رواية بين سلاسل العادات للكاتبة كفاية كاظم فصول إضافية الخامس
جاسب يگول...
تدري أنه احبك وأعتقد محد يحبك كدي وتدري أنه من دونك شحس؟ بالدنيا عايش وحدي وما جاي اسولفلك شعر جاي احجي كلشي العندي،!
عباس: زلمة مثل الجبل طاح والطيحة طيحة
الدكاترة تركض تريد بس تنزل ضغطة العلگ
انتهيت من الخوف علية وساعة وساعتين وضغطة ملگ بقة شكد حاولو نزل بس درجتين
خابرت على اهلي خاف يصير بية شي وهما ما يدرون.
اطب يمة وجهة صوفر عيونة جاحظهن على المغذي طالع بس البياض لزمت بيدة الصاحية كاعد بالكاع.
شبيك خوية شني الخلة ضغطك يعلك
بدون لا يعاينلي كال بصوت متحشر كوة يطلع
جاسب: روح لا تخليها تزوج انا كتلها تزوجي
بس اذا تزوجت صدك اموت ماكدر اتحمل
بقيت صافن هاي حالتة كلها علمود رغد
جا شكد يحبها؟ كمت من مكاني.
ياهو الگالك راح تزوج؟
سمعت امها تحاجي مريم
عيوني جمرن لو موتات الزلمة ياهي التفيدنا.
كتلة: وروح جدي جذابات ماكو هيج شي
رغد ماتعوف جهالها شبيك اصحى
جاسب: تنتقم مني وتسويها
مو لهاي الدرجة حاقدة هسة انا رايح
للبيت افهم السالفة واجيك وانت بس اهدأ
خل ضغطك ينزل ولك لو تنجلط لو تنشل
خرب بوجوهن ياهي التفيدك خلي جهالك جدام عينك وارخي اعصابك
اجة رحمان وعمي عفتهم يمة انطوة مهدى وجنة نام رجعت للبيت طاير واعصابي ترجف هسة شسوي نسوان اكتلهن واريح گلبي بيهن عساهن بحضهن وبختهن والله كلت مات الا شوية.
مادخلت جوة ضليت برا جهالة واكفين بالشارع
يكسرون الخاطر اجوني يركضون يسألون علية
نصيت عليهم
مابية شي ابوكم شكو ياهو الگاللكم
حيدر: سمعنا. جا يجذبون علينة عمي عليك الله كول شبية
مابية شي طالع بشغلة وين امكم امشو صيحوها
راحو يركضون دخلت وراهم طلعتلي خايفة وجهالها واكفين يعاينولي طلعت فلوس انطيتهم كتلهم اشترولي جكاير واشترو الكم ما راحو حسو اكو شي صاير بابوهم غوركت عيون حيدر نتر.
ماروح كول شبية ابوي النا كول احنا ولدة
رغد مو مرتة
عباس: شيطان انت خرب عمي روح اشتري مابية شي جاسب بس ولو سالفة مو علية
رغد: روحو ماما حيدر اخذ اخوك واني بعدين اسولفلكم
نترت بيهم امهم يلة مشو وعينهم علينة ضلت
رغد متانية احجي خايفة كتلها.
تدرين جاسب ضغطة معلك لهسة ما نازل
هدومة تنكعت بدمة
ها خطية
تدرين انتي السبب
عاينتلي مصدومة
اني شعلية والله ما محاچيتة.
مخابرتة ذيج وامج تحجي سامعها رغد رضت بالخطابة رجعولهم حجاية خل نحدد يوم خطبة
شوكت والله رفضت والله
رجفت بخوف
عباس: مو تدرين بية يحبج ويموت عليج
ليش تخلينهم يحرگون بگلبة ماطول عرفو انتي نقطة ضعفة كل مرة يسوونها بية چان مات بحضج بختج ولاكولين انا شعلية حتى حرام عليج
زلمة رايدج ماتردين كولي حتى ازوجة من باجر
لا انتي ولا ذيج بعد وجهالها وياة
والله اجيبلة خلقة واخلاق وتربي جهالها وتنسية
شكولجن.
رغد: بقيت جامدة بمكاني من كلامة جان كلش عصبي وجهة احمر قهرني بكلامة دخل للبيت
اخذ ملابس وطلع الجهال من طلع بقو يبجون وراة جلبو اخذنة لابونة باوعلي واخذهم ضليت الوب رجعو بالليل حتى مايحجون
جابهم رحمان كبل راحو نامو سألت رحمان
كال يبات الليلة ضغطة بعدة مامستقر
احس نار بگلبي تلسع كلام عباس ماعافني واني هم حملت روحي السبب شحجي وي امي اروح اتعارك وياها مثلاً صبح الصبح حتى مالي واهس اداوم.
راسي كلش يوجعني بدلت عفت الجهال نايمين
وصيت شروق عليهم وداومت.
بس اتصفن اكول اروح واشوفة ماطول نفس المستشفى وشي يمنعني اروح وارجع صرت ماعندي قرار جنت اريد اروح ودخل هو وعباس
گلبي رف
وحدة الدم فارغة والبنات يسولفن تلكيتهم وصلت كدامة وحسيت على نفسي رجعت ليورة كعد على الكرسي مدنك راسة وجهة تعبان بشكل كانونة بيدة البنات ماتقربن يسحبن دم لان عرفن اقارب
سحب ردن قميصة سجلت اسم ونوع التحليل.
تقربت بيدي التورنكا شديتها على ايدة وهو مدنك راسة عكس ذاك اليوم اكلني بنظراتة عقمت المنطقة واخذت السرنجا طلعت منها هوى
توترت باوعت لعباس يباوعلنا لزمت ايدة باردة سحبت دم بس سحبت الابرة رفع عيونة حمر صايرة فتحت التورنكا كتلة بصوت يرجف
رغد: مابيك غير العافية
البنات الوياي مرحات بشكل كاللة
ذاك اليوم اجيت ما حللت بس زيارة يقصدن يشوفني ضحكن وكملن بس هالمرة اجيت مريض
معافة ان شاءالله
جاسب: رحمة الله والديجن.
كالها وطلعو مشيت وراهن شحجي توترت كلت
عباس
مشة جاسب باوعت لطولة يمشي بتعب على كيفة
نصيت صوتي: شلون صار
زين بس نكمل تحاليلة نطلع
بالسلامة
مشو رجعت للوحدة الدمعة بطرف عيني كعدت وهنا يضحكن.
لج شبية حبيبج والله انقهرنا علية ذيج جيتة وين وهاي وين صدك تعبان
كتلهن واني مدنكة راسي
طليقي
اي المهم اكلج هذا الوياة متزوج
اممم
حرامات كلت اصيدة شلون شكول الله يحفظة.
ماكو مراجعين ولا سالفة يحجن بيها غير عن جاسب بس بشقة وضحكة والا صدك يعننها.
عليج الله اذا ماتردينة كولي
والله عجبني خوش رجال
خزرتهن كلتلجن متزوج
ميخالف هسة انتي شعليج لا اغنيك ولا اخلي رحمة الله تنزل عليك
طلعت برا العيادة ماتخيلتة تطلع تحليلة وتنطية اله من طلعت شفتها يمهم سويت روحي مامهتمة كملت طريقي للحديقة
مادري بروحي شتريد ضعت
صدك لو كالت لا اغنيك ولا اخلي رحمة الله تنزل عليك ماريدة يتزوج ولا ارجعلة.
مريم احس تعودت عليها واحسها اقل من عندي
دائماً اكول اني دارسة واحلى وحتى انظف
بس لو تزوج وحدة بمستواي وبجمالي
ماعرف شيصير بية صح هسة اني مو بذمتة
بس احس محجوز باسم رغد ورغد ماتريدة
هيج جنت احس طول هالسنين متطمنة
انانية ماعرف شيسمونها.
عباس: المحللة بقت تاخذ وتنطي بالحجي عينها على جاسب واضح رايدتة ينطيها مجال وهو بس مرت رغد عيونه لحكتها منا لمن اختفت
تمنيت من كل گلبي يشوف غيرها وحدة تدللة.
تحبة تهتم بية رغد هي بحالة.
ترخص وطلع كملنا شغل بالمستشفى ورجع تعبان كال ماريد ارجع للبيت
اخذك لبيتك
عفس وجهة لعبان روحة كال
لا ماريد
طلع تليفونة يكلب بية وانا سكتت بعد افكر وين اخذة كال امشي علشط اخذتة نزلت عبالي ينزل
مارضة مد ايدة بية التليفون اخذتة منه
عينة علية غمض عيونة تعبان طلعت برا شغلت.
فيديو كاميرات كدام بيتهم مالت جيرانهم هو مامخلي سرعتة وكفت تكسي كدام بيتهم نزلت مرتة تتلفت ولا تدري اكو كاميرات فتحت الباب ودخلت ورة شوية نزل الولد من التكسي ولحكها طولو بالبيت ردتة بس يخلص ماكو رجعت علية
گلبي لاعب ردتة يحجي كال.
من خابرتك كتلك تعال ردت احجي وياك على هذا الموضوع ماردت اروح للبيت خاف افقد واكتلها موت
منين هذا تعرفة
ابن عمها متزوج كل ماروح الكاة عد اهلها.
بايكين خمس ملايين هسة الولد بالمركز لازمينة
خابرت علية الولد مطلعين حليب امة من خشمة
عدها علاقة بيه؟
يحبها قبل لا تزوج بين اهلهم مشاكل
وما مطينها اله راح متزوج وضلت
ماترضة تزوج بس يكول مامتقربلها وبعدهم الولد يدكون علية
شتسوي هسة
اخاف افقد وادخل سجن تالي اخسر الاول والتالي روح انت اتصرف
من شوكت
كلتها وسكتت عرف قصدي كال
ماصارلهم ست اشهر من راجعين
هم جاي قبل لبيتك
لا بس هالمرة علمود الفلوس و.
سكت عفتة حسيت مراجعة الدكتور النفسي جابت نتيجة وياة هل اجة وگالي قبل لا يتصرف
والا هو صدك يفقد.
رحت للبيت هي بيت اهلي من يروح للواجب تروح يم اهلها بس اخر فترة اخوها يجيبها بيدة ويروح
خابرت اهلها وكتلهم على السالفة ضلو مايعرفون يحجون جنهم عدهم علم كال
دخيل لا تخليها يوصلها تموت بيده
هسة احنا جايين ناخذها
وي وصلتي لاكني طالعات رضية وعايشة وهي تبجي كتلهن كالن عدها ولادة كلت من الخوف.
يمكن اخذتهن بس تجيب ناخذ ابنا ونطلك هاي اذا صدك ابنه دخلوها عمليات واهل فوكنا امي مايدرن
يدعلها كلت لاهلها.
الفلوس ترجعونهم ولا حاضر ولا غايب
بقو يحلفون ماواصلهم ربع ومتنازلين على كلشي
يتوسلون بس خلو السالفة بينا كتلهم انا مالي غرض بس منا ناخذ الولد وكلمن بدربة اذا ابنة
بقو يحلفون ابنة وابن عمها ماصارلة هواي راد
سكتت شكولهم تقهر مذلولين ولا استخطيتهم
خابرت جاسب مايرد.
طلعن الممرضات شايلات الطفل لا صوت ولا صرخة تلكتهن امي صرخت كاللها ميت بطنها
حسيت رب العالمين ماراد يعذبة
امي تبجي هي وعايشة وانا احمد الله
لان مات وخلص من الدنيا.
كلت لامي وعايشة يرجعن وهنا يكولن
يااء يمة المرة بعدها مافاكها البنك شلون نعوفها
وخسرت ابنها فوكها
صحت بيهن وامها كالت بخوف
روحن روحن انا اضل يمها.
بقن يخزرن بيه وانا روحي طالعة اخذتهن وبس يحجن علية صعدت وحجيتلهن كلشي ضلن يلطمن يمة البت ماعدها هيج سوالف حرام عليكم
مايريدها يطلكها بدون مايذب حجي عليها
شعر راسي وكف صحت بعصبية
شني شتحجن انتن
صيحت فاقد من كتلهن على الكاميرات سكتن
جاسب مارجع للبيت ولا شفت شكلة
كلبي راح علية ادور هو تعبان وتوة طالع من المستشفى.
كلها درت بالخبر رحمان كال مرجعين فلوسة
والولد لحد هسة بالسجن يكول ماعندي شي.
وياها شكد دكو علية ماحجة غير هيج
خو الجماعة مايدرون ابن عم مرتة
لا يابة شلون
جاسب مناك وملتحق حتى مارجع
والبناء وقفة كتلة ماعدك فلوس انا اكملة مارضى كال لعبت روحي طلكتها سيد ووكلت محامي
اسبوع مر وتعجبت من اجت مرتة لبيتنة
تحلف ما متقربلي بس احتاج فلوس وانطيتة
كال ارجعهن وانا شريفة واخذوني حلفوني
هسة اروح لكربلا احلف جيبو القران
ضلت تبجي وتحلف هي شريفة
محد حجة كالولها انتي وزلمتج.
لطمت تصيح طلكني وراح كالتلها مرت عمي
شبيدنا عليج زلمتج بعد وهج
وابوها طب بالديوان يحجي عفت عمي ساجت
يكلة هي بس مطببة الولد لبيت زلمتها وهو ملتحق وحدهم وفوكها ماخذة فلوسة بدون علم احد هاي واكفة
ابوها يكلة بعد غلطت ونعتذر منكم
كاله هي من الاول مشاكل بينهم وكوة طايقها هسة بعد هالعملة مايريدها يتخبل عمي مو زين
مو جنزها وداها الكم احمدو ربكم جان بالمستشفى
ومريض
سكتو عود رادو يرجعوها بعد الصار.
مرت فترة طلكها محكمة غيابي والتهى جاسب
بالواجبات حتى ماعرفت زعل على ابنة المات لو لا.
سرى: التقيت بية كعدنا نسولف جنت كلش اعصاب وارجف من ورة الصار سألني شبيج
كتلة مابية حجالي على نفسة خلص كال وانتي
شحجي؟ رادلي اكتب قصة عن حياتي واقراها اله ماتكمل بيوم اختصرت كل حياتي بعمري وابني ومنفصلة اتفقنا على المهر وهاي السوالف
كملنا كال اوصلج جان عندة سيارة كتلة مايحتاج بس اصر لان الوقت تاخر
طول الطريق صافنة معقولة هيج بسرعة بسرعة
راح اتزوج وانسى كلشي واعوف الماضي.
لحظات اكول خل ارفض مادامة موجود
گلبي مامرتاح بس كلت لا خل اوافق
بلكت انسى الماضي واطلع من خيالي
العايشة بية سنين وارفض ناس يابو ناس
حتى ابقة عايشة بخيالي.
وارجع اكول لو ما وضعي فلا اتزوج وحيرة حيرتي
وصلني ونزل طلع الباب سلم على ابني
يضحك وياة ويتعرف علية راح كال باجر ادز اهلي خابرت امي كتلها هلهلت بصوت عالي كالت باجر ارجع نزلت دموعي هيج تسوين بية خليتيني ارضخ للواقع.
بس اني وابني بالبيت ليل وصوت الجلاب عالي يخوف حاصنتة كتلة.
سولف محتاجة احد يحجي وياي
بشنو اسولف ماما
اي شي شلون شفت مالك
ماعرف
سكتت كال كون باهر يجي والله حيل اشتاقيتلة
ان شاءالله
ثاني يوم ما داومت
قفلت تليفوني ابني نايم طلعت كعدت بالطرمة.
هوسة براسي صايرة اندك الباب كمت افتحة عبالي امي بس انصدمت من شفتة باهر جنت لابسة تراك نوم ومامخلية شي على راسي صرت ورة الباب كتلة راح ابدل ادخل عفتة الباب مفتوح ودخلت اركض گلبي يدك بسرعة بدلت بسرعة ولفيت شال على شعري متوترة طلعت مادخل لكيتة بالباب
لازمت بالباب جان يدخن وداير وجهة عيوني على ملامحة شصاير بية كلش متغير وضعفان دار وجهة ابتسم وذب الجكارة.
شلونج ام احمد
هلا بيك باهر
ادخل جوة لا تبقة واكف.
فتحت الباب كعدت بالاستقبال كال الوالدة وين
كتلة ماموجودة عد اختها دنك راسة
متريك اسويلك ريوك؟
اذا متريكة سويلي بس جاي
لا والله مامتريكة منتظرة احمد يكعد
وينه هالفصعون
نايم كوم اكعدة
باهر اعتبرة صديقي ابد ما استحي منه اسولف
وياة وهو ابد ماعافني بس هالفترة وعاذرتة
دخل يكعد احمد بس خليت القوري على النار ولحكتة ردت اشوف ردة فعلة من يشوفة
وهو باليل تمنى يجي.
دغدغ خشمة يضحك باهر واحمد فتح عيونة مطنكر: اشلونو الفصعون لك كوم وياك الضابط بااهر ابو عيون جداحة
ماصدك طفر باوعلي وباوعلة باهر سحبة لحضنة يبوس بية وهو ساكت عفتهم رحت اسوي ريوك والضحكة تارسة وجهي سويت مخلمة وبيض عيون اجبان فرغت العندي طلع يضحك فرحان
باهر: عاشت ايدج رادلها بس صمون حار اروح اجيب واجي
طلع واحمد اجة مغسل يضحك
ها الله استجاب لامنيتك تحققت هههه
اني زعلان منه بس شفتة كسر خاطري
تعبان
عفية حبيبي.
جاب باهر صمون وكيمر عرب ومربى من غير الاجبان.
مو عدنا المن جبت
ناكل منو والباقي عيفية بالثلاجة
كعدنا بالاستقبال ناكل ولحد يكول شلون تاكلين كدامة عشت بيتة فترة واعرف باهر شنو
ياكل ويسولف وين جان وشكد مشغول حتى
تليفون مايفتح باوامر عليا.
اكل بشهية واحنا على الواهس كملو شلت الصينية كال جاي سويلي خليت القوري على النار
عزلت المواعين وطلعت كوب جديد صبيتلة واخذتة.
عاشت ايدج
بالعافية
اني هاي نزلتي بوجهي الكم.
احمد: يعني تقنعني مارايح لمرتك تشوفها قبلي
جان يضحك غابت ابتسامتة ونزل الكوب
باهر: اي
اقنعني شنو اي
انفصلنا
شهكت وخليت ايدي على حلكي بقة يباوع بوجهي ساكت: تحجي صدك لو تشاقة؟
صدك ليش الشقى من زمان راحت بطريقها
لا والله مجاي اصدك وبنتك
اخذتها
هي اختارت الطريق الله يوفقها
ماتحملت الوضع كالت لو اني لو شغلك
كتلها من تزوجتيني اني هذا شغلي قابل هسة عرفتي بية كالت ما اتحمل ماتخيلت هيج
صارلكم شكد
خلصت عدتها.
فتحت عيوني على وسعهن
هواي ليش سيلي ما كلتلي
ماتعرف
زين باهر رجعها روح حاول وياها
مايفيد هي تركتني كتلها بس اصبري هالكم شهر اخذ مهمة احصل بيها ترقية وارجع اداوم طبيعي
سدي الموضوع
احسها تحبك وراح ترجعون
جؤ
دروحلها هسة شتخسر بلكت ترجع
حاول وياها
حاولت وياها هواي علمود بتنا ما هماها شي
نست كلشي بيوم وليلة
الجمود احتل ملامحي ضحك وكال
عبالج مثلج بليلة ويوم يتخطن وينسن
دنكت راسي ذكرني بالتخطي كتلة
يمكن تخطيت.
رفعت راسي رفع حواجبة ثنينهم
اجوني خطابة البارحة طلعت اتفقت وي الولد واليوم يجون اهلة
فتح عيونة على وسعهن مامصدك سولفتلة شلون عرفوني وحتى شنو اتفقت وي الولد احمد مو موجود يمنا دائماً من نريد نحجي يعوفنا متعلم
كملت وابتسمت على ملامحة المصدومة
هو هذا عمر بعد على كولتك لازم نتخطى الماضي
سنين اخذ مني وتشوف وضعنا ابني ما ربى وشاف اب عاد اقلها يكبر واكو اب يعلمة يخاف منه
وهم يصير عندة خوان وعائلة
فرك راسة كتلة.
بيك شي
رفع عيونة: تحبينة؟
يااا شحب منه مو كتلك شلون خطبوني
هز راسة اي شوية وراح اجت امي وراة مباشرة فد فرحانة ولا جنها عايفتنا ورايحة خابرتني عمتي الضهر كالت جهزو روحكم اجيبهم واجي العصر
البيت نضيف احمد سابح بقيت بس اني سبحت وطلعت فستان بسيط كاعدة اتمكيج واكول ارفض
وارجع استغفرالله فتحت تليفوني نور اتصلت
جاوبت من ورة خشمي.
الوو
هلو سرى شلونج
الحمدلله
خيرج اليوم ما داومتي
تركت الشغل
ليش
من ورة صديق ابن عمج.
سكت رجعت كالت
باعي والله العظيم جنت كاعدة بمكتب عمر
انتظرة يجي وخابرتج بوقتها اشوفج
اجة فاروق مد راسة يشوف منو
ماعبالي يسويها ويباوع وغلاوة ماما
ميخالف الشغل وتركتة
وشلون تبقين كاعدة دبرتيلج شغل
صدك يمعودة وين تلكين بعد ارجعي وهسة احجي وي عمر على فاروق بعد مايسمعج كلام
هما ثنينهم نفس الطينة قابل هو المدير مايعرف
بية المهم
وهسة شلون والله اهم بيج
لا تهمين حبيبتي راح اتزوج مايحتاج اشتغل.
واني هم تعبت وطلعت روحي من الشغل
اريد اجرب كعدة البيت
صدك تحجين
اي والله
لج شبسرعة
شافوني بالخطوبة وخطبوني ههههههه
حبيبتي ربي يسهلج وشايفة كل الخير
اعزميني وياج
اكيد اعزمج
سديتة منها وكملت ترتيب حضرت الضيافة شوي واجوو نسوانهم امه ومرت عمة وعمتة ومرت اخو
قدمتلهم الضيافة يسولفن وي امي دخلت ابني يسلم عليهن كالت مرة اخو.
يا ابنج جبير عبالنا صغير
شلون يعيش ويانة هذا حرام
سكتت وامة تخزر بيها احمد طلع واني كتلها.
ابني وياي ماعوفة
ردت بس هو جبير مو صغير تكدرين تعوفينة يم بيبيتة
كتلها اعتذر بس مالكم قسمة يمنة
امة بقت تعتذر ونخلي ابنج على راسنة
قفلت راحن وكالن ردولنة خبر رفضت ولعبت روحي من كلام مرت اخو وذنيج ساكتات مأيداتها اتصل بيه هو معليج بيهن متزوجتني اني لو مرت اخوي ماكدرت اكول اي كال رجعيلي خبر وفكري زين.
ثاني يوم لاشغل ولا عمل ضحكت على روحي.
من بقيت هيج حتى مالي واهس اطبخ وامي تحجي وافقي وخوش ناس يا خوش ناس حجايتها فتحت عقلي وصرت افكر اكثر شيسون بابني علبو غريب مليت من حجي امي بدلت وطلعت
كالي وين حضنتة.
نروح لمدينة الالعاب اي مكان نفتر نلعب ناكل
مانرجع الا لليل
سكت وصدك رحنا كاعدين بالمراجيح يباوعلي ويضحك يكلي ماما شكلج صغير عبالك طفلة
دك تليفوني توقعت مالك بس طلع باهر كلي وين انتي
طالعين
وين حتى اجيكم
انطيتة العنوان كال احمد.
ماما باهر شكد حباب ولا انسى من ياخذني يلعبني ويهتم بية وحتى يشتريلي ملابس ومصرف باعي ماما بس اكبر وهو يكبر ومايكدر اني اعتني بية وادارية واخذة للزيارات واسفرة حتى لو ولدة ماتريدة اني اخذة
بعد شيريد باهر
شوية واجة كتلة الكلام الكالة حضنة يبوس بية
انت ابني يول اابني
خنكة حاضنة يبوس براسة باوعلي كال
ها يابة شو تلعبين
ضحكت والله روحي طالعة واجيت اتونس
تعال العب ويانة
باهر: يول بالاستخبارات العب مراجيح
كيفك.
دك تليفوني عمتي ام سجاد كلتلي ها
عمة ماريدهم لعبت روحي كليلهم مالكم قسمة
فكري
فكرت عمة رجعيلهم خبر
سديتة منهم باوعلي باهر گال
ليش؟
باوعت لابني سكتت اندار لاحمد كلة
ابقى العب حنا نتمشى شوية
نزلت من المرجوحة مشيت وياة باوعلي ونصة
شعجب رفضتي مو جنتي قانعة
سولفتلة بحركة وهو ساكت اخير شي كال
لا تضوجين كل خيرة بيها تأخيرة
ضحكت كتلة لا مو هيج كل تأخيرة بيها خيرة
بعد اني ماعرف بهيج سوالف
سكتنا مشينا كال سغى.
راسا صدت عيونا ضحكنا كتلة
اووو صارلك زمان مامجفص بالراء هههههه
تذكرني بالبدايات
احممم صح اريد احجي
كول
امج راح تبقة لو تعوفكم
ماعرف والله بس حسيت تسوي هيج
حتى اتزوج
وشلون تبقين هيج كاعدة وحدج الدنيا اشكال
بيها وانتو وحدكم مايصيغ
الله الحامي
سرحت عيوني ليكدام وهو ساكت شوية وكال
تزوجي واحد زين يحبج ويحب ابنج
وين الگاة هذا هههههه
اني
اختفت ابتسامتي وباوعت بوجهة بقة صافن كمل
يعني سغى اني انفصلت اتقدملج تقبلين بية.
وجهي صار حار بتوتر رديت: شنو
مايحتاج اكلج منو باهر
سكتت واحس گلبي يريد يطلع من صدري اكولها ولاول مرة راح اعترف تندمت لان مانطيتة فرصة وعفتة شكد شفت بس مثلة ماكو.
مشيت مدنكة كال تفكرين لو
ماخليتة يكمل كتلة موافقة
فتح عيونة مامصدك صفنت بعيونة سبحان الخالق شنو من لون يدوخن رد بخفوت
صدك
اي صدك
شعجب وافقتي بسرعة
فرصة ماتتعوض ليش طلبتني للزواج؟
احبكم.
كالها وعيونة تترقب شفافي ارتفعت نفسي كوة جريت النفس: صدك باهر تحبني لو بس تحبة؟
احبكم من ذاك اليوم لهذا اليوم
ومرتك
حجيتها وسكتت نصة كال عوفي كلشي وعوفي الماضي شوكت نتزوج
بقيت مفهية عبالك كل هالكلام حلم
ضحكت وي ضحكتي ضحك
باجر اطش الخبر وجهزي نفسج حتى نعقد
راح لابني واني بقيت بمكاني افكر بكلامة نزلت دموعي جنت خايفة على نفسي وعلى بني وشايلة الف هم بس وي باهر انام رغد لان اعرف هو شنو.
واكيد راح يخليني بقمة السعادة.
لزم احمد من ايدة واخذة يلعبة بالالعاب
كلي اصعدي وياة ماصدكت بقة منتظرنة واحنا نلوحلة ونضحك نزلنا كال يلة خل ناكل
طلعنا من المدينة لمطعم طلب انواع الاكل
بقيت مدنكة راسي طول الكعدة وعيونة تاكل بية قبل يوم ماجانت هاي المشاعر ولا هاي النظرات
سبحان الله شبسرعة كلشي تغير.
مارجعنا للبيت رحنا على دجلة الاجواء كلش حلوة
يمكن هذا جان اجمل يوم بحياتي نسيت كل همومي ورجعت اعيش من جديد.
من رجعت امي جانت معصبة ومنتظرة اكول رفضت الخطابة حتى تنهد علية كتلها
رفضت واجوني غيرهم وافقت كالت منين ذولة
باوعت لابني ابتسمت: باهر خطبني وقبلت
ضحك احمد اجة حضني
صدك ماما راح تزوجينة؟
اممم
امي ردت تهجمين بيتة تردين ومرتة رايحة على شرك شبيج؟
هو بيتة مهجوم تطلكو من زمان
دخلت جوة لليل نام ابني واني ماكدرت انام
راسلني كاعدة رديت اي
شلونج
ههههه زينة
ماتوقعت تفرحين هيج
مارديت استحيت.
نامي باجر اكعدي الصبح روحي للمركز
تسجني؟
دز بصمة يضحك: اعدمج روحي نامي احبج
سديت التليفون مامصدكة گلبي صار طبل وخدودي جمرت باهر يحبني الله شكد حلوة هاي المشاعر فراشات صارت بمعدتي ولاول مرة انام هيج سعيدة من بعد سنين
ثاني يوم كعدت من الصبح يامن يخلص الوقت
استغربتو شخصيتي اي والله حتى اني مستغربة من نفسي لحد يلومني الماضي تعبني واخذ مني سنين بس قهر.
خابرتني صفية تهلهل وفرحانة.
مامصدكة كولو غيرها تضحكون علينا
لا خالة صدك
الله يهنيكم ويسعدكم يابتني مااكدر اوصف فرحتي جهزي نفسج جايتج
واني اجهز نفسي خابرتني نور
ها لج وين الخطوبة لو بطلتي
هههه لا باجر معزومة حبيبتي
ها الله يهنيج عمري
سديته منها وسلينا اتصلت هم مامصدكة
رحنا للمركز وي صفية لليل يلة رجعت صبغ تنضيف اشكال حسيت نفسي زبدة مايعة بدون مكياج وجهي يلمع لمع ثاني يوم الصبح دزو فستان الخطوبة كالو بيتنا الحارث يريدها يمة ماكلت لا.
اجتي نوف من الصبح تضحك وتبوس بية عمتي ام سجاد جابت جناينها وبس تهوس وتضحك
دكول فرحانة الج اكثر من بنتي.
اخذنا انمار للمركز مشغل اغاني بنتة بالصدر تكمز واحمد كاعد ليكدام يكلها لا توكعين وهي ترد علية
هتى هنا لاحعني (حتى هنا لاحگني)
ولج فوك مايخاف عليج
بقت بس تركص تونسنا شكد قبل لانوصل انمار وصى نوف مكياج اوفر ماريد هيج احلى
نوف: اي اي
انمار: اشوفج.
بس وصلنا خلت مكياج اوفر طلعت تموت وي فستانها مالت حوامل واني طلعت شكل ثاني وي فستان العقد فضي وتسريحة نازكة شعري مفتوح
وليورة مرجعتة كذلتي قصيرة كصتها
مكياج وردي اباوع لاخدودي تلمع كبوس براسي وي الفستان ما انزعة غطة شعري احلى من الحجاب.
اخذنا انمار يحجي على مكياج مرتة وهي مغلسة وساكتة خلتة يحجي ويسكت نزلتني صفية وامي ونهى تلكني كعدني بصالتهم جبيرة ومزينة عبالك قاعة كرايبهم التمت واسمع نسوان تحجي يمتها طلك ويمتها تزوج شنو محضرها غلسو عليهن
كمل عقدنا ولا اكدر اصدك بداخلي ادعي هذا اخر عقد ياربي هلاهل وصفكات كلها فرحانة بس مو بكثر باهر يصفك ويضحك باس راسي وصاح لابني يجي
بقى واكف يمي يباوع يضحك كصصنا الكيكة
ولبنسي الذهب احساس ماينوصف.
لزم ايدي بيدة رجفت ايدي ومشاعر حنينة انتقلتلي
باوع بعيوني عيونة تلمع كل ما اصد بيهم اردد سبحان الله دنك راسة وهمس باذني انفاسي حارة قريب من ركبتي كزبرت جلدي.
باهر: طالعة تموتين لا تسطرين تدوخين سغى
خشمة طخ برگبتي سحب نفس طويل غمضت عيوني كالت صفية لك مو هسة كدام العالم كلها تباوع
طبع بوسة قوية برگبتي صخنت
رفع راسة يباوع بوجهي واني راح اوكع من الخجل
باهر: حلالي صفية شلهم غرض.
كالن النسوان بالعافية خالة باوعت لنور تضحك وصفت وي مرة من كرايب باهر الذهب تارسها ترس
صفية: خلصت يلا طلع بعد شكو
بقة يباوع بعيونها مافهمت شيريد ضربتة طلع يضحك وهي دكلة لاحك يمة شبية الرجال شخط مو محترم جان.
شروق: طول الفترة المرت رغد عازلة روحهة ولا شاركت حتى بالكلام عن الموضوع جاسب دوامات اجازة يشوف جهالة ويرجع بهاي الفترة حصل على ترقية وبهاي المناسبة سوينا عزيمة
خطية هو هم نفسيتة تعبانة
رحمان جاب طلي وحيدر يكلة
خالي صار اعلى منك ابوي
ركض وراة رحمان وهما راحو يركضون يضحكون
ويحركون بية ابوي اعلى منك هي هيي
انمار ونوف اجو سفانة من الصبح عدنا وسجى هم اجت هدى طلعت حامل من رحنا للالعاب هي حامل.
وماتدري وعباس طاير من الفرحة.
المطبخ والبيت انترس جداري طبخ وصناديك فواكة
ببسي وماي كالو نتغدى بالبستان
رحنا فرشو الزلم بجهة والنسوان بجهة والولد جابو الجداري كل ثنين شايلين جدر.
نزار: ولكم لاتحركوني جاسب يفيدني
عباس: خاب ماتنجب جاسب
شعلية ابو خبنة جا مو كلها تاكل شني بس جاسب ياكل
نزار: خو انت محامي الدفاع عنة حسرة واحد وجاب طارية
عباس: اخوي وابن عمي لو طحت تفزعلي انت
حيدر يدك على ضهر عباس من دنك يكلة.
عباس تاج وباج زلم الخشنة عمي
عباس: دخل احجي على ابوكم تلبسوني عباية
كعدنا نصب ناس تسوي تشريب
وناس توزع طرشي.
سجى: الله دباع البستان صاير يرد الروح واخيراً تحقق حلمي واهتمو بية
رغد: ماتذكرين شي سجيوة بيمن يذكرج البستان
ضحكت باوعت لارفد كالت
سجى: تعرفت على الاملح استغفرالله مو املح
ابو ريم دكتور ارفد
رغد: بعدة ماماخذ الدكتوراء وصاحت دكتور
سجى: دكتور يا نسوان رجلي دكتوررر.
نزار: سمعنا والعباس سمعنا ارفد دكتورررر
التفتنا عليهم يباوعولنة يضحكون وارفد منصي بتة كاعدة بصفة تفشلت سجيوة كالتلة
هسة انت شعليك محترك دمك
نزار: هيج صارت سجيوة
لاتزعل نزار قباني
ضحكنا عليهم وعباس اجة يوزع فواكة النا وراها رحمان جاب اللبن والببسي كال وزعنا بينجن
سجى: عمي بس نسيبي ابو فضل
جنتل مان يقدر قيمة المراة تعلمو مثلة
رحمان: حجت سجيوة شيسكتها بعد
سجى: ياا شبيكم وياي ترة ازعل.
ضحك صاح بجاسب تعال انگل ويانة
جاسب: بعد ماترقيت؟
اهوو بعد مايتحاجة عمي دروح صوجهم رقوك
جاسب: غصباً عليهم يرقوني بزودي جبتها
عمي نسكت والسكتة اولى
نزار: لا يستاهل ابو حويدر رادلة هوسات
اصبرلي بس يجون جماعتك العبلك لعب
جاسب: ممنون منك ابو يزن
ولو ما مقتنع باسم يزن عمي دغيرة ماطول بعدة زغير يفشل
كلة من ورة اختك انا شعلية ديلة ارتاحت هسة
من كلها تضحك علية
ضحكنا عليهم وزهراء دكول الجذاب هو اختارة.
نريد وحدة توزع الخضرة وللبن وهاي السوالف محد دكول لو كبار والباقي حوامل رغد بس هي المو حامل بينا كامت تصب وتوزع النا صارت سفرتنا كلش طويلة نسوان عمي وبناتهن واحنا جدتي براس السفرة كلساع ومطلعة سالفة تخربنة ضحك وسجيوة تزود عليها جانت كعدة من العمر
كلش تونسنا.
رغد: خلص الغدا كمت اعزل بالمواعين جنت لابسة دشداشة كلش حلوة جنها فستان.
كل ماتصير عيوني على جهتهم عينة علية الكاها جهالة يمة كاعدين يستمعون على الحجي
ورة الغدا تعبت واني جنت بالدوام رجعت للبيت
لحگني كرار وين ماما كتلة تعبانة راح انام
صدك نمت كعدت العصر شروق كالت رغد اني رايحة جمعة حلوة هناك بقيت بس اني بالبيت
اسمع برا الهوسة والضحك حتى جهالي مو يمي بدلت وكشخت اني ما اروح لا وحدة تغثني بكلمة.
بس كلت يم البنات واغلس زلم جانت يمنا طكيتها ركضة خاف يطلعون وي جيتي واني اركض عيني على باب الدونية انركعت برحمان كام يصيح شبيج
عبالي زلم تطلع
طلع جاسب من وراة ماباوعت دخلت وعفتة
بقيت يم البنات نسولف سجى بسرعة سحبتني لغرفة حبوبتي حتى لا يغثني بكلمة اجة كرار يركض يصيح لعلي.
اركض اركض راح يهوسون صحبان ابوي.
علي ركض والبنات ونسوان عمي كلها راحت تباوع ضليت بس اني عندي فضول اشوف وهم استحي لا يكولن ها تريدة شفتهن ملتهيات صرت بين البنات بالحوش شكد جايين وجاسب بنصهن مخلي جهالة كدامة وهما فرحانين بالهوسات اليكولوها لابوهم من خلصو لكيت روحي اضحك بسرعة ابتعدت كبل لايشوفني.
جابو عشا من برا وهم صار خبصة حيدر وكرار
اجوني يضحكون ها يمة هااا شفتي ابوي شصار.
ضحكت لضحكتهم اختهم جلبت بيهم الا تطلع تخاف من امير ابن فارس اخذها كرار وياة
لازمها خطية البنية بقت يم حبوبتها هي من زمان عدها حتى امها ما تكدر تداعي بيها لان شامرتها
علبو بنية مااستفاد منها.
شوية ورجعت ماكدر ابقة بعد هواي ضليت عدهم
هو طاب وطالع صايرة بوجهة من بعد غياب ايام طويلة يشوفني رجعت بدون عشا كرار وياي يابا روح تعشة وياهم ماريد اجة حيدر كلة ابوي يريدك.
ماراح رجع حيدر كوة شايل صينية كلها مشاوي كال هاي عشاكم
منين ولك هاي بگتها
لا ابوي وداها الكم تعشو يلا كال
ماخوذ منها قليل متروسة حتى قواطي ببسي بيها
اكلت وشبعت خابرتني سجيوة كتلها تعالن تغدن يمي.
منيلج ولج
ابني جابلي
قصدج جويسب
لابنة
سكتت ومن اجت كالت هذا كلة لابنة
تضحك سكتت وكل ماتاكل صاحت شلون حب هذا كباب ومعلاك للحبيب
اكلج ماتنجبين
اسكتي لج احترمي يلا
نوف ليش ما اجت وياج.
ضلت مجلبات بيها جا يجبلن بية حتى ملني
جني نزار محد يرحب بيه
خاب ليش تجذبين
اكلي اكلي اكلج صدك ماجبتي هدية
رفعت حاجبي هدية المن؟
لجاسب غير ترقة
شبييج اليوم
صدك ثولة ولج الميدان فرغ تشرطي وارجعي
اذا مايرجع يتوسل لا اموت شني ميتة علية
تردين كل يوم يجي ويعيد الاسطوانة
رغد بليز ارجعي خاب دولي هسة تاخذة هاي ام التحليلات هي كبل وساحلة روحهة
الا هسة
وهي منين ماخذة رقمة
سمعت عن طريق اختي عباس كايللها.
هو الف وحدة تتمناة جان يحجي عليج اي مو تحقدين علية عود هدوة كالت لا دكلليلها
المهم مو رايحين للمستشفى كايلتلهم هذا
رقمي خاف تحتاجونة
واخذة؟
مادري والله اسألية
شكد سخيفة انتي لج اني اسألة هههه
بطرانة
اممم والله طيب من ايد النسيب
شبعت
كلتها وكمت سويت جاي وصبيتلها بقت للعشرة وراحت وشروق ولا تقبل ترجع حتى جهالي
طاشين بعد ماكدرت اطلع بدلت وبقيت اكمل روايتي هاي فرصتي
شروق اجت لهدعش نومت الجهال ونامت تعبانة.
جهالي مارجعو كعدت برا انتظرهم وهم اقرا بالرواية دخل رحمان.
اكلج وين ذولة
وي ابوهم هسة يجون
هزيت راسي اي ودنكت اقرا مات البطل لو شبعت بجي لو ادري يموت ولا قريتها هسة شيسكتني
عفت التليفون على الشحن لبست صاية وشال شمرتة على راسة طلعت اجيبهم وكل ما اتذكر مات البطل ابجي واكول خوش رجال جان عبالك اعرفة.
الاستقبال جان يمة شحاطتين مالت عباس والثانية لجاسب بس هو يلبس هيج نوع كلت اكيد يم ابوهم صحت حيدر كرار ما اجو لا كدرت امد راسي واشوف جاسب من ماردو كلت جوة خاف
رحت جوة كلها نايمة رجعت بسرعة ورديت الباب
رجعت للديونية مديت راسي نايمين ثنينهم وجاسب مخلي الهتفون باذنة مايسمع
دخلت نصي يلا شافني فز ونزع الهتفون من اذنة
ها رغد
بس الجهال
باوعلهم كال نايمين من زمان
عوفهم يمك بس ترة كرار يذب الغطا
خطية يبرد.
ما انطاني گلبي اعوفهم بس كلت خطية يفزون
درت وجهي امشي كال
اوكفي رغد
ردت اكلة دنيا الليل مايصير
شبيج عليمن باجية
رفعت كتفي كتلة تصبح على خير
شبيج مو احجي وياج
دنيا ليل
شمسويلج هسة انا
حتى لو اجيت علمود الجهال وبس واحد يلجحنا يسويها قصة
بنبرة صوت خافتة كال
ماكلتي شبيج باجية
ها اي
مال بركبتة
والله انا حالف ماخليج تبجين حتى عفتج
براحتج ولا تنغثين وتبجين شمسوي والله ما مسوي
لا على البطل بجيت.
صفن بوجهي واني ماكدر اباوعلة لو ابقى كدامة مدري شبية كبل مشيت مشة وراي كال
اكمل البيت لو اعوفة
شعلية اني
المن اكملة غير ما ترجعين
سكتت وتوترت كال
اكملة ها؟
كملة.