رواية لبوة علي للكاتبة كفاية كاظم الفصل الحادي عشر
الساعه التاسعه صباحا من إحدى المستشفيات
زينه -گاعدة منتظرة تجي لبوة الساعه بالتسعه وهي ماكو صايرة تتأخر هواي وتأخذ اجازات خلال هالفتره تغيرت وكلنا لاحضنههالشي عليها ابد ما تحجي والوقت كله صافنه...
قبل تسولف وتضحك ويانه وي المراجعين هسه ابد ومن اسئلها تحجي كله باللغاز كلشي ما افتهم منها الصراحه بديت اقلق عليها...
هدوئها يخوف تخلص شغلها وتخلص الاستراحة وحدها احس هذا الحادث اثر بيها كولش...
واخيرا اجت لبوة شافتني سلمت بدون ماتوگف وتسوالف وياي مثل كل مرة.
-هلو زنزن شلونج شخبارج
تجاهلت وجودي واني منتظرتها صارلي شگد گلبي طاگ عليها حسيت بفشلة دنگت العب بصابعي نزلت دموعي ما گدرت اسيطر عليهم همست بصوت ناصي...
-تمام
اجت باتجاهي وحجت بتوتر...
لبوة -شبيج زينه شصاير وياج؟ منو محاجيج؟
دنگت امسح بدموعي رفعت راسي الها مو لبوة هاي متغيره 180 درجة هالات جوة عيونها وضعفانة بشكل...
-محد.
هزت اكتافي بعصبيه ملامح القلق بانت ع وجهه
- شبيج منو مضوجج؟
-انتي
أردفت بصدمه تأشر باصبعها ع نفسها
-اني؟ شسويت شحجيت وياج گولي!
-هو لأن ماتحجين وياي، لبوة تدرين بيه متعود
عليج بكل خطوة انتي وياي مااعرف اسوي شي
بدونج
حجت بحيرة وضياع مغطي عليها...
-وهسه شنو التغير بعدني وياج بكل خطوة مستحيل اعوفج يوم صدگي والله...
-انتي تغييرتي، مو مثل قبل ولا كاني موجوده حالي حال الغريب ترة اني وياج مو زميلات تعودت عليج هواي حتى ما اگدر اسولف وي غيرج...
مسحت وجههة واردفت
-زنو تعذريني بس انتي ما تدرين بالشي الجاي
أمر بيه
- لج داده تتأذين احجي سولفي عن البداخلج لاتضلين تحبسين راح يجي يوم وتنفجرين ليش ما تسولفيلي مو تگولين انتي بمثابه صديقه واخت...
-هو هيج ويمكن اكثر بس مااكو شي ينحجي، يلا هسه عندي شغل واساسا اني متأخرة بعدين
نحجي.
لبوة كتومة حيل تحب تكتم بداخلها ولامرة فضفضت وحجت عكسنا اني وتبارك شكد نحجي ونشكي وهي تسمعلنة بكل اهتمام وتنطينة نصائح وتفسر تصرفاتنة...
راحت كل وحده لشغلها انتظرت الاستراحه تجي
ونلتقي بلگت اعرف شبيها صارت الاستراحة بقيت انتظرها واخيرا اجت جنها قالب ثالج ماكو بوجههة تعابير.
لبوة-ها زنو يلا تطلعين
-وين؟
-نتمشى برا نسولف شوية.
طلعنا خارج المستشفى للحديقه اكو مسطبات گعدنه عليها ولبوة كالعاده الا تمسحهن الاتگعد ما تبطل هالعاده ابد...
لبوة-احجي شبيج؟
-مابيه شي
-واضح من شكلج مابيج شي
باوعتلي مقلصه عيونها أردفت
-علاء بالموضوع مو
فتحت عيوني على وسعهن يمة ما ينضم عليها سالفة رغم ما مسولفتلها ابد
-يا صدوك لبوة منين عرفتي!
-هسه انجبي وگولي شبيه وياج الثور.
توترت وجهي صار حار حجيت واني دايرة وجهي عنها استحي احجي بهيج مواضيع وياها لاول مرة نتطرقها...
-خطبني
-ههههههههه وشبيج ايگول اني علاء شوف وجهج شصار عادي امي اول وتالي راح تتزوجين وانتي مامسوية شي حرام حتى تستحين
-لبوة شبيج وياي استحي والله
-يلا تمام، وانتي شگلتي؟
-ما گلت شي انتضر احجي وياج
-واني شنو القرار الج قابل اني اتزوج بمكانج
-غير استشارج شدكولين مو انتي عندج نظرة بالبشر تعرفين الشخص من وجههة.
-نعم الله عليج سويتيني كشافه
-لا مو هيج بس اني اريد اناقشج عندي هواي اسئله دور بالي ماالهن جواب
-يلا ناقشي ماهي اسئلتكي ايها الفتاه؟
ضربتها ع كتفها گلبت عيوني واخذت نفس وزفرته
-ما ادري، ساعه اگول اوافق بعدين اگول ارفضه احسن إلى واختصر هواي حجي.
-شنو السبب إلى يخليج توافقين؟
-مثل ما گلتي اليريدج يتقدملج، وهو هيج ما صار شهر وتقدملي.
-بس هذا السبب؟
-لا الصراحه اول ما شفته رتاحيتله
-حبيتيه؟
-انتي تدرين اني ما اعرف شنو حب گضيت عمري ادرس فما ادري حب يمكن اعجاب بعد ماادري
-حب من اول نظرة
-يمكن هيج واحنا بسرعه أخذنا ميانه ع بعض يگول بيناتنا علاقه قديمه يمكن شخصياتنة قريبة على بعض
-حلو زين شنو سبب رفضج الة؟
-شغله
-شبيه شغله؟
-كلنا ندري سمعتهم شنو وعلاقاتهم بالبنات اكو بيهم متزوجين وعدهم اطفال ويدورون سوالف مو زينه...
-زنو خليها قاعدة امشي عليها بحياتج كلها من تحجين بموضوع لا تشملين الكل بيه اصابعج مو سوة...
بالنسبه للعلاقات المحرمة والكترونية ما تقتصر شغل يعني مو الا الضباط والبجيش يصادقون ويدورون بنات، هذا الشي راجع لأخلاق الشخص وليس مهنته والصراحه اني اشوف علاء ما عنده هيج سوالف مبين خوش رجال
-يعني مو مثلهم؟
-ما كو شخص يشبه شخص بهذا العالم كل شخص ومبادئه وتربيته والبيئه المتربي بيها تختلف من شخص لآخر ولو فعلا هو من هذا النوع ما خطبج، زين شنو السبب الثاني؟
- شغله خطر اخاف يصير بيه شي ما اگدر اجازف اني الاوگع بيها والله
-كل شخص ويومه كلنه نموت اليوم او بأجر المكتوبله يعيش يعيش الموت ما محدد ع شغل
مثل ما تشوفين الحوادث شكثر تروح ناس ضحيتها، زنو عود هاي انتي الدارسه والفاهمه وهيج تحجين جا شدگولين لغيرج.
-والله ماعرف بس حايرة حيل ما اميز الصح من الغلط گمت ادور على السلبيات وماكو
-حقج لأن ما حاطه ببالج راح يخطبخ لو تتزوجين صار كلشي بسرعه وانتي بعدج ما تعرفينه زين
-شسوي هسه؟
-اطلعي وياه بمكان عام تعرفي عليه وشوفي أسلوبه ولو هو الانسان ما يبين بلقاء واحد، اطرحي عليه اسئله اي شي يخطر بالج احجيه راح ترتاحين وتعرفين أسلوبه أكثر
-شگله؟
-اتصلي عليه گليله اريد اشوفك احجي وياك
-اي بس مو هسه.
-براحتج من تشوفين نفسج مستعده اتصلي بية
-هففف هسه عرفتي شبيه، انتي شبيج؟
حجت وهي ومشتتى نضرها بالمكان
-كلشي ما بيه
-قصدج كلشي بيه
تنهدت بقهر وباوعت بعيوني عيونها حمرر
-منيلج هالحجي
-انتي شايفه روحج شصاير بيج راح تموتين شكو شصاير يا يوم انتي تأخذين اجازه من تعينتي ولهذا اليوم ما تاخرتي ساعه وحده دائما تجين قبل الوقت...
حجت بقهر وهدوء تام
-وهسه شصار؟
-اجازات تأخير اسلوبج تغير.
-ليش جان اسلوبي حلو حتى تغيير؟
-اكيد حلو، لبوة صح انتي مو هواي تختلطين والبعض يگول مغرورة عنج بس اليشوفج شلون تتعاملين وي الناس المرضى أحسد نفسي لأن انتي صديقتي احسج تعرفينهم تتعاملين وياهم كأنهم من عائلتج...
همست بقهر وضربت على رجلها
-عائله!
-شبيج لبوة احجي لا تسكتين فتتي كلبي يسكوتك هذا وعلى راح تموتيني احجي
-وداعتج ماعندي شي ينحجي ولا تشغلين بالج وياي اهتمي بنفسج وبس
حاولت تغير الموضوع وما تتطرقلة ابد.
-اكولج تبوو شو ماكو ليش ما داوم خاف بيها شي
- ما بيها شي موجوده بس انتي مو ويانه داخله بعالمج الخاص
غمضت عيونها بتعب
-اهااا
- اي وزعلانه عليج دگول دشوفني ما تسلم علية تغلس
- ميخالف الزعلان نراضيه، يلا تاخرنه خلص الريست
-مو دنحجي بعد وقت
-السوالف ما تخلص غير مرة أن شاء الله نگعد ونسولف كولشي
رجعنة كل وحده لشغلها بعد ماشفتها لگيتها طالعة خلصت دوام ورجعت للبيت مرتاحة هم وانزاح عن گلبي من حجيت البداخلي...
اتصل عليه علاء رفضته ودزيتلة مسج گتله اريد اشوفك واحجي وياك حدننا موعد ع بأجر رحت اسوي اكل ماما مدري وين احس بتوتر ما اگدر اكل بعدني بالبداية عود اسم الله شلون بية لو صار العرس وصارت صدوك أخذتني صفنه فززني صوت بابا...
-شبيه بنيتي زينه المزيونه صافنه؟
تفاجات بتواجد بابا بالبيت وتفاجات اكثر من طريقة كلامه حيل فرحت بجيتة وسؤالة علية جاوبتة بابتسامه
: -مابيه شي.
تقرب من عندي حضني بقى يمسح ع راسي خنست بحضنة شكد محتاجة حنانة.
-شلونها بنيتي الحبابه؟
اخذتني الصدمه اني بحلم بعلم بابا يحجي وياي هيج، حضن وجهي بين ايديه واردف...
-محتاجه شي گولي
-ها لا مابيه شي، انته بيك شي؟
ابتسم بقهر رجع باوعلي ملامحة متغيرة كبران مو مثل قبل.
-اسف بنيتي الشغل ماخذني عنكم منسيني حتى روحي
ماحجيت شي حسيت بتعبة لزم ايدي وقبلاها كزبر جسمي وعيوني دمعت.
-سويت كل هذا علمودكم حتى تعيشون الخير الماعشته ما ردتكم تعيشون مثل عيشتي.
كسر كلبي بهل كلمات حتى ماعرفت شرد علية مسحت عيوني...
-انته المهم عدنه مو فلوسك الفلوس تروح وتجي بس انت لا، ماجنه محتاجين بس حنانك وگعدتك ويانة وسوالفك الدافية
-ان شاء الله اعوضكم بالايام الجايه
كعد گبالي وصار ياكل وياي فتح شهيتي على الاكل شكد حلوة هيج اجواء ضحك بوجهي يلاطفني
-اي شكو ماكو
-ها ماكو شي بس.
-بس شنو احجي.
رجعت كذلتي ليورة وذبيت البيدي: -بابا هذا اكو واحد خطبني وباجر احاجية عادي مابيها شي
-مابيها بنيتي بس كون بمكان عام وگعدة محترمة
-اكيد والله بس عندي كم سؤال اريد اعرف جوابهن
-الله يقدم البية الخير الج
متت من الخجل بس لازم اكلة ماطول شفتة شويه وطلع يمسح بوجهه لحد هاي اللحظه ما مستوعبه الصار...
حسيت بي شي طلعت احجي وياه وأشوف شبيه شفته يسولف وي امي عفتهم وصعدت لغرفتي بعدني بالصدمه والخجل ماخذني...
تنهدت بقهر ورحت اغسل المواعين بابا گاضي وقته كله بالشغل لايگعد ويانه ولايحجي الاماندر وامي مگضيتها وي صديقاتها علاقتي سطحيه وياها وأخوي ما ادري شوكت يدخل للبيت وشوكت يطلع...
ماحس نفسي عندي عائله ما تلمست الخوف والحنان منهم بقيت ادور عليه بين الناس...
ما عندي اخت أو صديقة جنت وحدي رغم عندي بنات خال وخاله وبنات عم بس جانن يباوعلي على انو اني أعلى من عدهم رغم هما حالتهم الماديه تمام لكن اخذن عليه هاي النصرة، يمكن لان اني الوحيده فيحسني مدلله وكذا بس وين يحضي حياتي مملة لابعد درجة ماعندي وحدة احجي وياها...
إلا أن لگيت لبوة اتمسكت بيها بقوتي تلمست بيها المحبه والخوف عليه والإرشاد والنصيحه المفروض الام تعلم وتنصح بتها بس ما شفت بامي.
امي هاملتنة ولا بحالنه ابد عكس لبوة حسيتها شايله حنان الام ومحبه الاخت وخوف الصديق الصدوق عليه والله من صدوك بدون مبالغة...
حسيت بنفسي اكو شخص يخاف عليه يسأل ع أحوالي أو إذا شي مضوجني مااتردد احجي كل شي بداخلي يمكن جانت هديه من رب العالمين وفعلا كانت اجمل والطف هديه...
لثاني يوم داومت ولبوة ع وضعها ماتحجي شي وضعها ملخبط عفتها براحتها ماتحب واحد يلح عليها عسى ولعل تحجيلي ولو أمل بسيط...
خلص الدوام ورحت اشوف علاء اتصلت عليه گال منتظرج رحت للمكان الحددناة لگيته واگف يم المطعم منتجي ع سيارته لابس اسود باسود عود شخصية وكذا بس حلو عن جد ههه اول شافني ابتسم وطلعن الغمازات يطلعن الواحد من طورة شحيت عيوني عنة لا يصدگ روحة...
-هلا بزنزن، شلونج يبا؟
رديت واني اباوع ع المكان
-الحمد لله أنت شلونك
-من شفتج ردت روحي
-ها هسه شنو نحجي مو
-لا اباوع ع عيونج
-هاا
-بطلي فهاوه راح تموتيني بيها.
-اي ان شاء الله
ردنة نصعد على الدرج سوالي بيدة اصعد لان الدرج ضيگ.
-لا اصعد انت قبلي.
-وشراح يصير من تصعدين گبلي
-هواي هسه اصعد حباب قابل نبقى هيج
عمدة خليتة يصعد قبلي زحمة والله يمشي وراي وهو عينة زايغة هههه صعدنا للطابق الثاني مثل السطح صاير الهوى يدخل من كل مكان و المنظر الطبيعي ورد بسندانات مكان مريح وراقي كعدنة على طولة فارغة...
-بقيت أترقب المكان فززني صوته من گال
- شتحبين تأكلين؟
-ما اريد اكل بس اريد احجي وياك
-نحجي ما طاير اني يمج ما اولي لمجان ابد وهسة، شتطلبين؟
-لا ما اريد شي بس اريد احجي
-يبووو شبيج شفتيني بعبع خاف عبالج اكلج لا ترة اني زلمة ما اكل بشر اطمني
-لا هو مو هيج بس اول شي خليني احجي خاف انسى، بعدين ناكل عود
-ههههه والله عليج سوالف راح اطلب شي بين ما تحجين يوصل
- ها بكيفك
طلب إلى واله أردف وهو مركز بعيوني
-احجي دكتورة روحي شعندج طلعي.
احس الكلام طار انوب هو يباوع بوجهي بقيت ساعه اباوع ع مكان ساعه العب بصابيعي الصراحه
احتاجيت لبوة بهيج موقف استمد منها قوة يلهوي ينهار اسود شيگضيها إلى بلعت ريک...
-ليش تريد تزوجني؟
- چا هذا هم سؤال ما رادلها علم الذرة حبيتج واريدن اتزوجچ تربعتي بگلبي بعد
-شلون حبيتني وانت ما صارلك هواي من تعرفني؟
-جا هي المدة العرفتج بيها مو مهمة المهم عرفتج واحتليتي گلبي المزنجر صاير حديد وعلي.
-هاا اي بس شنو وين اكو هيج شي خليك صريح احجي ليش الا اني؟
احاول أتجنب نظراته احجي السؤال وادير وجهي
عنة.
-دشوفي اول شي جذبني بيج عفويتج طريقه كلامج الطفوليه...
الإنسان دائما يبحث عن الشخص اليناسبه الموجود بمخيلته شگد يشوف ناس لدرجه يگطع الامل أن الشخص اليفكر بيه ماموجود بالواقع...
شگد شفت بنات اشكال والوان ولاوحده
دخلت ببالي لاشكل ولا اسلوب، البرائه العندج
ما موجوده البياض البداخلج ما موجود عند وحده.
شفتي شلون گمت احجي مثقف مثلج هههه حفضتهن وعلي.
-هاا يعني اگدر اگول لگيت بيه مواصفات شريكه حياتك؟
-والحسين استحي افكر بوحده مثل مواصفاتج دكتورة وحلوة وتحشش بش بش جا بعد شرايد
-هاا وهسه شنو؟
-شني غير احبنج وتفكيري كله يمج واريد انزوجنج
-هااا
-هم گالت ها الفاهيه، خاب زوينه وافقي واختصري الحجي عليه اني رجال ماعرف شلون يحجون ولا اعرف بالرومانسيه من هسه اگلج
--هاا خوش عندك حبيبه هم حبيت من قبل؟
-خاب ويني وين الحب قبل جم سنه محد يگلبني ضال بالضيم مشمور شمرة الجلب بس هسه مدري شبيهن يشمرن رواحتهن عليه حليت بنضرهن صرت افلش على گولتهن
-وانت ما تصدگ
-وداعت حنش ذاك الزلمة الخير وداعت مدلول النشمي ما اباوع عليهن اصلا تلعب روحي من هيج شكول شني جا احنة مانباوع على ياهو الجان
-مبين
-طبعا يبين ما تشوفيني تسرسحت عليج رويحتي
واجيتج اخطبج بعد شكو.
-شوف راح اصدگك بس قسما إذا شفتك مراسل بنات لو مسولف وي وحده لو مجرد نضرة لبنية لجنية ترة تصير مو خوش سالفة...
-ربي عفوك ورضاك والموضوع ذاك ها هية صار
-خاب اني ما اعرف بسوالفكم حاطه ايدي ع گلبي من هذا الموضوع بس لبوة گالت علاء مبين خوش رجال
-هي هيج گالت؟
-اي
- نعمه الله عليها والله كبرت بعيني، وهسه شني
دگولين نجيكم لا؟
-ماادري
-هو شني ماتدرين يو اي يو لا
-والله ما ادري انطيك حجاية بس مو هسة.
-دخوش اخذي راحتج بالتفكير بس خليها ببالج اني مسودن بيج وماتلگين واحد يحبج بگدي وإذا لگيتي گليلي علمود ادچه بگلبه واسحله من رجليه خوش
-لابله وانتي شعليك بيه
-ها يعني عندج واحد يحبج
-اي
صار وجهه احمر قبض أيده وضربها ع الطاوله
-غير تگول ياهو حتى اعرف شغلي وياج تضحكين عليه انتي جا مو تكولين ما مخطوبة ولا تحبين هسة طلعتي عندج واحد
-هوب هوب اكلتنا حاصل فاصل حتى بعدني ما گلت منو شبيك.
-غير تفضها رحمه لحنش راح اگوم ومحمد بس ما اعبرها الج.
-اي علكيفك راح اگول ماطرت احممم شبيك والله ماضاحكة عليك
-جا من كون حضرتج ما تضحكين عليه فضيها وراي شغل
-شبيك غير انتة تحبني مو گلت قبل شوية
رخت ملامحة ضميت ضحكتي بيدي شكلة انگلب گلاب
-هسة شبيح تتمضحكين
-حراام
-اي حرام تجذبين الناس بضحكتج
-هاا هيج لعد ما ادري
-شلون انة وي بت بغداد
-لا بعد اني بت البصرة صرت احجي مثلكم والله.
-چا خوش تعلمي مثلنة تحجين بعد بيتي
يمة گاعدة على اعصابي اول مرة اطلع وي ولد صح احنة عدنة عادي بس ابد ما طالعة احسة مركز بوجهي نعلت روحي الف مرة لان اجيت.
شويه وصل الاكل نقذني على الاقل التهي بشي خلوة گدامي وطحت عليى صرت اكل بدون ما اباوعله اجيب بالاكل واخلي بحلگي مسحت المواعين مسح رفعت راسي اباوعله وين راح لگيتة مخلي ايدة على خدن وصافن عليه ومبتسم...
يلهوي يبوو اطم روحي بالتراب شگاعد يصير ماشايفة اكل شبية حسيت بروحي صخنت باوعت گدامي نص المواعين فارغه احس روحي تفشلت اريد ابلع الگمه مااگدر لزمت گلاص العصير شربته نصه حجيت واني اكل واشر للماعين.
-ما تاكل شبيك صاير فاهي
-تعلمت من عدك الفهاوة ضلعي
فتحت عيوني ع وسعهن
-شقصدك؟
اشوفه بقى يضحك دمعت عيوني احس الاكل وكف بزردومي.
-هاي لأن اكلت هيج
-جعل محد غيرك ياكل ضلعي.
حسيته يستهزا بية لان اكلت مثل الولد وين الرقة نزلت دموعي ومسحتهن.
-يابه هسه اني شگلت وهيج تبجين
-تضحك عليه حضرت جنابك وتگول ضلعي
-وهسه أنتي ع هاي من فدوه يروحولج جلوله المجلوله وحويدر ألمسودن وعزت هالگ
-هو اني هيج من اتوتر ابقى اكل هيج
-من فدوه رحت للهيج
-تضحك عليه حضرتك
-اكو واحد يضحك ع روحه شبيه مسودن
درت وجهي زعلانة من خاكري بقيت اباوع ع مكان
-اذا قبل شويه جنت احبنج هسه اشهگج شهگ وعلي
-ليش بله؟
- وين شايفه وحده طالعه وي خطيبها المستقبلي بمطعم تمسح المواعين مسح
-قحط اني ادفع الحساب حطيت عينك ع اكلي
-دخيلك يا على انشگ گلبي بعد لا تحجين شي
-اگول ما تاكلك شي
-هو اريد اكلج لوما الناس مناه
-هيووو احترم شنو تاكلني صمونه اني
مسح ع وجهه واستغفر گمت من مكاني واشرتلة
-شوف لا تطلع إذا ما تاكل هذا الاكل كله
-دمشي خل اوصلج عوفي الاكل هسه
-لا بله لعد انت المن طلبته وهاي گعده يلا اگعد اكل
-شبيج بويه تسودنتي.
- فكرة اني مسودنه من زمان مو اليوم يلا اكل التبذير حرام واحنة ما ناقصين حرام
خزرني وبدأ ياكل كل شويه واگله.
-هذا اكله وهذاك وياك حرامات نعمه الله ليش تنشمر
بالزبل
-شني گدامج حاويه تعبين بيه
- ما گايلتلك تطلب هواي، يلا اني تاخرت
سيو
-ولج اوكفي تركضين وعايفتني وراج شني گ
الج
طلعت بسرعه من المطعم وهو يحاول يوصل يمي
وگفت وشفته وراي انتظرته يوصل اجة فحطان...
-خرب بليسج شاده محرك بطه
-لا محرك سايبه.
-الضاهر راح انسحل هواي، ها وهسه شگلتي؟
-اني شكو اهلي اليقررون
-يعني موافقه
هزيت بكتافي بمعنى ما اعرف
-يلا تعاي اوصلج
-نو اني اروح وحدي يلا باي
- شتعلو خبالووو حضري روج بأجر امي تجي عليكم
مشيت بدون ما اباوعله ما اعرف احساسي شنو بس الاعرفه مرتاحه بوجوده ما احس بتقيد وياه رجعت للبيت فرحانة واضحك على سوالفنة...
----------
بسمة: -يمة غزالة ماتجين تنظفين البيت
غزل: -بس اني بالبيت شني البگة براسي لو هذا حضي.
بسمة: -هسة بدال هذا حجيج جا منظفة بس انتي وين لوك لوك مو لسان انضف اني المرة الجبيرة احسن صدك لو گالو مايفيدك لا ولد ولابنات امدة بطني
غزل: -كل يومية هاي الاسطورة انطيني انضف امرلي لله اخخخ اخخ
بسمة: -من الاول وگومي الا تخليني اعيد الربابة
غزل: -اوف منج بسومة ادري بسوالفج تهيضين مشاعري
بسمة: -ديلا نضفي بدون حجي زايد انة رايحة لبيت ام احمد
غزل: -وشعدهم بيت ام احمد معرسين.
بسمة: -هسة الا معرسين حک الجار على الجار نشوفهم وين راحو المرة تجينة عيب منها
لبست عبايتها وطلعت نضفت المطبخ ورجعت مسحت الصالة شكبرها مايصير انضف نصها بقة الدرج عفتة مابية حيل الة للعصر امسحة.
خلصت ورگضت وراي رياضيات عندي امتحان بيها على باجر شنهاي طلاسم كلة جذور وشي داخل بشي اخخ اليوم ما داومت امداني لو مداومة وي ازل ولا گاعدة بالبيت.
صرت يثاغورس اجيب واحط واكتب وامسح اندگ الباب قوي رحت افتحه يمة هاي امي شبسرعة اجت حجتلها نص سالفة والباقي تكملها يمي.
-اي اي اجيت اااااجيت على كيفج
فتحت الباب وطلع بوجهي رجال چبير لابس دشداشة وعگال اول ما شفته رديت الباب ما لابسه حجاب صخام بوجهي شاف شعفتي هسة شيكول هاي ماتمشط شعرها ابد صرت ورة الباب...
-لاتستحين ماكو غريب اني عمج.
استغربت من گال عمج عبالي كلمه عاديه اي شخص يگولها رحت جريت شال خليته ع راسي صرت ورا الباب مطلعه بس راسي صفن بوجهي سترك يارب بس لاهذا رئيس عصابة يطلع انوب يصيح لجماعتة ياخذوني نفضت الافكار وحجيت.
-تفضل عمو محتاج شي؟
بقى يباوع بوجهي ساكت گلت هذا شبيه انوب اني وحدي بالبيت هسة شسوي لف السبحة على ايدة وحجة بصوت خشن.
-صيحيلي امج اخوج موجود
-امي هسه تجي واخوي بالدوام.
جا شني عمي ما تضيفون مخليه عمج بالباب مايصير محد معلمج بالاصول
-ها مو شنو محد بالبيت هسه اروح اتصل بامي اخليهة تجي
سديت الباب ورحت اركض اتصلت بامي شويه واسمعت صوتها بالشارع رحت فتحت الباب دخلت امي وجهه ينطي الوان فتحت الباب على حيلة ودخلت الرجال للاستقبال گالتلي روحي جيبي مي وسوي جاي جبت مي اخذتة مني...
الف سؤال براسي منين هذا الرجال وشعجب امب مدخلتة لبيتنه وكاعدة يمة بقيت اسنط كلشي ما فهمت ضل بالنص ساعه يمنة وطلع وامي وجههة ما يتفسر ينطي الوان رحت استفسر من عدها.
-يمه منو هذا الرجال؟
-عوفي هذا الحجي وروحي طلعي اللحم من المجمده خليه يموع هم يلة يستوي
-هسه اطلعة بس گليلي منو هذا
صاحت بيه بصوت عالي متنرفزة.
-اااامشي
رحت طلعت اللحم ضايجة ليش زمخت بية اني شعلية اخين مو اخ باوعت الها صافنه رحت يمها.
-روحي سوي الغدة
اني والطبخ استغربت اول مرة تخليني اطبخ الغده
رحت للمطبخ اجت أزل وجههة املح من تراب السيارات ابو الخط عرس علينة وبطل خلانة مسحولين تسحول...
-هلو
-هلوات يابة
-شصاير اشو امي ضايجة
-بعدين اسولفلج روحي بدلي واغسلي وجهج صايرة تشبهين مرة بباي هههه
-هففف مو وكت سخافتج
طبخت الغدة ورحت اكمل قرايتي استوة صبيت وصحت لازل تغدينا اني وياها امي گالت ما أشتهي خليت ايدي على خدي اخبط بالاكل...
أزل -اگلج شبيها امي مو على بعضها اليوم؟
-والله ما ادري شگلج بس من الصبح هي هيج من اجه الرجال وحجه وياها
-يا رجال هذا؟
-ما ادري رجال شويه جبير لابس دشداشه وعگال صوتة خشن واسمررر
-ومرض عوفي مواصفاتة تخطبينة هسة بس يعني باي حق داخل لبيتنة شني سالفتة
-والله مادري رحت طايرة فتحتله الباب حتى بدون حجاب گال لا تستحين اني عمج عشتو
-عمي!
-اي هو هيج گال وكل ما يحجي كلمه وگال عمي عم تالي وكت هههههه.
-عمي اني شني السالفة!
-شبيج تعرفين شي واحنة ما نعرف تعاي اكلج احنة منيلنة عمام
-هااا اي
-وجعا احجي شبيج
-روحي شوفي امي وين
-تلگينها لو تابع محاضرات لو نايمه دحجي
حجت بهمس
-اگلج احنا عدنا عم واحد بس محد يقبل نحجي بية
فتحت عيوني بصدمه
- شوكت صار عدنا عم ولج؟
دمغتني وحجت.
-شبيج انتي ثوله من زمان قابل صاير وياج
-ياعععع جا ليش اول مرة ادري بية شني اني من اصحاب الكهف محد يگلي ها وجا ليش ما يجينه؟ واول مرة اسمع بيه.
-ما ادري بس علاقتنه مقطوعه من زمان أو بالأحرى من مات ابوي أو قبله والله ما ادري ماعندي علم بية
حيدر مايقبل نجيب طارية ابد.
-منيلج هذا الحجي عمري سبعطعش هسه ادري عندي عم جا شمسوي حتى محد يحجي بية وتنگطع علاقتنة وياه مو تايهة...
-اكيد مو تايهة وراها سر جبير وحقد بعيون حيدر من ينجاب طارية.