رواية بين سلاسل العادات للكاتبة كفاية كاظم الفصل الحادي والعشرون
-كتلوووها!
فارس: اي يمة
رضية: ياصخام الوجة مو بالسجن المرة
فارس: -اي انطة رشوة وطلعوها
رضية: -وكتلاها عليش يمنعول الصفحة خليها تروح بحال سبيلها شني هدر الدم مثل هدر الماي عدهم
فارس: -يكولون غسلنا عارنا اكو ناس معيرتهم اختكم وبناتها يشتغلن بالدعار والاخ حمة
رضية: -والبنيات بس لاهم كتلوهن
فارس: -لا ذني مدتهن طويلة مايطلعن بيوم وليلة هسة كايلين بس يطلعن يلحگن امهن
رضية: -لا حول ولاقوة الابالله.
عايشة: -وبشرو القاتل بالقتل مامتشمتة ابد بس هاي الدنيا مو هي مرت حمزة واخوها اتهمو صفية وسفگو دمها بسبتهم اليوم انسفك دمها بنفس الطريقة ونفس اليوم النكتلت بية صفية.
جدة حكمة: -سدن السوالف العتيگة مالنة گلب يتحمل الله يرحم المرة اترحملها مهما جانت مسوية بشبابها
عايشة: -انتن ترحملها كلبي ماينطيني اترحملها وانة جبت عمري ادعي عليها طشرت عايلة كاملة وعايلتها.
تطشرت لا ولد ولابت سمعتهم بالكاع وهي راحت اي اي اليوم تتلاگة الوجوة وينك يالماتخاف من ربك اجة يومك.
جدة حكمة: -لاترفعن ضغطي راح انجلط
جدة نوفة: -رحمتك ياربي تعطف علينة
عايشة: -سودة علية ينمر يبني ماعولت على الله تصير زين تفتر الدنيا عليك...
نوف: -انهار حباب افتح الباب
ماكو منة صوت واكفة ادگ بالباب واحاجية گلبي يخفق خوف وقلق علية صوت شهگاتي اعتلة بس اريد كلمة اسمعها وارتاح.
-لاتبجين. ماريد اشوف واحد عوفوني تعبان
-بس بس اني فدوة والله كلبي حيوگف خوفتني فدوة رد علية
-روحي يم البنات انسيني
-شكاعد تحجي شبيك انهار ترة بعدني مريضة اريد علاجي تعبانة نفسك.
دقايق من الصمت فجاة انفتح الباب يكول انفتحلي باب الجنة دخلت جان ورة الباب التفتتلة منطيني ضهرة مسحت خشمي اباوع لطولة لابس دشداشة سودة ومخلي على متونة جماغ مثل مايسمونة حسيت گلبي حينفجر من شفتة بهذا الحال حضنتة من ضهرة وانفجرت بجي منظرة فاقد الوعي موتني صعب اشوف الشخص المستمدة منه قوتي اليوم فاقدها...
-عليك الله لاتعوفني شبيك شبيك والله متت عليك
-اس بس لاتبجين عوفي البجي
-لاتطيح بعد.
-واذا طحت انة طايح من زمان
-لا لا انت جبل والجبل والمايطيح
-تؤ غلطانة كلش
رفعت راسي ارجف بحضنة رفعت ادية الترجف اتلمس وجهها غمض عيونة بتعب: -ليش هيج ذبلان
-ذبلوها لروحي
نبرة صوتة تخليني افقد بجي ماكدر اشوفة بهذا الحال صوتة بية حزن يقتل ابتعدت منة دموعي شلال والدنيا مسودة بوجهي كرفصت روحي بالزاوية القديمة وضميت راسي كاتمة شهكاتي العالية.
احس برجفة ايدة على جتفي مسحت وجهي ورفعت راسي اباوع لملاحمة الذبلانة ذبيت روحي بحضنة مجلبة بية من ركبتة.
-انهار انت قوي ليش هيج
-كل ماحاول اصير قوي ارجع لنقطة الصفر عجزت ماكدر اتخطى
-فهمني شتقصد حباب
-اخاف على گلبج يذبل
-عادي عادي المهم اعرف شنو صار وياك
-تعاي اشربي علاجج
-وانت شنو علاجك
-جاي ادور علية.
نهض يمشي بانكسار لازم ضهرة جابلي علاجي خلة حبايتين بيدي وانطاني كلاص مي شربت وكمت صرت گبالة لزمت طرف دشداشتة من ناحية صدرة.
-ليش ليش لابس اسود كافي مامليت من شفتك وليجاي كلة اسود.
-وانتي ليش لابسة
-اني على اخوي بعدة حتى سنة ماصارلة
-انتي على اخوج وانة على ديرتي وهلي البس العمر كلة ومايخلص حزنهم
-يا اهل يا ديرة شتحجي انتة عايش بوسط اهلك لاتخبلني انزع الدشداشة كلبي ينقبض من اشوفك هيج اتذكر الفاتحة.
-فاتحة بروحي سويتلهم محد سوالهم فاتحة ترة يستاهلون والكافل يستاهلون
-دوختني ماكدر افهمك
-ولا تكدرين ابد انة مافاهم روحي ولا ادري وين اوصل عوفيني نوف والله اتعبج فوك تعبج
-ليش هيج تحجي والله تقهرني بكلامك هذا
-اطلعي برا ماريد اشوفج
-ليش شسويتلك والله بعد مااحجي شي وياك
-اطلعي بساعج.
بقيت بمكاني ودموعي تنزل لزمني من زندي وطلعني برا الغرفة وطبگ الباب كعدت بالكاع روحي مفرفحة بجي ليش هيج وياي خسرت حياوي حتى بعدني مامستوعبة فقدانة لكيتة كدامي نسخة منة خوفة اهتمامة حبة ماكدر اخسر ثنين والله اموت من القهر.
اجت امة كومتني لغرفتها حاضنتني تبجي وياي
-والله العظيم مامسويتلة شي خالة فدوة كولي شبية انهار ليش هيج
-اعذرية يمة نمر متعوب كلها علية طاحت
-اي شبية
-هو يسولفلج مايرضة احجي شي.
-زين وبعدين يبقى هيج
-خلية وحده هيج يرتاح
-ماكدر احسة مريض
خلت شالها على وجهها وصارت تنعى خلص كلبي وين مااروح ما ارتاح مجرد ينطيني علاجي ويطردني بس باليل اضل ادك بالباب واتوسل بية يلة يفتحلي محد مهتم بالوضع عدهم شي طبيعي ولايكول ابنهم بس اني وامة مقهورين علية ادخل الكة الغرفة عبارة عن دخان يسوي جكاير بيدة ويشرب عجزت فعلا عجزت منه حسيت بالعجز ماكدر اسوي شي لا اكدر اطلعة ولا اطلع نفسي من هالقوقعة...
من ناحية حايرة بية ومن الناحية الثانية حايرين بشروق كل يومية طايحة ونايمين بيها مستشفى خطية امها صح جان تعاملها قاسي وياها وهلشي شفتة بعيني بس تبقى امها مو هينة عليها ليل ونهار بس تبجي حرت اواسيها لو ابجي وياها.
-كلبي خلص كافي عليج الله شنو بيدج وتسوين خلص راحت ادعيلها الله يغفرلها.
-شدعيلها كتلوها ما ماتت تخيلي امي انكتلت كتل واخواتي بالسجن هنا واخوي انتهينا نوف بعد ماكدر اواجة العالم شلون اعيش والحجي عليهم همزين ابوي مات وما شاف بعينة الصار.
نوف: -لا حول ولاقوة الابالله شبيدنا اكو شي نسوية اووف ليش هيج يسوون
سجى: -بحكم العادات علبو بعد محد يحجي علية غسلت عاري ومن هاي المهزلة
شروق: -راح اموت دخيلك يا ربي ارحمني كل هذا هواي والله هواي علية ضليت وحدي بهوسة العالم.
رحمن: -جا انة وين رحت وضليتي وحيدج
اجة كعد يم راسها سحبها من الكاع جثة هامدة من الحزن والقهر مسح وجهها وعدل شالها عيونها منزلتهن بالكاع وبس تشهك.
رحمن: -شروق انتي قوية لاتسوين بروحج هيج هذاقدر محد يكدر يغيرة لو شمابجيتي مايتغير شي
اهلج راحو انة اهلج شتريدين حاضر اصيرلج كلشي.
بس صيري زينة ارجعي شروق التضوي اذا مو لخاطر احد لخاطري گلبي جاي يتكطع عليج تدرين البارحة ضغطي علك من وراج همزين مانجلطت. يو صار بية شي ترتاحين
هزت راسها تناشغ حضنها لصدرة كدامنا دموعي ينزلن وحدهن من اباوعلهم تذكرت انمار وحنيتة علية رحت اشوفة دكيت الباب اكثر من مرة فحطت واني واكفة.
-افتحلي انهار تعبتنيييي
فتح الباب ومشة كدامي اشوفة شيسوي راح لخانتي يفرغ بملابسي عكدت حواجبي شكاعد يسوي.
-وين ماخذ ملابسي.
-روحي لاهلج
-يا اهل نسيت لو اذكرك نفسهم اهلي الاخذتوني منهم والتم علية ضيم الدنيا من عفتهم اهلي حمزة وجماعتة وينهم هسة شي بالكبور وشي بالسجون يااهل ذكرني مو كتلو رواحتهم علية شلون كاعدة وي ولد عمتج.
-اس كافي راسي يوجعني انتي معتبرتهم اهلج وربيتي عدهم بعد شكو الولد حاسبينج اختهم وانتي هم وهلشي شفتة بعيني هسةاخابرلج سجاد ياخذج
-شبيك انهاااار.
-شبية خلص روحي امج تهتم بيج ارجعي طفلة تلعب بضفيرتها روحي احضني كتبج واقلامج يفيدنج انة شني افيدج خليني افيد روحي بالاول
طلع الموبايل يرجف بيدة فعلا يريد يتصل عيوني دمعن جوة كلبي بكلامه لگفت الموبايل من ايدها
-ليش ليييش موو تعودتت عليييك شنوو. تضحكوون علييية انتووو طيرر حط حط ليشش تسووي هيييج بيةةة جاااي تعذذبنييي فوووك عذااابي خللص اررحمنييي كلبي خللصااان وحققق الكاافل خلصاان.
-والكفل زينب ماريد أذيج ادور مصلحتج بس انتي ثولة وغبية ماتعرفين مصلحتج وين...
-تماااام اااااني ثووولة وغبيييية ومااا اعرررف مصلحتتتتي خللصتتتتت
-لا ماخلصتت بطلي غباء وروحي عوفيني وي سواديني وي دفاتري العتيگة
-ماكو شي عتيگ العتيگ يحترگ ويموت اكو شي اسمة جديد اكو شي اسسسمة مستقببل حااضرر المااضي عووفة وررة ضهررررك
-قصدج اعوف روحي
-لا تخبللللنننني فهههمنيييي شيييي.
-كتلج روحي جيبي الموبايل لاتخليني اخذة بالغصب
-ما انطية
خليتة بصدري وافتر بالغرفة عتني عتك انلزگت بية فتحت عيوني على وسعهن مد ايدة بصدري وطلعة
يختض بيدة گلبي انقبض شلون اروح واعوفة بهذاحالة لو قبل جنت ارجع والضحكة على وجهي
بس هسة لا كلشي اختلف تعلقت بية مثل الطفل من يتعلق بامة.
-ليش تبجين حرت وياج حيرتيني ماعرفت راسي من ساسي.
-لا تصير حقير ترجعني وشلون بية هناك ابقى افكر بيك زين شلون من اتذكرك واتذكر اهتمامك شيصير، بگلبي ضربتين على الراس توجع ابجي واحن المن الك لحياوي العافاني وراح بس كلي شصير مو زين وضالة عايشة.
- اجتمعنا بالوكت الغلط وبالمجان الغلط كلشي غلط بغلط رادلي وكت انسى
-اي بس ابقى وياك ماعوفك وحتى ماضغط عليك اعوفك براحتك من تحتاجني تلكاني يمك
-شسويت حتى هيج تحجين هذا العوض لو شني
-انت عوضي انهار لاتنسى هالشي.
حضنتة دموعي تنزل شلون اعوفة وحضنة بية حنية العالم كلة شوية وطلع بعد مارجع...
-خاب سجيوة
-ها ولك وجهج املح شتريد
-تعاي اشاورح
قرب علية يريد يحجي نزلت لمستواة يضحك كلبي يلعب عبالي يريد يتفل علية ويشرد اعرف سوالفهم
-خاب احجي
الطفل-: هاج هاي من ارفد
فتح ايدة بيها ورقة اخذتها منة حلكي انشك من الضحكة ضميتها بيدة اكيد هاي الاسئلة دزها إلى من البارحة وديت علية الجهال ومالكوة أيست منه بس اليوم دازهن يمة فديتة فدي الله شكد يحبني حتى طلع يدرسني.
-يلا اطيني
-شطيك.
-فلوس جا بس جبتلج الحبجيات
فتحت عيوني وسطرتة راجدي يمة لسانة منين حبجيات دهر صابة لزم خدة: -راح اروح لابوج اكلة سجيوة عدها صاحب
-دهر فرك منيلي صاحب عابتلك
-هسة تطيني فلوس لو اكلهم
-اطيك ماي عيوني شني الفلوس صدك جذب تعال حبيبي هسة اطيك
رحت ادور بفلوسي مالكيت بس ربع صارفتهن
-هاك هذا ربع يلا روح
-شني ربع
-جا شتريد ابن المسموط
-ارريد الففف
-منين اجيبلك الف وجهك مخنسف عدي بس هذا اخذة وولي من وجهي.
-عوفية الج هسة اروح لنسوان عمي
لزمتة من اذنة اترقبة شيحجي: -شتگلهن
-عمة تريدين تعرفين شبيها سجيوة هي تكلي اي اكلها اطيني فلوس واكلج وهنا يطني
-ثعلب مكار جا امك ياهي هسة ادبرلك سم
رحت لرغد اخذت منها الف انطيته اله كوة على روحي رحت طلعت ملازمي وكعدت فتحت الورقة.
وبهتت ملامحي مكتوب بيها كلشي مهم اي شي اخذتوة داخل ومهم اقري زين وبالاخير كاتب تحياتي طفرت من مجاني حتى شعري عطب من الحرگة باجر الامتحان وماقارية معتمدة علية قريت كل المواد الا مادتة دگاها بية الاملح ياكاع انشگي وبلعيني راح اموت.
طلعت بالمطبخ عوجت حلگي: -اغسلي المواعين وياج لو بس تعرفن تاكلن
سجى: -مو تدللين هسة اغسلهن.
ضلت مصدومة حتى انة مصدومة بروحي اول تالي انخيلها بس محترك كلبي كلش طلعت حرگتي بيهن سويتهن طاخ طيخ كملتهن خلص الوكت وانة امسلت جريت الملزمة ودفتر كعدت بالمطبخ اقرا المادة تشک الحلگ صخام الصخمني شورطت روحي لو قارية بدال هالدكة...
بسطن يمي يدكن سوالف خايسة بعد نسوان متزوجات وشلون يحجن: -شلون ناس لا مستحة ولا خجل حتى خصوصية ماكو ويعععع ويعععع لعبتن روحي حتى ذوق ماعدجن مو تشوفني اقرا شكو اجيتن.
-شني علمودج نسكت بمزاجنة وين مانكعد نكعد ماعاجبج الله وياج
-لا شافجن الله ان شاءلله
اسلوبي وياهن معروف ابد مامحترمات حتى احترمهن عكس رضية وعايشة وردة مو نسوان قلصت عيوني اشوف الفرخ الاخذ مني الالف مشتري بيها وياكل جبس قص وهو ياكل درت وجهي وطلعت من ورا البيت للبستان هسة يكولون حسدتة.
بستانا محد يدخل بية شلون بيت الناس معتبرتة مايوم شفت بية غريب يعني ناخذ راحتنة بية حتى ولدنا مايوصلونة بس الفلاح والة وكت. ضليت احوس ودمعتي بطرف عيني اريد ابجي راح ارسب
ماخذة البستان روحة رجعة اغلط واسب بروحي امداني اي والله. سمعت صوت سيارة مامنها لازم اروح اشوفها المن.
رحت مديت راسي شفت سيارة واكفة جدام بيتة طلع من البيت يخابر ويضحك فركت عيوني مستحيل الاملح يضحك دخيلك ربي بس لا انسطرت.
سدت الموبايل عاينلي وانة على صفنتي.
-ها وين وصلتي بالقراية.
-يمك وصلت
-امم easy easy
-خاف ليزي ليزي
-هه هه ماتضحكين تافهة
-مثلك غير
-السانج بوية لسانج
-والله يا اوستاذ لساني ماكدرلة شسوي يحجي الصدك. صدك كلي شبيك اشو تضحك ياستار
-يا ستار لليضحك
-اي مو خاف مسويلك سواية والا شمعنة تضحك شوف خاف جاي تضحك على بنية وعلى خطيتها بركبتك وانت تعرف زين شيصير بدون تفاهم ذبح خطية عوفها التهي بشغلك.
-تخوطين بصف الاستكان عقلج مدوحس
-شلك بيها هاي جا كلي عليك الله عليش تضحك شصار وياك
-كل خير
-يا الله شني مثليش
-لعبت على عاصم الكلب لعب ماصاير واملاكنا رجعتهن
-لللللك كفوووو عاااش عاااش والله زلمة
-زين وطلعت من لسانج
-والله كفووو يعني بيتكم رجع وبعد شني
-كلشي اخذة رجعت اخذة بلحيلة رجعتة بالحيلة
-عمي والله زين فرحتلك
-رحمه الله والديج
-والديك شفت وجهي خير عليك
-يمكن.
-لا مو يمكن اكيد وجهي خير بس شفتني كبل توضفت وصار بيدك راتب وهسة حلالك رجع بعد شتريد مني كصتي خير
-خير كلش بس شو احسج تحسدين بية
-صدك ماتستحي هسة فوك ما اكلك ناس بلا ذوق
-عمي اسفين
-لا زعلت كلش كضيتتتتتتتتك
-ياااستاار يارربي شكضيتي
-ليش تخليني ادعي عليك وتدري كلش زين دعواتي مستجابة
-على بختج
-انت مو كلتلي اطيج الاسئله وخليتني ماقريت شي هسة شلون تصفة
-بكيفج
-هلو شلك بيها تصفة بالاسئلة.
-لو تموتين هنا ما اخليج تشمين ريحة السؤال
-ليش شبيك انمونة هي اسئله هسة لو انة استاذة وانت طالب وعلى اشيلها هي وحلها واطيكياها
بس انت ماشايف
-روحي اقري حالج حال الطلاب ذيج المرة انكسر خاطري ومدري شلون انطيتج هالمرة كلش ماكو
-ياءء ليش شبيك
-حرام علية مايصير حتى حرام عليج جاي تاخذين درجة اعلى من غيرج بجهد اقل
-هسة كلش صرت سيد عمامتك لاتطيح كضها
-شكد تسولفين حتى لهيتيني
-لهيتك الاملح غثة يرررربي.
-لاتخليني احطج بلساني ترة اخليج تكرهين روحج من التنمر
-شو هاك اتأثرت بكلامك حبيبي الثقة العندي لو اوزعها على الكرة الارضية ماتخلص
-انوب صرت حبيبها باجر رجلها يجوز.
عضيت لساني هذا مركز بكلامي كلش وانة من احجي بنقاش كلة حبيبي وگلبي يزلگن شغل سيارتة وراح بس التراب وراة عماني رجعت اقرا كتلت روحي كتل بالقراية ياريت اجيب باجر نتيجة ثاني يوم داومت وجانت الاسئلة ماينفهم منها شي وراحو الطلاب حاجوة كاللهم احسب درجة الشهر الاول طرت من الفرح. من هذا اليوم بعد اعتمدت على روحي وصرت اقرا المادة يوم بيومة ولا احاجية ولا اعاين بوجهة. بعد صرت ابد ماشوفة بس بوقت محاضرتة وحالي حال الطلاب. اما بالنسبة لهيثم ابد مايحجي وياي حتى بامور الدراسة وهذا الشي مريحني كلش.
نوف: -حاولنا نتأقلم وي الوضع الجديد تعبنا ودمرت نفسيتنا شروق صارت احسن ورجعت تداوم وانمار على صار يطلع من الصبح مايرجع الا نص الليل
مايحجي وياي شي. كلش جاي اتأذى بس ابين العكس.
شروق: -نوف شوكت ترجعين للمدرسة لو بطلتي بعد
نوف: -ماعرف والله يمكن السنة التجي اوووف
شروق: -جا اقري للخامس احسن ماضالة لاشغل ولا عمل بس جايبة لروحج الهم والغم
نوف: -تفرج ربج يحلها مايضل شي على حالة.
سفانة: -ولا يكول انتي نوف ذيج النهار كلة تضحك ماتعرف معنى الحزن حثيتج وحدة مارة عليها مثايب الدنيا
نوف: -اي والله يختي مرن عليه الصعبات وينها وينها التكسر الضهر اووووف اووف من كل صفحة اكو جوية مكانها يأذي
سجى: -روحي لاهلج ارتاحي بين ماتخلص هاي الفترة
نوف: -ماكدر الا اعرف شبية انهار واطيح على علتة
سجى: -الله يكون بعونج خية تفرج بحيل الله
نوف: -ان شاءلله.
هدى: -اوووف هسة شلون ماتخلص الكابة نريد شي يوخر الضوجة
سفانة: -احم بنات عدي خبر اكول لو لا
سجى: -اذا حلو كولي اما اذا خبر عاوج مابينة حيل الدنيا عوجتنة صفح
سفانة: -لا حلو والله
سجى: -هسة غير تحجي
سفانة: -انة حامل
سجى: -جذببببب
سفانة: -والله شبيجن
سجى: -مو سوينة التحليل كلشي ماكو
سفانة: -اي ثويت غيرة وطلع خطين
سجى: -هلاااا بمعتزز كلولووووش لكممم هلااااا واخيرراااا ررااااح يجييييي فرررخ اسمية انةةةةة.
ولكمممم يبووو گلبي طاااار جيبووووة
رغد: -شوف هاي الغبرة فرحانة جي تريد تسمية دطيري
سجى: -عليكم الله خلوني اسمية فدوووة
سفانة: -خل يجي للدنيا بالاول وانتي وفارث تثافو
سجى: -لللللك هلاااااا ررراااح تصيييررر اممم سفااانة عاااش عاااش عاااش فاارس
نوف: -الف مبروك حبيبتي
رغد: -شايفة الخير ان شاءلله
سفانة: -شكرا بنات يبوو مدري ليش اثتحي حتى فارث ماكلتلة
سجى: -همزين خل اروح ابشر بلكي احصلي شي شيايتين.
سفانة: -طفرن البنات يتراكضن يطشن الخبر وانة ضليت كااعدة استحي مدري متوترة اضحك من اتخيل فارس من يدري شراح تكون ردة فعلة. دقايق والكل سمع الخبر البيت انترس هلاهل وضحك ماجنت متوقعة هالخبر يغير نفسية الكل باركولي الفرحة تلصف بعيونهم على فرحهم فرحت زيادة.
جدة حكمة: -يستاهل فارس جنت شايلتلة هم شكبرة
خايبين شكد فرحت
رضية: -الله يديمها حجية هالخبر ردلي روحي.
جدة نوفة: -على خير يحبوبة بس اركدي بين ماتجاوزين ذني الاشهر بعد لاتشتغلين ولاتشيلين ثگل
رضية: يمي حجية احطها بعيوني ماخليهة تجيس شي.
رحمن: -يمة زوجيني اريد اخلف شوكت
جدة نوفة: -شمالك مستعجل بعد تلث اربع خمس سنين يلا عود ذاك الوكت نفكر بيك
رحمن: -غير انتحر وخطيتي بركبتكم شني اربع سنين اريد هسة تخطبولي
جاسب: -مو جنت ماتريد تعرس شبيك هسة.
رحمن: -جنت اخاف على روحي غير جبتولي سحلية صفرة على برتقالية تكش الروح هو من اشوفها حتى نفسيتي تنسد.
جاسب: -وهسة نفسيتك انفتحت بيمن
رحمن: -بناس خدودها وردية
جدة نوفة: -ولك يمغسول لاتضل تشمر منا ومنا فضها وكول ياهي الحاط عينك عليها حتى احجزها الك
رحمن: -تعاي احبج على هذا الحجي
جدة نوفة: -ولي مني ماريد حبتك فضني ياهي هاي خدودها وردية
رحمن: -مو وكتها حجية.
جاسب: -ها ها طب نزار قباني طبعاً انت ولاتفوتك فايتة اول باول
نزار: -اوي سمعت الحجي بس لاتريدني انة خدودي وردية هاكم شوفو
يعصر بخدودها ويتماوع شبعنة ضحك حتى نوف تضحك.
رحمن: -خدودك مو وردية نعلية خاف
جاسب: -كفو تربيتي هاي هيج اريدك رجال تحجي ولا تبالي
رحمن: -هسة غير يسكت نعالي
جاسب: -طاح حضك مو صوجك الوصخ
نزار: -حل افرح يالشامت طبعاً انة عود صايرين ولد عم وصحبان امداكم تسدون النفس.
جدة نوفة: -بسكم يمگاميع لاتتعاركون
نزار: -راح اسكت لخاطر ثفانة هلو هاي ثفانة صدك على الخير راح تصيرين ام ثفانة تثير ام دخيلك يالحمزة
رضية: -شناقصها حتى ماتصير ام ولك نزار جوز من البت لا احيل فارس عليك
نزار: -بركاتج مدام سفانة
جاسب: -يم جدة نوفة البركات شو حبوبة اطية من بركاتج.
ركعتة بعوجيتها شوطت رجلة تشوط دخل عباس هستوة نزل ذب جنطتة بالباب واستلموة سلام كعد على الكرسي جابتلة زهراء ماي شرب وعاين لهديوة لواكفة تعاينلة مدمعة عيونها.
-شمالج هدوة ماتجين حدي
هدى: -وصل سلامك منا
عباس: -ها هيج صارت
هدى: -اي هيج
عباس: -سجلتلج مدرسة مو ماتريدين اقريج بعد شوي حضري روحج انتي وزهرة
طلعت من المطبخ عيونها مدمعة ذب حسرة وكال
عباس: -اليوم مجتمعين السلتان خيركم وجوهكم تبشر بخير.
نزار: -اليوم انة فرحان ورحمن فرحان وجسوبي فرحان وجدتي نوفة فرحانة وفارس فرحان وسفانة فرحانة والعشيرة كلها فرحانة
عباس: -الله يسطرك سطر ولك اريد مختصر عددتلي الامة العربية شني سر هاي السعادة
جدة نوفة: -فارس راح يصير ابو
عباس: اي واخيرا على الخير والبركة ان شاءلله تجيبينة بالسلامة
سفانة: -مشكور يوم اللك
جدة حكمة: اي والله يوم الافرح بيك الشيب راح يطلع من اذانك شوكت تعرس وتفضها
عباس: والله مادري بعد.
نزار: -فكرتنا وياك اتزوج حتى تنحل الجبسة ونتزوج وراك
-عباس: الله كريم بعد وكت
جدة نوفة: -يحبوبة العمر يركض هم نريد نشوف جهالك شوكت تلحك تفرح بيهم والمرة موگفينها الك من زمان عيب علينة الزلمة ساكت وحنة مغلسين عنة
ترة ماصارت بتة عدة لا هي للسما ولا للكاع، وجي صارت عدنة فواتح الزلمة متفهم الوضعية بس من تدير السنة مامنها تعرس يعباس بعد اطينة الناس جلمة.
عباس: -هسة شني تريدين.
جدة نوفة: -حاجاني الزلمة وكتلهم ورة ديرة السنة يصير كلشي رسمي
عباس: -ها هية بكيفكم تخطبون وتعرسون كلشي بكيفكم.
راح لحجرتة وامة راحت وراة عباس موكفيلة مرة من زمان وقارين فاتحتها هسة صار شي. اكيد ورة دورة السنة يعرسولة.
سحبتني سجيوة هي ورغد لحجرتي.
-ها ولجن شبيجن
سجى: سوي مفاجاة لفارس مثل البلمسلسلات
رغد: اي ولج غبرة اتعلمي شي منا منا لاتضلين فاهية دومج وزمانج
سفانة: -شسوي يعني شلون مفاجاة علمني.
رغد: عوفي كلشي ورانا واسكتي
راحن طلعلي قميص نوم غطيت وجهي بدية وجهي مشتعل نار.
سجى: هسة هاي مو يسمونها عيارة مستحية من عدنا جا منة شلون يبووو على حضك يفارس شبيج يحضي غير زلمتج بدلي واتكحلي واتحمري حتى يتسودن عليج فوك مايحبك.
سفانة: -اي بس مو هيج استحي
سجى: -امداج
رغد: -وامداج مرة ثانية
سجى: -اليوم فارس يدعيلي بسم الله
رغد: -يا الله
سفانة: -شني راح تسون
سجى: -تعديلات بسيطة جدا.
سحلني فلن شعري يشسورن بية هو ناعم بالاصل بس بية كسرة شوية صار شطولة كصن الاطراف ورتبن كذلتي سولي تسريحة بسيطة بية وبدن بوجهي شيلكن يخلن منة ويفركن احمر اصفر طيحن كلبي بالكاع.
سفانة: -ولجن خاف وجهي يخرب شخليتن من طراكيع علية
سجى: -والله مادري بس اعتقد ذني مقشرات للوجة المهم تنضيف شبيج
سفانة: -يمة زعم تحركن وجهي هسة يطلعن صابون الحلاقة مالت فارس
سجى: -ومال الغسل اي والله شفتيني ثولة.
رغد: -لا خية حشاج كملي شغلج
بعد ساعة ضبط طلعت النتيجة تجنن صرت اشوف روحي احلى من الممثلات هيج وجهي ابيض وخدودي حمر وحطلي مكياج خفيف بس بارز.
سجى: -اوكفن خل اصوفر
صوفرت بصوت ناصي ورجعت لدية صبغن اضافري بلون القميص وشكو عطر يطلع جدامهن يشرلي.
سفانة: -ولجن كافي خنگتني
سجى: مهروش وطاح بكروش يلا كافي اويلي طلعتي احلى من لميس وسمر
رغد: -بس عدسات خضر تطلعين فاطمة حبيبة كريم.
سفانة: -فطمة ماغيرها التركية بث بدون حماوة جذبن بالمعقول
سجى: -هسة احنة سوينة العلينة و.
اجن البنات يمنة بس نوف ضلت بالباب صحناها يلة طبت.
هدى: -هلا هلا ولكم شهل جمال عيني الباردة عليج
رغد: سجيوة هاي اختج والله مؤدبة وتعرف الاصول جا انتي شمالج عليمن طلعتي
سجى: -دنجبي لا الطمج على حلكج صدك ولج نوفة تعاي الله جابج نمكيجج ونطلعج نار وشرار.
نوف: لا ماريد.
سجى: يا حبيباتي انتن عرايس خو ما تضلن بحزنج زلمجن هم خطية كلشي ماشافو لا احمر اصفر اصخم شلون بلة ماعدجن احساس وتحسن على رواحتجن يعني واذا لابسات اسود باليل ارتب روحي
رغد: -كفو من شاربج بس انتي تحجين شي يفيد
سجى: -هسة رجلج شارد مايلفي حگة ماشايف شي بس يمييي.
كعدن نوف گوة اجباري عنها احسها خافت منهم سجيوة تصگر صگر فتحت شعرها ماشاء الله يخبل من صدك مالعبت بية بس سحبتة ومكيجتها مكياج بسيط طلعت تجنن هي بيضة وعيونها وساع مكحلة ورموشة طوال وحواجبها مارسمتهن عافتهن شوية نضيفات...
سجى: -اليوم طلعنة نسوان جانن زومبي الله اليستر
يلا نوف بعد عليج طلعيلج شي مشلتح نفس هذا وادعيلي وياج.
اخذت البت وطلعت هاي سجيوة طرگاعة فلا تكعد راحة. ضليت اناطر جيت فارس بدلت ورتبت روحي شعلت شمع مثل ماوصني وطفيت الضوة خليت بس الاحمر واهم شي الحبشكات وصني عليها. امشي واطگگ بصابعي شحجي شكول هسة زين واضلن واكفة اذا شفتة. بعد وكت مو هين انفتح الباب رجف گلبي لجيتة ضليت جامدة بمجاني.
عيوني مركزة وياة حتى ماسلم مثل كل صار گبالي مرة ابتسم وكرص خدي: -ترة هواي علية كل هذا الجمال الله يساعد گلبي الليلة شمسوية ولج
-والله هاي ثجيوة الجلبة هي ثوتلي كل هذا انة مالي علاقة
فارس: -نعمة الله عليها خوش بت تعرف الاصول الله ينطيها لحد مايرضيها كون كليومة تفزعلي هيج فزعات
-هاا
-لاتموتين اروح اسبح وارجع.
ضليت ارمش بعيوني ادري بروحي اليصها لوص اخذ ملابسة وطلع يسبح رجعت ارش عطر وكل شوية راجعة للمراية اتاكد بعدني حلوة مثل مساع لو لا.
رجع ينشف بشعرة ويضحك.
-شبيك تضحك
-دشوفي روحج تضحكين ههههه
-ياءء ليش
-يكول اول مرة اشوفج مو صارلنة شكد
-جا شثوي هي هيج انة
-ضلي مثل ما انتي لاتسوين شي
سحبني على الكرويتة ياكل فواكة ويوكلني عيوني بالسگف متعلگة افكر شلون اكلة وافاجئة مثل المثقفين.
-وين بالج
-وياك بث اكول
-كولي يبعدهم.
-هاي شوف انة عندي مفاجاة الك
-هههه انتي مفاجاة بروحج وتجيبين مفاجاة
-فارث عاينلي
-يبعد الما يرمشن من يشوفنج
-انة حامل
صفن بعيوني ثواني وهاي الثواني جرت لدقايق وحهها صار دمم بس يبلع بريكة ماحجة شي لزمت ايدة: -احجي شي شني مافرحان
-انتي شبيج كلتي
-حامل
-يعني انة انة راح اصير ابوي طفل طفل يصير ويصيحلي بوية احجي سفانة عود صدك تحجين لو شني
-والله ثدك راح تثير اب.
كام من مكانة يفتر حول نفسة ويضحك كمتلة خليت ايدي على جتفة دار وجهها عيونة تصب دمع خلة راسي بيدين ادية تجوي جوي من الحرارة.
-عليج الله صدك راح اصير ابو
-اي والله
مسح وجهها بيدة وخلاها على بطني رجعت عيونة تصب دمع بجيت وياة من شفت حالتة.
-هنا ابني
-اي
-الله ما مصدك الا اشوفة بعيني
-ان شاءلله.
كعد على كرويتة خلة ايدة على وجهها يبجي بصوت دموعي تنزل وي كل شهگة يشهگها گطع گلبي حضنتة ثنينة نبجي استمرينا على هالحال لفترة من الوكت. ضام راسي لصدرة ويمسد على وجهي بيدة
-الف شكر والف حمد على نعمة الله مستحيل انسى هالفرحة اول مرة بحياتي افرح اهلكد
-ان شاءلله فرحة اكبر من الكبلها
-بوجودج
باسني بخدي وبحجني ورجعني يلعب بشعري جرة حسرة طويلة وگال...
-الله عوضني بشي جبيبر اكبر من توقعي انسانة تحبني وتقدرني شايلة طيبة وحنان الكون وهسة شايلة ابني الف حمد الك ياربي على سفانة وزعاطيها الراح يجون.
-شتحب ولد لو بنية
-شيجي من اللة يامحلاة وبس اتمنى بنية
-ههه ليش
-حبيبة ابوها يابووية هيج صغيرة وتركض وراي وترتل بوويااا اكلجن ثنينجن
يعض ويبوس بية صوت ضحكاتي ملة المكان سد حلكي بيدة وبدت سهرتنا الجميلة تنطبع بالذاكرة.
اغطي برجلية الطالعات لو بزنودي شسون بية ذني صدك مايستحن ذني بس اني الغبية المشيت ورة كلامهم من ناحية اريد ابدل واكو شي بداخلي يكلي لا حلو عليج رحت كدام المراية متفاجاة من نفسي من بعد فترة كلش طويلة انعجب بشكلي شعري مبروم ومكياجي حلو خفيف فريت اشوف نفسي ابتسمت بس من تذكرت انمار اخمش كلبي.
الساعه بالتسعة ماكو مو كالت سجى اتصل بية شو ماكو كالعادة مايجي راح اتعود على غيابة رحت للزاوية كعدت المكان الوحيد الارتاح بية ضجت كلش شوية وابجي. عقلي مشغول بالتفكير بية.
فزيت من شفتة فوك راسي فاتح عيونة على وسعهن
سحبت القميص من جوة طلع صدري شكد عيب
اسحبة من فوك تطلع رجلية اخر شي كمت متوترة كلش بقة على وضعة وعلى جمودة.
-هاي انهار شلونك وين جنت
-زين
-ليش هاي تتاخر وين تروح يعني.
من التوتر الف شعري على اصبعي واجر بية سحب اصبعي وشمر شعري ليورة سحبني من خصري علية
كلبي وكف من التوتر ماعرف مشاعرة انخبطت مدري شحسيت خشمة بركبتي غمضت عيوني يمشي ايدة على وجهي لركبتي حابة قربة اخذني بغير دنيا دقايق واندفعت مسافة شوية والتوت رجلي جا انكسرت فتحت عيوني مصدومة من تصرفة.
-شبيك ليش دفعتني
-روحي بدلي هذا لبسج.
يتنفس بسرعة حسيت الاوكسجين خلص من كد ماتنفس ايدة ترجف ياشرلي على الكنتور يحاول يسيطر على نبرة صوتة.
-بدلي يلة بساعج احنة احنة، مو اتفقنا لبسج عريض كتلج من اول يوم ليش لابسة هيج يلة بدلي
بقيت بمكاني فاتحة عيوني مصدومة لا اخذ ولا انطي راح طلعلي ملابس اخذ ايدي وانطانياهن
: -هناك روحي بدلي
-ترة عادي البس هيج شنو تستحي مو جنت تسبحني وتغيرلي ملابسي.
سحبني من زندي يتنفس بوجهي: -كبل جنتي مريضة ماكدر اخلي غيري يبدلج بس هساع كلشي يختلف
اخذت ملابسي ومشيت بسرعة ينتر بوجهي نتر بعد شوية ويضربني رحت بدلت بالكنتور ودموعي نزلن رحت نزلت مخدتي والغطا شمرتهن بالكاع بصف الزاوية ولفيت روحي، ابجي من كل كلبي فرفحت روحي اكيد مايريدني بعدة يحب حبيبتة كل ماافكر هيج يحترك كلبي وابجي بالزايد يحاول يجر الغطا مني.
-عووفنيي رروح لحبيبتتتك
-بسج بجي عوفي لطيمتي.
-لاااا ما اعوفهاااا امشييي روحلهاااا ادررري بيك كل يومية تبقى يمها حتى ماتجي هنااا رروح بعد مارييدك الله يحرگ گلبببك مثلل ماحرررگت گلبببي
-ماااا ناااقص حرريگ اموووت والكفل زينب ماضل عايش
سحب الغطا مني ضميت وجهي بيدي اناشغ وخر ايدي من وجهي بالقوة بقيت مغمضة عيوني واشهگ
-انتي جاي تحرگين گلبي حاشة الله
-ااانييي احرررگ گللبببك شووكت شووكت انت التحرك گلبي كول ماريدج احب غيرج خليني اروح واتزوج براحتك.
كعدت على حيلي مسحت وجهي المشتعل نار
-كول والكافل اعوفك واتزوج براحتك هنا جيبها مابيهة شي بس لاتمشي ولاتجرحني بهلطريقة
-ماعندي غيرج بيش تريدين احلفلج
ضحكت بصوت عالي ودموعي تنزل: -جذاب جذاب جنت يمها ادري ماتريدني تريدها هي تحبها ماتحبني
سحبني لحضنة ابجي وارجف اريد ابتعد منة ماكدر حاضني بقوة جريت نفس سكتت هادئة حسيت بدموعة على جتفي حارت جوني.
-دتبجي
-تؤ
-جذاب
سكتت افر بعيوني دقايق وحجة بصوت مبحوح.
-انة اول بشر لاگوني يمهم انة اول بشر عافوني كلهم
ذب حسرة ورجع كال: - ابتعد عنج اتأذى واتگربلج اتأذى بالزايد
-ليش شسويت حتى أذيك
-وجودج بحياتي يعذبني اخاف بيوم اخسرج مثل ماخسرتهم.
-منو الخسرتهم
-امي واخوي واختي اخاف اخسرج مثل ماخسرتهم
من الصدمة ماعرفت شحجي عقلي فصل ماجاي يستوعب كلامة.
-امي كتلوها جدام عيني هنا وانة صغير
كام من مكانة راح ليم الباب يرجف ودموعة تنزل
كمت وراة ياشر باصبعة صوتة يرجف كوة يحجي.
-هنا جنا نريد نطلع انة وياها واخواني بالحوش اخذت ملابسها بيدها ردنا نمشي وطبو عليها كتلوها جدام عيني كتلوها هنا هنا والله والله هي بريئة مامسوية شي.
حضنتة يرجف ويبجي ماعرف شلون صرت قوية وبقيت واكفة على طولي لزم وجهي ويحجي: -بريئة هي والله بريئة ونضيفة كلش انضف من كلوبهم السودة
طاح بالكاع وطحت وياة حضنتة يبجي كطع گلبي.
-عافت اخواني صغار يبجون عليها حر ودرة جانو صغار كبل لايكتلونها كالت دير بالك عليهم بس مادرت بالي ماتو راحولها وضليت وحدي. بهلدنيا الغبرة...
گلبة خلص شهگات ماعرف شحجي وياة بعدني مامستوعبة الصار وياة. رفعت راسة مسحت دموعة ورجع كمل.
-جانو صغار من اروح للمدرسة الگاهم متانيني بالشارع يركضون انطيهم حلويات اشتريلهم بمصرفي وهما يفرحون بيوم جنت راجع شافوني طارو بالشارع يضحكون صوت ضحكهم بذني مايروح للدوم يضحكون ويصيحون نمر درة درة...
غص بالبجي ورجع كمل: -جانت سمينة كوة تركض حر يركض اسرع منها مكيف فتحتلهم ايدي فرحان يجون لحضني آلمهم بية اجت سيارررة طيرتهم بالسما.
شهكت بصوت انجنيت واني اتخيل الموقف فرفحت روحي ورحة بجي لنص الليل واحنة نبجي نايم بحضني دموعة ببلن ثوبي ودموعي بللن وجهها. اسوء ليلة مامثلها ليلة وجعه بكلبي وشهگاتة همس بصوت ناصي.
-راحو وعافوني اخاف من الزمن يغدر بية وياخذج لو حبيتج
خليت ايدي على وجهي ماكدر الزم نفسي دنكت علية ابوس بية ودموعي تصب.
-ماعوفك والكافل الكفل زينب
-الزمن غدار شاد حيلة علية.
بقيت احجي وياة وكل شوية اغص بالبجي منا لمن نمنا واحد حاضن الثاني الدمع يابس على وجههنا
كعدت لكيت روحي بالسرير دورت علية ماكو انتبهت لورقة على الميز سحبتها اقري شبيها مكتوب شهگت بصوت عالي وطحت بالكاع اصرخ بصوت عالي...