رواية وتيرة الأعرج للكاتبة حوراء السعيدي الفصل الثامن والأربعون
حنين
دخلت للمستشفى صارت گدامي أنوار.
انوار: لك هلا ب أم الحسن.
أبتسمت حضنتها.
حنين: هلا بيج شلونج.
الحمدلله حسونات شلونه؟
الحمدلله بس لو يبطل يبچي أصير بخير.
دخلنا الغرفتنا الخاصة وگفت أعدل بلبسي و أسولف وياها.
اي شلونج بالزواج الجديد.
جاوبتني و عيونها تلمع لمع بالسعادة.
كلش مرتاحة هوَ و أهله زينين ويايَّ أهله يعاملوني مثل ما يعاملون بناتهم.
الحمدلله و الشكر الله عوضج و ان شاء الله دائماً يبقون هيج وياج.
امين.
طلعنا بدينا بشعلنا و كل ما يصيرلي مجال اخابر خالة جوهرة
و اسئلها
عن الحسن درغام بدوامه صفينا وحدنا بديت اتعود على هذا الوضع
قبل جنت انقهر و اموت بقهري من يصعد الدوامه بس هسه عندي ابني يسد فراغه
دخلت انوار وجها ما يگصه السيف مع العلم هيَّ صاحبة ملامح بشوشة و دائماً تضحك رحت عليها.
حنين: انوار شبيج؟
ابتسمت مجاملة بوجهي بس واضح اكو شي مضوجها.
انوار: ماكو شي بس تعبت.
و تقنعيني هاي حالتج لان تعبانة؟
گعدت والدمعة بطرف عينها.
حنين: هيووو انوار مو احچي راح اطيح حظج.
الممرضات هنا يحجن عليَّ حنين صارلهن فترة يگولن على زوجي لان دكتور و ماخذني
يگولن شنو ماخذلة زعطوطة و هوَ دكتور و يستاهل الاحسن منها هذا الكلام يقهرني.
قبل هم سونها و هسه هاي الحالة اول مرة لو شنو.
من اتزوجت لليوم اسمع الكلامهن.
تعاي حبيبتي.
سحبت كرسي گعدت بصفها انوار من النوع الحساسة تتحسس من كلشي و يحز بخاطرها.
انوار اسمعي دائماً من ينحچي على أحد أسمع أهلنا يگول رسول الله بعظمته ما خلص من كلام الناس و شرهم
لعد شلون احنا البشر نخلص منهم و من كلامهم ذني تلگيهن طاگتهن الغيرة
وعلي منج من حرگت گلبهن يحجن هيج و يتقصدن يغثنج يريدن يخربن بينج و بين زوجج.
بعدين تعاي اگلج شنو انتِ وظيفتج قليلة؟ اذا هوَ دكتور شنو يعني فوگاه.
ريشات اثنينكم درستوا و تعبتوا على نفسكم، ذني ماعندهن سالفة يحجن ييها يدورن طبقات و يقيسن بيها الناس كلنا نفس التراب راح ينذب علينا
لا تبقين بهاي الشخصية و تهتمين الكلام الناس خليج انسانة واثقة من نفسها و من خياراتها.
الكلام طنشي بابا ما يحجي عليك غير إلى ميت غيرة منك و ما يتمنى الخير الك
أهتمي بنفسج و بعائلتج اني چان رحتلهن وطيحت حظهن بس تعرفين بالمدير شگد متشدد ويانا.
-لااا لاا فدوة حنين اگعدي ما نريد مشاكل خيولن و صدگ كلامج ما ادري شبيه انقهر بسرعة.
عفية البسيهن مثل ما تلبسين حذائج الصبح و تمشين بي.
ابتسمت حضنتني.
احلى صديقة والله.
ام الحسن قصدج اييي اييي ام الحسن اني بعد وين تلگون مثلي.
فدوة للحسن و الامه، صدگ ذكرتيني هاج.
باوعتلها حطت گدامي مجموعة هداية مغلفة ماواصخ شنو آلي بداخلهن.
انوار: هاي هدية من خالته انوار و زوجها للحسن حبيب خالته.
حنين: اويي عمري ليش تعبتوا نفسكم بعدين انتِ مو أجيتي و قمتي بالواجب.
شجايبة قابل يمعودة.
شكراً حبيبتي انوار اردها الج ان شاء الله.
حطتهن على جهة و رجعنا مكملين شغلنا ما عندي غيرها صديقة هنا بالدوام
مكتفين بنفسنا مالنا علاقك بأحد لان وين ما أنروح النفاق موجود، مرت ساعات
دوامنا و خلص هيَّ طلعت ويا زوجها و اني اخذني الخط رجعت للبيت مشتاقة
الابني اول مادخلت للبيت عيوني تدور عليه شفت خالة جوهرة گاعدة.
و مخليته بحضنها سلمت عليها اخذته منها أبوس بي.
حنين: حبيب ماما، اشتاقيتلي مثل ما اشتاقيتلك هاا.
جوهرة: خلي احميلج الاكل وانتِ بدلي.
لا خالة اني احمي كافي عليج الحسن من الصبح يمج اكيد شلع گلبج.
ضربتني على كتفي تضحك.
خايبة شو اسكتي حفيدي هذا ابن العزيز.
رحم الله والديج بس ارتاحي اني هسه اهتم بكلشي.
بكيفج يمة بدلتله قبل شوية بس جوعان رضعي.
اي هسه.
باوعت للهداية إلى حطيتها بصف جنطتي.
شني هاي.
هاي انوار هيَّ و زوجها دزوهن الهذا الحلو.
ياا فشل ذاك اليوم البنيه اجت و ما قصرت.
گتلها والله، راح أدخل جوا أبدل و أرضعه.
دخلت الغرفتي و هوَ يباوعلي بعيونه السود حطيته على الچرباية و بدلت ملابسي ركضت عليه ابوس بي.
يمك وليدي يمة جوعان.
شلته بحضني ارضعه و صدگ جوعان سودة عليَّ بقيت ارضع بي لحد ما شبع اتصل درغام.
درغام: بعد ماكو بلائي كله ام الحسن.
حنين: ما متفقين هيج اذا ماتگول بلائي أحس بنقص.
ضحك و هوَ يگول.
شلونج بلائي.
زينة قبل شوية وصلت من دوامي وصلت انتَ.
اي وراح تتغير اوقات الدوام و ايام النزول هم.
للاحسن لو للاسوء.
نفسي الشي بالنسبة الي.
هاا.
غير الموضوع و هوَ يسئل عن الحسن.
شلونه ابني؟
يبوسك هوَ و أمه راح أنومه و اگوم اكل.
بقى يحجي ويايَّ شوية وسده بالدوام وقتنا محدد، نام ابني و طلعت جوعانة
حميت الاكل خالة مسوية مرك لبلبي مال حمص و دجاج و تمن صبيته.
و حطيته بالصينية گعدت اكل صافنة بالفراغ إلى گدامي و چانت أفكاري
بخصوص حياتنا شلون تغيرت قبل چانوا ابوية و غياهب بالدفرات يگعدوني من نومتي
هسه صرت مسؤولة عن عائلة و طفل ودوام ر اتمنى تبقى حياتنا تستقر للاحسن.
درغام.
مسحت وجهي صافن بالصور هاي صور الحنين و بوضع مو زين و لا لائق
كاتبلي جوا الصور، أخلي روسكم بالگاع
رديت عليه و دمي فاير حسيت النار صارت تطلع من عيوني و انا اعرف.
بمرتي شنو عسا لو سواها صدگ و نشرهن اللي اعرفها من الطفولة لو يحطون
ايديهم على أقدس شي بالكون ثقتي بيها ما اتنهز و أدري ب عمي سلطان شمربي.
درغام: اذا ما كسرت ظهرك على هاي سوايتك ما اطلع سبع الهورة اطلعك من جوا الگاع أصبرلي بس.
طلعت شفت مُجاهد واگف بزي العسكري يخابر إشرتله يجي سد إتصاله اجاني.
مُجاهد: هاا ضلعي.
هاك هذا الرقم اريد تطلعلي صاحبه من جوا الگاااااع.
رقم منو؟
ثائر.
أخذ الرقم رجعت المكاني اتمنى بس يطيح گدامي و بين ايديَّ وحگ اخو
زينب ما اخلي عظم صاحي بي، لازم انحط حماية العوائلنا سالم بدأ يظهر
و راجع الله العالم شنو إلى اباله رجعته هاي ضاملنا سي بيها بنفس الوقت
ما اريد عوائلتنا يدخلون بحالة إنذار وخوف و هم يمارسون حياتهم رجعت اتصلت ب أبوي.
جابر: ها درغام.
درغام: هاا يابة أحنا لازم نخلي حماية لبيوتنا الله يعلم جدي اذا طلع شيسوي.
فاهمك و درسنا هالموضوع عمران اتكفلها فكرنالها قبل لا تتصل.
سديته منه من انعل ابو سالم لابو ثائر الكلب، مرت ساعات دخل مُجاهد
بأيده ورقة انطانياها بيها عنوان ثائر المتواجد بي رفعت راسي اله.
مُجاهد: شنو إلى ابالك؟
درغام: تروح ويايَّ؟
وياك للموت بس فهمني السالفة.
مسوي صور مفبركة موزينة على مرتي و يهددني بيهن يريد ينشرهن الجايف.
چا يلا امشي نروحله انا وياك زيارة.
بس انا وياك ما اريد احد يعرف بشي
أمشي ضلعي.
نطلع منا بالزي بس خلي نغيره بالسيارة للأحتياط.
طلعنا من المركز اثنينا صعدت بسيارتي طلعنا ملابس النا بدلنا بسرعة
اتوجهنا للمكان الگاعد بي بأحد الفنادق إلى ببغداد شگد شايف اغبياء بس مثله
ما شايف إلى يضم روحه يغلق جهازه مو يگعد يلعب بي و يخليهم يوصلوله الا اذا چان متقصد و أباله شي ثاني.
مُجاهد: بس كون ما يطلع من المكان إلى متواجد بي.
درغام: تلگاه ماخذله بطل و داخل بعالمه.
شمرت عليه حهازي إلى بي الفيديوهات الب دزهن سالم.
هاك شوف.
فتحهن يباوع بيهن وصل للفيديو إلى ذبح بي جدتي هيلة صفن و وجهه
تغيرت ملامحع رفع راسه داير بوجهه ناحيتي.
متأكدين هذا بشر؟
اذا اگول حيوان أظلم الحيوانات.
دخيلج يا ام البنين شنو هل الموته الماتتها الحجية ولك هذااا أمثل تمثيللل بيهاا.
أحس بعيوني صرت ما أشوف بيهن بس اريد الزمه و أطلع ضيم الدنيا بي.
وصلنا للفندق دخلنا و اكيد ما ينطون معلومات بسهولة اضطريت استغل اسمي
بشغلي طلبت لقاء المدير مال الفندق علمود يعرف مو ناس عادية المقصد من ناحية الشغل.
گلناله هذا الشخص مطلوب للدولة بعد حديث دار بينا و شوفناه هوياتنا
اخذنا الغرفته وراح بقينا واگفين لحد ما طلع من المرر اكو كاميرات اكيد ف چان
لازم نتصرف بدقة، دگيت الباب ما فتحه رجعت دگيته بنفس الدگة القبلها.
بهدوء انفتح الباب صرنا على جهة انا و مِجاهد ما ايشوفنا، طلع من الغرفة.
وگف يم الباب يطوطح مو بوعية مبين شارب دارت عيوني بحذار جريته
من ياخة قميصة دفعته للغرفة دخلنا جوا مُجاهد سد الباب، سحبت سلاحي حطيته براسه و هوَ خنس.
درغام: محتار شلون أتفنن بيك.
رد بلسان ثكيل يفتح بعيونه ويغمض.
ثائر: م. منو اا. انتَ؟
مُجاهد: ربحنا.
خيسة مثل أبوك.
رد مُجاهد.
اكيد ما راح تخبزه هنا بنص الفندق و اتسويلنا سالفة.
نزلت سلاحي حطيته وره ظهري.
لا شبيه غبي خلينا نطلع منا بهدوء قبل لا يشكون بشي.
طلعنا و لازمة مُجاهد و هذا گوا يمشي چان المدير واگف يم الباب أشرت
المُجاهد يطلع گدامي مديت ايدي مصافحة دخيل الله اذا انكشفنا بس انا صدگ راح اخذه للمركز.
درغام: أشكر جهودك المساعدتنا.
المدير: اهلاً و سهلاً بحضرتك اني الاشكرك لان جاي تأدون واجبكم و تخلصنا من هيج ناس.
ابتسمت بوجهه و طلعت من الفندق صعدت بالسيارة درت على الوراي هذا
رايح منتهي و مجاهد حاط ايده على خشمه معمكش وجهه لعبانه روحه.
درغام: شبيك شكلك يذكرني بحنين من هيَّ حامل و اگعد يمها بس تشم عطري لعبت روحه تخليني اشك خايس بريحتي.
مُجاهد: ما أتشوف خيسة الشرب هاي شلونه يتسممونه.
درت وجهي اشغل بالسيارة.
انتَ كلها عندك خايسة، النسوان خايسة، الامة العربية خايسة، بس هم صدگ ما الومك الشرب خيسته تگتل.
دمشييي امشي راح ازوووع بسيارتك.
علمود انعل والديك البارحة غاسلها.
خاااايب امشي و الكفل زينب صرت چني حاامل معدتي خبطت.
شغلت السيارة و طلعنا من يم الفندق چنا مخلين السيارة بمكان بعيد عنه.
مُجاهد: هسه هذا وين راح تاخذه؟
درغام: للمركز يعني قابل وين، هاي تهمة تخلي يخيس بالسجون.
انا ما ادخل للتحقيق من هسه اگلك، انتَ أدخل وياه خيسته گتلتني.
هوَ انا ادخل بس سددد حلگك شگثررر حچيت.
و هذا شلون تحقق وياه و هوَ ضارب بطل معدل مبين.
هواية طرق موجودة.
مُجاهد: أباوع الصاحبي ينتر نتر بالحجي و عيونه بگصته صايرات
من سالفة ثائر الله غضب على ثائر من طاح بين ايدين درغام و سالفته الي
سواها ماينسكت عنها درت وجهي للجامة فتحتها لعبانة روحي اريد افهم شلون
يشربون هذا السم غمضت عيوني بسرعة فتحتهن من اجت ابالي استغفرالله طردتها من افكاري شنو هل المصيبة إلى اجتني.
ما رايد اخون صاحبي و انا افكر بعرضه حتى لو چان مجرد تفكير
وصلنا للمركز رجعنا لبسنا الزي مالتنا نزلنا درغام سحب ثائر مني ودخل بي
قريت على روحه الفاتحة رجعت دخلت گاعد بالسيارة مشتهيلي جكارة
فتحت جهازي جايني طلب مراسلة كاتبتلي مرحبا ما وافقت على طلب الرسالة.
دخلت الحسابها چانت بنية ناشرة صور الها و مبينة ما عايشة هنا غلست
عنها شربت الجكارة رفيجة الروح و دخلت جوا للمركز.
درغام: بقيت گاعد أنتظره يصحى علمود اعرف شلون احجي وياه خليت واحد
من الجنود يجيبلي سطل ماي حطه گدامي وطلع، شلته ذبيته كله صبه وحدة عليه وگف يكمز لان الجو بارد.
ثائر: خررررب باابووووك الكو.
فزيت وجهه براشدي على خفة ايدي بقى فاتح عيونه.
انتَ.
لا عزرائيل.
شجابني هنا؟
جابك عزرائيل.
شررايد درغااام؟
انچب لك درغام شنو گوووول سيدي ما گااعد بنص بيتك يالدثو.
وجهه صوفر يمسح بوجهه يبلع بربگه بخوف گعدت گباله احجي وياه.
اسئلك سؤال واحد، و اذا ما تجاوب عليه بصراحة راح نتخارب و اذا اتخاربنا هنا راح تخرب بينا.
شتريد؟
مكان سالم المغضوب.
ما ادري بي.
هااا بدينا نتخارب.
والله ما ادري بمكانه.
چااا شلون عرف ارسلان إلى حرگ المعمل و ابوك بي؟ تضحك عليمن انتَ.
انا حچيتله بس مابينا لقاء تواصلنا اتصال.
طلعت من جيبي جهازه إلى خذيته من رحنا للفندق حطيته گدامه أشرتله.
أفتح الرمز لا أفتح راسك و طلع الرقم.
ما يثبت على رقم لان يدري ينعرف موقعه من الرقم.
عطت بي.
افتحههه.
خذاه فتحه طلع الرقم سحبته منه و طلعت اتصلت بالرقم اشوفه مفتوح او لا
و للاسف جان الواضح متخلص منه رجعت اله شمرت الجهاز سحلته لازگة بالحايط.
درغام: ترررريد تستغلني بصورر مرررتي وللك حيووووان كلللب ابن الدثو عررررضي نفسه عرررضك شلووون اتسوي هيج.
باوعلي بحقد يغلي.
ثائر: و أبوي إلى سكتوا عن موته هم عنده بنات و عرضكم.
اكللل انتَ شتدررري هاا؟ و اخواتك محدد متگرررب الهن و لا واصل لحدهن
محدد ماسهن بحچاية، تدرررري ابوي متكفل بمصارريف اخوواتك.
وانتَ إلى تحصلله بشغللك تروووح تگضي بالملاهي و ال ولللك ابوووك اتحررش
بطفلة طفلة و متحررش بغيرررها هذا گتله حلال لووووو ما مخلصنااا
منه ارسلان انا بيدي اگتله ومحمدد لووو أدري ادخل سجننن بي.
هذا جذببب منكم انتم تكرهونه من زمااان.
لزگته براشدي ثاني.
شنكرررره هوووو منو بدأ بهل الكراهية انتم صررتوا مفضلين جدي و انااا إلى چنت انگتل و المشاكل إلى تصير و حتى المالي علاقة بيهاا تطيح براسي انتَ تدرررري بجدي مجررم.
بيكم تستاهلووون.
هزيت براسي متوعدله.
انتَ الواضح مستعجل على رزقك.
دفعته، نزعت احزامي طبگته طبگتين.
اشووووف منووو يطلعك مناا اليوم انتَ وره حادث ارسلان؟
لا.
لسعته بالحزام على ظهره.
وتجذب؟
نزلت عليه بتحقيق طلع روحه صريخة صار صريخ النسوان يصرخ دمه صار
بطوله انگتل گتله فوخت گلبي طلعت ضيم السنين بي، ضيم السوالف
الي چنت مالي علاقها و يطيحوها براسي و منا جدي شلون يحبني و يصدگني
گعدت الهث و هوَ يتلاوه من الالم انفتح الباب دخل مُجاهد باوع للوضع و الفوضى الصايرة ركض عليه.
مُجاهد: درغاام لا يموووت جوا أيدك مابينا حيل للعواقب.
اخذه وذبة بأقرب زبالة اذا يبقى هنا ما أضمن روحي ما اخلص عليه.
ما راح تسجنه؟
لا انطيته للي يستحقه.
مشيتله لزمته من فكه عصرت بايدي عصر.
درغام: اقسم بالله يا ثائر اذا تكرر سوالفك هاي المرة سماح الجايات
احط طلقة براسك اطشر مخك، ارسلان اذا تتقربله اسلمك الارسلان
بايدي و هوَ أيشوف شغله وياك ما اضمنلك تطلع من جوا ايده عايش اذا
رايد تحافظ على روحك و حياتك و ما تندفن بصف أبوك خليك بعيد عنه.
دفرته برجلي طلعت دخلت للحمام غسلت عيون ابني صارت گدامي.
ابتسمت بنص تعبي رجعت لمكاني الخاص اتصلت بحنين كاميرا فتحتها
تفرگ بعيونها مبين نايمة ثبتت الجهاز اباوعلهم نايمة و مخليته بصفها.
غرام.
طلعت نيروز من الحمام وجهه أصفر رحت عليها لزمتها من أيدها.
غرام: شبيج نيروزه؟
نيروز: هاا مابي شي
شلون ما بيج شي شوفي وجهج اصفر.
حچت بغصة مختنگة.
ممكن تتصلين على عمر؟
هزيت براسي اتصلت ب عمر و هيَّ وضعها ما يطمن قلقتني جاوبني.
عمر: هلا مرت خالي.
غرام: هلا بيك خوية، شسمه تگدر تجي للبيت؟
ليش محتاجين شي؟
لا بس نيروز ما ادري شبيها.
تغيرت نبرة صوته و استبدلت بنبرة ماليها الخوف و التساؤلات.
شنو؟ شبيها نيروز.
ما ادري والله.
يله يله هسه جايكم.
سده ورحت گعدت يمها شفتها تبچي.
غرام: ليش تبچين حبيبتي احچيلي بيج شي؟
نيروز: ما ادري بس خايفة.
دخلت ناز شايلة سراج چانوا بالحديقة تضحك بس شافتنا اختفت ضحكتها واجت تسئل بقلق.
ناز: شبيج نيروزه؟
بقت تباوع بوجوهنا منتظره جواب السؤالها.
نيروز: مدا اعرف شدا ايصير ويايَّ.
بقيت صافنة بكلامها شبيها البنيه ليش هذا وضعها.
احچي مو فتيتي گلبي.
صارلي فترة أنزف حتى عمر ما يدري.
رفعت عيونها تباوع ال ناز ورجعت تباوعلي بخجل دموعها بعيونها.
نيروز: حتى من يريد يتقرب إلى أمنعه و اطلع عذر.
بقيت ساكتة ما اگدر احجي شي لان ناز موجودة و ميصير ادخل بعمق بالحديث و هيَّ ما متزوجة.
غرام: احم. ناز عادي تاخذين سراج توكلينه.
هيَّ الواضح فهمتني هزت براسها و طلعت من يمنا بقينا اني وياها وحدنا.
نززف شنو نيروز؟ خاف حامل و ما تدرين بنفسج؟
لااا مو حامل النزيف إلى عندي قوي.
وليش ساكتة؟ صارلچ شگد ساكتة على الاقل لو حاچية الزوجج.
م. ما أدري خايفة.
ان شاء الله ماكو شي هسه يجي عمر وياخذج للدكتورة لا تبقين هيج.
اندگ باب البيت شنو معقولة عمر أجه بهل السرعة وهوَ عنده مفتاح البيت طلعت.
فتحته چانت مليكة راجعة من بيت اختها سلمت عليها دخلت جوا و شافت نيروز
و حجتلها كلشي بقت تحجي عليها لان ساكتة على روحها، اجه عمر گعد يمها حاضنها لامها بحضنه الخوف بعيونه.
عمر: شبيج نيروزتي؟
بقت ساكتة و دموعها ماخذه مسارهن، صاحتله مليكة الغرفتها لان شافت
نيروز تخجل تحجي او عناها صعوبة بالكلام تشرح وضعها.
غرام: گومي بدلي و اني راح اروح وياج دام مليكة أجت تبقى يم ناز و سراج.
دخلت الغرفتها تبدل و اني دخلت هم ابدل و ادعي ربي مابيها شي خابرت
كُميل انطيته خبر رايحة وياهم رغم هوَ باريني الذمة بس ما ارتاح الا انطي خبر.
كُميل: هلا علويتي.
غرام: هلا بيك، خابرتك علمود ابلغك اني راح اطلع.
هاا وين؟
نيروز مريضة و راح ناخذها للدكتور اني و عمر.
هاا اي اييي گال عمر زين تسوين روحي وياهم بس شلون تخلين ناز وحدها؟
لا اجت خالة مليكة لو ما جاية ما اروح.
اذا هيج روحي من ترجعون طمنيني.
ان شاء الله.
سديته منه بدلت و لبست عبايتي ادور على جواريبي گوا لگيتهن طلعت گعدت
بالصالة بعد ماجهزت نفسي انتظرهم ما ادري مليكة حچت ال عمر او لا طلعن هيَّ و ناز گعدن يمي.
مليكة: موتني بفهاوتجن.
ناز: مليكة لا تحجين عليهن خطية يمكن البنيه عبالها غير شي و سكتت.
ضربت رجلها مليكة مقهورة طلعوا عمر و نيروز و خطية ملامح عمر كلها تدل شگد خايف عليها لازمها من ايدها.
عمر: يله خلونا نطلع.
طلعوا گدامي و هوَ يمشي بيها عفت سراج يم ناز و مليكة صعدنا بسيارته
گعدت يمها مالت براسها على كتفي و همست بصوت مختنگ.
نيروز: علوية خايفة.
غرام: يمكن شهريتج متخربطة لا تخافين اتفائلي بالخير.
لا مو شهرية اني اعرف شهريتي.
هسه انشوف الدكتورة شتگول.
صعد عمر و اتوجهنا لعيادة الدكتورة و ماحاجزين هسه تعال ألزم سره طول
الطريق عيون عمز عليها اثاري كلهم بيهم هالصفة من نتمرض نظراتهم يمليها.
الخوف و التوتر و القلق يشتغل عندهم وصلنا لعيادة الدكتورة و لگيناها صايرة
هوسة لان نسائية، راح عمر يسجل اسمها و احنا گعدنا ننتظر اجه راحع گعد
بصفنا ابتسم بابتسامة هادئة بس واضح عليها القلق بس يحاول يطمن نيروز.
عمر: هااي شنو نيروزة ان شاء الله ماكو شي.
لزم ايدها باسها ابتسمت المنظرهم درت وجهي عنهم من لعبت نفسي
معدتي قلبت صارلي يومين هالحالة و خايفة يطلع اللي ابالي صح مر وگت.
واحنا ننتظر بعدها وصل سرانا صاحوا باسم نيروز بس عمر ما دخل
بقى واگف يم الباب و اني وياها دخلنا قبل لا ندخل سمعته همسلها.
عمر: حبيبتي توكلي على الله.
دخلنا للدكتورة گعدنا سئلت.
الدكتورة: منو المريضة.
نيروز: اني دكتورة.
احچيلي ماما شنو مشكلتج.
دارت وجها اتباوعلي شجعتها تحجي بنظراتي.
صارلي فترة أنزف و يصير عندي ألم بالحوض.
طال الحديث.
بين نيروز و الدكتورة و هيَّ تشرحلها وضعها و إلى دايصير وياها و غير اعراض بعد داتصير سئلتها الدكتورة.
النزيف عندج اول مرة يصير وياج لوسابقاً صار؟
أي قبل هم صار و گطع يعني هاي ثاني مرة تتكرر بس بذيج المرة فكرت شهرية.
خير ان شاء الله، انتِ متزوجة.
اي دكتورة.
أبتسمت بوجهه نيروز بخفة باوعت عليَّ.
الدكتورة: زوجها جاي وياكم.
غرام: اي.
خلي يتفضل بلا زحمة.
وگفت و گلبي ما مرتاح خصوصاً بعد شرح اعراض نيروز الها و هسه طلبت
عمرطلعت شفته واگف بس شافني اجاني يمشي سريع.
عمر: هااا علوية شگالت الدكتورة؟
غرام: ما گالت شي بس طلبت أتشوفك.
هاا اي يلا.
دخلنا جوا سلم عليها و نيروز راح تموت من الخوف گعد يمها.
عمر: اتفضلي دكتورة.
رفعت بعيونها النا اني و نيروز و فاجئتنا من گالت.
الدكتورة: بلا زحمة انتظروا بالخارج عندي كلام خاص ويا الاستاذ.
نيروز: بس دكتورة اني المريضة المفروض اعرف وضعي و حالتي ليش بس زوجي؟
عمر: ميخالف نيروزة انتظري انتِ و العلوية برا.
أخذتها و طلعنا و هيَّ مقهورة لأن ما حچت شي گدامها، بس ليش. ،؟
هم بقت علامة أستفهام بعقلي من تصرفها، طول عمر و هوَ يمها جوا.
نيروز: شو طولوا؟
غرام: ما أدري والله هسه يطلع.
هزت براسها شوية و طلع عمر بس وضعه مو مثل ما دخل خلانا صافنين
عيونه حمر اتقدم النا راحتله نيروز بخطوات سريعة.
نيروز: عمر؟ اتأخرت شگالتلك الدكتورة.
طول بنظراته اتجاها، عصر عيونه ورد بنبرة مختنگ.
عمر: ماكو شي حبيبتي بس فهمتني على التحاليل علمود انسويهن.
بس طولت؟ كل هذا علمود تحاليل شبيهن عيونك؟
مسح على عيونه و هوَ يحاول يرسم الابتسامة على ملامحه الحزينة.
يمكن دخل شي بيهن يحرگني، وعادي بعد دكتورة.
بقت تباوعله بعيونها ما مقتنعة بكل كلامه عبالك حاسها گلبها ضام شي عنها.
طلعنا انسوي التحاليل و الدكتورة طالبة من عمر بحال طلعت التحاليل
يجونها للمستشفى سوينا التحاليل بس الغريب مو مثل تحاليلنا العادية گالوا
فترة و تطلع إلى اعرفه تحاليل تطلع بيومها.
رجعنا للبيت طول الطريق عمر ساكت تحسه داخل بغير عالم اتلگتنا
مليكة حچيتلها مختصر لان الدكتورة ماحجت شي و حسب كلام عمر التحاليل
تحدد كلشي رجع كُميل من شغله هم سئل عنها و نفس الكلام عمر بس.
يصفن حتى خاله لاحظه دخلت للمطلبخ دخل ورايَّ يسئل.
كُميل: اگلج غرام متأكدة من كلامج؟
غرام: ورسول الله الدكتورة ما حچت شي بس سئلت نيروز كم سؤال و بعدها طلبت تشوف عمر و احنا طلعنا.
چااا يحظي شكو طلعتن أنتن.
هيَّ طلبت هذا الشي.
عمر من طلع شگال؟
حچيتله إلى حچاه عمر عض شفته يفكر رفع عيونه.
حاس أكو شي و عمر ما يريد يحچي شي.
ما أدري بس أتوقع اي.
طلع من المطبخ دخلت ناز تساعدني ساكتة.
غرام: خو ما تعبج سراج.
ناز: لا هادئ لهيته باللعب.
بقينا نجهز العشه بين ماكمل صبيناه گعدنا ناكل كلنا سوا بس عمر على نفس صفناته وضعه ابداً ما عجبني.
كُميل: ماتاكل عمر؟
عمر: ما اشتهي خالي اكلوا انتم بالعافية.
گام من مكانه بقت عيون نيروز وراه گامت من مكانها وراه استوقفها صوت كُميل.
هاا خالي انتِ وين رايحة هم؟
نيروز: شبعت خالو.
ما اكلتي شي بابا.
شبعت والله.
براحتج.
طلعت وره زوجها بقينا احنا الگاعدين اللكمة گوا تنبلع اليوم.
مليكة: اگلكم شو انسام صارلها شكثرر ما جايتنا خافنها بيها شي.
ناز: ياا مليكة نسيتي انسام هيَّ وزوجها راحوا للشمال.
خايبة نسيت عبن مشتاگتلها.
خابرها كُميل حچوا وياها سلموا على رجلها گالت ذني اليومين يرجعون لان
اجازة رجلها راح تخلص و ما يگدرون يتأخرون، لميت السفرة اني و ناز غسلت
المواعين و ناز سوت چاي الخالها صبته وطلعت اله ما طولت و هيَّ ترجع بايدها نفس الكوب.
غرام: هاا شو رجعتي.
ناز: يگلي خفيف.
اخذتها منها شفته صدگ خفيف.
اي والله شو خفيف عوفي هسه اني اسوي روحي ادرسي انتِ.
لا اني اكمله هسه اسوي ثخين.
رجعت ضافتله علمود يثخن وبقت واگفة تنتظر الغلاية تكمله حد ما كمل صبته قبل لا تاخذه اجتني.
شوفي هسه ثخين؟
اي اخذي اله و اذا هم عيب بعد لا تسويله.
هههههههااي و اگوله العلوية گالت هيج.
ضحكت طلعت كملت شغلي بالمطبخ لاگتني يم الباب.
ناز: يگلي هسه خوش چاي عاشت ايدج.
غرام: هههههههههه ما يحب الخفيف.
اي گال يله اني رايحة أدرس بغرفتي تريدين شي بعد؟
سلامتج.
رجعت يم مليكة و كُميل متگابلين يسولفون و سراج بنصهم يلعب بس شافني
رفع ايديه عود شيليني، شلته ابوس بي، مادري شيحجي ما مفهوم كلامه
گعدت حطيته بحضني سحبت ايده الناعمة بوستها دخلوا عمر و نيروز لازمين
ايدين بعض گعدوا يمنا يسولفون اخذوا سراج مني يلاعبون بي ايدي جوا خدي اباوعلهم.
عمر يتقرب السراج و سراج يبوسه و هوَ مرته ميتين عليه وجهم ضحك و اخيراً.
مرت فترة من الايام المنتظرة و بلغوا عمر طلعت التحاليل و هالمرة راحوا بس
عمر و نيروز بقينا ننتظر على نار حتى محاضراتي ما ادري شلون درستهن طلعوا
من الثلاثة الظهر الثمانية بالليل هم ماراجعين نتصل محد يجاوب علينا زاد قلقنا و خوفنا.
كُميل: شبيهمم ذوله و لا واحد بيهم يجاوب.
غرام: بلگي هسه يجون.
سمعنا صوت السيارة مال عمر طلعنا كلنا للساحة وگفنا وايدي على گلبي.
انفتح الباب دخلوا اثنينهم بقى الكل صافن بوضع نيروز عمر شايلها و هوَ عيونه
دم ركض عليه خاله يباوع بأستغراب على وضعهم و شهگات نيروز نابعة من عمق گلبها تبچي.
بوضع كافل يخليك تدخل بحالة رهبة و تسائل مثل إلى فاگدله عزيز.
كُميل: عمر خير شبيها مرتك ليش هيج حالتها.
مارد على أحد دخل بيها جوا للبيت دخلنا وراهم و مليكة تصيح و تسئل
و لاعبالك يسمعها دخل بيها الغرفتهم مادخلنا بس هيَّ دخلت بقينا واگفين ننتظر.
ميتين خوف والله بس مدنلاگي جواب و لا فاهمين شصاير و ليش هيج حالتهم.
مرت دقائق طلع عمر راحله كُميل لزمه من ايده.
كُميل: الكم نية تحچون اولا؟ شبيها مرتك عمر.
أختل توازنه لزمه كُميل ايدي على حلگي شديصير وياهم؟ گعده يرتاح ناز
طفرت للمطبخ جابت مي انطته الخالها راد يشربه دفع ايده وگع بالگاع منكسر
صرنا نصفن على تصرفه لان عمر مو من هذا النوع انسان يحترم الجبير و الصغير و تصرفاته رزنة و ثكيلة.
بس بهل اليوم چان وضعه كله مختلف، گعدت ناز يم رجليه لزمت ايده باست باطنها و تباوعله بعيون مدمعة مقهورة.
ناز: من شنو متوجع احجيلنا؟ أحنا كلنا أنسمعك.
نزلت دموعه بضعف ما گدر يخفيهن حاول بس فشل زفر نفس بحسرة و گال بصوت مبحوح.
عمر: نيروز لازم اتسوي عملية.
كُميل: عملية شنو؟
صوته منتهي بصعوبة ينطق الجواب.
عندها ذاك المرض كانسر ر لازم يستاصلون الرحم.
فتحت عيوني جاحظتهن بصدمة دخيلك ياربي، رجع يكمل و احنا بعدنا بنص صدمتنا.
عمر: ما ترضى نيروز اتسوي العملية انا اموت اذا يصير بيها شي وروح امي المظلومة.
غرام: زين الدكتورة متأكدة من هالشي بلكي خطأ اكو بالتحاليل.
التحاليل مضبوطة علوية و لازم اتسوي العملية بأسرع وقت و الا حالتها تسوء.
نزلت دموعي عليهم حتى ما صارلهم هواية من متزوجين مالحگوا يتهنون.
اسفة على سؤالي بس الرحم يستأصلوا كُلي لو جزئي.
يشيلوا كله للأسف.
شبعت قهر أدمرت عليهم عفت كُميل و ناز يهونون عليه دخلت النيروز المنتهية
من البچي حاضنة مليكة و تبچي عيونها مابطلت گعدت بصفها من الجهة
الثانية و ما ادري شنو إلى احجي و يخفف عليها حچت بصوت منتهي.
نيروز: ما اسوي العملية.
غرام: ما ايصير حبيبتي نيروز حياتج تصير بخطر.
شهگت بدموعها ضميت وجها بحضن مليكة.
ما راح أصير أم، راح أنحرم من كلمة ماما ما راح أكون مثل اي بنيه عندها طفل.
اخذتها من حضن مليكة نومتها على رجلي امسد على شعرها و شهگاتها تطلع من گلبها و مستوطنة بصدرها.
نيروز انتِ بنية مؤمنة بقضاء رب العالمين و اكيد ماياخذ شي الا بي خير
للانسان و بي عوض يمكن، اتذكري هذا الشي تدرين عمر يريد يموت
من خوفه عليج و ميت قهر هوَ ما هامه الاطفال إلى يهمه انتِ.
يريدني أسوي العملية.
كلنا نريدج اتسويها صحتج و سلامتج أهم من كلشي و اذا على الاطفال ابني ابنج.
غصت بدموعها تشهگ.
بس مو مثل ما انتِ تحكليمغبي و تتعبين بي شعور هذا الشي يختلف.
رفعت راسي المليكة الوجهه مطعون بقهرها.
غرام: لا أعتراض على أمر رب العالمين خليج قوية يمكن يصير عندكم طفل
و لا سامح الله يطلع عاق و يشلع گلبكم الاطفال صح يزينون حياتنا بس مو على حساب صحتنا.
بقيت مستمرة احجي وياها عسا ولعل تقتنع بس ما جنت اسمع منها غير
كلمة الرفض نامت و دموعها بعيونها دخل عمر سحبت نفسي منها بهدوء، يباوعلها بتعب و يذب حسرات.
عمر: ما حجيتي وياها.
غرام: حچيت بس ما تقبل.
فرگ وجهه بعصبية.
خايف أضغط عليها و تتأذه.
لا لا تضغط عمر حاول تحجي وياها بهدوء لعل تقتنع.
الدكتورة بلغتني مو من صالحنا نتأخر.
نبقى نحجي وياها بهدوء عسا و لعل تقتنع ضروري ننطي خبر الاهلها بلگي يساعدونه بأقناعها.
طلعت من يمهم گلبي ينزف بقهره بس خاف صدگ نضغط عليها و البنيه تتأذه اجت ناز تسئل عنها.
ناز: شگالت؟
غرام: ما تقبل تقتنع.
اوووووف.
الله كريم، باوعت ماكو أحد، لعد وين الباقين؟
مليكة من القهر ضغطها انطيتها علاج و اخذتها ترتاح و خالي اخذ سراج و طلع بي ما ادري وين.
باجر عندي دوام راح انام حتى مالي خلگ اداوم بس مجبورة.
دخلت الغرفتي
ذبيت حجابي مالي خلگ الشي هالخبر أثر على نفسيتي و على الكل اختنگت أكثر من ذكرت
ذاك اليوم من اجتني و تگلي اريد يصير عندي طفل بالنهاية ما نگول غير الله يعوضها و الحمدلله.
غياهب.
راحت حنين بعد ما ثولتنا هيَّ و أبنها هوَ يصرخ و هيَّ تصرخ مگروصين اثنينهم
الثاني يوم وگفت يم الشباك غرفتي أستغربت من إلى شفته واگفين ابوية و خالي
عمران وياهم اثنين شباب منو ذولة، نزلت لازمة ظهري ما ادري شبيه
واني گاضيتها بس نوم و كلشي گالتلي عليه الدكتورة دا أطبقه بنص الدرج و اتصل ارسلان وگفت فتحت خط عليه.
غياهب: هلا عيوني.
ارسلان: هلا بيج بعد عيوني شلونج.
الحمدلله و انتَ.
بخير. اتصلت علمود أذكرج اليوم موعدج ويا الدكتورة.
أي بيبي و بلغت بابا گال العصر أنروح.
خو ما تعبانة؟
زينة لا يضل بالك.
عزيزة عيوني هالله هالله بأكلج اكلي زين.
حاضر، اگلك ارسلان.
اممم
شگد باقي و تنزل؟
اسبوع.
اممم طولت
بس هالمرة لان شغلي كله تغيير
شلون يعني؟
اممم عوفي شغلي لا تشددين تركيزج بي لان تتعبين وانتِ ما فاهمته.
لا تنسى اني محامية.
ضحك بصوت و رجع گال.
هوَ لان محامية ما اريد اتعمق وياج بشغلي.
شلووون مُستفز.
هذا ياهوا انا؟
اي
أحبج و أحب صراحتج.
ترا ادري شغلك خطر و اخطر بعد من شغل درغام بس انتَ ماتحجي و ضارب الوضع تغليس من احد يسئلك.
صارت عصبية صارت.
ارسلان؟
احبج حبيبتي العبصية.
عبصية شنو؟
يعني عصبية.
اوف ارسلان اوف.
اخخ غياااهب اخخ.
لا تتعاير بيبي
شجاي اتسوين.
باوعت النفسي بعدني بنص الدرج.
غياهب: بنص الدرج.
اجاني صوته عاط.
ارسلان: شنووووو
شبيك ثواني أفهمك يعني اني جنت نازلة من غرفتي و انتَ اتصلت عليَّ.
و ما عرفتي تنزلين للاخير وتجاوبيني.
هسه شكو ضجت هاي راح انزل.
يلاا و على كيفج انزلي باية باية.
ضحكت بصمت سويت مثل ما يگلي و الجهاز على اذني الى ان كملت الدرج گعدت بالصالة خالتي بدوامها.
و هاي گعدنا.
اوف منج غياهب طلعتي شيب حتى براسي.
شمسوووية؟ شو ماخذ راحتكو تحجي عليَّ.
من عنادج و سوالفج.
ديلاا يلااا علساس سوالفك تنگط عسل.
طلع جبار.
غيا انتَ ما تخليني أحافظ على انوثتي.
سكت الثواني احسه مختنگ بضحكته ما ادري رجع گال و هوَ يتحمحم.
احبج حتى برجولتج يحيلي لا تهتمين.
اووي لا ديربالك اهتميت.
فوصة مو بيدج.
سولفنا الدقائق وسده لان عنده شغل، دخلوا ابوية و خالي سلمت على خالي ضرب بخفه على بيطني يشاقة.
عمران: هاي شنو الدعبولة.
غياهب: هههههههه بيها فصعون او فصعونة.
طبك حواجبه يباوع البطني.
بطنج مو مال فصعون واحد خالي.
باوعت النفسي ما جنت منتبها على كبرها ما ادري اذا هذا كبرها عادي.
او لا گعدوا رحت صبيت الهم عصير قدمته الهم گعدت يمهم و ذكرت إلى شفته فوگ.
غياهب: شفتكم واگفين برا و يمكم زلم منو ذوله؟
جاوبني ابوية.
سلطان: حماية.
حماية؟ الشنو و ليش؟
للاحتياط.
رفعت حاجبي اباوعلهم ما مقتنعة بالجواب.
بابا شنو گدامك طفلة و تضحك عليها بهذا الكلام.
عمران: حبيبتي خالو روتينات بسبب شغل درغام هم صاير شوية تعرقلات
و سوالف ف خلينا حماية للامان خاف يصير شي.
باوعت بوجوهم ما مقتنعة بالعذر بس سويت نفسي مقتنعة و طلعت من يمهم
استوقفني صوت ابوية و هوَ يحجي بصوت ناصي.
سلطان: زين سويت اذا تعرف ليش جبنه الحماية تدخل بدوامة خوف و قلق و هيَّ حامل.
طبكت حواجبي عن شنو يحجون يقيت واگفة اتأمل القط كلمة توصلني
الشي بس غيروا الموضوع و سدوا باب ذاك الموضوع.
للعصر جهزت نفسي طلعنا الدكتورتي ماطولنا لان حجز سوتلي الفحوصات.
الازمةو نفس كل مرة لازم تنتبهين النفسج و اكلي و كتبتلي فيتامينات.
الدكتورة: سويتي سونار؟
غياهب: لا بعدني انتظر زوجي يرجع من دوامه و أسوي.
اذا تحبين اعرفلج جنس الطفل.
صفنت بيها ذكرت لهفته بذاك اليوم من يريد يعرف جنس الطفل ما اريد اكسر هاللحظة ابتسمت بوجه الدكتورة.
لا انتظره ما يطول ذني الايام يجي.
اتشكرن منها و طلعت بابا واگف منتظرني سئلني طمنته، رجعنا للبيت خابرت.
ارسلان طمنته هم و شرحتله كلام الدكتورة. مر اسبوع و اليوم ينزل جهزت
اغراضي علمود اوصل قبله ارتب البيت و انظفه صارلي ايام متروك
طلعنا
اني و ابوية شايل جنطتي و الحماية واگفين بيتي گبال بيت أهلي كلش دخل الجنطة جوا باوع للبيت وايديه وره ظهره.
سلطان: شتگولين لو انظف وياج، هسه يا بابا لو گايله البارحة و جايبين خالتج ويانا.
غياهب: لا بابا شنو السالفة عادي.
ما هاين عليَّ تشتغلين وانتِ حامل.
قابل الحامل تگضيها بس نوم و اني هسه صرت زينة حتى نساتي احسن من قبل.
هايهية نظر عيني انا رايح محتاجة شي؟
سلامتك حبيبي.
ودعني و طلع باوعت للبيت مترب صاير صعدت الغرفتي حطيت الجنطة
بيها غيرت ملابسي رفعت شعري كباية و لبست طوك لميت شعري الواگع الزايد
بي، بديت تنظيف بالبيت بلشت بالجوا تنظيف و تنظيف ظهري صار يأذيني
لان حامل اتأخرت بتنظيفه لو ما حامل ساعة كافي اكمل كلشي.
حسيت بنفسي نعست حطيت مخدة جوا راسي على القنفة و نمت ارتاح
ما أدري شگد وأحس بأنفاس يم رگبتي طبكت حواجبي فتحت عيوني
بنعاس شفته گدامي گاعد بالگاع يم القنفة وجهه بوجهي.
غياهب: ارسلان؟
ارسلان: ياروحه.
گعدت فرحانة طايرة طايرة حضنته اشم بي شم و هوَ راسه برگبتي يسحب نفس منها.
أوفيش يا ريحة هلي.
أشتاقيتلك.
مو گدي ميت عليج.
اخذني جاعصني بحصنه و انب اضحك باوع للبيت جر انفي.
من التعب واضح نمتي.
شو تعبت بسرعة هاي ماسويت شي بس نظفت الصالة و تعبت.
هسه انظفه الج.
لا عاد ارسلان مو الهلدرجة تنظفلي حتى البيت.
لا الهلدرجة و نص تعاي تعاي بعدني ما شابع.
رجع حاضني و يتغزل دفعتع من صدره بخفه.
ما شبعت شنو؟
أكو واحد يشبع من هيج كيك.
حاوطت رقبته بايديَّ.
لا تصير منحرف زيادة ترا اني وحدة ما تحب الانحراف هواية.
شووف الجذب.
و النبي.
باسني بحنكي.
تموتين على الاكشن.
محهزتلك اكشن بعد الولادة بس خلي أولد اولاً.
ضحك و وگف.
خلي أغير ملابسي و انكلبلج موظف تنظيف.
ارتاح انتَ اني على كيفي انظف.
انچبي و اگعدي.
انتَ تدري كلمك انچبي أحلى من كلمة أحبچ
چاا انچبي ياروحي.
خوش خوش.
اخذ جنطته و صعد سحبت نفس براحة من وصلي بالسلامة گمت من مكاني شوية و نزل لابس تراك بيت رفع ردانه.
اي ست غياهب منين أبدي.
گتلك اني أسوي انتَ جاي تعبان من دوامك.
سحبني من ايدي ناحيته باسها.
انا رجال مشتاق أبوس و أحضن.
ايباااه.
بقى يغني و اني اضحك عضني بخدي يتأمل ملامحي بعيونه خجلت من نظراته درت وجهي.
احم. ارسلان خلي نكمل البيت قبل لا يصير الليل.
انا ما اتأثر تهي بهي.
استداريت ما فاهمته.
شنو؟
لا هيج.
تخوصرتله ايدي على خصرص عض شفته.
وللج انا شگايلج لا تتخوصرين گدامي هذا المكان بس ايدي تلزمه من حقي انا.
شتقصد عود من تگول ما اتأثر؟
هسه شكو منو يمج عمي انا رجال ما اندك بيج يمج كرباج تدورين الزلات عليَّ.
اني عرفت قصدك بس راح أغلس بس شووووف ترررا كل بنيه من تسمع كلام حلو و غزل تخجل اذا من شخص تحبه.
يعني قبل چنتي تتأثرين بكلامي.
لا، بس من حبيتك صرت اتأثر و كذا.
ينعللل بليسج.
رفع الماسحة ضرب رجلي على كيفه.
أمشييي منااا.
ضحكت بلشنا تنظيف و اكثر الشغل صار عليه اني بس الشي الخفيف اسوي و كل شوية حاچي و ذالني.
هاااي تاليتي اشتغل المررتي.
اهوووو ذليتني تررررا
اوي عيني ست غياهب شبيج نشاقة.
ضميت ضحكتي شلون يحچي و يقلد ما أكدر اضحك و اخرب الهيبة نوب
ينظف و يغني لو يبقى يتناكر ويايَّ ضجت بداخلي ماقابله يشتغل اكيد دوامهم متعب.
ارسلان: باجر اروح الاهلي تروحين ويايَّ؟
غياهب: اي.
هز براسه كملنا الشغل كله طلع البيت يلمع لمع هسه يلا ارتاحيت هف والله
اذا البيت وسخ احس نفسي حتى اني وسخة و تلعب نفسي، سبحنا
بعد ما كملنا گعدني بين رجليه يمشطلي شعري ذكرت السونار.
ارسلان
حيلي.
نگدر نشوف جنس البيبي.
صدگ؟ شوگت
شوگت ما تحب.
حچى بحماس فرحان.
چا باجر نروح.
غير انروح الاهلك باجر.
اي نأجلها على عكب باجر.
بكيفك عيوني.
اگلج غياهب.
عيني.
خلي أسويلج ظفاير.
لا ايععع ما احبهن من جنت صغيرة أكرهن.
والله حلوات غياهب شبيج انا خوش اسويهن.
لا بله اطلع شكلي شكل الشمر لعنة الله عليه.
غص بالضحك نهضت من مكاني ارفع بشعري و هوَ لا زال يضحك.
شبيك والله اكرهن ما حبهن يخرعن عليَّ شگد اكره من يگلولي سويهن
اسويهن الج ناصيات ها شگلتي.
يابه شتريد مني عوفني بحالي تفتر عليَّ بالكرون علمود تصيحلي ام كرون.
بس تصير عندي بنيه الا اسويلها موتي بقهرج.
عود انتَ و بنتك
شوگت تجي و تگلي بابا.
هسه انتَ تحجي بصيغة بنت يمكن يطلع ولد.
عادي المهم أتمام الخلقة بس اذا اجتني بنيه افرح اكثر.
اممم
وصيت على اكل هسه يوصل.
نزلنا و وصل الاكل ناكل و الحمدلله صرت احسن من قبل معدتي صارت تتقبل الاكل.
غياهب: هم تعرف بموضوع ذولة الحماية.
ارسلان: اممم.
دا احس خالي و ابوية جذبوا عليَّ لان سمعتهم يحجون من طلعت يگله همزين گتلها هيج لان راح تقلق اكثر.
يجوز يقصد عن السبب ماحچالج التفاصيل.
رجعت اكب و عيوني تراقبه.
الك علاقة بالموضوع هم؟
لا يابه شجابني انا.
دا اتجذب ارسلان.
يحجي بس ما يرفع عيونه بعيوني مثل ابوية من يضم شي عني مايحط عيونه
بعيوني و هاي لغة العيون نگدر نفهم من خلالها هواية شغلات.
شجذب شبيج بابا؟
عوفنا من أحساسي و العواطف احجي وياك بعقلي، عقلي يگول الك دخل بالموضوع هم لعد ابويك شكو مخلي الحماية بين بيته وبيتنا و هوَ اتقاعد من فترة.
شبيج غياهب؟
دا اتجذبون عليَّ و ضامين شي أكبر من إلى حچيتوا.
گام من الاكل صحت وراه شايطة بأعصابي.
غياهب: ارسسسلااان؟
دار وجهه خازرني لان عليت صوتي بهل الطريقة.
ارسلان: صوتج غياهب.
حچيت بهدوء و الغصة صارت بلعومي.
لعد احچيلي شنو إلى ضامينا؟
ما ضامين شي.
لااااا ضامين.
هايهية ابقي بهذا تفكيرج.
عافني و طلع والله ادري بيهم ديضمون شي و ما يريدون يحجون النا لميت
الاكل و ضميت الزاد بالثلاجة غسلت گعدت بالصالة اكلب بالتلفزيون
و هوَ بعده برا، رجع لليبيت باوعتله بطرف عيني خشمه صاير احمر من البرد كعد بصفي.
ارسلان: غياهب.
غياهب: نعم.
لا اتسوين هيج
ليش شمسوية؟ مسوية شي و اني ما ادري.
أوف منج راسج يابس.
حطيت الريموت بصفه.
رايحة انام.
عفته صعدت انام طلعت بطانية ثانية اني اعلمك ارسلان تضم عني و ما
تحجي تمددت و تغطيت ببطانية وحدي لفيت روحي لف خاف يتغطى ويايَّ
غمضت عيوني اجبرهن يغفن بس ما گدرت، دزتلي حنين صور للحسن
جديدة و گاتبتلي جوا شوفي الجمال العراقي الاصلي.
ضحكت كتبتلها.
الله يحفظه الج.
بسرعة ردت.
حنين: اريد اسوي جلسة تصوير انس وياه و ابوه بس ما اعرف عند منو اريد واحد تصويرك فخم.
غياهب: هواية موجودين بس راح ادزلج حساب بنيه اعرفها و شوفي الصور إلى عندها ناشرتهن بحسابها.
دزي بساع.
رحت طلعت حساب البنيه و دزيته الها، رجعت الجهاز المكانه و هذا بعده ما
صاعد طنكرت اكثر من شفت يدة الباب تحركت غمضت عيوني امثل النوم اسمع صوته گال.
يا حَبيبي ربحنا.
اتمدد بصفي گام يسحب ببطانيتي و اني لازمتها بقوا گدر يسحبها
ودحس روحه ويايَّ بنفس البطانية فتحت عيوني.
موووو عندك بطانية.
ما حبيتها بطانيتج احلى.
اي خوش بس وخر هيج لا تلزگ بيَّ.
نتصالح؟
لا.
ليش.
اسئل نفسك هذا السؤال.
تجين بحضني؟
لااا.
اجي انا معناها.
هم لا.
شكل البريك.
گوم أطلع من بطانيتي.
لووو نتمالخ هم ما اطلع.
تعررررف بنفسك فددددد واحدددد لزززززگة.
اي والله صح كلامج بس وياج لززگة هيج، رب الشردتي اللبنان و بقيت لازگ بيج تريدين هسه ما الزگ.
أووووف ارسسلان أووووف.
سحبني الحضنه مقيدني بايديه.
ارسلان: شلون بينا بهل الشراسة احنا.
ارسلان والله زعلانة منك.
أنعللل ابوي بس مو حسين لا فارق، ليش زعلانة.
ليش ما تحچيلي سبب هالحماية.
راح ينشغل بالج و انا مارايد هذا الشي.
علساس هسه ما راح ينشغل بالي.
هسه عوفينه من هذا الموضوع يجي وگته و أحجيلج.
ضربته بعكس أيدي ببطنه.
لعدددد راح أبقى زعلانة لحدد ماتحجيلي.
بقى يحاول و يريد يراضيني بس قفلت و ما قبلت بأي محاولة و كل هذا المدافر
الي صار و هو جاعصني بحضنه بالاخير أيس گال.
ارسلان: المهم بحضني راح انام مرتاح.
درت وجهي عليه و هوَ مغمض عيونه رغم زعلي القوي بس ما اتراجعت
استنشق عطره قربت انفي الرگبته اشم بيها گرصني بخصري.
لا تتحرشين بنت سلطان.
منو ميت عليك بس هاي نساوتي عليك.
هااا خوش.
رفعت ايدي امشيها على خده بهدوء صارت شبه ابتسامة على ثغره.
هاي نساوتي مو اني
اي اييي ادري بيج.
باوعت الاظافري الاطوال غرستهن بخفة برگبته اجت ابالي فكرة قذرة بي
والله الا اسويها حركت راسي بقرب منه باوعتله مغمض عيونه ابتسمت.
بخبث اتقربت اكثر غرست اسناني برگبته عضيته لزم ايدي دفعني صار فوگاي خازرني رگبته صار بيها أثر.
ارسلان: صاااايرة وكحة غياااهب.
غياهب: أنتقم منك.
أهااا و شمسويلج.
لان ما تحجيلي.
اممم.
بعد شعري عن رقبتي و اتقرب إلى حط وجهه بوجهي و هوَ يگول.
شنو رأيج أسوي بيج مثل ما سويتي بيَّ.
أموووتك.
لا ما ايصير لازم اخذ انتقامي.
خووووب انتَ تموووت على الانتقامات هوَ زواجنا صاررر بسبب انتقام.
دفن راسه برقبتي بگت هوا بس لا صدگ يسويها مثل ما سويت بي.
لا تتخبل ارسلان.
بعدني ما امسوي شي ترا.
حرك انفه بملمس جلدي.
وخررررر.
ترا انتِ عضيتيني.
بكيفييي
شوف الصلافة.
طبع بوسة خفيفة ورفع راسه عيونه ذبلانة.
ما اگدر أذيج.
أييي عفية يلا خلي انام.
أنام بحضنج يُمة؟
بلعت ربگ و جسمي ما ادري شصارله من سمعت جملته ما انتظر جواب مني فتح ايدي حط راسه عليها.
ارسلان: أقريلي قصيدة يريح الهاب مثل ذاك اليوم نمت مرتاح.
ماحچيت شي بلشت اقراها اله الى ان ثكلت انفاسه عرفته نام باوعتله امشية اصبعي فوگ حاجبه همست بكلامي.
غياهب: لعد شگد مستفقد حنان الام بحياتك بحيث توصل مرحلة تگلي يُمة.
غمضت عيوني، للصبح حجزنا يم سونار و العصر طلعنا انشوف شنو اللي ببطني
و اني مطنكرة من البارحة بس من شفت حماسة و ابتسامته متحمس
يعرف ابتسم دخلنا للدكتورة و هوَ دخل ويايَّ بلشت الدكتورة بشغلها و هوَ واگف يمي.
الدكتورة: انتِ ماخذه قبل سونار؟
غياهب: لا عيوني.
هزت براسها بقت تمشي بالجهاز على بطني ابتسمت.
ما شاء الله.
شنو دكتورة؟
باوعت الارسلان إلى تحسه گاعد على نار بس يريد يعرف ورجعت تباوعلي.
الف مبروك جايّكم توأم و بنات هم.
رمشت بثكل من كلامها توأم مرة وحدة؟ و ارسلان انرسمت ابتسامة السعادة
علي وجهه مسح جبينه يضحك ما مصدگ.
ارسلان: صدگ دكتورة؟ يعني انا جايني بنات توأم.
اي والله شوف.
درت براسي اباوع وياهم صدگ ذني توأم ضحكت و عيوني انملت بدموعي و فرحتي الي
مافرحت هيج فرحة من سنين طويلة، اتشكرنا منهت طلعنا نمشي اثنينا نضحك فرحانين
بالسعادة إلى جايتنا دانعيش نفس الشعور رفعني شايلني يفر بيَّ و الناس تباوعلنا تضحك خجلت من نظراتهم.
غياهب: ارسلان نزلني شوف الناس عيب شوف شلون تباوعلنا.
ارسلان: ما يهمني والله ما اهتم وللج غيااهب فرحتي هااي لو ادفع عمررري كله.
ما انطيهااا غياهب بنات اثنين جنت رايد وحدة بس رب العالمين رزقني باثنين احبج وروح العزاز احبج و ميت بيج.
نزلني الگاع كلشي بملامحه فرحة اباوع لعيونه لمعن بدموعهن من شافني صفنت
بي و عيوني مدمعة مسح وجهه يضحك.
ارسلان: فرح. دموع فرح والله انا اول مرة بحياتي هيج افرح و ما اتمنى هالفرحة يخلص شعورها.
ابتسمت لازمة ايده اتوجهنا السيارتي إلى اجينا بيها لان بعده ما مشتري.
سيارة گال هاي الايام ياخذ وحدة جديد، ايد بايد نمشي وصلنا للسيارة دانصعد
بس استوقفنا شي غريب ورقة باللون الابيض محطوطة على السيارة لزمتها
بايدي مبتسمة رفعت عيوني اله عيونه بالورقة يباوعلها بأستغراب لكن
الثواني انسحبت مني الورقة و اختفت ابتسامتي.