رواية بين سلاسل العادات للكاتبة كفاية كاظم فصول إضافية الثالث
رغد: خفت كلش حسيت اكو شي مو طبيعي همست باذني خايفة: احجي رغد فدوه سوي روحج مشتاقتلي احضنيني احضنيني
حضنتها اباوع للشارع هوسة ماميزت شي شوية ورفعت راسها باوعت للشارع تتلفت جرت نفس وانغمى عليها صرت ارجف اكعد بيها والناس التمت جابت مي ترش عليها هبطتني فتحت عيونها كوة
شفتها يابسة كالت: كوميني فدوه
تكدرين تمشين؟
هزت راسها باي وحاولت تنهض روحها كومتها كتلها وين تصعدين باوعتلي متوسلة: عادي اجي وياج.
انصدمت وبنفس الوقت خفت وراها شي واني ماناقصة بس ماكدرت اردها هزيت راسي باي واخذتها وياي بتكسي طول الطريق ماحجت شي
بس تبجي وترجف حاولت اهديها نفس وضعها
وصلت لبيتتا نزلتها باوعتلي ومسحت دموعها كالت
ملاك: ماريد اسببلج احراج بس صدكي مضطرة
يا حراج هذا امشي هسة انتي بيا حال
ولعلمج بيتنا فارغ بس اني ومرت اخوي
اخوي بشغلة
تطمنت نوعاً ما دخلنا لاكتنا شروق مستغربة.
كتلها صديقتي رحبت بيها اخذتها للحمام كتلها اجيبلج ملابس ماقبلت كعدت تعبانة صافنة
ذبيت شالي افرك بشعري دخلو جهالي اجوني يركضون بوستهم يباوعون لملاك كتلهم
خالة مريضة
بقو واكفين يباوعولها صاحتلهم راحلها بس كرار حيدر بقة واكف باوعت بوجهة نزلت دموعها وحضنتة بقوة كالت بدون وعي.
ملاك: فدوه ربي ماياخذ بنتي فدوه
لزمت كرار من ادية كلتلة ودموعها تنزل
ملاك: يكولون دعوة الاطفال مستجابة.
حبابين ادعو بنتي تبقى يمي ماياخذها ابوها
مسح دموعها كرار كللها
هسة خالة ادعيلج هواي وانتي جيبي بنتج
وضلي يمنا مانخلية ياخذها
حيدر: نكسر ضهرة بس يجي ابوي ضابط وخالي ضابط يسجنونة ويكتلونة كتل معدل
ابتسمت ومدت ايدها اله راحلها باستة
الله يحفظكم عيوني انتو
جابت شروق غدة وهي ماتقبل تاكل كوة جبرتها
اكلي بس حتى يتوازن ضغطج شبيج
اكلت شوية وكالت اروح لزمتها من ايدها
وين رايحة
لبيتي
احجيلي شبيج يمكن اكدر اساعدج.
محد يكدر يساعدني بس رب العالمين
ادعولي كون ينسانة ونعيش براحتنا
زوجج
اي زوجج
شني سالفتج انتي
بعدين اسولفلج
رغد: راحت تخابر بعيد شوية واجت رتبت حجابها ومسحت وجههة باوعتلي كالت: شكراً حبيبتي ما انساها الج
وين رايحة
لبيتي
ردتها تبقى اكثر ماقبلت كتلها
خاف يلگاج
لا اني من اجيت وياج ضيعتة
طلعت خلتني بحيرة وخوف عليها عدى كم يوم وهي ماكو خفت اكثر عليها وعلى بنتها وبداخلي فضول اعرف سالفتها واكول لو ما متأذية منه.
ماتشرد هي وبتها منه.
واني راجعة من الدوام شفت جاسب واكف والعمال يشتغلون بيتة جهالة واكفين يمة حيدر مخلي ادية ورة ضهرة مثلة وكرار يلعب باوعلي حيدر اجة يركض وجاسب ذب الجكارة من حلكة لزمت بيد حيدر، ومشيت للبيت قبل لا ندخل باوع بوجهي حيدر عيونة مدمعة كال.
ماما هذا بيتنا بابا كال الكم
سكتت ماعرف شكلة خاف احجي ويبقى يبجي دخلت وهو وراي يردد: والله بيتنا ونكعد بية بس يخلص.
طلع بعد ما رجع بس كرار يروح ويرجع علية اسألة على اخوة يكلي يم بابا اسكت عنة راحت شروق الهم رجعت دكلي.
ولج هذا حيدر عبالك شريكتة مريم يخزر بيها خزر
مايحبها
ومو بس مايحبها لا يشمر بالحجي عليهاولج صدمني منين جايب هالسان شو انتي فقيرة
عبالك شايب
ياريت بس لسان تتفكيرة يخوفني ويخليني احسب الف حساب.
ثاني يوم بالطلعة صار بوجهي جاسب خفت شصاير صار بالي يم الجهال ولا عبالك كل فترة اشوفة كبال المستشفى منتظرني اطلع حتى بس يشوفني ومن اصعد يلا يحرك بس هالمرة لا فتح الجامة اشرلي اصعد وكفت قريب منه كتتلة
صاير شي
بعدين تعرفين اصعدي
صعدت خايفة اسألة شكو شصاير التفتت دور عيونة بملامحي كال ماكو شي وحرك
جريت نفس الجو هدوء سألتة: وين ماخذني
سكت شوية ورد
شوية احجي وياج
نفخت بملل ودرت وجهي على الجامة.
طبك سيارتة بحديقة عامة كلها شجر وفي
بيها صبات كعدة نزل كدامي وفتحلي الباب صفنت بوجهة ورجف گلبي لحد هلحظة بعدني اخاف منه
نزلت مشة كدامي التفتت علية وكفت طلع كلنس
مسح الصبات كعد واشرلي اجي كعدت بمسافة عنة
بقة يباوعلي ساكت نظراتة خلت اطرافي ترجف باوع بعيوني وگال
جاسب: ادري بعمرج كله ماحبيتيني
ومن احجي مايعجبج حچيي بس اكلج مو علمودي
علمود ولدنا فكري بيهم شوية
رجفت شفتي وكتلة
خبلتهم علية ماجانو هيج
ذب حسرة وكال.
كبرو وصار يفتهمون انا ما احچي شي جدامهم
سكتت دنك راسة وكال
هذا البيت بنيتة الكم علمود كرار وحيدر
ماعاجبني وضعهم
ميخالف ادزهم الك
ضرب على رجلة وكال بحركة
لج حيدر يبجي يگلي خلينا كلنا نكعد بية
يريدة اله يكول بيتي وانا كتلة اسجلة باسمك
بس...
سكت وباوعلي واني كوة كاعدة الحرارة صعدت لعيوني صار زمن ماكعدت وياة وحجيت
جانت نظراتة متوسلة مشتاقة هايمة بملامحي
جاسب: اطلكها ونعيش انا وياج ولدنا بيت واحد.
انتفضت وهزيت راسي بالنفي نزلت دموعي لا ارادي كمل.
عاجبج هذا الوضع؟
لا انا عايش ولا انتي ولا جهالنا محد بينة مرتاح
اكسري غرورج شوية واتنازلي
مرتاحين احنا شعلينا بيك
كلتها ومسحت دموعي لو شما اصير قوية اضعف كدامة وارجع رغد الضعيفة.
مرتاحين!
جهالج مرتاحة؟ تضحكين على روحج عليمن
لج تدرين شيسولفون كبل لا اروح لو گلبج من حجر حن عليهم
عيونة صارت دم وغوركت راساً دار وجهة وسكت يمسح بيهن رجع كمل وهو منطيني ضهرة.
خاف جنت عايز زودوها علية بحچيهم
كعدتي وياهم هسة انتي سألتيهم مرتاحين لا؟
سألتيهم شيتمنون؟ سألتيهم شيريدون؟
ما سألتهم لو سألتهم جان هزت گلبج حچايتهم
باوعلي مخنزر مندمج يحجي
بلة جاسب تكرهينة من يوم يومج مامرة حبيتية ولا ردتية ولا باوعتيلة وطبني طوب حاولت ردت مو غصب المحبة وما اجت
الجهال شني ذنبهم اذا اهلهم ماتفاهمو
هه شوف منو يحجي شوف.
انا اعترفت بغلطتي وتعلمت منها بس انتي ماتعترفين بغلطج وذبيتي الصوج كلة مني
چا هي اجت الدخان بدون نار؟
تروح وترجع على الماضي على الصخام
ا...
قاطعني برود
ما اجيت افتح الدفاتر العتيكة بس اجاوبج وهسة بعد هالسنين خل نصحح الغلط ونرتب اوضاعنا
المرة واطلكها وارجعي
بقة يباوع بعيوني واني بس اهز براسي والرجفة لازمتني.
جاسب: عوفي العناد وارجعي لخاطر جهالج
ههههه وجهالك من مرتك ماتريدهم؟
ذولاك وحد وذولة وحد تصلح شي وتخرب شي
بساعة عصبية مو بس زواجي غلط حتى الاختيار جان غلط لا ترهم ام ولاترهم زوجة
البنية ومالها علاقة بيها والبطنها ماتحن علية
وتشمرة مثل ماشمرت اختة
انا ماعايش ما عااااايش ولا جهالي عايشين
ما اقبل ماقبل
كلتها بصوت يرجف وعقلي مو راضي ينسى ولا راضي يخليني اتعايش يرجعلي الذكريات وشعوري بيهن.
اقسملج قسم وكلمة رجال ما اتقربلج ماطول مارايدتني حدج جهالج كعدة على صينية وحدة وبيت واحد وها هي والله ماجبرج علية
ولا اريدج الي
غلط غلط مايصير
رغد انسي والله تندمت مو الف مرة مليون مررة
عرفت روحي ماكدر اعيش بدونج ولا إلى نفس بشي بعدج كلشي مخربط حياتي وحتى انا مخربط لميني
كالها ومال راسة عيونة جمرن والدموع تلالت بيهن.
جاسب: انا لو احبج من سنة وسنتين انساج واعيش وي غيرج بس انا احبج من سنييين سنييين مامرة كتلج ولا حسستج ماتفهمين هالشي رغد رغد عوفي عوفي عنادج والله جاسب بيدج
هالمرة وظيفتج وبيتج وجهالج بس ارجعي
ماترديني احجي عادي عادي
خليت ايدي على حلگي وبجيت
رغد: دمرتنا انت جاسب والله دمرتنا
جاسب: ماترجعين؟
روحي تارسها الحقد والانتقام تمنيت اشوفة منكسر وبهذا حالة بس ما ارتاحيت من شفتة هيج عبالي افرح بس صار العكس جان يباوع لعيوني بحذر قرة الرفض كمل باخر كلام يحدد مصيرنا.
حتى من اطلكها ماترجعين؟
سكتت ودنكت راسي ارجف بس كلمتة هزتني هززز
وصدمتني خلت عقلي يوكف.
جاسب: تزوجي وخلصيني منج تزوجي خليني اأيس من رجعتج خليني احس على نفسي واعيش مثل البشر بلكت اذا صرتي حلال غيري استحرم وما اذكرج بلكت انساج تزوووجي روحي بعييييد عنيييي
صرخ اخر كلامة وصار يضرب على راسة بجنون ودموعة تنزل وكفت مذهولة جاسب يبجي معقولة وعليمن يبجي علية نزلت دموعي على رغد!
بقة يضرب براسة ويصيح
تزوجي واحد خارج المحافظة اطلعي منا المن باقية المن تضيعين مستقبلج ومستقبلي.
لا انتي تعيشين ولا تخليني اعيش وارتاح
روحي تزوجي اطلعج من نفسي
وجهالج بروحي اضمهم بس رررروحي
وعوفي كلشي
وجهة انطعن احمر وخشمة طك دم ما واعي على نفسة حاولت الزم ادية اذاني مو بس اذى روحة تعودت اشوفة شامخ مايهمة شي
لزمت ادية كوة ورفعت راسة عيونة صارت بعيوني يردد.
تزوجي روحي الله وياج
انسي جاسب انسية وادعيلي انساج
هزيت راسي اي وطلعت كلنس امسح دم خشمة
وهو يحجي بحركة.
روحي رغد والله روحي ما اوكف هالمرة بطريقج ولا اطرد الخطابة التجي روحي بلكت تطلع روحي
وارجع بشر من جديد
صرخت بية بعصبية
كااافي بس كااافي اسكتتت
مسحت خشمة وماتحملت ابقى اكثر اذا ابقى اوكع
علي وجهي عفتة بكعدتة مكسور ومشيت مارجعت لبيتنا رحت لبيت فارس اريد سفانة صارت كدام عيوني ردتها تلمني بحنيتها وتنصحني بعقلها
فتحتلي الباب وجهي احمرر وعيوني تهل دمع
اكثر شي اثر بية من كالي تزوجي هالكلمة خبلتني.
شلون كالها وهو حتى اليريد يجي يخطب يرجعة
وبس يسمع يكلب البيت حتى صارو يخافون لا يسمع جاية خطابة.
فتحلي امير الباب انصدم طبيت ادور عليها
بس شافتني منهارة فتحتلي ذرعانها وضمتني لصدرها تمسح على ضهري واني اشهك كوة اتنفس
نزعت شالي وغسلت وجهي كعدت مابية حيل
خلتني بحضنها واني احجيلها ببجي وشهكة
كلساع اغص بالكلمة.
تعبت ونمت للعصر يلا كعدت غسلت بس صافنة عبالي الصار حلم والكلام السمعتة هم بالحلم.
جابتلي اكل وحلفتني اكل اكلت شوية وطلعت برا للحديقة كاعدة وحدي جابتلي جاي وكعدت يمي
سفانة: خابرت على شروق كلتلها رغد عازمتها على الغدة وبقت جهالج بالبيت كالت ماخليهم يطلعون
درت وجهي عليها ملت براسي
رغد: هسة اني صح لو هو؟
سفانة: ثنينكم مو ثح انا اكول انطية فرثة
هو يريدج ويموت عليج وكلها تدري بعد اذا يطلك
شعندج من عذر
ماكدر هي عدها جهال مو ضابطه
وانتي شعليج بيها عدها ماعدها جهال
هما بينهم يتثافون.
صعبة هاي سنين گلبي برد منه
حجينة هواي وما وصلت وياي لنتيجة
رغد ترسها الحقد وماحسبت لاحد حساب.
سرى: افزع منو واحجي لمنو حيلي باد طلعت افتر بالشوارع واسئل اهل الاسواق بلكت مشتري منهم
لزمتني دوخة والكاع فرت بية بعد ماكدرت امشي كعدت عيني على الشارع وانخى يرجع للبيت
لهناك واشوفة يركض ينكت بملابسة ويرتب بشعرة من شافني وكف وصار يمشي على كيفة صار كدامي خاف مني هو اني شوكت خوفتة
كمت على حيلي صحت بوجهة
لك وين جنت
بيت صاحبي
ضربتة راجدي بقوة ايدي
لتكذبببب
ملابسة كلهن وصخ وادية سود مصخمة.
شرد يركض للبيت بجيت بحركة گلب
دخلت امي تحجي علية والباب مايقبل يفتحة غسلت اعصابي ترجف بقيت امي تعشت ونامت بقيت انتظرة يطلع سمعت الباب انفتح على كيف
عرفتة راح للحمام شوية ودخل بقة واكف بالباب
غمضت عيوني اتمالك اعصابي
تعال ناكل
اجة بهدوء كمت صبيت اكل كعدنا ناكل بهدوء مدنك راسة ياكل جف ايدي طابع بوجهة انسدت نفسي اول مرة اضربة خلص راد يكوم جلبت بية
سولفلي وين جنت؟
كتلج ماما يم صديقي
لا تكذب مفهوم احجي الصدك.
هذا الصدك قابل وين رحت
لطمت على رجلي
من هسة ماكدر عليك لو كبرت شتسووووي
من شافني عصبية كام من مكانة صحت بية يرجع نتفاهم كال: ماما هسة عصبية بعدين نتفاهم
خدي بعدة حار ترة
تستااااهل خوش بسيطة الا اخابر باهر يجي
يطيح حضك انت صاير ماتنلزم
هز ايدة وضحك باستهزاء كال
هو باهر بحالي وبحالج بعد
ماتسكتين وتنسين باهر
سكتت ماعرفت اتفاهم وياة واني عصبية دخلت لكيتة نايم تعبان لعبت بشعرة ودموعي نزلت.
ليش هيج تخوفني عليك بلة صارلك شي وانت صغير ماتعرف الدنيا شبيها.
حضنتة ونمت الصبح كاعد يكتب دروسة سويت الريوك كعدنا نتريك واني القن بية مو تطلع مو مو تروح منا ومنا وهو يهز براسة اي وصيت امي وطلعت لدوامي دخلت لغرفة المدير سلمت وبصمت يخزر بية من باوعتلة دنك طلعت سويت كهوتة ورجعت قدمتها رجعت لمكاني اشتغل.
للضهر جنت واكفة على الطابعة واني ماعرفلها كلش
نسيت الحجوة إلى البارحة طبعت الاوراق ودزيتهن.
كعدت اشتغل على الحاسبة ماكو شوية ودزو علية
كال رئيس القسم طالبج واني ماندل بس غرفة المدير سألت يلا اندليت دكيت الباب كال تفضل
دخلت تذكرتة استاذ فاروق.
السلام عليكم
فاروق: وعليكم السلام
بيدة الاوراق لازمهن بطرف اصبعة كال
هاي طباعة هاي؟
تقربت سحبتهن من ايدة تفشلت احس وجهي صخن
كتلة بتوتر: اعتذر استاذ بس لان بعدني جديدة
هسة اعدلهن
ثبت ادية على الميز مخليهن جوة فكة وبس يباوع.
استأذنت وطلعت طبعت مرة لخ هم مو مضبوط رجعت اطبع مرة ثالثة صار فوك راسي وترني بالزايد شمرت الاوراق بالزبل وكفت جديد كال بجرئة مامتوقعتها.
فاروق: اوف شلون خدود حمرة هاااي اشتعلت صفحة ذيج الناس
رفعت راسي عاكدة حواجبي ومخنزرة بوجهة
سرى: استاذ احترم نفسك شنو هالكلام
ضحك كال
فاروق: اسف اسف اني عادي احجي هيج وي الموضفات بس التلاثينيات نفسيات طلعن.
رجعت خزرتة هسة هذا شرد علية واني البارحة توضفت لا والنوب رئيس القسم كتلة برسمية.
بالضبط ماحب الشقى ولا هيج كلام
دنكت اريد اطبع سحب الورق وصار بصفي يطبع ابتعدت صار يطبع ويعلم كمل نص الاوراق وكف كال: يلة دورج الباقيات كمليهن
تمام بس شوية لو سمحت
ها ها اعتذر. ولو هي المسافة عادية
يامن يصبرني واخلص كملت كالت عاشت ايدج
رتبهن وكال: كهوة ست سرى.
هزيت راسي باي سويت واخذتها بداخلي استغفرالله شنو عاملة اني كهوة ما كهوة
وين جنت بذاك شغلي مدللة هنا لا شغلي ولا يتعاملون وياي بشهادتي الحمدلله على كل حال
دكيت الباب دخلت خليتها على ميزة كال
اشكد صارلج منفصلة؟
اعتقد مو المكان للشغل مو للاستفسارات الشخصية
ردت امشي ورجع كال
فاروق: اااوف يالثلاثينية شكد جادة
تفاديت الشر وماردت اخسر وضيفتي طلعت فوراً منزعجة كلش شجلب ثلاثينية ما ثلاثينية.
كملت شغل بس جان الراتب قليل اشوف اجو عمال شفت مسائي فكرت اشتغل شفتين ماطول ماعندي شي وهم راتبي يزيد عاد يوصل للمليون حتى لو اقل من المليون.
رحت للغرفة المدير طلع كتلة
استاذ عادي شوية من وقتك
باوع لساعتة وكال
اعتذر ماعندي ولا شوية فاروووق
اشر بيدة شفت استاذ عمر طالع من مكتبة مشة مستعجل وكلة: شوف سرى شتريد
ضرب على صدرة وكال بنبرة متلاعبة يمي.
كلت بكلبي لا هلا رجعت لمكتبي الم الاوراق واخذ جنطتي وصل يم مكتبي باصابعة يضرب على المكتبة ويدندن.
اتفضلي ست سرى شردتي
ها. اي ردت اشتغل شفت مسائي يصير؟
اذا حابة يصير طبعاً بس شغلتج شوية تختلف
تصير
ميخالف شوكت اكدر ابلش
من هسة اذا حابة
فرحت شوية وكال
شفت المسائي كلة زلم وانتي تلاثينية
وضحك صحت بية بعصبية
انت شنو من بشررر كلسااع وكلت تلاثينية ما تلاثينية منووو يمك عسى ما خمسينية
شعليييك وليش كلساع عايدهااا.
بس اعصابج مو ردت احذرج شغل المسائي يختلف
كالها وغمز اخذت جنطتي وطلعت صايرة نار صاح وراي: والشغل ليش ليش ااه
من انعل ابوك لابو الوكت الخلاني بحاجة هيج شغل رجعت للبيت من وكت اخذت مسواك ورجعت لكيت صديق احمد بالشارع كلي
خالة احمد شوكت يرجع
عكدت حاجبي كتلة
لعد هو مو بالبيت
لا خالة طلع من زمان
وين طلع؟
كلتها وحيلي راح نزلت العلاليك من ايدي كال
راح يشتغل بالتقاطع
لطمت على راسي صحت لولد من المنطقة كتلة.
فدوة وصل المسواك للبيت
اجة يركض اخذهن مني واني طلعت للتقاطع اشوفة مشيت لمن فحطت واني منا روحي ممرودة
ضليت اباوع بعيوني بلكت اشوفة ماكدر امشي بعد
لهناك وشفتة يركض بيدة كلنس يفتر على السيارات الا شوية انجلطت مشيت سريع
هو جاي ليكدام شافني ركض شارد مني ركضت وراة وماحس الا روحي مشمورة بالشارع والناس فوك راسي والشرطة اجت اريد افتح عيوني واميز الدنيا تفتر بية انطوني مي اشرب وصوت الرجال يصدع باذني يصيح.
والله هي شمرت روحهة لو ما وكفت جان هسة مكسرة
جسمي يون علية سالوني الشرطة
تكدرين تمشين ناخذج للمستشفى
الرجال يصيح
وكفتها والله وكفتها ما انضربت حيل
كمت وعيوني صارت علية صاير ورة الناس مخلية ايدة على حلكة ودموعة تهل دمع انكسر گلبي علية فتحتلة ايدي اجة يركض ضم روحة بحضني يرجف.
اسف ماما والله ما اعيدها بعد اكعد
بالبيت نحجي اسندني هسة
بقة لازم ايدي امشي على كيف دايخة بعدني
طول الطريق يمسح بدموعة
كافي حبيبي.
هسة لو صاير بيج شي
سكت يبجي بستة براسة وصلنا للبيت وهو كايدني
بس وصلت تمددت وغطيت عيوني وهو يفتر علية غفيت خطية لليل كعدني يهمس.
ماما كومي اتعشي بدلي ماما زينة انتي
فتحت عيوني وجهة اصفر وخايف
سحبتة حضنتة: ليش هيج حبيبي بعدنا بالبداية
ليش تشلع گلبي عليك وتأذيني
والله بعد ما اعيدها والقران شكبرة
اخر مرة اطلع ابيع
وانت منو عاتب عليك بس گلي
كاتلنة الجوع مثلاً؟ ابو الايجار واكفلنة بالشارع.
انقهرت ليش بس انتي تشتغلين واتعبين
واني كاعد هي الزلم تشتغل وتنطي للنسوان وانتي بس تشتغلين كلت اشتغل اجمع فلوس حتى من يصيرن هواي تبطلين من الشغل وتصرفين منهن
نزلت دموعي حضنتة اقوة ابوس بية
بعدك صغير يا روح امك عيش حياتك
عيش طفولتك اني ما اشتغل عمالة بمكتب ومرتاحة لا حر ولا برد
اوعدني بعد ماتطلع ولا تشلع گلبي يلا حبيبي انطيني وعد كلمة رجال
وعد يلا بس كومي نتعشى ترة اني جوعان وبيبي اكلت من زمان.
كمت غسلت وبدلت علسرعة شغلت تلفزيون وكعدنا ناكل ونتابع دك تليفوني طفر جابة كال
ام روزة
ابتسمت واخذتة منه فتحت خط ضلينا نسولف وتشكي من الحمل.
نوف: يابة دخل يجي ابني للدنيا الا اسوي عصابة اني وياة بسيطة روز وابو القضايا
انمار يضحك يكللها
اسحبة وياي نصير عصابة ضدج
نوف: مو بكيفكمممم ابني إلى حتى اخذة وياي للصيدلية على عنادج هي هي هي هي
وروز اجتها تركض حضنتها
لا مامي اني اهبج
نوف: وماتحبين بابا
اهبج واهب بابا.
لا غش هذا اني لو بابا
روز: اتي وبابا
تونسنا على سوالفهم وعركاتهم الكيوت سديت الاتصال وفرشت فراشنا نهى مراسلتني اريد اجيكم كتبتلها هلا بيج وسديتة.
ثاني يوم داومت بس وصلت هناك لزمتني الصخونة وعضامي تون علية كوة امشي المدير كلعادة بس يخوزر بس ذاك لا بس يدردم اول ماشافني جنت مخلية راسي على المكتب نط
ها سلامات سلامات بس لا حسدتج خيرج
مارديت علية كال هو
عود ردت كهوة بس هسة بطلت من شفتج.
صدك ايدج شلونها لازم تچوي احوووي
گلبت عيوني ودرت وجهي مالي خلگة والنبي
دخل جوة يم المدير طلع هو يطبع ويحجي
حتى ما اتعبهم بس كون يغزر
كون التفتت علية كال شدكولين سرى يغزر
سكتت دنكت راسي اكتب كال بحدة
مو احجي ويااج ليش تجاهليني
كوة طلع صوتي وحجيت
أستاذ مريضة
سكت واخذ الاوراق مشة وجهة مكلوب يريدني ادك سوالف وياة بطران من طلع المدير كلي
اذا ناوية تشتغلين بالمسائي كليلي حتى احجزلج مقعد.
فكرت اكول لا من تذكرت كلام استاذ عمر بس كلت يجذب واني شعلية بشغلي وهم اكون بيتي هاي فرصة كتلة: ان شاءالله اشتغل من باجر يبدي دوامي
طلع خلصت شغلي وطلعت استاذ عمر جان بسيارتة يريد يحرك شافني صاح اصعدي اوصلج
هزيت راسي وابتعدت ولا عبالك رجعت للبيت فتحلي احمد الباب نهاوي يمنا.
خطية تنطي مصرف لامي كل ماتجي وتجيب ملابس لاحمد جنت تعبانة امي مسولفتلها على ضربة السيارة مايدرن بالباقي تعذرت منها ورحت نمت لان كلش تعبانة بالليل اجة زوجها اخذهم
ثاني يوم داومت لاحظت استاذ عمر غير اسلوبةة
عبالك غير واحد صار رسمي وجدي حتى كهوة مايطلب مني بس اني من اشوفة يدخل يم المدير اجيبلهم ثنينهم.
خلص الشفت الصباحي وكلها الموظفين طلعت حتى المدير الشركة فرغت خفت وحدي ضليت احسب دقايق شوكت موظفين المسائي يجون
اجاني استاذ فاروق گلي.
بدا وقت دوامج اتحولي على شغلج
كالها وراح واني عيني على الباب كعدت بالصالة متروسة حواسيب بس اني بيها شوية وطفت الكهرباء.
شروق: كل يوم العصر اروح لبيت جدي اتونس يمهم والجهال يم حبوبتهم تحبهم وانوب ارجع
جلبو بية للعشا رحمان مو بالبيت بقيت تعشينا
هدوة تسوي جاي واني وياها نسولف
مريم عد اهلهة طب جاسب جهالة وراة دخلو اسمعة كللهم
روحو لبيتكم هسة اجيكم
طلعو ضايجين جانو عمامي ملتمين وحبوباتي ونسوان عمي كالهم
جاسب: يابة اريد اطلك مرتي.
وكلها ضلت تحجي ماراضين ليش وليش والمرة حبلة وهو يصيح: اطلك اطلك لعبانة روحي وكوة متحمل لا اريدها ولا تدنى نفسي عليها
المن ضالة عندي خليها تشوف حياتها
امة كلتلة
اطلك وتضل شني نيتك
صاح بيهم
ترة انا روحي طالعة لو شتحجون مايفيد اطلك كتلكم وهاي اجيت انطيكم خبر
والحاضر والغايب
انطيها واخلص بس تعوف جهالي ولو هي شامرتهم
حبوبتي كالتلة
عاد خل تجيب ولك حبوبا شسالفتك انت.
وي الطلاك خاف تالي مثل ذيج الوحدة لا حضت برجيلها ولا خذت سيد علي.
جان قصدهم من يطلك رغد ماترجعلة وهي صدك قافلة تخاف من طاري جاسب كلة.
رجعت كلت لرغد ماردت علية بقت اتابع روايتها
علي الصامت.
ثاني يوم اجة حيدر مطنكر يكلي
لا هلة ولا مرحبا هم اجت
كتلة ياهي كال
السعلوة
ياا ياهي هاي
رد كرار مريم مريم
ويهز بيدة فكيت حلكي هاي مو راح تطلك شعدها جاية الفضول اخذني رحتلهم تبجي وتتوسل نقنع جاسب مايطلكها وهي ماتريد تطلك وجهالي وين يرحون ومن هذا الكلام.
كالت بس خل يحط سكف البيت.
حتى اهلي ما اروحلهم اضلن يمكم كدام بيتكم
حيدر جان برا سامعها وطب متخبل عبالك زلمة خرب يصكر صكر من صغرة عبالك جاسب سبحان الله.
حيدر: هذا بيتنا ما تكعدين بية لو تموووتين
صاحت علية
انجب انت لسانك شطولة روح خل امك تنطيك تربية
حيدر: منطيتني امي تربية اذا تعرفينها
جانت يمها طاسة ستيل شالتها وركعتها بيه.
راح يطفر وكلها ضلت تحجي عليها لان ضربتة وطفل صغير طلعت وراة يصرخ اريد اشوف مكان الضربة خاف تأذة مايخليني الزمة يكلي
خابري ابوي خل يجي خابرية
راح كرار يركض عبالة شوف شيسوي ثاري خابر ابوة وهو نازل شوية وطلعت مريم لازمة بطنها
تمشي كالتلة.
ها شبيك ياا خاب حرگت كلبي وهو وحدة محترك ماردت اطگك تعال ابوسك يلا
نتر بيها
اي اي تعاي بوسيني خفتي من ابوي.
طلع برا يبجي احس هاي حركتة لان كالت اكعد بالبيت والله احسة گلب هالولد يختلف عن جهالنا كلهم طلعت وراة اجة جاسب اخذة وراح حتى ماطبو جوة.
اجت رغد من الدوام وكرار سولفلها تخبلت عبالها انكسرت رجلة وابوة اخذة للمستشفى كوة سكتناها ضلت متانيتة بالمطبخ خابرت جاسب من مبايلهم كال شوية وراجعين.
ضلت رغد تنود علية طب هو وابوة لازمة بيدة مبتسم ابتسامة انتصار ولازم بيدة ورقة راح لامة يركض ويبوس بيها التمو يشوفونة عبالهم بية شي لازم وجة امه مسح خدودها وضحك وجاسب شغل جكارة يتأملة.
حيدر: ماما لا تبجين باعي باعي
انطاها الورقة فتحتها وباوعت لجاسب كال
فرحان بابا حيدر بعلاجك
ضحك وطفر حضن رجل ابوة وجاسب يلعب بشعرة كالت امة.
وين اخذتة ورحت طيرت كلوبنا
جاسب: رحت سجلت البيت باسم حيدر.
بس يكبر يتصرف بية وما دام هو قاصر لا يتاجر ولا ينباع وحتى ماينسكن بية بعد شتريد حيدر
ماخليتة بنفسك
كلها سكتت ماكدرو يحجون بس مريم من سمعت طلعت تصيح: وجهالي شني حيدر ابن الاميرة
پرود رد عليها
هو اخوهم الجبير يعرف يتصرف
الله يقدرني واسجل باسمة املاك
وين اكعدد تريد
جاسب: ياهو كالج تعاي لاهلج يلا اطلعي لا اسحلج لا عبالج ساكتلج على طكة حيدر بس جي كدام العالم ماريد اهينج
دخلت جوة وهو شمر الجكارة من حلكة.
رغد اخذت جهالها وشالت الورقة خلتها بيدي كالت
انطيها الها رجعت لبيتي ومريم عمامي تدخلوة كالولة عوفها يمنا يم جهالها وهو يصيح الا اطلكها
طلعوة وبعد ما رجع رحت اركض لبيتي بس اني باقية اجمع اخبار حتى جهالي عافوني
رجعت للبيت هدوء رغد مخلية جهالها على البلازما
وهي تقرا رواية صاح عليها رحمان عمت عيونج راحت
وهي فاصلة ساعة تعكد حواجبها ساعة تضحك كتلة كلة من ورة زهيرة وهديوة علمنها
خزرني كال
وين جنتي انتي.
ها خل اكعد اسولفلك
كعدت وهو خازرني ضحكت وسولفتلة كل الصار بقى ساكت ما علق بس يباوع لحيدر كلي
سبع هالولد
ضحك وكال لرغد تنوم الجهال وياها سويتلها باي وهي رجعت تقرا ثاني يوم العصر سمعت مريم راجعة لبيتها القديم استغربت شلون اقتنع
كلت يمكن لان رغد رفضت ترجع كال خل ارجعها
اجت هدوة يمنا هي وابنها رغد تراسل كنالها بسجى؟ اتصلي بيها كالت لا ملاك
وبقت تراسل.
اجت عمتي علينة كالت ها رغد
راح تخلصين من هالرنة.
كالتها شكو ردت وهي فرحانة
خطابة وشلون ناس وشلون ولد
كلها تتمناة.
ملاك: خايفة ومرعوبة افتر اتاكد البيبان مسدودة
واني بيدي سادتهن رحت اتخبل من وراة
لا يمة ارتاحيت ولا من شردت منه رجعت يم بنتي
عمرها تلث سنوات اسمها ملك
ارجع للبدايات
بغداد الاعظمية
من واني طفلة ماما وبابا منفصلين عشت يم بيت جدي اهل بابا ماما تزوجت وعافتني اسست حياتها ولا سألت عني كبرت درست بطلت نست عدها بنية اسمها ملاك بس جابتني لهلدنيا بابا من عمري اربع سنين هاجر للسويد وهناك تزوج وخلف جهال.
كون اسرة واني بقيت لا ام ولا اب.
جدو وبيبي ينقهرون علية ويتحسبون على اهلي كل يوم لا محد بيهم سأل عني هما صارولي اب وام عماتي جانن شابات هم شاركن بتربيتي جنت اسمي بيبي ماما وجدو بابا
من كبرت جدو توفة
عماتي تزوجن بقت بيبي مرة جبيرة بس اني الاهتم بيها وكل خوفي لا اخسرها مثل ماخسرت جدو.
دخلت جامعة بغداد بمعدل يقبلني تحليلات مرضية.
جنت كلش شاطرة بهاي الفترة عايشة بس اني وبيبي بالبيت عندي عمام ثنين واحد انقتل بشبابة واحد محكوم مؤبد وبابا تمرضت بيبي والدنيا ضاكت بيه.
اخذتها للمستشفى كلي الدكتور محتاجة عملية
بالعراق مو ناجحة الا بالخارج تسفرونها
خابرت عماتي اجن كتلهن جمعلها فلوس واني اعرف حالتهن المادية ماتساعد تعذرن وكالن
ماعدنا لو عدنا هي امنا مانقصر عنها
ملاك: وشلون نعوفها تموت
هسة نخابر ابوج بلكت يحولنة فلوس تبقى امة.
اني بابا لليوم ماحاجية وياة حاقدة علية وكارهتة ولا معترفة بوجودة اليسالني اكلة ميت
خابرنة وهوسة الجهال يمة يتعاركون طلعت برا
ماتحملت اسمعهم ولا اسمع صوتة ليش اني مو بنتة ماحاول يسفرني اله ويعيشني بعزة!؟
جنت امسح بعيوني وطلعت عمتي تحجي علية والثانية تغلط عرفت يكول ماعندي عماتي بقن كم يوم ورجعن لبيتهم بوقت الدوام تجي وحدة من عماتي يمها ومن ارجع تروح لبيتها
بيبي إلى هي امي دتموت كدام عيني.
حضرت محاضرتين بنص المحاضرة طلعت مختنكة بس تذكرتها كعدت بالحديقة شعري صار جواي جان كلش طويل اشكر بية كسرات وخرتة على صفحة بالكاع ودموعي تنزل خايفة شلون حفارگ بيبي لان تعبت حالتها.
ول ول اشتعلت صفحة البچاج
رفعت راسي الشمس اجت بعيوني صار بجهتها ولد صفن بوجهي وكال: اعطيني اسمو وحگج يجيج لتحت رجليكِ
مسحت وجهي وكتلة
محد مأذيني
كعد نص كعدة مقابيلي
عجل عليش تبجين شهگاتج كطعتو لگلبي.
بلعت ريك وهو عيونة تنتقل بملامحي كتلة
امور خاصة ابتعد منا فدوه
تردين تبجين؟
هزيت راسي اي شفتي ترجف كال
بس افتحي اثمك وكولي اشرايدة
بس تخيلت بيبي تموت وتعوفني بجيت اكثر وهو باقي بمكانة.
امسحي عيونج يول
انطاني كلنس مسحت ولميت شعري رفعتة كعكة
انتبهتلة صافن علية مفهي كمت بسرعة كام يمسح بشواربة رفعت راسي اباوعلة كتلة شكراً ومشيت
طلعت من الجامعة احسة يمشي وراي بس طلعت من الجامعة كال: دحجيلي.
خفگ گلبي بخوف التفتت كتلة
شرايد مني؟
تنقل بنظراتة بعيوني كال وهو مركز بيهن
سنان اسمي
استغفر الله شدخلني بيك
عوفني الله يخليك
نترتها ومشيت للبيت وراها بيبي حالتها ساءت
اكثر ناخذها للمستشفى كالو مانفيدها احنة لحكو عليها بقيناها يمهم لان دكاترة موجودين داومت علمود الامتحانات جاوبت شلون ماكان وطلعت للمستشفى وصلت جانت فاقدة كعدت بالكاع ابجي والدكتور يهدي بية ويحجي سمعت صوتة يكل للدكتور.
اشبيها الحجية.
كلة الدكتور شتقربلها رد علية
اهلها
رفعت راسي مصدومة بجيتة وكلمة اهلها
واني لا اعرفة الدكتور شرحلة حالة بيبي باوعلي وكال: ان شاءالله الاسبوع ناخذها للهند
بقيت اباوعلة مصدومة رفعت ايدي احجي بحركة
ياهند انت تحجي وحدك هو احنا منيلنة فلوس
راح الدكتور وهو يكلي
امشيها على فلوس اني اتكفل علاجها
رفضت لان ماعرفة عاف رقمة وكال من تفكرين عدل رجعيلي خبر ومر اليوم واني مامصدكة خابرتة ثاني يوم افتهم منه اجاني صوتة خشن.
جنة نايم رد:
سنان: منهو
ملاك
احاااا ملاك ول اسم على مسمى
عفوا بس اريد افتهم كلامك البارحة
شنو تسفرها للهند
اسفرها هسااع عجل اخليج تبجين
الموضوع مو مال شقة تعرف شكد التكاليف
جوة رجليج
انت ليش تسوي هيج صارحني
ماحب اشوفج تبجين لو ضايجة
سكتت افكر بكلامة وهو يجر حسرات فزيت على صوت عمتي تصيح ماتت امي راحت من ادينة.
ابشع ايام حياتي تمنيت ماما وبابا ميتين بيومها ولا بيبي انمردت روحي خلصت الفاتحة اني بالمستشفى نايمة مادري بالدنيا وعلى المغذيات
ب
يوم فتحت شفتة سنان يباوعلي درت عيوني صافنة
مالي روح حسيتة قريب مني بعد خصلات شعري من وجهي كال.
سنان: مو كافي كومي ترحميلها لاتعذبينها اكثر
مايصلح الحزن على الميت
بقة كل يوم يمي يحجي علية يواسي بية ماعافني
رغم اني مو بحالة ولا اعرف شنو يريد بالضبط.
رجعت اداوم جسد بلا روح لا احجي لا واشكي
عماتي ماقبلن ابقى وحدي بالبيت كالن تعاي يمنه علبو بنية شابة مادري يريدن يبيعن البيت ويتقاسمنة
بقيت عايشة يم عمتي ما مرتاحة ابد
اداوم مرحلة ثالثة
سنان صرت يوم عن يوم احبة ابد ما عافني
ومن سألتة كلي حبيتج من جنتي اولى ادحكلج
صار يحجيلي عن اهلة هو من سكنة الانبار
عندة شقة كاعدة بيها هو وصديقة
اهلة عدهم خير ناس شيوخ
وعدهم حلال وشغل خير من الله.
علاقتي جانت بية سلام هو متخرج بس يجي علمودي من يصح اله مجال
وهيج مرت ايام كل مايفتح موضوع الزواج اسدة اخاف واكول بعد وكت
الصراحة جنت خايفة يطلع مايحبني
يمثل علية لان اسمع بالشباب يضحكون على البنات
وقصص تشيب الراس
وبيوم تعاركت وي عمتي ورجلها طلعت من البيت ابجي هذا الحجي اني صرت رابعة
رحت لبيت جدي كل عقلي اكعد بية
لكيت ناس عايشين بية تخبلت.
كالو باعوة ماهمتني فلوس بس شلون انطاهن كلبهن يبيعنة وكل ذكريات اهلهن بيه
بجيت وضليت كاعدة بمكاني اتذكرهم وازيد بالبجي
لا جدو ولا بيبي صفيت وحدي مر وقت شكد انتهيت من كثر البجي رجعت لبيت عمتي مخلص الغروب جان واكف باب الشارع وصاير عصبي
اول ما اجيت صيح علية وضربني راجدي
بقيت مصدومة شسويت وعمتي سحلتني تلطم ويامن جنتي!