رواية وتيرة الأعرج للكاتبة حوراء السعيدي الفصل الخمسون
غياهب.
وگفت بمكاني و اني أنزل بفستاني اللي لابسته بايدي متفاجئه من جيتهم منين
يعرفون عنوانه؟ بس اللحظة ذكرت عمو كريم صديق بابا ف أكيد من خلاله
اخذوا العنوان أتقدمت إلى اية مبتسمة.
اية: شلونج غياهب.
أبتسمت الها و اني لا زلت بنص أستغرابي.
غياهب: هلا بيج.
حضنتني بحضن حار تسلم و راهب واگف وراها اختي الثولة مدخلة الرجال.
حنين واگفة ماتعرفهم لعد شلون دخلتهم طلع ابوية بنفس اللحظة يرحب و يسهل بيهم اتقدك راهب الي.
راهب: شلونج ست غياهب ان شاء الله بخير؟
غياهب: اهلاً و سهلاً استاذ راهب.
حنين طلعت من المكان كله ما بقت ما أدري شعجب أجت خالتي هم رحبت
وسلمت عليهم، گعدنا كلنا و اية بصفي گاعدة ركزت بيها ملامحها تدل كلها سعادة
و راحة عكس من سافرت وشفتها اول مرة نزلت عيوني الايدها اتأكد.
من شي و فعلاً طلعت بعدها لابسة الحلقة معناها اكو شي صاير و هيج خلاها مستمرة بالخطوبة.
سلطان: يا اهلاً ما ادري اليوم تجون لان البارحة انطيت العنوان الابو اية
ما گال بنته بالعراق جاية هسه بلغني حياكم الله.
ابتسم راهب بأمتنان الابوية و هوَ يگول.
راهب: تسلم، اية رادت اتسويها مفاجئة الغياهب.
درت بوجهي الها مبتسمة.
غياهب: حلوة مفاجئتج بحيث صدگ خليتوني متفاجئة.
ضحكت اية اطبطب على أيدي.
اية: بابا گال عيب تروحون بدون ما تنطوهم علم.
لا بالعكس هلا بيكم.
نزلت نظرات عيونها على بطني فتحت عيونها مبتسمة.
حامل؟
اي.
يااا فدوة اني ما ادري بس راهب گال رجعتي ويا زوجج لان شايفكم سوا.
اممم اي التقينا بمجمع، شوگت أجيتي.
صارلي كم يوم.
شعجب اجيتي.
باوعت الراهب مبتسمة بخجل ركزت بيهم مطورين؟ مو مثل ما شفتهم هالمرة راهب نظراته نفس نظراتها بكُل حب رجعت تجاوبني.
نهاية الشهر زواجنا اجيت أعزمج.
يا عيني الف مبروك.
الله يبارك بيج حبيبتي، البنيه إلى فتحت الباب النا عبالي انتِ بس گالت اني اختها.
اختي حنين توأمي.
جابت خالتي الضيافة قدمتها و ابوية و راهب يسولفون، اية تحجيلي
عن تجهيزات الزواج امها جاية وياها بس ابوها عنده كم شغلة يكملهن
و يجي للعراق رفعت راسي من راهب وجه سؤاله الي.
راهب: زوجج ما موجود ست غياهب.
غياهب: عنده شغل طالع.
مبروك على الحمل.
أشكرك أخوية.
ابتسم بوجهي نزلت انظاري، و اني اگول الحمدلله ارسلان ما موجود چان أشتغل المخازر و يضوج بروحه.
اية: تجين مو؟ حبابة اني تعاي اني ما عندي صديقات هنا.
غياهب: الله كريم اشوف زوجي.
ابتسمتلي بوجهها البشوش و هيَّ تگول.
أنتظرج.
جهزتي كلشي الزواجج محتاجة مساعدة.
بصراحة مدا اعرف شنو اخذ من بدلة مرتين رحت و ما عرفت اختار.
اممم تحبين اروح وياج.
انتِ حامل وين تگدرين خاف موزين عليج تمشين هواية.
اعرف مكان خاص بهيج امور شغلاته كلها نازكك نروحله و انشوف.
بكيفج بعد.
انطيني رقمج.
طلعت جهازها انطتني رقمها و الفرحة بعيونها، فرحت الها هيَّ و راهب
علاقتهم اتحسنت عن قبل، حنين ما دخلت و لا وصلت وگفوا مترخصين يروحون
طلع ابوية وياهم للباب اجت حنين تباوع للباب و شايلة ابنها بين ايديها.
حنين: اگلج منو هالناس.
غياهب: راهب و اية.
ترا سمعت اسمهم مو ثولة لو طرمة بس اقصد منين يعرفونج.
شبيج يمعودة اية بنت عمو كريم و هذا خطيبها راهب هم محامي.
و راهب منين يعرفج و يعرف ارسلان؟
اووه سالفة طويلة.
گعدت هيَّ و خالتي مُصرات الا احچيلهن بديت احچي من اول ما التقيت براهب و ارسلان شافه و السوالف الصارت كلها.
وجدان: هذا لو درغام چان زنك الولد وگتله رجلج عاقل.
حنين: اييي وعلى درغام من شاف هذا اللي خطبني راسلني راح كسر الولد و هوَ مريض.
غياهب: لعد ارسلان يسمي راهب بزر النستله و ابو نوتيلا لان اشقر.
هيهيهييييهيي.
وجعع.
نسيبي يغار يغار.
عوفونا اني ضل بالب شو لحد الان ما متصلين.
رجعت ملامح حنين حزينة گالت خالتي.
وجدان: والله ما ادري يا خالة اتصلت على عمران ما يجاوبني.
رجعت عيوني على حنين مندمجة ويا ابنها تبتسمله و تحاول اضحكه.
غياهب: حنين رماد بعده بالحديقة؟
حنين: اييي حتى الباب ما فتحه و من دخلوا راهب و اية و لا سلم عليه لابس سماعاته و مغمض عيونه خلگه صاير بخشمه.
خلي اگوم أشوفه گاعد بالبرد وحدة.
لبست شي فوگ ملابسي طلعت شفت ابوية گاعد يمة.
غياهب: رمودي ضايج.
ابتسم مجاملة و الضوجة واضحة بوجهه.
رماد: اتصل عليهم محد يجاوب.
گعدت بصف ابوية.
يمكن ما يسمعون.
ما ادري.
طبطب ابوية على كتفه.
سلطان: گوم ابني لا تبقى گاعد وحدة هنا ان شاء الله ماكو شي.
گوا اخذه
ابوية دخله جوا بقيت بمكاني افكر بالوضع اجه ابالي سؤال يعني ذولة الحماية
معقولة ماشافوا شي قريب من سيارتنا هاي اذا فعلاً اكو حماية مثل ما گال.
و ما مجذب عليَّ قررت بس يرجع ارسلان و اسئله بخصوص هل الشي
و ان شاء الله يحجي الصدگ و ما يبقى يضمضم.
رجعت دخلت جوا رماد شايل الحسن و يلعب بي صحكت بصمت من شفت
رماد ابيض اجنبي و الجسن ملامحه حلوة بس أسمر مملوح گالت حنين.
حنين: شكر و دبس.
رجع اندگ الباب گالت.
أكيد هذا درغام.
طلع ابوية يفتح الباب شوية و دخل راجع وياه درغام.
درغام: السلام عليكم.
الكل رد السلام كبل راح على أبنه اخذه من رماد و يصيح.
درغام: بوووووية وليددددي.
يبوس بي و جعص الولد جعص و حنين ترمش بعيوونها صافنة فاتحة حلگها
لان ما سلم عليها وراح الابنه اول واحد سوت بحلگها حركة عود عيارة هوَ
و أبنه لحد ما شبع منه دار بجسمه علينا حاطه على صدره.
شاف حنين مكتفة ايديها و تباوعلهم ضحك اتقدم الها وگف گبالها درت وجهي
عنهم لان يباوعلها بنظرات كلها لهفة أشتياق ابوية واگف ايديه بجيوبه ويباوعلهم.
درغام: شلونها بلائي.
حنين: بعد وگت؟
ليش؟
دخلت كبل الابنك و لا عبالك اني واگفة و منتظرتك من البارحة لليوم بس أبنك هذا الچنه دبس اخذك و نسيتني.
صاح رماد ضايج و حنين جرت كلامها جرة وحدة.
رماد: خااااب هاااي منين يطفوووها طفوووهااا.
درغام: انچب انتَ و لا تصيح عوفها براحتها.
تحمحم ابوية وگف يمها رفع ايده حضنها من اكتافها و هيَّ تباوع الدرغام بزعل.
سلطان: شفتي بابا ما تلگين مثل ابوج هذا بس شاف ابنه نساج من گاعج.
درغام: لا تدفعهاااا ترررا مرتي عرربانة الله و كيلك.
صاحب حنين بي.
حنين: منووووو العربااانة درغااام.
مو انتِ حبيبتي.
سلطان: حبيبتك شنو؟ شو انتَ ماخذ راحتك؟
درغام: مررررررررتي.
أخذ أبنة
ك و روح دام فضلته عليها انا بناتي معودهن اما بالمركز الاول او ما يريدن غيره.
چااا هوَ شطيح حظناااا غيررر دلالك الهن.
دارت عيون ابوية بيني و بين حنين مبتسم.
سلطان: نظر عيني ذني.
درغام: مثل ما أتعز بناتك انتَ، انا أعز أبني لو عليك حلال و على درغام حرام.
گعد الكل و درغام كل ما ايريد يحجي ويا حنين ترده عود زعلانة منه و تتگلب
عليه لليل خابرونا بخصوص نيروز و الحمدلله عدت سلامات و طالعة من العمليات
راحوا درغام و بلائه البيتهم الثاني يوم رجع ارسلان من السليمانية
نيروز يمها اهلها و زوجها، اخذني من بيت اهلي اباوعله مبين ما نايم بحيث بصعوبة فاتح عيونه.
ارسلان: راح اسبح و انام راسي مسطور سطر ما نايم.
غياهب: اسويلك اكل؟
لا ما شتهي شي اريد حضنج و بس.
اي مو تدلل استاذ ارسلان.
باسني بخدي ما يبوس طبيعي يبوس قوي و يشم، صعدت جهزت ملابسه
دخل مكمل وگف گدامي رفع المنشفة بمعنى نشفيلي شعري اخذتها انشف بشعره مبتسمة نزل راسه طبع بوسة بحنجي.
مشتاقلج.
كلمة بيها معاني هواية.
البارحة بقيت ويا عمر للصبح.
الله يكون بعونه و يساعده.
غياهب.
رفعت بانظاري من حسيت بصوته مختنگ ركزت بعيونه لمعت بالدموع
بدون ما يوگعن مسح وجهه حاچيته متسائلة بقلق.
شبيك ارسلان؟
مقهور على أخوي.
حضنته مقهورة مثله بس مابيدنا شي.
حتى اني مقهورة عليهم اثنينهم بس هذا قدر رب العالمين.
گلت راح ينجلط بالمستشفى و هوَ منتظر مرته تطلع من العمليات.
سوده عليَّ.
ما ارتاح الا لمن طلعوها و مكابل غرفتها.
مسحت دموعي و اني اسمعه يسولف عنه ابتعد يمسح بعيونه تمدد بمكانه.
و تغطى حتى وجهه غطاه مشيتله گعدت بصفه هم سابح و الجو بارد و هم مقهور خفت يصخن مثل هذيج المرة.
ابني.
مارد عليَّ ساكت دغيته بكتفه من وره.
مو احچي وياك.
رفع الغطى من وجهه عيونه حمر و شعره بعده رطب.
ارسلان: هاا غياهب؟
تنام بحضني؟
هز براسه اي تمددت بصفه نام بحضني ايده على بطني يمسح عليها بهدوء.
ارسلان: شوگت يجن؟
غياهب: كم شهر.
غياهب.
عيوني.
شنو انسمي بناتنا.
ما ادري والله انتَ ابالك اسماء.
فاجئني من گال.
اي.
شنو بلا؟
رفع راسه مبتسم.
احچيلج قصة الاسماء.
اييي.
امس گاعد بحديقة المستشفى و أجت عائلة وياهم بنات أثنين چنهن
طيور ذهب، گلبي رف الهن اول ما شفتهن گعدهن أبوهن و هنَّ ياكلن شعر بنات.
الله ارسسلان اررريد والله.
طبك حواجبه بعدهم فهم.
شتريدين؟
شعر بنات.
وين اولي وين أبات.
ههههههههههه صدگ أريد أشتهيته.
اجيبلج باجر هسه دنيا ليل صارت منين اجيبن الج.
تررررا موووو اني اريد بناااك يريدن.
ولچ منيننن اجيبلج هسه.
تجيبلي لووو لا.
عض أصبعه و يسويلي حركة باصابعه يسب بيَّ.
رايح أدور بهل الليل على شعر بنات انا شورطني و حچيت لو ماكل تبن و ساكت ماحاجي سالفة الاسماء مو احسلي.
صدگ ارسلان شو ماكملتلي سالفة الاسماء.
أروووح ادوررر على مشتهاج بالاول.
اووووي أحبك.
انچبي.
جيبلي هواية مو تجيبلي شوية ترا فلوسك هواية لا تبخل علينا اني و بناتك.
اخخ غياهب اخخ.
اخخ ارسلان اخخ.
طلع ملابس يلبس بيهن و مطنكر كمل لبس اخذ مفتاح سيارته إلى اشتراها.
بالجديد قبل لا يطلع من الباب دار عليَّ و اني ضامة ضحكتي على شكله.
الباب ممنوع تفتحي لأي شخص راح اقفله انا من اطلع.
تمام my eyes.
گالبتها على الإنكليزي.
هسسه روووح جيبلييي راح اموووووت.
رايح رايح من عمري على عمرج.
اسم الله.
ضحك و طلع رجعت لفيت روحي بالغطى بقيت اتصفح بجهازي طلع گدامي
رقم اية دزيتلها رسالة بلغتها هذا رقمي هسه شيقنع ارسلان علمود اروح وياها.
يمكن جان غلط انطيها كلمة و اني مگايلتله دزيت رسالة الحنيم اضحك كتبتلها.
هاا تصالحتوا؟ لو بعدكم.
الحقيرة مفاتحة نت هسه يطلع ضاحك عليها بكلمتين و متراضين لان واحد لوتي
مرّت ساعتين و هوَ ماكو اتندمت خليت الرجال يطلع بهل الليل ادري شبيج يا غياهب
مرت دقائق و سمعت صوت الباب و واحد يغني من جوا نزلت من الچرباية فتحت
الباب على كيفي ايدي على حلگي و اسمعه.
صعد الدرج وبايده الشعر بنات و يردد بالاغنية فتح الباب رفع حاجبه يباوعلي انطانياه.
غياهب: شبيك بيبي شبيك ضربتك الغيرة العراقية نص الليل.
گعد يمي يهز بأيده.
سمعت كلام ضوجني.
عفت سالفته و گتله.
جبتلي شعر بنات؟
رفع عيونه عليَّ.
انتِ اليوم شبيج كل ما احجيلج السالفة ما تخليني اسولفها و لا اكملها كبلللل صحتي شعررر بنات.
رفع أيده أشر على العلاكة إلى بحضني.
هذااا نوب همزين لگيت واحد مفتح.
شكراً عيني
اكلي يلا.
فتحت العلاكة جايبلي هواية تربعت بگعدتي اكل و هوَ يباوعلي مبتسم مديتله ايدي بيها من عنده.
تريد؟
لا بنيتي اكلي انتِ و بناتج عافيات.
الله يعافيك، يلا سولفلي.
شسولف؟
قصة الاسماء بيبي.
غير خرب واهسي.
ضربته بعكس ايدي خازرته.
احچي.
وين وصلنا بالسالفة؟
من شفتهن ياكلن شعر بنات.
اها واضح الليلة برعاية شعر بنات.
يمكن.
المهم ما احجيلج و لا تحجيلي خذني رجليَّ الهن بعد نقطة ضعفي هالبشر سلمت على ابوهن، نزلت الهن احچي وياهن و هنَّ يجرن بالكلمة جر وحدة منهن باستني بخدي شو هاي الثانية شهگت و گالتلها ولچ ايب ايب ثون تبوثين عمو، ابوهن و امهن شابعين ضحك عليهن سوالفهن حلوة تخيلت بناتي هيج يطلعن ويسولفن بعدين عرفت اسمائهن اجت ابالي نسمي بناتنه نفس اسمائهن.
اممم و شنو اسمائهن؟
سيرين و لارين .
واو اسمائهن حلوة.
ضحكت عيونه.
يعني نسمي بناتنه؟
اييي ايي حبيتهن.
جر خدودي يبوس بيهن.
اكللج اكل انتِ و البطنج.
يمة ارسسلان خنگتني مووو هيج.
گام نزع ملابسه إلى جان طالع بيهن ورجع لبس ملابس البيت تمدد بمكانه حط ايده جوا راسه يباوع عليه.
ارسلان.
حيلي.
البارحة اجه راهب البيت أهلي.
چان مبتسم مجرد حجيت هيج اختفت ابتسامته و كمز من مكانه.
شنووو شنوووو شگلتيييي غيااهب؟
ريلاكس بيبي ريلاكس خلي نتفاهم.
شجاااابه هل المطي البيت اهللج.
عيوني دگعد خلينا نفهمك.
فهميني بلااااا.
اجه هَو و خطيبته اية و عزموني على عرسهم.
ياااا حبيبي.
اي والله بس ترا لا عبالك گتلهم اجي گتلهم اشوف زوجي حبيبي و الله كريم.
ماكووو ما تروحين.
مووو هيَّ بكيفك.
هااا؟
أقصد ليش عيب البنية اية من گعدت عندهم هواية وگفتلي و اجت برجليها عزمتني عيب بيبي عيب شلون ما اروح.
انا هذاا رويهب بزر النستلة ما مرتاحتله.
ارسلان لتبالغ الرجال ما مسويلي شي؟
انچبي عايززز يسووووي شي.
اباوعله وجهه انصبغ احمر من العصبية خنست اتقربت اله لزمت ايده.
غياهب: عيوني انتَ الرجال راح يتزوج و علاقته بخطيبته حلوة على شنو مضوج نفسك.
نتر ايده مني.
بكيفج روحي.
عافني و نزل جوا يعني والله ما ادري ليش هيج انفعل نزلت وراه واگف
يم الشباك صافن، باوعلي برود و رجع دار وجهه وگفت گدامه مرجعه ظهري على الحايط الورايَّ.
غياهب: اعرف تضوج منه بس ما عبالي الهلدرجة.
ارسلان: اصعدي نامي.
وانتَ؟
ما أنعس.
بس چنت تنعس وو تعبان.
طارت النومة.
عافني وراح يمشي للمطبخ رحت وراه وگف يسوي گهوة.
عود شنو زعلت؟
لا
لعد شكو دا اتحجي بهالطريقة الجافة.
يتهيأ الج.
ضجت من برودة ردوده درت وجهي اريد اطلع من المطبخ استوقفني كلامه.
أفهمي يا بنت الناس انا رجال أغار حتى من ينذكر اسم رجال غيري على لسانج.
طلع من المطبخ مبقيني وحدي صعدت الغرفتي ضايجة اني ماحجيت
شي غلط و الرجال راح يتزوج و يعيش ويا وحدة تحبه و يحبها و عزموني.
العرسهم ما ادري شبيه ما تدري، نمت و اني أطحن قهر بقيت الوقت عيوني انتظر
عيوني صارت تلزگ من النعاس و هوَ ما راجع غمضت عيوني، للصبح گعدت باوعت المكانه مثل ما هوَ الواضح ما صاعد و لا نايم هنا.
طلعت غسلت وجهي و نزلت ادور عليه نايم على القنفة بدون غطى حتى
و الصالة باردة اريد افهم شلون گدر ينام هيج رحت جبت غطى غطيته
اتلمست وجهه غمضت عيوني بقهر من شفته مصخن همست بصوت خافت.
ارسلان.
فتح عيونه بتعب و صايرات دم.
اممم.
تصعد فوگ تنام.
ما يحتاج.
رجع غمض عيونه متجاهل وجودي.
اگعد اكل علمود تاخذ علاج شوف حرارتك مرتفعة.
ما اريد اكلي انتِ.
عفت و طلعت متنرفزة من اسلوبه و مشكلتي ما اعرف ارضي بس اني ما غاطت
مجرد كلام حچيتله اخخ يا ارسلان، سويت ريوگ و اخذته للصالة جهازه يدگ
فتح خط ما ادري ويامن بس من خلال كلامه عرفته شخص يخص شغله
لان يحجي بالتشفير وياه سده ورجع لف روحه بالغطى.
غياهب: گوم أتريگ ويايَّ.
ارسلان: ما أشتهي.
مو چنك زودتها ارسلان؟
خزرني بعيونه.
بشنو؟
اني ما حجيت شي غلط حجيت الك هم اجوا و عزموني العرسهم يعجبك أضم عنك يعني؟
لا.
لعد شبيك طنكرت عليَّ من البارحة؟
موقف البارحة وضحلي شغلة.
شنو هيَّ؟
انا حتى لو ما غلطان أراضيج و اگلج الغلط مني و هوَ مو مني بس المهم عندي ما اخليج
تنامين و انتِ شايلة بخاطرج مني، بس البارحة انتِ اثبتي العكس حتى لو ما غلطانة ما تتنازلين الي.
اجيتك و حجيت وياك و انتَ تتصرف ببرود و تجاهل.
مااا تعبتي نفسج من شفتيني هيج عفتيي ورحتي لو انا ما اعوفج لحد ما اصالحج.
چان يحجي مختنگ و مقهور مني نهض من مكانه و جسمه ما متوازن يحاول يثبت بوگفته.
ارسلان: گضيتيها ويايَّ ما تننازلين إلى بس ارسلان اتنازل عن اهواية الخاطرج.
طلع من الصالة نزلت دموعي، اثنين بس من يتغيرون عليَّ اتأذه أبسط
شي نبرة صوتهم اذا اتغيرت ويايَّ اتأذه هم ابوية و ارسلان
بعدت عني الصينية.
بقيت گاعدة بمكاني لحد ما نزل مبدل طلع بدون ما يحجي ويايَّ اخذت الاكل
رجعته بصعبية و ابچي دگ جهازي سحبته شفتها اية غسلت وجهي وجاوبتها.
غياهب: هلا اية.
اية: صباح الخير.
صباح النور.
بس لا نايمة و گعدتج.
لا گاعدة.
هااا بس اتصلت عليج اگلج عادي نروح اليوم انشوف البدلة اذا عندج وقت.
بقيت ساكتة و اني اتذكر نظراته و قهره و هوَ يحجي مجرد ذكرت اسم راهب گدامه أفكر لو ما راجعتله ورحت كملت حياتي ويا شخص ثاني شنو ممكن يصير بي؟
أعذريني والله ولو خجلانة منج بس شوية تعبانة وزوجي مريض.
لا عادي سلامتكم.
الله يسلمج، راح ادزلج العنوان واخذي امج وياج ان شاء الله يعجبج.
شكرررراً هوواية ماتعرفين شگد جنت محتارة.
ما سويت شي اهلاً و سهلاً.
سديته منها دزيت العنوان الها برسالة خابرت عمز اطمن على نيروز گال
علي الله وضعها، مرت ساعات و ارسلان ما راجع ضلت كلماته تتردد بعقلي
من يگلي ما تتنازلين الي، بس اني اموت و لا شخص يعاملني ببرود و تجاهل
طبخت غده و نظفت البيت اذن اذان الظهر يلا رجع جايب علاج وياه و شكله تعبان
شمر اغراضه و نام بمكانه بدوون ما يباوعلي بقيت واگفة اريده بس يباوعلي بس للاسف ما باوع.
اتنازلت ورحت گعدت بصفه سحبت الغطى منه حايرة شلون اراضي طلع من يقفل اكثر مني.
غياهب: نتصالح؟
لا.
ينطيك گلبك.
انعلللل ابوووو گلبي لووو گاتل أجدادج و مختفي أحسسلي.
غمضت عيوني من حسيت أكو ألم صار بأسفل بطني فتحت عيوني على صوته لازم ايدي و يباوعلي بقلق.
ارسلان: شبيج غياهب؟
غياهب: شتقصددد بكلامك؟
عوفي كلامي احچي يوجعج شي؟
چان يحچي بأهتمام و خوف.
أجاني ألم وراح.
بهالسرعة؟
ما راح كلش بس مو مثل اول ما اجه.
خوش گومي ارتاحي.
و تبقى زعلان؟
ما زعلان بابا گومي ارتاحي.
لا تجذب.
شتريدين غياهب؟ تعبان والله و مالي خلگ.
ارسلان والله ما چان قصدي أغثك و لا چنت أعرف راح تنغث هيج.
باوعلي بنظرات كلها عتب.
ما انغثيت من سالفة راهب بكثر ما انغثيت من عفتيني ورحتي بقيت الليل كله
أنتظرج اگول هسه تجي هسه تجي و ما اجيتي.
اسفة بس اني من اشوف نفسي ما غلطانة و واحد يحاجيني باسلوب جاف اضوج و ما اتقرب اله.
بس انا مو أي أحد اتوقع؟ انا ارسلان.
نزلت راسي العب باصابع ايدي.
ارسلان ما اعرف اطالح و اراضي فاشلة اني بهل الشغلات صدگني حتى بتعبير مشاعري فاشلة.
تريگتي الصبح؟
هزيت براسي لا.
طبختي لو أوصي.
لا طبخت.
گومي نتغده.
هزيت براسي فرحانة طلعت گدامه صبيت الغدة و جهزته اثنينا شال الخاشوكة يريد يوكلني أبتسمت.
مو علساس زعلان؟
فتحي حلگج و اكلي وانتِ ساكتة.
لا تحجي هيج ويايَّ.
أشر على الخاشوكة اللي اكلت بيها صار يفلسلي دجاج من الفخذ و يحط گدامي
رغم مرضه و زعله بس ما غير هالشي شهگت فاتحة عيوني من اندفرت بطني بقى صافن بوجهي بملامح جامدة.
ارسلان: شكو؟
بقيت ساكتة و صافنة بالصار بگد ما الشعور حلو بس خفت من صارت حركة ناتجة
من داخل بطني اخذت ايده حطيتها على بطني و رجعت صارت الحركة تغيرت ملامحه و لانت ابتسم فرحان.
ارسلان: شنو هاي غياهب.
غياهب: بناتك.
عض شفته نزل المستوا بطني باس بطني و همس عباله ما سمعته.
زاد حبي الچن لان عرفتن بابوجن زعلان و جاي تنتقملي.
ذني من هسه وياك.
رفع راسه تحمحم.
اي شكو بيها ابوهن انا، چا مو هاي انتِ و اختج تبيعنا علمود ابوجن.
راح تضحيلهن مثل تضحيات بابا؟
بدون شك، مثل ما ضحيت و اتنازلت الامهن.
دا اتعيرني؟
لا بس اسمعج لعل تغيرين طبعج ويايَّ.
لعد شگد مهضوم مني؟
رفع ايديه يمسح بوجهه و يتنفس سريع.
هواية غياهب، انا طفل يمج انتظر منج الحب و الاهتمام و الدلال حتى لو غلطت اگعدي ويايَّ گليلي هذا الشي غلط، من ازاعل راضيني.
امم احم هوَ مو لازم هذا الكلام انتَ تگولياه.
نقلب الاية شكو بيها.
ارسلان.
رفع عيونه بقى صافن الثواني رد يلزم بروحه.
اممم.
گلبي راح يموت من البچي.
ليش الگلب هم عنده عيون و يبچي.
ارسسسلان؟
ح. احم هاا.
وعد ما يتكرر إلى صار البارحة كافي ذليتني طيحت حظي من البارحة لليوم.
چا اتذكري شگد طيحتي حظي وصلت وياج حتى تهينيني بكلامج.
ليش داحسك دا تنتقم لا تنسى اني كلشي سويته چان حقي.
اممم بس انا ما جاي انتقم چاي احچي الصدگ كلامي صح او لا؟
اكيد صح و كلشي سويته وياك تستاهله.
يعني ابداً ما متندمة.
ماكو و لا ذرة ندم.
جيد.
رجعنا ناكل ساكتين، ما اريد اجامله و اگله متندمة على إلى سويته وياه اني
عاقبته بالتجاهل و بالبعد و بطلاگي منه ما متندمة على اي شي لان إلى صار بالماضي.
مو شي بسيط و أسامحه عليه و انسى صح سامحته بس ما راح انسى شي بيوم و شنو عشت، فزيت من افكاري من گال.
ارسلان: غياهب.
غياهب: ها عيني.
رغم مهضوم منج لس عجبتيني و زاد حبج اكثر عندي من ما جاملتيني.
اخطاءنا نتعلم منها للحاضر و المستقبل.
غير الموضوع هاز راسه مأيد كلامي.
اريد نطلع نجهز للبنات.
تمام.
كمل غده و اخذ علاجه بس بقت بنفسي اشوفه يرجع طبيعي ما عفته بيومها كله.
افتر وراه لحد ما اتصالحنا و ضحك وجهه، دفن راسه بحضني و استسلم للنوم
براحة حاراته خفت، ما گعد الثاني يوم من التعب اللي بي.
غياهب: ابالي شغلة.
ارسلان: شني؟
بيوم ما رحنا للسونار و انحطت الورقة على السيارة انتَ مو گلت ورانا حماية.
امم اي؟
و الحماية تقنعني ماشافوا اللي حط الورقة.
بنفس اليوم محاچيهم انا ماشايفين شي و گتلج عقل جدج شنو، لا تبقين تفكرين.
بسالم يطلع هسه هذا جاي يلعب على الناعم ما استبعد ضاحك على طفل او على احد
و مخلي الورقة و الحماية لامحين طفل يبيع قريب على السيارة و من لازمي لاگينه
يبيع علاليك بس ماشايفين الورقة لان انتِ شفتي حجم الورقة، و الدوريات
كلها عندها معلومات بإلقاء القبض على سالم ف ما راح يظهر نفسه.
تتوقع شوگت يظهر گلبي ما مرتاح.
موته على أيدي.
بعدك ثابت على قرارك؟
ما متراجه بحياتي على شي سالم انا قسمت بعظمة الله جل جلاله اگتله اگتله لو يبقى اخر يوم بعمري.
اخاف خوالي يصير شي بينكم ما ادري خايفة ياريت تخلي القانون يحاسبه اذا لزمتوه.
قانون؟ ياااا قانون هذا يگعده بالسجن و يرتاح محد يتقربله بسسس
و انااا نار گلبي شيطفيهاااا و اذا على خوالج هيَّ العشيرة بأكملها
تبرت منه ذبت سالم و دمه انهدرررر الي، محدد راح يفك حلگه و يحجي.
بعد مرور أشهر.
هاي الاشهر كلها الحياة ماشية صرت بشهري قربت ولادتي فرحت
للعلوية من طلعت حامل عمر و نيروز رجعوا و نيروز جاي تحاول تتقبل الوضع
و دائماً الكل يحاولون يحجون وياها بايجابية و يوصلولها فكرة الحياة ماتوگف
و لازم تعيشها، طلعنا نشتري اغراض التوأم بذيج الفترة ارسلان صار عليه
ضغط شغل و ما يقبل الا نطلع اني وياه، اما عرس راهب و اية گدرت أروحله بعد أقناع مُتعب لان عيب من البنيه.
غياهب: ارسلان اشترينا هواية غراض.
ارسلان: فدوة لبنياتي.
مو يكبرن و بعد ما يجن عليهن.
اوگفي شفت شغلة تعاي ناخذ منها.
اخذني من ايدي و طاير من الفرح وگفنا گدام أحذية اطفال حديث ولادة.
ارسلان: ناخذ منهن.
غياهب: يااا مو اخذنه ارسلان.
اي ناخذ شكو بيها.
اخذنا اثنين للتوأم لون بناتي باوعلي بخبث.
اذا كبرن بنياتي نضمهن الاطفالنا الجايين.
اتأدب بنات اثنين و بعد كافي قفلت، بعدين شنو شهادتي اريد اشتغل بيها.
مخليتها بس اباوعلها لا عيني لا عبالك اسكت و استسلم اريد اشتغل و اتعب و اكون و اكبر اسمي.
چا هسه انا شگايل گليتيني بكشوري.
دفعنا الحساب و طلعنا من المحل سيارتنا مخلينها بالجهة الثانية أشرلي امشي
گدامه لان شايل الاكياس بايده ما يقبل اشيل وياه امشي
و اضحك
عليه بطني صايرة شكبرها گوا امشي چان هم يضحك و يهز براسه
عود سهلة اني اعلمج صعدنا راجعين للبيت سحبت نفس بتعب.
اووووف شوگت اولد يمة الثكل.
ما بقى شي كلها ايام حبيبتي.
صعدنا بالسيارة و دانسولف و نتناقش بكلام الدكتورة إلى اخر مرة گالته
الي شهگت و ما لحگت اشوف شي بس سمعت صوت ضربة و السيارة
أفترت بينااا صرخت من عمق روحي بصوت عالي باسم زوجي و بناتي و أشوف
الدنيا نزلت بردة السواد گدامي غمضت عيوني و اسمع للهوسة و للاصوات اللي صارت.
حنين.
طلعت أمشي بأحد ممرات المستشفى و انوار ويايَّ.
انوار: رجليَّ موتني المفاصل من البارحة هايجة عليَّ.
حنين: اخذي علاج.
اخذت نفس الشي.
تعاي نطلع بالحديقة شو اختنگت.
باوعتلي باستغراب.
شبيج اليوم انتِ؟ ملاحظتج من اجيتي مالج خُلگ بس لا متعاركة ويا زوجج.
لا يختي شمتعاركة بس من گعدت الصبح و مختنگة.
لزمتني طلعتتي من خارج المستشفى گعدنا بالحديقة زفرت نفس بعمق
لو اعرف شبيه چان ارتاحيت درت وجهي على صوت سيارة الاسعاف
بقينا نباوع عليها صافنين، نزلوا منها رجال بالاول وگفت مالمحت شي صايرين.
گدامه بس جسمي انشل و اتوقفت حركتي من انتبهت الايده لابس محبس و هل المحبس شايفته؟
اتجحظت عيوني من مكاني و اني استذكر ارسلان لابس نفسه عفت الكل
و مشيت اهرول امشي سريع عفت انوار گاعدة بمكانها ركضت اريد اشوف
هذا المريض اتبسمرت بمكاني من نزلوا اختي وراه و اسمع يصيحون
المريضة حالتها خطرة، ثاني موقف صعب يمر عليَّ الاول ابوية من رادت
تگتله امي و وگع گدامي بدمه و هسه اختي و زوجها.
حسيت على أيد لزمتني ساندتني باوعت بضياع چانت أنوار واگفة.
انوار: شبيج حنين؟
بلعت ريگ اريد الكلمك تطلع مني ما اگدر عيوني مفتوحة نطقت الكلمة بحروف متقطعة.
حنين: ا. أختي.
شنوو اختج شبيها ولچ حنين شييج.
لزمتني من اكتافي تصحيني عفتها دافعتها دخلت للمستشفى ادور عليهم
دموعي تنزل لا ارادياً لحد مالگيتهم مجتمعين عليهم الدكاترة و الممرضين
ارسلان واگف عليه دكتور و اختي دكتورة سهام رجليَّ بصعوبة امشي عليهن.
و هم يتراكضون و اسمع الدكتورة تأمرهم لازم يدخلون غياهب للعمليات
ما گدرت اوگف أكثر خانتني قواي وگعت على اركبي دايخة الدنيا صارت تفتر بيَّ انوار وگفتني طلعتني من يمهم روحي انسحنت سحن.
علگولي المغذي يحاولون يسيطرون عليَّ الى ان رجعت لوعيي بالكامل
طلبت جهازي جابته انوار ضغطت بقوا عليه هسه من أخابر ابوية شنو احچيله
عضيت شفتي ميتة قهر قويت بروحي جبرت نفسي اتصل ايديَّ ترجف.
و عيوني غوشت بدموعي امسح بيهن يرجعن ينزلن اجاني صوته.
سلطان: هلا بابا.
حطيت ايدي على حلگي امنع شهگاتي اختنگت اكثر هفيت على وجهي أحاول احجي وياه و يفهم عليَّ رجع يحچي.
بابا حنين تسمعيني؟
حنين: اييي اسمعك.
سكت الثواني رد.
شصاير ليش تبچين احد وياج بابا؟
استصعبت كلامه شنو اگول اگله بنتك و زوجها بالمستشفى و حياة بنتك
بخطر و هيَّ حامل و ما ادري للي بطنها عايشات لو ميتات.
بابا.
نظر عيني اسمعج.
تعال للمستشفى.
صاير شي بنتي؟
تعال فدوة أنتظرك.
يلااا يلاا اهاا جايج بس أهدي حبيبتي.
سده مني ماگدرت احجيله على الاتصال خفت عليه اتصلت بدرغام اجاني صوته و اسمع الصوت الحسن يمة.
درغام: يا هلا ببلائي الجميل.
شهگت بدموعي انوار عافتني وحدي بعد ما عرفت السبب.
بچيت بصوت من گلبي.
بسم الله شبيج ابوية؟
حنين: ارسلان و اختي مسوين حادث درغام اختي موزينة درغام موزينة.
بقى ساكت صار هدوء حتى ابني اختفى بالاخير رجع صوته وهوَ يگول الخالة جوهرة.
درغام: يمة خلي الحسن يمج انا طالع عندي شغل.
اسمع بطبكة الباب رجع صوته و نبرة صوته اللي تبين صدمته من الخبر.
وينج حنين تسمعيني.
رديت من بين دموعي.
حنين: اي.
شلون صار هيج.
مادري ما ادري جابوهم وسمعت يگولون حادث.
خابرتي ابوج؟
اي بس ما گدرت احجيله خفت عليه و هوَ عنده سكر خفت يتخربط هسه راح يجي للمستشفى.
استغفرالله و اتوب اليه، جاي انا هم.
غلق الاتصال رجعت انوار يمي نهضت من مكاني اريد اطلع اشوف شصار على وضعهم لزمتني مرجعتني.
انوار: وين رايحة حنينه بعدج تعبانة.
حنين: اريد اشوف اختي و رجلها شصار عليهم انوار راح اموت والله.
هسه سئلت عنهم.
باوعتلها بلهفة و گلبي احسه على اي دقيقة يوگف من خوفي.
اييي شصار لا تضمين عليَّ بداعت امج.
زوج اختج وضعه زين مو خطر بس.
طبكت حواجبي اباوعلها بانتظار.
بس شنو؟
اختج وضعها خطر لان الضربة الاقوا جاية عليها.
هزيت راسي برفض بعد سماع كلامها دموعي تحرگ بخدي.
وبناتها.؟ اختي حامل بتوأم بناتها عايشات؟
ما گدرت اخذ معلومات كاملة بعدها اختج بالعمليات.
مسحت وجهي وروحي محترگة طلعت من مكاني ما ادري وين رايحة
بس كل اللي اريده اصرخ بعلو صوتي فركت صدري النفس صرت استصعب
اسحبه بقصت واگفة بمكاني و كل اللي بالمستشفى يعرفوني و يتسائلون.
عن حالتي لمحني ابوية اجه باتجاهي و عيونه كلها خوف ذبيت نفسي بحضنه ابچي.
سلطان: شبيج بابا؟ والله خوفتيني عليج.
حنين: اختي بابا.
شبيها اختج بابا راحت هيَّ و ارسلان يجهزون البناتهم ماباقي شي لولادتها.
بچيت أكثر رفعت راسي اله اغصغص بدموعي.
اختي بالعمليات.
رخت قبضة ايده من ايدي و هوَحاضني ابتعد عني طابك حواجبه ما فاهم مقصد كلامي اردف بتعجب.
عمليات؟
صاير وياهم حادث و جابوهم للمستشفى، ارسلان وضعه زين بس اختي خطر وضعها.
دخل من الباب درغام اجه باتجاهنا اول جملة طلعت منه.
درغام: شنو وضعهم؟
اختي بالعمليات.
لا لله الا الله.
حچى ابوية و هوَ بنص صدمته يحاول يقوي بروحه.
سلطان: إن شاء الله خير.
درغام: راح أبلغ اهل ارسلان.
بقينا واگفين منتظرين خبر عن اختي و زوجها درغام بلغ اهل ارسلان باللي صار.
غرام.
أمتحنت الحمدلله و نجحت و ناز خطية وگعت بمادتين العربي و الرياضيات
بس گلنالها لا تيأسين هم اتقبلت الوضع هيَّ لان تگول اعتبرها تجربة
لان شخص مثل وضعي مو بسهولة راح يحصل النجاح اذا ما تعب
نيروز وضعها احسن و مستمرة بالعلاج بس تجيها ساعات تفرفح من البچي
لان تذكر ما راح يصير عندها اطفال و نبقى نحجي و نحجي لحد ماتهدأ
بس الكلام مثل العلاج مجرد مهدأ الكم ساعة و ترجع نفس الحالة نفسيتها متأزمة عمر احتار شيسوي.
گاعدين اني و كُميل و واحد صافن بوجه الثاني شلون راح نفتح الموضوع
وياهم عمر و نيروز گبالنا صافنين بوجهنا لان طلبنا نحجي وياهم.
عمر: خير شنو السالفة راح تگضوها صفنات؟
كُميل: ها خالي والله ما تدري شلون افتح الموضوع وياكم.
غرام: اتمنى ما تفهمونه غلط.
رد عمر اللي تعب واضح بوجهه ديتعب هواية ويا مرته.
ليش نفهمكم غاط مرت خالي؟
مليكة تباوع علينا ساكتة لان عندها علم بالموضوع اللي اقترحناه الها اشرت النا نحجي.
كُميل: خالي احنا كلنا شهدنا شگد متأذين صارلكم اشهر خصوصاً
مرتك و مالومها و لا الومك يمكن لو انا و غرام بمكانكم هم صار بينا
مثلكم بس نگول الحمدلله على كلشي قدر رب العالمين و لا اعتراض عليه.
عمر: الحمدلله المهم نيروز رجعتلي بالسلامة الف الحمدلله.
حچت نيروز بغصه و مكسورة وجها شاحب من سوت العملية لليوم البنيه تعبت نفسيتها.
نيروز: اسفة لان دا اتعبون ويايَّ بس احتاج وقت اتقبل فكرة اعيش و ما عندي طفل مثل اي وحدة صعبة.
غرام: تعب؟ احنا نتعب عليج لان دا اتعبين و ما مسويلج شي و نتعب على حزنج
نيروز حزنج من حزنه و فرحج من فرحنا انتِ و عمر غاليين علينا.
ابتسمت بنص دموعها و كُميل فتح الموضوع.
كُميل: ليش ما تتبنون طفل هواية اطفال بحاجة ام و اب.
طبك حواجبه عمر بتفاجئ.
عمر: نتبنى طفل؟
اي خالي.
وگف عمر ما قابل و لا اتقبل الموضوع عكس نيروز إلى تحس رجع الها الامل بهذا القرار.
عمر: افهم كلامكم هذا بس انا ما اگدر اتبنى طفل.
رد عليه خاله.
ليش؟
خالي اجيب طفل و اربي و من يكبر يعرف احنا مو اهله الحقيقين شراح يصير وياه شيصير بنفسيته؟
ما مجبور تحجوله هذا الشي.
ماكو شي ينضم و هيج حقيقة غلط تنضم عن الانسان من يكبر.
حچت نيروز متأمله يوافق.
نيروز: نگدر نفهمه بطريقتنا.
بقى يباوعلها غمض عيونه متحسر ورجع رد عليها و خيب كل املها.
عمر: اعتذر منج نيروز بس ما اگدر اخطي هالخطوة لا تتأملين بهالشي إلى تريدي يصير الا هذا الشي ما اگدرله.
طلع من يمنا وخاله طلع وراه گعدت مليكة حاضنتها و نيروز تبچي.
مليكة: گتلكم ما راح يرضى رجلها ما سمعتوني.
غرام: بس ليش خالة؟ مو ارسلان اتبناه عمو حسين الله يرحمه.
مليكة: يختلللف وضعع ارسلان، من جااابه جان يفهم و يفرق.
نيروز: ما راح اصير ام بحياتي.
انفجرت تبچي گطعت روحها تگطع باوعت الناز واگفة يم الباب تباوعلها
بقهر دخلت للمطبخ اجيب مي دخلت ورايَّ ناز تفرگ بايديها، لزمت ايديَّ بقيت مستغربة من تصرفها ابتسمت بوجها.
غرام: محتاجة شي نازي؟
نزلت انظارها البطني ورجعت رفعت عيونها ناحيتي.
ناز: انتم تگدرون تساعدوونهم.
شلون؟
انطوا هذا الطفل ال عمر و نيروز.
صفنت بكلامها و قلت ابتسامتي.
تقصدين انطي اللي بطني الهم؟
اي.
بس.
اعرف صعبة تنطين قطعة من روحج الغيرج بس هم هنا وياكم بالبيت
وراح يبقون گدام عينج انتم تگدرون تجيبون بدل الواحد اثنين علوية بس
هم ما راح يگدرون و عمر شفتي شلون رافض شغلة التبني.
تحچي و تبچي روحه ممرودة مرد على أخوها درت وجهي عنها أفكر بكلامها الي
صعقتني بي ما اجه ابالي بيوم ينطلب مني هيج طلب، طلعت من المطبخ راجعة
يم مليكة و نيروز انطيتها المي و عقلي ضايع باللي حچته ناز، دخل كُميل.
يمشي سريع دخل للغرفةاستغربت شبيه مو طبيعي دخوله طلعت من يمهم
دخلت وراه شفته يبدل سريع بسرعة گال موجه كلامه الي.
كُميل: طلعيلييي فلوووس بسرعة.
غرام: شصاير؟ شتسوي بيهن.
ارسلان و غياهب مسوين حادث.
شهگت مخترعة بقيت واگفة بمكاني مصدومة شنو هل المصايب.
حادث؟
مووو وگت اسئلة يابه؟
فتحت الكنتور بسرعة انطيته المبلغ إلى طلبه طلع بدون ما ينطي خبر للباقين
باوعت من الشباك صعد هوَ و عمر و طلعوا بقيت اكل بأظافري شلون.
هسه اذا سئلني البنلت و مليكة ردت اطلع ويا طلعتي دخلت مليكة تباوعلي بنظرات شك.
مليكة: شبيه رجلج طلع يركض؟
غرام: هاا؟
شني هااا شمااالج فهيتي خايبة الفاهية.
قررت احجي اول و تالي راح يعرفون.
ارسلان و غياهب صاير وياهم حادث كُميل گال.
لطمت على صدرها و صرخت يمةةة.
لزمتها من شفتها رادت تتخربط دخلوا البنات على أثر صرختها.
خالة فدوة اهدي ما گال شي كُميل ان شاء الله ماكو شي.
گعدت ناز لازمتها و مافاهمة شي و نيروز واگفة فوگ روسنا نفس الحالة عيونها مورمة من البچي.
ناز: عن منو دا اتحجون؟ و شبيها مليكة؟
نزلت دموعي منطيتهن الخبر ردت فعلهن جمدت ملامحهن.
حنين.
طولت عملية غياهب بسبب وضعها و اخذوا الموافقة لان راح يولدونها بعملية بسبب الوضع اللي هيَّ بي.
درغام: اتأخروا كلش.
حنين: خلي انشوف ارسلان.
ردنا نروح اني وياه و استوقفنا صوت ابوية التعب هد حيله و بعده مقاوم.
سلطان: انتظروني اجي وياكم بابا اشوفه.
طلعنا انشوفه سئلنه عنه گالوا وضعه احسن بس بعده ما راجع لوعيه
و عنده كسور بس متجاوز وضع الخطر اجوا اخوه و خاله وجوهم متغير لونها
من خوفهم ما هدئوا حد ما اطمنوا عنه باثناء مدا انحجي اجه ولد شاب
بس لابس مدني همس الدرغام ما لقطت غير كلمة سيدي؟ طلع وياه درغام طلعوا من الممر الواگفين بي.
عفت ابوية يحجي ويا خال ارسلان و اخوه و طلعت امشي وراهم ادور عليهم.
بالمستشفى اختفوا وينهم؟ طلعت للخارج سمعت صوت درغام صاح.
درغام: شتحچي انتَ؟
أتقدمت بخطوات وگفت بمكان مايشوفوني منه ضامه نفسي و اسمع الكلامهم الوگف عقلي من اللي سمعته.
سيدي احنا چنا ماشين وراهم بمسافة يش ما ادري شلون اجت السيارة
طايرة و للأسف الضربة صارت الاقوى الزوجة الضابط ارسلان.
لزمتووووا هالكلب؟
نعم تم القبض عليه و التحقيق وياه.
شفهمتوا شنو منبع الحادث؟
مؤامرة.
لااا تبقى تحجيلي كلمة كلمة.
انضم الهم مُجاهد اللي نزل من سيارته و كمل الكلام.
مُجاهد: انا حققت وياه و هاي جيتي من المركز سالم جدك اللي دازه.
ضرب ايد بايد درغام بروحه شايطة.
درغام: خرررررب برووووحك سالم.
شلونه وضع ارسلان و مرته.
غياهب بالعمليات وضعه احسن بس عنده كسور و بعده ماراجع لوعيه.
انا عقلي راح يوگف من شي واحد.
شنو مُجاهد؟
جدك شلون جاي يحمي بروحه صارله شگد مطلوب للدولة و يدورون.
عليه خصوصاً عمك عمران المستلم الوضع شغلة تحير يا خوية.
الخنيث مااا جاااي يطلع روحه يدز نااس علينا.
و الحل يبقى الوضع هيج؟
لاگي و مااا لازمة الاااا اشررررب من دمه هالحيوووان حتى بيوتناااا
حطينالها حماية خاف يتقرب الهم مرررتي من تجي الدوامها مخليلها حماية شسوووويييي اكثررر.
عيوني بقت متجحظة تباوعلهم من إلى سمعته سبب الحادث سالم؟ اختي
بنص الموت دا اتحارب بسببه؟ دخلوا للمستشفى و هم يتناقشون.
عنه لزمت راسي بألم و الدنيا تفتر بيَّ، رجعت دخلت وراهم عيوني جمرت نار چانوا واگفين اجاني درغام.
درغام: وين جنتي؟
رديت بدون ما اباوعله.
حنين: طلبوني علمود شغلة.
رجعنا ننتظر خبر عن غياهب لحد ما طلعت الدكتورة ركضت الها و گلبي نار على خيتي.
حنين: دكتورة اختي شلونها؟ طمنيني عنها؟
المريضة فاقدة للوعي بالوقت الحالي راح تكون تحت المراقبة.
رديت عليها بخيبة امل.
يعني شنو؟
سوينا اللي علينا و الباقي يم الله.
و بناتها؟
الحمدلله ولدناها بس تعبانات ضروري يبقن بالخدج هل الفترة.
هيَّ راحت
منا و ابوية وگع عندنا لزموا الولد عمر و درغام فحصوا سكره لگوا صاعد حطوا بغرفة
يرتاح بقت عيوني حايرة وين تباوع الاختص لو الابوية لو البناتها.
كُميل: انا رايح اشوف ارسلان.
راح الخال بقيت گاعدة على الكرسي حيل ماكو باد عيوني انتهت غطيت وجهي بايديَّ
دموعي تنزل بغزارة اجت حالي و حالها مو احسن انحسنا حوس بسبب سالم الله لايوفقك.
كل حياتنا دمارها بسببك، طلعت اشوف بنات غياهب إلى گالوا عنهن وضعهن
تعبان سئلت عنهن و دلوني عليهن اتذكر اختي شلون چانت فرحانة بيهن
و تجهز الهن هيَّ و ابوهن مالحگوا يفرحون بيهن. رحنا اني و درغام انشوف
ارسلان دخلنا بالممر إلى بي غرفة ارسلان و نسمع صوت صياحه بصوته التعبان
دخلنا للغرفة الدكتور لازمة و خالة و هوَ يريد بس يگوم و وضعه منتهي اتخبل تخبل يحچي گوا.
ارسلان: ب. بس أشوفها.
مُجاهد: خوية ماتشوف وضعك وين رايح صير زين وناخذك چا انتَ لا اتصير كلش وتزيد الضيم ضيمين.
انطوه ابرة مهدأ طلبوا منا نطلع نعوفخ يرتاح بس ياترى عرف بناته اجن للدنيا بناته
الچان ينتظرهن أحمر من الجمر بأنتظاره، ما قبلوا بالمستشفى نبقى كلنا
ابوية ما قبل يتزحزح من مكانه خلانا كلنا نرجع بقوا بس هوَ
و الخال كُميل.
والباقي رجعوا لبيوتهم رجعت البيتي تعبانة و اسحل بروحي سحل من التعب خالتي.
وجدان ويانا ماخلاها درغام تروح البيت اهلي لان وحدها تبقى الحماية واگفين
بالباب اتلگتنا خالة جوهرة واصل الها الخبر خالي ماموجود بدوامه ما تگدر
حتى احجي شفت ابني بايدها و هوَ يريدني اخذته منها حاضنته الصدري گعدت
و دموعي مداتوگف مجرد افكر بوضع اختي و مصيبتها.
جوهرة: گومي ماما سبحي و ارتاحي اكليلج شي.
حنين: راح اسبح و انام ما اشتهي شي خالة.
التفتنا على شهگة خالتي وجدان تبچي و هيَّ تگول.
وجدان: شوگت ترتاح هالبنية جابت عمرها ضيم بضيم كلنا يالله و الدنيا رجعت تعوضها.
گعدت يمها خالة جوهرة تهدي بيها حطيت الحسن عند ابوه ورحت اخذت ملابس دخلت
للحمام عقلي يفكر بشي واحد بس هوَ اختي كملت دخلت الغرفتي درغام
واگف ينوم بالحسن شايلة بين ايديه تمددت حتى شعري مانشفته و لا مشطته الدنيا
طالعة من عيني غمضت عيوني بثكل احارب بنفسي انام، الثاني يوم من الصبح.
طلعنا للمستشفى اني و خالتي و درغام وصلنا لگينه اخت ارسلان ناز موجودة و عمر الخال هم ابوية گاعد بجهة سلمنا سئلت.
حنين: ماكو تحسن بوضع اختي؟
سلطان: بعدها الدكتورة ما داخله الها و لا احد گال شي.
مرت يوم بعد يوم و ماكو تحسن بيوم كالعادة الكل موجود دانحجي و طلعت ممرضة تمشي
سريع ما ادري وين راحت رجعت وياها الدكتورة دخلوا الغياهب بقينا ننتظر
ردنا نموت اني وابوية لساني ماهدأ عن الدعاء و النذورة إلى نذرتها بس.
اختي تعدي مرحلة الخطر ناز واگفة گدامي تدعي مثلي.
اجه مُجاهد منزل راسه ينكث ببنطلونه و بايده علاكه ماعرف شنو بالعلاكة الثانية
صمون يمكن جايب اكل رفع راسه وصل يمنا راد يحجن وصفن بالجهة الواگفين
بيها اني و ناز و عمر بس ما طول بصفنته و نظراته بسرعة دار وجهه و گال.
مُجاهد السلام عليكم.
رد الكل السلام و هوَ ما ادري شصارله الولد تخردل تخردل و اتقيد اتقربله درغام همسله بس سمعته من گاله.
مُجاهد: هذا اكل جبته للخال و ال عمي سلطان انا رايح.
درغام: الواضح عرفت سببب صفناتك.
عضله شفه مُجاهد يأشرله يسكت خازره من شافني اباوعلهم نزل راسه خجلان مني حط الاكل وراد يطلع لزمه درغام.
درغام: ابقى الدكتورة دخلت الغياهب خلي انشوف شتگول و انروح الارسلان متخبل الرجال.
ماشي.
بقى واگف و الدكتورة بعدها ماطالعة گلوبنا خلصن و هيَّ بعدها جوا اجت
نار لزمت ايدي حچت بصوتها الهادئ اللي يمثل شكلها.
ناز: ان شاء الله تطلع بالسلامة.
ان شاء الله.
و اخيراً طلعت الدكتورة ايدينا على گلوبنا اجت علينا مبتسمة.
الدكتورة: الحمدلله على سلامة مريضتكم تعدت مرحلة الخطر بس يحتاج تبقى فترة عدنا.
الكل جر نفس حضنت ابوية و عيوني مدمعة اثر فرحتي ما قصر رب العالمين
ابوية هسه يله رجع الدم الوجهه دموعنا نزلت دموع فرحه و شكر لله اختي الله يحبها نقذها من هيج حادث.
ناز.
ناز: عمر راح اروح أبشر ارسلان.
عمر: اجي وياج.
لا اني اروح خاف ما يقبلون ندخل اثنينا.
عفتهم واگفين فرحانين بسلامة غياهب و رحت امشي اشوف اخوية إلى ما مهتم
النفسه و ما هدأ يريد يعرف خبر عن مرته وگفت بنص الممر نسيت غرفة ارسلان
ضربت جبيني بخفة هسه لو مخلية عمر يجي ويايَّ مو احسن سويت روحي فاهمة و اندل علساس.
سمعت واحد يتحمحم ورايَّ رمشت بعيوني اتمالك نفسي هذا نفسه اللي
شفته بالحلم قبل شوية هم شفته واگف حچى بنبرة حلوة و هادئة.
مُجاهد: محتاجة شي؟
ناز: ضيعت غرفة اخوية.
هاا تعاي اخذج الها.
مشى گدامي و اني امشي وراه و كل شوية ملتفت عليَّ لحد ما وصلنا الغرفة ارسلان.
اتفضلي.
شكراً اخوية.
اخوية؟
رفعت حاجبي مستغربة من نبرة صوته اللي تغيرت من گتله اخوية.
شنو؟
ادخلي الاخوج جوا.
هز بايده ما عاجبه وراح يمشي شبيه هذا؟ دخلت اضحك الارسلان
اللي كسورة صايرة كسر بايده و كسر برجله من غير الجروح اللي باقي جسمه و وجهه راسه لافينه بشاش ابيض.
ناز: عندي الك خبر حلو.
چان صافن بالسگف دار وجهه بهدوء أشر بعيونه بعنى شنو؟
غياهب اتجاوزت مرحلة الخطر و هسه الدكتورة بشرتنا.
تغيرت كل ملامحه عيونه ضحكت قبل مبسمك رد بتعب.
بروح ابوج.
اييي ايييي وروح ابوية بس لازم تبقى هنا بالمستشفى لان تحتاج اهتمام وراحة و هم سولها عملية قيصرية.
عملية قيصرية؟
اتقربت اله بدون ما اطخه لحد الان ما سئل عن بناته ما اعرف ليش.
بناتك نورن حياتكم ياروحي.
نزلت دموعه ما تحملت المنظر شلون وضعه كله تغير نزلت دموعي ويا دموعه.
يعني غياهب ولدت؟
بسبب الحادث سولها عملية بس شوية حبيبات عمتهن تعبانات مخلينهن بالخدج.
رجعت اختفت ابتسامته.
شبيهنن ليشش بناتي بيهن شي؟
اوف يالساني ما الزمه اني هسه اترزل، والله ماكو شي خطر عليهن بس تعب.
روحي صيحي خالي.
هزيت براسي طلعت دموعي بعيوني هسه راح يطيحون حظي لان حجيت يمكن ما حاجيله بسبب وضعهن ضربت رجلي متعصبة و اني احجي عبالك گاعدة ببيتنا.
هيَّ شنوووو هاي المستشفى كل شوية ضااايعة بيهاااا كل الابواب نفس اللون شبيكم قلللة الوان من طاح حظكم.
كمزت بمكاني على الصوت الاجه من ورايَّ ايدي على گلبي دخلت بحالة رهبة وخوف...