رواية وقار الغريب للكاتبة حوراء السعيدي الفصل التاسع عشر
ريم.
فتحت عيوني راجعه لوعيي شفت نفسي بعدني بنفس
الغرفة مال وارث، منيميني على السرير درت وجهي
شفته گاعد على جهه وصافن بالسگف يرمش بهدوء
نزل راسه باوعلي من شافني بسرعة نهض من مكانه واجه گعد بصفي
وارث: ريمه شلونچ هسه
باوعتله ونزلت دموعي من اتذكرت كلامه اخر مرة يگول كلچن نفس الشي.
بدون ما أرد عليه نهضت من مكاني مشيت للباب أستوقفني كلامه
ماچان قصدي اعلي صوتي عليچ.
مديت أيدي اريد افتح الباب اطلع ما ادري شلون صار گدامي
وارث: ليش ماتجاوبيني
ريم: ماكو كلام بينه
لا تزودينها عليَّ كافي مصيبتي
ممكن تبتعد اريد اطلع.
فتح الباب بأيده طلعت من يمه، وگلبي محمل منه شفت أمي
تصعد على الدرج مبين جايه اتشوفني، مجرد شافتني فتحت عيونها
اجتني تركض وتسئل بلهفة خوف لزمتني
نجاة: شلون صرتي يمه
ريم: زينة يووم لا تخافين مابيَّ شي
نجاة: تعاي ننزل ترتاحين.
هزيت براسي اخذتني من أيدي، ما ادري شبيَّ گلبي محتررگ حرررك منه.
نزلنا من فوگ لاگانه جدي أخذني الحضنه باس راسي
عزام: شلونچ هسه حبيبتي
ريم: أحسن
عزام: وارث گالي حاچي وياچ كلام يضوج ويجرح
لا تشيلين بخاطرج منه اعذري، إلى صار اليوم صعب يتقبله بسرعة
ريم: ما يهمني جدي بس مو معناها يقارني بيها.
زلة لسان
الله كريم
عفته ودخلت للغرفة اتمددت بمكاني انفجرت ابچي
بچيت حد ما گلبي بقى يأذيني خفت ترجعلي الحالة طلعت للحمام.
أسمع اصوات الكل جايه من الصالة غسلت ورجعت نمت
كل ما أريد اعذره أتذكر قساوة كلامه ويايَّ غصبت نفسي
تنام علمود ما افكر بشي ولا اتنازله وارجع اله بسس اخخ من گلبي.
بقيت متمددة وفاتحة عيوني حسيت راح افقد عقلي
من التفكير إلى حاوطني، إلى صار اليوم صعب مثل ماگال جدي
تحب شخص وراسم حياتك وياه وبعدين يغدرك هالغدره
مو الكل قوية وتتحمل الخيانه عفت النوم ورحت الملازمي
لزمتهن افتح بيهن واسد اتمنى هسه اصرخ واريح گلبي.
للصبح گعدت أمي بعدها نايمة باوعت للساعة ب 5: 00 الصبح
مانايمة بس ساعتين طلعت اباوع بأرجاء البيت هدوء والكل بعده نايم
رفعت عيوني للطابق الثاني، عقلي يگلي لا اتصعدين
لا تنسين إلى سوا وياچ البارحة، وگلبي يكلي لا تقسين
عليه أنتِ والزمن موقفه مو سهل، أعترف كرهت نفسي
بسبب هذا الشعور المحاوطني والتناقض.
طلعت للحديقة گعدت بيها الفجرية الجو بارد لأن بداية
الفصل الشتائي وملابسي بعدها صيفية كمزت بمكاني.
من انفتح الباب مال البيت ودخلت سيارة آدم نزل منها شكله
مو على بعضه ومبين شارب، حتى ما انتبه الوجودي دخل للبيت
شلون يسوق هذا وهوَ بهذا الحال، بقيت گاعدة بمكاني لمن طگني البرد دخلت شفت خالة سلمى
گاعدة ومبين القهر بملامحها وزينب واگفة تجهز بالريوك
و وَهج طلعت من الحمام مغسله، شافتني.
وَهج: صباح الخير شلونچ ريمه
ريم: الحمدلله
بدأ الكل يگعد وكلمن أتريك وطلع الشغلة وارث مانزل ولا شفناه.
وصلني زيد للدوام لأن آدم عفناه نايم إذا هو راجع الصبح شيگعده.
أفتر بالجامعة سُرى ماشفتها اليوم أنتبهت النفسي لابسة
الحلقة بعدني، نزعتها حطيتها بالجنطه عليمن لابستها ما ادري
گعدت بمكاني إلى بكل مرة اگعد بي ايدي جوا خدي صافنة بالدنيا
ما ادري شلونها ويايَّ، اني مو من النوع إلى ما أهتم لا
الشي يضل ياكل بگلبي اكل وما اعرف ابقى أتصرف طبيعي
ضوجتي تبين بملامحي إلى ماتتعدل اله الشي ينحل وارتاح.
اجت نفس البنيه إلى ضربتني ذاك اليوم وگفت گدامي باوعتلها ببرود
ريم: اتفضلي
اجيت اگلج كم كلمة واروح
وهنَّ؟
گعدت يمي وخلتني فاتحة حلگي بكلامها
ادري بيج جاي اتسوين كلشي علمود تخلين دكتور مناف ينتبهلج
واتريدين تكسبينه الچ، ف انصحچ اتعوفين هذا الشي لأن مو بصالحچ تمام يحلوة.
بقيت متعجبة على كلامها وتسفيطها زمخت بيها
احتررررميي نفسچ قااابل الكل مثلللچ ادبسززز
اخذت جنطتي وطلعت أمشي سريع دمي فاير الله لا يوفقها.
فورت دمي، من طاح حظج وحظ دكتور مناف وياچ على هيچ تفكير
دخلت للقاعة مالتي گعدت وسُرى ماكو اليوم ماداومت
من ارجع اخابرها من تليفون امي أشوفها والغريب حتى دكتور مناف مامداوم اليوم.
ومر الدوام حد ما قبل لا اطلع اجت طالبة وصعقتني بالخبر
هلو ريم اگلج تروحين ويانه البيت سُرى
شعندهم
ليش ماتدرين امها اتوفت
فتحت عيوني مامصدكة
شنوو شوگت ماتت
اليوم والبنات گالو سُرى صديقة بالقسم ولازم انروح
شوگت اتروحون.
باجر من نطلع من الدوام
اي اي اروح.
طلعت من الجامعة ميتة قهر على سُرى لگيت زيد منتظرني
صعدت بس سلمت مالي نفس احچي شي
زيد: شو البنات تطلع تزاگط شبيچ أنتِ
ريم: ام صديقتي اتوفت
زيد: هاا الله يرحمها، هم وارث هسه جبته من المستشفى.
التفتت اله بقلق
ريم: ليش شبي وارث؟
ضغطه وما ماكل
يريد يموووت نفسه علمودها
درت وچهي للجامه راح انفجر منين ما ادور مصيبة والله تعبت
وصلنه للبيت نزلت دخلت جوا أسمع جدي يسولف وياه وينصح بي.
رحت الأمي علمود احچيلها إلى صاير چانت گاعدة يم البنات.
ريم: يووم ام سُرى اتوفت، نفسها صديقتي إلى سولفتلچ عنها
نجاة: ياا سوده عليَّ الله يرحمها
ريم: وطلاب قسمي راح يروحون واني گتلهم اروح وياكم
نجاة: شلون ترجعين.
هم يرجعوني وياهم گلت انطيج خبر
اي يمه روحي دامها صديقتج بس انطي خبر الوارث
ليش شعليه؟
ريم أنتِ مرته بالشرع بعد لازم تنطينه خبر
عضيت شفتي اكتم غضبي سكتت ماجاوبتها لأن بس احچي راح أنفجر وتلاص.
تغديت وبلشت ادرس وصفا صارلها كم يوم هادئة
ريم: أنتِ وضعج ماعاجبني
صفا: منو اني
ريم: لا خيالچ، اي أنتِ
صفا: لا ماكو شي بس جايني مود بس اريد انام
عافتني وطلعت والله هم شغلتها مبينة مو خالية
للمغرب رجعت وَهج واكيد أكثر وقتها ويا ابنها تقضي ماتفارگه.
لازم اروح احچيله بس خاف يعاند بهذا الوضع ومايقبل اروح
لا هوَ مو من هذا النوع، مالگيته يم جدي گالو بغرفته صعدت فوگ.
دگيت الباب اجاني صوته يگول ادخل فتحت الباب چان نايم متمدد دخلت سديته ورايَّ.
ريم: وارث
من سمع صوتي فتح عيونه طابگ حواجبه وعيونه دم حمر
وارث: اتفضلي
ريم: صديقتي امها اتوفت وطلاب القسم راح يروحون واني حروح وياهم
وارث: ماكو مشكلة.
هزيت براسي وطلعت عفته وحدة نزلت انطيت خبر الأمي
وهيه مرت الايام يوم يجر يوم رحت مرتين البيت أهل سُرى
وحالتها تبچي الصخر مرة ويا طلاب القسم ومرة اخذنه زيد اني وامي.
دكتور مناف ولا شفته ولا حتى لمحته والي دمر نفسيتي
وضع وارث إلى اعتزل بنفسه وماينزل ولا يشارك بالگعدات وياهم.
اعتزل بنفسه عن الكل يصعدون يحاجونه ماكو فائدة
وامه اتريد تموت عليه صحته بدأت تتراجع ادمر دمار نفسيًا وجسديًا
كل هالفترة أسمع الكلامهم، وامي شگد تحچي
اصعد اله احاچي ما اصعد، خلي يموت نفسه علمودها ويمرض بنفسه ويدمرها.
شفت الكل نام مثل كل يوم، رحت للمطبخ طلعت مواد.
الشوربة و وگفت اسوي بيها بين ماكملت صبيتها وصعدت
بيها اله أمشي على كيفي كملت صعود الدرج وآدم طلع من غرفته
آدم: وين رايحة
ريم: الاخوك العاشق
آدم: وهذا شنو بأيدج
ريم: شوربة.
اريد
جوا بالمطبخ بالجدر اكو
إذا مو طيبة احطها براسج
احترررررررم نفسسسسك
هههههههه يله روحي وشرط وكلي بأيدج القزمه
اهووو لا تضل تتتمررر ايدي ناعمه مو قزمه
يله يله ما اتنمر لا تبجين روحيله.
عافني ونزل كملت طريقي والصينية بين ايديَّ وگفت يم الباب
حطيتها بالأرض، وسحبت نفس دگيت الباب ماكو صوت
فتحته الغرفة ضلمه دخلت شغلت الضوء نايم اخذت الصينية
دخلتها حطيتها على الميز وبقيت واگفة بمكاني
هسه شلون اگعده خاف اگعده وينعاط بيَّ.
بقيت أفتر بالغرفة لازم يگعد وياكل بس شلون
والله راح أگعده
وشيصير خلي يصير، صعدت على السرير گام يطلع صوت
اتقصدت بلكي يگعد، رجعت اطلع صوت مرة ثانية فتح عيونه منزعج.
وارث: شتسوين هنا
ريم: مختنكة راح اموووت اخخ گلبي.
فرگ عيونه وگعد على حيله يباوعلي بخوف مد أيده سحبني من أيدي
كعدني بصفه يباوع بنظرات وترتني اجيت اغم نفسي
هسه لو يعرف چذب اله يلزمني هنا يطلع ضيم قهره مال هالفترة.
وارث: شبيچ
ريم: شسمه سويت شوربة تاكل ويايَّ
شوربة وبهذا الوقت شبيچ ريم؟
اي شبيك اشتهيتها
اكلي أنتِ اني ما أشتهي
مو اني حلفت إذا متاكل ما اكل
شوگت حلفتي
واني اصعد على الدرج
ريم
هاا وارث.
شبيچ مختنكة.
من ناكل اسولفلك
ما اريد
زمخت بي
ترررررا مووو بكيفك تاكل وأنتَ الممنون.
رفع حاجبه يباوعلي
صدگ؟
اي صدگ لعد شنو
راجع انام اني وشوربتچ اكليها أنتِ الف عافية.
انطاني ظهره ونام نوب صدك اختنگت صارت الچذبة صدك
دغيته بأصبعي بكتفه
ريم: شبيك ضحيت بنومتي علمود أسويها الك وماتاكلها
وارث: بوية أحد عاتب عليچ
ريم: اني مو زعلانه منك المفروض تراضيني
وارث: ليش زعلانه.
لازم نسيتتت شسووويت ويايَّ
گتلچ مامتقصد
مايخدمني هالكلام.
چا شتريدين
اكل الشوربه ويمكن ارضى
زفر نفس بقلة صبر ورجع گعد أشرلي عليها اجيبها ماصدگت
كبل رحت جبتها حطيتها گدامه مبتسمة صارت بنصنه.
شو جايبة خاشوكتين
غير ناكل اني وياك
عود صدك تحبينها
لا بس علمود اسويلك واهس تاكل
اتوترت من ردت فعلة كرص خدي بخفه مبتسم وگعد ياكل
اثنينه ساكتين نوب هاي حركته انطبعت بعقلي.
يله سولفيلي شبيچ
شسولف
رفع راسه يباوعلي.
مو گلتي مختنگة
اچذب عليك هههههههههه.
ضل ساكت بس ماچنت ادري جذبتي الفطيرة هاي هيچ
راح تغثه اباوعله علامات العصبية كلها بانت بملامحه وتحسه بصعوبة لازم نفسه.
ريم: علمود تاكل
وارث: وتگليلي ليش تغلط بالكلام ويايَّ
ريم: استاذ وارث اني ما اچذب ولا احبه للچذب بس مرات
ننجبر نچذب چذبات بيضه بيها فائدة وما اتضر هسه
اني جذبتي علمود تاكل مو علمود شي ثاني
وارث: لا تكرريها لأن هذا الشي ما احبه.
نزل من يمي وطلع برطمت بزعل هسه شسويت اني.
غير علمود تاكل باقي هيچ كله علمود وحدة استغفرالله
نزلت اخذت الصينية وطلعت وهوَ بعده بالحمام اسمع صوت ال مي.
دخلت للمطبخ آدم گاعد وگدامه كاسة شوربة وبأيده جهازه
آدم: هاا بشري
ريم: اكل
آدم: رحم الله والديچ، بس اخوي طلع كلب ابن كلب.
أستداريت عليه
ريم: ليش؟
چا ماضل واحد ماصعدله يحاچي مافاد بس رحتيله اكل
عبالك اكل بسهولة؟
هاا
غير جذبتلي چذبة يله اكل نوب من اعترفت طنكر بوچهي
هسه اله تعترفين.
شمدريني اخووك مايتحمل اووي عينيي
احم
شكوو تتحمحم
أشرلي على الباب درت وجهي وصرت أبلع بريگي
من فشلتي شفته واگف وأيديَّ مكتفهن ببعض
وارث: تعاي ورايَّ
ريم: اريد انام
وارث: انتظرج دقائق إذا ما اجيتي ايصير غير حچي
ريم: لا ما اجي اريد انام.
عافنه وطلع گعدت گبال آدم يباوعلي صافن
آدم: شو گعدتي زوجة أخي
ريم: لعد شسوي
مو صاحلچ
ما اروح هسه يضل يچفص واني گلبي محمل عليه
گلبچ هم يحمل ههههههههه
لعد شبيه
حدثي.
اوووي سووالفك مادري شلونها اروح انام أحسلي.
رحت للغرفة اريد ادخل، وانسد حلگي فتحت عيوني بخوف همس بأذني
وارث: اش هذا اني
غمضت عيوني وجسمي يرجف من الهبطه ادفع بي مايندفع
لا تبقين تدفرين اش، بعد إذا اشوفچ گاعدة بهذا الوگت انصير مو حبايب خوش.
عافني وصعد أيدي على گلبي دخلت كبل للغرفة من خوفي
فلك فلكني منين طلعلي نمت بصف امي واغلط عليه بگلبي.
مافزيت الصبح اله على صوت صياح وارث وتكسير.
بقيت بمكاني واسمعه يحجي مفرفح نزلت دموعي على صوته
الي راح من العياط ويريدون يهدونه وهوَ يصيح وماجاي
يتقبل الموضوع ولا ادري شوكت راح يتقبله جرحه من نريمان
مأذي ماجاي يخلي يشوف بعيونه، حد ماسمعت صوت عميد الدين يصيح عليه ويكله.
عميد الدين: ماتحبهااا يُبا أنتَ حالتك هاااي كلهااا
لأن متعلق بيهااا، مووو حب وارث ارجع لوووعيك لااا تدمررر نفسك بسبب تعلق.
وارث: لك عميد الدين تغدرررنييي هالغدرررة صعبةةةة والله صعبةةةة
بعيووونيي شفتههه حاضنهاااا بشنوووو قصرررت وتطعنييي هيچ طعنههه.
بقيت اتسمع الكلامهم وصوتهم الرج البيت قررت حتى دوام ما ادوام
وبكل يوم تنعكس حالة وارث اني بداخلي اموت الف موته
صار اعصاب مايتحاچه أقل كلمة كافله تنرفزة وتخلي يرعد رعد
بعصبيته صاروا يتجنبونه يوم ياكل اسبوع ماياكل تعبت نفسه وتعبني وياه.
وره اسبوع من كل هذا رجع يداوم وبيوم رجع من دوامه
مثل كل يوم جدي يگعد والكل يجتمع يمه دخل وارث
لابس لبس طلعه يريد يطلع وقبل لا يطلع خلاني صافنه بقراره.
وارث: جدي الخميس حضروا أنفسكم راح ايصير زواجي اني وريم.
صارت لحضة صمت وهدوء، هم ما اهتم الأي شي عافنه وطلع
باوعت الأمي وال جدي وحتى عميد الدين ماحچوا شي
اخذت ملازمي ورحت يم وَهج چانت تنوم بأبنها
ذبيت الملازم وافرگ بعيوني.
وَهج: شبيچ.
ريم: لچ وَهج هذا وارث يگول الخميس زواجنا
وَهج: اي وليش هيچ حالتچ مو هذا شرطچ چان
ريم: شو من صارت صدك أحس باحساس غريب حاوطني
ريم
هاا
أنتِ جاي تميلين الوارث
مافهمت؟
بدت مشاعرچ تميل الوارث
لا ماكو هيچ شي مشتبها
ههههههههه لا والله ترا مبين تحبي
شبيچ شحبن
امم چا ليش وضعج يتخربط كله من ينجاب طاري اسمه
لو من يدخل للبيت عيونچ تبقى تلاحگه وين مايروح
فاضحه نفسچ بنفسچ، ف لا تقنعيني ماحابته.
گعدت يمها مقهورة لأن إلى حچتها صح اني مشاعري
جاي اتميل اله شگد حاربت نفسي بَس ماگدرت
وخايفة لا ابقى بهالمشاعر وهوَ گلبه مو ألي نزلت دموعي منزله راسي.
ريم: بَس هو مو مثلي، شوفي حالته شلون اتمرض
وعزل نفسه لأن خسر إلى يحبها، وبعده يحبها كل مايگلوله تعلق يرفض هذا الشي.
وَهج: والتعلق التشافي منه يتأخر تدرين التعلق أقوا من الحب
ريم: شسوي وَهج والله جاي اموت يحترگ گلبي من أشوف حالته.
وَهج: شافي من هذا التعلق بأيدچ.
رفعت راسي الها مافاهمه منطوق كلامها
ريم: شلون؟
مثل ماگال عميد الدين هذا تعلق وارث اتعلق بيها
اهتمام منها بوقت ماچان محتاج هذا الشي بالنسبة الشخص
مثل وارث جبير وماينتسى بسهولة بعدين وين أكو واحد يحب
تصرفاته وياج غير، لو يحب صدگ ما تظهر منه ردات فعل من ناحيتچ.
سكتت عنها، وبدأت تجهيزات زواجنا كأي زواج ايصير
عند كل بيت عراقي، الكل فرحان ماعدا هوَ ماشفت ضحكة.
أو اي شي يدل قبولة بهذا الزواج، وكل ماتطلع خالة سلمى
اتجهز النا ينطيها فلوس وأسمعه يگلها جيبي الاحسن والافخم مثل مارادت ريم.
آدم: يا الله انفكت الجبسة مال بيت حجي عزام
زينب: يله أن شاء الله بعد زواج عميد الدين يجي دورك
آدم: لا عوفوني هيچ مرتاح اطلع واطب بكيفي ماكو حكم حكومة.
دخلت امي بأيدها الجهاز گالت
نجاة: ريم هاي صديقتج جاي تتصل.
رحت أخذته منها شفتها سُرى اتصلت عليها جاوبتني بسرعة.
سُرى: ولچ وينچ صارلي ساعة اتصل
ريم: هلو حبيبتي سُرى ماچنت يم الجهاز هسه امي گالت
سُرى: شلونچ شنو هاي البطاقة عود صدك راح تتزوجين بالدوام ماگدرت احچي
ريم: اي.
مو گلتي ماتريدين تتزوجين
ابن خالي ويانه نفس البيت
هاا، الف مبروك
الله يبارك بيچ، شلونچ أنتِ
ذبت حسرة مختنگة.
ماشي الحال بس البيت احسه يريد ياكلني من امي ماكو.
بقت تبچي انقهرت عليها بقيت أسولف وياها ومابيدنا شب نقدمه غير المواساة للشخص.
سديته منها وأنفتح الباب چان وارث أتقدم إلى بدون مقدمات سئل
وارث: ويامن تحچين؟
ريم: ويا صديقتي سُرى
سحب مني الجهاز خلاني صافنه بتصرفه بقى يتفحص بي
وأصلا جهاز امي من ذني القديمات، لثواني خلاني أحس يشك بيَّ بسبب تصرفه.
ريم: شدا اتسوي وارث
وارث: اتصلي على نفس الرقم گدامي.
أتشخصت عيوني عليه معقولة لهلدرجة
تشك بيَّ
اتصلي
وإذا ما اتصلت؟
ريم لا تخليني اتصرف تصرف غلط
گوول اشك بيچ
لا مو هيچ
لعد شمعنى تصرفك هذا؟
ضل يباوعلي بنظرات ماعرفت افسرهن عافني وطلع
گعدت منهارة، لا ياربي اله مرض الشك لا تخليني أعيش معاناته
وكل ما أكول الدنيا بدأت تريحني ترجع توگعني بالأصعب.
رحت ويا وَهج علمود نختار البدله ونحجز يم الصالون
وهوَ يأخذنه ويرجعنه لأن رجع الصحته مثل قبل لا ايسوي حادث
وقبل لا ننزل كال أخذي إلى يعجبج وبكل مرة يثبتلي إلى بعقلي
صح وارث بدأ يشك حتى بأظافيره لبست البدله
الي اختارتها وَهج إلى وطلعت اتشوفها عليه.
وَهج: كلش حلوةةة ونازكة لايگتلچ
ريم: اي حلوة.
نزعتها وحجزناها وبعدها حجزنه الصالون ورجعنه وماباقي الزواجنا
غير يوم واحد قررت اخصم الموضوع وياه وأشوفه اريد اسمعها منه.
كل يوم بالليل يگعد بالحديقة وحدة مرات الولد يگعدون يمه
گعدت هالمرة اني وياه ومحتارة شلون افتح الموضوع
ريم: وارث أنتَ متغير.
رد ببرود وعدم مبالاة
وارث: من اي ناحية
ريم: كلشي، مو نفسك وارث إلى اعرفه
وارث: تعودي على الجديد معناها.
أسلوبه جاف وناشف مو مثل قبل ولا وارث إلى اعرفه
ملاحظ نفسك صايرة عندك أفعال الشك
متوهمة
لا أبداً وارث، والله صاير عندك شك اتجاهي
إذا هيچ تفكيرج ف okay.
نرفزني بطريقة أسلوبه
تبقى بهذا الأسلوب الغي كلشي
مثل شنو
الغي الزواج كله، اني ما اريد اعيش بعذاب وياك وأنتَ بهذا التفكير
اتوقع بنفسچ ردتي زواج البصرة كلها تحچي بي وجاي احققلچ إلى أتريدي.
وهسه ما أريدة
رفع راسه يباوعلي حتى نظراته مو مثل قبل نظرات قبل أحس.
بيهن متجمع كل الامان أما هسه كل القلق والخوف ينزرع بيَّ من اشوفهن
اتأخرتي هالمرة اني إلى أريده.
وگفت أحذره بالكلام
ديربالك تستخدمني وسيلة انتقام من إلى أذوك لأن صدگني
بذيچ الساعة أنتَ إلى راح تخسر كلشي مو اني وماراح
أتشوف ريم إلى هسه واگفة گدامك راح اتشوف انسانة ثانية.
سحبني من أيدي أحسها انملخت انضرب راسي بصدره
رفع أيده محاوطني بين قيود أحضانه.
وارث: لا تهددين، لا تخليني أذيج لأن مو وارث القديم إلى تعرفي گدامچ.
رفع أيده يمشي بيها على ملمس خدي غمضت عيوني وأردفت
ريم: ولأن موو القديم جاي احذررك.
أمشي عدل ويايَّ علمود ماتتأذين
لا تخليني اكررهك وارث
اكرهيني هوَ اني أريدچ تكرهيني، اكرهيني شگد ماتگدرين.
رفعت ايدي الوجهه ذبلت عيونه وهوَ يباوعلي
ليش تغيرت هيچ؟
دفعني من حضنه أرتديت لورة لزمت بالشجرة الموجودة
كلي تعجب وصدمة وأستغراب من تصرفاته.
رفع شعره بأيديّ
ادخلي جوا.
دخلت جوا عقلي مشوش سمعت صوت
عميد الدين ورايَّ
يمشي ويباوعلي بنظرات شك لأن وضعي مخربط وأيدي ترجف
عميد الدين: چنتي يم وارث؟
ريم: اي
سوالچ شي؟ غلط بالكلام وياچ.
بلعت ريگي إلى يبس
لا لا ماسوا شي چنت أسولف وياه كتله ما اريد حنه
ليش ماتريدين
مو حابه وراح انسوي عرس چبير يعوض.
يُبا أنتِ ماجاي تضمين شي عني گولي وارث جاي يأذيچ
لأن احنا اخوانه وصاير عدواني ويانه تغير
لا مسوالي شي.
ولو مامصدك بس براحتج وأي شي تحتاجينه انا موجود
شكراً الك عميد الدين
هز براسه وصعد الغرفته، گعدت وحدي صافنة بتصرفاته
وين وارث القديم، ووين وارث هسه، شك تغيير، هذا الشي راح يتعبني.
الثاني يوم رفضت اسوي حنه حاولن البنات ماقبلت
وحتى هوَ اجه راد يقنعني رفضت رفض قاطع
مر اليوم
بالهوسة والتجهيزات واخذني للصالون تنظيف البشرتي وترتيب
واجه اليوم المحسوم يوم زواجي وهالخطوة أما تخلي علاقتنا.
تتحسن اما تبقى بنفس النقطة واثنينا نبقى نعاني.
كملتني ام الصالون اباوع النفسي كلشي مثالي ولا غلطة وأكثر شي
بارزات ملامحي عيوني بس ما ادري الغلطة يمكن بهذا الزواج
من بعد أشهر طويلة اليوم نزعت الاسود وبدلته بالبياض الي
هيَّ بدلة حفل زفافي .
صفا: گومي گومي خلي اخذلج صور
ريم: لا ما اريد
صفا: خااب دگوومي لا اطيح حظج هسه
جبرتني اخذتلي كم صورة اجت ام الصالون گالت
تأخذون صور هنا أنتِ وزوجج
لا.
عافتنه وراحت، لأن التصوير بالقاعة گالوا ايصير.
صفا: ابتسمي هذا وجه عروسة عبالك ماخذينچ تحضرين جنازة.
أبتسمت مجاملة الها بقينه بالساعة مكملين منتظرين
بعدها اجوا صوت الاغاني وأصوات السيارات أعتلت بالشارع.
جهزتني صفا ودخل وارث كاشخ كشخة العريس أتقرب إلى بكل رزانه
لزم ايدي بحنية أستغربت منه رفعت عيوني أباوعله
ريم: مرة تقسى مرة اتصير حنون مافهمتك
وارث: برنسس تدري شغلة
ريم: شنو؟
وارث: you re beautiful inside and out.
اتلاشت ابتسامة خفيفة على ثغري اكتفيت بيها
وگف يعدل بدلتي ويغطي بيَّ خاف شي طالع مني
حضنت أيده وطلعنا وصفا تمشي ورانا وتگول
صفا: خاب فدوة شهل الجمال عمي جيبولي رجل مثل وارث
وارث: موجود بس ننتظر الموافقة منچ
صوتها اختفى
وأصوات الهوسة العالية وهورنات ما أشوف شي صعدني بسيارته.
وارث: هسه اجي
بقيت وحدي السيارة عطرها يجنن رفعت البركع.
اشوف الناس تارسه شارع الصالون والإخوان كلهم لابسين رسمي
و آدم وزيد سادين الشارع ويركصون رجع وارث صعد وانطلقت الزفه.
وارث: ارفعي راسج
رفعته اباوع للزفه آدم يفر بسيارته وزيد وياه والاغاني عالكيها
عميد الدين يأشرلهم بمعنى بسيطة هم مامهتمين
باوعت السيارة عميد الدين وَهج گاعدة بصفه وره گاعدين صفا وسَند وبنت أكرم رحيق.
أخرونه كل شويَّ نازلين عالكينها ويركصون ويسدون بالشارع.
طول الطريق بقينه على هل الحالة حد ماوصلنا للقاعة
يله استچنوا وهدئوا، نزلني وهم رجعت الهوسة
انسطرت سطر وانثولت ومنا مانايمة الليل كله.
أسمع وَهج ومبين تحچي ويا عميد الدين تضحك تگله
وَهج: إذا أنتَ عيونك شهل اني عيوني بُني لا تتحدا
دخلنا للقاعة بس أخذوني بالاول الغرفة الاستراحة
دخلن صفا و وَهج ايشوفني شمحتاجه وگلبي طبول اتدگ بي.
صفا: عمي احفاد عزام ديربالچن عليهم شفتلي الأناقة.
وَهج: كلها تتأنق بالمناسبات شنو الجديد.
غمزتلها صفا.
صفا: أناقة عن أناقة تختلف
وَهج: والله عندچ سوالف صفصف.
خلصت الاستراحة واجه وارث علمود ندخل للقاعة جوا
لزمت بأيده أرجف ما ادري ما ادري شبيَّ عيوني دمعت واختنگت
وارث: شبيچ بوية
ريم: م ما ادري
ترجعين ترتاحين
ما ادري
تعاي
لزمني گعدني وراح جاب مي شربته وبعدني نفس الوضع.
وارث: من اجينه مابيچ شي
ريم: وارث
هاا ريم
أنتَ تريد تأذيني؟
لا.
إذا نيتك هاي أحلفك بأمك تنهي هذا الزواج هسه
ثنى رجله گعد گدامي لزم ايدي
تخافين مني ريمه؟
نزلت دموعي
قبل لا، بَس هسه أي، خايفة من تغيرك هذا.
رفع أيده يمسح بدموعي
ما ادري شلون راح تتحمليني ادعي الله تخلص فترة دراستج
واتروحين بحالة سبيلچ إذا تبقين ويا شخص مثلي يضيع عمرچ
راح تعوفني
مو هسه من تخلصين دراستچ.
خنگتني غصتي حتى الدموع صارت ماتبرد گلبي وكلامه مابي امل
وگفت عدلت نفسي مسحت دموعي همزين الميك اب ماسايل.
وطلعت وياه وهايهيه عرفت نهاية هذا الزواج ما اله داعي الامل إلى جاي اخلقه بداخلي.
انفتح باب القاعة واشتغلت اغنية الدخولية ومصورة
اتصور بينه أعتلت صوت الهلاهل والاغاني وخالة سلمى
وامي يطشن جكليت علينا، ناس اهوايَّ حاضرة
من عمام وخوال خصوصاً أهل خالة سلمى شيوخ ونسوانهم
شكثر جايات بيهن اعرفهن وبيهن ماشايفتهن بس بعرس أكرم اذكر كم وحدة بينهن.
وصلنا المكانه المخصص گعدني بي وهوَ گعد شويَّ وطلع.
وأشتغلت اجواء الحفلة والبنات يركصن مستحلات نص القاعة
اجت امي گعدت يمي وعيونها مدمعة
نجاة: اللهم صلِ على محمد وآل محمد
ريم: هسه ليش هل العيون الحلوة مدمعة
نجاة: اريد الله يزرع الحب بينچ وبين وارث.
نزلت عيوني وحجتي اعدل ببدلتي حب؟ واني و وارث
شي صار مستحيل، اجوا البنات يمي وامي راحت للمعازيم
زينب: حرامات كوثر ماكو عاد جنت محضرة سوالف يخبلنها
صفا: دختولي عوفي العرس يمر بدون حيايه.
زينب: هم صدك خلونه فرحانين احسن مايكسرن فرحتنا.
اجت خالتي ناهدة وايفان وياها رغم زعلت بذاك اليوم
بس من امي خابرتها عزمتها اجت بوستني
ناهدة: مبارك بعد عمري
ريم: يبارك بيچ خالة
أباوعلها باوعت البنات خالي أشرف ودارت وجها نزلت بقت ايفان يمي.
ايفان: طالعة تخبلين ريمه
ريم: أنتِ هم طالعة حلوة
ايفان: غير كون يحس إلى أبالي
أبتسمت وباوعت للبنات مامهتمات للحديث يسولفن بين بعضهن.
نزلت صفا فستانها جوا الرگبه هيَّ بيضه وملابسه لبس بنزاكه مو هوسة.
وزينب و وَهج هم راحن بقت بس ايفان بصفي.
ايفان: تگليلي حبابات وينهن حبابات شايلات خشومهن
ريم: لا تنسين اخر موقف صار بينكم وامچ شلون حچت على وَهج
ايفان: وهن ماقصرن كل وحدة مدت السانها شطوله
ريم: لعد خالتي إلى حچته عيب وماينحچي.
عوفينه منهن، شفتي آدم
اي
اني هم شفته بس ماينطي مجال حتى سلامه بثكل
ايفان ترا آدم يشرب أنتِ تتحملين هيچ شخص؟
اي اتحمل لأن احبه
ما ادري أكثر من مرة صدچ المفروض تعوفينه بعد لا تتقربين اله
احسه يحب
كلشي جائز
ليش تعرفين شي
لا، بس احتمال صدگ يحب ف هل جاي يرفضج.
بقت صافنة ومبين ضاجت، اني كل سوالفها ماتعجبني
ونصحتها كم مرة بس مافاد وياها هيچ متخبله عليه
وهوَ بكل مرة تحچي وياه يرفض الموضوع ويگلها أنتِ مثل اختي.
گالو راح يدخل العريس سترن نفسهن والبنات لبسن فوگ
فساتينهن وسترني هم، انفتح الباب ودخلوا وياه فقط اخوانه.
و وياهم فرقة موسيقية، وهلاهل خالة سلمى وامي الأجواء
چانت كلش حلوة بس اكو خوف وقلق بداخلي
يمنعوني أعيش هالفرحة وخصوصاً بعد كلامه
هنا آدم غير كل الجو طلع الفرقة الموسيقية وركض على Dj وعلگها ب راية يعباس
راح جاب
امه وامي وحطهن بالنص كابلوهن هوَ وزيد ركصوا ركص من كل گلبهم
زينب واگفه يم رجلها، أشر عميد الدين
ال وَهج وصفا يجن يمهم
صاروا مثل الدائرة و وارث بنصهم كلهم يركصون بس البنات واگفات يصفگن.
وصوت القاعة صار يجلجل بقصيدة
راية يعباس. غيرة ينوماس
بيك تزهي المرجلة. هسه تشهد كربله
بيك تزهي المرجلة بگد الزلم
رايتك زلمه وخذت منك عزم
أنتَ أية عاطفة وبيك منبوع الوفه.
بقوا يركصون عليها لمحت وارث يباوعلهم مبتسم
خو زيد گطع روحه تگطع يهز كتف اسرع
من السيارة من تسرع
كملوا وقبل لا يطلعون اجو آدم وزيد إلى يضحكون.
آدم: وگولي حمويني ماركصوا بعرسي
ريم: ههههه لا كفيتوا ووفيتوا
زيد: صرتلچ صافيناز بعد شتردين.
ضحكت على سوالفه اتباركولي وطلعوا بقى بس وارث.
وصار دور فقرتنا اني و وارث، أتقرب إلى مد أيده واخذني وياه
النص القاعة تحت أنظار الكل يتعامل ويايَّ بكل رقه
أشتغلت اغنية مابعرف حضني بين أحضانه وصرت اتمايل وياه.
بصعوبة مثبتة نفسي، نبضات گلبي مامستقرة
النفس من التوتر صرت بصعوبة اسحبها قربني اله أكثر همس بأذني
وارث: شبيچ
ريم: مابيَّ
وارث: عجبج العرس.
رفعت راسي اباوع للقاعة كلشي فخم بي وادري اتقصد.
يسوي كل هذا لأن طلبت قبل اريد كلشي فخم واني من حچيت
بوقتها لأن صارت شغلة عناد ولا أبالي هالسوالف
كلشي حَلو
الي ردتي صار، بعد شنو إلى أتريدي
ترجع وارث إلى اعرفه
تخافين من الجديد
اي.
قرب راسي الصدره وبأيده الثانية محاوط خصري يتمايل
ويا كلمات الأغنية اول مرة بحياتي اكون بهذا القرب ويا شخص
سحبت نفس من عطره ماحسيت على نفسي واني بين أيديَّ
الا وخالصه فقرتنه، رفع ايدي باسها وأردف.
اني اگول الدكتورة ريم بلا مكياج عندي احلى
غير عرس هذا
نمشيها
رجعني المكاني ورجعت اجواء العرس وگلبي يريد يطير
ضحكتي صرت ما اگدر اسيطر عليها قربه ثولني
كمل العرس بعد ساعات استمرت من الفرح وماچنت اعرف
شمضمولي بعد هذهِ الضحكة إلى ضحكتها.
طلعنا من القاعة ونفس الأجواء وبعد احلى الفرقة الموسيقية
موجودة والاقارب والإخوان موجودين صعدنا بسيارته
وزفونا للبيت ماردنه فندق وهالسوالف وگفوا يم سياراته قبل لا نحرك.
الولد وزيد يهلهل ويجيب كولات وهوسات
زيد: يله يله ويايَّ وخدها طماطه ولا تگول محمرة
آدم: لا ولك اتعلم مني، وين دورها ولكاها وفصوص روبه ويا كفاها
اها اها وزفيناه بصاية حيدر و زفييناااه بصاية حيدرر
زيد: وها وها فرحانة الدنيا بعرسه وفرحانة الدنيا بعرسه.
عميد الدين: يله يُبا كافي الوادم منتظره اتزف
راحوا وصعد وارث ينافخ بعصبية ما ادري شبي
الطريق كله أجواء عرس الناس فرحانة والعرسان العكس.
وصلنا للبيت لكينه الكل گدامنا أستقبلونه بالعادات المعروفه
صعدوني الغرفتنه اني و وارث دخلوني بيها مجهزيها
تجهيز غرفة عرسان بقيت بيها وحدي
وقبل لا يكسرني بأي تصرف منه شغلت عقلي واتصرفت
لأن زواجنا ماراح يكون مثل أي زواج طلعت ملابس الي
وبدلت قبل لا يدخل فتحت تسريحة الشعر سهله لأن چانت تسريحة بسيطة
ومسحت إلى بوجهي هستوني كملت ودخل ضل يباوعلي بأستغراب
الثواني رجع طبيعي اخذت منشفه بقيت واگفة اريد اطلع.
وارث: هاا وگفتي
ريم: اريد اطلع للحمام اغسل شعري
وارث: چا ماتطلعين
ريم: هستوك دخلت مايصير خلي تمر دقائق عاد
هز براسه مرت دقائق وطلعت اباوع ماكو احد فوگ كلها جوا
دخلت للحمام غسلت شعري وگلت فد مرة خلي اسبح
سبحت وملابسي هستوني لابستهن مابيهن شي رجعت عليهن
كملت ورجعت للغرفة دخلت لكيته مبدل وگاعد بأيده جهازه.
رفع راسه شافني
وارث: نعيماً
ريم: ينعم عليك
اندك الباب كام يفتحه دخلت زينب جايبه النا عشه وطلعت.
گعدت گدام المراية امشط بشعري
ماتتعشين
لا
ليش
شبعانة
شنو منين شبعانة
اكل أنتَ اني مو جوعانة.
گعد اباوعله من المراية ماياكل ينقش بالاكل تنقش
وطلع أخذ الصينية وياه بقيت بمكاني گاعدة دگ جهازه
وگطع رجع يتصل مرة ومرتين وهوَ بعده ماراجع
گلت إذا واحد من اخوانه اجاوبه بس يعني هوَ جوا شنو ماشافوا
رحت أشوفه لأن رجع يدگ لزمت الجهاز وگلبي عصرني من شفت المتصل نريمان.
شعندها متصلة وبهذا اليوم اكيد واصللها خبر اتزوج انفتح الباب
دخل وارث وعيونه صارت على الجهاز سده واجه باتجاهي
وارث: شيسوي جهازي عندج
بلعت ريگ بدون ما اباوعله حطيت الجهاز بأيده
ريم: خطيبتك السابقة تتصل عليك.
حچيتها بغصه ردت أمشي صاح ورايَّ
وارث: وماجاوبتيها
نزلت دمعه مني مسحتها لا يشوفني أستداريت اله مبتسمة أبين اله ما مهتمة
ريم: وليش اجاوبها اني؟ شنو لا يكون ابالك
تستغل هل النقطة علمود تنتقم منها.
وارث: أنتِ منين صايرة تجيبين هل الأفكار
ريم: هذا الواضح انتَ أستعجلت بالزواج علمود
اتشوفها حياتك ماتوگف عليها، ولكيتني گدامك.
اتخبلتي بوية؟
لا والله احچي بعقل سليم وياك ليش تنكر وماتعترف
لأن ماكو هيچ شي
اكو
ماكوووو
اكوووو
گلت ماكوووووو ليش تلحيننن.
أصواتنا صارت عالية سكتت لأن ناس جوا فشلة يسمعونه
رجع اتصل جهازه باوعله وباوعلي
جاوب جاوب شنو خجلان مني لا تخجل اعتبرني ماموجودة
إذا اريد اجاوب ماخايف منچ.
فصله وذبه على الميز نام بمكانه حاط أيده على عيونه
وارث: ماتنامين
ريم: علساس يهمك ابو الحُب
استغفرالله
گعدت بمكاني محروكه حرك مو بيدي والله حطيت ايدي
ودنكت راسي عليها نزلت دموعي بقهر شنو هل الوضع ياربي
فدوة الاسمك خلصني من هذا الشعور شعور الغيرة يأذي ما أريدة خلصني منه.
وارث: ليششش تبچين
ماحاچيته رحت نمت بمكاني سحبت الغطوة كلها منه لفيتها عليَّ.
ريم: استاذ وارث جيبلك غطا وحدك أني ما احب احد يتغطى بنفس الغطوة مالتي.
بدون ما يحچي راح طلع من الكنتور غطوة ونام تغطى بيها
وارث: راح انام اتريدين شي ريم
ريم: اي.
شنو
جهازك
شتسوين بي
ماجايني نوم وين اروح خلي أتصفح بي
مد ايده من فوگاي بيها الجهاز أخذته منه
كلمة السر مواليدي
تمام وردة.
أخذته كتبت مواليده انفتح بقيت اكلب بي اباوعله منطيني ظهره
دخلت للبرامج اشوف إذا نريمان متواصله وياه اولا.
وصدك لكيت حساب داز رسائل اهوايَّ وكلها من نريمان
تعتذر وتتوسل يسامحها وتكله غلطت ونفتح بداية جديدة
يمكن فوك الخمسين رسالة تعبت واني اقرأ بيهن
وراث مامجاوبها بس قاريهن وعايفها ردت احذفهن
بس گلت هسه اكيد يعرف قريتهن عفتهن ودخلت
اشوف ستوريات الولد كلهن عن عرسنا صور وفيديوات.
بديت اتثاوب رجعت الجهاز ونمت ماعرفت شمنتظرني
للصبح گعدت باوعت المكانه ماموجود والغطوة.
مالته مسفطها وحاطها على جهه، مديت ايدي على مكانه الچان نايم بي
نهضت من مكاني رحت گدام المرايه وانجذب نظري ورقة وفوكاها قلم
اخذتها اشوف شنو هاي، فتحتها وجسمي انشل من إلى اقرأ مكتوب من وارث.
وارث: اعتذر منج على الدموع إلى نزلت منچ البارحة
اني رايح فترة ارتاح إذا ابقى يمج راح تتأذيت ريم
اني صرت اشك بخيالي وراح اتعبج بهذا الشي ويايَّ
ما اريد يطلع مني تصرف يكسرچ لو يأذيچ وبعدين.
اتندم أنتِ أمانة عندي راح ابقى محافظ عليها
انتبهي النفسج
من اشوف نفسي صرت زين ارجع، عفتلج الجهاز إلى جبته
الج قبل بالكنتور مالتي افتحي وتلكينه اهتمي بنفسج ودراستچ أستودعچ الله .
دموعي تنزل دمعة وره دمعة ليش سويت هيچ
أنتَ هنا هم كسرتنييي من عفتني وبثاني يوم من زواجنا
بدلت وطلعت ادور على جدي وعميد الدين موقف وارث هذا
كسرني وفشلني گدام الكل ويا فشلتي
من هيچ كسرة .
وَهج.
عميد الدين: من البارحة تقلدين على عيوني شنو وضعج
وَهج: إلى يدك الباب يحصل على الجواب
عميد الدين: يُبا ماگلت عيونچ مو حلوة گلت صغار
وَهج: اي وليش تقلد عليهن
ما مقلد
بلى قلدت.
سَند: ماما
وَهج: عيون ماما
سَند: أنتِ حلوة
ضحكت حضنته وأشر ال عميد الدين عليه
الذوق عند ابني وبَس
يا حچاية ردي المكانج.
جاي انسولف ونضحك بالمطبخ وزينب موجودة وصفا
البارحة بالزفه يگلي عيونج صغار هو ادري بي حچاها بالشقة بس لزمتها عليه.
دخلت ريم عيونها حمر تشهك اخترعنا من منظرها عفت سَند ركضت الها
وَهج: اسم الله امي شبيچ
اباوعلها وجها مطعون احمر بأيدها ورقة اخذها عميد الدين
منها و وگف يقرأ وعلامات الصدمة بوچهه صارت
عميد الدين: لا وارث لا.
وَهج: شكو عميد الدين شصاير
مسح وچهه بأعصاب ذبها على الميز وطلع ركضت صفا اخذتها
شبيكممم احددد يفهمنييي
ريم تشهك بالبچي لازمينها اني وزينب وصفا بأيدها الورقة
صفا: وارث عاف البيت
شنوو؟
ريم: والله بعدد لووو يصبووونك ذهب يا وارث ما اررريدك ماررريدك على هااي كسررتك
اخذتها الحضني، عيوني دمعت على حالتها تعبانة بشكل
ومبينة الموضوع مأذيها، وبيها بخت محد بايت هنا من الأقارب
غير عمتي ناهدة وايفان، دخلت امها والباقين من أهل البيت
أخذوها مني وهيَّ اسم الله عبالك رايحلها عزيز على گلبها ميت.
صعدتها امها الغرفتها تبچي من كل گلب شگد ضجت من تصرف وارث
نوب ثاني يوم من عرسهم ما انطى مجال تمر فترة.
والله من يمي احتررگت وانقهرت شحال ريم واحساسها
الخبر صار يم جدي وصار يرعد رعد علينا بالبيت.
عزام: هسسسسه اتدورووونه روحوو الدوامه شووفوااا
اييييي مكان تعررررفووونه يروووحله تدورونه بي لااا اگلب البيتتت فووك راسكم وراسسس الخلفوووكم ولكم انااا عزام حفيدتييي تنعاف بصباحية عرررسسهااا.
صرنا نتراجف من صوت جدي اخوانه طلعوا يدورون عليه
صعدت الريم أشوفها مسكينة هالبنت من اول عمرها تبهذلت تبهذل.
فتحت الباب حاطتها امها بحضنها وبس صوت شهكاتها
مسموع بالغرفة، حتى ماگدرت أسئل شلونها طلعت
عمتي نجاة گعدت بمكانها حطيت راسها على رجلي.
وَهج: ليش صار هيچ
ريم: ما ادري، البارحة نريمان اتصلت
شتريددد هااي
اتريده يسامحهاا وتبدي وياه من جديد
معقولة هيَّ سبب تصرفه هذا
رفعت ايديها الوجها مغطيته تناشغ مناشغ
ليش سوا هيچ وَهج شنو ذنبي اني
كافي ياحبيبتي ويمكن ابتعد علمود صدك مايأذيج.
ضربت على صدرها.
أذاانييي أذانيييي چنت حااسةةة راح ايصيررر شي
كافي امي گلبچ راح يوگف من البچي
بقيت يمها احاول اهدأها حد ماغفت غطيتها وطلعت
اتصل ب عميد الدين مايجاوبني اوف شكره هالسالفة
نزلت جوا واسمع جدي يصيح ومبين يخابر ومن خلال
المكالمة والصوت الچان مفتوح عرفته وارث.
عزام: تررررجعععع لهناااا لاااا انعل والدي والددديك
وارث: جدي ليش ماتفهمني أنتَ إذا ارجع أذي البنيه والله
خلوني اتقبل إلى صار ويايَّ مو هين بسبب إلى صار.
صرت اشك بكلشي شنو ذنبها تتعذب ويايَّ.
عزام: والسووويته ولك اكووو واحد يعووف وحدة بصباحية
عررسهااا ولك ماگدررت تتحمل چم يوووم بعددد وتووولييي.
بقى ساكت وارث جدي فاتح الصوت وعمتي نجاة
والكل واگف بس الولد ولا واحد منهم موجود
عزام: مااا تحچيييي ليششش سكتتت
وارث: شنووووو احچي جااييي اگلكم هيچ تگلوووليي هيچ
اترريدووونها تتأذه هسسسسه ارجع.
سد جدي الجهاز بوجهه وصاير بركان ضل يغلط عليه ويسب.
بس يريد گلبه يبرد مر اليوم والولد رجعوا ولاكينه حاچين وياه
ماقابل يرجع يگلهم اذا ترجعوني معناها انتم تگلولي قابلين بأذية ريم.
صاح الاذان مال المغرب اريد اطلع اتوضأ وبقيت واگفة
بمكاني من شفت ريم نزلت من فوگ وبأيدها جنطة
نزلت وجدي ضل يباوعلها بغرابه
عزام: شنو هذا
ريم: اني ما إلى گعدة هنا بعد خلي يرجع.
عميد الدين: گولي يا الله كلشي ينحل وين تروحين
ريم: نأجر بيت اني وامي ونگعد بي.
آدم: مووو هيَّ هيته تگعدن وحدددچن
خزره عميد الدين
يسكت لأن ريم منتهيه تحسها گوا واگفة على رجليها
عزام: جدي وين تگعدن
ريم: هذا البيت إلى گبال بيتكم شفتهم كاتبين لافته طالبين مؤجر.
آدم: شنووو جدي بس لا صدك راح تخليهنن يگعدن وحدهن
يعني زززلم تارسسه البيت نخليي نسووانه تگعد وحدددهن.
اباوع الجدي منفوخ نفخ بعصبيته بس ساكت ماطلع منه غير كلمة
عزام: عميد الدين
عميد الدين: هاا جدي
عزام: أجرلهن البيت دام هنا گدامنا.
عميد الدين: يجرالك ويجرالها
آدم: صددددك تحچووون؟
أكرم: ولو هالشي مامقبول بس براحتج خوية ريم
ودامه هنا گبالنا ماعليچن شي گدام عيونه.
ضل يصيح آدم ماقابل يگعدن وحدهن بس ريم صممت بقرارها
وره يومين انتقلت اله اخذت بس اغراضها الخاصة
ما اخذت اي شي من غرفتها سلمت مفاتيح الغرفة الخالة سلمى و ودعتنه وراحت.
صعدت الغرفة عميد الدين گاعد رفع راسه شافني أشرلي
بأيده اگعد بصفه گعدت اباوع جاي يشتغل.
عميد الدين: ابوچ لحد الان شعجب ماطالب شي منچ
وَهج: اكيد بعقله شي
عميد الدين: انا هم ماقابل طلعة ريم بس حقها السوا
اخوي مو شويَّ ولا هم اگدر الومه لأن وضعه تعبان
وَهج: وين گاعد هوَ هسه؟
يم ولد صديقنه مامتزوج
عندكم اهوايَّ اصدقاء
اممم
هذا الشيخ إلى جبته بالخطوبة منو
هههههههه صديق آدم هذا ماشفتي عفطي مثله
يااا
وداعت اليااا.
دگ جهازة رقم بدون اسم فتح خط
عميد الدين: العزيز ابن العزيز. شلونك خوية.
وينك غاط هاليومين. تستاهل هو أنتَ هيچ نوعيات يله تگدرلك.
اباوعله يسولف وخربان ضحك على هذا المتصل
هسه راح ادزلك الشغل كملته بس خلي ايشوفونه إلى عندي. تبقى كلب ابن سطعش كلب.
سده منه وحط الحاسبة گدامي
عميد الدين: شوفي هذا الشغل مال الفلاشة رتبته كله.
أخذته منه بقيت أشوفه واقرأ بي كلشي مثل ماهو بَس
اكو شغلات تخص ابوي باعدها لأن لازم يلزم بس صاحب الشغل
كلشي تمام هسه وين راح تدزه؟
للولد إلى خابرني.
ممكن تفهمني شنو علاقة هالولد
اكو ظابط جاي يساعدنه بهذا الشي
تعرفه للظابط؟
حق المعرفة.
هزيت براسي بس خله عيوني تتحجظ
من گال.
عميد الدين: وَهج
وَهج: هاا عميد الدين
باسل تعرفينه مو
يا باس، صفنت شيقصد بأسم باسل
ياباسل تقصد؟
اي باسل إلى وياكم بالشغل
شبي؟
حك طرف خده وخلاني اصفن أستوعب كلامه
هم يشتغل ويانه. ، دخوله للشركة من ضمن تخطيطنه لدمار أشرف.