رواية عكد الظفيرة للكاتبة زينب جعفر الفصل الثاني والأربعون
قبل سبع ايام...
مسره
صبحت اكح وطاكه بلاعيمي باوعت الامي تغز بيه قويه
مسره والله كعدت
ام مسره فات الوكت صار ضهر بنتي
تثاوبت كايمه هيه رجعت تسفط بلملابس وتخلي يمها على جربايه مقسمتهن
مسره موحجيتلج اني اسويهن
ام مسره يول بيوم اشوي على اذاناتج بصل
مسره ياا ليش والله حجيتلج اني اسوي الملابس
ام مسره اذا بنتي التفر بيت فر بنضااااااافه ماشاءالله طبعا اجني هين واسوي الملابس
حكيت شعري بالعه ريكي
مسره وصل بسمارج.
عدلت شده ربطتها تباوعلي وتخوزر
ام مسره الحمدلله
لبست حجابي فايته للحمام مغسله وجهي وطلعت لكيت حصه لابسه مناظر تباوع ب ايبادها شافتني ورفعت حاجبها
حصه لا اكلتي لاهاي
مسره تعبانه ونمت شويه اكثر
حصه نمتي جثير تگصدين
ماحجيت وهيه أشرتلي على ساعه وراي انداريت اباوع بطرف عيني ابتسم بتصنع
مسره شنو اسمه بيت خاله رمله بعدهم؟
حصه ناوشيني جكارتي وامشيلهم
مسره جكاره
حصه اول مره؟
مسره جده لايدحكلج شيخ فرج لو يدري.
حصه گلبي متفطر على ابني الميت وهاي تحجيلي فرج
مسره الله يرحمه بس صارله شكثر ميت
حصه ليش الايام تزيحه من بالي تحسبين؟
سكتت داخله الغرفتها ماده ايدي جوه مخدتها جاره باكيتها الجكاير وديته الها صاحت فراس على جداحه ومثل كل مره تحذره مايكول الشيخ فرج وذياب هوه مامهتم يصعد فوك كبل يلعب ب العابه
دخلت للمطبخ لكيت نوف كاعده بلكاع على زاويه لازمه راسها
مسره بعدج تبجين مو شيخ فرج واكف صوبج ويسكتهم.
نوف مادحكتي شلون اذاني
مسره هاله دومها اذيه من طك عندها تلاكينها ضايجه وطلعت حركتها بيج مثل كل مره
نوف وكل مره ضرغام يطكني هيج واي مشكله تطلع عني تسويها هاله هوه واكف صوبها مساندها
مسره خل يمشي يولي عوفيهم
كامت متنهده فاتت غدير مبتسمه بيديها علاكه
غدير دحكن بنووااات.
اندارينه كلنه انضارنه عليها هيه باوعت بكل صفحه تتاكد وحده من الحيايه ماكو وطلعت فستانها بدون اردانات اسود وبي خرز يلمعن فضي وياه جفوف طوال فكيت عيوني متعجبه
مسره جثير حلو جثييرررر
غدير فهد ليله فاتت اعطانياه
مديت ايدي اريد الزمه
مسره عاديي؟
هزت رأسها واني لزمته ذابه نفسي حاسه اريد منه صح تفكيري غلط بس اتربيت واني اشوف العندهم افضل ماحقد وراضيه بنصيبي بس اتمنى.
رجعته الها
مسره بلعافيه
غدير حبيبتي.
باوعت النوف صافنه
غدير نونه ما كافي؟
نوف تلبسينه بلهنه
رجعت ملابسها بلعلاكه لازمه ايد نوف
غدير كلنا تجي ايام يتاذي گلبنه من احد لاتخلين بالج وزيحي كل سالفه تاذيج لان الحياه ماتضل على احد ويجي يوم تخلصين من الكل وتزوجين
نوف هساع دا تواسيني؟
ضربتها تضحك
غدير يا سزز عجل شنو احجيلج
رادت تحجي وحصه صاحتها ركضت رايحه واني درت وجهي اباوعلها
مسره نوف عادي اسألج سؤال؟
نوف سالفه الياهوه؟
مسره شنو؟
نوف سالفه تحجيها المنو
مسره ضرغ...
قبل لااكمل نطق اسمه
نوف مافكر بي لاتخلين بالج
عافتني وراحت صح تصالحنا بس مارجعت علاقتنه مثل قبل نزلت راسي حاسه بذنب حبي اله ماحسيت الا واني صافنه افكر بي
ضرغام بسبس
فزيت لكيته كبالي مبتسم
مسره جده حصه كاعده غاد
ضرغام شنو اسويلها
ماهتم وجراني من ايدي على زاويه الثانيه
ضرغام مشتاقلج
مسره امي هين والله لاتجي
ضرغام ماسوي شي حبيبتي.
مسره ادري شنو اموتك اذا گربت بس اذا دحكولك هيج همن مايرضون
ضرغام كلها جم اسبوع واعرف شغلي وياهم
مسره ماريد اي سالفه تصير من ورايه
ضرغام ابويه جبر يرضى بعلاقتنه
ردت احجي وسمعت صريخ، انخرعنه طالعين بسرعه صاعدين لكيت كلهم صعدوا قبلي وعلى غرفه هاله!
مهى صلي على محممممدد شنو ساالفتج.
ضرغام مافات داير وجه عاكد حواجبه يريدني اشوف شبيها ضليت اباوع من بعيد خايفه ملخه شعرها بشكل يخوف وتسب وتغلط وصوتها عالي خالتها غزاله تريد تسكتها ماكو ترفس ومحتاره شنو تلكى كبالها تشمره
هاله اااااني ككل هل سنين صابررره وتجي زعطووطه يعلك الهااااا ليش هييييج ليش شنووو موحجااالي مايحبهاااا يحببب التذله يعني؟
حصه اكضبي السانج لا اشوي لج اموتج اذا حجيتي على حفيدي بعد
هاله كااافي اتحمللل كافيييي.
صارت تضرب على وجها قوي طايحه بلكاع
مفرفحه روحها
هاله وحقق الله حراااام وحق الله مايصيررر هيييج
لكيت جاه واكفه تخزر ب ساره راحت تحاجيها اتقربت يمهم
جاه ارتاحت دوده البيج؟
ساره كافي اسكتي واطلعن من حياتنه نخلص من اختج تجين انتي
جاه نضل عله على گلبج وهنا نبقى روحي اركعي راسج بلحيطان انتي والخبله هاي
مسره شكو بنات؟
عافتنه جاه طالعه ونوف شايله ورد الترجف قوي خايفه من امها.
هاله ليش هييج ما استااااهل والله هيج يصيرلي الحبب ذياب وبجي عليهااا المفروض إلى لان اني سنين صوبه موجوده وگرباااه ولا استااهل بنتي هيج مريضه وتلعب روح الواااحد بس يدحكلها
غزاله بسرعه ضربتها قوي مصدومه من كلامها
غزاله بنتج هايي بيج شي؟
هاله ماريييدهااا ماريييدكم كللكم مارييدكم
ركضت تريد تجر ورد من ايدي اني لازمتها قوي وههي تسحب بيها فاتحه عيونها على حيلهن تريد تاخذها
امينه عوفيهااا شبلااج انهبلللتي!
اريد اوخرها منها ماكو لزمت شعر ورد قوي وهي صغيره شعرها ناعم بسرعه انجر ضلت تصرخ طفله شايغه روحها
حصه مو ااحاجيج عوفيهااا هااله
بسرعه رحت وياهم اجرجر بيها عبالك تخبلت دفع بينه بس تريد تاخذ بنتها نوف ضلت فاتحه حلكها مصدومه من الخوف عافت البنيه كبل طاحت بلكاع على راسها زادت بجي مغمضه عيونها قوي خايفه تنشغ
جرتها امينه حاضنتها وهاله تصيح جيبوهاا حصه اندارت الهاله تضرب بيها قوي على راسها.
هاله عوووفييييينيي ححححصه
حصه جرت شعرها خازرتها
هيييج تردين طكييين بنتج هااااا هييييج! احجيي
كعدت بلكاع تبجي وجها مخرمش عفناها وطلعنه اولنه امينه تمشي سريع نازله خايفه على طفله كلهم طلعوا وبقيت اني اباوعلها مامفتهمه وضعها
مسره يعني من تردين تاخذين الطفله شنو طكينها؟
سكتت ضاغطه على شفايفها اندارتلي عيونها حمر شرايينها واضحه
هاله ما استاهل هل حياه
مسره هاله اضن ماتعرفين شنو تسوين بضبط؟
هاله اطلعي.
عفتها طالعه نزلت جوه لكيت يردون يسكتون بورد ولازمين راسها صار الليل وانفتح الباب فايت ذياب
جانت خاله رمله وجاه رايحات وسمير طلع بدون م احد يدري وين حشام بلغرفه يرسم وضرغام طلع ويه جماعته فهد اخذ مرته وراحوا للمطعم وشيخ فرج مسافر وباقيين كل واحد بغرفته حصه لازمه راسها ومگابله صوره ابنها وامينه متمدده ونايمه هيه ورد واني وامي باقيين كاعدين يم حصه.
اما نوف بغرفتها ماطلعت لاهيه ولاهاله وغزاله بلغرفه ويه هاله مهى غفت بغرفتها
ذياب السلام عليكم
حجت وصوتها مبحوح
حصه وعليكم السلام حبيبي
ام مسره كل هلا
عكد حواجبه رايح الحصه مدنك
ذياب شبلاه صوتج
حصه مابيه حبيبي ماكل؟
ذياب اي شلون اكل مال فواتح فاتج
حصه ياااا ياهوه مات
ذياب اخو حجي عبود
حصه ياحجي عبود هذا
ذياب ماتعرفينه بس خطيه الله يرحم اخو واضح متاذي علي
حصه اي الاخو عزيز على گلب الله يبعد شر فواتح عنك حبيبي.
راد يكوم وانتبه الورد نايمه يم امينه ابتسم مدنك يبوس بيها مستنشق عطرها
ذياب يايبه يابويه اندارلج فدوه بنيتي ورداتي
نايمه
شالها مخليها بحضنه شايلها على كيفه حتى لاتكعد
حصه عادي كعدها نامت شكثر
ذياب لا ضل نايمه احسن
مسره شيخ ذياب محتاج شي؟
ذياب لا خيتي روحي نامي شدي السبحه وياهم
ضحكت هوه رجع ورد يم امينه
ذياب مسبحينها
حصه اي امينه سبحتها وكلتها ونامت
ذياب خطيه لابارده ادحكلها ترجف
حصه هساع مسره تجيب بعد فراش.
ذياب نزع فروته مغطي بنته مطلع من جيبه سلسال ذهب منقوش على حرفها بالانكليزي لبسها ب ايدها الثانيه
وكام يريد يصعد يمسح على شواربه بهل اثناء نزلت هاله وكفت كباله شعرها مخربط وعيونها كلهن دموع باقي حوالينها حمر شخوط عشوائيه بوجها
ضل صافن يباوعلها مستغرب من وضعها وههي تباوعله برود بس بؤبؤ عينها مركز علي
ذياب هاله شبلاج؟
عافته نازله هوه دار ضهره يباوعلها رادت تاخذ امينه وحصه صاحت
حصه لاااا عوفيها نايمه.
هاله بنتي واريدها.
حصه عوفيها هاله
ذياب شنو صاير؟
هاله حاجيهم اريد بنتي
ذياب انتي شنو بي وجج شو دحكيلي بويه هاله؟
هاله تا احجي اريد بنتي
حصه ماتاخذيها
ذياب صايره سالفه هين ومادري؟
باوعت الذياب مبتسمه مايله وجها
هاله ومن يمتى تدري بينه انتَ؟
ذياب لايطول السانج غير اليوم فاتحه ومشيتلهم
هاله فاتحه لو بنات اليهاتلي حزن
ذياب تا تحجين؟
باوعتلنه حاجيه بحده وكل برود
هاله اني اريد بنتي
حصه اطلعي فوك هاله.
ذياب اخذي بنتج هاله
حصه ذياب شنوحجيت اني!
ذياب تعبان والله مابيه احل سوالفكم
عافنه وصعد داخل الغرفته
حصه مسره طلعي ورد بغرفه البيها ذياب
هاله ياااعجووز لاتخلين راسج برااااسي بنتي بغرفتننه اني وابوهاااا تضل
حصه والغرفه ثانيه مو موجود ابوها
هاله اني اريدهاااا بغررررفتي ماسمعتي ذياااب كافيييي محد يدخللل هاي بنتي انتوا مو احن عليها مني!
ردت اكوم وهاله خزرتني جاره بنتها حاضنتها قوي مثل مهووسه وصاعده فوك ساده الباب وقافلته بعد سكتت اني رجعت للغرفه مالتي انتضر امي تجي
مسره امي ماتنامين
ام مسره لا سمير بره ومادري يمتى يجي
مسره طلع ويه احد؟
ام مسره سمعت كرم يحاجي
مسره هذا هوه لايضل بالج
ام مسره لاشلون وشيخ فرج همن ماكو
مسره شيخ فرج مسافر غير عنده طلابه
ام مسره عجل مايجي شلون حجي هذا
مسره حصه كاعده
ام مسره لاتنام راح اضل كاعده نامي بنتي نامي.
مسره صدك ورد عندها دوه بليل
ام مسره هساع صدك ذياب مايدري بنته مريضه ب التهاب
مسره اي هاله ماتحجيله
ام مسره ابوها غير يدري وتحجيله
مسره تكول تا اعالجها مو خطر
ام مسره شربت دواها ورد؟
مسره لا امينه ماطلعت فوك بعد بس من خلت نوف تمشي تناوشها ملابس من سبحتها
ام مسره خلي احجي الهاله تشرب دواها
مسره ماتدري شنو عوفيها مادحكتي وججها شلون گالبته علينه
هاله.
خليتها على جربايه ساده الباب قافلته اتمددت متنهده ححاسه گلبي محترك حرك كل حيلي رايح تعبانه صار رعيد قوي كبل طفت
هاله فرج موو رمم البييت وره ماحتررك شنو ماسوه هل كهرباااء كل شوي طافيه مايصصير هيج.
كمت متنهده اتلمس جايبه تلفوني اريد اشغل ضوه مايشتغل ماشاحنته بي خمسه ضليت اسب بيهم شامرته بعيد مديت ايدي على جراره لازمه دولكه شربت مي اريد ارجعها وضلمه ماشوف تيهت بين مكانها ومكان جراره طاحت بلكاع سامعه صوت كسرها
هاله هذا الناكصني اني. وين امشي اذا هيج كلهاا كارهتني وما إلى حظ.
خليت ايدي على راسي متذكره دوه ورد ضليت منتضره فوك نص ساعه تجي وماجت كمت امشي على كيفي والزم بشغلات الييمي لحد ماوصلت للميز على ادويتها وادويه ابوها
هاله هساع شنو عرفني اني ياهوه منهم
عرفته من باكيته وكل ضني هوه.
فتحته اادور على صرنجه اسحبلها مالكيت طكت روحي خليت بلقبق راجعه هزيتها قوي كعدت فازه
هاله اشربي.
رفعت راسها مشربتها دوه حسيت بي نصه طاح على ملابسها ماتكدر تشرب الا صرنجه مسحته ب ايدي شامره القبق بعيد مرجعه راسها على المخده
باوعت الايدي بقرف لان ادبكت
هاله دحكتي ابوج؟ حجالي يجيني ونزاح من باله كل كلامه وضل بلغرفه الغاد ليش هيج؟
اتمددت مبعده ايديه المدبكه من دوه بعيد مخليه راسي على راس ورد
هاله لو دحكتي مامهتملنه. كله منها حسبي الله عليها بس.
نزلت دمعتي مباوع الورد ماشوف ملامحها باقيه نايمه اتلمست راسها
هاله سامحيني حبيبتي مو بوعي وردت اطكج.
شكران هسه شنو منو انت ياهو دازك
سمير اوف اوف ام خشم عش هل تكبر؟
باوعت اليوره خايفه لا احد يطلع رجعت خازرته
شكران اعرف كرم بس ماعرفك منو انته
سمير
شكران ادري صخيم شتررييد ابن منو
بكوه يفتح عيونه فركهن باوعلي مبتسم مايل راسه
سمير وصليني البيتي
ردت اسد الباب ولزمه ماد راسه خفت راجعه اليوره
شكران لك وخررر.
سمير ااني اخو ذياااب
شكران والله؟
بلع ريكه بكوه مجاوبني
سمير والله
شكران ليش جاي بنهار ذياب جان هناا شتريد شكو ليش ما اجه هوه وكرم شكلك مجاي افتهم بس تكلي كلي كرم وكلي كرم غير اعرف شحجالك الصخيم الثاني يعني ههسه اني عندي دوام باجر وكاعده مستكعدتلك بدال ماروح ادرس جوه وانوب ههسه اذا ابوي طلع يبوو يبوووو يموووتني والله يموتني هوه منا اخو ميت وذا امي لاحلو تريد انكتل بنعال لو شنو احجي مو احاجيك؟
سمير مسجل ومادري بيج شنو؟
شكران احتررم نفسك كونك رجال غريب واحجي سريع يا اسد الباب
سمير ككرم يريد يحاجي اختج
شكران عزا العزاك وعزاا الكرم ليش؟
سمير مو اختج شنو اسمهاا جوري
شكران ها وليش ماكافي لازك بيها اخوك
سمير حسابها رايح يريده ماعرف رقمها
شكران معليكم بيها معليكم هيه حذفت حسابها حتى لايدز اخبارر ذياب تريد تخلص يلا روح
ماجاوبني يتنوطح رافع راسه بيده بطل يشرب
شكران شجاي تشرب روح يلاا.
هيله شكرااان جيبي شكر وين صرتي
شكران ههسه ماما
رديت الباب راكضه بسرعه جوه موديه العلبه الامي شافتها ورفعت حاجبها
هيله يايمه شجاج گلبي هذا ملح
شكران ها
هيله شكر شكر حبيبتي
باوعت الجوري مدنكه تاكل وتوكل ابنها وياها
شكران جوريه عادي انتي تجيبين الشكر
هيله لاا دزيتج الج روحي يلا
شكران اي نروح اني وياها
جوري هوه شكر شني سالفه
خزرتها اشرلها تكوم وههي مامنتبه ملتهيه ب ابنها توكله
هيله يمه موكلشي توكلينه بعده صغير.
جوري عضام ياكل كلشي هذا
هيله ماشاءالله لاصدك صغير
جوري لاتخافين طالع الابو
سكتنه كلنا نباوعلها هيه انتبهت وغلست راجعه توكله وهوه بيده خاشوكه يطبطب على صينيه
هيله يلا امي
فزيت راجعه للمطبخ فايته للممرر اباوع شفته داخل بطرمه جار دشداشه امي من حبل مخليها على راسه وبكوه واكف
شهكت طالعتله بسرعه
شكران ولك شجاااي تسوي شهرررتنااا
سوه دشداشه امي مثل حجاب لابسه شامر ارداناتها صفح يباوعلي مبتسم
سمير شنو شهرت.
شكران ولك اطلع امي راح تموتني من وراااك روححح لايكعد ابوي همات وتصير عركه
سمير اخ مال عرك صدك
رفع راسه يشرب خليت ايدي على حلكي مصدومه عارفه الجاي يشربه موعصير.
هيله شكرااااان جاي راح يبرررد
مالكيت حل غير ادفع بي اريد اطلعه مايطلع وكل شوي افز على صوت رعيد نزلن دموعي ابجي
شكران عليك العباس ررروح شنووهاييي شثكلك
مايطلع كعد بلكاع متربع عاكد حواجبه مغمض عيونه
سمير اشش مااااطلع اني.
ضليت الطم على وجهي واكمز عيني على باب الممر عارفه امي راح تجي وهو ب اردانات امي يشدشد بيهن على راسه يشرب ويضحك
شكران راح اسبك واسب كرم وياااك ولك اطلع والله اصررخ اعيييييطط ولك اعيييييييط
سمير لاعيب
رفع عينه يشرب استغفرت منداره وكف كلبي من شفت خيال احد يريد يفوت للمطبخ حسيت هنا نهايتي بس ارتاح گلبي من شفتها جوري جايه مضيكه عيونها حاسه شافته وانصدمت
جوري شجابه هذاا نوبب.
شكران عليج الله خلي يطلع والله امي تذبحني اذا عرفت
جوري لك كووووم شنو فرج ملتهي بمشاكل الناس وعايف ولده عليه كل شوي واحد جنكم فيران
سمير جوريه شلونج تعاي اسلم عليج
جوري اتفل عليك اخلص من اخوك تجي انت امشي بره
سمير والله مال طكه موجج سلام انتو
جوري اطلع برره سميررر
كام يتنوطح اني جريت دشداشه امي من راسه جوري بسرعه طلعت تلفونها مطلعه حساب كرم داكه عليه من جاوبها رفضته مراسلته ياخذ سمير.
طلعناه اني وياها وسدينه الباب جوري باوعت الدشداشه امي بيدي وضحكت
جوري مخابيل والله
هيله ليش واكفات بره؟
جوري راح تمطر جنها
هيله ادز وحده اختفت وثانيه هم شهل فهاوه بنات هسه برد الجاي
جوري هسه احمي الج ولايهمج
حضنتها جوري بايستها وامي سكتت اني عفتهم فايته جوه
هيله ليش بيدج دشداشتي
مانتبهت ضاله امشي اتذكر سمير وجوري وعسل يباوعلي ويضحكن ايناس مستغربه مني
هيله يمعوده
شكران ها مماما.
هيله شبيج شنو راح اموت وتتحضنين بدشداشتي
انتبهت ورجعتها الها كاعده بغرفتي مكمله دراستي عايفتهم مرةة الايام وذياب ماكو وعسل كل شوي تذكر بجوري وجوري تضوج وتعوفها
عسل راح يجي يوم سابع وهوه ماكو
جوري شسويله يعني؟ بلعكس احسن ماريد اشوف خلقته
جريت عسل خازرتها
شكران شعليج بي؟
عسل دا اسأل بس تره
شكران ماتشوفيها تضوج عوفيها والله لحيتي
عسل ماقصد تره هذا هوه راح اسكت.
عفتها متمدده اگلب بتلفوني رحت على انستا كاتبه سمير فرج بس ماطلعلي حساب حذفت بحثي مطفيه التلفون
شكران شعليه بي اني هم
هزيت ايدي غامه روحي لكيت ايناس تباوعلي مستغربه
شكران لاعبالج تخبلت
ايناس لعد شنو تسوين
بلعت ريكي ماحاجيه رافعه اجتافاتي اجه يوم سابع وكعدنه نحضر ونطبخ ابوي سوه الجادر هوه وجيران وجان يريد ذياب وياه يساعده بس ماكو لاههوه ولا كرم يخابر بيهم وميجاوبون
شكران جوري
جوري ها عمري.
جاوبتني وهيه منزله راسها تساعدنه
شكران ماريد اضوجج بس موتحسين غريب ماكو اثر الهم
جوري ياهمه؟
شكران ذياب وصاحبه
جوري مادري هاي سوالفهم كل مره يلزكون نوب يختفون لاتخافين مثل حصونه كلشي مايصيرلهم
هزيت راسي مر الوكت لحد ماحجى ابوي ويه امي يكللها جايه اتصال ما الها نفس جوري بسرعه اندارت مصدومه
جوري ياههي ما الها نفس
عبود ورد بنت ذياب مصبحه هيج
شهكت منقهره
شكران سوده بوجهي
ايناس اله بنيه اسمها ورد.
هيله اي خطيه صغيره اشوف ذياب مايجي طلع هيج صاير وياه
درنه انضارنه الجوري لكيناها باقيه واكفه مامستوعبه شافتنه نباوعلها ودارت وجها راجعه مكمله شغل
عسل اليوم ماتت؟
عبود لا يوم ثاني من موت عمجن الله يرحمه
ايناس لا اله الا الله
عسل لازم نروحلهم؟
هيله شنروح مو احنه عدنه فاتحه
عبود لا نروح باجر
عافنه ابوي وطلع ضليت انضاري على جوري لكيتها كل شوي تباوع السليمان خايفه وكل شوي تجيبه يمها ماتخلي يزحف.
هيله يمه خلي يزحف الطفل
جوري لاهنا احسن يمي
وزعنه اكل وابوي وجيران شالوا الچادر بقينه متمدديين تعبانين وجوري ماكعدت ويانه باقيه بغرفتها هيه وسليمان
شكران ليش كعدت وحدها
عسل اصيحها؟
هيله عوفيها تعبت اليوم لاتصيحيها.
جوري
شربت ابني مميه خلصها ونام خليتها على جهه مغطيته زين مخليه حوالينه مخدات اتوضيت ورجعت فارشه سجادتي ومخليه التربه اصلي
خلصت صلاه ساجده ادعي الرب العالمين يحفظلي ابني رفعت راسي ردت اكوم وتذكرت متنهده
رفعت ايديه داعيه حاجيه بصوت ناصي
جوري الله يهدي گلبه بفراگ بنته.
نزلت ايديه صافنه افكر بي واحواله هسه بالاخص ذياب اعرفه يكتم يكتم ويبين نفسه موحزين وينفجر مايحس بروحه شنو من افعال يسوي انداريت اباوع الابني
جوري حبيبي ادعي الابوك
كمت ذابه چادري شايله سجاده متمدده يمه باقيه افكر بذياب قاطع تفكيري اشعار فتحت تلفوني شفته من نوح
كاعده؟
ما جاوبته قافله تلفوني مغمضه عيوني شابگه سليمان اقوى ونايمه بتعب، تحلمت علساس اني بلمنطقه بيها بيت عمو فرج اتمشى واني نفس ملابسه صايه وحجاب ومتربه مثل ماعفتهم اخر مره ورحت.
علساس كلهم متجمعين يهوسون فرحانين واني اباوعلهم اريد اشوف ليش فرحانين وصايرين مثب دائره على شخص ويركصون وناس بيديها سبح وتفر بيها وناس دك قوي ومطر تزخ اني وكفت ماتقربت بعد اكثر يمي غراض قديمه حيل مشمورات بلكاع.
نزلت راسي مانتبهت من هل غراض قديمه غير رتبه عليها نجمه ونسر وكصيبتي مشمورات ومدمرات طين
جوري ليش كصيبتي
ردت ادنك اشيلها وسمعت صوت هلهوله باوعت وشفتها امي واكفه وياهم لابسه عبايتها ومخليه اصابعها على حلكها تهلهل فرحانه طالع شوي شعرها ضليت مستغربه ما اجي يمهم بس بداخلي اريد اركض واشبگها قوي
حسيت گلبي راح يطلع من مكانه من كثر سرعات انباضي احساس غريب برود بعقلي ونيران بگلبي.
دنكت ماده ايديه الترجف مثل سعف لازمه
رتبته وكصيبتي.
رفعت راسي كايمه اباوعلهم من بعيد لازمين اسلاحاتهم ويرمون فرحانين بتقدم رتبته
عقيد.
شفته وسطهم رافع اطراف شواربه بيده سبحه ذهبيه تلمع ولابس ملابس دوامه ورافع ايده يحرك بيها ويضحك مبينات غمازاته على اچتافه رتبه اثنين نجمات ونسر
جوري القناص صار عقيد.
فزيت من نومي محتره وعركانه مسحت على ركبتي صابتلي مي شاربه
جوري دخيلك ربي حتى بلحلم ماخلصانه.
باوعت الابني شفته يتحرك على كيفه عدلت نومته متقربه بايسه خده مغمضه عيوني رجفت ايدي راجعلي مشهد ذياب وهوه يبوسه
جوري ليش كل ماشوفك اتذكره؟
كمت من فراشي لافه عليه غطوه الخفيفه ماشيه ناحيه شباك فاتحته اباوع للمطر القوي متچيه راسي على الحايط
رفعت عيني للسماء شفت ماكو غيوم
جوري هل مره الهلال اليبجي.
طلعت بره ضلمه مجفين الاضويه اشوف خفيف من ضوه خفيف يبقى مشتعل اصفر كعدت بصاله بيدي تلفوني لكيت حاطين القفص الحمامات هنا
جوري زين سوت هيله لاتبردن بره
شمرت تلفوني مطلعه عطيه من القفص مخليته بحضني امسح عليه هوه يحرك جناحاته يريد يطير
جوري كلنا فقدنه عزيز علينا وحتى انتَ الحمام فقدت
مسحت على راسه بهدوء ذابه نفسي بحسره
رجعته للقفص معدله خاولي عليهم حتى يدفون لزمت تلفوني مجاوبه نوح
جوري اي كاعده.
طلعت ولكيت كرم قبل ساعه حاط حاله ضليت صافنه على حسابه متردده افوت لو لا لحد مادخلت لكيته ناشر
كبر وعلى ورد واحد نايم على الكبر وشابگه قوي مامبين هلكد داير وجه على صفحه ثانيه ومن بعيد مصور جاي المطر
اخذت سكرين رايحه للاستوديو مقربتها للصوره اشوفها ادق وعرفته من اصابيعه المحتضنه الگبر
حسيت غصه احتلت بلعومي قربت تلفوني بايسه صورته
كرم كلها راحت ذياب
ماوخر ضال جسمه كله يرجف كل ماله يضغط بشبگته على كبرها.
كرم ذياب
ردت احركه رفع راسه يبجي وجه احمر وشعره مخربط متبهذل وذبلان
كرم خويه كلها مشت البيوتها بعدين نرجعلها ورده
ماحجى ولايكدر يحجي صوته رايح!
اشرلي ب ايده التراجف اانو اروح رجع راسه على كيفه للكبر حاضنه
كرم مايصير هيج ذياب خويه دحك حتى صوتك ماكو موهيج صبر روحك وانت انسان مؤمن بقدر رب العالمين
ماستمعلي احاجي ولاعبالك باله يمي بس دموعه ينزلن على كبر بنته
كرم الكبر جديد اليوم سوو لاتدمر اسمنت دحك تمطر.
استغفرت مدنك يمه ماسح دموعه
كرم لاتاذي كلبي عليك كوم ويايه قناص
صرت وراه مخلي ايديه جوه ايده اجرجر بي ماينجر اقوى سحبته يلا انجر مدمر تراب حط ايده على وجه يبجي قوي
كرم يلا خويه من مات ابويه لو من يجي باله شنو تحجيلي؟ ها موتحجيلي كلنا بهذا درب؟ مو اي احد يموت جدامنه من صحبانه تحجيلي نفس الحجي يلا كوم وياي وصدكني بعدين همن نجي هين.
شاغت روحه كام بكوه ورجله يرجفن ماكدر رجع طاح بلكاع مرجع راسه متچي على كبرها
كرم لايصيبك شي خويه ذياب كووم الله يحفضك
اباوع للمكبره مابيها احد بس احنه حتى اليفتر يحرس المكبره ماشوفه بعيد رجعت انضاري عليه احرك بي مايتحرك
كرم ذياب
ضال نفس وضعه هزيته قوي طاح بضهره عليه فتحت عيوني خايف علي
كرم ذياااب خوييه. اكووو احد هيين. ياواااادم.
اريد اكومه ماكدر وحدي ضربت على وجه باقي مغمى على وجسمه كله يرعش بشكل يخوف حتى شفايفه يرجفن قوي الدرجه سنونه واحد يطك بثاني عاض لسانه
ضليت اضرب بي قوي على وجه راشديات اريده يكعد ماكوو عليت صوتي
كرم ماكوووو هييييين واااادم
استغفرت مطلع تلفوني اريد ادك على احد واجه واحد من اليحرسون المكبره مساعدني اشيله
وديته للمستشفى وعرفت صايبته جلطه!
فرج وزلمه اجو وحصه وياهم بس تلطم وتون على ذياب بقينه منتضرين يصير زين طالع النهار وهوه بعده بلغرفه
واني هناك خابرتني جوري ماكدرت اجاوبها ساد الاتصال مرر الوكت ونسيت جوري اتصل عليها دكت نوف وفتحته
رايح على صفحه مخلي ايدي
كرم ها خويه
نوف شلون صار ذياب؟
كرم ادعيله
بلعت ريكها ردت اسده وحجت
نوف وصلت اوراق
كرم اوراق شنو؟
نوف هساع شوي احاجيك هاله انهبلت تريد تذبح روحها
كرم خوش روحي.
سدت الاتصال مره كم دقيقه ورجعت خابرت فتحته
نوف وصلت اوراق تسمعني
كرم اي اسمعج اوراق شنو
نوف ماعرف اني بس حشام قراهن يكول مال طلاك
رفعت حاجبي مستغرب
كرم طلاك ياهوه؟
نوف جوري وذياب.
جوري
شبگت ابني باقيه كاعده بطرمه اذب اكل للحمامات
شكران جوري الباب
ذبيت بعد اكل للحمامات وبالي مويمهن
شكران جوري ماكدر افتح الباب جاي احط ماسك افتحي، جورررري
اجت يمي داغتني بطرف ايدها باوعتلها فازه
جوري ها
شكران شجاج مو اصيحلج الباب.
ردت اخلي ابني بلكاع وصاحت
شكران لاالا مو الكاع متبلله
جوري ها اي صدك
شكران جوري شبيج؟
ماجاوبتها فايته جوه مخليه ابني وطلعت فاتحه الباب لكيته كبالي
كرم شنو هذا السمعته؟
جوري السلام عليكم؟
كرم ياا سلااااام صدك تحجييييييين!
انخلست من عيطته بلعت ريكي احاول اوازن روحي وما انهار
جوري لاتصيح درع
كرم شنووو لاتصييييح شنووو لج اخووويه بلمستشفى راااح يموووت وانتي داازه اوراق طلاااك ماعندج ضميرررر موتعرفيين بي عاشكچ!
جوري احنه مطلكين اساسا بس ه...
شهكت من دفعني ب ايد وحده داخل وساد الباب شكران ضلت تباوع مصدومه وخايفه منه
كرم ههوهه ساااكت عن الكلب الغااااد المتعلك بيج الخاطررر يدحك الابتسامتج لو ياهوو عدنه هيييج مره متزوجه وتحاجي غيررره وتفضلله عليه وماينحسب طلاااك وتدرين بي شكثر هوه متاذي ومنكسر گلبه على بنته تراا ادري دحكتي للحاله وهساع دازه الاوراق طلاك ياهو علمج عليهن غيرر الكواااد الغاد.
جوري عوف نوح ماله دخل رجال
ضرب على الحايط يعيط وفاتح عيونه عبالك يريد يهجم عليه الا شويه محترك گلبه
كرم عجل شنووو درااااج بهل سوالف غيرر هوهه يعلم بيييج وليش هساااع ليش تدرين هوه صايبته جلطه بسببكم انتو كلكم االغاد موتت بنته وانتي هسااع سنتين حاررمته من ابنه وتردين تطلكين منه
طكت روحي حجيت منزله راسي ماريد يشوف دموعي.
جوري اني مره ولازم اشوف حياتي مامجبوره على ولا مجبور اتحمل هوه انقهر لو مانقهر معليه مالي دخل بي افهمم
كرم صح حقج اتزوجي الكلب الغاد ليش تنقهرين على صاحبي شنو هوه شنو سوه الج مثلاا شنو القدمه الج
جوري ماطولك تعرف ماقدم شي إلى اسكت واطلع معليك لابيه ولابنوح ولابشنو يعلمني
فتح الباب اندار يباوعلي عيونه كلهن دموع نازله دمعته رافع سبابته يحاجيني بتهديد.
كرم الماقدملج شي اخر نضره دحكتها اله وهوه على فراش الموت رجلي طالعه الاحتركن حتى يطلعج ياجوري
باوعتله بسرعه هوه هز راسه
كرم اذا صابه شي بعد لو خسرت اخويه ينزاح من بالي مره لو زلمه اسكطكم كلكم مستوعبين
طلع واني سديت الباب وراه مخليه ايدي على گلبي حاسه الم قوي اجاني
لكيت شكران تباوعلي ماحاجيه شي عفتها فايته جوه
هيله شبي كرم؟
ماحجيت دخلت الغرفتي ساده الباب قافلته كعدت بلكاع اشهك ابجي كل ماريد ابدي حياه جديده يطلعولي ذياب
دائما يذبون لوم عليه ويفكرون بس بمشاعر ذياب ومايفكرون بمشاعري وليش هيج صرت ابتعد منه!
كل مده قبل جان يعذبني بيها ويقارني بهاله محد سأل وكلهم واكفين وياه بس من يصيرله شي يحجون عليه اني!
طلعت تلفوني مراسله نوح
ااجل العرس لاتتقدملي هسه
بسرعه شافها وخابرني جاوبته واني اشهك راد يحجي وسمع شهكاتي همس بصوت ناصي.
نوح صارلج حبيبتي؟
جوري تعبانه والله راح اموت
نوح تردين اجيج؟
مسحت دموعي بكوه حاجيه
جوري لا اني اجيك
نوح خوش انتضرج
سديت الاتصال لبست شالي وعبايه واني دموعي ينزلن وگلبي كل ماله يزيد الم
طلعت شفت سليمان بحضن هيله
هيله شجاج امي حاجيني وين رايحه
جوري ااطلع شوي واج...
سكتت جايه عيني بعين سليمان كبران وصاير نسخه من ابو يباوعلي عاكد حواجبه يريدني اجي
هيله طفل يريدج باعي شلون ضايج
جوري لاماريده
هيله شنو؟
ماحجيت خايفه اباوع سليمان وعبالك اباوعله هوه يأنبني ضميري رغم ادري الحق وياي طلعت بره راكضه زايد البجي مالتي لكيت نوح كبالي لزم ايدي بخوف
نوح بس اهدي واحجيلي شنو شبيج جوريه
جوري ذياب، ذ، ذياب مريض بفراش الموت
نوح شعليج بي جوريه هذا هوه بس يوقع ينتهي كلشي بينج وبينه
باوعتله وهوه لزم وجهي يمسح بدموعي حجيت وكلامي نصه مقطع لان اشهك
جوري ككله بسببي كررم اجاني يكلي نوح العلمج عرف انتي كتلي نطلك اني وذياب.
نوح وذا خلي يعرف وذياب موبسببج مريض انتي ردتي حقج جوريه لو خيولي هاي كلاوات تلكينه منه
جوري لا لااا صدك هوههه مريض صدك حجيه صدك
نوح وذا مريض جوري شنو شعلينه بي؟
باوعتله ساكته بس دموعي ينزلن هوه طلع كلينس ماسحهن
نوح انسي شي اسمه ذياب وكل يصيرله هذا عقاب من رب العالمين على اذيته الج لاتحنين
نزلت راسي منداره امشي
نوح جوري وين
مايلت وجهي هامسه
جوري لاتتقدملي هسه.
راد يحجي عفته ورجعت للبيت داخله بقيت ايام منهاره بغرفتي واكل بروحي اكل
مرة الاشهر واني ونوح نتعارك هوه يريد يزوجني واني أجل بسالفه لحد مابيوم صبحت على دكه باب
رجعت مغمضه عيوني منتضرتهم يفتحونه همه بس محد فتحه كمت متنهده لابسه شالي طالعه شفتهم كلهم نايمين وشكران بدوامها فتحت الباب ماده راسي ولكيته
جوري درع
دار ضهره يباوعلي مضيك عينه
كرم شلونج؟
جوري ذياب شلونه؟
استغرب من سؤالي حاط ايده بجيوب قبوط مالته.
كرم ماجاوبتيني
جوري بشنو
كرم شلونج؟
جوري الحمدلله
هز راسه مطلع اوراق طابكهن قدمهن كدامي
جوري شنو هاي؟
كرم دحكي
فتحتها وعكدت حواجبي مافاهمه شي
جوري ماعرف هوسه
رفع حاجبه مبتسم بتك خد ب استهزاء
كرم مسويتها موقعه وماتعرفين شنو هيه؟
رفعت اچتافاتي ماعارفنه
جوري احجيلي شنوهاي
كرم طلاكج ام كصايب
تذكرت منزله راسي وشفته موقع همست بصوت ناصي
جوري وقع
كرم اي اتزوجي الخنيث بس لايزرعد جثير الج عده مايصير احد يدحكلج بيها.
عضيت شفتي اباوعله ضامه الورقه وره ضهري هازه راسي
جوري تمام
كرم راح تزوجين؟
جوري ان شاء لله
حك حاجبه داير ضهره يريد يمشي وحجيت
جوري ماجاوبتني
وكف مايل راسه
كرم زين هوه.
عافني وصعد سياره ماشي بيها درت وجهي ساده الباب داخله ماخذه نفس
جوري صار تردينه جوري
ضليت صافنه على الاوراق حاسه گلبي منجعص ماعارفه ليش مديت ايديه اتلمس مكان توقيعه.
جوري الله يوفقه.
رحت الغرفتي لكيت ابني كاعد وكايم ابتسمت مشربته مي ذابه الاوراق على صفحه نزعته ملابسه لافه على خاولي مطلعتله ملابس ثانيه
جوري ها سليمانه نسبحج خيه؟
شلته مفوته للحمام مكاسره المي كعدته بلحوض سباحه صغير هوه يخاف ويبجي ضليت اضحك صابه على المي غاسلتله شعره
سليمان امممه
جوري عيون اممه هسه نسبحك جا شنو تريد تضل وصخ ومحد يحبك؟ ها
ضل يبجي مايسمعلي تنهدت شايلته انشفه سديت الحنفيه طالعه هوه يباوعلي مكمل بجي.
جوري طلعنه هذا هوه عليمن البجي
رجعته ملبسته اتراك ومشطه شعره شغلتله تليفون مخليته بلكاع يم عسل ورحت اسوي ريوك سويت على جهه طماطه مكصكصتها راشه ملح وعاصره ليمون عليها ضليت اكل منها
رجعت شفت عسل كاعده تحاجي بسليمان وتبوس ب ايده
عسل ها صباح الخير
جوري صباح النور ليش ممداومه
عسل ممالي خلك وكت دوام بهل نومه الحلوه
ابتسمت وهيه كامت انتبهت للاوراق اخذتهن عاكده حواجبها
عسل شنو هاي جوري؟
سفطت ملابسي نضيفات باوعت وشفتها ب ايدها
جوري طلاكي
عسل شنو نوح وانتي
جوري اني ونوح بعدنه مامتزوجين
عسل لعد منو بس لا ذياب
جوري اي ليش بس لاذياب
عسل لاجوري
جوري شنو لاجوري هذا هوه كل واحد راح بطريقه هوه خلص من مشاكلي وماينقهر بعد واني خلصت من اذيته واذيه كل واحد يعودله
عسل يلا اكو يكولون الحب الاول مجرد درس والحب الثاني ميتعوض
جوري صح بس اني ماحبيت ذياب.
ماحجت اني طلعت ضليت انضف البيت هيله كعدت مخليه سليمان بحضنها ومستغربه مني
هيله بنتي شجاج
ضربت المخدات قوي باوعتلها
جوري ها
هيله شجاي تسوين؟
جوري مخدات احس بيهن تراب جاي اضربهن تردين اشرهن صح لازم اشرهن اني شاره هسه الفراشات يطلعن جراثيم شوي واخلي مخدات لان ماكو مكان
هيله جوري بنتي شسالفه ياهوه راد منج تشتغلين زين منج سويتي صبح ريوك وكنستي شبيج بس تفترين اكعدي
جوري لا اكو شغل اهواي اليوم لازم اسوي.
شمرت مخدات ماخذه وصله مبلله امسح بلغراض ماحسيت الا دمعتي نزلت على خدي مسحتها
راحن ايام العده واني على هذا الحال لحد ما اجى يوم النوح يتقدملي بي بلبدايه حجي عبود ماقتنع لان ما وياه اهله بس من شافني قابله رضى ومادخل بقراري ابد اما خاله هيله هم مادخلت بس واضح موهلكد راضيه.
قررت ابدي حياه جديده وانسى كل الماضي انسى كل اذه اتاذيته وماخلي ابني يعيش العشته وماخلي بلايه اب! قبلت وكلشي صار سريع سريع من خطوبه وره اسبوعين صارت حنه وعرس نفس اليوم كعدت عسل تحني ب ايدي
ايناس جوريه اعذرينه بس وحدنه بس كراي.
قاطعتها مبتسمه
جوري لايمعوده شنو سالفه بلعكس اني اريدها بينه وماريد هوسه باعي حتى لافستان ولاهاي ملابس عندي مال طلعه ولبستها
عسل بس طالعه تشكين المطي
جوري مدح هذا هسه.
ضحكت منزله راسها تريد تكتب بلحنه
جوري ترا بس هيج ب ايدج
عسل لا ايع رسم احلى
ضلت ترسملي واني خنكه بصدري رغم ابينلهم فرحانه بس احس بوحشه جبيره وتوتر وخوف من مصيري ومستقبلي الجديد.!
صار ليل وجيران اجو وصديقات عسل وشكران ايناس ضلت يمي وهيله صح جانت ويايه وفرحانه بيه عبالك بنتها بس امي كل ماتذكرها تنزل دمعتي لا ارادي مجان إلى قرار غير هذا وبالاخص هنا احس نفسي تعبتهم رغم مايحسسوني بهيج الا اني ماكدر اتعب غيري كافي تعبوا عليه كل هل سنين واجه الوكت الاروح بي.
لبست فستان ابيض سنبل بي خرز بي ودلعته مربعه بيها تول حتى من اطراف الاردانات حطوا عليه شال.
باوعت السليمان لابس دشداشه سوده وشماغ ابيض كل شوي يريد ينزعه وايناس تلبسه اله
وحده من نسوان باوعتله
ابنج يخبل ماشاءالله لايگله دشداشه
جوري اي يشبه ابو
باوعتلي مصدومه لان ذكرت ابو انتبهت الروحي مستغفره كايمه ضايجه ححاسه اضلم نوح ومايستاهل اضلمه
رغم ادري صارتلي مشاعر اتجاه نوح.
بس القناص بالي دوم
غسلت وجهي متوتره انداريت لكيت عسل كبالي شاهكه
عسل مكيااااجج ليش هيج غسلتي.
تذكرت لازمه وجهي اجت بسرعه جارتني تعدل بمكياجي حسيت راح ابجي
كل شوي اسوي شي ومانتبه رجعت كاعده على كرسي والمره ماشالت نضراتها مني كل شوي اخطف نضره الها والكاها تحاجي بنسوان وتباوعلي عرفت تفتن الهن انو مناسيه ابو سليمان.
صارت الهلاهل من طب نوح بقاط نيلي وقميص ابيض ضلوا يهوسولنه واني بس منزله راسي انقطع كل تفكيري صار مو وياهم بس صافنه وگلبي يدك سريع خايفه من هل خطوه.
فزيت من حسيتهم ينزلون شال على راسي باوعتلهم مامفتهمه
نوح يلا نروح
باوعتله رامشه اكثر من مره مامستوعبه لزم ايدي مكومني وبنات وراي مطلعاتني هيله تبجي وتهلهل ايناس شمرت ورد ورانه تحجي بصوت عالي فرحانه هيه ونسوان يرددن
شايف خير ومستاهلها. شايف خير ومستاهلها
طلعت منزله راسي وجسمي يرجف بروده صابتني موطبيعيه دا امشي ونوح لازمني ماشوف شي بس كاعيه رفعت شالي شوي اباوع الطريقي.
وكفت سامعه صوت طلقتين انداريت ولكيته واكف بعيد بضلمه.