رواية بين سلاسل العادات للكاتبة كفاية كاظم فصول إضافية الأول
رغد: كعدت من النوم ادور بعيوني على جهالي بالغرفة مالكيت الهم اثر سحبت شالي لفيتة على راسي وطلعت ادور عليهم بالبيت اووف ولا يكعدون شوية رجلية طايحة من وراهم رحت لغرفة شروق مالكيتهم وشروق تكول ماصاعديلي نزلت البيت كلة دورتة عليهم مالهم اثر گلبي انقبض بس كلت بالشارع يلعبون رحت فتحت الباب مديت راسي الشارع فاااارغ ولا طير البية خليت ايدي على كلبي انظم دكاتة وين راحو؟!
بقيت على وكفتي بس عيوني تزرزر بلكت تلكطهم وهما جايين واحد يمشي بضهر الثاني بس ماصار واجو الدنيا لفت بية دختتت دخلت جوة كوة احجي.
حبوبة جهالي ماكووو الحگيلي
حكمة: وين ولو ذولة هسة تلكينهم يلعبون
ماكو بالبيت ولا بالشارع هسة دزيت الجهاال تشوفهم يم الاسواق بس ضلت هاي واذا ماكو شلووون؟
هسة يجون وين يطيرون بس على كيفج.
كلها كعدت على صوتي واني مثل الطير المذبوح لازمة راسي وافتر اروح للباب وارجع القلق بدا ياكلني اكل هما مايطلعون ابد الا يكلولي لو وي جهالنا سوى مال يرحون وحدهم مايسوونها!
اجو الجهال تركض وهما مو وياهم نفسي ضاع اريد احجي ماكدر بعد كالو.
ماكو كرار وحيدر يم الاسواق محد شايفهم.
بعد ماسمعت شي وشة صارت بذاني ركضت مثل المخبلة اهز راسي لا سحبت عباتي خليتها على راسي وطلعت اركض بالشارع ادورهم اريدلهم اي اثر ماكو اضرب على خدودي واصرخ وابوي يسحب بية واني منتهية كوة رجعوني للبيت حالتي حالة صارت ساعة ضبط وهما ماكو...
رغد: راحو ولدي راااحووو اتسوودن والله اتسووودن اذااا ما لگيتهممم.
ماحس على روحي واني اعيط بصوت عالي واملخ بنفسي كوة لازماتني تخبلتتت عليهممم وكل واحد يحجي شكل راحو لبيت فارس وهم مارايحيلهم
ماخلو حتى الجيران سألوهم واحنا بهذا الحال والكل خايف ويتوقع دخل جاسب رفعت راسي اشوفة يباوعلنة باستغراب الكل بقة ساكت وهو يسال شكو شصاير.
جاسب: ماتحجون شبيكممم ياهووو المااات.
عيوني تروح وترجع علية يريدني احجي عيوني توسعت بفرحة وصدمة من شفتهم دخلو شايلين ثنينهم علبة جانو فرحانين بس من شافوني حالهم صار مثل حال ابوهم انصدمو واني ماصدكت اشوفهم طفرت حظنتهم وابوس بيهم عيوني تصب دموع مامصدكة خفت لا اخسرهم للابد!
رغد: روحي يمة وين جنتو؟ هلكت واني انتظركم
حيدر: كرار هاي شبيها رغد؟
كرار: صدك رغد شبيج فحطانة وتبجين ياهو محاجيج؟
ضحكت بفرح ودموعي تنزل حقي ما اتخبل عليهم حقي حضنتهم لصدري ابوس بيهم وجاسب يحجي فوك راسي.
جاسب: هاي الدنيا محتركة لان اخذتهم وياي شبيكم بابا شني شكد دراما انتم يعني وين يرحوون
كمت اصيح بوجهة بحركة وصوت عالي
رغد: تاااخذهم بكيفككك تاااخذهم وتطلععع ماتكوول اكووو ااام وراهممم تمووت لو صارر بيهم شي ماتفكرر انت لو جالطني ترتاح گلي تررتاح
جاسب: دراما دراما بعد بعد.
رغد: اييي دراما حقك متعجببب واني لو ماجاي مييتة بخوفييي عليهم منا وغاد ماتاخذهمممم بدون علمييي
جاسب: انيي ابووهم
رغد: واذاااا اني امهممم ماتخاف عليهم بكديي ولا تحبهم بكدي ثاني مرة تنطيني علممم يلا تاخذهم لايصير غير حجيي.
جحظ عيونة ماعاجبة كلامي سحبتهم من ايدهم عايف الكل وراي شيحجون خل يحجون بعد الجهال ماياخذهم الا بموافقتي، كعدت على الجرباية مخليتهم بحضني العب بشعرهم وهما ساكتين بعد ماحجو لان شافو الوضع مو مال شقة انتبهت للعلبة لحد هسة عدهم مجعوصة جعص طلعتها منهم رفع راسة حيدر يحجي بصوت ناصي وهادء.
حيدر: رغد انتي جنتي نايمة وجاسب اخذنا وياة يونسنا بعد ماكعدناج كلنا خطية.
رغد: جا مو خطية من اركض بالشارع مثل المخابيل مو خطية جان انجلطت عليكم عقلي هذا عقلي وكف كلت وين الكاكم بعد هاهية رحتو من ادية
كرار: يمة رغد احنا مانعوفج بعد لاتبجين مانطلع نظل يمج حتى اذا جاسب ابوي كاللنة نطلع مانروح
رغد: اني ما اريد احبسكم بالعكس اطلعو وياة لو وي ولدنا بس انطوني علم ادري بيكم طالعين
تنفست براحة امسح بخدودهم الترفة كعد حيدر على حيلة سحب العلبة وفتحها متروسة اشكال الحلويات.
حيدر: هاي جاسب اشتراها طلعانا للالعاب وتريكنا بعدين اشترة هاي كال لامكم وانتو
هزيت راسي اي وهو كمل يحجي عيونة مدمعة
كسر كلبي وي كلامة.
حيدر: رغد ترة جاسب خطية ليش صيحتي بوجها هسة زعل وهو فوك ما اخذنا ترة احنا كلنالة يطلعنا خطية هو فوك ما جابلنا حلويات تزعلينا
كرار: اي صح خطية ليش زعلتية وصحتي بوجهة ترة احنة نحبة ونزعل وياة
رغد: ياااا هاي شبيكم!
حيدر: اعتذري منة رغد ترة نزعل انتي مو تكولين اليغلط يعتذر روحي اعتذري منة خطية هسة هو زعلان
حجاها وكام طفر طلع من الغرفة يركض وكرار وراة طلع بقيت صافنة وحدي شبيهم ذولة جهالي شلون يحجون احسهم منقهرين خاصة حيدر من يحجي عيونة تتلامع بالدموع يحجي مهظوم على جاسب لان صيحت علية!
طلعت وراهم اشوف وين راحو شفتهم بالحديقة كاعدين بحظنة من كل صفحة كاعد واحد وهو بيدة جكارة يشرب ويسمع لسوالفهم كرار يحجي وحيدر يصححلة اعرفهم لان حيدر يباوع لحلگ اخوة ابتسمت على منظرهم وحيدر من شافني طفر من حظن ابوة واجاني يسحل بية من دشداشتي.
رغد: ها ولك شبيك
حيدر: ترة نزعل وياج بس ماتعتذرين من ابونا هسة هو زعلان يلا روحي اعتذري حبابة.
لا ارادي رحت وياة الكلمة من يحجيها احسها بيها مشاعر وعيونة تتوسلني صرت كدامة رفع راسة باوعلي ونفخ الدخان على صفحتة بقة ساكت بس يباوعلي نظراتة وترتني خليت ايدي على ركبة حيدر احظنة واحجي وياة بجدية.
رغد: اني اعتذر لان صيحت عليك
جاسب: امممم
رغد: هو شني الاممم اكلك اعتذر
حيدر: يلا بوية سامحها
كرار: اي يلة جاسب حباب جبناها تعتذر يلا وافق
كفخة على راسة بخفة يكلة
جاسب: شني ولك جاسب ابوك ابن الجيران.
حيدر: اي بوية شفت يصيحلك باسمك
كرار: انت اسكت لاتصير حيال
رغد: كافي اسكتو لاتتعاركون
حيدر: اي ها بوية يمة رغد اعتذرت منك شدكول انت
رغد: يلا خلصوني شدكول سامحتني لان اذيتك
جاسب: كلج اذية علية ضلت على هاي روحي بوية روحي
خزرتة ومشيت ادردم علية كلة من ورة زعاطيطي يسحلون بية وبكرامتي الكاع عفتهم يمة هو بقة بالاستقبال للغدة وهما يرحون ويرجعون علية.
للعصر بدلت اروح لدوامي هاي اخر الايام اداوم بالمختبر رحمان جاي يدورلي وظيفة بمستشفى يكول راتب اقوة وضمان احسن من المختبر كملت وطلعت اشوفهم وين اجوني يركضون.
حيدر: ها يمة رغد راح ترحين
اي ديربالك على اخوك ولا تطلعون بالشارع وتعاركون الجهال
كرار: رغد انتي مو كلتي اخذك وياي صارلج شكد ولا مرة اخذتيني
ديلا غسل وجهك والبس حذاتك وانت يميني؟
حيدر: اضل هنا ما اروح
يلة خوش عفية بابني السبع.
راح كرار يركض غسل شوية واجة وجهة ينكط مي وحذاتة بيدة اخذتها لبستها اله وهو ملابسة نظيفة ماصارلة هواي من بدلتلهم مسحت وجهة وعدلت شعرة طبعاً مستحيل يروح وحدة اذا مو حيدر وياة لازم لازم ثنينهم سوة.
كرار: يميني بروح جدك امشي وياي
حيدر: جدي عايش ما ميت هييي
حباب روح وياي هناك رغد تشتريلنا كلشيي ونشوفها شلون تسحب دم.
عافة حيدر وراح بقة محتار لايكدر يروح ويعوفة ولايكدر يبقة دون يلح علية اخذة وياي اخر شي اجة وياي وطول الطريق يحجي علية محترك كلبة لان ما اجة وياة وصلني ابوي ورجع وهو بقة كاعد على الكرسي يباوع للناس بحقد شي تكة ماموجود
اجت صديقتي تسالني بهمس.
اكلج هذا ابنج شبية منفس احد محاجية خطية
رغد: لا والله محد محاجية بس هاي لان اجة وحدة واخو مو وياة
ياروحي شوفية شلوون يخبل وهو ضايج فد شخصييية اكلج هذا مايشبهج.
هما ثنينهم يشبهون ابوهم كل مايكبرون
هيج ابوهم حلو!
اممم
وماترجعيلة صدك تحجيننن!؟
من كل عقلج الجمال مهم! بعدج ماشايفة ضيم الحلوين يبزعونج والله
عفتها اشتغل وهي مامقتنعة بكلامي وهو صدك شنو فايدة الشكل والاسلوب مو خوش...
كملت دوامي وطلعت لازمة ايد كرار وحلفني الا اروح للاسواق اشتري العاب لحيدر ماكسرت بخاطرة واخذتة خليتة يختار بكيفة دفعت الحساب ورجعت للبيت اول ماوصل دخل يركض يراوية ويغورة صحت علية من بعيد.
رغد: بيناتكم العبو مامااا
ردت ادخل وصار جاسب بوجهي بس شنو وجهة مايكصة السيفف يريد ياكلني خزرني وفاتني شبية هذا دخلت جوة لكيت نزار جايب ابنة منطية لحبوبتي وكاعد ياكل كعك وجاي سلمت علية وهو استلمني...
نزار: اهلاً اهلاً برغد عمي احوال صايرة
ها شبيك
مابية شي بس فلك طرج صايرة تخبلين الفلوس هيج تحلي الواحد لو الراحة
انت شدكول؟
ثنينهن.
وكفت اسوي عشا وهما اجتمعو بالمطبخ ونزار طابك وياي اليوم انوب جاسب موجود هسة يسويلة مصيبة خايفة منه لان هذا السانة فالت وصاحبنة خبل.
نزار: اكول رغد صدك راح تتعينين بالمستشفى
بعدني من اتعين اكلك
واعزميني وياج من تستلمين الراتب
ادلل
صدك ولج ابن زهير الوسطاني خاطبج ورافضتة؟
اممم
لا بربج يلا هم احسن لا توافقين بية جمال وراتب ارضي بية اني مامحرم عليج مو؟
مو
جاسب: هوووو شنييي الموووو شنييييي.
التفتت علية اشوفة نار يرجف حجيت بهدوء
اقصد ما محرمة علية
نزار: يعني اكدر اتزوجج على صفرتي
هو كال هيج لو جاسب تخبببل طفرر علية وربك ماكاعد بصفة جان نتفة بوكس طير وجهة نزار راسا طفر وعمامي صارو بوجه جاسب لزمو ونزار الغبي ماسكت.
نزار: هسة واذا كلت اتزوجها بيها شي؟ ترة اني مو غريب عليها وهم خيرنا مايروح لغيرنا
جاسب: ووولككككك گ اليووم اشگ حلگك ابنننن.
كلنا ندري بنزار يتشاقة وساكتيلة سوالف نزار ماتنعد بس هذا شبية تخبل وهو ذاك شكلة مبين يحجي شقة بس يريد يحركة زودها ابوي فوك مامحترك وراح يموت...
مابيها شي نزار الشرع حلل اربعة وزهرة وياها صاحبات يمكن تكيف لو درت
هنا جاسب صار مثل الاسد الهائج نزار طفر لاهلة هو وابنة وعاف وراة نااار الخطابة مو شي جديد هاي صار فترة خطبوني ورفضتهم حتى جاسب ما يدري او يمكن يدري ومغلس.
عفت كلشي بيدي وبقيت اباوعلة خفت علية لاتضربة جلطة من كمية العصبية البيها من يسمع ابوي يكلة.
شني تريدها تضل عمر تربي بفروخك او وتالي تزوج من حقها مثل مامن حقك وهي بعدها شابة هسة بس الجهال يكبرون ويفهمون ازوجها
مو كلام كالة ابوي نار وذبها علية صار يرعد مايشوف كدامة شي شال الدولكة الكزاز فلشها بالحايط خلاها تتطافر ورجع يكسر ويفلش بالمطبخ هنا تاكدت هو مريض بشي اسمة رغد.
من خوفي علية بهاي حالتة لاينجلط صحت بصوت عالي يسمعة.
رغد: ماااا اتزوووج لاتخااف بس اسكتتت والعباسس ماتزززوج جااسبب تسمعنييي ما اتزووج غيرررك لو تنگلببب تررة اني لعبانة رووحي.
هنا سكت وقف عن التكسير وكلماتي مثل الماي الطفت بيها النار سكت كوة يصارع حتى يجر النفس جسمة يرجف رررجف اجة تقدم علية واني صرت ارجف رجعت اتذكر من يصير، عصبي ويكتلني يفقد يفقد وهسة نفس الحال جاسب بعدة ماتغير بس يتظاهر متغير واقل شي يرجعة لجاسب القديم.
رغد: لاتحرك دمك اني ما اتزوج هيج مرتاحة.
جاسب: رغد رغد اسمعي اسمعي اموتكم كلكم والله والله بس لو تزوجتي هذا البيت احركة بنفط وجداحة اشمر بية ورجلج اكتلة واكتل روحي واعوفج وحدج تتخبلين
شبيج انت صاااحي
مووو صاااحيي اننني مو صاااحي من السالفة بيهااا ررغد افقددد عقلييي انييي افقدددة اخسرركم كلكممم بس تسوينها
وشني تستفاد من كل هذا
احررگ گلبببج احرركة واخليج تعيشين مخبلة بعدددي ما اخليكمم تتهنون.
اباوع بوجهة احس مو صاحي ولو صارت صدك كل حرف كالة يطبقة بدون مايرفلة جفن حتى لو عندة عقل يفقدة من يفقدني للابد هزيت راسي بخوف وانسحبت بهدوء عفت امة يمة تحجي وياة وتهدي بية بعد ماطلعت بقيت بالغرفة حابسة روحي ماعرف شنو صار بيها كل شوية اتذكر شكلة ورجفتة حتى نفسي انسدت من الاكل ونمت بدون عشا.
لثاني يوم اني مزاجي متعكر من الصار ومالي خلك شي اجة رحمان بشرني بالوظيفة طرررت طررت من الفررح واخيراً شغلة ثابتة واحسن من شغلي فرحتي ما انطيها لاحد.
جنت اغسل بالملابس واغني مرررتاااحة لو لا ما اجة دفر الباب نزيت من الخرعة وعيني صارت على ايدة ترررجف ررجف گلبي كام يرجف وياة حالتة مو طبيعية هسة هو باقصى حالات جنونة بس الله اليستر منة عدلت شالي اضم شعري اريد احجي الساني يرجف سد الباب لو گلبي وگف ركضت افتحة وهو لازم اليدة بقبضة ايدة.
شبيك افتح الباب شكو سادة.
احس نفسي صرت نارررر مصخن ومن صرت قريبة علية احتريت من يمي ابتعدت بسرعة احس وجهي يريد ينفجر اباوعلة صافن...
جاسب افتح الباب فدوة خلينا نتفاهم برا
مارد علية بحرررف هذا الحرف اباوع لرجلية تتقدم بهدوء انحشكت بالحايط صار بصفي بالضبط مايفصلنا شي دمعت عيوني وحجيت اذكرة.
جاسب اني طليقتك حررررام هذاااا القرررب البينا.
دفعتة اريد اصيح وسد حلكي بيدي ضاعت انفاسي دنك يحجي يم اذني بصوت يرجف واني من الخوف والرهبة صرت ارجف لا يجي واحد ويشوفنة كبل يزفوني الة.
جاسب: رغد وداعت حبي الج وحقققج وحقج لو باوعلج واحد بعين صلفة افكس عيوونة وادمرر حيااتة واحلف بحقج ادمررة ولج اني حسن لحد هاي الساعة ما جايز منه ومخلية شايف الويل كل يومية طايح بمصيبة اني سببها شكد مايتعذب ما ارتاح الموت قليل بحقة لان هو سبب بدمار البنيتة هو هو لو ماهو اني وياج ماكو احسن منه خطف حلم سنيني حسن وراح اخلية يدفع عمرة ثمن لهلحلم.
دفعت ايدة بثنين ادية خنكني ما حاس على نفسة رخت ايدة وحجة بصوت الين.
اني والله اغار عليج هذا الهوى الهوى اغار عليج منة من جنتي صغيرة ولحد الان اغار عليج من اخوج رحمان رغد لاتخليني ارتكب جرايم ارفضي ولا تعانديني
دفعتة بقوة اتنفس سريع
رغد: كتلك ما اتزوج ماااا اتززوج مو محبة بيك بس اني فكرة الزواج كرهتها اخاف اخاااف اني ما اتزوج خليت بيه عقدة وخوف من شي اسمة زواج.
ماتزوجين ادري ادري بس الوظيفة ارفضيها مال المستشفى الرايح والراجع يباوعلج دكاترة وممرضين ومراجعين يشوفونج! ما اتحمل رغد اموتتتج امووتج من افكررر واحد حجة وياج لو باوعلج نفس ما اني اباوعلج
اي اي هاهية بس وخر عني
دفعتة بقوة وطلعت اركض عفتة دايخ مو بوعية يرجف رجيف شنو سامع وهيج متخبل مر اليوم واجة اليوم اليبدي بية دوامي جاسب بعد ما شفتة.
كل ما اجهز نفسي للدوام اتذكر ذاك اليوم وحالتة منها بعد ماشفتة نفضت راسي من الافكار وقريت الفاتحه لام البنين بعدني ما طالعة من البيت دخلت مريم مبهذلة وعباتها معلكة بطرف راسها هي شافتني وصرخت.
مريم: خلبلتييي الزززلمة خبلتييية الله لاينطيييج مرتااحة والضييم على راااسي
اجت تجاهي بوضع الهجوم راسا شلت السجينة رفعتها باتجاها
رغد: تعاااي تعااي الا انبتهااا بكلبج مثل ماسويتهااا وي رجلج.
صارت تلطم على راسها وتصرخ بكلب محروك
مريم: اكتليييني وخلصييني اكتلينييي مليييت تعبتتت من وراج حتى بالحلم لاحگتني
رغد: مو بحاالج اني طلعيني من راسج يكون افضل
التمو على صوتنا ونسوان عمي يلزمن بمريم يفتهمن منها السالفة والشي المخليها تجي بهذا الحال المبهذل وتسوي هاي الهوسة من الصبح صارت تبجي وتحجي تشكيلهن وهنا يسمعن بانصات.
مريم: تخبببل الزلمة تخببل لا يريدني ولا يريد البيت لايجيكم ولا يجينا كره حتى الكعدة بالبيت مايردينااا تخببل بس يهذي بيها ومتخبل لاتزوج والله والله يحرك البيت فوك راسي
كالتها مرت عمي: جا انتي شعليج ويحرك البيت فوك راسج؟
مريم: هو شكو قهر وحركان كلب من رغد يذبة براسييي يكوول اني مخليتة يطلگهااا
التفتت علية تمسح دموعها بكف ايدها.
مريم: ارجعيلهااا ماترجعيين تتونسين بهذالة وبهذالنا كلنااا شكد شايلة حقاارة وحاقدة الزلمة مييت بطاريج والكل يدري ماترجعين وتخلصينةة
رغد: لو تموووتون
مريم: هو من ورراج نمووت ناقصيين عمرر ولج شني انتي اول وحدة يتزوج عليهااا رجلهاا اذا علية انيي تعبتتت ومليت مو يمج ولا كرباج شتقسمين اني راضييية بس ارجعيي
رغد: حلم ابليس بالجنة ارجعلة خليها بالج وبالكم كلكم
اخذت جنطتي بيدي وعبرتهن صاحت وراي بحركة.
مريم: وواني شنيي ذنبييي متبهذلة من ورراج
رغد: مشكلتج هاي ماكتلج روحي تزوجي رجال متزوج و ماصارلة فتررة وانتي تدرين مرتة بعدها صغيرة ومن شفتيني حلوة وصغيرة مارفضتي خاف قبل عبالج جبيرة واتزوج علي! اتزوجتي رجال متزوج وصرتي الثانية اتحمللي كلشيي يصيرر وياج اني ك رغد مو مشكلتي مشكلتج انتي ك مررريم.
عفتها وطلعت ايدي ترجف من العصبية اني شكو بية وبحياتة مو هو العيشني برعب من عرف عندي علاقة وخلاني اترك جامعتي؟ مو هو التزوجني بلا عرس ولاتحظيرات وخلاني اعيش هليوم ارعب من الرعب؟ مو هو الخلاني امشي واتلفت من شكة بية هاي الكحلة ما اخليها ورضيت ونفذت؟ مو هو الكسرني مرة ثانية بشكة وعذبني وهاني وداس على كرامتي لان شك بية؟ مو هو التزوج علية واني بعدني عروس وجاب مرة ثانية بكدي ضرة؟
هو السوة كل هذا وزاح شكو محبة بكلبي تجاهة اذن خل يتحمل الراح يصير بية لان اني ما مسؤؤلة على اي شي يصير بية وبحياتة هو ماعرف ينضم حياتية ويتصرف صح ررغد شكوو حاشرينها بالموضوع؟
الى متى الى متى اخلص من جاسب واخلص من كلشي يخصة اتمنى اسافر من العراق حتى اخلص وارتاح بس تبقة امنية!
داومت اليوم الاول بالمستشفى دوووخة وهوووسة راسي احسه يريد ينفجر من الضجة والاصوات اول يوم متعببب الى درجة هلكت تعبت بعدني مامتعودة على الوضع ينراد وقت لا اكثر، طلعت من المستشفى بقيت انتظر واحد يجي ياخذني للبيت فز گلبي من شفت سيارة جاسب طبكت كبالي شيسوي جايني!
الله اليستر شنو صاير من مصيبة تظاهرت بعدم الاهتمام بس داخلي خايف لحد هاليوم بعدني اخاف منه من اشوفة هيج عصبي صدك لو كالو التكرصة الحية مرة يخاف من جرت الحبل!
فتح الجامة واشرلي اصعد ذبيت نفسي قوي وبقيت بمكاني جني ما اشوفة صاح بصوت عالي.
جاسب: تصعددين برجليييج لو انزززل اصعددج ااني واخليي العالم كلهاا تباوعلج.
عضيت شفتي بقهر وهزيت راسي اي يسويها هذا يسحلني ويصعدني غصصب واصير فرجة للعالم صعدت من فتحلي باب الصدر خليت جنطتي بحضني والله احس اطرافي ترجف وگلبي يريد يطلع من صدري من الخوف شلون ارجعلة وهو هيج وضعة وياي!
يمشي سريع ونفسة عالي حجيت امثل القوة
رغد: شترريد مني هسةة انتتت وين ماااخذني
لجهنننم رررغد لجهنممم اخذذج واخذذذ روووحج وياااي
اااحجي صددك جااسب
اااالله ياااخذ جااااسب ويررريج منههههه.
ضرب على السترين بقوة سكتت بالعة ريكي بخوف بس احجي كلمة زايدة وياة يكلبها بينة ونروح بيها طول الطريق نااار نااار صاير واني حالي حال الكرسي لو تحرك وحجة شي ماخليت القران ختمتة والادعية كلها ردت اتصل برحمان بس خفت يتعارك وياة وتصير مشكلة الها اول مالها تالي وماكو غيري اليطيح بيها.
وكفت السيارة لو وكف عداد عمري نزل ودار على جهتي فتحلي الباب يسحبني من ايدي نترت ايدي منه ونزلت اصيح بوجهة.
شترررريد انتتتت شتررريد ماتگليييي ررراح امووت من ورررااك ماااا كااافي مااا كافي
ولا نفس امشيييي
رفعت راسي اشوف الشقة نفسها العشت اسوء ايام عمري بيها انواع العذاب شفتة هنا ولو باقية فترة اطول جان موتت نفسي بيها!
غطيت وجهي بيدي ابجي واصرخ جسمي كلة يرجف
رررجيف مو طبيعي انعادت الايام بذاكررتي.
رغد: عووفنييي جااسب عووفني ررراح امووت اموووت ماااا اررروح وياااك ما اررروح انتتت مخبببل مووو صاااحي اكررهك اني اكرررهك
تخبلت انجنييييت صرت اضرب على عيوني بخبال وكل مايريد يلزمني اشرد منه صرنا فرجة للعالم مادري عقلة وين من جابنة لهنا بس اني متاكدة ماعندة عقل حالياً.
جاسب: رغد والعباس ماريد اسوويلج شيي بس اتفااهم وياج على كم شغلة.
لا شااافك العببباس لا شافككك لككك انييي طليقتتك طليقتتك حااط راسك من راسي ليييش ماعندك رحمة ماتكدر تشوفني مررتاحة مثل البشرر تستلذ بعذااابي كووول كوول ادرري بيك اددري
كلمة وحدة ما حجة وياي بقة صااافن وضعة تغيررر من العصبية للسكوون.
جاسب: امشي اوصلج كافي هم كافي.
صعدت ارجف عصبية وحرركة ماحجة ولانطق بكلمة وحتى مسحت وجهي وعدلت وجهي لا يبين على شكلي بس ولو واضح وجهي مطعوون طعن من البجي وصلنا قريب بيتنا وراح دخلت جوة لغرفتي كبل لفراشي نزعت حجابي لفيت روحي بالبطانية ابجي واشهك من كل كلبي رجعني جاسب لذيج النقطة مايخليني ارتاح.
حسيت على جهالي يسحبون الغطا مني واني لافة روحي زين ما اريد يشوفني هيج ويخترعون.
حيدر: يمة رغد هاي اجيتي من الدوام؟
كرار: لا رجعت من الحج.
انت اسكت شوف شبيها ماتحجي يمكن هاي مو امنا
ولك هاي هي رغد غير هاي غرفتها وهاي جربايتنا وين اكو واحد يجي هنا غيرها
اي صح بس ليش ماتطلع وجهها خاف جني ولك
هو الجني هووى هووى مو بشر هيج شوف هاي لحمم
يكرص بية بيدة الناعمة ويكل لاخوة: -شوف شوف
وحيدر يرجع يكرص بية حتى يتاكدون اني بشر بنص خرابي متت ضحك عليهم وخرت الغطا عني
رغد: بووووووو
كرار: شوف هاي رغد وين جني انت ماعندك عققل
تعال تعال لاتحجي على اخوك.
فتحت الغطا وهما اجو بحضني بستهم احضن بيهم وهما صافنين بوجهي.
شبيكم؟
حيدر: شبية وجهج احمممر
يتسلمسون بوجهي منقهرين يريدون يعرفون السبب
حساسية هاي لاتخافون
حضنتهم ونمت وياهم ومررتاحة وهما بحضني ويمي روحي هما عوضي من الدنيا.
جاسب بعد ماشفتا لاهو ولا مرتة وحتى ماجبت طاريهم لا مريم منو اخذها ولا جاسب شراد مني من اجة اخذني نزار بعد نسيت شكلة ابددد ابدد مايجينا وحتى من تجي زهراء جاسب يجيبها يوصلها ويروح.
مايدخل واكيد السبب هو بمنع نزار يدخل لبيتنا
رغم مرت فترة على الصار بس اني مامرتاحة احس راح يتكرر الصار حياتي مامستقرة احسها مهددة بالخطر كابوسي صار يرجعوني اله حتى صرت اتحلم بهلشي واكعد مخترعة بس الحلم وهيج اكعد خايفة شلون لو حقيقة!
رحمان من زمان يبني بيتة لان البيت هوسة وكلها جهال صغار وهو عندة ثنين وشروق حامل بدايتها بيتة بصف بيتنا لزك وحتى سوينة باب ينفتح على البيت لان امي وابوي ماقبلو يطلعون لان امهم موجوده وهما متعودين هنا فطلعت وياهم وشروق.
ما اكول ارتاحيت بهذا البيت الجديد لا عرفت معنى الراحة اني وشروق وحتى جهالنا اخذنا راحتنة بالبس وبكلشي الشال بعد ماخليتة على راسي شعري جهالي يسوون بية تسريحات ولعبو بية لعب كد مافاتحتة حتى كرهوني بية صرت ما افتحة ابد
وهما الله يسلمهم يكول البيت باسمهم صاكرين جهال شروق مايخلونهم يطلعون خطوة من البيت وشروق مكيفة تكول احسن مايكتلونهم الجهال بحيث شموسة وراهة وراهة كلساع جايبينها سحل وهي تصرخ بيدهم.
رحمان الله يحفظه النة ويسلمة مامقصر بشعرة ويانة يمووت على جهالي وابد ابد مايفرقهم عن جهالة وشروق تعرفونها شلونها بس خطية تتوحم ولعبانة نفسها والبنات داكاتلها طبل كلساع حامل؟
وهي تكلهن رزق الله ويامحلاة من رزق يستاهلون كل خير.
احس انتقلت لغير دولة مو لغير بيت كلشي ماعرف عن ذولاك الناس اجو راحو لا اشوفهم ولايشوفوني ولا اسمع بطاريهم ذاك البيت بعد ماوصلتة حبوبتي وتجينا من نسوي غدة لو شي نعزمهم يجون ياكلون ويروحون.
بين الدوام وجهالي تمشي الايام كلمن رسم طريقة بيدة واختار الشي اليريحها ويسعدة ويبقى السؤال براسي جاسب بذاك اليوم من اخذني شنو الموضوع الراد يحجي بية متاكدة متاكدة ما يكلي ارجعيلي ولا يحجي بهذا الموضوع لان يدري منتهي جان موضوع اخر محد يعرفة غير جاسب!
جهالي يشوفهم طبيعي ويبقون يمة بس ماياخذهم للبيتة لا بيت جدي يبقون مرات يطلعهم لو للالعاب لو للزبارة ما اعترض ابد وينطيهم مصرف وهاي قصتي وياة انتهت وبقت مستمرة بس وي جهالة
اخر موقف صار جنت مبدلة لجهالي ومكشختهم شعرهم طولان وزايدهم جمااال ناااعم ونازل على عيونهم اخذتهم بيدي يردون يروحون لبيت جدهم جنت واكفة بالباب اليفصل بينة كرار طلع كدامنا وحيدر بيدي لازمتة كزكزت علية وبستة بخدة بقوة.
وهو يضحك رفعت راسي اباوع لجاسب يباوعلنا حيدر من شافاة ركض عليها وجاسب فتحلة ادية حضنة وباوعلي رجعت جسمي واشوفة باسة بنفس الخد البستة بيدة ويطول بالبوسة.
دخلت البيت ومنظرهم براسي للعلم حيدر وكرار يموووتون على جااسب بحيث بس يسمعون بية جاي يرحونلة ركض حتى لو جاي ياكلون يعوفون اكلهم ويرجعون فرحانين الاعمى يشووف فرحتهم بديهم فلوس ويغورن حتى الجبير رغم والله ماقصرة عليهم الكل ينطيهم فلوس بس من جاسب يختلف كلشي عدهم.
وهو هم يموت عليهم ولاية دائماً تجي يجيبونها وياهم تخبببل ولاية وفد نازكة وحبابة وهما يموتون عليها اذا اجت مايعوفونها لحظة لازمينها من ايدها ويفترون بيها ويلعبونها وجاسب يطير بيهم يوصلي الحجي.
فارس سجل جهالة روضة وهما الا يسجلون وياهم ماكسرت بخاطرهم وافقت لان ابوهم موافق وسجلهم بيدة صح اخاف عليهم من الجهال بس طلع الجهال تخاف منهم على يسولف لامة عليهم يكول خابصين الصف خبص والمعلمة تموت عليهم لان يسولفون وياها.
كاعدين يكتبون او الاصح يشخبطون شكد علمتهم مايفيد واحد يجر عرض واحد طول وكل شوية واحد دفتر الثاني يكتب بية عود يعلمة ولا يصيرون مثل على وامير.
رغد: هسة مو كل واحد عنده دفتر ليييش تتعاركون شبييييكم مجلوبين
كرار: امشي يميني امشي هاي رغد ماتعرف شي بس تصيح علية
حيدر: مدري شلون صارت دكتوره
رغد: ايي ايي بعد بعد گلبتو علية عفية يميني هيج هاي انت الجبير العاقل
عافوني وطلعو بيدهم بس اقلامهم يمشون ويصيحون.
نروح لابونا يقرينا هو حباب مو مثل هاي رغد بس تصيح
درروحوو رحوو بعد لاتجونيي خل جاسب يفيدكم.
طلعو وين يلة اجو يركضون يريدون يراووني شي كرار بيدة عشرة الالف فاتحة بيدة يلزم بوجهي يخليني اشوفها جفلت بمكاني من شفت مكتوب بخط ايد واضح.
جاسب مهووس برغد
عكدت حاجبي اسئلة: -هاي منو كاتبها؟
ابوي جاسب
سكتت وضميت العشرة...
لليل كلش تاخرو الجهال رحت اجيبهم ومادري بية كاعد برا صار بوجهي ماكدرت ارجع بعد جان يشرب جكاير ويسمع موال بتليفونة للعلم جاسب اخر فترة مدمن اشعار من اقتربت علا الصوت وصار يقرا وي صاحب القصيدة.
تباصرنا وكعدنا. شبية وانه
وحجة جرح المخزن. شبية وانه
وراك مهدل واركض. شبية وانه
كلني اسنينك مجلبات بية.
ضرب على رجلة قوي واني بس اريد اعبرة بسرعة دخلت اخذت الجهال لازمتهم بيدي وهو على كعدتة باقي يعيد بنفس القصيدة حيدر فلت من ايدي وراحلة ركض حضنة يبوس بية وكرار لحكة يركض
عفتهم ومشيت وي ابوهم.