رواية لبوة علي للكاتبة كفاية كاظم الفصل الحادي والعشرون

رواية لبوة علي للكاتبة كفاية كاظم الفصل الحادي والعشرون

زينة...
احلى ارتباط هو ارتباط الروح من تلگة شخص نفس طبعك ونفس تفكيرك تحسة جزء من عندك اليوم تأكد من مقولة نصي الثاني...
فعلا الإنسان يكون نص ناقص مشاركة الأفكار والكلام لشخص يشبها جنت استهزء بهذا الكلام ودائما جنت اكول أنت مو نص...
لكن اليوم اختلف تفكيري جذريا وامنت بالمقولة...
طلعنة نسوي جلسة تصوير ومناك نرجع للبيت الكل بستقبالنة...
وصلنا المكان كولش حلو الخضار والورد وصوت البلابل مالي المكان...

بدينة بالجلسة جنت لابسة قفطان مغربي ابيض وايت بيه حزام ذهبي وردن عريضة من جوة داريها ذهبي كولش عجبني تصميمها وعلاء لابس دشداشه بيضة وجراوية بيضة بيها سور ذهبي غامق لافهة بطريقة كولش حلوة ونازكة...
كملنة الجلسة بالف يا على علاء ماخلة سالفة ماحجاها موتني ضحك بلكوة خلصتها الحلو بيه دمة حتى نسيت الخجل عود عروس يكول صارلنة قرن مزوجين...
اخذاني من ايدي ويمشي بيه صايرة لزگ بيه يكول راح اشرد همس بمرح...

علاء: -ها زوينة شلونج اليوم
زينة: -حجيت عاقدة حواجبي شتوقصد
علاء: -مااقصد شي
زينة: -دمغني على راسي وكال
علاء: -صفي نيتج زوينة
زينة: -هلو هلو هاي شنو هاي دار وجهة يتلفت
علاء: -شني هاي شكو ولج
زينة: -گرصتة من زندة شو تكولي زوينة عود بعدنه أول يوم بس يصير شهر شتصيحلي جبار ابو المولدة
حضني من جتفي وحجة
علاء: -بكيفي زينة زوينة زنزن بس اكلج شو ما يلوكن مو مثل زوينة هيج تحسين روحج مرة من صدك.

زينة: -عقجت حواجبي ولزمته من دشداشتة شقصدج اني مو مرة...
علاء: اكيد لا
زينة: -فتحت عيوني بصدمه يااا شنو مو مرة
حجة وهو يضحك
علاء: -جا مجذب عليج شوفي المرة عدها دزن مال جهال وعبايتها تسحل وراها وشعرها طالع من الحجاب وجهالة يتعاركون واحد يجر بثوبها والثاني بعبايتها والثاني يملص انعالها يكتل بيه إخوة...
أما البنية تصير حلوة ونازكة وعدها طفل واحد ومسميتة يزن...

زينة: -انت وين لاكي هاي الكلاوات البنية يعني مامزوجة والمرة مزوجة
علاء: -هاا ها بدينة من هسة تكسرين كلمتي شوفي ترى اني كلمتي ما بصير تنتين من اكلج البن اسود كولي اسود خوش...
زينة: -ههه مو خوش بس رحمة لجدك لا تصير علية ابو شهاب من اليوم...
علاء: -هاي شنب هم انتي متابعتة...
زينة: -اي والله يخبل وصلت لخيرية من انفسخت خطبتها
علاء: -انتي وين جا اني وصلت لابو عصام من طلگ سعاد.

زينة: -يمة كافي صار بيها طلاگ بدل المسلسل
علاء: -هههه خوش نعيده اني وياك ضلعي
زينة: -ضربته على جتفة لا تكول ضلعي
علاء: -هسة المثلي غاركين بالعسل وانتي تحجين بابو شهاب انتي صدك بدون احساس ماعندج لا ذمة ولا ضمير
زينة: -ياا هو منو البدة اني لو انت وعلساس الييسمعك يكول البارحة لف راسة وانام خطية شو خلفلة على اذان الفجر خلصني من عندك...
علاء: -بربوگ طلعت مو زين...
زينة: -لاتغلط.

علاء: -ترى هاي مو غلطة بالعكس مدح وإذا ماتصدكين ابحثي وشوفي...
زينة: -اممم نشوف.
علاء: -تشوفين و هسة شلون اريد بوسة
زينة: -لا لا يمعود ينشرونة على التكتوك ننشهر شهيرة
علاء: -مافكرت بيها بس عفية عليج اريدج دوم هيج ذكية...
زينة: -من يوم يومي ذكية و لو اني ما ذكية ماصرت دكتورة
علاء: -دمشي دكتورة جا أنة هين
زينة: -لا وين هين تاج وباج ملازم علاء الذهب
علاء: -اكرطج كرط هم زينة وهم خزينة ههههه.

زينة: -خل نرجع للبيت عيب من أهلك
علاء: -خاب شني عيب غير مرتي والاسبوع الجاي نروح شهر عسل...
زينة: -ههههه شهر عسل اكولك نبقى شهر مو
علاء: -لا سبوع سبوعين مانطوني إجازة شهر ولد
بس صدك اريد عسل مو تسوينة شهر بصل...
زينة: -هههه ادلل من عيوني...
رجعنة للبيت باركولنة احس وجهي يبعث حرارة اخواتة موجودات ومرت إخوة كولهن حبابات ودمهن خفيف يشاقن نفس علاء بالضبط...

أخذني على غرفتي وهو طلع للاستقبال يباركوله دخلني البنات لغرفتي ماشاء الله الذوق يجنن الغرفة إيطالية...
بقن البنات يدلني على مكان الغراض والملابس شوية وصاحت عمتي انزل...
نزلت وي البنات أجن نسوان يباركن ومنا واستلم ناس تروح ناس ترجع الساني طاح شكد ناس...

غزل...
فرغت طاقتي بالعرس وطلعت كل مواهبي بالركص
زينة وعلاء ثنائي يخبل كولش متراهمين لبعض...
رحنه للزفة وياهم بسيارة حيدر وجلال صعد بالصدر
بس شنو لعب لعب نزل بنص الشارع ويهز...
الجو صار يخبل والشارع متروس شخصيات تعال وستنگة من طلعنة امي كل شوية وصاحت بيه راسج نزلية هو أنني شمسوية بس اباوع اسد عيوني قابل.
وصلنة العرسان للفندق ورجعنة حيدر شخط السيارة مااشوف الا جلال يركض ورانة ويصيح...

وكف حيدر السيارة وهو اجة فحطان كوه يجر النفس طاحلة بذيج الرزايل بعدين انتبة النه ستحة وحيدر جراة بسالفة...
طبعاً جلال فد واحد كل اسلوب ماعندة لحد الان اتذكر من سطرني أن شاء الله سطرك العباس حتى وجهي يبقى يوجعني من اتذكر ذاك اليوم...
حقير باي حق يضربني كسر بايدة كون لاجذب خطية...
وصلنة للبيت ولليل اجت أزل وجهة اصفر تكضينهة من خشمها تطيح حجينة وياها كالت تعبانة جنت اقرا عاد عفناها براحتها...

رحت بدلت وفتحت الانستا شفت الستوريات كلها مخبوصة بالعرس...
دخلت اشوف استوريات المگموع صورة ماشاء الله اليشوفة يحوفة ماخذ كدام مراية مدري شنو المهم على طول جسمة مخلي الموبايل على وجهة ورافع حاجبة...
واحد مسويلة تاك ورادة مصورة يركص بالشارع وكاتبلة العريس مافرحان مثلك لو ماخذك الواهس راد علية افرح لبن العم تحتاج ايامة...

وهواي ناشر ريلز هو وعلاء ماخذين سوة وصورة لخ حيدر وياهم بس ماطالع وجهة بس دخان نافخة مامبين شكلة وناشر مقاطع دخلت على التعليقات يبووو كلة بنات.
فتحت عيوني شهل جرأة وهيج يحجن وحدة كاتبة اروح فدوة لهل طول وحده كاتبة راح اعوف رجلي من وراك وذني المسويات رواحتهن متدينات كله يحفضك الله منور وحدة كاتبة هنيالها للعروس لو اني ماخلية يطلع سالم وحدة كاتبة هذا اليدخن سحلني سحل مئة ناقة اليجيب رقمة...

راده عليها وحدة لا عوفيه إلى حبيتة مبين غامض احب هيج شخصيات يمة تعجبت خلال ساعة آلاف الاعجابات والتعليقات بالخمسمية شنو السالفة...
هاي شبيها البنات رجعت اعيد الريلز وينة على حورة
شو ازرگ محترگ حراگ ياريت ابيض ومنفوخ نفخ صدوك ذوق ماكو...
راسلت صديقتي شوية نمت ميتة تعب گعدت الصبح متأخرة لگيت أزل تسوي ريوگ بقيت اكلب بالموبايل مااحس الاطبة درت وجهي شفت أزل وكعت...

بقيت اضرب بيها ماكو رحت صحت امي حيدر ماموجود بالدوام خابرت ابن خالي...
شوية واجة هو وامة وزهراء وفاطمة أخذوها وهنا بقن يمي واني ميتة خوف هاي ثاني مرة توكع...
ابجي والبنات يسكتن بية منا لمن امي اتصلت طمنتنه عليها كالت نتأخر احتمال نجي وي الغدة...
.
رحت حضرت الغدة اني وبنات خالي ورة الاذان اجو خطية وجهة اصفر والكانونة بيدها حالتها حالة...
تحمدت الها بلسلامة ورحت سويت نصبت الغدة...

خطية بالگوة تاكل طلع عدها هبوط بالضغط وفقر دم عاد هي شلونها بالاكل...

لبوة...
كيف لهذا الروح أن تبقى على قيد الحياة وكل هذا الالم متواجد فيها كم تعبت كم شكت كم بكت لماذا كل هذا الصمود لم اعد اعرف شي...
دخلت للغرفة اطلعلي ملابس كمت اشوف نار محاوطتني صحت بصوت عالي طفونييي احتركتتت
وكعت من طولي واني اشوفها تجي بصوبي بقيت ازحف ادورلي على مكان اختل بية...

وضعي تلخبط انفاسي تضارب جسمي يفح حرارة وارجف خليت ادية على وجهي واني اصرخ علييي علييي طلعنييي راح اموتتت احتركتتت...
المكان يلهب لهب حسيت بغواش على عيوني مكدرت افتحهن انعدمت عندي الروية بس احس بحرارة جسمي ومنظر النار مرسخ بعقلي كمت مااحس بشي بس حرارة محاوطتني...
احس بوجودة اي هذا هو على اجاني ابوي اجة ههه مستحيل يعوفني...
هادئة هدوئي مشكلة اريد اسولفلة على النار الحركوني بيها بس مكدرت...

حسيت بلمساتة الحنونة على شعري من بعدها اختفى حسيت برودة عكس الحرارة الجانت تمشي بجسمي فتحت عيوني برعب واني ادور ع النار...
وين صارت طفت لزمت راسي اضغط علية قبل شوية جانت هنا نار رادت تحرگني اباوع بالبيت مابية اثر حرق...
گمت افرك بعيوني واني افتر بالبيت ماكو شي والنار اي احتركت اني شفتها تريد تحرگني وينها قبل شويه جانت محاوطتني حتى جسمي حار من أثرها...

گعدت بالگاع وحطيت راسي بين رجليه دموعي نزلت بدون انذار مسبق...
ياربي اني ليش هيج ليش شمسوية واستحق كل هالعذاب معقولة تخبلت رسمي لا اني ماتخبلت هما اي هما حاولوا يخبلوني...
رجعت بيه الذكريات...
نار محاوطتني اكلت الاخضر واليابس اشوفها بعيوني تاكل كولشي يطلع بوجها اكيد تاكلني اني هم لزگت بالحايط ردتة يحميني منها حسيت نفسي راح اموع من كثر اللهب أصيح محد يسمعني صوت راح...

حريق بدون سبب فتحت عيوني لگيت روحي بنص النار...
أصيح بعلو صوتي محد بحالي كلمن حاير بروحة من كثر الخوف اغمى علية وماحسيت بشي بس حرارة. لفحتني مثل تنين يفح نار...
فتحت عيوني بين الحلم والواقع لكيت زمرد تمسد بشعري وتبجي اباوع لروحي ايدي ملفوفة ورجلي تصل علية اي هاي الحقيقة تعرضتلها من جنت طفلة...

ليش ينعاد هذا الموقف وكانو جاي أمر بية تعبت واني اشوف نفسي تحترك ويغمى علية بسبب هذا الحادث شسوي حتى اخلص راح اهلك وعقلي يتخيل هذا اليوم ينعاد وأمر بنفس الخوف...
راجعت أطباء كثير ماارتاحيت لواحد منهم ولا تحسن وضعي شوية هو هو من سولفت للدكتورة هالشي ردت حل هاي مو اول مرة اشوف النار تحركني مرات افز من النوم على إثر حريق جسمي حار اروح بوجهي للحمام...

حالات متعددة روح تعبانة محد يفهم البيها كل مرة أصيح باسمة اريد اعاتبة اريد اشكي احجي ابجي
تعبت هذا مو وضع...
مسحت وجهي بثنين اديه الترجف مو خلصت صار فترة كولش طويلة ماشايفة النار لابحلم ولا بحقيقة
شرجعاني الها...
اخذت ملابس بيدين ترجف وعقل على حافة الجنون اي مرات احس نفسي مو طبيعية ليش هيج يصير وياي...
سبحت لبست بشت اسود وشالة اخذت جنطة واحتياجاتي وطلعت من البيت اسحل بروحي وين رايحة بهل وقت...

رايحة اشوفة صار الوقت اعاتبة واسولفلة كولشي لا دكتور ولا دكتورة افتهمت سالفتي بس هو اكيد يفتهمني ويفتهم وضعي...
طلعت والجو حلو هوة بارد يلفحني كرهت روحي واني أحلل حالتي وافسر الاشياء التصير وياي كلها حقيقيه زين ليش تنعاد واعيشها من جديد مو انتهت مو تعذبت مرة ليش مكتوبلي اعيشهن للمرة الألف...
اخذت تكسي ذبتني بالكراج...

اصوات عالية المكان ضجة ناس تروح ناس ترجع ناس تصيح بغداد طالع ناس تصيح كربلاء طالع ناس تصيح السماوة...
سيارات مالية المكان ناس تدخل كل شخص يمشي باتجاة واني واگفة بنص الطريق واترقب بهدوء وين اريد اروح نبض گلبي بلهفة من سمع نجف طالع...

رحت اسحل بروحي وكفت گدام منشئة عالية اخذت صفنة بيها ناس كبار اطفال شباب فززني صوت خشن درت وجهي رجال وسط اشر بيدة نجف تروحين هزيت براسي وصعدت ادور على مكان مناسب هواي عوائل وناس تعرف ناس اكو حجية كاعدة وحدها بالطرف دخلت كعدت يمها
علي الجامة...
اباوع لايدي الشرايين بارزة تريد تطلع من مكانها بقيت العب بيهن حجت الحجية وياي...
يمة انتي جاية وحيدتج
هزيت براسي حجت وهي تعدل بشيلتها السودة صايرة حمرة...

سودة عليه شعجب لااخي لاام لا رجل وياج.
انخفض نفسي وعيوني غوشن حجيت بغصة رايحتلهم هاي اول مره اروح الهم كلهم هناك بس اني وحدي عايفيني راح الحگهم...
درت وجهي امسح بعيوني روحتهم ذلتني مرمرتني خلت روحتي مجروحة...
انطلقت المنشئة حطيت الهتفون بذني...
.
شخص واحد ماعافني بحزني ابد ولامرة تعرفون منو هذا الشخص باسم الكربلائي هههه تصدگون احسة وياي دائما وابدا اي بس هو يداوي جرحي بكلماتة التهز المشاعر...

مسافات تخطي أزقة نعبر واني احسب خطوة خطوة سؤال يطرح نفسه شوكت نوصل...
الكل نام الظلام خيم على المكان نمر بازقة ضلمة فارغة بقيت اعد مسافات وامتار لاكتني قطعة مكتوب بيها النجف ترحب بكم اكيد ترحب بينة شخلت النة بعد شكو غالي النة نايم بيها...

واخيرا وكفت المنشئة وصلنة اي هنا هما راح اشوفهم نزلت الركاب وأحد ورة اللخ هذا الشايل طفلة هذا الازم ايد مرتة ذولي الجايين جماعة بس اني وحدي لااا مو بس اني اي اكو واحد ثاني جاي وحدة الحجية محد وياها...
نزلت وهي تمشي على عكازتها وحيده فريدة الحزن مغيم على ملامحها.

مشيت وحدي بنص الكراج الدنيا ضلمة ماعرف منين اروح ومنين اطلع الكل تطشر بلحظة بقت بس الحجية تمشي بطء مشيت وراها اريد اطلع منا فجأة وكفت واني هم وكفت دارت وجهة علية واشرتلي بعكازتها وهي تكول.
شمالج تمشين وراي يحبوبة تعاي امشي بصفي
رحت يمها ومشينة سوة هي ساكتة محجت شي بس حزت بروحي هي هم مثلي ماعدها أحد وجاية وحدها الأسئلة تقهر وخصوصا اذا نعرف الجواب...

رافقتها لمن طلعنة من الكراج وصلنة قريب ع المقبرة الدنيا الفجر اخذتني بخطواتها لحسينة أشرت إلى للمغاسل وراها رحت توضيت وصليت اني وياها سلمت وكالت اتوكلي بالله يحبوبة روحي شوفي ناسج.
حسيت بوحدة من كالت كلمتها تقربت منها اخذت راسها ودموعي نزلن حجيت بغصة مودعة بالله حجية...

درت وجهي ومشيت عندي العناوين كلها بس ماعرف منين امشي واني ماجاية قبل سالت ولد عندة ستوتة كال اصعدي اني اوصلج صعدت وراة مشينة مسافة وكف وكال وصلتي...
حسيت كلبي يريد يطلع من صدري هنا هما قريبين وصلت الهم بقيت أتلفت بالمكان ماكو ناس وينهم بس قبور أتلفت صور شباب بعمر الورد شافو من حياتهم...

لافتات مكتوب بيها الشهيد الفلاني وأعمارهم صغيرة بس صورهم مبتسمين وهما لابسين زي الشرف وبنادقهم على جتفهم منضر لا ارادي يخليك تنقهر...
اشتريت دبات مي غسلت قبورهم المخيم عليها التراب ليش مو المفروض ورد مزروع مايستاهلون...
عجيب هالموت ماخذ من جميع الأعمار اطفال شباب شياب المكان بيه الف عبرة...

ماكو فرق بين غني وفقير كلهم نفس التراب مشيت ادور عليهم والسواد غطة روحي من اسمع صريخ الأمهات طفل يحاجي ابوة ليش هو بقى ابو يرد علية...
تعبت واني ادور بين القبور نزلن دموعي بغزارة ليش ماتريدوني حتى من اجيت ماترحبون بيه ليش اني مو بتكم...
عيوني غوشت امسحن ويرجعن ينملن من جديد امشي واتلفت وكعت على اركبي ادية استدنت بقبر كلة تراب...

رفعت راسي صورة هدمت حيلي وكسرت روحي من شفت صورتة القديمة أي هذا على بوية أي هو بشكلة القديم...
ليش مو المفروض يستقبلني مو اني جايتة خطار ولازم يرحب بيه مو جنت متخيلة يجي يوم ويرجع واجلب برگبتة واسولفلة شصار بغيبتة...
امالي تحطمن وصارن خراب جنت عايشة على أمل اشوفة...
حجيت واني امسح بقبره ودموعي تصب دمع.

اكعد بوية اجيتك اني لبوة اكعد شوفني انت تحب تشوف شكلي كوم على كوم شوفني اجيتك رحب بية افتحلي حضنك لمني بيه الدنيا باردة كوم شوف وحيدتك محتاجتك انكسرت بروحتك كوملي بس احضني مااريد شي تعبت على تعبتني شوفني كوم...
شوف اني كبرت وصرت دكتورة أنت مو كلت اجيج ما اجيت وينك ما شفتني وأني لابسة الابيض ماشفت لبوتك على يابوية هديت حيلي...

تدري اني كل يوم انتضرك كل يوم من رحت ولجاي عبالي تجي جانو يكولون مات كافي انتي خبلة واني ارد عليهم لا انتم تجذبون ما ميت هسة يجي هو كال...
انتضرتك بعز الشتة بوقت كلمن كاعد مدفي بالصوبة واهلة محاوطينة واني البرد محاوطني انتضرتك و الشمس حركتني واني مامليت يوم ولا إيست جان عندي امل تجيني ماتعوفني وحدي...
مريت بهواي اشياء اهلك ما رحموني حركوني بنارهم حرك...

كوم بوية كوم جيتك يلب الكلب جيتك كوم لاتردني خليني يمك مااريد اروح الناس ماترحم محد حبني ودللني مثلك كوم اريد العب وياك ترة بعدني طفلة ماكبرت...
سولفلي قصة اريد اسمع صوتك قصصك بالي مانسيتهن تدري بيه لا ماتدري متت والله متت الف مرة وارجع اعيش لخاطرك...
عاتبت ملك الموت وتوسلت بيه يرجع بس ماقبل ردت اموت وراك بس مااخذني عافاني ومشة حاجية وياك خل ياخذني اريد اجي يمك.

رفعت راسي واني اباوع بصورته انكسرت روحي كمت على طولي واني امشي اصبعي على ملامحة المطبوعة بعقلي...
تدري حتى صورة الك ماعندي بس مانسيت شكلك مانسيت انفاسك ياعلي كسرتني تدري إيلام إيلام روحي راح اعوفة وامشي راح اعوف روحي وراي شفت ليا مرحلة وصلت...
كل هذا الكلام والعتاب لايوجد رد فقط هدوء يدب في وسط المكان...
دموعي من كثر ما هلن غسلن تراب قبرة عتابي ماخلص ولا راح يخلص...

التفت غمضت عيوني عساني مافتحتهن وشفت هذا المنضر قبر بالجهة اليمني مكتوب المرحمة اي هاي امي راح اعاتبج مو بس على إلى علية حق انتي هم...
ذبيت روحي على قبرها واني انحب يمة قبرج بارد كومي دفيني بردت كومني كافي نوم ماشفتيني ولا شفتج وشبعت منج كومي اريد ارجع للبيت الكاج كدامي تلاكيني وتكليلي هلا بيج اجيتي شو تعبانة اسويلج غدة...

ليش ادخل البيت مالگة واحد محد يتلكاني تدرين البنية محتاجة امها بكل شي تحتاج نصيحتها حضنها حنيتها...
عفتيني بيد سعاد تدرين شسوت بيه شلون تقبليها على روحج نايمة وعايفة بتج بيد الناس واحد يضب والثاني يرخي شلون ينطيج گلبج اني مو بتج ما تگولين تحتاجني حتى بحلم مامريتي بيه...

العتاب مايخلص الوجع يزيد رفعت راسي من قبرها طخت ايدي بقبر صاير فاصلة كلش صغير شهگت بقهر طفل اي هذا اخوي إيلام هههه إيلام حتى سميت فرسي على اسمك ردت يصيرلي اخو...
حجيت واني امسد بقبرة...
تدري لو انت موجود هسه جان دللتك ماخليت مخلوق يحاجيك...
اوديك للمدرسة بيدي ادرسك اخليك بروحي تدري اني محد إلى جان ضليت سند لأختك تقبلها محد إلى يكسر روحي من اجاوبهم ماعندي أحد...

جان بقيت إلى سند من يميل بيه الوقت استند علية جنك تدري بالدنيا ماترحم حقك يخوي بس والله مادام اني موجوده مااخلي واحد يمسك عاد اتشجع بيك كدام الناس...
بس احسن الك مشيت وانتة ماشايف شي...
كمت على حيلي واني اباوعلهم شلون مصفطين منا ابوي ومنا امي وأخوي بنصهم عمري كلة ماتصورت هالمشهد...
صفيت وحيده حتى الامل الجان عايش وياي من سنين اليوم عافاني وراح اليوم تشيع...

غسلت قبورهم ورجعت على كسرة روحي غسلت قبرة بدموعي...
ياعلي يابوية اريد انام يمك سويلي مجال حضنت قبره برودة القبر تعاكس حرارة روحي غمضت عيوني وشهگاتي مسموعة غفيت واني اتخيل روحي بحضنة...
احلامي تشيعن اليوم الامل الربيتة وداريته من سنين اليوم شيعتة كولشي مزعج صار بالنسبة إلى حتى الشمس غثتني...

كعدت احس راسي كتلة من النار الشمس فرغت حرارتها بية مااعرف شكد نمت كعدت مسطورة قريت الهم قرآن صوتي كوة يطلع ختمت جزء الهم من القرآن وقريت الهم زيارة عاشوراء...
باوعت للساعة بالعشرة وربع تنهدت بقهر اكيد المنشئة عافتني لأن الوقت تأخر بست قبورهم بدي مااعوفهم بس كولشي آلة نهاية وهاي نهاية امالي خلص وقتها...
ودعتهم بدموعي وطلبت منهم يدعولي ويتم سفري على خير توجهت للامام على (ع)...

خطوات عاثرة روح مهزومة حزن ضاهر حياة مابيهة طعم شريد احصل أكثر من هيج...
مشيت احس بنكساري احس الناس كلها درت بيها مكسورة دخلت للسوگ شكد ناس عوائل المة حلوة دعيت الله يحفصهم من كل مكروة...
واني الوحيدة التمشة بين الناس لاگتني قبة الامام الها هيبة دموعي وحدهن نزلن ردت اوصل اله بأقل وقت...
وصلت ضريحة جلبت بية بقوتي ودموعي تشكي عن البداخلي اليوم اني صرت يتيمة اليوم حسيت باليتم...

يا حيدر الكرار يا داحي الباب يتيمة ماعندي أحد بهاي الدنيا الجبيرة بس انت وكفاتك ما انساها
ياعلي عفت يمك اماني دير بالك عليها عفت يمك على راح اروح ويضل بامانتك...
طلعت وعيوني تهل دمع عفية عيون مايخلص دمعها
الجو برد كل ساعة شكل مددت بصحن الامام وغفيت...

امشي بطريق اضلم وحدي المكان يخوف بس ماهتميت بقيت مستمرة امشي اسمع شخص يصيح وراي بس بعيد ماالتفت اله ابد استمريت بهذا الدرب الاضلم فجأة وكعت وي وكعتي صحت يا اسد الزهرة...
احس بشخص جلب بية ماخلاني اوكع كال الزمي بية وما توكعين درت وجهي اله بخوف صحت بيه انت منو جان شاب بس ملامحة ماتبين رد بهدوء ما اذيج ابد بس الزمي بيه ماحسيت الا انرفعت...
كعدت مخروعة واني اباوع اني وين...

أدركت اني بالامام تنفست بأريحية تأخر الوقت لازم ارجع للبصرة طلعت من الامام ماادري بعد ارجعلة لو هاي اخر مرة...
واني جاي امشي اكو بنية شابة جانت واگفة وحدها من شافتني اجتني وجهة اصفر باين الخوف عليها حجت وهي تعصر بديها...
يبنية اني ضعت من اهلي مااعرف وين صارو ابقي وياي على مايجون اهلج...
غصة بلعومي ماخلتني انطق مسحت وجهي بعكس ايدي اشرتلها براسي...

وين اهلي عفتهم نايمين برملة على حجيت شكد وياهم ردت بس اسمع كلمة ماكو تنفست بقهر...
ورة دقايق حجت: - اني غبييه حتى رقم ما حافضة وامي كالت الزمي بيدي ماسمعت كلمتها...
حجت الكلام وكامت تبجي: -هسة اهلي يدورون علية وين يلكوني بعد
همست بصوت ناصي يجون لاتخافين...
شوية واجة ولد شاب حضنها وهي اجهشت بالبجي
التمو عليها حضنتها امها وتمسح بوجهة وأبوها يطمن بية وهي بين حضن وحضن تتنقل أخذوها ومشو...

بقيت وحدي نزلن دموعي جون خدي بقيت بمكاني اباوع وين اني منو اليجيني لااخ ولا اخت ولاام ولا اب شمنتضرة بعد...
رجعت من النجف بترابي رحت للمزرعة اشتاقيت ليلام اول ماشافني بقة يصهل مسحت شعرة واني اهدي بيه حجيت بصوت مبحوح...
إيلام خلص كولشي طلع جذبة وهم امل مزيف جان...
إيلام راح اعوفك اتعود على المحيط وإنساني مثل مانسوني اني دربي معثور لاتمشي وياي تعثر...
طلعت من إيلام من بعد ما ودعتة...

رجعت للبيت فتت سبحت فتحت موبايلي اجتني الاشعارات من زينة خالتي و دكتور محمد متصل هواي...
رجعت اتصلت بية وطمنتة عني...
دكتور محمد رجال كفو ماقصر وياي ابد موضوع سفري هو رتبة و كال اوصلج للمطار بيدي ومناك يلاكوني اقاربة كولشي مجهزلي بحكم اقاربة بالخارج مستقرين فرحت بهالشي وزاد واهسي.
مابية حيل احجي لفيت راسي ونمت على إثر تعب قهر كعدت مالي واهس هذا اخر يوم إلى هنا بيتنه...

الوداع الوداع ايها البيت النحيل...
تحملتني ولميتني عشت وشفت بيك هواي اشياء شينة وزينة...
نضفتة واتصلت بيه زينة رديت احاول اغير صوتي الووو...
زينة: -صباح الخير دادة اشتاقيت.
لبوة: -صباح النور كلبي تشتاقلج مكة
زينة: -فدوه الكلبج الينكرط اكولج شبية صوتج
لبوة: -مبية شي بس لان هستوني كاعدة.
زينة: -اممم انتي والله حقيرة ليش ولج ماسالتي
علية متت عشت شصار بيه...

لبوة: -ماينخاف عليج وعلاء موجود وموضوع شصار بيج كلنة نعرفة...
زينة: نازعة المستحة فرد نوب
لبوة: -عازمتج على العشة تجين...
زينة: -مم اشوف
لبوة: -انطيني كلمة علمود اعزم واروح اجهز
زينة: -تعزمين منو
لبوة: انتي وتبو وخالتي وبناتها وسمر وفاطمة
زينة: -هلو هلو اكعد يعلاء واسمع لبوة صايرة عدها خالة وبنات وين جانت من تالي وقت اجت جاية من البرية تريد تاخذ الأولية...

لبوة: -هسة طلعت النة خالة من تجين راح تتعرفين عليها وتحبينها تدرين حتى تشبهني
زينة: انوب نسختج انتي وحدج مامتحملينج انوب خالة وياج وحلوة مثلج بوياااااا
لبوة: -اثكلي شوية وهسة تجين مو
زينة: -اكيد اجي وخوش من عزمتي تبارك العارة
لبوة: -دروحي شوفي علاء خطية عايفتة وتحجين وياي...
نهيت الإتصال كملت تنضيف واتصلت بخالتي وتبارك عزمتهن بقت بس سمر وامها من ارجع أخبرها...

طلعت للسوگ احضر للعشة لاگاني عمي سلطان حالتة حالة احسة كبران حيل هو من النوع اليهتم بنفسة ونضيف بشكل سلم عليه مارديت عليه وكملت دربي صاح وراي غلست عنة شيريد مني بعد كلة من وراة وهسة جاي يسلم علية والله يالله...
وكفت براس الشارع انتضر تكسي طبعاً من راح ادهم ولجاي متبهذلة خطية جان ياخذني وين مااريد.
طبكت تكسي بس السايق ماعجبني مدري شبية هسة اني شعلية بية مجرد يوصلني سلمت وصعدت
مشة بيه بسرعة فائقة...

السيارة خنگة افتح بالجام ماينفتح حجيت وياه يفتح الجام ماجاوبني كررت كلامي ماكو بس يمشي سريع حسيت بنعاس مو طبيعي شنو السالفة هستوني كعدت شبعانة نوم...
حسيت بنحول عيوني ينفتحن وينغلقن وحدهن حسيت بخدر بجسمي ولساني ثگل حتى مااكدر احجي شي بعدها ماحسيت بشي...