رواية عكد الظفيرة للكاتبة زينب جعفر الفصل الرابع والثلاثون
ابتسم ونزل الثامه رجليه يرجفن اباوعله
وكفت بنص صافنه درت وجهي الذياب كاعد على كرويته وكلهم كاعدين حوالينه يحاجونه هوه عاكد حواجبه متاذي رفع راسه جايه عيونه بعيوني
رجعت انضاري الفلاح رفع ايده مأشرلي اجي اسرع
تحركت رجليه ناحيته رايحتله...
ضغطت على العبايه خوفه بعدها بيه وصلت يمه بس اباوعلهم محتارين بي وهاله تبجي من كل گلبها على وهوه يحاول يهدي بيها.
درت وجهي الامي وجاه واكفات تعبانات وجميله لازمها فراس من ايدها
جوري مكاني وين؟
درت ضهري متنهده اريد اخطي خطوه جديده بعيد من الكل ما اعيش مضلومه بقيه حياتي والكل مستهان بيه احاول اتذكر زين بيهم بس افعالهم الشينه سيطرت عقلي كلها اولهم ذياب، حصه. امي. ساره. هاله. وحتى ابوي صرت افكر صدك هوه راد يخلص مني معقوله اني هيج عله على گلوبهم كلهم
درت وجهي دمعتي بطرف عيني هامسه بغصه وصوتي مخنوك.
جوري كافي محد راح يتأثر بدوني.
مشيت على كيفي واني ماعرف شنو طريقي وشنو فلاح وهيج وثقت بي بس ردت اخلص من الكل
جوري أنلچمت روحي حيل يابويه
رفعت عيوني للسماء زافره بنفسي بقله حيله اخطي خطواتي بهدوء راجعلي كل ذكريات اني واخواتي وابوي بس.!
ذياب جوريه.
انداريت لكيته منزل راسه يباوع الهاله مبتسم وهيه لازمه وجه قرب ايده على خدودها ماسح دموعها بايس وجها
جوري اتخبلت وصرت اتوهم.
ضحكت ب استهزاء دايره ضهري الهم مقرره مارجع ابد لا هل عائله ولا لهل ذريات
شلت القفص وعفتهم ملتهين بنارهم كدامهم بس كل هل ثلث سنين محد اهتم بنار الجواي
الكل يوم تلتهم گلبي شوي شوي
محد اهتم بمشاعري ولا احد حبني صدك
جنت دائما شخص اخر من يهتمون اله.
حتى ابوي الجنت متوقعه هوه العاشگني الوحيد
شككوني بحبه الي.
الشي الوحيد الاخذته ذكره ابوي، الحمامات.
وصلت يمه منزله القفص رافعه عيوني مخليتهن بعيونه اباوعله.
فلاح ها نمشي؟
جوري وين؟
فلاح لاتهجسين بلخوف ولاترجفين صدكي اطلعج من سكطهم.
بدون ماحجي هزيت راسي هوه ابتسم ماخذ القفص وماشي جانت قطعه متروكه لكيته مخلي سياره ناصيه بلون نيلي فتح الباب الوراني
فلاح اطلعي
جوري انت الحركت البيت؟
فلاح اي، ويجي دورهم.
ماحجيت مامفتهمه اني شنو اسوي بضبط ضايعه بكلشي هز براسه مأشرلي اصعد بلعت ريكي جايتني الف فكره
تذكرت اكو روح بطني خليت ايدي عايدلي مشهد ضرب ذياب.
جوري الخاطره على الاقل.
اخذت قراري علمود ابني
دنكت صاعده بسياره وهوه سد الباب صاعد معدل الثامه مشغل سياره يرجع سياره اليوره باوعتلهم ب أخر نضره الهم
لكيت الاطفاء اجتي نازليين يحاولون يطفون بنار وحشام يركض وياهم ذياب بكوه كايم ورجلي يرجفن مسح عيونه دايخ ومشى وياهم
اخذت نضره الامي لكيتها كاعده تحرك برجليها وجاه شايله جميله تبوس بيها اشرتلهم ب ايدي بمعنى معه سلامه.
بكوه طلعت كلمه مني شاهكه نازله دموعي بقهر
جوري ديربالج عليها جاه
عضيت شفتي منزله راسي مغمضه عيوني بكوه ماخذه نفس حاسه گلبي اتفرفح عليهم
دار سياره واخر نضره اجت على ذياب يدور بعيونه عليه...
درت وجهي تاچيه راسي على الكشن مغمضه عيوني ودموعي ينصبن على خدودي دمعه وره دمعه
لزمت بطني زافره نفسي
جوري اتحررت صيدة القناص.
خليت القفص بحضني حاضنته ماشيه سياره طالعه من الفرع كله!
باوعت للشوارع باهته ملامحي مامفتهمه شي حاسه بلغربه والوحشى وماعرف وين راح يوديني
ومادري سويته صح او لا بس الادري بي ماريد اعيش وياهم.
باوعت للحمامات لكيتهن مختنكات وياهم نسر رفعت حواجبي متعجبه ناسيته
جوري عبالي بس حماماتي وياي شجابك
قربت اصبعي ناحيته لازمه شعر على راسه هوه مغمض عيونه مرتاح
جوري ها؟
شبه ابتسامه صارت على شفايفي متذكرته بسرعه درت وجهي اباوع من جام مخليه ايدي جوه حنجي.
جوري ماراح تكلي وين توديني؟ خاف تخطفني
فلاح يول عش شنو اتسمينو هذا
جوري اريد مكان ارتاح بي وحدي
فلاح صار ياشطبته.
ماحجيت ساكته امسح بدموعي وبالي كله يمهم شنو راح يسون من يعرفون بيه رحت
يضوجون؟
هم يعصبون لان حاسبيني غلط لو يضوجون راح يشتاقولي؟
خليت راسي على القفص باقيه اباوع للشوارع
فلاح جوري احسبيني اخوج
جوري فلاح المسودن يطلع منه هل كلام؟
فلاح مو من سوالفي احجي هيج بس حبيت عفتي السكط واجيتيني
جوري ذياب؟
فلاح اي.
مارديت صاير بالي كله يم ذياب...
غمضت عيوني ومر الوكت ماحاسه الا وبديت اغفى
فزيت مامرتاحه بوضعيه نومتي رجعت راسي للكشن ضاغطه بحضني على القفص
حاسه بصوت خفيف يردد وهوى بارد محتلني بالاكثريه جايه على خشمي
اي، بسيطه، نايمه، يلا اتكحز ومعليك
فتحت عيوني بكوه ماده راسي اباوع
هوه دار وجه شافني رفع حاجبه
فلاح كعدتي يول
جوري تحاجي منو؟
فلاح اهجس معليج؟
جوري اهجس شنو.
فلاح دحكي مادري ب الحجي جنوبي فا اسكتي وخلي هل درب يفوت على شر
جوري وين راح توديني؟
فلاح والله هبلتي ابويه ال اصبري
جوري غغيررر اعرف وين توووديني
فلاح جوري حجيتلج احسبيني اخوج عمي احسبيني سربوت بس اسكتي والله تلاكين روحج غاد بخير
جوري هوه انتَ مسربت على اخوك احسبك ليش
باوع من جام خازرني
جوري نعست اني
فلاح اتفردي سياره شكثرها
جوري شبيك مخبل اتمدد؟
فلاح بمزاجج بعد بلتحبينو
جوري وديني للعماره ماندل هنا.
فلاح عماره؟
جوري اي
فلاح شنو غرفه فندق؟
جوري لاعماره محافضه شبيك
فلاح يامحافضه؟
جوري هيه عماره
لف الستيرن يفكر
جوري ميسان
فلاح ها اي عماره صح اعرفها
جوري اي رجعني
فلاح انزاحت سالفه من بالج لو شنو؟
جوري شجاي تحجي ولك بس لاخطفتني
فلاح دحكي والله ازت طلق كله براسج اسكتي
جوري والله ماسكت وديني للعماره
جر بريك لاف ستيرن قوي عطت خايفه لانندعم وكفها على صفح باوعلي معصب.
فلاح توكفين ضد ذياب وازتج للعماره موهساع تتكحزين شبلاج
تذكرت صافنه همست هازه راسي نافيه
جوري لاماريد
فلاح والله اموتج هين وماكو احد داري عنج كافي
سكتت منقهره كلها تاذيني واذيتي طالعه كلها من اليعودون الفرج.
ضميت قفص اكثر اباوع للحمامه البيضه متلوعه روحي بهل ضياع! ومابيدي شي اسوي.
انتضرت وانتضرت وهوه طريق كله يدخن ويخابر ويسب ويفشر السانه زفر ضليت متقذره منه بس اريد نوصل
وكفت سياره كدام بيت صغير حيل.
فلاح هين
جوري وصلنه؟
فلاح لابعد شبلاج؟
ضجت واني اشوفهم كلهم مسويني صغيره كدامهم ومافتهم نزلت بيدي القفص وسديت الباب قوي
فلاح ههي هي انتي
باوعتله بطرف عيني
جوري ترا مخبله اني والله امشييي شنيهاي اخلص منهم تجيني انته ولي
رفع حاجبه مصدوم من كلامي وضحك شامر جكارته
فلاح نومه هني ومري يامصگوعه، جايج صبح مستوعبه؟
جوري ععساكم لا اجيتم ولد فرج شوكت يجي اليوم اخلص بي منكم كلكم
تغيرت ملامحه الجديه حاد حاجبه.
فلاح لاتحسبيني عليهم اني ما إلى اب فوتي جوه
جوري اكو اكل
فلاح دحكي هل ايراني ما ضال اكل منه
جوري مافهمت يا ايراني؟
فلاح بيت واحد ايراني زتيته وجبتج حتى كله يمج
صفنت مامستوعبه كلامه
جوري صصدك تحجي لو شني؟
فلاح اي عجل شنو
لزمت راسي حاسه ب الم قوي اباوع الايدي بعدهن يرجفن وجسمي كله بردان مشيت
جوري كافي راح اتخبل
فلاح تردين تشربيني جاي؟
جوري لا
فلاح بش دحكي.
مجاوبت عادها باوعتله عاكده حواجبي جان بيده شي شمره من جام باوعت لكيتهن مفاتيح اخذتهن خازرته
جوري من تنطي شي بيدك اتعلم
دكلي هورن وشخط سياره طافر عليه مطر عطت شامره المفاتيح على سيارته
جوري حقيرررر
باوعت الروحي صاير حرك شوي ب الاطراف وفوكاهن مي خليت اقفص بلكاع لعبانه روحي
جوري دحكتن ولد فرج الغثيثين
مشيت للبيت اريد افتح الباب ماينفتح تذكرت ضاربه على راسي رحت ادور بلكاع على مفاتيح.
جوري وينهن، هسه شكو شمرتهن. شجابني اطلع من ضيم يتلكاني ضيم اكثر لو شارده بطرق عشوائيه احسلي
دنكت اتلمس بلكاع لا أرادي برطمت دموعي نزلن على خدي شاهكه خليت ايديه على وجهي ابجي بحرگه على حالي
وخرت ايديه امسح بدموعي زافره نفسي حاسه ب ألم گلبي حاولت الكى المفاتيح ولكيتهن اخذتهن بسرعه افتح باب البيت ماينفتح
جوري شبي هذااا نوبب ماتنفتح.
لويته قوي ادفع بي ماينفتح ضربته برجلي قوي وانفتح الباب طالع صوت جان طلاكه وحده باوعت ماده راسي البيت اضلم مابي احد
رحت على كيفي ماخذه القفص مال حماماتي ونسر ذياب فايته جوه سديت الباب وعيوني دور بلمكان
جان عباره عن مطبخ صغير ماخذ بطولي وعلى يساره حمام
فتحت الباب جان حمام صغير بي ريحه موطيبه لعبت نفسي امشي داخله الغرفه
جوري هاي شنو تسمى استقبال لو هول
باوعت للحمامات مبتسمه.
جوري حتى هاي مافرق بينهها شايفات هيج؟ حقهم مايحبوني ها
حازت بخاطري هل كلمه اخذت نفس متقربه لكيت درج فتت بي رافعه راسي اباوع جان اكو بعد عرف وحده فوك وبس
جوري بارده اليوم
انتبهت عاضه شفتي كل غراض موجوده كامله
جوري معقوله رجال گبل هيج طلعوا بدون غراضه
رحت ناحيه شباك بنص جبير مطل على شارع تاكدت مسدود قوي
جوري شو يخوف
ددرت نفسي ماخذه نضره سريعه
جوري ماتوقعت يجي يوم اعيش وحدي اعتبرها قوه؟
نزلت راسي حاضنه اجتافي بين ايديه رحت يم القفص مدنكه
جوري جوعانات؟
فتحت ثلاجه جانت صغيره وقديمه لكيت بيها صمون وجبن وحاطين زعتر وكبه
اتلمستها جانت بارده
اخذت صمون مفتفته رايحه للبراد لكيته مطفي ومابي مي
جوري شلون هسه
حسيت نفسي اختنكت رحت للحنفيه فاتحه المي مبلله الصمون وسديته مخليته للحمام ونسر
جوري تاكل صمون؟
سديت القفص عليهن ماخذه الكبه اكل منها صافنه افكر بحياتي جديده وشنو راح يصير؟
راح اكدر اكمل وحدي؟
جانت كبه بارده كلش الدرجه صاير عليها مي خفيف. بس لان جوعانه كملتها كلها بدون ماغسل ايدي مسحت بطرف ملابسي نازعه شال
رحت على صفحه بلكاع متمدده اكو ثلث مخدات منقوش عليهن رسم ايموجيات اخذت سوده مرسوم عليها ايموجي ب ابتسامه مستفزه
اتمددت مقربه رجليه ناحيه صدري بردانه
جوري معقوله ماكو هنا بطانيه
كمت اباوع بطرف زاويات الغرفه ماكو عرفت فوك دخلت الدرج خايفه كمت اطكطك ب اصابيعي.
صعدت على كيفي جانت الغرفه ضلمه خفت بسرعه عيوني دور بلمكان اريد بطانيه لكيت على صفح مسفطات بطانيات وفراشات اهواي جريت وحده وركضت گلبي خايف ينبض سريع
علي نص درج انلوت رجلي طحت على ايدي متاذيه
جوري اييييديي
رجفن شفايفي مامصدكه بعذر ابجي بجيت قوي كايمه حاضنه البطانيه وامشي دموعي يطيحن عليها رجعت للغرفه جوه اخذت شال اشهك واخلي فوك القفص
جوري هم بردانات مثلي؟، والله اخاف منا.
باوعت ناحيه درج امسح بدموعي تنهدت راجعه بزاويه مخليه راسي على المخده متغطيه صاير شباك كدامي ضليت اباوعله ضباب تارس شوارع من قوه البروده
ثواني وبديت اغفى من تعب ماحاسه بالوقت
للفجر وحركت راسي ضايجه من الحلم راجعلي مشهد الحريق فزيت گبل صدري يصعد وينزل من سرعه انفاسي
باوعت للغرفه ضلمه جايه عيني على شباك تمطر ودنيا ليل حكيت راسي حاجيه بنعاس
جوري ذي.
سكتت متذكره هوه ماكو تنهدت متمدده طابگه ايديه وحاطتهن جوه راسي
جوري تعودي وأنسي چوياته.
كمت لافه البطانيه حواليه كايمه كاعده على قنفه اباوع من شباك على شوارع وضلامها ومطر
جوري شجاي يسوون هسه؟، عرفوا بيه ماكو؟
نزلت راسي افرك ب ايديه ادفي بيهن نافخه طالع هوى شايفته ضباب ضحكت
سمعت صوت اشعار عكدت حواجبي مستغربه كمت وصار صوت اشعار ثاني وكفت لكيت محطوط تلفون على جراره زركه اخذته
جوري ناسي جهازه الايراني.
ردت ارجعه وصل اشعار طالع
ماتحجين جوري
جوري جوري؟ معقوله عليه
استغربت فاتحه التلفون جان رمز بس ارفع اليفوك شاشه لكيت رسايل مكتوب فلاح الغريب.
جوري ههذا انتَ؟
فلاح لا ابوي الكواد
جوري ايع شهل اللفاظ
فلاح ليش كاعده؟
جوري ماعرف
فلاح موتعلگين كلبج بي
صفنت شوي وكتبت راجعه المكاني كاعده اعدل بلبطانيه
جوري مافهمت؟
سمعت صوت حمامه تتحرك باوعت لكيتها نايمه مرجعه راسها ينزل على كيف وصلني اشعار فتحت تلفون مرجعه راسي على المخده وشفت رساله
فلاح لاتخلين بالج ذياب. ترا مايفكر بيج.
ضليت اباوع للرساله حاسه گلبي انمرد سديت التلفون ممجاوبته وشمرته على صفحه رفعت البطانيه اكثر مغطيه حتى وجهي
جوري ماحبه اصلا اني ليش حتى افكر بي
خليت ايدي على بطني
جوري ابوك راد يموتك. ماضيعلك حقك حبيبي
رفعت ايدي الجانت على بطني بايستها.
خليت ايديه جوه راسي اهمس على كيفي متذكره الاغنيه
جوري عندي امل ب ناس واترجى بيهم بيت الفرح نبني ايدي ب ايديهم، باجر شمسنا تعود والغيمه تنزاح ثوب الحزن نطوي ونبدله ب افراح
غمضت عيوني افكر ب ابوي وشلون الاگي ويلزم كصايبي ب ايده الخشنات من تعب شغله
طاحت دمعتي على خدي
جوري كلمن غلط وياك ومبجي ليلك يندم على السواه باجر يجيلك.
فتحت عيوني مامتذكره باقي كلمات الاغنيه نمت على ضهري متحرك بؤبؤ عيني ناحيه النسر فاتح عيونه يباوعلي
جوري نسر القناص.
اندارت نايمه على صفحه بجهه القفص
جوري سؤال، القناص هم ينقاص؟
جاه
دخلنه للبيت والمره ترحب بينه
ام عبدالله ععيونه تفلعوهن الكم يمه مامصدكه بيت شيخ فرج يمي يابويه اندارلكم فدوه
باوعتلها مبتسمه باوعت للنسوان كلهن كاعدات والحزن بعيونهن وزلم بلمجلس
جاه ماما هاي منو.
رمله مادري بس جيرانهم نكعد يمهم بينما صبح
هزيت راسي وعيوني دور بوجوهن اريد اشوف جوري ماكو نزلت راسي لازمه ايد جميله
جميله جوري وين
جاه ههههه كبرتي وصرتي تسألين علينه
حصه بيت مالنه هساع اتور ابو ابوه وانتي تتمضحكين؟
باوعتلها مستغربه هيه دارت وجها ضايجه وهاله تهز ب ايدها سكتت وامي رفعت حاجبها
رمله ححصه خليج بروحج هاي طفله شعرفها بلحريق
حصه مو وكت ضحك شبلاج؟
رمله ماضاحكتلج بنتي معليج بيها.
ام عبدالله صلوا على محمد شصابكم؟
غزاله رمله جده جثيره بلعمر احترمي
رمله علمي الاحترام الروحج اول ام سحوره اسكتن مني لا والله اگلبها هنا ماعندي مانع
ام عبدالله لا ان شاء لله ماكو شي هدو هدو
اباوع الحصه فاتحه عيونها على رمله وسكتن كلهن خايفات من امي لاصدك تسوي مشكله هنا
ام عبدالله تتردون اكل حياكم
حصه لاتعبانين راح انام
ام عبدالله حقكم والله من سمعت گلبي انلاچ عليكم
غزاله شنو انسوي بعد اذا شر ويانه ويانه.
امي مجاوبت كايمه جاره مخده مأشرتلي اكوم من قنفه كمت كاعده بلكاع يم مسره وههي تمددت مغمضه عيونها
مسره صصدك يحجون يزتن بسامير هين
جاه اندري
انفتح باب فايت فراس بيده شماغ حشام
فراس جاه
باوعتله هازه راسي
جاه ها حبيبي
فراس ضبطي شالج واطلعي عمي ذياب يريدج
كلهن حولن انضارهن عليه حمحمت كايمه اعدل بشالي وطلعت جان جو بارد حيل
جاه يبو بارده.
فزيت لكيته واكف اندار يباوعلي اول مره اشوفه رافع عيونه مخليهن بعيوني بس مجان مركز
ذياب جاه يبه
جاه ها خويه محتاج شي؟
ذياب جوري...
بلع ريكه عيونه ذبلانات وجه باهت
ذياب جوري وياكم هين؟
جاه ماعرف ماموجوده بلغرفه
سكت مرتخيه ملامحه صافن مامستوعب
ذياب لا وينها؟ ليش ماكو
جاه خاف راحت للحمام
يحجي وشفايفه يرجفن يشرحلي ب ايده
ذياب م. م. ماكو من طلعتها دحكتلها وبعد م. اكو
جاه ااهدء اخويه وين راحت مثلا هسه اشوفها.
هز راسه اكثر من مره لازم الحايط مستند عليه كوه واكف على حيله نزلت عيوني الرجله جلده متزلغ حاطيله دهن ابيض
ذياب يلا يبه الله يخليج
جاه اي
فتت جوهه لكيت هاله واكفه شافتني غميتها رادت تحجي وشافت نسوان سكتت رحت للمطبخ لكيت ام عبدالله دا تسوي جاي
جاه خاله وين الحمام
ام عبدالله ليغاد بنتي
جاه شفتي بنيه صغيره هيج بيضه عيونها كبار
ام عبدالله ياهيه مسره؟
جاه لا لابسه عبايه
ام عبدالله لا
هزيت راسي صايره خوفه بگلبي.
رحت للحمام فاتحه دكيت الباب ماجاني صوت فتحته ومالكيت احد
رحت بسرعه الامي خايفه
جاه ماما
فتحت عيونها مستغربه من نبره صوتي
رمله شنو شبيج؟
جاه ج، جوري ماكو
حصه هل بت بس يجي وراها سوالف سكط وخرابه
رمله وين ولت؟
جاه ماعرف
هاله بس لا فلت ويه الزلمه الحاجته وطكاها ذياب من هل سالفه
جاه كافي انجبي ولاتدخلين
رمله لج اختججج وييييييين
جاه والله مادري.
رحت بسرعه طالعه فاتحه الباب جان منطيني ضهره گبل اندار عاكد حواجبه واضح بعيونه الخوف مال راسه هامس وصوته مخنوك
ذياب هين شطبتي؟
بلعت ريكي مجتمعات دموعي هازه راسي نافيه هوه طاح بلكاع ركضت بسرعه اله واكفه يمه
جاه خاف راحت
ذياب عافتني
جاه لا وين تروح مثلاا بس لابلبيت بعدها خاف على صوره ابوي هيه تحب ابوي حيل وعندها صورته تعزها كلش
ذياب راحن ضلوعي راحن.
بس حجاها ب اثنين ايديه رفعهن مخليهن على وجه جسمه كله يرعش.
جاه ذياب راح اكول الحشام يشوفها بلبيت بلكت هناك
ماجاوبني باقي الوضعه بس يهمس ب اسمها ضام وجه ب ايده انقهرت ععلي وخايفه على جوري لاصدك شردت!
ويا خوفي لو كلام هاله جان صحيح.
فتحت باب المجلس لكيت زلم كاعدين شافوني ومنهم اجت عيوني على حشام خزرني رافع نفسه
جاه حشام خويه تعال بسرعه اريد احاجيك
اشرلي براسه اوخر وخرت متنهده حمحم هوه وكام طالع وسد الباب
حشام عش هيج فتي؟
جاه باوع
اندار على اخو وشافه اتقرب يمه مدنك.
حشام ذياب خويه!
اتقرب لازم اطراف رجله يحاول ميأذي
حشام شنو تاذيك حاجييني اخويه اخذك للمستشفى حاجيني يانفسي انتَ
ماجاوبه ذياب وخر ايده عيونه حمر بيهن دموعه سند ايده على الحايط كايم بكوه محدب ضايع حيله
حشام وين خويه ذياب
ماحجى ولاكلمه فتح الباب يمشي ويعرج من رجليه المحتركات
حشام ماراح تحجيلي وين ذياب
اندار هامس بهدوء وبكوه
ذياب الشطبه.
سد الباب واندارلي مامفتهم الموضوع
حشام شنو صار شبلاه اخوي؟
جاه ماعرف جوري ماكو
حشام شنو!
دخلت جوه لكيت ام تلطم وجميله تبجي مفرفحه شلتها اهدي بيها وحصه وغزاله وهاله يحجن على جوري حتى امينه!
امينه شكثر بلا ادب هل بت
جاه والله ماتوقعتها منج خاله
باوعتلي وسكتت دايره وجها ضايجه ضليت اطبطب على جميله افكر حاجيه بيني وبين نفسي
جاه وينج جوري، وينج حبيبتي.
جوري
مرن يومين واني بهذا البيت وحدي فلاح بس يراسلني يكلي اجي بعدين.
رحت للقفص كاعده فاتحه القفل منهم مطلعتهم مخليتهم يطيرن ب الاستقبال
جوري ياطير يامسافر اله. وصله هذا الكلام
. كله حبيبك كله. الليله ابد ماينام
ابتسمت بكسره رحت للمرايه واكفه اباوع الروحي
وجهي مصفر وضعفانه شوي بيدي وخرت شعري اليوره ولان قصير رجعن كذلاتي على كصتي ضجت اوخر بيهن ويرجعن
اندك الباب رحت بسرعه مخليه شال وفاتحته لكيت فلاح لابس قبوط طويل ماروني طوخ على بني ولاف على ركبته لفاف اغمق من لون قبوطه.
فلاح ليش هيج؟
جوري ها
فات بسرعه ساد الباب فاتح عيونه على حيلهن خفت راجعه اليوره لازمه شالي
فلاح من ويييييم عرفففف وييين!
جوري شنو شكو مجاي افهم والله
فلاح ذيااااااااااااب ررررجللج السسسكط ويييين عرففف سيارررره الطلعتي بيهاااا هااااا
جوري والله مادريي والله ماعرف
ضرب الحايط يعيط دخل جوه يدور
فلاح احجيي وين تلفووونج هاا احجي يللااا والله انهبل عليج واموتج هين
جوري ذاك ومحمد ذاك.
راح بسرعه ماخذه يفتش بي ويدور كتب يوزر وطلع حساب ذياب گلبه اكثر واتنهد مبتسم
فلاح كد ثقه عليتي راسي
جوري شبيك مسووودن؟
عطت على دفرته يتقرب ويهمس بنتر
فلاح ممارييد ذياااب احسن مني مارييييده هل ادم بحياااتي ولابحياه اي احد اكررره
جوري وخررررر لاتلزمني
فلاح شكثر اني مسودن وشراني بس
وخر مني رافع حاجبه حاجي بتركيز
فلاح ماحط عيني على عرض الوادم مستوعبه
جوري تحط ماتحط عينك لاتلزمني ماقبلل.
فلاح ناوشيني شغلاتج نتكحز يلا
جوري وين
فلاح احطج ب غير محل هين يضل بالي مثل ماعرف ياسياره طلعتي بيها يعرف محلج وذا عرف اني ماخذج هساع سالفه جثير صعبه
جوري لا اريد اضل هنا
فلاح يلاكييييج شبلااااج ماتسمعين الحجي يول
جوري لاتعيييييط عليه وتراا اكيد يعرف غير اكو كامرااات بس عرف سياررره مايعرف المكان
صفن يفكر وهز راسه مبتسم شوي وضل يضحك بطريقه غريبه ومرعبه صفنت مستغربه منه.
فلاح ذكيه، ههههههههههه، ادحكله عاشگچ
جوري وين عاشكني؟
فلاح طير راس لواء الخاطر عيناج
جوري يا لواء؟
فلاح صالح.
ملت راسي مامفتهمه هوه عافني وراح يطلع صحتله موكفته
جوري فلاح
بدون مايندار ورث جكاره بين شفايفه هامس
فلاح همم.
جوري اذا ردت شخص تجيبه الي
دار وجه إلى رافع حاجبه ضاحك ب استهزاء
فلاح ياهوه؟
جوري نوح تعرفه؟
وخر جكاره بين اصابيعه زافر نفسه يفكر
فلاح نوح نوح، لا ياهوه هذا؟
جوري اريد احاجي تكدر تعرف وين عايش او تجيبلي رقمه
فلاح موسهله حتى انتي ماتردين ذياب وخنتي
گلبت عيوني على كلامه
جوري موهيج بس هذا صديق عزيز عليه حيل
فلاح زتيلي اسمه ثلاثي وسوالفه كلهن واجيبه من جوه الحوش
جوري حوش؟
ضحك جار كرسي كاعد عليه حاط رجل على رجل لازم حذائه الاسود ماخذ نفس ثاني بجكاره لازمها ب ايده ثانيه
فلاح يلا احجيلي، شطبه.
جوري جوري اسمي موشطبه
عدل كعدته مركز بيه
فلاح تمام يلا غردي؟
تذكرت نفس كلمه ذياب نزلت راسي باديه احجي معلومات نوح...
جاه
مررن يومين وذياب ماكو والبيت منگلب گلاب كلها تحجي على جوري وتطعن بيها احنه كعدونه بغير شقه مؤقت امي هم ماراضيه على جوري تسب بيها بس كدامهن دافعلها وتسكتهن
طلعت من شقه معدله عبايتي صافنه لكيت ذياب موجود بكوه يمشي بنفس ملابسه طلع بيهن شعره مخربط وحرك رجله مطكك وجه اصفر وحلكه يابس بكوه يمشي
جاه ذيااااب.
رحتله بسرعه لازمته طاح على ضهري صاير راسه على حجابي
جاه شجاك يااا وين جنت
اسمعه يهمس بصوت ناصي دايخ
ذياب جوري. حمامتي
جاه جوررري موهناا تعال اوديك الماما
ردت امشي ماكدرت فتحت عيوني متوجع ضهري طلع حشام من شقه ثاني شافنه ومشى سريع رافعه
حشام عوفي
جاه شوخر. ماتشوف رجال شلون تعبان مهدود حيله
حشام هساع امشي جوه لايضل بالج امشي الغرفتج
جاه لاخويه شلون.
سمعته يستغفر ضايج ماستمعتله ماشيه راد يودي للغرفه مالتهم وامي فتحت الباب شافته
رمله ياااا ذياب شجاه
جاه تعبان
حشام هساع افوته ينفرد جوه
رمله جيبه جيبه هاله تنگ فوك راسه جيبه
حشام خاله لا
رمله لاتكثر حجي جيبه
تنهد بكوه مشي محدب ماكادر على ثگله وصلنه وكلنا رفعنه ماكدرنه نودي اكثر على قنفه استقبال خليناه طاح على ضهره مغمض عيونه يحرك براسه
ذياب جوريه بابا
رمله سوده بوجهي شصاير بيك حبيبي ابني.
باوعت الامي مستغربه كعدت يمه لازمه ايده متربات ومتجرحات ماعرف منين خلت ايدها على كصته عركان
رمله جسمه حار نار مصخن!
جاه راح اسويله كمادات
حشام اني اجيبله علا...
قبل لايكمل كلامه امي باوعتله ضايجه
رمله اسكت حشام واكعد جاه يلا روحي وصله ومي حار وسويله جاي بليمون
هزيت راسي ردت افوت للمطبخ وفزيت على جره حجابي انداريت وشفته ذياب جار طرف من حجابي يبلع بريكه ويهز براسه نافي
ذياب جوري
رمله هاي جاه.
وخرت ايده من حجابي ماشيه للمطبخ طلعت القوري اسوي جاي وتذكرت اني لابسه من شالات جوري بيهن عطرها
باوعت الحجابي زافره نفسي بحسره رحت للغرفه فاتحه جنطتي طلعت غير شال لابسته وشال ثاني اخذته
رحت يمه مقدمه شال يمه فتح عيونه بكوه شام عطرها لف شال على ايده اكثر من مره حاضنه مخلي على شفايفه يبوس بي ويردد ب اسمها
شطبه.
ضليت صافنه اباوعله بعمري ماضنيت هيج متأثر بيها.
جوري.
صار الليل واني مسويتلي لفه جبن وزعتر مگابله الحمامات اكل
جوري طيبات ها
عضيت منها فاتحه التلفون اگلب بي
جوري نت ضعيف
زفرت نفسي كايمه متقربه يم راوتر جايه شبكه كرطت اظفري مبتسمه لان اجه نت
جوري اي هيج هههه
كعدت يمهن ماخذه الحمامه الرصاصيه بحضني امسح على ريشاتها
جوري عطواتي مشتاقين الذاك البيت؟، اني هم مشتاقتلهم احس
سكتت ضاغطه على شفايفي متذكره كم ذكره واكثريتهن على ذياب هزيت راسي نافيه.
جوري لا، مامشتاقه خيولون، بس جاي احس بوحشه لان وحدي
الحمامه البيضه طارت بعيد عني ضحكت
جوري لايمعودات انتن مونساتني همزين جبتجن موصح نسوري؟
باوعتله لكيته فاتح عيونه طلعته من القفص اباوعله
جوري شو اشوف ليش ماتكدر طير ولك ها
رفعته مبتسمه واختفت ابتسامتي منتبه على رجله حديده ذهبيه منلفه على شكل دويره
قربت رجله قاريه دكه صايره على حديده مكتوب
نسر ذيب
جوري هاي سوالف الطبرجي.
ضجت منزله النسر كمت لكيت كيويه عضيتها هيه وكشرها ضايجه
جوري كل شوي ويصير شي اتذكره هل نذل
اكلتها كلها حاقده على سمعت صوت اشعار درت وجهي ماخذه تلفون شفت فيديو وصور من فلاح
جوري هذا شبي مايدري نت ضعيف هنا
انتضرت يحملن وحده منهن اشتغلت ردت اطلع وانتبهت موجود بصوره ذياب
عكدت حواجبي فايته للصوره ذياب لازم رجال يضرب بي ورجال كله دم!
انتضرت يكمل تحميل الفيديو وايدي على گلبي من خوف فتت للفيديو وجان رجال كاعد وذياب فوكاه يضرب بي ضرب مرعب وقوي على وجه!
الدرجه خفت بسرعه طلعت
جوري شنوو هذااا!
شوي وشاف رساله حاط ايموجي اليضحك ضحكه مستفزه
فلاح عجبج جرائم سيدج المقدم؟
جوري ليش هيج يضربه بس لامات رجال
فلاح لاماميت بس متكسر
جوري على شنو العركه شوكت هاي
فلاح بسببج
جوري ااني شكو!
فلاح ههل زلمه جاب سالفتج وزلمتج انهبل على مثل مادحكتي
جوري مافهمت؟
فلاح راح اتصل واستوعبج كل سالفه وشنو اتسوين وره هل ليله
جوري شنو يعني باجر؟
فلاح اي
جوري شسوي شعندي باجر؟
فلاح هوه موهساع بس ارفع قضيه ويصير اول العابي
جوري ماجاي افتهم؟ شنو اسوي
ماجاوبني شوي واتصل فتحت الاتصال سامعه صوت هوى بارد قوي جايني
فلاح ها جوريه
سكتت شوي وجاوبت بالعه ريكي
جوري ها
بده يحجيلي يوضحلي واني استمعله بدون ماجاوب على شي او اعلق،.
مرة الايام وبيوم طلعت ملابس من كنتور الايراني غسلتهن وسبحت لابستهن طلعت ب ايدي مرجعه شعري اليوره
رحت كاعده بين الحمامات ماده رجليه
جوري اليوم النهايه.
اندك تلفوني واصلني اشعار منه راح يجيني حتى نروح للمحكمه.
تردد بعيوني وسالفه اضنها هينه ك ضرب
باوعت للنسر مالته
جوري ترضى اشهد ضد الرباك؟
نزلت راسي محتاره بس مامرةة كم دقيقه واندك الباب بسرعه لبست العبايه فاتحه الباب شافني لابس مناضره وبحلكه جكاره عطره اشتميته قبل لا يفوت وكاشخ على اخر كشخه.
جوري متاكد رايح محكمه؟
فلاح اش ودحكي سويتلج هديه
جوري شنو هيه؟
فلاح اطلعي ودحكيلها غاد
مافتهمت سديت الباب طالعه صعدت بسياره اليوره هوه نزل مناضره يباوعلي
فلاح سايق ومادري؟
جوري دمشي الله يخليك ترا ابطل.
سكت مشغل سياره درت وجهي للجام وگلبي ماذيني احساس يكلي اعوف هل شغله
مشت سياره وصلنه كدام المحكمه نزلت وشفت كدامي نوح انصدمت راكضتله هوه فرح عيونه يلمعن
نوح الشطببه
جوري شلووونك مشتاقتلك اهواي
ابتسم عيونه دور على تفاصيل ملامحي شعره طولان لابس قميص وضعفان وطولان
جوري ليش هيج ضعفان
نوح ليش هيج صايره حلوه؟
ابتسمت منزله راسي شابكه ايديه سويه سمعت حمحمه فلاح انداريت لكيته يدخن ويعدل بمناظره السود رفع حاجبه مأشرلي ادخل
نوح ععرفت كلشي
جوري خايفه
نوح لاتخافين راح ترتاحين وتخلصين من ضلموج كل هل سنين وتجين وياي
جوري وين اجي وياك ارجع للعماره
نوح حتلو اني اجيج دائما يمج اني صدكي شطبه
ابتسمت ههوه طلع من جيبه علبه بيها محبس شذرته ناعمه
نوح هاي سويته ال...
قبل لايكمل فلاح جراها منه مرجعها بجيبه.
فلاح فوتي راح يفوتنه الوكت يابه
جوري صبرر والله ابطل
استغفر فايت قبلنه اني باوعت النوح
جوري شوي وارجعلك
نوح شطبه ماصدكت لكيتج لاتخلين ذياب يخسرنه بعض.
سكتت مامجاوبه زفرت نفسي بحسره خاطيه خطواتي جوه
باوعت اكو اشخاص قليلهن بيديهن جنط سود يفترون ومنهم منتضرين كاعدين وبيهم اليحجون عصبيين.
لكيت فلاح منتضرني مطفي جكارته مشيت يمه خخايفه جسمي كله يرعش من رعب وشي يكلي كملي وشي يكلي عوفي هل سالفه ولاتشهدين ضد القناص.
كعدنه على كرسي وفلاح انتبه على ايديه ماثابتات
فلاح هدي
جوري ماريد هل شغله
فلاح لاتخلين بالج هل شي ترا تعبان على هل سالفه بكثر شيب ابوي الكواد فا اسكتي لاوالله اترس راسج طلق من هساع
سكتت اتلوى ماعرف شلون راح اسويها!
درع
يول كافيي
ابراهيم انته بيسوي زرب مال اني
درع ياهوه زرب شبلاك.
ابراهيم استغفر الله مو زرب زررراااااب شوف بعين انتا شوف
ضربني على بطني ضحكت موخر ايده
درع هساع شنو ياهوه جابك هين
ابراهيم ذياب مايجي للمحكم؟
سكتت ماحاجي داير وجهي كلهم صاروا موجودين وذياب صاحب المشكله ماكو
درع وينه؟
حصه يريد يلاكي ال خرابه سزز بس الله يعلم وين بيا حضن هيه هساع
رمله احتررررمي نفسج لاوالله هسه احبسج سجون والله اليجيب سيره بنتي بحرف اموته.
هاله خاله شو همن ماتعرفين تحجين بنتج مرر عليها شكثرر وكت وهيه ماكو؟
رمله شرطه وذياب ان شاء لله يلكونهاا واسكتي مالج دخل
نزلت راسها تحرك ب سبحه
رمله عندي امل بذياب يلگاها.
وامل جبير.
رحت اخابره ومايجاوب استغفرت مشغل سياره مطلع موقعه رايحله اجيبه.
جاه ممرر الوكت وصار فوتتنه كعدنه واني توتر ماكلني اكل وتعبانه على جوري كعدنه كلنا على كراسي شوي واجه القاضي ضل يحجي وذياب ماكو
توترنه نباوع للبوابه نريده يجي.
مؤيد سيدي دحكت فل
حصه مارضى احد يحجي على حفيدي هيج والله مثل ماكسرك هساع يموتك
القاضي ضرب على طاوله
هين محكمه احترم
رفع ايده معدل مناضره شفافه
المتهم ماكو!
امينه لاهساع يجي
شنو هساع يجي هين لعبه لو محكمه؟
باوعنه للباب وانفتح فايت درع وراه ذياب عيونه تعبانات ذابله رافع ضهره مبين على وجه التعب
تنهدنه براحه بادي القاضي يحجي.
جوري ضليت خايفه اطكطك ب اصابع ايديه معدله عبايتي
كعدت لازمه بطني.
جوري حبيبي ابني وعدتك اجيب حقك على ضربه ابوك، بس والله ماجاي اكدر
زفرت نفسي منقهره الوب من الخوف
قاعة المحكمة جانت هدوء حيل، بس الهوى بيها كله توتر وتردد وتفكير.
ذياب جان لابس زي دوامه على أچتافه رتبته النجمه ونسر.
القاضي رفع راسه من الورق حجه محمحم
القاضي ذياب فرج، انتَ متهم بالتعدي على المواطن مؤيد محمد يوم 18 احنا نسمع من الشهود واحد واحد، وتجاوبني بجواب واضح مفهوم
مسح على عيونه حاجي بهدوء.
ذياب سيدي اني ما اعتديت، ههوه الذي بده
القاضي ضرب على طاوله احنه معدلين كعدتنه نزع مناظره
القاضي هساع ندحك شاهد الاول يفوت!
الباب انفتح، طلع صوت الباب ينفتح على كيفه اندارينه نباوع لكيت ذياب متجمد كل اطراف جسمه صافن عليها
فاتت جوري لابسه عبايتها الخوف بعيونها وايديها يرعشن قوي عيونها يباوعن على كل الوجوه خايفه
من شافها ذياب اختنك نفسه حاس دمه مايسري بجسمه بعد
رفع حواجبه وحجى بكسره وخذلان
ذياب الحمامه.
القاضي باوعلها واحنه كلنا مصدومين بس صافنين شجاي يصير شجابها معقوله راح تشهد ضده جوري! وين جانت وليش هيج سوت؟
القاضي الشاهده جوري خالد تفضلي تحلفين يمين تحجين صدك لاتكثرين بحجيج ولاتنكصين
ضلت تباوعلنه واكفه دموع بعيونها ردت بهل لحظه اروح واحضنها ماعرف منو خلاها تسوي هيج بس جانت كل نضراتها الذياب طايحه دمعتها على خدها
متلوع گلبها
صعدت وتبلع بريكها مخليه ايدها
جوري اني اشهد احجي الحق
القاضي والله العظيم.
مسحت عيونها من دموع مكمله
جوري والله العظيم
همس بصوت ناصي سامعينه بخفوت واضحه غصته
ذياب وريتي گلب القناص ياصيده.
كرطت اظفرها ترجف مثبته بؤبؤ عينها على ذياب الصارن عيونه حمر مكور ايده ضاغط قوي
القاضي بيوم سالفه متواجده بهل مكان؟
جوري اي
القاضي تصيرين المقدم ذياب فرج زوجته صح؟
جوري اي
درت وجهي اباوعلهم كلهم گالبين خلقتهم على جوري وا اولهم فرج طالعه عيونه من عصبيه
اتقربت حصه تهمس ب اذني.
حصه ابني يطلع من هل سالفه مثل شعرايه بلعجين بس سالفه اختج شنو يطلعهاا!
ماحجيت مرجعه راسي الجوري قاضي يحاجيها وهيه بس تجاوب ب اي وتبجي
القاضي زين. افادتج صارت واضحه تكدرين تكعدين بمكانج بنتي
رجعت نازله كاعده بعيد عنه ضليت اباوعلها اريد اعرف ليش سوت هيج. مرة على جلسه ببحوالي من نص الى ساعه وانتهت مأجله الى اسبوع
طلعنه ولكينه نوف كاعده بره
نوف ها شنو صار شكالوا.
حصه بينما يجمعون الاجراءات والتقرير الطبي يصدرون ان شاء لله الاسبوع بس هاي وينها
جاه بيبي عوفيها
حصه اش لج والله محد يخلصجن مني تردن تزتن حفيدي بلسجن يابنات خالد بسيطه
جوري طلعت حصه ركضتلها جارتها من ايدها
جوري مماما
رمله لج ويييين جنتيي
جاه امي موووهنا احنه بمحكمه الله يخليكم
حصه تررردين تزتين حفيدي بسجووون ولج جوررري اموتج ب ايدي
سكتنه كلنا من طلع ذياب فاك عيونه على حيلهن رافع ضهره ويباوع بثبات الجوري.
جوري اريد اروح عوفوني
حصه ويه عشيكج السزز هاا
ماحسينه اله ذياب اتقرب مكور ايده كاز على سنونه لحظه سريعه جراها من ايدها ساحبها
جوري امييي لااا
رمله يااااا وييين ماخذهاااا
طلعها من المحكمه جارها قوي من ايدها مصعدها السياره هيه تعيط ماتريد ناس كلهم يباوعون مستغربين وهوه قفل البيبان شاخط سياره...