين.
سكتت واني افكر صرت اني الاشك مو هوَ استغفرالله
رجع يرن التليفون ويرجع يفصله غلست عنه إذا احچي
أكثر يگول مهتمه إلي، فتح خط عليه جاوبه
وارث: هاا زيد، مشغول، بعدين، گتلك بعدين، تمام
سده منه ورجعه المكانه من شاف نظراتي دفع الجهاز بخفه گدامي.
افتحي واتأكدي بنفسج لا تبقين تباوعين هيچ
شعليه وردة شي خاص بيك.
جابوا الاكل وزعوا على الطاوله گعدنا ناكل
دا اشوفه مو ذاك الالتزام
أنتَ ليش ماتخصص علاج الك
ما اله داعي
لا تنجلط يمعود وين انطي وچهي.
رفع راسه الي، حسيت بالجفصه إلى چفصتها
ريم: أقصد لا يرتفع سكرك واحير بيك واني كافي حيرتي بنفسي.
صدك؟
شنو؟
مو زوجج لازم تحيرين بيَّ
زوجي چذبي مو صدگي
نايس برنسس، خلينا نحچي.
قلبت عيوني.
شنحچي
بموضوعنا
مايحتاج كلشي واضح.
أسمحيلي هالمرة احچي.
سكتت وأخذ سكوتي علامة رضا وقبول رجع ظهره على الكرسي
وارث: راح اسئلج اسئله وجاوبيني عليهن
ريم: اوكي
وارث: قبل لا اتصير سالفة نريمان بذر مني خطأ اتجاهج؟
لا
سمعتج كلمة تغثج لو تستنقص منج
لا
وگفت ضدج بيوم؟
لا
زين قصرت بشي وياج
هم لا.
من خطبت نريمان بيوم وگفت وياها ضدج
لا
خوش حچي، بكلشي ماچنت مقصر وياج بس
من غلطت غلط واحد عفتي كلشي وركزتي بهالنقطة بس
لأن غلطك مو سهل.
تگدرين تعيشين ويا شخص يشك جاوبيني بصراحة ريمه؟
ما ادري بس ما أتوقع اي شخص يگدر يتحمل مرض الشك
ليش ما اتفهمين موقفي، اني شخص أنصدم صدمة مو سهله
لا تتوقعين مني اتصرف تصرفات صحيحة غلطت
وغلطي مو سهل اتسامح عليه بسس أفهمي حطي نفسج بمكاااني شتسووينن.
لو لاغي العرس كله لو ما أجله شيصير عليك؟ ليش خليتني بصباحية عرسي افرفح من القهر بسببك.
أنتَ والإنسانة إلى حبيتها، اني شنو ذنبي اتعاقب وما استبعدها اتزوجتني علمود تشوفها حياتك ماتوگف عليها.
رجعنا النفس القوانه بشنوو أحلفلج ماتزوجتج علمود اغور بيها
أنطيني مبرر انطيني عذر واحد بس يقنعني علمود أعذرك
اني غلطت أعترف بغلطي، بَس يشهد الله خفت أذيج إذا ابقى وياج
وغلطي استعجلت بهذا الزواج بدون تفكير عقلاني اتخذته
هايهيه اتحمل نتائج أفعالك
اني ما أريد اجرحج بالكلام، بَس حاولي تراجعين نفسج.
شوفي تصرفاتج أنتِ عاقلة وفاهمه مو حلوة بحقج هالتصرفات الجاي اتسوينها.
وگفت بمكاني
اريد ارجع للبيت ممكن ترجعني
جاي نتناقش ارجعي اگعدي بوية
اتناقشنا وانختم نقاشنا
هايهيه براحتج اني إلى عندي حجيته ويبقى كلشي يمج.
دفع الحساب وطلعنا حتى ماتغدينا زين رجعنا للبيت
ذبيت أغراضي دخلت للحمام فتحت الدوش وگفت جوا بملابسي ودموعي تنزل اختلط
ب المي ضربت
علي جهه گلبي وشهگت وانتَ ليش ما تفهم اني حابتك.
كلشي اتفاق طلگني وخليني ارتاح مو بس وحدك جاي تتعذب
صعبة عليَّ أشوفك ويا وحدة ثانية، وصعبة عليَّ كلشي صار
وهوَ مو من حقي اي أعترف مو من حقي، لأن هوَ ما وعدني بشي ولا انطاني أمل بشي.
بقيت بالساعة داخل الحمام امي يم خوالي عيوني جمرت
نزعت ملابسي باوعت ضربت كصتي من ناسيه ادخل ملابس ويايَّ
فتحت الباب وگفت وراه صحت بصوت رايح من البچي
ريم: وارث
ماكو رجعت كررت يله اجه بس راسي طالع مبلل وچهي.
بس شافني غمض عيونه بنفاذ صبر لأن مبين باچيه رجع فتحهن
زفر نفس بحسرة وگال.
هاا ريم
نسيت ادخل ملابس ويايَّ ممكن تجيبلي
حاضر
راح يجيبهن سديت الباب، الشهكة بعدها بصدري
ثواني ودگ الباب مد أيده بيها اتراك أخذته منه وسديته
بدلت لفيت شعري بالمنشفه طلعت رحت للمطبخ شربت مي
ورجعت أمشي بالبيت چان مبدل وگاعد گدامه دفاتر مال طلاب.
ريم: اني داخله انام وارث
وارث: براحتج
جاوبني بدون ما يباوعلي، دخلت للغرفة بدون ما أمشط.
ذبيت المنشفه ولفيت نفسي بالغطه شعري مبلل نمت من التعب إلى بي غفيت بسرعة.
للمغرب گعدت عظامي مكسرة تكسر، وامي فوگ راسي
أسمعها تحجي وياه
نجاة: چم مرة ناهيتها ماتسبح وتنام مناعتها ضعيفة بسرعة تتمرض
وارث: رايح اجيب الها علاج انتبهي عليها.
فاتحه عيوني گوا حضنتني امي الحضنها
نجاة: ليش تعذبيني وتعذبين بنفسج ريمه.
ما اگدر احچي بلاعيمي طاكه رجعت غمضت عيوني نمت.
ما ادري شگد مر وقت رجعت فزيت على شخص يهمس بأذني أعرفه من صوته وعطره شفايفه على جبيني
وارث: برنسس أفتحي عيونج.
فتحت عيوني ماكو أحد غيرنا بالغرفة حجيت گوا
ريم: أريد انام.
بالاول اكلي واخذي علاج وارجعي نامي
هزيت براسي ساعدني گعدت دخلت امي بايدها صينية
اكل گعدت كبالي توكلني اكل گوا بس علمود العلاج كلت شوي وبعد ماگدرت
جاب العلاج گعد يشربني بي رجعت المكاني متمدده.
وارث: عمه روحي أنتِ، اني يمها.
طلعت امي وهوَ يفتر بالغرفة ما أدري شيسوي
ريم: يله اطلع.
دار عليه يباوعلي
باقي يمج
كله بسببك اتمرضت حقير
ليش شعليه اني ريم
أنتَ تقهر بيَّ.
گعد يم راسي واني احس نفسي عبالك سكرانه دايخه
أنتِ تقهرين بروحج
اسكت وردة
سكتت
عفية شطور استاذ وارث.
لزم أيدي دفعته بأهمال رجع لزمها
وارث: هم مريضة وهم تعاندين
ريم: شكد اكرهك
وارث: مو من گلبج، وحدة مثلج رب الحنان عندها ماتگدر تكره
ريم: أنتَ شتريد مني ماتعوفني يا اخي.
بقى ساكت بس يباوع بوجهي رجعت نمت
أحس بلمسات أيده بشعري
گضيتها نايمه الثاني يوم فتحت عيوني لازمه راسي
فتحت ايديَّ جسمي نحلان ضربت أيدي بشي صلب جمدت بمكاني
التفتت شفته نايم بصفي بدون ما متقرب مني نايم بالجهه الثانية من السرير.
فتح عيونه بنعاس، گعد يفرك بيهن
وارث: شلون صرتي
ريم: شتسوي هنا أنتَ؟
وارث: جنتي مريضة وبقيت يمج بالليل امچ مو مال تسهر
ريم: يعني أنتَ سهرت الليل كله هنا
اي نمت الفجر من نزلت حرارتج.
عدلت شعري واباوعله بأحراج نزلت عيوني
شكراً
عفواً، اتحسين نفسج احسن؟
اي.
وارث: بعد لا اتسبحين وتنامين وبدون تمشيط والجو بارد شوفي شلون تمرضتي
ريم: بكيفي وردة بكيفي
وارث: هاا صحيتي
ريم: ايييي مابيه شييي شوووف شووف
جاي أشوف، يله اتريكي وادرسي للامتحان الجاي.
طلع سد الباب لزمت اتراكي اشمشم بي شو هذا عطره بملابسي
شوف الحيوان ابو النسوان يمكن حاضني مستغلني واني مريضة
كمزت من مكاني ولا عبالك نفسي إلى البارحة مواته.
فتحت الباب طلعت صارت بوجهي امي حضنتني باستني
نجاة: الحمدلله على السلامة، وارث گالي صخونتج نزلت
ريم: الله يسلمج، يووم أنتِ ليش تخلين وارث يمي بالغرفة.
رجلج مو غريب
أوف منج أوف
عفتها ورحت اغسل طلعت شفته واگف وحدة بالصالة وامي بالمطبخ
رحتله هوَ جان منطي ظهره للباب دخلت أمشي بخطوات على كيفي
قبضت كف أيدي وبكل ماعندي قوة ضربته بنص ظهره.
بسرعة سحبني من أيدي لزگني بالحايط عيونه صايرات بكصته.
وارث: شنووو هل التصرفاااات ررريم
ريم: أنتَ حاضني واني نايمه مو؟
لا
اي
لا
اي
لااا
اي
لا
لا
لا
اي
اي
هااااااا شفتتتتتتت كشسشفتك ياااا جذاب.
شبيچ يمعودة
صاير تلعب بكيفك
ما امسوي شي غلط
لاا امسوووييي بأي حق تلمسني
أنتِ گتيلي نومني بحضنك.
فدددد چذاب وحق الله انييي ما احچي هيچ
رحم الله والديج بس ترا أنتِ نمتي على أيدي وبعدها اجيتي الحضني
احترررررررم نفسسسسك
أحلفي
والله والله.
كرص خدي يضحك
مشتاقلهن.
دفعته وطلعت يم امي گلبي عبالك خفقان بي
گعدت بدون ما احچي
اجه هو هم گعد گبالي صبت امي الريوك حچت امي
نجاة: ريم اني راح اروحن ويا جدج وخالتج سلمى ونادية للنجف باجر
ريم: لا عفية يوم انتظري اكمل امتحانات وانروح اني و وياچ فدوة.
وارث: خليها اتروح ومن تكملين اني أخذج أنتِ و وياها.
مسحت دموعي مشتاقه ازور أبوي گلبي طاك
ريم: وعد تاخذني
وارث: وعد بنيتي
نجاة: هايهيه يمه اني اريد اروح ويا جدج علمود أزور أمي هم.
ريم: تمام يووم توصلون بالسلامة.
كملنا ريوك وساعدتها بشغل البيت وارث اخذله ايام يگعد يصحح
بدفاتر الامتحانات إلى عنده لأن عنده ثلاث شعب عليه
كملت وأخذت ملازمني ورحت گعدت يمه أدرس.
ريم: مو تظلم أحد بالتصحيح انتم مدرسين الإنكليزي خبيثين
وارث: كل شخص ياخذ حقه اكيد ما اساوي المامجاوب ويا المجاوب
شوف شلون خبيث، يمكن المامجاوب خطية
صايرله ظرف لو أنتَ جايب الاسئلة صعبة وماگدر يجاوب.
خفي علينا أنتِ وحنيتج، اني من اشوف طالب يحتاج مساعدة أساعده.
خلي اصحح وياك
مو عندج دراسة
بس كم دفتر
تعاي
نهضت من مكاني فرحانة گعدت بصفه انطاني قلم وعلمني شسوي
ريم: أنتَ تخلي الدرجات اني بس احط صح او خطأ
وارث: اي بابا
خوش بس مو تگول ماتعرفين تصححين
انشوف شطارتج بالاول.
گعدت اصحح وياه وكل شوي أمد راسي للدفتر إلى يصحح بي
واتعلم منه شلون يصحح كل ما اخذ دفتر أشوف اسم بنيه
وارث أنتَ شنو تدرس بنات.
جاوبني وهو مركز بالدفاتر وتصحيحهن
اي، ليش برنسس
هاا هيچ، اول مرة أعرف تدرس بنات عبالي ولد.
هز براسه مامهتم للموضوع، ذكرت نريمان تداوم وياه
بنفس المدرسة اكيد ايشوفها بس لزمت الساني وماسئلت.
صلحت يمكن عشر دفاتر ومليت شنو هاي والله يدوخن الله يساعد المدرسين والمدرسات
حطيتهن گدامه عشرة دفتر فوگ دفتر أخذهن مني ايشوفهن
وگفت گدامه اكل بشفتي خاف يطلع بي غلط واتفشل رفع راسه مبتسم
عاشت ايدج
عليك الله يعني كلشي صح.
اي ومصلحه احسن مني.
رجعت شعري المامشط لوره وباوعتله بغرور
أتعلم مني التصحيح استاذ
هههههههه حطي رجليج بالگاع يأبه
باعتله بطرف عيني رجعت گعدت ادرس نوب شلون
راح ابقى وياه وحدي وامي راح اتروح صحت واني بمكاني.
يوووم شكد تبقون بالنجف
جاوبتني وهي بالمطبخ
نجاة: نبقى يجوز اربع ايام لأن نريد نروح مناك لكربلاء جدج يريد يشبع زيارة هناك.
سكتت خانسه شلون راح اتحملهن وياه رجعت ادرس.
الثاني يوم راحت امي وجدي والباقين للزيارة بقيت وحدي وياه.
الامتحانات خلتني حتى ما اكل انسى نفسي مرات مماكله
لو ابچي من صعوبة المادة لو ادرس مثل الاوادم وما اخلي يساعدني
مايخليني اطبخ يوصي كله دلفري وياريت لو اكل التفكير يسد كل شهيتي.
وارث: مو حاله هاي شوفي شصاير بيج
ريم: اكلك وارث اخاف باجر ما اجاوب شو مامتفائله
وارث: تفائلو بالخير تجدوه
حطيت القلم بحلكي من التوتر والقلق اعضض بي انسحب مني بهدوء.
راح تاكلينه شبيچ
تدري باجر امتحاني منو دكتورة
منو؟
دكتور مناف
طبك حواجبه هو أصلاً ما يعرفه ولا حاچيتله عنه
منو هذا
دكتور المادة
اي وليش هيج قلقانه منه
هاا هم صدك بس تعرف قلق الامتحانات
هز براسه ورجع گعد بمكانه
وارث: تريدين نطلع لو انروح البيت أهلي لا تتعقدين كله دراسه
اي اي طلعني اختنگت من جو الدراسة والعباس.
يله گومي بدلي
ركضت للغرفة بدلت بسرعة اني طلعاتي قليله مالحك بسبب دراستي.
طلعت چان هم مبدل لابس بلوز بيجي وجاكيت اسود وبنطلون هم اسود.
طلعنا قفل الباب بيت جدي كلش مقابيلنا دگينا الباب، فتح الباب آدم
آدم: يا هلا يا هلا هذا منو جاينه اليوم عاش من شافكم عبالي ميتين وانتم هالگبالنه.
سلمنا عليه
دخلنا جوا الولد كلهم موجودين حتى أكرم رحبوا بينا البنات فرحن بجيتنا.
آدم: عمي كوموا جيبوا ببسي سفن ميرنده كهوه
چاي غير يمنه خطار اخوكم ومرته خطار عندكم
عميد الدين: اخوك هم گوم جيب أنتَ.
صفا: آدم تروح لوو لا؟
آدم: طبعاً اروح هذا اخوووي العزيززز هو ومررته الحيه جايناا شلووون ما اجيببب
زيد: لا هاي لأن صفا گالتلك لو احنا چان ماجبتلنا
كفخه وطلع يجيب الولد گعدوا بينهم يسولفون واحنا بينه انسولف.
وَهج: شخبار الامتحانات
ريم: خليها سكتة
صفا: عادي الدور الثاني للابطال لا تهتمين
زينب: ياا شوف هاي بيمن تفاولها.
رجع آدم جايب حلويات وعصائر انطاهن الصفا راحت جهزتهن واجت.
آدم: جبتلكم حتى بقلاوة بعد شتريدون
زيد: راح يذلنا الخايسسس
آدم: تذكر بالمطعم شسويت من عزمتنا لو ناسي
زيد: دللتكم دلال هم گولوا چذب
خايب الفكر دسكت بيومها تذكر شصار لو ناسي.
ضلوا واحد يعير بالثاني حد ماعاط بيهم أكرم
أكرم: صوج امي من راحت ما اخذت زعاطيطها وياها
آدم: لا تجرح مشاعرنا
خابروا عميد الدين فتح خط يضحك جاوب المتصل واختفت أبتسامته
گام من مكانه ويباوع ال وَهج إلى بقت عيونها تباوعله بنظرات قلق سده.
عميد الدين: يُبا انا طالع يمكن اتأخر انتم أخذوا راحتكم
وارث: وين رايح عميد الدين
شغلة والله اكملها واجي
صاح ال وَهج طلعت وياه الدقائق رجعت گعدت ساكتة
أكرم: خوية شصاير
وَهج: ماكو شي بس صديقة محتاجه وراح اله.
هز براسه ومامقتنعين رجعوا يسولفون وأكرم گال لگوا
دكتور ال آدم علمود علاجه ومن باجر يبلش بي ومن ينجاب
طاري الموضوع آدم تحسه يتوتر بس اخوانه يحاولون يخلونه إيجابي.
زينب: أكرم رحيق ماباقي شي العيد ميلادها انسويلها السنة.
گعد بنته بحضنه يبوس بيها
أكرم: اكيد شعندي غيرها بس كون مايصادف عندي خفاره
زينب: هو بعد يومين
أكرم: أي هايهيه أن شاء الله.
أتقربت يمي وَهج
وَهج: شلونها علاقتكم أنتِ و وارث.
سولفتلها شصار بالمطعم من كلام وهيَّ تستمع إلى بدون ماتقاطعني حد ماكملت
ريم: بس بعدني مقهورة منه ما جاي اگدر اسامحه.
وَهج: انطي فرصة بينكم تتقبلون بعض وكلشي ينحل دشوفي عيونه مانشالت عنج.
رفعت راسي اباوعله چان يسولف ويا أكرم وعيونه عليه
درت وجهي بسرعة الها أكمل بكلامي وياها كلامها
چان عبارة عن كلام عقلاني تحاول تهدأ الوضع إلى بينه عبالك عميد الدين ويسولف.
رجعنا من البيت وگفت انتظره يفتح بالباب رفعت راسي
شفت مثل الخيال وره الشجرة الموجودة بلعت ريگ بخوف
لزمت بكتف وارث خايفة وعيوني تباوع للشجرة
ريم: وارث وارث
وارث: هاا ريم.
اكو واحد جاي يراقبنا.
وگف بأستقامه يباوعلي بأستغراب
يراقبنا؟
اي والله وروح أبوية شفت الخيال يم الشجرة.
دار وجهه يباوع النفس المكان ماكو شي رجع دار عليَّ
ماكو شي
بيمن أحلفلك شفتتتتته بعيوووونيي.
لزم وجهي يهدأ بيَّ
اهدأي هسه أشوف.
عافني وراح يمشي باتجاه الشجرة ركضت وراه لزمته من أيده
لا تروح خاف واحد يريد يأذينه.
خليني أفتهم شبيچ يا بوية شبيچ ترجفين
عافني مشى بخطوات واني بلعت العافية من الخوف.
متأكدة شفت أحد، بقى واگف يدور ماكو أحد رجع يمي.
وارث: ماكو احد
ريم: دا اگلك انييي شفته بعيوني
يجوز يتهيألج لو صفنتي بالظلام وصارتلج هل التخيلات.
أخذني من ايدي دخلني الداخل البيت ليش مالگه أحد
اني بعيوني شفت الخيال، شنو أتخبلت لليل كلش أريد انام ما أگدر
وهو ينام بالصالة وارث، اخذت مخدتي والغطوة مالتي طلعت
نايم متمدد وبأيده جهازه من شافني رفع عيونه.
وارث: هاا شو چنج مهاجرة.
ريم: ترا ما خايفة، بَس يعني ضجت وحدي
أي أي
شبيك مدا اتصدگ
أحلفي
حرام الواحد يحلف، هسه شبيك أنتَ تنام بهاي الجهه واني بهاي الجهه
بكيفج.
ذبيت مخدتي على الأرض ونمت متمددة اباوعله يلعب بلعبة ومبتسم
شدا اتسوي وارث
ألعب بلعبة تلعبين؟
ما أعرف العب لأن مالازمه هيچ أجهزة غير الصرصور مالت امي الجهاز وبي لعبة الحيه
مو جبتلج تليفون
ما أريده
ليش مو عندج صديقة ماتحبين تتواصلين وياها، مرات يمكن تحتاجين شي هم يفيدج.
تكثر مشاكلنا بسببه
مو شرط، اني جاي احاول اقضي على الشك لا تخافين من ناحيتي
راح اجيبه وتنزلي اللعبة
تمام
نهضت من مكاني نوب خفت ادخل للغرفة رجعت اله
تعال ويايَّ
شبيج جبانه
احتررررم نفسسسسك.
گام من نومته اجه ويايَّ طلعنا الجهاز ورجعنا للصالة
أخذه فتحه سوا إلى ورتبلي البرامج
وارث: شتريدين من برامج
ريم: مادري
انزلج انستا واتساب
اوكي بس ماعرف كلش استخدمهن
هسه اعلمج كلشي.
گعد يشرحلي ويعلمني شسوي حد ماصارتلي فكرة.
يله نزلي اللعبة
لا مو هسه، إذا انزلها هسه راح تلتهين بيها وتهملين امتحاناتج كملي وانزلها الج
اريد العبهااا
هاج جهازي العبي شوي
اخذت جهازه، نوب كلشي ماعرف بيها رفعت راسي اله
ماعرف شي
اخخ من العناد شلون ايصير
احتررررم نفسسسسك
محترمهاا.
اجه گعد يمي رفع أيده حاوطتني من وره لزم اصابيع ايدي
ويحرك بيهن باللعبة، ضربته بعكس أيدي ببطنه
ريم: لاااا تلزمنيييي
وارث: غير اعلمچ
سوالفك واضحات
نيتج شاطحه للمريخ مو بيدج.
اخذت جهازه ورحت نمت بفراشي العب بيها اندمجت بيها
حد ماصرت اغفي وگع مني، اخذه مني غطاني
وارث: نامي يله وراچ امتحان الصبح
ريم: باجر تخليني العب بيها
يأبه العبي بيها بجهازج
لا اريد بجهازك
ماشي هههههههه متفقين بس نامي.
ايدددك لا تلزمنيي
استغفرالله
استغفرالله كثرة الاستغفار تخفف الذنوب
دفنت راسي جوا الغطى اضحك بصمت غفيت
للصبح أخذني للامتحان وخايفة من اسئلة دكتور مناف اتسلمت الاسئلة النا.
ومثل ما اتوقعت خلى الطلاب تصفن بالاسئله طلعت منهاره من الامتحان
اجت سُرى وراي نفس الحاله هم مامجاوبه.
ريم: شبييي اخوووج اكووو واحد يجيب هيچ اسئله
سُرى: شمدرينييي اني أخته وما ادري بالاسئله
هسه يطلع منطيج الاسئله ومجاوبه بس تطردين عين
لا والله حالي من حالج.
طلعت الجهاز اتصل ب وارث يجيني من شافته اتفاجأت
سُرى: اشتريتي جهاز
ريم: اي
چا انطيني رقمج.
طلعت رقمي انطيتهياه رمشتلي علمود احفظ رقمها.
خابرته يجيني، بقيت گاعدة يمها حد ما اجه ودعتها ورحتله الدمعة بطرف عيني.
صعدت مبرطمه
وارث: هاا مبرطمين اليوم
ريم: ماجاوبت زيننن
ليش؟ مو درستي زين
الدكتور جايب الاسئلة صعبة الطلاب كلها بقت اتصفن
لا تضوجين المهم سويتي إلى عليج
وإذا رسبت
ماترسبين شاطرة أنتِ.
مسحت دموعي ما اگدر احچي شي عن مناف بس خايفة لا يسويلي
مشاكل بالمستقبل، إذا احچي هسه و وارث بهذا الوضع ما ادري شيصير.
صفا.
جهزت نفسي أطلع ويا عميد الدين وآدم علمود انروح
للدكتور سوا، طلبه چان اكون وياه بكل خطوة
ردنا نطلع وأبوي دخل للبيت صرت أبلعم هسه أذا شافني راح يسئل
وگف يباوعلي مجهزه نفسي وآدم وعميد هم واگفين ضلوا يباوعون عليه وهو يباوع عليهم
أشرف: وين رايحة صفا؟
صفا: للدكتور
دكتور شنو
أحتاريت شكله أدخلت وَهج
وَهج: عندها مراجعة علمود ظهرها من ذاك اليوم من وگعت
وعميد الدين وآدم هم رايحين لدكتور وبطريقهم ماخذينها.
أشرف: لا تتأخرين من ترجعين أصعدي الغرفتي
ذب كلامه وصعد، بقينه اني و وَهج وحدة تباوع بوجه الثانية بأستغراب
آدم: شيريد منهاا؟
وَهج: هسه روحوا والله كريم لمن ترجعون.
طلعنا احنا الثلاثة بسيارة آدم يسوق متوجهين للدكتور
لمن طلعنا من فرع بيت جدي يله اتنفست براحة أيدي على گلبي.
عميد الدين: آدم تطبق كلشي يگوله الدكتور
آدم: أن شاء الله خوية
وصلنا المكان الدكتور نزلنا حاجزين حجز ما قبل ادخل عميد الدين.
دخلوا بس هو وآدم بقيت انتظرهم اكو مراجعين هم موجودين.
دعيت ربي تكون خطوة موفقة ويگدر يتغلب على مرضه
مر وقت طولوا جوا، حد ماطلعوا آدم عيونه بكصته وحمر
عميد الدين لازمه عبرني وطلع بدون ما يباوعلي شبي هذا
صفا: شصار
عميد الدين: ماكو شي كلام روتيني بس آدم ضاج منه لا تشيلين هم.
طلعنا من يم الدكتور جان گاعد واگف يغسل بوجهه وأيده ترجف
خفت واني بمكاني راحله عميد لزمه فتح باب السيارة گعده.
عميد الدين: شحچي هسه ولك ليش ليش دمررت روحك بهذا السم شووف وضعك
صفا: آدم
باوعلي خفت من لون عيونه هنه شهل وداير مداير صايرات حمر خفت من شكلهن.
ماگدرت احچي شي بعد رجعنا للبيت وهوَ ساكت
ومحد يحچيلي شصار وياهم جوا يم الدكتور بنص الطريق
وسيارتين حاوطن سيارتنا
آدم: شبيهم ذوله شنو ماخذين بطاله من ابطالتي
عميد الدين: اوگف خلي نفهم، شبيهم ذوله
صرخت بصوت من ثأرت رصاصه حيه والواضح الضربه.
بالتاير خلت سيارتنا تروح يمين ويسار يريد يسيطر عميد الدين
عليها مايگدر گلت هايهيه نهايتنا اليوم.
گوا سيطروا عليها وگفت نزلوا بسرعة نزلت وياهم
چان التاير مضروب، والسيارات مالحگنا نعرف منو بيهن
عميد الدين: هاي ماكو غير سوالف بشار الكلب ابن سطعش كلب
آدم: يريد ياخذ ثأره منه بيوم ماكسرنا أيده.
جسمي كله يرجف من الرهبة إلى صرنا بيها گعدت لازمه راسي اجوا اثنينهم يشوفوني
آدم: صفااا شبيچ.
راح عميد الدين جاب ماي واحنا واگفين على شارع ترابي
حتى قلة سيارات اتفوت، انطوني البطل لأن مايگدرون
يتقربون أكثر أخذته منه غسلت وبعدها الرجفه بيَّ.
حد ماهدأت شوي خابروا على زيد يجينه نص ساعة واجه نزل متعجب على حالتنا
زيد: هذا يا مسوي هيچ
عميد الدين: اكو غير بشار الخيخه الخنيث مايجي يواجه بروحه يدزلي چلابه.
آدم: زيد أخذ صفا للبيت
صفا: وانتم
آدم: انشوف حل السيارتي ونرجع لا تخافين.
لا فدوة ارجعوا ويانه عود السيارة بعدين
عميد الدين: مايرجعون لا تخافين يله يُبا روحي ويا زيد.
أخذني زيد مرجعني للبيت وهم بقوا أباوعلهم من الجامه
وگف عميد الدين الواضح جاي يشرح بشي
ال آدم
اجه زيد صعد، رجعني للبيت وراح مانزل دخلت للبيت
اتلگتني وَهج باوعتلي مستغربة اجت لزمتني حضنتها بخوف نزلت دموعي
صفا: رادوا يموتونه.
وَهج: اسم الله صفصف شبيچ ليش هيج وضعج
گعدت مهبوطه، حجيتلها كلشي بنص كلامي باوعت ورايَّ.
وَهج: إذا زيد جابج چاا وين سَند؟
صفا: شنو؟ سَند شدخله
سَند مو راح ويا زيد، زينب گالتلي أخذه زيد وطلعوا.
مسحت وچهي مافاهمه شجاي أيصير
وَهج شتحچين زيد اجه وحدة
اتجحظت عيونها مصدومة طلع الكلام منها بتلعثم ورهبة
وَهج: أبني وين؟