رواية وتيرة الأعرج للكاتبة حوراء السعيدي الفصل الرابع والعشرون
غرام.
طلعوا غياهب و ارسلان و گبت بين كُميل و أمه لان مديفهمون شنو إلى أباله
و هاي البنيه فاطمة راحت حچالي كُميل عنها ما أهتميت الها المهم عندي غياهب خايفة لا ارسلان يرجع يأذيها.
غرام: خايفة على غياهب
كُميل: ابن ال. استغفرالله ماجاي يجاوبني
عمر رجع طلع
هذا هم شوفي وين دايح و كلمن يمشي بكيفه احتاريت وره منو امشي و الزهرة خبلوني اخ لو ما امانة عندي.
اتقربت اله ايدي على كتفه.
لا تقهر بنفسك عمر مقهور لان اذى نيروز و ارسلان محد فاهمه.
غرام
عيوني
يصير ابوسهن
ههههههههه هسه انتَ مو ماخذ الدور المتعصب عوف الرومانسية
دخليني ابوسهن علمود احچيلج شي.
هزيت براسي ضامة ابتسامتي باس عيوني و هوَ يگول.
أوفيش هدأت أعصابي
يله احچيلي شنو ردت تگلي
ارسلان يحب غياهب
ما أستغربت لان واضح من تصرفاته و نظراته و خوفه عليها من تجيها الحالة.
قبل فترة اجاني منتهي
شبيه؟
يگلي تلعب نفسها مني.
حقها حتى لو يحبها هيَّ ما راح تخلي هالشي يطور او يشفع التصرفاته، ارسلان أذاها خصوصاً بيوم زواجهم
أوف يا علوية الولد ضايع داخل بتناقض مرة يريدها مرة ما ايريدها ويريد ياخذ ثأره بس مايريد يرجع يأذيها
ارسلان ديدوس على نفسه هواية و هذا الشي راح يتعبه
غير كون يقتنع وانتِ شعبالج اذا صار زين وياها راح تنساله سوالفه لا راح تردله الاذية بالاذية
ندعيلهم الله يبرد گلبهم ويهديهم
امين.
باوعتله خازرته اشر بمعنى شكو.
ترا انتَ زودتها ويا خالة هيَّ شعليها تتعارك وياها شو حالها من حالنا روح راضيها خطية هسه تلگاها صاير بخاطرها منك
اي والله زودتها اليوم الله يلعنك يا أبليس.
طلع الامه بقيت گاعدة وحدي تحتار ويامن توگف ويا ارسلان إلى عاش أبشع طفولة
لو ويا غياهب إلى ما تقل عنه والله هوَ مو بس يحبها لا ميت بيها بس معقولة بهاي الفترة حبها؟
بس يكابر و يخفي هذا الشي اما غياهب من كلامها ولسانها واضح ماتطيقه.
و لا عندها شي اتجاهه باقية علمود تهديداته او يمكن اكو شي ثاني
براسها بس متأكدة هيَّ راح تنتقم منه أشد أنتقام سكوتها اله معنى.
الثاني يوم اجت جيلان و امها و بس اني و خالتي بالبيت امها سلمت عليَّ طبيعي
بس هيَّ ما سلمت ما احجي وياها من ذاك اليوم إلى سحلتها بي غياهب
بقيت گاعدة يمهن جان وقت العصر دخل كُميل اتفاجئ بيهن گدامه سلم بس على خالته، وگفت جيلان.
جيلان: ماما اني رايحة للحمام.
طلعت من يمنا بقى كُميل يسولف ويايَّ عن ارسلان و خالته عين علينا و عين ويا اختها
مخابره گايله بخير و مابيهم شي فترة و يرجعون بس شنو الغاية ببقائهم هناك.
كُميل: وين جهازج
غرام: بالغرفة ليش
جيبي جبتلج رصيد مو گتيلي
اي رحم الله والديك اريد اخابر غياهب گلبي طگ عليها.
طلعت من الصالة رايحة الغرفتنا حطيت ايدي على يدة الباب و انفتح
باب غرفتي اتشخصت عيوني من جيلان طلعت منها طبگت حواجبي بأستغراب.
شتسوين بغرفتي؟
جيلان: شبيج هيَّ غرفة قابل وين داخلة
أتوقع هاي غرفة نوم و غاط تدخليلها بدون أذن من اصحابها.
بس عدلت حجابي
الحمام بس مراية
هسه شصار شبيج و اذا دخلنا شنو متعجبة عندج غرفة لو حقج فكر ما شايفة.
دفعتها من كتفها رجعت لوره متفاجئة من تصرفي
ايدج لااا اكسرها غرام
رجلج اني إلى اكسرها بعد اذا تدخلين الغرفتي بدون أذن مني.
سديت الباب بوجهه تاركتها بصدمتها عبالها غرام إلى قبل تسمع الكلام.
و الاهاين و تبلعه سحبت جهازي و اخذت المفاتيح طلعت قفلتها خاف الها
نيه ترجع تدخل لان احنا هنا ماعندنا احد يدخل الغرفة نوم الثاني بدون أذن، رجعت يمهم تباوعلي تخزر شافها كُميل: كُميل: شبيها هاي
غرام: لگيتها بغرفتنا رزلتها.
فتح عيونه بصدمة.
شتسووي؟
ما ادري مالحگت الشي ردت افتح الباب و طلعت منها
العببب بس لااا طگونا بسحيرر
شنو سحيرر؟
سحر
صخام الصخمني
گرايب امي معروفات بهاي السوالف صيت خايس
شنسوي هسه.
خلي يروحن و انشوف.
سكتت خايفة خاف صدگ مسويات أعمال الشعوذة و لو جيلان كلشي
صرت أتوقع منها بسبب تصرفاتها و اخلاقها ويايَّ لليل بقن اتعشن
وراحن عمر شافهن بالباب ماسلم عليهن، سحبت أيد كُميل بتوتر.
يله تعااال
اوگفي خلي اشوف عمر
أجي وياك
تعاي.
دخلت خالتي تنام لان هيَّ تنام من وگت رحنا ال عمر صار بوجهنا بأيده ملابسه
يريد يدخل للحمام سحبه عمر من ياخة قميصه يشم بس أستغربت من تصرفه ضحك عمر.
عمر: ماشارب خالي شتدري بيَّ اتقرب انا لهاي السوالف
كُميل: عبالي مسويها علمود اكسر ظهرك و رجليك
لا و من باجر راجع للشغل وياك
زين من رجعت العقلك.
ماكو خبر عن ارسلان
خابرني يگول زينين
هوَ هذا حتى لو موزينين يگول زينين.
دار وجهه مبتسملي.
عمر: شلونج مرت خالي
غرام: الحمدلله شلون صرت انتَ
علي الله.
راح من يمنا والله گلبي ينقهر عليه بس كل انسان يتعاقب و يتجازه بأعماله.
و أفعاله رجعنا الغرفتنا ايدي على گلبي خاف صدگ مسويتلنا.
كُميل: شبيج وجهج انگلب
شو خايفة
خلي ندور.
بدينا ندور ما بقى شي ما نفشناه لا فراشات لا ملابس كلشي حتى
جوا الجرباية مالگينا شي حتى المخاد فتحناهن ماكو نفس شي.
ماكو شي
ما أدري بس گلبي ما مرتاح الدخلتها للغرفة.
قابل وين تخلي نفشنا الغرفة نفش ماكو شي شفت بعينك
ما أدري
دتخوفني
لا انسي هايهية تعاي خلي ننظف الغرفة شوفي شسوينا بيها.
ابتسمت الكلامه.
يعني راح ترتبها و تعزلها ويايَّ.
اي ليش شكو بيها
ما ادري بس اكو زلم يحسونها چبيرة بحقهم
عقليات علويتي مابيها شي المساعدة بين الزوجين و ما بيها شي حتى من تساعد امك، اختك المساعدة حلوة.
أحب تفكيرك
وانا احبج.
دنگت الملم بالاغراض خجلانة من كلامه و وجهي مبوخ بدينا نرتب بيها
و نرجع كلشي المكانه و فعلاً احب تفكيره انسان واعي متفهم مثقف بعقليته
ماعنده كلشي عيب و يستنكف منه، مشت الايام هادئة و عايشة حياتي بهدوء.
مرات تجينا انسام تونسني اذا زوجها ماموجود تبقى يمنا تبات مرات لان تگول هم تضوج وحدها.
اجوا عمر و كُميل مثل العادة يتغدون و مرات بس واحد منهم يجي و الثاني
يبقى بالمعرض باوعت الكُميل مو مثل عادته من يرجع حتى ما باوعلي عذرته
اكيد شغل و تعبان بس لاحظته لان تعودت على كلامه و تصرفاته صبيت الهم چاي
گعدت بضفه كل يوم من يرجع يسئلني شلون گضيتي يومج شسويتي بهل الساعات.
و هالشي حابته لان مديحسسني هو بس زوج إلى لا وصديق هم بس هل المرة كل هذا ما سئل عنه.
غرام: بيك شي؟
كُميل: لا ليش
داحسك مو على بعضك
لا مابي شي.
كلامه جاف و ناشف ويايَّ و هذا الشي بدأ يتطور مع الايام صار ينفر مني
اذا اتقرب اله و اذا احاجي تحسه ماله خلگي صرت اختنگ من الوضع المنو احچي
و أفضفض ما عندي احد چان بس هوَ وهسه حتى تغير مو مثل الاول.
دافنة راسي بالمخدة جوا الغطى دموعي تنزل بصمت مختنگة من كلشي.
راسلت دكتورتي حجيتلها كلشي نصحتني انطي مجال و أحاول افهم السبب مستفقدة
كلشي جان بينا، حبه، حنيته عليَّ، نظراته ملمس أيده إلى يطمني بكل مرة اخاف من شي. انفتح الباب حطيت ايدي على حلگي أمنع صوتي
يطلع بس هل المرة صار شي اكبر من تجاهله، اباوعله من جوا الغطى وجع گلبي
اكثر من شفته اخذ مخدته و غطاه راد يطلع گعدت من مكاني وگفت مانعته دموعي تارسه وجهي.
وين رايح؟
انام.
احچي وصوتي يرجف مختنگ.
اي؟ مو هاي غرفتنا نام بيها
لا انام بغرفة ارسلان
بس ليش؟
ما ادري غرام مختنگ من الغرفة.
بذر مني شي موزين وضوجك مني؟
لا
لعد ليش دتتغير
غرام وخري من يم البال تعبان اريد انام.
اتقدمت اله رفعت رجليَّ فوگ رجليه حضنت وجهه اباوع بعيونه مابيها نفس النظرات إلى جنت اشوفهن أردفت بغصة.
بس انتَ جنت تذب تعبك بحضني شنو إلى تغير؟
بعدني من طريقة بدون ما ينطي جواب الكلامي طلع گعدت وره الباب دموعي.
رجعت تنزل معقولة تندم لان دخلني حياته؟ مسحت عيوني اشهگ لبست حجابي
طلعت من الغرفة اني إلى صرت هم اختنگ منها لان هوَ ماموجود گعدت بالحديقة
دموعي نرفزني مديوگفن مهضومة من تصرفاته و مداينطيني مبررر علمود اتفهمه
اريد بس يصارحني و يگلي ماريدج اعوفه و اعوف كلشي ورايَّ بس لا يتعامل بالتجاهل.
نيروز.
شالوا الشباب گدامي فاقد رجليَّ ماتن بعد ما يساعدني لزمتني احد الطالبات.
خيرج حبيبتي.
صوتي انبلع اريد ارد عليها ما اگدر صديقتها الثانية انطتها مي غسلت وجهي
و اني كل تفكيري بي رجعوني للسيارة وضعي متخربط إلى بالسيارة الطالبات
احتارن بيَّما همني شي وصلوني للبيت جان ابوية واگف يم الباب ندل السايق
يحاجي غمضت عيوني گلبي عاصرني عصر و اني اتذكر اخر نظراته و كلامه وقسوة كلامي وياه.
سمعت صوت ابوية يصيح باسمي بس ما اريد افتح عيوني نزلني شايلتي.
بين ايديه ضميت وجهي نزلت دموعي ما اتحملت اكتم اكثر دخلني جوا للبيت
امي تحجي بخوف و تسئل عن حالي مانطاها جواب فتحت عيوني اثنينهم واگفين يباوعولي بنظرات خوف وقلق و تسائل.
گعدت امي بصفي سحبتني الحضنها.
نادين: شبيج ماما.
ما نطيت جواب شكلهم الانسان إلى احبه گدامي شالوا بدمه مسحت دموعي.
نيروز: مابيَّ شي ماما بس مو زينة بالامتحان و اني تعبت بدراسته اليوم ماگدرت اجاوب و انقهرت.
عمران: علمود امتحان هيج وضعج؟
اتوترت من نبرة سؤاله.
أي گتلكم لان تعبت و تعبي ضاع
انعللل ابو الامتحااان بابا چااا تموتين روحج هيج وگفتي گلوبنا تعوضينه بعد ابوج
ان شاء لله بابا.
التفتت الامي الواگفة تباوعلي بقهر.
عمران: صبيلها اكل خلي تاكل و ترتاح
نادين: صار.
طلعوا هم الاثنين نزلت دموعي بصمت هسه شلون اسمع اخباره ياربي ساعدني
فدوة الاسمك والله بعد ما اجرحه بكلمة بس رجعه لا تخلي يصيرله مكروه ذكرت كلام غياهب.
من گالت رب العالمين ما يعوفنا و يستقبل دعائنا من نلجأ اله طلعت غسلت و اتوضيت
رجعت الغرفتي لگيت امي حاطتلي الاكل على جهة فرشت سجادتي وگفت
أصلي و كلي امل برب العالمين ما يردني و حاشاه يرد عبده، كملت صلاتي
رفعت ايديَّ ادعي بگلب تايه دموعي تحرگ خدي اقرأ بالدعاء إلى علمتنياه غياهب
دموعي مستمرة تنزل عيوني احسهن جمرن كلشي جذب كلامي چان كله جذب
اتجاه هذا الشخص ما كرهته بيوم و لا گدرت انساه.
ما اگدر احجي شي گدام أهلي اخاف يشكون بي ماعندي غير غياهب
او غرام اتواصل وياهن اتصلت بغياهب محد يجاوب رجعت اكرر اتصالي
الى ان انفتح عليه الخط بس اتفاجئت من الشخص إلى جاوبني.
ارسلان: اهلاً ست نيروز.
صفنت ابلع ريگي هذا صوت ارسلان شيسوي جهاز غياهب عنده وهيَّ وينها اصلاً.
نيروز: مرحبا ارسلان
تفضلي
غياهب وين؟
بالحمام
اذا كملت خلي تتصل عليَّ.
محتاجه شي؟
بقيت ساكتة يمكم ما عنده علم بصاير باخوه لان ديحجي طبيعي ردت ارد سمعت صوت غياهب تسئله ويامن تحجي بجهازي.
ارسلان: هاي بنت خالج تريدج.
اجاني صوت غياهب.
غياهب: هلا نيروزه.
نزلت دموعي بضعف.
غياهب
شبيج ياروحي ليش تبجين شصاير احد صايرله شي لا تضمين عليَّ.
عمر غياهب.
اختفى صوتها الثواني رجع.
شبيه؟
اليوم بالدوام شفته بالطلعة و حچى ويايَّ
بعده يفتر وراج.
بچيت اكثر اشهگ بدموعي.
عمر صار وياه حادث اندعم غياهب بعيوني شفته والله ما يحرك لا ايد و لا رجل اخذوا على اخر نفس.
ما اسمع بس صوت شهگتها و اردفت بصدمة.
اندعم؟
عبالي عندكم علم لان ماعرفت شي بعد عنه خابرتج اريد اعرف شي عنه راح امووووت.
هسه اشوف ان شاء الله مابي شي.
سدته مني قفلت الباب مال الغرفة احس مارايده بشر اريد بس انعزل بنفسي اطلع إلى بگلبي براحتي.
غياهب.
نظراته تراقبني و اني احجي ويا نيروز إلى منتهية شلون احچيله و اگله.
اخوك إلى أندعم و من خلال الفترة إلى عشتها وياه اكتشفت اخوانه
نقطة ضعفه اجه وگف گدامي مال براسه يباوعلي بنظرات تسائل.
ارسلان: منو إلى أندعم؟
عضيت شفتي حايرة احچي لو انتظر هم يبلغونه بس فكرت ماكو فرق بالحالتين راح يعرف.
غياهب: عمر
انجماد صابه صفن بوجهي حتى عيونه اتوقفت عن الرمش خفت بداخلي وضعه
الي تغير كفيل يشرح إلى بداخله رفع ايده مسح المكان إلى بين حواجبه رفع راسه.
شتحچين انتِ غياهب؟
هسه نيروز گالتلي.
بلع ريگ و لا زال واگف بوگفته المتصنمة اردف بصوت بدأ يتغلف بالخنگة و نظرات الخوف بعيونه.
م. مات؟
بسرعة رفعت ايدي أشرتله احجي.
لا لا اسم الله گالت اخذوا للمستشفى عايش بس ماتعرف اي اخبار عنه.
صار يفتر بالغرفة يلم اغراضه وايده ترجف اخذ اجهزته راد يطلع وگف
يم الباب دار ناحيتي عيونه تحجي حزنه و قلقه من الفقدان.
ارسلان: ما اگدر أعوفج وحدج هنا
غياهب: أروح وياك؟
اي.
جهزت نفسي سريع طلعنا متوجهين البغداد راجعين يسوق ويريد بس يوصل
اول مرة اشوفه بهيج حالة ملامح وجهه صارت شاحبة، رغم ذاك اليوم گلت
علي عمر يستاهل إلى ديصير وياه من أذيه بس شماتي ماتوصل افرح على الي
هسه صار وياه، عمر مو مثل ارسلان غلطة ما يتقارن بغلط ارسلان الطريق
أستغرق ساعات يسوق بخبال مثل يوم عرسنا، خابر خاله تعارك وياه
بالاتصال لان ما بلغه مرت الساعات وصلنا البغداد للمستشفى.
دخل گدامي يمشي سريع مالحگ عليه طاير بالمشي جانوا موجودين الخال و زوج انسام و انسام سلمنا عليهم.
ارسلان: خاالي شنو وضع عمر؟
يريد يجاوبه و ارسلان حركته صارت ما متوازنة لزموا ساندينا.
كُميل: شبيك ارسلان؟
اباوعله وجهه صار اصفر و شفايفه انقلبت بيض ما گدر يتوازن اكثر دخلوا
جوا و من خلال الفحص طلع السبب ضغطه عمر چانوا مطلعي من العمليات
بس بعده وضعه طلعت من يم ارسلان انسام يمه تركتها خابرت نيروز.
ها عيني نيروز.
ردت بلهفة منتظره الجواب.
نيروز: ها غياهب فدوة احجيلي لا تضمين عني شي
طلعوا من العمليات بس عنده كسور هسه الخال سولفلي و بعده وضعه.
اذا اجه ابوية اجي وياه
لا تتخبلين وين جاية
نار بگلبي تعبت و اني منظره طبع بعقلس مديروح من بالي.
الله يساعدج ميخالف نيروز قوي نفسج ادعيله الله يگومه بالسلامة.
ان شاء الله، ما تجين الاهلج؟
لا ما اگدر راح ابقى وياهم جيتي اشوفها مو حلوة اعوفهم بهيج وضع و ارسلان من وصلنا اتخربط من قهره على اخوه
الي يريحج عفية لا تنسين تخابريني كلشي يصير
ميخالف انتبهي النفسج.
سديته منها وضعها تعبان الدرجة صوتها مبحوح ويرجف من البچي طلعت
الخارج المستشفى گعدت افكاري تتضارب، هوَ غلط اثنين بس إلى ديتعاقبون
اكثر من شخص محد غيرنا الوگع بيها، ابتسمت من شفت طفل يجي عمره.
بحوالي الخمس سنوات واگف يباوعلي مبتسم ابتسمتله أشرلي على اللفة الي
بأيده گاعد ياكل بيها انتبهت عليه امه يمكن الگاعدة وياه ضحكت تباوعلنا.
نهضت من مكاني امشي اتجاهم وگفت يمهم جربت انفه بخفه اضحك.
غياهب: شعندك تتحرش بيَّ هاا
شعرج حلو
هههههههه شنو اسمك انتَ
غيوثي
فدوة الغيوثي السانك عسل.
اترخصت من انه رجعت للمستشفى ماباقي شي ويطلع الفجر صاروا گدامي الخال و انسام وزوجها راجع من زمان.
كُميل: ها خالي راجع للبيت وحدهم ما اگدر ابقيهم وحدهم
لو تاخذ ارسلان وياك وضعه تعبان
گلتله ما قبل تجين ويانا اشوفج هم تعبانة؟
لا اني راح ابقى وياه روحوا انتم اذا صار شي اخابرك.
طلعوا من المساء رحت عليه فتحت الباب چان گاعد صافن سديت الباب سحبت كرسب گعدت قريب منه رفع راسه يحجي ببهتان.
ارسلان: ليش مارحتي وياهم
غياهب: وضعك مو مال احد يتركك وحدك
ما گال شي الدكتور بعد
اممم لا ننتظر للصبح الله كريم.
ببقى يباوع كأنما يريد يحجي شي و متردد أشرتله بعيوني يحجي.
تگدرين تدعيله
ليش ما تدعيله انتِ؟
ما اتوقع رب العالمين يستجاب الشخص مثلي
وحدة العالم بكلشي ما يرد احد.
مارد سحب الكانولا من ايده و الغبي سحبها بالغلط صارت ايده تنفط دم ركضت عليه بدون وعي لزمت ايده ما منتبها على تصرفي.
شبيك يا عيني اكو احد يشيلها هيج غير تگول أصيحلك احد.
صفنت على نفسي شداسوي اني رفعت عيوني شفته صافن بايدي.
الي محاوطة كف ايده سحبت كلنكس حطيته بايده ابتعدت منحرجة.
بس علمود الدم يعني
هاي ثاني مرة تداوين جروحي.
رفعت طرف اصبعي احك جبيني بدون ما اباوعله.
ما صار شي اي احد غيري يسوي هالشي
ليش تسوين كل هذا تزيدين من عذابي.
ثبتت عيوني عليه.
ليش نسيت من صخنت هم داويتني و سهرت للصبح علمودي و اشتريتلي اللبلبي.
ابتسم بتعب هز راسه.
راح اشوف الدكتور.
طلع بقيت وحدي ضربت گصتي توجعت هسه شكو تخلين نفسج بهيج مواقف.
بس جملة ابوية ابالي علمنّا دائماً نكون احسن من المقابل حتى لو هوَ مأذينا
يم رب العالمين مايضيع شي و كل شخص يتعامل بالمبدأ إلى أتعلم عليه.
للصبح خابرت ابوية انطيته خبر بقى يحجي لان ما نطيناهم خبر لان عيب
و بقى يلوم بيَّ ماكو اي تحسن بخصوص حالة عمر و نيروز ما تمر ساعة اذا ما تتصل
رادت تجي ما سمحتلها لان اعرف بيها هسه عاطفتها متغلبة عليها بعد فترة.
لو رجعت العقلها راح تتندم على افعالها و هوَ هذا احنا البشر نتصرف بعاطفة
و بعدين نتندم لان مو كل تصرفاتنا و قراراتنا صحيحة بهيج وضع
اجت غرام
ويا الخال متغيرة كل تفكيري بسبب وضع عمر بس ما عبالي اكو سبب ثاني حضنتني كأنما محتاجة لهذا الحضن.
غياهب: شبيج غرام.
ابتعدت تمسح بدموعها.
مابيَّ شي شنو وضع عمر
نفس الشي
خلي نقرأ الدعاء إلى علمتينياه
ما جايبته ويايَّ.
اني اني كتبته من گتيلي عنه.
طلعت من جنطتها الورقة فعلاً كاتبته كله انبهرت بخطها و جماله ابتسمت و عيوني تباوعله.
خطج يخبللل
شكراً خلي نقرأ عفية.
تمام تعاي نگعد هنا.
عفنا كُميل و ارسلان واگفين يحجون و احنا اخذنالنا جهة نقرأ بيها بنية الشفاء العمر
سمعت صوت ابوية گلبي نبض لصوته كملت الدعاء رفعت راسي شفته واگف
وياهم عفت غرام گاعدة رحتله امشي سريع اريد اوصله و احضنه اشتياقي اله ماكو شي بالدنيا يگدر يوصفه.
غياهب: بابا.
دار وجهه بسرعة حضنته اشم بي اريد اضم نفسي داخله و ما انحرم
من هذا الحضن باسني براسي و اني بنفس وضعيتي حاضنته.
سلطان: يا روح ابوج
مشتاقتلك بگد كلشي بالدنيا
يا نظر عيني.
شلونهن خالتي و حنين مشتاقتلهم باقية وياهن على گد الاتصال. باوعت الارسلان الواگف يباوعلنا. هناك الشبكة مو شي
الكل بخير.
دار ابوية على ارسلان لازال يباوع بعيون مُتعبة.
سلطان: شنو شغلك ما خلصته ابني
ارسلان: لا بعده لا تخاف المكان امن هناك.
من تلتحق الدوامك شلون؟
لا تخاف امان و مرتب وضعي.
سكت ابوية و احسه مو كلش عاجبه گعدتي بالعمارة بس شيحجي اذا اني برضاتي
رحت وياه فزيت من صفناتي على ملمس ابوية الجبيني يتلمس باثر الجرح باوعلي بأستغراب.
شبيها گصتج غياهب؟
غياهب: هااا ايي هاي جانت ماكو كهرباء و گعدت بالليل و اني امشي انضربت.
وبعدين غياااهب؟
شنو بابا
يوم أصبعج يوم گصتج بالجايات شنو؟
لا تكبرها حبيبي قدر وصار.
سكت متنرفز هاي تاليتي اجذب على أبوية إلى جبت عمري كله صريحة
وياه اتجحظت عيوني من شفت خالي عمران و نيروز جايين باتجاهنا هاي شدتسوي ياربي.
عمران: السلام عليكم.
الكل رد السلام اجت نيروز الوجه شاحب العيون تعبانة.
نيروز: لا تگليلي ليش اجيتي ما گدرت والله
أوف منج.
اجت غرام سلمت عليها تحسها بعالم ثاني غير عن عالمنا وگفت ساكتة عيونها
مثبتة اتجاه الخال إلى ما تعب نفسه و لا بنظره عليها ما ادري شعجب.
لان قبل جنت اشوف عيونه تلمع من يشوفها گدامه هسه هذا الشي كله
ماموجود استغربت من الوضع طلع الدكتور اول شخص راح عليه ارسلان.
ارسلان: ها دكتور بشر
الحمدلله وضعه تحسن، بس عنده كسور و وضعه يحتاج اهتمام لازم يبقى عندنا بالمستشفى.
كلنا شمرنا نفس براحة.
ارسلان: مو مشكلة دكتور المهم وضعه يتحسن يبقى شگد ما تريد بس كون اخوي يطيب.
راح الدكتور بعد ما شرح الوضع و اهلي اترخصوا نيروز إلى تحس.
هسه يله رجع الدم الوجها هم راحوا اجه كُميل موجه كلامه للعلوية.
كُميل: يله غرام لازم ترجعين للبيت كثرتنا هنا مالها فائدة
غرام: اي صح غياهب انتِ هم ارجعي ويايَّ.
مو بس غياهب ترجع حتى ارسلان.
باوعله ارسلان من سمعه بتك عين من مايعجبه شي يسوي هالحركة.
ارسلان: ارجعوا انتم انا ما ارجع
كُميل: اكل تبن ارسلان ترجع للبيت ترتاح انا راح ابقى هنا.
بقى يحجي وياه و ذاك رافض گوا قنعه يرجع للبيت و العصر يرجع رجعنا اني.
و ارسلان و غرام للبيت أستغربت مليكة ما وصلت لان عمر عزيزها تموت عليه درت وجهي الغرام اسئلها و احنا بالسيارة.
غياهب: شعجب مليكة ما اجت
غرام: ما گدرت مريضة عفت انسام يمها
ارسلان: ناز شلونها؟
غرام: الحمدلله
جاي تأخذونها للجلسات.
اي مرات كُميل و مرات عمر چان
ماجاي اتعبكم؟
لا احسن بس.
خفف سرعة السياقة و ملامحه تغيرت
بس شنو
تسئل عنك بأستمرار.
هز براسه ساكت الى ان وصلنا دخلنا للبيت اول مادخلنا مليكة و انسام.
گاعدات و يمهن ناز إلى مجرد لمحت ارسلان نهضت من مكانها فرحانة
ركضت عليه مثل الطفلة إلى تتلگى أبوها حضنته مبرطمة بزعل.
ارسلان: ياروحي عاينيلي شو.
ناز: ل. ليش عفتني
ما عايفة بعد اخوج يمج والله.
عفتهم مبتسمة المنظرهم يمكن ناز الوحيدة إلى تخلي ابتسامتي نابعة من قلبي
وياه رحت المليكة هل الانسانة طيبة تستحق الحب و الاحترام سلمت عليها.
غياهب: ملوكة يا حلوة عمر احسن الحمدلله.
نزلت دموعها خطية حضنتها.
والله احسن اذا ما مصدگتني اسئلي ارسلان.
خلتني اضحك من گالت.
مليكة: خيولي اصدگنج الج ولا هذا المسربت الساقط.
اجاها ارسلان هيَّ دارت وجها عنه زعلانة منه ليش نتفاجئ هم ذوله
ارسلان و مليكة گاضينها بس تزعل كلها تتصافى الا هم سحب ايدها باسها.
ارسلان: مليكة قلبي تعبان عوفي العيارة هسه لبعدين.
لزمته جرته من اذنه.
انتَ ليمتى تبطل سوالفك بس گلي
هسه عوفي اذاني نلعتي والديها شمسوي انا؟
كل سواية مكسرة
هذا ياهو انا.
لا ابوي گعد من گبره
يله بقت عليج عشت عمري ماكول مذموم.
عفتهم يتناكرون بالكلام دخلت الغزفتنا انعس و التعب متكدس بجسمي
سحبت ملابس من إلى بقن هنا دخلت سبحت وطلعت باوعت للاثار اني ليش
داخفيهن سنين صارلهن گلبي يأذيني من اشوفهن بس بنفس الوقت استمد القوة منهن
لبست ملابسي وطلعت شفتهم حاطين الاكل ردت اساعدهن ما قبلن البنات
گعدت دقيقة مثاوبة من النعاس اكلنا بس كلمن صافن بزمانا دخلت انام.
عيوني قفلت بعد مابيها مجال شغلت السبلت شمرت نفسي مخدة جوا راسي
و مخدة حضنتها نمت ناسيه هاي الارسلان بنص نومتي احس بشي كمزت من مكاني الغرفة ضلمة شغلت التيبلام.
غياهب: هذا انتَ
ارسلان: چا ياهو
شتريد؟
مخدتي
ليش اني شمدريني بيها
چا شحاضنه؟
باوعت النفسي هاي مخدته نوب حاضنتها الگلبي ايعع، بس لان متعودة
انام بهيج طريقة شمرتها عليه رجعت نمت اخذها ساكت اتمدد بصفي طفيت التيبلام الغرفة صارت ظلام دامس.
اگلك ارسلان
اممم.
بس اسئلك هذا السؤال و ارجع انام
اسئلي يحيلي
شلون صرت
يهمج
لا ايععع بس مجرد سؤال
احسن
ها خوش لعد راجعة انام
نوم العافية
الله يعافيك بيبي
تدرين شي
شنو؟
ما متعود عليج تصيرين مؤدبة.
ردت اغرد عليه لو ما ايده إلى طخت بايدي.
هاااا خيررر
خير إلى يصيبج
عووف ايدي لعد شكوو لازمها.
ايدي عوفها شكو لازمها.
سكت الثواني عيوني تفتر بالغرفة الضلمة انتظر جوابه اردف بهدوء.
غياهب تزا انا بشر مو چلب و تلعب نفسج منه.
شهگت من سحبني الحضنه جاعصني جعص قبل خدي بهدوء.
عوووووفني
صوتج
شبيكككك ارسلان شدتسوووي شنوووو هالتصرررفات.
أتوقع مامسوي شي حرام مرتي و إلى حقوق عليج.
و لا يستقر ابو الحقوق مصدگ روحك احنا متزوجين مثل الناس
بصراحة غياهب اي مصدگ روحي ليش ما اصدگ
ووولككك ارسسسلان
ياااا حيله
و العباس اكرررهك
اممم راح تخلينا نبعرها
خنگتني راح امووووت
خنگة و بحضني هنيالج
ايععععع
اش يله نامي تعبان والله لا تنگين.
اردفت بهدوء.
ارسلان.
ها غياهب
الله يخلية ابتعد عني.
حچيتها بغصة مختنگة ما اريد هذا التقارب بينا رخت قضة حضنه بعد ماجان حاضني بقوا نزلت دموعي ابتعد عني.
ارجعي المكانج.
ابتعدت عنه رجعت المكاني منطيته ظهري مختنگة مو بيدي هالشي مصيبتي
الكبرى اذا طلع مثل ما گالت العلوية يحبني و احساسي نفس كلامها
ما اريد بيوم اضعفله اذيته اندگت بروحي غمضت عيوني مستسلمة للنوم.
گعدت من النوم شفت الساعة عابرة الثمانية بالليل باوعت المكانه ماموجود.
أكيد راح الاخوه راسي احس طبقه منه راح تنشلع من الالم طلعت غرام گاعدة وحدها ايدها جوا خدها صافنة.
غرام: صح النوم
غياهب: صح بدنج شو وحدج
مليكة بغرفتها تدرين بيها تنام من وگت و انسام راحت البيتها لان جهالها وحدهم ويا ابوهم تگول مايسيطر وحده و ناز نامت هم
و كُميل ما رجع؟
تحسرت منزله عيونها.
لا ما رجع.
گعدت يمها گوا فاتحة عيوني من قوة الصداع إلى ملازمني.
علوية انتِ بخير
اي
متأكدة؟
الله كريم غياهب.
ردت افتح موضوعها هيَّ و الخال وحاسة علاقتهم متوترة بس عفتها براحتها
يمكن ماتريد تحجي كمزنا اثنينا على دفرة الباب و صوت ارسلان الرج البيت رج صرنا نبلعم من الهبطة يصيح باسمي.
وگفت ما فاهمة شي دخل عيونه تنگط شر سحبني من ايدي دخلني للغرفة
قافل الباب شبيه هذا؟ لزمت ايدي متوجعة.
ارسلان: شسوووييي بيججج هسسسه شسووووييي
غياهب: شكو؟
عيونه حمر ملامحه ترعب ماكو شي بملامحه يدل على الرحمه دفعني على الحايط خانگني بايده يحچي من بين اسنانه.
شسووويييي گليللييي.
حچيت واني التقط انفاسي بصعوبة.
شبيككك تخبلللت.
ابتعد عني شهگت النفس توسعت عيوني من شفته گام يضرب براسه بالحايط ويصيح ما مفتهمة شي.
وينننن يررووح مني وينننن.
ما فهمت عن منو يحجي و هذا مستمر يضرب براسه راح ينفجر راسه وگفت عيوني انتهت.
كافي ارسلان.
ما يرد عليَّ اتقدمت خطوة اله مديت ايدي بينه وبين الحايط انضرب بايدي
غمضت عيوني بألم من حس باللي سويته اتوقف رجعت فاتحة عيوني يباوعلي يلهث بأنفاسه.
ارسلان: جدج الكو شرررررد ساااالم شرررررد.
هوَ شرد انتَ ليش تأذي نفسك و تأذيني؟
رص على اسنانه و هوَ يگول.
يتعافى عمر ويصير خير
خير؟ اين الخير انني لا اراه مُنذ ان ألتقيت بكَ.
و لا راح تشوفينه لا انتِ و لا أهلج.
دفعته من مقدمة كتفه.
للمررررة الالف احذرررك اهلي ما تتقرب الهممم
عياش وراح لنار جهنم مالحگت أستلذ بعذابه سالم هسسسسه شرررد
اي؟ معنى كلامك شنو؟
قوس شفايفه بخبث.
ولدهم موجدين مثلاً عندنا حضرة جناب عمي الطيب ابو زوجتي، عندنا ابو درغام ابو نيروز
ليش هم بالضبط ليش مو غيرهم ترررررا كل اللي عددتهمم همممم علاقتهم سيئة ويااااهم مالهمم ذنب.
گلبي حبكم مو بيدي
ليش سالم شرد عرف شي عنك؟
للاسف لا بس أنتظري أهلج يخابرونج و يبلغونج شسوا الكم وشلون حرگ گلوبكم.
سرت رجفة خوف بجسمي بسبب جَديته بالكلام و نبرة صوته إلى كافلة تخلق الرعب بداخلي.
حنين.
حنين: خالتو
وجدان: سالفة مابيها خير ادري بسوالفج
لا شبيج وجدانو
اليوم شنو سالفتج ويا حرف الواو
قبانو الوجهكِ
ياا شبيها هاي
ههههههههههه اليوم اجت دكتورة جديدة اصلها موصلي لهجتهاا تشگ شگ
الله يا اهل الموصل و لهجتهم ناس طيبة.
اي والله، وجدانو خلي نخطبها.
باوعتلي تضحك.
المنو الرجلج
لا طبعاً
چا المن
الرجلج إلى هوَ أبوية الله ويصير عندي نسوان اب اثنين طگينااااا
صدگ ما تستحين
هسه شكو بيها الشرع حلل اربعة للرجال.
وگفت ضربتني بخفة تضحك.
چا اذا هيج يهمج الشرع و الدين زوجي رجلج اربعة
عزا عزا شنو ازوج رجلي و تشاركني بي وحدة غيري غيرررر انجلط و كبل الوووادي السلام
شلون تريديني ازوج ابوج.
وگفت اغمزلها ضربتها بالشقة بخفة بكتفها اضحك.
تغارين ها ها.
انتِ ما عندج شغل و عمل بس مگابلتني
بعد كم يوم ابلش اجهز الزواجي و ما ازعجج.
رجعت گعدت ملامحها تبين ضاجت عبالي لان راح اتزوج واعوفهم ردت اسوي دراما.
شبيج خالة
ما مرتاحة حنين أبوي جاي يعيش براحته و بدون أي أهمية و هوَ برگبته دم شخص بريئ.
حجيتلها من فترة سمعتهم و صار عندي علم بافعال اجدادي طبطبت على ايدها.
الله كريم يجي يوم و يتحاسب درغام و ابوية ماتاركين الموضوع ديبحثون عن عائلته.
ما حصلوا شي لحد الان حتى درغام من راح للعمارة ماحصل شي
يمكن الناس مغيرين اسمائهم او متلاعبين بمعلوماتهم ما ادري شو هيج اجه ابالي.
أنفتح الباب دخلوا ابوية و درغام مو علساس زعلان مني سلموا سلام جماعي و گعدوا.
درغام: شلونج عمتي العزيزة
وجدان: بعد عمر عمتك الحمدلله من زمان ما شفنا هالطول.
خطف نظره مني و رجع يحجي وياها.
شغل ماكو مجال
الله يساعدكم و يحميكم.
رجع يحچي هوَ و أبوية اتشدد تركيزي وياهم ملتزمة الصمت.
سلطان: شنو إلى گدرت تعرفه
درغام: مو اشياء هواية
احچي
قبل كلشي احب انطيك معلومة و متأكد منها اكو احد جاي يتلاعب بالمعلومات شخص مايريد نوصل لاي شي يخص هالعائلة
عرفته؟
لا
المغدور حسين حسب ما گالوا عنده اربع أبناء و العرفته بعد ماموجودين
بالعمارة و بحال موجودين ف هم متكتمين على نفسهم ومعلوماتهم
الموضوع يمك سالم لازم ياخذ جزاته بس مانگدر هسه لان ماعندنا اي دليل.
نحتاج أدلة قوية ابوي راح الربه و هناك حسابه بس سالم غلط يبقى عايش
بهل الرفاهية إلى نصها مادري كلها من مال الحرام ودم الناس الابرياء
ان شاء الله عمي.
وگف ابوية مترخص منه.
سلطان: اخذ راحتك انتَ انا اترخص تعبان داخل ارتاح
مرخوص عمي.
دخلوا هوَ و خالتي الغرفتهم بقيت اني گاعدة گباله مقلص عيونه يباوعلي.
درغام: شلونج ست حنين.
قلبت عيوني.
حنين: بخير
بعد هيَّ ام الراهي
راهي لو زاهي
ما تضحك ترا شنو هل التفاهة.
ادري، شبيك درغام؟
انا لو انتِ؟ صرتي تشككيني بيج حنين.
طبكت حواجبي بعدم فهم من كلامه.
ما فهمت.
وگف گدامي مخلي ايديه بجيوبه نزل المستواي حاني ظهره يباوع بعيوني.
ما احسج تحبيني مثل ما احبج
شنو مناسبة هذا الكلام؟
تهربج مني؟ من انخطبنا لليوم من اگلج خلي نطلع تطلعيلي اعذار كأنما
صاحبج إلى طالب منج مو خطيبج لو من اتقرب الج تتهربين حنين انا مامسوي شي حرام انتِ مرتي بالشرع و القانون.
وگفت خانگتني العبرة من كلامه بس ما اگدر انكره لان كله صح بنفس
الوقت حقه يفكر هيج بسبب تهربي منه بس مو قصدي.
يعني قبل لا اخطبج شگد چنتي تطلعين ويايَّ هسه خاطبج ومن اگلج جوابج
دائماً الرفض ما اتوقع انا جبرتج على جبي او تقبلين بهذا الزواج.
حنين: درغام بس...
اذا تشوفين نفسج استعجلتي بقرارج و ماعندج المشاعري إلى عندي اتمنى ما تغشيني.
لان اذا اكتشفت بيوم من الايام كلشي سويتي خداع راح كلشي يتغير ماتريدين تكملين خلينا نتط...
ركضت عليه ايدي على شفايفه مانعته يكمل نزلت دموعي تسللت خدي.
لا تكمل اني مو مثل ما مفكر والله.
نزل ايدي لازمها.
چا شنو معنى تصرفاتج
بس خايفة والله.
گعدني و گعد گبالي لازم ايدي.
من شنو خايفة حبيبتي؟
اخاف ماتنجح علاقتنا لان اني ما اعرف شلون اتصرف متعودة على علاقة صداقتنا.
ليش هوَ انا شوگت طلبت منج تتغيرين بالعكس احبج بكل تصرفاتج الا تجاهلج
و تهربج مني يخليني افكر غير افكار.
حضني طخ انفسي برگبته گرصني بخصري يضحك.
نعلعلا
اني شعلية غير انتَ حضنتني.
تحمحك و حچى.
عوفينا من كلشي و اسمعيني
تمام.
اول شي انا من حبيتج، حبيتج الج الشخصج حبيت هالعيون السود إلى بهذلني
حبيت البرائه إلى عندج انتِ انسانه روحها نظيفة مثل گلبها حبيت هل القوة إلى عندج المدموجة بالطفولة.
احترمج و كل يوم يزيد احترامي ألج بعيداً عن مشاكستنا ويا بعض عندي كلشي
بجهة وانتِ بالجهة الثانية متأكد ماراح اتندم بيوم على أختياري، ما طالب
منج تغير انا مامتزوج خدامة، المهم بالعلاقة الثقة و الاحترام اذا تواجدن نجحت العلاقة
لا تخافين من شي و عيونج وياج بكل خطوة و امي ما يحتاج احجيلج
عنها انتِ مو غريبة عليها لو ماتعرفيها و اذا تريدين حتى الزواج أجله.
اوييي كزززكزا تعاال ابورسك.
لا انا رجال استحي صايم و مصلي
شو حبيتك اكثر
انا محبوب من گاعي بلائي
منيلك المزنجر
مزنجر بس محبوب
شوف
وين اشوف
شبيك باووعلي
باوعت.
راح احفظ كل كلامك خصوصاً هسه إلى حچيته هواية طمني اذا بيوم من الايام
خطأت اكو من يعلمني و ينصحني بس وعد اسوي كلشي ماريد شي يأثر على علاقتنا
كلي ثقة بيج
ما يحتاج اتأجل الزواج
هايهية ابوية ابلغ ابوج ان شاء الله
غياهب هنا
ادري يمكن باجر اروحلها
شتسوي؟
عندي حچايتين وياها
اروح وياك اشوفها.
ماشي يله انا رايح.
طلعت وياه لازمه ايده اوصلله للباب و دگ جهازه مديت راسي هوَلازمه بايده
چان خالي جابر فتح خط على ابوه و ارقب بعيوني الحركاته لازم ايدي بس
رخت ايده من كف ايدي من اجه الخبر إلى بمثابة صاعقة نزلت علينا.
درغام: ها بوية.
حرك طرف حذائه اتوقف عن الحركة و ملامح الصدمة أعتلت وطغت على ملامحه ارف بتعجب.
شنوووو.
من صوته ونبرته اخترعت بمكاني صرت ارجف.
حنين: شكووو درغام.
سده من خالي عض أصبعه بقوا و هوَ يگول
اخخخ يااا سالم اخخخخ
درغام والله راح اوگع بطولي شبيك خوفتني
روحي گعدي عمي و عمتي بسرعة حنين.
ركضت جوا للبيت ارجف دگيت الباب عليهم جسمي ينفض خوف گلبي ما مرتاح انفتح الباب جانت خالتي.
وجدان: ها حنونه شبيج؟
حنين: اسفة لان دادگ الباب وانتم نايمين
لا عادي خالاتي شبيج ليش وجهج اصفر
خالة حبابة گعدي ابوية درغام يريدكم.
شصاير ولج.
ما ادري والله بس خالي جابر خابر على درغام مادري شگاله و ذكر اسم جدي
دخيلك ياربي اكيد مصيبة.
دخلت جوا گعدت ابوية رجعت الدرغام عيونه مدمعة مسحهن مجرد شافني طلعوا اهلي بوجه كله قلق.
سلطان: شصاير؟
باوعلهم بنظرات حيرة و ركز نظره ناحية خالتي و نطق الخبر خلانا نتبسمر بمكانه.
درغام: هذا جدي سالم
شبيه؟
وجدان: ولك ماما احچي راح توگف گلبي الله الشاهد
درغام: گتل حبوبتي هيلة ذابحهااا ذبح.
شهگت شهگة نابعة من اعماق قلبي متجحظة عيوني.
خالتي بقيت صافنة ساكتة مانطقت الحرف لزمها ابوية يحچي وياها تحسها فصلن عن عالمنا.
سلطان: وجدان احچي وياااج.
شهگت بدموعها شهگة قوية وجدان: ذ ذبحها؟
جانت تحت أثر صدمة فاتحة عيونها محد چان متوقع يسمع هيج خبر صارت
الهوسة وكلها طلعت طلعنا البيت جدي بس مطوقة القانون لان الجريمة صارت
داخلة اسمع صوت خالي عمران يحچي مفرفح و هوَ يتوعد السالم الفاتحة صارت.
ببيت خالي جابر هناك كلها منجمعة نسوان خوالي و عمامي اجت نيروز دموعها بعيونها.
نيروز: خابرتي غياهب؟
حنين: ها لا دخت والله عقل مابقى براسي الله ينتقم منك سالم
خابريها خطية هسه تلگين اهلنا مو بحال ووضع ينطونها خبر.
هزيت براسي اخذت جهازي صوت خالتي يگطع الگلب وهيَّ تصرخ
الشعر گطعته گوا لازماتها خالاتي بالنهاية امها حتى لو مو الحقيقية بيبي هيلة.
ما جانت مؤذية الها بسكوتها دخلت الغرفة درغام تعبنا من المشاكل و الصدمات
والله حتى ما بقى لاي واحد بينا حيل يتحمل شي حتى الفرحة إلى نفرحها
تبقى ناقصة، اتصلت على غياهب جاوبتني بسرعة كأنما منتظره اتصالي.
غياهب: هااا حنين بيكم شي.
نزلت دموعي بغزارة ابچي بصوت مسموع تخبلت غياهب هنا خصوصاً بعد ما سمعت صوت صرخات خالتي.
ولج احجييي شبيكم راح تموووتوني انتم
جدي سالم ذبح هيلة.
اردفت بنص صدمتها إلى ماتقل عن صدمتنا.
ذبحها ذبح؟
اي والله يا غياهب فاصم راسها عن جسمها شي مرعب ما اعرف شلون گدر أيسوي هيج شي
الله ياخذه الله ينتقم منه الله يشوووفني يوم بي.
سدته مفرفحة گعدت وحدي بالغرفة ابچي منهارة شوگت نرتاح مو كافي امي مجرمة و هسه جدي طلع مجرم اكثررر منها.
غرام.
طلعت غياهب من غرفتها ترجف بايدها مفتاح سيارتها رادت تطلع صاح وراها ارسلان إلى صاير كتله من الغضب.
ارسلان: غيااااهب وينننن رايحة بهذاااا الليل.
استوقفها كلامه استدارت.
غياهب: موووو گتلي اهلج راح يوصلولج خبررر وصلي الخبررر.
ما فهمت عن شنو يحجون الا لمن غياهب گالت وشفتها ترجف.
سالم اليوم كرر جريمة أبشعععع من جرررريمة أهلك اليوروم ذبح مرررررته بكل دم بااارد.
بقيت صافنة بكلامها دخيلك يا اللهي اردف ارسلان بروح محترگة مثل روحها الغياهب.
حوووووبتهم راح تلللعب بيكم لعببب واحد واحد
الكلااام ويااااك ضااايع.
رجعت تريد تطلع رجع صاااح وراهاا.
أنتظري أوصللج لااا تروحين وانتِ بهيج وضععع.
ماردت عليه طلعت و طلع وراها يركض لزمت گلبي بخوف ذبح؟ شديصير بالدنيا بعد من مخفيات؟
النوم طاير من عيوني بمنو أفكر بهل الفاجعات لو بوضع زواجي إلى دينهدم
للصبح دخل كُميل البارحة بات يم عمر حجيتله هوَ و خالتي عن فعلة سالم صاروا
يضربون صفنات من الخبر اخذني للفاتحة بيوم الثالث علمود غياهب
عيب لان خالتي ماتگدر و إلى عرفته سالم شرد و يدورون عليه.
غياهب مارجعت.
اسبوع كامل يم اهلها لان خالتها تعبانة و ارسلان محد ايشوفه بيوم اجه گال.
ارسلان: انا عندي مهمة هالفترة غياهب راح تبقى يم اهلها بين ما ارجع
كُميل: زين تسوي عمر باجر نطلعه من المستشفى.
الثاني يوم طلعوا عمر من المستشفى ارسلان التحق بالمهمة إلى فقط گال عنها مهمة
و لا گال شگد راح يبقى ماحجه عنها شي اجت جيلان و امها يشوفن
عمر روحي تعبانة و الدوخة لازمتني لان صايرة ما اكل بصعوبة امارس.
حياتي اتمنى انام و بعد ما افتح عيوني تجاهل كُميل دمرني.
جيلان: شلونج غرام
غرام: بخير.
استغربت من حديثها ويايَّ.
مبين تعبانة
مابيَّ شي
وشبيج تحجين من وره خشمج
كل انسان يشوف الناس بعين طبعه.
طلعت من يمهم مالي خلگها رحت ال عمر مديت راسي من الباب.
غرام: هلو ممكن ادخل.
عمر: اتفضلي.
دخلت اباوعله بأسف على حالته ايده ورجله متكسرات راسه ملفوف هم حال الضيم حاله رب العالمين ستره بهذا الحادث
شلون صرتي.
الحمدلله بس راسي شوية
ان شاء الله مع الايام تتحسن اكثر.
تحسر مبتسم بتعب.
قبل لا اندعم شفتها گالتلي اتمنى بعد ما التقي بيك و من اندعمت وغمضت عيوني تمنيت ما ارجع للدنيا
اني ما ادري اذا كلامي راح تزعل منه بس انتَ نيروز غلطت بحقها إلى سويته مو شي سهل هذا اسمه خداع.
ما الومها.
فرگت ايديَّ بتوتر.
خالك ما حجالك شي؟
عن شنو؟
ما ادري بس اي موضوع
لا ما حچى مرت خالي اكو شي؟
لا ماكو شي
تقصدين على سالفة سالم الكلب.
هااا اييي ايي عليها.
هوَ جذب مو عليها فكرت حاجيله شي يخصنا.
اي حچالي حسبي الله و نعم الوكيل مجرم قحي هذا حتى مرته ما سلمت منه
حسبي الله و نعم الوكيل.
حتى گلبي صارت بي نغزات من التفكير اترخصت منه ردت اطلع استوقفني صوته.
عمر: غرام
اتفضل
محتاجة شي؟
لا سلامتك
من تحتاجين شي انا موجود لا تترددين
تسلم ما تقصر.
اجاني اللعبان النفس سحبت نفسي منه بهدوء دخلت للحمام اتقيئ غسلت.
وجهي صارلي اسبوع لازمني هذا الشي طلعت من الحمام وگفت بباب الحمام
اتنفس سريع مغمضة عيوني الثواني سرعان ما اجت الفكرة ابالي فتحت عيوني متوسعة معقولة نفسه الس ابالي؟
رجعت غياهب وره كم يوم رغم جانت نفسيتها تعبانة بس من حجيتلها ما اتررددت تاخذني نتأكد.
غرام: خلي انطي خبر ال كُميل لان ما ايصير اطلع بدون علمه.
غياهب: تمام.
خابرته و ياريت ممخابرته لو اعرف جوابه راح يكون بطريقة تخليني اتاذه.
كُميل: ها علوية.
غرام: اني راح اروح ويا غياهب للدكتورة
براحتج
اي بس يعني ماتحب تعرف السبب
لا.
سده بوجهي خلاني بقمة صدمتي و استغرابي بتصرفه خنگتني عبرتي ليش ديتصرف هيج.
طلعنا اني وغياهب للدكتورة كتبتلي اسوي تحاليل بعد ما حجيتلها عن وضعي سويناه بالمختبر گعدنا ننتظر.
شو التحليل طول غياهب.
هسه يطلع داحسج حامل ههههه
اذا طلعت فعلاً حامل رب العالمين وهبني اعظم هدية.
ان شاء الله.
طلع التحليل گلبي يگلك خفقان بي من التوتر دخلنا للدكتورة انطتهياه غياهب عيوني تراقب شفايف الدكتورة شنو راح تنطق.
الدكتورة: حامل ماما مُبارك.
انرسمت الابتسامة على وجهي مامصدگة إلى سمعته نزلت عيوني على بطني
ايدي لامستها بسعادة يعني هسه اكو نُطفى بداخلي راح أصير ام و اعيش شعور الأمومة.
طلعنا منها اثنينا غياهب رغم مصايبها بس ما منعت نفسها تشاركني.
فرحتي بالي يمه هسه اكيد راح يفرح بالخبر مرة گالي يحب الاطفال اتوجهنا للبيت غياهب تسوق.
غياهب: شوفي علوية اذا اجتج بنيه تسمينها على اسمي
غرام: ههههههههه و اذا اجه ولد اسمي ارسلان شتگولين.
لا دخيل بختج يمعودة هوَ ارسلان واحد مامتكفين شره وسوالفه يجينا واحد ثاني.
ضحكت بصوت طايرة بفرحتي اتمنى هذا الطفل يكون سبب باسترجاع
علاقتنا وتتصلح وگفت غياهب بنص الطريق تباوعلي.
علوية ما مشتهية شي منا منا شوفي بباب الحارة يگولون اذا تشتهي شي حامض
و مالح تؤبري ألبي بيجيكي صبي ولما بتشتهي شي حلو بيجيكي بنت سوالف ام زكي هههههههههههههههه
انگلبتي سورية
هسه شبيج خلينا عايشين الدور گولي شمشتهية.
كلشي ماكو لحد الان.
هاا يجوز بعدج
يمكن.
رجعت تسوق مكمله طريقها وصلنا شفت سيارته موجودة ابتسمت يعني ماراح
انتظر اكثر علمود انطي هل الخبر دخلنا گاعد هوَ و امه يضحك وياها.
من زمان ماشايفه ضحكته مجرد شافني اختفت ضحكته دخلت مبتسمة اريد انطيهم الخبر.
مليكة: هااا ولچن يمفلوكات اتأخرتن.
غياهب: ياروحي عندنا خبر الكم.
أشرتلي غياهب احجي كلي حماس اشوف ردت فعله خصوصاً
من يعرف راح يجي طفل النا احنا الاثنين اتبخرت كل امنياتي
و كل حماسي و كل فرحتي مو سبقني بالكلام و گال.
كُميل: غرام
غرام: عيوني
حولي غراضج الغير غرفة.
صفنت بكلامه غياهب باوعتله بأستغراب حتى أمه.
ليش؟
لان قررت أتزوج.