رواية وتيرة الأعرج للكاتبة حوراء السعيدي فصل إضافي

رواية وتيرة الأعرج للكاتبة حوراء السعيدي فصل إضافي

مُجاهد: ولك عوووفه درغاام هسه يگلي ما أنطيك اختي.
درغام: أكثر اثنين متونس عليهم عمي سلطان و ارسلان.
چا أدعي الله ما ينطيك بنية ترا يضموها الك و يطلعوها من عينك.
أشك خلفتي كلها ولد.
مو انتَ عالم الغيب.
أسكت راح أتصل بشرفك خلي نضوجه.
أتصل على ارسلان هاي سوالف درغام محد خالص منه كل مانلتقي يخبله وهسه يريد يضوجه فتح خط اسمع الصوته.
ارسلان: هااااا خيررر خيرررر شررايد؟

درغام: عليكم السلام ورحمة الله وبركاته.
الزبدة؟
رجل أختك گاعد يمي.
المطلوب؟
ماتجي يمنا گاعدين بالكوفي.
گاااعد يم عائلتي.
واحنا اصدقائك تعال أتونس يمنا.
ونسة و يمك ما أريدهااا.
أفا ليش ابو سيرين.
تدري كلش زين ليش ابو الحسن.
ههههههههه لا تعال رايدك بشغلة.
أريد أطلع سيرين و أمها.
غمزلي درغام تحمحم رجع يحاچي.
دتعال گاعدين انا و رجل أختك.
عاط ارسلان.
بعدددده بعدددده ماااا صاير رجلهاااا.
بالشرع و القانون صار.

درغااام ولي خوووش، و لا تتصل عليَّ فك ياخة مني.
العرس عكب باجر تجي؟
ويننن اجي غيرررر الماخذينهاا اختي.
مابيها شي چا صاحبة الماخذها قابل غريب.
سد الخط بوجه درغام، ضحك خربان ضحك عليه رجع يدزله رسائل يضوج بي بالاخير انطاه حظر.
مُجاهد: دعووفه يمعوود.
درغام: غير اخونا و نشاقة وياه.
ما أتصيرلك چارة انتَ مرتاح لان ماعندك اخوات و لا بنات والله دازك للناس غضب.

رفع أيديه يطگ أصبعتين و الكوفي كله شباب و بي صوت اغاني شوية ناصي هزيت بأيدي يائس منه.
الحمدلله محد يعرف بينا ضباط چان تفلوا علينا شكول ضباط نتمرگص بنص الكوفي.
أي و محمد هسه الوادم تگول ذوله يحمون الوطن؟ خلونا نطيرهم بزيج.
دوومك فاضحنا.
والله خوية مفضوحين انا و مريتي دومنا.
سحبت جهازي اجتني رسائل، عفته يسولف ابتسمت مِن شفتها ناز.
ناز: هااا شو ناسيني اليوم؟
مُجاهد: عايفج تجهزين نفسج براحتج.

لازم طالع ويا مرتك الثانية مو؟
ضحكت و درغام يهز بأيده، تقصده لأن اكثر طلعاتي وياه و كل ماتسئل وينك اكلها ويا درغام.
اي هاي گاعدة بصفي.
گللها ترا ما يصير لازم يوم الج حبيبتي و يوم النازو.
هههههههههه ميخالف هسه اگلها.
رفعت راسي شفت ارسلان دخل للكوفي كتبتلها.
أجه اخوج و اذا شافني احجي وياج يطربك الدنيا علينا.
طلعت من المحادثة وگفنا سلمنا عليه و گعدنا.
درغام: مو علساس تطلع سيرين و أمها.
رفع عيونه يخزر بي.

ارسلان: سيرينن طنكرررت و خربت الطلعة كلهاا، بس بعد منووو خوالهااا؟ الناس تورث شغلات يرتاحلهاا الگلب الااا حظي وارثتلي تدورر حلوين و العناد.
رد عليه درغام ضام ضحكته بنت ارسلان مصيبة وين ماكو حلو لزمته و اتريده عبالك چبس ابو الربع و اتريده.
درغام: وشبيهمم خوالهااا خاف ماعاجبينك رجعلناا بنيتنا والله وياك.
ضرب أيد بأيد ارسلان.
بعدد الفاس وگع بالررراس.

مُجاهد: اگلك ارسلان هوَ مو انتَ نفسك گتلت روحك على أمها أتحب نذكرك بماضيك لو لا؟
ارسلان: لا تخليني أغردلك أسكت أفضلك.
سكتنا راح أتحملك ذني اليومين لأن جاي أدگلك الناعم بس اخذ اللي أريده بعد تعرف شلون يصير التعامل.
كفيلك الله العب الغالي على الغالي مثل ما يگول درغام.
خليك أصلي و لا تقلد حبيبي.
ارسلان: شگددد لغيتوا.
درغام: رجل أختك و مطلوب منك تتحمله.
أستغفرلله لك بابا بطل سوالفك بطلهااا.

چا شحاچي انا؟ هوَ مو راح ياخط أختك.
صوچي أجيت انا، أنتم مثل ذيل الچلب ما تنعدلون.
ضحكنا رجعنا نسولف وياه مبينة بنته مسودنته تقريبًا ساعة و كلمن رجع البيته اخذت شغلات الاختي ورجعت البيتي.
ناز.
اليوم الحنة مالتي قررنا موعد الزواج بعد تعرقلات أستوقفتنا الفترة مو قليلة
كل شغلة أجهزها من تجهيزات زواجي چانت بكل حب و سعادة
و تدقيق.
غرام: ناز اليوم منو ياخذ أغراضج البيت أهل مُجاهد؟
ناز: نيروز و مليكة.

هيَّ وينها نيروز صارلهم يومين مِن أجوا ماشفناهم عدل.
راحت الأهلها خطية أكيد مشتاقتلهم گالت تجي ويا أمها و أهل غياهب.
تمام لعد گومي يله بدلي أنسام راح تجي علمود ترحن للصالون نتلاگة بالقاعة.
هزيت براسي و جهزت نفسي اخذت كل أحتياجاتي حطيتهن بجنطة أجت انسام.
أنسام: يلا عيني خالي منتظرنا.
ناز: أييي أييي.
طلعنا اني وياها چان خالي منتظرنا بسيارته، صعدنا و اتوجهنا للصالون.

الحنة و القاعة سويناهم بقاعة هذا طلب أم مُجاهد لان وحيدها.
كُميل: من تكملن أتصلن عليَّ أجي اخذجن.
أنسام: ان شاء الله خالي.
رفع عيونه يباوعلي من المراية اللي گدامه.
ها خالي شو خانسة.
ناز: هاا لا ماكو شي، بس عمر ماموجود ماشفته؟
عنده شغلة راح يكملها مال معاملة و أستنساخ هيج شي.
هزيت راسي متفهمته وصلنا للصالون دخلنا جوا أستقبلتنا المالكة گالت شوية
و أبدي بيج، شعري هالفترة طولته و صرت ما اگص بي علمود تطلع.

تسريحة شعري بالعرس حلوة قبل چنت اگصه لأكتافي.
ساعة و بدأت بيَّ بلشت بشعري سوته ويفي و الميك اب ملائم الملامحي و بشرتي
بدلتي لونها سمائي بس چانت بدلة نازكة و مرتبة اخذتها ويا لون عيوني، رفعت عيوني من گالت البنيه إلى تشتغلي.
لابسة العدسات بالبيت؟
مو عدسات عيوني ذني.
ماشاء الله والله عبالي عدسات حبيبتي.
ابتسمت الكلامها بأمتنان.
يلااا عادي هوَ اللي راح يصير زوجي من شافني هم يگلي عدسات.

ضحكت ورجعت تكمل بشغلها و أنسام الموظفة تشتغل بيها.
الحفلة كله نسوان بس يجي مُجاهد يحنيني، كملتني طلبت مني أشوف نفسي
فتحت عيوني اباوع النفسي أنبهرت بنفسي لأن اول مرة بحياتي أحط هيج
شيء مِن ال ميك اب حتى بخطوبتي مشتغلتني بكل گلب، ابتسمت فرحانة. كملت لبس البدلة و انسام تفتر فوگ راسي تقرأ ايات و تصلي على محمد و آل محمد تگلي اخاف عليج تنحسدين.

و اني اضحك على سوالفها، الى ان صار الوگت اللي اروح بي للقاعة خابرنا
خالي اجه النا لبسني البركع فوك راسي و غطن جهة صدري مِن گدام لان
من يم الصدر التصميم مكشوف، طلعنا صعدنا بالسيارة و خالي يضحك.
كُميل: غاطة بيها غطوط هاي البدلة ههههههههههه.
انسام: تخبل عليها.
لان شكلي ناعم و لا يم عمري هاي عود اني اكبر من غياهب بكم سنة.
كُميل: هسه وصلت امي وغرام للحنة و اجيتجن.
انسام: خاالي و جهالي و جهالك وينهم؟

ويا عمر عفتهم.
هم يسولفون و اني ساكتة خجلانة من خالي هوَ هم سكت عني ما أدري
شعجب وصلنا للقاعة قبل لا أنزل وگف يم الباب نزل براسه مبتسم.
كُميل: شو خليني اشوفج خالي.
عضيت شفتي والله خجلانة موبيدي رفعت البركع مبتسمة زادت ابتسامته
مجرد شافني ماحچى شيء لزمني من ايدي نزلني باس راسي.
الله يسعدج حبيبتي.
ناز: شكراً خالو.
دخلنا جوا كبل الغرفة الملابس الخاصة بالعروس باوعت الشكلي همزين كلشي.

مامتخربط گالت انسام شوية و نطلع دخلت غياهب باوعتلي بأعجاب وبرزانة كلامها گالت.
غياهب: شنو هالجمال بيبي.
ناز: هههههههه جمال عيونج زوجة اخي.
غمزتلي تضحك هاي هم متسوفلة مثل زوجها صايرة.
هسه مُجاهد من يشوفج و يشوف هالجمال يگووول اليووم اعرس الااا اليوم ما اريده باجر.
اش عيب.
ضحكت هازه راسها وگفت تسولف ويا انسام عن الحفلة الى ان طلعنا
لداخل القاعة و الهلاهل أعتلت هواية ناس موجودة بس اكثرهم چانوا أقارب.

مُجاهد گعدوني بمكاني اتوترت و اني أشوف الناس و نظراتهم الي.
أستصعب مرات هيچ نظرات من الناس لان ما متعودة عليها حتى بالتجمعات
اللي تصير اذا بيها غربة لان عشت حياتي بحياة منعزلة بغرفة وحدة
مرات أصفن بحياتي اللي تغيرت و اگول معقولة من انسانة مريضة الانسانة
اليوم غير رزقني ب أنسان مُحب فاهمني لعد رب العالمين شگد حنون على عبادة و ماكو شي صعب.
دخلوا البنات النص القاعة و وياهن اخت مُجاهد زهراء الكل فرحان.

و متأنق اشتغلت الاغاني بصوت عالي وصارن يرگصن بس غياهب گاعدة تباوعلهن
تضحك و بنتها بحضنها اما ام الحسن لا محد گدر يلزمها لعبت لعب وفنتها فني بالردح اجتني زهراء همستلي.
زهراء: راح يدخل أخوية.
هزيت براسي راحت گالت الامها وبلغت اي بنيه محجبة ولابسة قصير تلبس، لبسوا
شالاتهم و بشتات رجعت إلى استغربت من صارت تغطي بيَّ غير بس هوَ يدخل.
ليش؟

مُجاهد يگول كمطوها تگمط هههههههههه لان اصدقائه راح يدخلون وياه اليوم ناوين يرجعوله تعبه باعراسهم بفرحه.
أنفتح الباب و دخل أول واحد ويا شباب من ضمنهم درغام ورماد هم اخو
نيروز لعبوا لعب بالقاعة شعلوها بالرگص و درغام بنص القاعة يرگص و أبنه وياه يدبچون على أغنية.
أريد ادبچ لحد مطيح رجليَّ
أحنااا أهل الولد موش أهل البنيه
ردددح حيلي رددح الليلة للصبح
أخووها خوش أخو ويوگع على الجرح .

بقوا مُستمرين يرگصون شعلوا الجو و الانظار عليهم بحيث حتى اني نسيت نفسي
و اندمجت باجوائهم اضحك، فتّحت حلگها من اتگابلوا مُجاهد و درغام يهزون
بأكتافهم العريضة و الضخمة، طلع زوجي هيلك و اني اللي عبالي الحجل اخذه
كملوا الولد و طاعوا بقى بس مُجاهد بس يمكن چانت أكثر فقرة اتونس الكل بيها
و ماعندي شك بالأعراس هاي الفقرة الكل يتشوق الها.

رجعت زهراء خطية أبتلت بيَّ تعدل بتسريحة شعري و بدلتي صعد مُجاهد يمي نظراته تخلي گلبي ينبض سريع و اتوتر.
ناز: هاا شنو شبيك راح تاكلني؟
أتقرب قريب مني همس بأذني.
مُجاهد: أذا يصير ليش لا، أكو واحد تصحله كيكة و ما ياكلها.
اگلك شو طلعت مو مثل ماگتلوغ عنك.
شلون؟
گالوا عنك مؤدب و ثكيللل.
چا شنو شفتيني هسه؟ أستغفرلله شبيج ناز غير عرسي و اتونس بي وانتِ مريتي.
سكتت مبتسمة لزم ايدي بكف ايده حاضنها.

مُجاهد: شطالعة بوية حرام عليچ.
ما أدري شبيه أحب هاي نبرة صوته نزلت عيوني منه أشتغلت اغنية خاصة
بالحنة و اجت أم مُجاهد بايدها صينية الحنة و ترگص بفرح گعدت گبالنا
و حنتنا اثنينا تدعي النا بالسعادة، لزمني تحت انظار الكل أشر الاخته جابت
علبة باسته بخده وراحت فتحتها اباوعلها چانت گلادة ذهب منقوش
بيها اسمائنا لبسانياها، ايده طخت بصدري فزيت و هوَ رافع حاجبه يسوي نفسه عود ما يدري.

بس مبين ضام ابتسامته والله هذا طلع ملعب حتى فترة خطوبتنا اللي گضت
چان زين مو هيچ يايمة شبيه الرجال، باس راسي و لأول مرة أسمع هالكلمة
منه و چنت مغلسة عمها بس بنفس الوقت منتظرته يگولها انفاسه ضربت بوجهي حچى بصوت خافت وايده محاوطه خصري.
أحبچ يالستوطنتي گلبي و عقلي.
رفعت عيوني بسرعة نظراتي قابلت عيونه اللي تباوعلي بحُب اتقرب باس خدي و شاربة يجك بخدي.

ردت احچيها من زمان بس شفت الاحسن تصير مناسبة تخصنا اسف لان خليتج تنتظريها كل هالفترة.
نربط الساني ما أدري شسوي حرت شنو احچي كلمة السعادة ماتوصف كل
شعوري وسعادتي الحقيقية بهل اللحظة أحس بگلبي يريد يطفر من مكانه
أكتفيت بالابتسامة النابعة من خجلي اللي احتلني، أنطوا خبر يطلع باس كف
ايدي وطلع بس كلامه بقى يتردد بگلبي وعقلي و كل حواسي.
رجعت الاجواء و البنات وجعن الجوهن الى ان انتهت حفلة الحنة رجعنا للبيت.

هلكانات تعب كبل سبحت ونمت لان باجر لازم اگعد من وگت، الثاني يوم
گعدت على الهوسة وراسي مو إلى مصدع اريد ابچي منه اتريگت على الركضة وهالمرة نيروز تروح ويايَّ للصالون.
نيروز: يمعوودة ناززز يلااا فضيهاا عمر واگف برا.
ناز: بس أصبري أجيب غراضي بالغرفة.
ركضت للغرفة أخذتهن وطلعنا و عمر يحچي علينا يگول صارلي ساعة واگف تخوصرت نيروز رافعة حاجبها تباوعله.
نيروز: بله شوگت صارلك ساعة استاذ عمر؟ صارلك كم دقيقة.

عمر: حبيبتي بهارات زايدة يم الشعب العراقي قابل ماتعرفيها.
صعدنا نضحك وصلنا النفس الصالون اللي سويت عنده الحنة و انعاد نفس الروتين
نيروز ليست فستان محجبات لأن هيَّ هم اتحجبت بهالفترة و بناتنا الباقيات
كلهم قررن يلبسن فساتين محجبات لان بالحنة اخذن راحتهن باللبس
كملنا وطلعت واني راضية ومقتنعة بالشغل اللي اشتغلوه الي.
رجعنا عمر دخلوني البيتنا و الهوسة تسطر سطر اتلگوني البنات و مليكة بالهلاهل.

اباوعلهن كلهن طالعات نازكات بس إلى جذب نظري غياهب رغم حلاوة ملامحها
الطبيعية أنعصر گلبي و اني لليوم أشوف ضحكتها بيها حزن و اخوية نفسها
حياتهم أستقرت بس مانسوا بنتهم الراحت ضحية ذنب مالها اي علاقة بي.
مليكة كل شوية وباچية و تخليني اريد ابچي وياها و من اريد صدگ ابچي
ترزل بيَّ ساعة تضحكني ساعة تبچيني حضنتها ماگدرت اسيطر على دموعي
هالانسانة رغم هيَّ مرت جدنا مو ام أمنا بس ماقصرت ويانا و اتحملت الماينحمل.

علي ما أجت الزفة صارت همسات بين الكل منو اللي راح يقدمني الزوجي
الثواني رفعت راسي شفت اللي دخلوا ارسلان و عمر وگفوا گبالي اثنينهم مبتسمين.
ارسلان: الباري يحفظج بنيتي مُبارك.
بطمت مدمعة واني اشوف عيونه بنص ابتسامته لمعت بدموعه اجت سيرين لزمت ايده و تباوعله صافنة بتركيز.
ناز: أبوية انتَ يبارك بيك ويحفظك ربي إلى و العائلتك.
حضني عمر باس خدي.
عمر: أجمل عروس شافنها عيني حبيبتي مُبارك زواج الدهر.

ناز: حَبيبي الله يبارك بيك.
قدمولي هداية و مِن ضمنها مجوهرات ذهب دخل مُجاهد لابس قاط أسود
و القميص أبيض وياه ربطة عنق، نزلت عيوني عنه لان اخواني واگفين و ارسلان موجود
سلموني اله و ارسلان ظل يوصي بي بنبرة صوته المختنگ دمرتني ختم كلامه وياه.
ارسلان: تعاملها معاملة الأب البنته و الزوج و الصديق أعتبرها بنتك وداريها مثل ما تداري عيونك هاي بنيتي اليوم مسلمها الك و كلي ثقة بيك راح تسعدها و تعوضها.

دگ صدره مُجاهد اله برزانه.
مُجاهد: بعيوني ان شاء الله خوية.
أتقرب مني مُجاهد باس راسي و همس.
مُبارك رويحتي.
نزلت دموعي و اني أودعهم و أودع هذا البيت بكل ذكرياته الحلوة و الحزينة طلعنا
من الباب وسط اجواء الموسيقى العالية شارع بيتنا كله سيارات سادينا صعدني
بسيارته و الثواني رجع صعد وانطلقنا، جماعته ماقصروا كل كم دقيقة موگفين السيارات
و يگطعون الشارع ينزلون يرگصون ويرجعون يصعدون.

ساعات واحنا ماواصلين للقاعة اتأخرنا كلش بسبب اجوائهم وصلنا للقاعة نزلني لازمة
بأيده وصارت الدخولية مالتنا ويا أغنية بقيت صافنة بفخامة الدخولية الورد
يتناثر علينا و الهلاهل المصورة گدامنا تصور كلشي، وصلنا للكوشة گعدت
و هوَ طلع بدأت اجواء العرس أغاني و رگص نسيت نفسي بيها الى ان رجع علمود.
نرگص وباقي الفقرات مال العرس أعلنوا دخوليته ويا مادخل شغلوا أغنية.

انتَ أختياري، أتقرب لزم ايدي و اخذني النص القاعة خففوا الإضاءة الموجودة
صرت أتمايل ويا على الكلمات سند راسه على راسي أحس بنفسي طرت
ويا بغير عالم فاصلين عن الناس اللي حولينا، گلبي ينبض سريع فرحانة بكلشي وصلت الاغنية البارت أتربع بگلبي.
غيرت مشاعري بقيت بحب و عارفة أحس.
بعد ما كنت رافضة فكرة الارتباط
با عندي انتَ أغلى أحد عندي
بس با عندي انتَ خلاص بطل
كل الحكايات انتَ أختياري من.

بعد صبر سنين كتيرة انتَ السند و الظهر و الحب الكبير .
مُجاهد: شطالعة نازي شليتي گلبي بهذا جمالج و ملامحج بعلي وين أضمج عن العيون.
حاولت اتجرأ و أندمج وياه أبتسمت بخجل.
ناز: انتَ هم طالع حلو.
شدني من خصري الناحيته لزگني لزگ بي و يحچي بهمس.
أول مرة شفتج بيها بتركيز بالمگبرة يم أهلج مردتي گلبي بدموعج و شهگاتج وهاي چانت اول مرة بحياتي أضيع و أغرگ بهل العيون.

اممم من رفضتك گلت أكيد راح أيشوف حياته ما چنت أدري عندك كل هالمشاعر الي.
تستاهلين الأنتظار.
مُجاهد.
گلبه.
نزلت نظراتي متوترة أريد أنطق الكلمة بس داخلة بدوامة حيرة شلون رجعت
رفعت عيوني ملت براسي اباوعله و هوَ عيونه تتفحصني نطقتها ونزلت عيوني ميتة خجل و أيدي ترجف.
أحبك.
صفن الثواني ضغط على خصري و هوَ يگول.
شگلتي نازي؟
ترا سمعتها شنو.
عيديها.

حضنته مبتسمة و شعور بمعدتي و گلبي حلو ما أعيشه و لا يجيني الا من أكون وياه.
أحبك مُجاهدي.
حضني بقوة يضحك ويسحب نفس مِن شعري.
ريتني أروح نذر الچ أموت عليچ.
كملت هالفقرة و اني فراشة طايرة بدينا بباقي الفقرات الى ان كملنا
و اخذنا صور ورجع طلع رجعت الاجواء و البنات ماقصرن عدى العرس على
خير بدون اي تعرقلات گالوا صار وگت الزفة و حنين صارت تحچي مشفر أرتبكت من كلامها.

حنين: و اليوم يومك يااا بطل و ألعب على الچرباية.
غياهب: انچبي حنين من طاح حظج على هيچ هوسات لا تخرعين البنيه.
اووووي هسه قابل شحچينا عليمن الخوف اني هم صرت أتعاير بعرسي و الرعب
اللي دخلت بي و الافكار طن مسلسلات و دراما صارت بعقلي طلعت السالفة ماتستاهل كل هذا.
ناز: كافي اش عيب عيب.
نيروز: هههههههه كافي ياعيني البنيه راح تخترع.
راحن البنات بقت يمي غياهب أبتسمت بوچهي.
غياهب: خيولن معليج بيهن.

يعني ماكر شي يخوف مو؟
أكيد و مُجاهد واعي وفاهم مو صغير.
طمنتني بكلامها بعدها طلعنا متوجهين للفندق و الولد هم سولنا زفة ينحچي
بيها و يشخطون بالسيارات من الخوف لازمة بأيد مُجاهد و هوَ يضحك على
شكلي شلون يصير، نزلنا گدام الفندق و درغام و رماد هزووا هززز احنا
مانهز مثلهم دخلن ويايَّ ام مُجاهد و غياهب لان انسام ماگدرت تنزل عندها طفل.
من فترة صار عندها ولد ثالث و غرام ابنها هم مادري شبيه ماگدرن ينزلن.

بقت ام مُجاهد تعلمني على كم شغلة و بصراحة ماچنت اعرفهن و الحمدلله
فهمتني و خلتني انتبه غياهب جهزتلي شغلاتي اللي احتاجهه.
غياهب: حطيتلج كلشي تحتاجينه بالحمام.
طلعن واني واگفة بمكاني بالغرفة أكل بأظافري من التوتر فز گلبي من سمعت
الباب انفتح جسمي جمد عبالك ماخذيني للحرب العالمية و فوگاها دخلي استاذ
مُجاهد يغني والمزاج فووووب حضني باس خدي قوووي جعصني جعص.
مُجاهد: أوووفيش موو خد گيمر.

بقيت ساكتة ملتزمة بالصمت رجع گال.
تبدلين حبيبتي؟
أحم اييي.
أجيب عشه النا وانتِ كملي بين ما أرجع لا تتقيدين.
هوَ طلع منا و اني ذبيت نفس براحة منا، دخلت للحمام حاطيلي الروب اني
جبته على أختاري سادة ابيض بدلتي بسرعة انفتحت ما عاقتهي وغسلت وجهي
و شعري، جسمي مكسر سبحت سبحة كاملة يلا گدرت ارتاح بالكامل لبست
المحطوطلي وطلعت أنشف بشعري و هوَ بعده ماجاي باوعت للسرير هسه.

اذا انام ما اگعد لبعد فد يومين على هذا التعب وگفت بسرعة.
سشورت شعري بس كملت اجه جايب اكل النا حطه بجهه و نزع سترته و الرباط.
مُجاهد: أغسل ايديَّ و أجي.
هزيت براسي گعدت و أطكطك بأصابعي طلع ينشف بايديه گعد گبالي أشرلي بحواجبه بمعنى اكلي.
جبتلج شاورما مو تحبي يلاا اكلي أكيد جوعانة و ما متغدية عدل.
ما اتغديت بس اكلت كيكة و عصير.
صدگ؟ وين أكو كيك ياكل كيك.
هههههههههه مو الهلدرجة.

وجهي بوخ رفع قطعة شاورما حطها گبال حلگي.
أكلي.
أخذتها من ايده اكل بيها ظل يسولف ويايَّ حد ماكملنا غسلت عفته بالحمام
وطلعت اجه ورايَّ شافني أفرك باصابعي لان متوترة اتركزت نظراته باتجاه ايديَّ.
محتاجة شي؟
هاا لا بس چنت أنتظرك.
أتقرب بخطوات سحبني بسرعة الحضنه رفع ايده الشعري يبعده عن وجهي همس.
شتسوين بيَّ منتظرتني؟
يعني مو لازم أنتظرك؟
شتگولين انتِ؟
اني اگول يعني لو انام لان تعبانة.
حقج.

رفعت عيوني لسگف الغرفة أتهرب من نظراته اللي مخترقتني اثنينا ساكتين مرت دقائق بالاخير گتله.
اگلك مُجاهد الغرفة حلوة هاي.
انتِ أحلى.
شكراً عيني.
هلو عيني.
زين اگلك انتَ ما تعباه مو لازم تنام.
اي والله كلش تعبان و اريد ارتاح.
صفنت بوجهه و حسيت بنفسي چفصت بدون ما الاحظ صرت الوص بالحچي.
هاا خوش انتَ نام و اني راح أشوف فلم.
رفع حاجبه يباوعلي.
لاااا بله فلم؟
أي.
حبيبي انا عندي فلم الچ بس أنطيني الأشارة.
يا أشارة.

الخضرة.
فهمت قصده وجهي نار شبت بي بقيت ساكتة أدولي على سالفة احچيها كل هذا و هوَ حاضني بين ايديه.
مُجاهد: شو اوگفي ناز شنو هاي.
ناز: شنو شكوو وين؟
اوگفي هاي بشعرج.
أتقرب أكثر و اني انتظر عبالي اكو شي ما أحس غير طبع قبلة بين خدي واذني.
مو حرام الشذب.
چا مو حرام جاي تشعوطيني بعدين تعاااي هاي شلابسة ماينعرف وجهج من اللون اللي لابسته.
لا تعيب.
ناز.
هااا.
اللي يشذب الله وين يذبه؟
بالنار.

خوش حچي اسئلج سؤال و جاوبيني بدون شذب.
انتَ ليش تگول شذب.
احچي بلغتج بوية.
امم شنو سؤالك.
خايفة مني؟
ضميت وجهي بصدره ساكتة أيده رفعها يمسد بيها شعري بدأت ليلتنا، للصبح
فتحت عيوني شفت نفسي بحضنه سحبت نفسي بهدوء للحمام سبحت وغيرت
لبسي ابتسمت و اني اتذكر ليلة البارحة كمزت و طلعت من أفكاري على
دگة الباب عدلت نفسي سريع و فتحت الباب بدون ما اباوعله ردت اطلع لزمني من ايدي.
مُجاهد: ماكو صباح الخير؟

ناز: صباح الخير.
ناشفة.
حطلها مي.
مشيت اضحك عرفت قصده صاح و هو بالحمام و اني وگفت ارتب بالسرير.
أخت الاعرج تستلوتين مثله.
عاد الا ابو سيرين ما اقبل تحچي عليه.
هسه صار الوگت الاخذ راحتي بي چنت أخاف احچي شي ويگلس بطلت ما أنطيك اختي لان اخوج مسودن.

كمل سبح وطلع جابوا الريوك اكلنا شوية محد يشتهي جهزنا نفسنا علمود نروح البيت أهله منتظرينا لبست الفستان الصباحي اشترته إلى غياهب هدية منها لونه كريمي مديت ايدي أحط كريم أساس لزم ايدي.
مُجاهد: صدگ عود؟
أستغربت مافاهمته.
ناز: شنو؟
تريدين تحطين من هذا ما أدري شسمه ولچ غير انتِ مزلوغة زلغغ ببياضج.
بس شوية.
لا خيولي انا أحبچ بشكلج الطبيعي عليمن حاطة هاي مواد كيمائية تخرب بشرتج بعدين.

تمام احط ايلاينر وحمرة شوية.
لا ختولي الحمرة هسه انا أغيرلج لون شفايفج.
درت وجهي بسرعة شو هذا صاير مايستحي اتبهذلت بارتباكي الاغراض
وگعت مني امداج ناز شبيج اسمع صوت ضحكته ورايَّ، اخذت الايلاينر
أرسم عيوني سحبه مني رفعني من خصري گعدني على الميز مال المراية فتحه.
أرسمه الچ؟
تعرف؟
أعرف الكلشي.
خاف تخرب عيوني.
هسه تشوفيهن.
و اني مثل الغبية سلمته نفسي بدأ يرسم و يشتغل على كيفه كل ظني صدگ يعرف.

و يطلعه إلى حلو لان ايدي اني ترجف ما أسيطر.
شنو مُجاهذ ماطلعت رسمة ايلاينر صارلك ساعة بيها.
اوگفي هسه راح نكمل حتى كوافير صرتلج شتريدين بعد اخت الاعرج.
أنشوف و نحكم.
أبتعد عني صارت شبه أبتسامة على وجهه بس ضمها صابني فضول أشوف
شكلي درت وجهي للمراية فتحت عيوني و حلگي على منظر عيوني صحت.
يماااااا شنووووو هاااي دخيلللك ربي.
رجع لوره فاطس ضحك رحت عليه اضرب بي.

هاااي شسويت بيَّ هااا هسسه شيوگعة صرررتلي شاطرر تتعلم برررراسي.
يريد يلزم ايديَّ مايگدر من الضحك وگعنا اثنينا على السرير قيد أيديَّ يحاول يسكت ما يگدر مُستمر يضحك.
مُجاهد: هههههههههههه هسه نمسحه شبيج تخبلتي.
ناز: تعررررف طلعت اشبه منو؟
منو؟
عبالك ذولي جماعة اخناتون امن حوتم ماعرف حوتم من يخلون الايلاينر طايررر لاذاناتهم.
رجع يضحك عفته ورجعت للحمام اوگع بي ونوب هذا گوا يطيح طلعت اخزر.

بي و هوَ كل مايباوعلي مايگدر يلزم نفسه كل شوية ضاحك، طلعنا من الفندق متوجهين البيت أهله.
غياهب.
غياهب: أرسلان حباب اگعدد اتأخرت.
فتح عيونه بنعاص و أنزعاج يتخبل اذا أحد يگعده و هوَ نايم.
ارسلان: شتررريدين؟
راح أطلع للمحكمة ديربالك على سيلي مو تنسى تريگها تمام حبيبي.
وانتِ أكلتي؟
ما أشتهي.
نهض من مكانه وجهه مايگصه السيف و مخدته بايده طلع گدامي متوجه الغرفتها.

حط مخدته بصفها اباوعله وسحبها الحضنه رجع مام ركضت للغرفة اخذت
اغراضي يم الباب بدون ما يحس صورته أعشق شي اسمه ذكريات نزلت
جوا النص الدرج و ذكرت نسيت مفاتيح سيارتي رجعت صعدت الغرفتي أدور
ماكو وين راحن مو وگت تضيعن ياربي، رجعتله يم الباب هسه يعيط بيَّ بس اريد مفاتيحي هوَ دائمًا يضمهن بمكان.
احم ارسلان.
مارد عليَّ دخلا وگفت يم راسه دغيته باصبعي زفر نفس بقلة صبر.
ارسلان: هااا غياهب هااا.

وين مفاتيح سيارتي ماموجودات دورت عليهن.
وره الباب معلكهن.
هاا خوش.
نزلت بجسمي طبعت بوسة بخده.
اسفة لأن كل شوية مگعدتك.
أنتبهي النفسج عزيزة عيوني.
سديت الباب عليهم ونزلت اخذت جنطتي وطلعت اتأخرت اخذتني النومة صعدت
بالسيارة و اتوجهت للمحكمة عندي جلسة بنص الطريق خابرتني الموكلة فتحت خط عليها.
غياهب: عيوني ام ليث مابقى شي و اوصل أعتذر على التأخير شغلة دقائق ويمكم.

سديته واسرعت بسياقتي عندي قضية حضانه و الاطفال مو بصالح يبقون
يم الاب لان يشرب و مرته اطلكت منه بسبب شربه وضربه الها وسوالفه
بالمختصر تعبانة من الاخير، الاطفال چان يأخذهم يمه من يرجعون الامهم معنفين
من قبله سويت تقرير بخصوص هذا الشي لان اكيد راح يفيدنا بربح القضية
وصلت للمحكمة لبست روبي الخاص بعمل المحاماة نزلت التقيت بيها وگفت يمهم اباوع للام قلقة و متوترة.

ام ليث: والله خايفة ست غياهب ما ادري هذا سكوته وهدوئه يخوفني.
غياهب: شيريد ايسوي مثلاً اتفائلس بالخير الحق دائماً المنتصر مهما كان الوضع.
أجه الاب و وياه محامية مشوا من يمنا باوعلنا بطرف عينه و ابتسم مكملين طريقهم.
شفتي شلون دخل واثق كأنما متأكد هوَ الراح يربح.
لا تخافين.
صار وگت ندخل للجلسة دخلنا سميت باسم الله ودخلت بدأت الجلسة و كان.

اكو توتر قوي بين الطرفين و نقاشات حادة صارت لان اتوجهت بعض الاتهامات
للأم لكن مع الدلائل اللي عندي مانطيتهم مجال لا بالبداية و لا بالنهاية
ابتسمت من انحسم القرار و الحضانة ربحتها الام لان الاطفال بعدهم صغار.
طلعنا و شعور الفخر محاوطني بينما الام محتارة شلون تعبر عن فرحتها وسعادتها
تضحك لو تبچي من فرحتها حضنتني تشكر مني.
شلون أجازيج شلون بس گليلي بفضل الله وفضلج اطفالي راح يبقون عندي.

الفضل لله ماسويت شيء غير واجبي.
هزت براسها و دموعها مُستمرة تنزل ما مصدگة رجعت البيتها الفرحة غامرتها
فرحة الرابح كنز و فعلاً اولادها چانوا كنزها بهالدنيا، كملت كم شغلة عندي
وطلعت و اني دا امشي اصطدمت بشخص رفعت عيوني چان محامي بس ما اعرفه اول مرة اشوفه.
غياهب: أعتذر منك مامنتبها.
لا اني اللي أعتذر من حضرتج لان الغلط مني.
حصل خير عيوني.
كملت طريقي صعدت بسيارتي باوعت من الجامة شفته واگف يباوع باتجاهي.

شبيه هذا انطلقت راجعة للبيت، نزلت اخذت كم شغلة من الاسواق
وصلت للبيت بقيت صافنة شنو هذا الصوت؟ چان صوتي اغاني عالكة واصل صوتها
الباب الشارع عززززا بعينج غياهب انفضحنااا، فتحت الباب امشي سريع
أستوقفني جهازي يرن چانت حنين جاوبتها و اني ادخل جوا للبيت.
حنين: هاي شنو شعندكم عرس؟
غياهب: أعذرينا تم تحديث زوجي و بنتي.
اوووووي صوريهم إلى بربج غياهب.
انا بيا حال و الدفان يغمزلي.
عليچ الله غياهب صوريهم.

أسكتي أسكتي انفضحناا بالمنطقة، أبقي ويايَّ على الخط.
وصلت الصالة وگفت بمكاني فاتحة حلگي متكابل هوَ و بنته ويهزززون خووو هاي
سيلي الفصمة تهززز من كل گلبهااا و ارسلان يصيح داخل بالجو وياها.
ارسلان: شدددد بعدددد شيبي شدددد.
أصيح عليهم و لا عبالك يسمعوني مشيت طفيت الاغاني انتبهوا اثنينهم صاحوا بانزعاج.
ليشششش.
غياهب: صدگ چذب جيران بصفنااا شيگولون علينا هسه.
ارسلان: ببيتي عمي قابل شمسووي راگص بنص بيتهم.

هاي عود انتَ الچبير يحظي اخخ ارسلان اخخخ.
اخخخ غياهب اخخخ.
ما أهتموا إلى ورجعوا شغلوا الاغاني يرگصون صعدت فوگ اكمل مكالمتي ويا حنين.
هوَ و بنته ظهرت صافيناز اللي بداخلهم.
حنين: ما أستغرب لان كلشي وارد من الزلم و اتعودي درغام نفس الحالة هوَ و أبنه
تظهرلي بالليل فيفي اللي بداخلهم و يكمزون فوگ راسي.
و هوَ درغام يعرف بيچ رگصتي بعرس مُجاهد او لا وانتِ حامل.
داخلة على عرضج و شرفج أسترينا الله يسترج.

انچبي أدبسزز حامل وبالاشهر الاولى و تكمزين زين منه و ثابت الملكوفة.
العفو أتوقع مشتبها اني ام الحسن مو الملكوفة.
نزعت حذائي اتمددت بملابسي نعسانة.
اگلج صدگ انتِ شعندج متصلة نسيت اسئلج.
ذكرتيني حتى اني نسيت و الچفن العدويني.
احچي لِچ أريد أنام.
اليوم معزومين يمنا عشه.
شنو المناسبة.
ماكو مناسبة بس خالي مسوي عزيمة يگول من زمان مامجتمعيه ودام عمر و نيروز
و رماد هنا گال نسويلنا جمعة قبل لا يسافرون.

لعد ما انروح ال ناز؟
باجر نروحلها نيروز گالت العصر اتروح هيَّ و العلوية و مليكة و انسام.
نايس لعد.
يلاا حسده هذا المدير يفتر علينا اذا حچى بعد ماسكت حتى الماله علاقة يشيله طشار بالحچي.
ههههههههه ماتبطلين سوالفج.
سديته منها سحبت مخدة جوا راسي اجتني رسالة من نورس كاتبتلي.
نورس: صار جلستين ماجاية غياهب بيج شي؟
كتبتلها.
هلا نورس لا ماكو شي بس انشغلت هالفترة أمر عليج ذني الايام شكراً الج.

نزعت السترة اللي لابستها و الحجاب دفنت روحي بفراشي من النعاس
و التعب نمت بسرعة، مر وقت نايمة فتحت عيوني يحرگني من النعاس و هوَ متمدد بصفي يبوس بوجهي.
غياهب: شگدد مزعج.
ارسلان: مبينة تعبانة الدرجة ما مبدلة ملابسج.
درت وجهي اله حاضنه المخدة.
ما سئلتني عن الجلسة؟
مد ايده يعدل بشعري.
مو عيب غياهب سلطان ماتربح القضية وهيَّ مستلمتها.
اممم بس هم رادوا يلعبون وجهوا اتهامات للام مُزيفة و أحس اتوترت بالبداية.

شلون أحل كلشي صار متشابك ببعض بس الحمدلله گدرت أعبرها.
ما ينخاف عليچ.
وين صافيناز؟
طبك حواجبه ما فاهمني.
منو قصدچ؟
بنتك.
تشبهينها براقصة ولچ غيااهب.
لعد هيَّ جوا شچانت أتسوي تلطم غير تهززز بروحها.
رفعت المخدة ضربته بيها يضحك.
كله من ورراك انتَ علمتهاا بنتي راح تتفوسق تربيتها.
الرگص يطرد الطاقة السلبية.
نهضت من مكاني سحبت ملابسي أشرتله يغطي وجهه.
عوووود ليش أغطي وچهي فددد فووووصة وربج.
يلااااا.

عاند ما يقبل اخذتهن وطلعت للحمام ظل ورايَّ يحچي يگول عيارة هتي بدلت
ورجعت اول مادخلت اجتني ضربة المخدة صارت براسي.
غياهب: لاااا تتحرش لا تعرف شسوي.
ارسلان: شتسوين بلاا؟
اني أفعال مو بس كلام وانتَ تعرف كلش زين شنو أگدر أسوي.
قلبت عيوني نزلت جوا الساعة عابرة الوحدة الظهر و احنا بعدنا بدون غده
و مطابخه نزل ورايَّ يحچي يمااا هذا الرجال مايمل من المداهررر.
وينهااا أفعالج تعااي شوفينياهاا.

اشو تدور مشاكل انتَ خير؟
مشتهي مشاكل بيها شي؟
باوعتله بطرف عيني رفعت شعري وگفت اريد اطبخ راح سد الباب مال المطبخ واجه عليَّ.
بس حچي مابيچ خير.
ههههههههههه عود دا اتريد تستفزني.
شو تضحكين؟
تسكت لو لا.
و اذا ما سكتت شتسوين.
يگولون هالفترة النسوان بادية بأزواجهن لو يگصن أذنه لو ينيمن السچينة بروسهم هم سمعت بهيچ شي؟
كتمت ابتسامتي شلون باوعلي لزمت السچينة اقطع بيها الخضروات باوعتله بباوعلي مقلص عيونه.

عود شني حضرتج تهدديني؟
مو گلنا ما نهدد أحنا أفعال بيبي.
أجه يمشي حصرني بين الكاونتر وبين جسمه حاوطني بايديه.
غياهب: وخر مدا اتشوف دا اشتغل.
ارسلان: أي اشتغلي أحد لازمج.
مرر أنفه على خدي درت وجهي أحارب ما افضح نفسي و اضحك.
مو وگت رومانسيتك مدا اتشوف اثرم بصل ما تلعب نفسك.
بعد شعري الواگع طبّع شفايفه برگبتي و لعب بعدادات گلبي.
اخر شخص أفكر تلعب نفسي منه هوَ انتِ.

هسه انتَ مو نزلت تتعارك أشو اشتغلت سوالفك السخوفية.
گرصني كمزت بمكاني درت عليه خازرته ضربته بصدره يضحك.
كم مرة گتلك هالسالفة بطلها أضوج منهاا.
انچبي أسوي اللي يعجبني.
لا والله؟ و مصدگ روحك.
چاا شنو اللي يمنع ما أصدگ روحي.
يلااا بيبي كملت؟ أطلع خلي أكمل شغلي.
سمعنا صوت سيلي بسرعة أبتعد ما يحب اتشوفنا بهيج منظر.
ارسلان: هاا بابا.
وگفت يم الباب تفر بروحهاا.
سيلي: أليد بزون.

لا بابا لاا الا هاي السالفة تلعب نفسي منها.
اخذها شالها و طلعوا يتخبل من البزازين مو يخاف بس تلعب نفسه من الحيوانات
كلها و سيلي صارلها بالشهر تلح عليه تريد وحدة لان درغام جايب وحدة
الحنين لان مالتها القديمة ماتت و من شافتها تفتر علينا تريد مثلها، كملت
الغدة و رجعوا شغلوا الاغاني شمرت نفسها بملل طلعتلهم وگفت كتفت ايديَّ.
غياهب: شنووو فرحااان بزواج أختك؟

خزرني ركص ورايَّ طفرت على الدرج اضحك وگفت بنصه صاح ورايَّ.
لااااا تررركضين خررررب غيااهب گلبج موووزين عليچ.
وگفت أجر بالنفس و هوَ لو بدري مرات شغلي اصير بي هيج حالات يطيح
حظي صعد إلى لزم ايدي يباوعلي بخوف وقلق.
شبيج؟ گلبج يأذيج؟
مابيَّ شيء لا تخاف.
مو گايلج لا تركضين.
نسيت.
جاي تاخذين علاجج بأنتظام من اروح للدوام؟
أي.
باوعلي بنظرة عدم تصديق.
غيااهب؟
والله شبيك مامصدگني شنو؟
مصدگج تعاي ننزل يلا.

نزلنا جوا ويمشي بيَّ بهدوء صبيت الغدة گعدنا نتغدة رفعت راسها سيلي لازمه بايدها خاشوگتها.
سيلي: بابا.
باوعلها و هيَّ من شافته يضوج تگول دادي صارت تگله بابا لان يمشي ويصيح ولچ بوووية عوفي كلمة دادي.
ارسلان: عيونه.
يثير أبوث الحثن.
شدددد.
أييي ليث ما أبوثه.
بطول الأصبع وتدورين بوس يابوية چا شلون بيَّ من تكبرين.
غيرت الموضوع و لو ساكتة أحسلي.
غياهب: ليش بالروضة ماتلعبين ويا البنات؟
عقجت وجها.

سيلي: أيععع ما أهبهن.
ارسلان: ليش بابا بيهن جرب لو يگرصن و تتحسسين منهن.
ألعب ويا ادم.
ضربت خدي بصمت خازرتها تسكت و ارسلان عاف الاكل باوعلها بتسائل و فضول.
منو ادم؟
غياهب: هااا يمعود ارسلان وياها بالروضة طفل صغير ترا.
هز براسه ساكت رجع يريد ياكل غير تلزم السانها لا وين كل كلمة تذبها اكبر من راسها رجعت گالتله.
سيلي: بابا ادم هلو حلو .
رفعت ايدي على وجهي انلاصت نهضت من مكاني گعدت بصفها.

غياهب: كافي مانا زودتيها.
تغالين مني تغارين مني .
أيي أيي أغار بس اسكتي و كملي اكلج.
ارسلان: ان شاء الله ينكتب على گبري سبب وفاعي بنتي.
غياهب: ارسلان طفلة مو كلشي تحچي تاخذه بجَدية.
خوووش.
عاف الاكل و طلع ضايج، صفنت چنت مفكرة ماكو شخص مثل أبوية يغار
علي بناته بس اللي صرت أشوفه ارسلان أضرب من أبوية بالغيرة حتى لو سيرين
طفلة يغار عليها ويبقى يكتم لان طفلة و مايگدر يسويلها شي و هاي بنتي.

روحهااا بالكادر الرجالي و الحلوين باوعتلها.
غياهب: عجبج ست سيرين؟
سيلي: شثويت ثبيج.
ماسويتي شي ماسويتي ارجعي اكلي.
طلعت وراه شفته گاعد بالحديقة مال البيت يدخن مشيت بخطوات گعدت بصفه ملت براسي على كتفه مبتسمة.
غياهب: لا تگلي زعلت من بنتك.
ارسلان: لا شزعل.
اممم لعد ليش تركت الغدة.
شبعت.
ارسلان؟
حيلي.
سحبت نفس اوضحله الفكرة.
حَبيبي سيلي بعدها طفلة و ما دا تفهم اللي تحچي وما تحچي.
و شنو المصبرني غير هذا العذر.

هههههههههه لعد أضحك يلاا يلااا.
مالي خلگ.
رفعت راسي اله خازرته.
لا شوووو الا تضحك.
صارت شبه أبتسامه على ثغره.
عمي وخرن عني انتِ و بنتج راح تجلطني.
دا ارد و اندگ الباب مال بيتنا، نهض من مكانه راح فتح الباب مجرد سمعت
صوت زلم دخلت جوا سيلي بعدها بمكانها تاكل و گدامها الايباد مشغلة كارتون
باوعت من الشباك دخل رجال معكل و طبكت حواجبي بأستغراب وياه نفس.

الشخص اللي شفته بالمحكمة، رحب بيهم ارسلان وبوجهه علامات الاستغراب
دخلهم للصالة مال الضيوف، اجه دخل للمطبخ گال.
ارسلان: حضري ضيافة.
سويت مثل ما گال سويت نفسي ما أعرف شيء بالاول خلي افهم.
غياهب: منو ذولي الجايين؟
ما أدري والله بس يگولون جايين بالخير.
أهاا.
هزيت براسي كملت الضيافة وانطيتها اله طلع و اني رجعت اشتغل بالمطبخ
أفتر غسلت المواعين ونظفت سيلي بقت گاعدة يمي لا اتروح يمهم وتچفص.

بشي غير تفشلنا و تخلي ارسلان يلطم، مر وگت و طلعوا نبض گلبي بخوف من دخل ارسلان.
من برا و عيونه صايرة بگصته صاح بصوت رج البيت و حتى بنتي خنست بس عيونها صارت تفتر.
ارسلان: وللللللچ غيااااهب ووووينچ.
دخل للمطبخ بلعت ريگ أشرتله بعيوني على سيلي رخت ملامحه شوية اتقدم الها حچى بهدوء عكس ملامحه.
ارسلان: بابا سيرين أصعدي الغرفتج شوية و اجي نلعب انا وياج.

نزلها من الكرسي حط الايباد بايدها وطلعها صعدها الدرج بقى يباوعلها حد مل اختفت دار عليَّ أشرلي أمشي گدامه للصالة.
شكو ارسلان؟
گدامي أمشي.
رفعت حاجبي اتنرفز من هذا الاسلوب.
ما أحب هذا الاسلوب تعرفني صيغة الأمر لا تستخدمها ويايَّ.
گووا لازم روحي أمشي نحچي بالصالة.
شيت گدامه ضايجة من أسلوبه ما أحب هالشي سواء وياه أو ويا غيره أتخبل منه وگفت بنص الصالة.
أتفضل احچي شبيك انگلبت خلقتك بس أجوا هالناس.

خزرني اتقرب حاط عيونه بعيونه.
تعرفين هالناس منو؟
وين اعرفهم اني؟
رفع حاجبه.
متأكدة ماتعرفين أحد بيهم؟
بس واحد اليوم شفته بالمحكمة و أتوقع محامي هم ماشايفته يعني
بس اليوم اول مرة اشوفه بس ليش هالاسئلة بيبي؟
أتقرب إلى رجعت لوره شبيه الرجال أتسودن عليَّ ظل يتقرب لحد ما الطشت على التخم إلى ورايَّ.
غياهب: شنوو السالفة يااا.
حط وجهه بوجهي خازرني راح اموت خوف وضحك.

تدرين ذوله جايين و مترهين و بكل ثقة يگلولي يشرفنا نخطب أختك؟
كلهم أختي زفيانها وزوجناها البارحة.
غيااااهب.
كمزت بمكاني.
هااا عيوني.
جايين يخطبوووووونج مني اناااا رجلللج يخطبوووونج مني شسووووي هسه گليلي.
صفنت بوجهه أستوعب كلامه بس الموقف بگد ما ضوجه چان يضحك بالنسبة الي.
احم. يخطبوني اني؟
لااااا يخطبووووني، انتِ مااا جاي تفهميننن شحچي.
لا لا فهمتك بيبي الناس أجوا يخطبوني منك عبالهم أنتَ أخوية.

اخخخخ غيااهب اخخخ هااي تاليتي بنص بيتي يجووون مررررتي مني.
مسحت وجهي يمااا شلون الزم ضحكتي.
شگتلهم انتَ؟
گوووا لزمت روحي گتلهم الخااتوووون مرررتي هاااي.
احم. يلااا حَبيبي عادي تصير أشتبهوا.
روحي من وچهي لاااا هسه هنا أخبزج خبز العباس و الزگج بالگاااع گووووومي.
طفرت من مكاني و هوَ اللسان الدلالة گام يلعلع تلعلع يعد ويصف عليهم
يمكن البعض يشوفها مُبالغة بس هوَ هذا ارسلان وهاي غيرته و حبه.

ارسلان: أدرررري انااا شنووو و تخطبوووون مررررتي مني.
غياهب: حقهم ما گدروت يقاومون جمالي.
أذا أجي أكسر ضلووووعج بنت سلطاااان المرررراهق.
شحدددك.
ما أحس غير صار گدامي عيونه تنفض غضب لزمني من أيدي ضاغط عليها بقوة.
أيددددي شبيك ارسسلان؟
عووود انتِ شنو جاي تستهزئين بيَّ لوووو شنو غياااهب؟
عليمن مكبر الموضوع عبالهم ما متزوجة و هسه عرفوا و انتهى كلشي عليمن غاث نفسك.
ماشي غياهب.

عاف ايدي و طلع مسودن مال غيرة ثواني و صرت أشوف كلشي بالصالة يتحول
الرماد شكوو شي گدامه يشيله ويرگعة هذا ارسلان اذا ما حچى و كتم مايظل
شيء بالبيت مايكسره وهاي الصالة اكثر من خمس مرات احنا مغيرين غراضها
بسببه يكسر و من يهدأ يروح يشتري غيرهن وعلى هالموال باقين.
طلعت أفكر هذا اللي اجه شلون عرف بيتنا وشنو ماشاف الحلقة اللي بايدي غريب
والله و شبساع شافني الصبح اجه العصر يخطب، رجعت فتحت الباب چان.

متمدد وكلشي صاير يا قدوس گعدت بصفه لزمت ايده دفع ايدي.
غياهب: ارسلان.
ارسلان: امممم.
نخلص من راهب وجنونك منه تجينا هسه هاي السالفة، عيوني انتَ حتى ما أعرفه.
هوَ يگوووول انا شايفهاا اكثر من مرة بالمحكمة.
لان شغلي هناك أكيد يمكن شايفني بس اني ماشايفته و عيونك.
ضرب أيد بأيد فايررر باعصابه.
لِچ هذاااا ابووووه يگلللي أبنا شاااق بنيتكم و خووووش بنيه و عجبته وللللچ
انااا يگولوووون على مرررتي عجبتهم و گددامي؟

ياا يااا شوف شلون صدگ ما يستحون أدبسوووز معليك بيهم.
والله مااا غيرج الأدبسزززز ام المصايب يومياااا سالفة وكلهم محامينن
مرة وااااحد يرقمج گدامي و هسه واحد يخطبج مني شسوووي بيچ؟
ضمني بگلبك.
فتح عيونه بعد ما چان مغمضهن تسللت أيده الخصري سحبني بهدوء اله
صرت فوگ صدره مشى ايده الثانية على خدي و عاگد النونة.
لو يصير أضمج والله أحسن من ماجاي يحترگ هيچ.

هسه شبيك يا عيني إلى يشوفك ويسمعك يگول هاي مرته ملكة جمال و يغار عليها هيچ.
چااا شعليه الجمال بالغيرة؟ والله بيج دفرة أطلع ضيمي، ماله علاقةالجمال
الانسان من يحب يشوف اللي يحبه أجمل شخص بعيونه حتى لو حطوه و حطوا
بصفه ملك جمال راح ايشوف اللي يحبه أحلى.
أعرف بس انتَ دا تتأذه ما ايصير هيچ.
غير من وراچ.
شدخلني اني.
نزل راسي على صدره أحس بدگات گلبه همس بصوت خافت.
بنت المراهق تشعليني و تطفيني.

بس عوفوووا أبوية انتَ و درغام.
من حبنا اله لان خلفلنا مصايب.
ضحكت رفعت راسي اباوع للهوسة هسه هاي شينطفها.
تدري الصالة لو عندها السان چان صاحت عوووفني بحالي من تعصب.
چااا أحسن ما أچفص وياچ و يطلع مني تصرف غلط لو حچاية تجرحج غير
أموتن بقهري لو نقهرتي و انا حالف دامني أشم الهوا أعوضج عن كلشي.
مرت دقائق نسولف الى ان ثكل نفسه عرفته نام و ما اگدر اگوم والله سيلي.

اذا تدخل هسه و اتشوفنا بهل المنظر و الوضع الا تفضحنا، سحبت نفسي
منه، نظفت الصالة وصعدت اجهز ملابس الها دخلت اشوف بنتي شفتها نايمة
تمبل نوم طفيت الجهاز، للعصر گعدوا جهزنا نفسنا علمود نروح البيت خالي كملنا وطلعنا مشينا مشي لان زين قريبين علينا.
غياهب: شلون صرت.
ارسلان: هسه احچي الابوچ أشوفه شنو رأيه.
ياااا.
أريد اگله شنو شعورك و انتَ يخطبون مرتك منك.

سكتت عنه بعده متنرفز من السالفة قبل لا ندخل لان وصلنا گال.
ما جاي أشوفج تروحين الدكتورة نورس؟
بس جلستين ما لحگت أروحلها انشغلت.
هز براسه.
علمودچ انا عزيزة عيوني لان وضعج أحسن من قبل.
ان شاء الله.
دگ الجرس مال بيت خالي بقينا واگفين ننتظر يفتحون الباب، أكثر شخص
سندني هوَ و ابوية و اختي هم ما قصروا بس اكثر شخص اتحمل كل تعبي
و تقلباتي و اگدر اگول وضعي أهون من قبل بس لليوم أحاول اتخطى صدمتي.

بموت بنتي صعبة عليَّ أتخطى هيچ حادثة و اني شفتها گدام عيوني لليوم صوتها
وهيَّ تبچي و تتلوع يرن براسي ما گدرت انسى و لا جزء من حادثتها رجعت لواقعي من انفتح الباب چان خالي جابر.
جابر: يا هَلا بحبايبي.
غياهب: هلا بيك خالو.
سلم عليه ارسلان دخلنا جوا و صوت حنين ودرغام طالع لبرا يتعاركون
هاي تگله مت وراك و هوَ يگلها لا من وراچ الفاهية، دخلنا من باب المطبخ واگفين اثنينهم يتناكرون.

غياهب: هااا هااا شصاير يمعودين؟
درغام: أختج حرگت الكيكة.
حنين: لاااا تچذب المزنجرر گتلك ديربالك عليهاا.
ارسلان: صلوا على النبي خوية چاا الناس تتزوج و تخلف تعقل الا انتم بالعكس تمشون.
جوهرة: خلصوووني منهم وطلعوهم من المطبخ سودنوووني يااااع.
درغام: فوگ ما انساعدج يمة تطردين بينااا.
حنين: انتَ بس أطلع منهاااا درغام مسوي روحك شيف وتعرف.
أحسن منچ.

دخلوا جوا الولد و خالي وگفت أساعدهن و حنين شوية تتقصد تحچي وتعلي بصوتها علمود يسمعها.
حنين: هوَ هوَ حررررگهااا درغاام.
و هوَ يريد يجيها خالي يلزمه.
غياهب: منو حرگها؟
حنين: لِچ شوفي والله كملتها و حطيتها اشويها چان واگف يمي عود يساعدني.
ساعدج بالكيكة؟
أي هيووو ترا شبيج صعبة.
كملي كملي.
أي فشنو خابرتني أنوار بقيت أسولف وياها رادت تشوف فستاني اخذته.

من فترة تريد تاخذ مثله گتله دقائق واجي گال اييي و خووووش بقيت بالغرقة
شمدريني يدگ الناقصة. ما أشملج غير ريحة العطاب ترست البيت طلعت والگاه
مطلعها صايرة فحم طلع حضرته طالع برا يم خالي و خالتي مو بالمطبخ و الكيكة راحت ماتسوووووا التعب اللي تعبته.
يلااا فدوة هيَّ كيكة.
چنت مشتهيتها المزنجر حرگها.
اني أسويلچ و أدزها لا تزعلين صغيرونتي.
أبتسمت برضا، لليوم ماتضبط الشي اللي اتسوي مامرة طبخت شي اذا ما حرگته.

لو ماتعرف تضبط المواد و تخرب الاكله، مرت ساعة الكل أجه بيت خالي عمران
و أبوية و خالتي، حضنت ابوية أشم عطره نفس الحنية ماتغير شي لا علينا و لا على أطفالنا إلى معزتهم بمعزتنا.
غياهب: شلونك حَبيبي.
سلطان: نظر عيني مشتاقلج شلونج.
الحمدلله.
أجت حنين سلمت على أبوية حضنته بكل قوتها ابتسمت الحركاتها دخلوا يمهم
اجه رماد وگف يمنا يضوج بحنين رماد هالفترة أجه زيارة هنا و هذا الاسبوع.

يرجع يسافر و خالة نادين من هسه ضايجة تريده يرجع كل مايجي هنا تبقى
تحچي تريده يرجع بالاخير گالها بس يكمل شغل هناك ويرتب وضعيته لان مرتبط هناك بشغل و هوَ مهندس.
رماد: گتلنااا الجووع يلاااا يمعودات.
حنين: بعد حتى ما مأذن المغرب و نيروز ما اجت بعدها.
خلي أخابرها.
خابرها گالتله بالطريق جايين شوية ووصلوا هيَّ و عمر و أنضمت النا گعدت تسولف
عن ناز و تگول غرفتها كلش حلوة وبيتهم مرتب وسوالف العرس بين ما أذن الكل.

صلى وصبينا الاكل گاموا الولد هم ينقلون بالاكل احنا نصب و هم ياخذون انجمعنا كلنا بسفرة وحدة و من زمان مامنجمعين.
ارسلان: تعاي سيرين أگعدي يمي بابا.
بقت واگفة بمكانها و تباوعلنا مِن شافها ما أجت رفع راسه يباوعلها صحتلها اني.
غياهب: تجين يمي ماما؟
هزت راسها برفض صاحلها أبوية هم ما قبلت راحلها رماد شالها و گعدها بينه وبين الحسن أبن حنين ويضحك.
رماد: هسه راضية خالو؟

هزت براسها تضحك، درغام و حنين ما أدري شيتهامسون و مختنگين بالضحك
علي الصامت يضحكون بس عرفت من نظراتهم المقصد ارسلان.
سلطان: ارسلان أشرب ماي دخنت كلش.
و هوَ لگاها حجة طلع اللي بگلبه.
ارسلان: صدگ عمي اريد اسئلة سؤال من رخصتك.
اتفضل اسئل.
أذا واحد أجه خطب منك مرتك و گلك انريد ناخذ أختك و أبنا عجبته البنيه ورايدها بالحلال شتسوي؟
طبعًا أبوية عباله ارسلان يريد يضوجه فَ جاوبه.
أحط طلقة براسه.

چا اسمع اليوم أجوا خطبوا بنتك مني و عبالهم انا اخوهاااا.
و هنا گلب عليه أبوية و أختلف بكلامه.
أي عادي مابيها شي أبني.
شنوووو هل الاختلافية سلطاااان هسه گلت أحط طلقة بررراسه.
وجدان: يشاقة وياك.
سلطان: ياهوا گالج أشاقة؟ ماليش يخطبوووون مرتي مني.
غياهب: يووووو بابا انا من الظهر أهدي بي وانتَ تشجعه بكلامك.
ضحك درغام يهز بأيده.
درغام: هااي لو انا خاطبين حنين مني الا اطلعهم محملين مكسرين.
بقت تباوعلهم خالتي.

وجدان: شنو سالفتكم انتم عمك يضرب طلقة وانتَ تكسر أستچنوا شوية.
حچى رماد و هوَ ياكل.
رماد: عوفوونا من هالسوالف مال الغيرة العراقية عند الرجل العراقي بيها
حماوة زايدة، كملوا عشع وخلونا نطلع و ناخذ البنات ويانا.
نيروز: اييي اييي اخذوني الابو نؤاس مشتاقة أروح هناك.
تدللين.
كملنا اكل وسوالف و كل شوية ناصبين على ارسلان و هوَ يخزر بيَّ أدري شعلية.

اني، غسلنا المواعين اني و نيروز لان حنين تجهز نفسها هيَّ و أبنها دخل رماد مد راسه بنصنا يهمس بالكلام.
رماد: ما تگولن لرجولتچن لا تجون و خلوني اطلع وياچن بس اني اخ واخواته.
غياهب: روح گللهم انتَ.
غير گلت الدرغام لزمني و انطاني علابية بأيده الكرك.
نيروز: و ليش ميروحون ويانا عود.
ولچن أتورط احچي حچاية و يا وحدة منچن، عمر زين بس ذولاك يشتغل المخازر عبالك داخلين بحرب المخازر.

غياهب: لا تحچي عليهم اذا ممكن ما أقبل.
رماد: بعتيني غياهب بسرعة.
ضحكت ودخلت حنين مكملة تجهيز نفسها بس ضعفانة لان حامل رتبنا نفسنا
اني و نيروز بسرعة وطلعنا كلنا بس الشباب الكبار بقوا بالبيت و كلمن اخذ مرته
بسيارته بس سيلي و الحسن حطهم رماد وياه، بالاول رحنا للالعاب سوالف
رماد هاي و حنين تريد تصعد بالمرتفعات و درغام يصيح لان حامل يخاف عليها.
ارسلان: أم روح الحلوة وين صاعدة خوية.
حنين: لعدد بس أنتم تصعدون.

درغام: عمي انا ما أصعد بس أركدي راح ابقى يمج، دار وجهه على رماد كفخة و هوَ يگول، خرب روحك الا تجيبنا هنا ماتدري عندي طفلة مووو مرة.
صعدنا اني و ارسلان و عمر و نيروز و رماد.
نيروز: اذا صارلنا شي دمنا برگبتك رماد.
رماد: انچبووووووا عاااد أحد جابركم.
و قبل لا اصعد لزمني ارسلان.
ارسلان: غياهب گلبج؟
غياهب: لا حباب لا تمنعني اتحمل.
بس.
لا تخاف اذا شفت نفسي موزينة ما اصعد.

هز براسه بس مامقتنع صعدنا وصار الصوت مال الناس تصرخ ما أدري الواحد
يضحك لو يبچي بطونا انخبطت خبط و رماد و لا مهتم و يصور خربنا ضحك من حذاء نيروز وگع و تصيح.
نيروز: وووولكم حذائي وگعععع.
لحد ماكملت اللعبة نزلنا واحد يگول للثاني الحمدلله على السلامة بعدك عايش عبالي ميت.
ارسلان: معدتي مادري شبيها الله يطيح حظك رماد شسويت بينا.
رماد: ويننن الزلم الخششنة وين أهل السواتر.

رجعنا يم درغام و حنين گاعدين و مشتريلها ومشتري للأطفال.
حنين: هسسسه الا أصير حاامل ليشش و مت صرررت حامل جبتونااا هناا.
درغام: ان شاء الله بلائي بس تطلعين بالسلامة اجيبج هنا و اصعدي باللي يعجبج.
عمر: وين مصعدهاا يمعود هو غير انا كل شوية و ناطق الشهادة.
بقينا شوية گاعدين وطلعنا الابو نؤاس مثل ما رادت نيروز جابوا الولد حلويات
و عصاير خابروا الخال هم يجي گالوله الگعدة ناقصة و صدگ أجه و مليكة يم ناز باقية.

غرام: كُميل حرگني حرگ حتى ما أدري شلبست بس يله جوا العباية منو أيشوف.
غياهب: مو الولد گالوا الگعدة ناقصها الخال.
رجعنا المغرب من ناز بس خالتي بقت يمها ما قبلت أم مُجاهد ترجع ويانا.
الله يسعدها شلونها ناز؟
غمزتلي العلوية تضحك.
بخير بخير.
انتِ هم طالعة عينج ام سراج.
ضحكت بصمت رفعت راسي من درغام بدأ بسوالفه.
درغام: ناقصنااا بس رجل بنتكم.
باوعوله الولد ارسلان و عمر.
عمر: يا أخي شبيك انتَ؟

ليش مُجاهد مو ماخذ أختك لوو اناا غلطان.
كُميل: ههههههههههههه ماخذ اخته و اخت ارسلان.
ارسلان: چاا مو انتَ خالي وخالهاا و اختنا بنت أختك.
ديكمل كلامه و الكل يضحك وسراج و الحسن اتضاربوا صاحوا بيهم يفهمون شكو.
درغام: هااي شنوو عليمن ولكم.
سراج باوعله وجهه صاير دم ضايج وعصبي.
سراج: أبنك باس بنتنا.
چان يقصد على سيلي كزكزت على سراج تحسه من هسه عنده هيچ هيبة الرجولة و الرزانة وثكيل بكلامه ضحك ارسلان.

ارسلان: تربيتي ما ضاعت.
كُميل: چا بوية هاي صغيرة و خلتكم تتعاركون اذا تكبرون شلون عمي هاي
سالفة داچة نوب أبوها ارسلان و هذا ابو سبع الهورة لا هايهية.
درغام: أحنااا اذا خلينا وحدة براسناا ناخذها غصباً على الخشوم.
ارسلان: شلون أتريد نوعيته؟
شنو؟
الزيج.
الكل ضحك، أبتسمت براحة عيوني تتنقل بنظراتها الكل شخص بينا حياته
أستقرت و لا بد بيها بعض الصعوبات بس أسهل من معاناة الماضي اليوم كل.

وحدة بينا بظهرها رجال و النعم منه ماقصروا ويانا و يحاولون شگد ما يگدرون يخلونا مرتاحات و سعيدات.
رفعت كام جهازي أخذت صورة تجمعنا كلنا موثقة هاللحظة ملت براسي على كتف ارسلان مبتسمة.
حنين و درغام بنصهم الحسن ثمرة حُبهم .
العلوية و الخال گدامهم أولادهم سراج و إلياس نتيجة عوض العلوية وتعبها و معاناتها .

عمر و نيروز اللي هدوئهم ياخذ گلوبنا مثل النسمة ما قل حُبهم و لا حتى بشي قليل زاد مانقص و أثبتوا اللي ياخذه منك رب العالمين ينطيك عوضه أضعاف .
رفعت أيدي على گلبه اباوعله عيونه صافنة بوچهي مبتسم.
غياهب: بشنو دا تفكر شنو اللي براسك؟
ارسلان: انتِ براسي حضرة المحامية.
أنرسمت ابتسامة واسعة على ملامحي، ارسلان كان ونعم الزوج و الحبيب.

و الصديق اليوم حياته مصفيهاا و مخليها العائلته و أهله و أحبابه و خصوصًا العائلة
عنده أهم من كلشي يمكن لان فقد هذا الجانب و دا يحاول يعوضه
لارين مانسيناها و لا مُمكن ننساها حتى لو كانت طفلة تبقى بگلوبنه كل
شهر نروح للنجف نزورها و فهمت و أمنت هذا رزق رب العالمين بكيفه ينطي وياخذ و الحمدلله على كل شيء.
مرت فترة أشهر بين حياتنا و ألتزاماتنا و شغلنا و أطفالنا و أجه منورها ذو الفقار.

الأبن الثاني الحنين و درغام الحمدلله كان بصحة جيدة ودرغام طاير بي طيور.
حنين: والله اسماء أطفالي عملاقة الحسن، ذو الفقار .
درغام: مثل أبوهم.
همّ المهم مايطلعون مثل عصبيتك أنجلططط.
دخيل ربهم و العباس ابو فاضل غير اذا مثلي شفايتلهم چاا يطلعون فاهين مثلچ.
بقوا يتناكرون بالحچي محد أدخل لأن بزعنا و ملينا هم يتعاركون منا يرجعون يحچون منا.
للعصر ببيتي الاجواء شتاء المطر ينزل خفيف سويت معجنات لبست شال شتائي.

علي أكتافي لان الجو بارد سويت چاي و اخذت من المعجنات وگعدنا اني وارسلان
گدام التدفئة ندفي بأيدينا سيرين نايمة و حاضنه الدُب مالتها جايه الها ابوية من الزيارة.
غياهب: الجو بارد موتني.
ارسلان: ندفئ بگلبج الحار.
لا تصير شاعر بهذا الجو قلبي الصغير لا يتحمل.
مد أيده يتلمس بهدوء بخدي مبتسم.
خدچ بارد، بس گلبج عكسه يدفيني أكثر من الف بطانية.
ضحكت على سوالفه و اني ارجف الجو ميشاقه صوت المطر مسموع.

حطيت راسي على صدره صافنة.
تدري ارسلان اني ما أريد شيء غير شغلة وحدة بالحياة.
شنو؟
تبقى يمي طول حياتك و تبقى هاللحظات الدافية بينا ما يخربها شي بالدنيا.
گعدت سيرين اجت باتجاهنا و ارسلان يگلها.
تعااي بايا تعااي أكيد بردانة أمج حضنها أحسن بطانية بالدنيا.
نامت بحضني تباوعلي بعيونها
النعسانة ورجعت غفت نامت، مد أيده يتلمس بأصابع ايدها الترفة حچى بهمس و هوَ يقبل أيدها.

ارسلان: فهمت العائلة مو بس ناس نعيش وياهم جوا سگف واحد لا هم مثل الوطن اللي يلمك مِن كل شتاتك.
رفع عيونه إلى لحظات صمت، و مشاعر و ابتسامات نابعة من القلب أردف.
مِن تضحكين الدنيا أتصير أحن عليَّ و كل تعبي يروح و أحسني بخير عزيزة عيوني .

تمت