رواية بين سلاسل العادات للكاتبة كفاية كاظم الفصل الحادي والأربعون
بين ماصار الغدا انمار اختفة جانت نظرات الحارث على باهر يمنعة من الخروج وهو كاعد على اعصابة
بدا ياكل و الولد والباقين اكلو بقة بس باهر يحرك رجلة بتوتر واني انكطعت شهيتي لان انمار ماكو وشفت الوضع مايبشر بخير...
شوية وطفر باهر وارتعش گلبي من الحارث ضرب بمقبض ايدة الطاولة هزنا هز رجع صاح بية بصوت عالي جمدت بمكاني الوضع مو تمام وعركتهم الوضحت هالشي...
باهر: -اااني زماااال واسمعلكم خليييني اتلاحگ الووضع
الحارث: -باهر اسمع الكلام خطوة ماتخطي مفهووووووم
باهر: -لا مو مفهوم
راح مستعجل والحارث رفع موبايلة ايدة ترجف فتح الطرف المقابل الخط وكانت اول كلمة حجاها: -شوف شغلك
غلق الفون وشمرة سحب كلنس وطلع صفية طلعت وراة ورجعت تلوب وجهي صار اصفر من الخوف وسرى حالها من حالي مامفتهمة شي.
نو: -سرى خايفة شنو صار
سرى: -ماعرف والله حالي حالج
-انهار صار بية شي مو؟
سلينا: -اووف بنات شبيكم ليش هيج تحجون
نوف: -لعد وين راح مشفتي الوضع شصار حموت من الخوف فدوة شوفي شصار
سلينا: مصار شي شبيج نوف ترة الوضع عادي كلش مو شي جديد خليج ريلكس
نوف: -يا ريلكس حموت والله بطني كامت توجعني
لزمت ايدي سرى وكومتني من الطاولة لان حسيت نفسي تلعب منا خوف ومنا ريحة الاكل...
ضليت الوب للعصر ومحد اجة اتصل بية وميجاوب عيوني من كثر ماجمرن حتى دمع مابيهن روحي لابت ياربي مابية حيل اخسر شخص اعز من روحي رجعة إلى سالم...
رفعت راسي سرى نايمة مخلية راسها على القنفة كمت من الصالة امشي بدون روح گلبي انخمش بالزايد من شفت الحماية تارسة المكان اريد اشوف واحد اعرفة ماكو درت وجهي ومشيت ورة البيت.
كعدت على صفحة خلصت طاقتي مددت رجلية بالكاع وخليت ادية على وجهي وصرت ابجي بصوت عالي وماكو بلساني غير...
-يارب رجعة سالم لاتكسرني انهار فدوة رحتلك تحملت الوعة مرة ماكدر اتحمل هالمرة اموت لاتاخذ روحي واني عايشة وخشمي يشتم الهوة، ياربي روحي يمك رجعها إلى سالمة.
سمعت صوت وراي فزيت ومسحت وجهي شفت ابن خالة جان مدنك راسة ومخلي ايدة وراة كال.
-شبيج خوية هسة يرجع عندة شغل لاتخافين.
-شغل؟ ياشغل وهاي الخبصة الصارت عليك الله صار بية شي فدوة لتضم علية والله ماكدر اتحمل
-عليش اضم عليج سلامتة مابية شي رجلج عرج مايصيبة
-احسة بخطر ليش عافاني هلمرة يرجع لو.
سكتت واحس گلبي تگطع دموعي تنزل جمر حتى نسيت الولد تحمحم اكثر من مرة يلا انتبهتلة قدملي كلاص مي اخذتة من ايدة وخليتة بالكاع...
-اشربي يول ترة انمار المصكوع مايفيدج بكثر صحتج.
-غلطان الصحة اذا راحت ترجع بشوفتة واهتمامة اما اذا هو راح مايرجع وياخذ صحتي وعقلي هالمرة انجن رسمي
شهكت ومسحت وجهي...
-دكومي اراويج شكر
رفعت راسي وكتلة: -شنو هاي؟
-هههههه والعباس مخابيل يسمي المرة شكر والمهرة شكر خبل مو صاحي
-عندة فرس؟
-اي ويشبهج بية لان ابيض مثلج
راح يمشي كدامي وكف وصاح: -تعاي يول شبلاج دابجة بالكاع شني حلتلج الكعدة انهضي بساعج.
كمت وراة فضولي اخذني ماجذبني المكان لان نفسيتي زفت طلع بيدة فرس ابيض يخبل ضحكت وخليت ايدي على حلكي: -حلوة شنو هاي
-هاي حبيبتة الثانية يخونج وياها تدرين
-حلال عليها
-مو مساع تبجين علية وسويتي دهر هسة انطيتية ببلاش لهاي الفاهية
عض شفتة وراح كال اترخص: -مرخوص خوية
راح وبقيت اباوعلة تقربت عليها وخليت ايدي على شعرها غمضت عيونها وهمست: -يرجع مو؟
اذا يرجع طلعي صوت حبابة اي شي سوي.
ضليت مكابلتها وكاعدة على نار جنت اريد اي شي يطمني كل شوية ارفع عيوني عسى ولعل تطلع صوت بس جانت هادئة.
حيلي باد حتى تفكير كمت مافكر صرت لا اخذ ولا انطي واي اي خبر ماكو صار الليل والخوف خيم علية اريد جواب يريحني ماكو كمت تمشيت خطوتين ردت اسحب التليفون وكعت من طولي فقدت الوعي شما اكبر تبقة هالحالة بية بس اخاف اتخربط...
جنت نايمة بثقل كعدت من النوم امط بجسمي متكسرة فتحت عيوني لكيت نفسي بحضنة غاط بالنوم صفنت ماكأن صاير شي شوية وتذكرت الصار احس روحي انتعشت بوجودة.
الغرفة جانت ضلمة تلمستة موجود مدا اتخيل خليت راسي برگبتة اتنفس.
-شسويت بية امتلكتني منين طلعتلي يبن عمي؟
وليش هالكثر احبك
تلمست لحيتة نزل ايدي وشدد حضنتة: -انهار كاعد
-تؤ نايم
-اذا نايم شلون تحجي لعد.
-ياهو هذا اليحجي نامي بوية نامي دنيا الليل مابية حيل لسوالفج المسربتة
-هيج صارت شبيك غير اطمئن عليك
-اش نامي
-مااا اكعد اريد احجي وياك
-انتي ياهو؟
-شبيك يعني منو غير حبيبتك
-استغفر الله انا رجال اخاف الله استحرم اتمعشگ وي بنات الناس
-شبيك غير زوجتك
جان مخلي ايدة على عيونة ويحجي برود
انمار: -بس انا مامتزوج بعدني عزابي
ضربتة على صدرة طفر من مكانة خازرني فاتح عيونة على وسعهن رفع حاجبة وكال: -انتي جنية؟
-انهااار
-ادمية طلعتي ولج ماتستحين نايمة بصف زلمة مالابس ملابس امشي كومي لج
-يا شبيك انهار
-منين هذا انهار شكاعد تخربطين امشي من وجهي لا ادفرج شلون بنات ماتستحي
جر الغطة وهو معصب رفعة غطة صدرة ضليت مفهية شبية هذا يحجي صدك لو يتشاقة رجع صاح
-كوومي لج يلا ولي من وجهي
الدموع تجمعن بعيوني راسا طفرت من الجرباية طلعت برا الغرفة كلبي يدك ببلعومي البيت اضلم خفت ورجعت للغرفة اول مافتحت الباب صاح.
-راح نجي اني والجنانوة نسحلج
-يمة انهار شبيك والله اخاف
-ماعندي جني اسمة انهار شتحجين انتي
-لتخوفني حباب
بقيت واكفة بالباب مخلية اصبعي بحلگي صرت اطگطگ من الخوف حسيت نفسي بفلم رعب ردت افتح الضوة بس من صاح وكفت...
انمار: -تعاي يمي اشوفج
رحت امشي خطوة خطوة وصلت يم الجرباية
-حباب لتخوفني الدنيا ليل خاف يصير بية شي
-وانا شعلي عسة مايصير بيج اشياء
-هسة يلة تاكدت انت مو انمار رجلي هاي صدك انت الجني.
فتحت عيوني على وسعهن ردت اصرخ وسد حلگي انتهيت من الخوف سحبني علية يضحك بصوت عالي واني ابجي شوية وشغل الضوة كمت اباوعلة منتهي يضحك بقيت صافنة علية...
-هاي شبيك
-ههههههههههههه والعباس فلم كوميدي الا شوية خليتج تهجين بهليل
-يعني جنت تضحك علية مو؟
-لا بوية انا اخاف الله ما اضحك على الناس هههههههههههههه.
رحت تقربت منه سحبتة من شعرة بقوة ونبتت سنوني بزندة ماعفتة لمن حسيت سنوني وجعتني شفت سنوني مطبوعة بيدة مسحتها وكتلة: -نشوف الوقت بيها خوش ساعة ضبطتها الك
-جلبة غير
-احترم
-شلون ادفرج هسة
-هاي شبيك شنو خالك بدلك اشو تخوفني وتضحك علية وهسة كلامك مدري شلونة
-تستاهلين جا بس تهبطيني عليج الله يرضاها ردت اموت عليج
-اني الردت اموت مو انت سلامتك وين جنت كل هالوقت؟ الف سؤال براسي وفكرة صارت احجيي ووين جنتتت؟
- دنيا ليل لاتعلين صوتج
-جاوب لا اتصرف غير تصرف وياك
-اووو الوضع حمة شبيج بوية غير عندي شغل ورحت اشوف موكلي
-موكلك؟ عفتني بدون لتكلي والناس المختبصة ومحد يعرف شي عنك وموبايلك المغلق نص يووم مختفي وتكلي عندي شغل يا شغل هذا تضحك علية شفتني قشمررر اكلة ردددت اموت يكلي عندي شغل احجي وييين جنت؟
سحبني لحضنة دفعتة صايرة نار وهو يقابلني ببرود
باسني براسي وبقة لازمني اريد اسحب نفسي منة ماكدر...
-انمار: هاي شبيها غير تستقر حتى نحجي
-احجي يلا وين جنت وشنو صار
-ماصار شي اتصلو بية شغلة ضرورية رحت بسرعة مالحكت اكلج كلت اتصل بيها وموبايلي صفر
-حلو واوو كمل لو تريد اصفكلك على هالابداع تضحك علية انت لو شنو والناس المتخابصة احجي الحقيقه.
-يا حقيقة شبيج بوية راكبج جني مو جاي اكلج شغل وبالنسبة لخالي ترة هما هيج بيتهم وجوهم ماشايفتهم حقج هاي لان اول مرة ترحيلهم اسئليني عنهم دوخة راس بعد خالي وشغلة المايخلص.
-ماكدر اصدكك احسك تضم علية شي
-لاتحسين بعد شضم راجع من الضيم الكاج منتهية شسويتي ديلة تعاي نامي وراي باجر شغل.
سحبني لحضنة ونام عيني مانامت دقيقة احس الموضوع جبير وميكلي طلع الصبح سويتلة ريوك وحضرت الحمام وملابسة كعدتة تحضر واكل على الواكف والاتصالات تدك.
باسني وطلع مستعجل رجعت اشوف جنطتة شعجب اليوم ماماخذها من شفتة وشافني هي وياة ياخذ بيهة ملفات واشياء تخص الشغل...
اكيد اكو شغلة جبيرة وخطرة كذبتة متعبر علية بس بمرور الايام نسيتها ومادري عواقبها بالمستقبل...
رغد
البيت اشبة بالفارغ البنات كل وحدة بدوامها والجهال بالمدارس و ولدنا كل واحد بشغلة.
عزلت البيت ورحت اسوي غدة جانت عائشة وعمي فايز كاعدين يسولفون عمي فايز عايش على العلاجات اذا ماشرب العلاج بوكتة ينتهي...
جاي اكشر بتيتة واسمعة يكلها...
فايز: -هم تخابرينة
-ياء جا شلون غير وليدي اخباره اول باول
-شلونة مرتاح
-الحمدلله بخير الله يهنية ويسعدة بنعمة ومريتة رجعتلة خير ربك فرجها علية.
-ردتة يبريني الذمة العمر يركض ركض وعلى ساعة الله ياخذ امانتة
-عمرك طويل ان شاءلله لاتحجي هيج
-مامرتاح لا باليل ولا بالنهار صوتة وهو يتوسل بية اعوفة مايروح من اذني اذني تنطرش بصوت صريخة كتلتو امي اريد امي لو اخوتة صورتة القديمة تعذبني يبت الناس
-الراح راح محد يكدر يرجع الماضي ويصلح غلطة اطلب السموحة منه واعترف بغلطك بلكي والله يسامحك.
-وحدة ثنين شيسامح وينسة، تدرين انة ماكتلتها هما كتلوها بساع بساع ماجنت ادري راح يصير هيج وتنكتل
-الله يرحمها ويجعل مثواها الجنة
-اريد اروح لكبرها مرة بعمري اقرالها الفاتحة
سكتت عايشة تحس بدموعها تمر السنين وتبقة هذيج الصديقة الوفية المانستها بكل مرة تحجي عنها وتخلي الناس تعرفها من غير الثواب التسوية الها وتوزعة بدون ماتكول هذا لفلانة بس احنة ندري.
الندم مثل الموت البطيء ياكل بصاحبة عمي فايز بالوقت المنتهي يلة اكتشف الاشياء من حولة
وعرف حقيقة الامر بس بعد شيفيد ابنة كون حياتة بعيد عنة وعن ذكراة السعادة ترافقة وين ماجان تعذب هواي...
سويت الغدة ورحت لحبوبتي تصيح: -ها حبوبة
-التربة يبعد جدتك
باوعت للساعة بعد نص ساعه للاذان اخذت التربة ورحتلها: -جدة بعد هواي وكت للاذان
-ادري يحبوبة.
-جا ليش من هسة تتوضين غير لمن ياذن انا دوم اكول ليش تتتوضة من وكت بس انسة اسئلج
-يجدة البشر من يصلي يصير بين رب العباد هذا موعد وموش اي موعد موعد الخالق بالمخلوق
فشلة من المؤذن يذكرك ويكلك حبيبك متانيك روحلة اليحب واحد يزهب روحة من وكت حتى من يصير الموعد يلكاة جاهز.
ابتسمت وفرحت بنفس الوقت على كلامها وربطها للمواضيع بالرغم هي مادارسة بس تعرف تناقش باي موضوع تريدة وهنا ناكد الماداخل مدرسة مامعناها جاهل يامن جهلة لازمين مناصب...
بين ما اذن الاذن خلصت صلاتي واجت الجهال من المدرسة شمرو جنطهم بالباب اخذتها طببتهن واجو وكفو يم راسي يردون غدة...
-يلا عمة بساعج جواعنين
-يخسة الجوع غسلو اديكم هسة اصبلكم.
صبيتلهم وخليتهم يتغدون دخلن البنات وجوهن مايكصها السيف بين مابدلن نصبت الغدة تغدينا وصعدت لغرفتي عفت المواعين على نسوان عمي
سبحت ولبست ثوب قصير بارد ونمت حسيت شي على وجهي فتحت عيوني كاعد بصفي...
-الله يساعدك شوكت اجيت
-كبل نص ساعة
-ماكعدتني اصبلك غدة احضر ملابسك
-سبحت مااشتهي
سحبني الحضنة يشم ويبوس بية: -شبيك احسك مو تمام
-دوخة راس ولعبان نفس
-سولفلي عن شغلك
-شسولفلج كل يومية جايتنة قضية شكل.
-مثل شني القضايا قتل وهيج
-خيانة اكثر شي، النسوان سبب المشاكل والجرائم ماكو سالفة صارت اذا مو سببها مرة يلعبن وي ابليس يواعدن ويحبن ويتمعشكن وهنا عدهن رجولة
-استغفرالله شني من بشر
-صاحبنا ويانة يداوم اليوم تبخبر بسبب مرتة
-شلون!
-لكاها وي واحد بنص بيتة ماتحمل خلة طلقة براسها برابي. شلون جان مدللها حتى بيت عزللها وحدها وشتريد جاهز سدي الموضوع لعبت روحي ماريد احجي بالشغل.
سكتت من شفت شكلة انگلب عفس وجههة ونام ضليت صافنة اتخيل ماحس الا سحبني وكعت بحضنة.
: -نام ارتاح
-من اغفة كومي
-براحتك
اباوع لملامحة واحفظ رسمة وجههة ليش قبل ما اتزوجة مامنتبها لجمالة جنت اشوفة كلش عادي بس هسة لا احسة شخصية ومايحلة غيرة بعيني لو جان يملك جمال الكون سبحان الله من زرع المحبة بين كل زوجين...
طارت خصلة من شعري على وجهة ردت اشيلها على كيف همس عوفيها عفتها وضليت صافنة علية تحركت شفايفة وكال بصوت نعسان: -احبج رغدة
ابتسمت واحس فراشات ببطني سكت ماعرف شجاوب عفس ملامحة وغفة من شفتة نام سحبت روحي على كيف بدلت ورحت لغرفة البنات لكيتهن نايمات بس سجيوة كاعدة ناثرة الاوراق وكفشتها صاعدة
رغد: -ها ولج شتسوين
-اصخم والطم تعاي رغيدة لحگيلي اكتبيلي التقارير وانا اروح اقرة
-انطيني اقلام واوراق واسم الموضوع.
كعدت يمها واخذت المعلومات بديت اكتب وهي تقرا
موبايلها يرن وهي مغلسة: -انسطرت روحي شوفي موبايلج مو ثبرنا
سجى: -ياهو غير الاملح يدك
-بعدج ولج صار خطيبج ماتجوزين من هالحجاية باجر يصيرون عندج جهال شلون يسمعونج ويتعلمون منج
-خاب اسكتي عني ماطايقتة مو زين املح ولا غير شي
-شني شبيكم متعاركين
-لا بس صايرة بيناتنة بالنعل
-ياء ولج سجيوة شمالج وي الزلمة طايحتلة نتر هذا هم اسلوب والله مدري شلون متحملج.
-هسة مودية علية كايلتلة اتحملني والله يا الله هم نزل وهم يدبج على السطح يسوي كلشي عندة عادي بس انا دخل افتح حلكي يسويها شكبرها علية
-بدال هاي جان حاجية السالفة
-ولج يحرك كلبي يحجي وي البنات ويضحك وهنا شلون بنات اللبس والمكياج وحدة تلكل للثانية انا اضرب منج ومن اكلة واحاسبة يكلي طالبات مرحلة اولة هنا يجن يسالن عن المواد شعدي وياهن
-حجية صدك شافنة شاب وحلو كالن بلكت ينعجب بينا.
-وينة حلو اشو املح غثة شني الحلو البية
-بعد بعد طلعية غورلة صدك ماعندج ذوق
-عفتة الهن هو والذوق
-هسة عاد اغلقية سوية صامت مو مخليتة يدك بروسنة
-دعوفية مابية حيل اكوم
-اوووف الله ينطيج العقل.
كعدت اكتب وانسجمت بالتقارير ابحث واطلع اسئلة عن المناقشة اتذكرت اول سنة إلى شلون جانت صعبة وشلون اسوي التقارير ونروح نسئل عن الاجوبة اذا مانلكة جواب مقنع كلبي انعصر من اتذكرت تعبي وقرايتي ليل ونهار كلهن راحن بسبب غلطة ياترى اذا افتح الموضوع من جديد راح يخليني اكمل؟
لو الثقة اذا راحت بعمرها ماترجع مهما سوينة...
اووف منك خسرتني دراستي بس لهنا لو بعد تخسرني!
هدى
مدنكة اقرا انكليزي احس ضهري حدب عدلت كعدتي ورجعت اكمل القواعد اجت يمي زهراء الدمعة بطرف عينها اخذت نفس: -شبيج وجههج مصوفر
طكطگت اصابعها بارتباك وكعدت بصفي.
زهراء: -شني ماريدة شوكت يفصخون العقد
-نزار!
-جا هو اكو غيرة
-ليش هيج كارهتة ترة نزار حباب وخوش ولد شتريدين اكثر من هذا
-ماريدة هو روحي كلي لامي خل تگل لابوي
-مسويلج شي مأذيج الولد
-ماريدة من الله.
كامت عيونها حمر كبل لاتطلع كالت: -فدوة كلي لامي وياج
-خوش
رجعت اقرا وبالي وياها نزار الكل تحبة هو صح يتنمر هواي بس ماعندة اذية على واحد...
احس راسي انسطر من القراية رحت كلت لعايشة الحجي الكالتة زهراء وطلعت برا راسي مشوش دايخ
شفت على اجة يركض لحبوبتي حضنتة تبوس بية وراح يسلم على عمامي شوية وضهرت سفانة وياها فارس يتمشون سوة سلمت علينا وسو كعدة...
رحت سويت جاي واخذتة الهم تفاجأت بوجود عباس بينهم شوكت نزل شو مادري حقي اذا لازكة بالغرفة فريت الصينية وصلت يمة عطرة اجة بخشمي الصينية كامت تهتز بيدي اخذ الجاي ورحت طفرت للمطبخ
اباوع بجامة المطبخ وجهي احمر واطرافي ترجف دمعت عيوني وناجيت ربي بهلحظة...
-يارب خلية شخص عادي بحياتي حالة حال الناس ليش باقية معلكة بشخص مو من نصيبي ولا حاطني ببالة لشوكت ابقة هيج هاي جم سنة وما تجاوزتة
طلعة من داخلي.
رفعت عيوني صاير كدامي بيدة استكان الجاي بية نص عيوني دورن بطولة لابس دشداشة نيلية ضاربة وي بشرتة ولاف الجراوية...
ولدنا كلهم مايلبسون دشداشة اذا مو وياها جراوية...
عباس: -صبيلي جاي فوك هذا حلو حيل
اخذت الاستكان من ايدة وكلبي يدك بقوة ماباوعت بوجهة ردت اصب جاي وكال: -خلية يحمة شوية.
خليتة على الطباخ وشغلتة ضليت دايرة وجهي عنة واسوي روحي اشتغل كطعت الحركة من حجة...
عباس: -شلونها الدراسة وياج
-زينة.
-اقري بس على كيفج وي روحج ترة يصير براسج خيط خبال من كثر القراية
سكتت ماجاوبتة رجع كال: -مبينة صرتي لبلبان بالرياضيات وباقي المواد حتى صرتي بعد ماتجيني اقريج
-مو انت ماكاعدلي واعتمدت على اليوتيوب
-ياهو كلج ماكاعدلج جا مو جبتي العمر انا اقريج شختلف هسة.
هم ماجاوبتة طفيت الطباخ واخذت القوري اريد اصب ماكدر ايدي ترجف والمصيبة مبينة رجفتها ماحس غير اخذة من ايدي صار وراي احس بحرارتة بلعت ريگ وتوترت كلش من ذيج الفترة ابتعدت عنة حتى صرت ماشوفة هواي.
اباوع لايدة بيها محبسين ويصب على كيف ترسة وخلة القوري على صفحة سحب الاستكان وعبرة من فوگي كال: -عاشت ايدج شلون جاي صارلي زمن ماشارب مثلة
اخذة وطلع عافاني روحي بايدة ترس المطبخ عطر شفت سجيوة كدامي درت وجهي.
-عباس جان هنا.
-اي راد جاي
-شعجب طالعة بطرگ ايدج لا دفتر لا كتاب
-جنت اقرة ودخت راجعة اقرا
عفتها وصعدت فوك رجعت لكتبي محد يفيدني غيرهن مانزلت للغروب صليت ورحت للمطبخ لكيتهن يصبن عشة جانت امي تخابر سدت الاتصال واجتني
-هاج رجعي الموبايل لابوج وكليلة تكول ام ياسر(اختها) مشكور ماتقصر
-عليمن.
-ياسر ابن خالتج مو جان اقسام داخلية كلت لامة خل يجي يكعد يمنة الديوانية شكبرها شكدها بدال ماماجر شقة ومصاريف كيفت المرة ومن كلت لابوج هم رضة
-راح يجي يمنة
-جا شلغيت دمشي لابوج ودية
مانطيت للموضوع اهمية واذا بقة يمنة بفترة الدراسة شيصير مادريت راح يصير المامتوقعتة بهاي الجية المطولة...
سلمت الموبايل لابوي ورجعت نصبو العشا تعشينا وانجمعنا نغسل مواعين جذبني حديث رضية ونسوان عمي يسالنها...
-شني خية رضية ماتزوجين عباس لو تخلي وحيداني لوين
-رضية: والله ياخية مو بكيفي ذاك هو مايفعل حجيت وياه گالي سدي السالفة مالي خلك النسوان ومشاكلهن
رجعت وحدة منهن حجت: -ماله خلك لمشاكلهن لو بعد مايدبرها من بعد الحادث
رضية: -شهلحجي الماصخ شني مايدبرها كصدج ابني مو زلمة
-لاخية كصدي مو الدكتور كال بعد مايخلف.
نزار: -جا مادريتي الدكتور كال يتعالج ويجيب كرج فروخ بس تمر سنة لو مادريتي بية حتى ماحتاج علاج ورجعت نسبتة
دكت على صدرها رضية وكالت: -ياع يبزر بطني شايلة همك وماتكلي جا كون هيج السالفة ليش طلك مرتة
نزار: -هي شلون مرة رحمة لاهلج طلكها لان بزعتة مامتراهمين بينهم عجز منها ولكاها حجة
بس مو تكولن انا حجيت ترة يرميني بس يدري بية حاجي يلا انا اروح وماردت احجي بس من سمعت حجيجن حجيت المضموم.
رضية: -خو هذا الحجي جدامجن صار
-جا اذا هيج زوجية وخل يستقر احسن مايدور غير دروب
رضية: -يمة يعبيس شناوي تضل طول عمرك كاعد هيج هم اريد اشوف خلفتك وافرح بيك
احس كلبي يرعد رعد مادري شحسيت بس فرحتلة وبنفس الوكت حجي نزار من كال هو ومرتة مامتراهمين اجت الف فكرة براسي شبيها مرتة احس فعلاً اتخذها حجة حتى يخلص منها لان وراها سالفة بس سترها هذا جان احساسي لا اكثر...
الساعة العشرة باليل رحت اغسل ملابسي كعدت اغسل واراجع قصيدة بدر شاكر السياب علساس استغل الوكت...
اقرا بصوت عالي كلة حماس مثل طلاب الابتدائية من يقرون انشودة جنت حافضتها مثل اسمي واني زينة بالادب ماحسيت شوكت خلصت كمت اريد اطلع وفزيت لكيتة بالباب شكلة هستوة جاي او يمكن جان هنا من زمان بيدة ملابسة...
-خلصتي يلا اطلعي
هدى: -ها اي.
سوالي مجال طلعت رحت شريت ملابسي ورجلية بدون ماحس رجعتني للحمام على كيفي بهداي بهداي تمشيت لكيتة يجلف ملابسة بحركة مكومهن فوك الصبة كسر شي داخلي من شفتة هو يغسل ملابسة تحمحمت وحجيت راسا دار وجهها.
هدى: -جيبهن انا اغسلهن
-تؤ لاتعبين روحج غسلتهم
-هواي ذني شو جيبهن يلا كوم هسة اغسلهن
-اسئلج سؤال
-اسئل
-هم يجي يوم وتنسين اهتمامي بيج لو خوفي وحرصي.
دمعت عيوني واحس گلبي نبض سكتت شوية انوب حجيت: -الابن العاق الينسة تعب هلة واهتمامهم وانا بارة واكيد ما انسة تعب هلي واهتمامهم لو خوفهم علية
-بس انا ماسئلتج عن هلج!
-ادري بس من كلت هلي جنت اقصدك، من وعيت لكيتك انت الاب والام تشتري وتقري وتكتب انت الرحت وياي للمدرسة اول يوم وانت الزمت ايدي وكتبتني اول حرف انت نفسك التنطيني مصرفي وتشتريلي ملابس واقلام من اتمرض اركضلك واحجيلك وجعي كبل لا افكر اروح لامي جنت اشوفك الكل بالكل
-وهسة اختلف الوضع وصرتي ماتشوفيني عاد اذكري رباي بس.
-مايضل الوضع مثل ماهو صح بس مال ما اشوفك هاي واكفة حيل ومال انسة ارباك كتلك انا مو عاقة وخير ماربيت انطيني اغسل هدومك
مارد علية وكمل يغسل منطيني ضهرة ماحجة شي وتجاهل وجودي خليت ورحت احس هشاشة بكلبي من يوم يومي اسولف واضحك وياة فجاة صرت استحي اباوع بوجهة اااه من الزمن...
راحت ايام وردت ايام انتقل ياسر لبيتنا جنت ما التقي بية ولا بواحد منا اداوم مدرسة واقرا يوتيوب بس اريد الحك على المدرسات...
كاعدين بالغرفة احنا البنات رغد تحف لسفانة وشروق كالبة خقتها متعاركة وي عمتها وزهراء صافنة بالكتب وسجى مجلبة بعلاوي تمشط بشعرة...
سجى: -الا ازوجك بتي
علي: -ماليدها
سجى: -هي شني بكيفك ماتريدها ولك بتي مالها مثيل بالسلف جنها انا اخبل اجنن لج سفانة تقنعين ابنج ياخذ بتي خوش
سفانة: -وانا شعلي تريديني اجبر ابني على وحدة مايريدها
سجى: -لا حبيبتي يريدها شني بكيفج تحجين اصلا من يشوفها يضل لاطش بالباب.
رغد: -هي وينها غير متعاركة وي ابو البت وشالعة كلبه شوكت تزوجين شوكت تخلفين محد يدري
سجى: -اضب وارخي لا تخافين ماكو شي بس مشلحنات بالكلام لا اكثر ادور نرجع حبايب
رغد: -هو شتخلين علية ودور ترجعين صخام بعينج
سجى: -سفانة ولج ديري بالج على نسيبي وكلية ماريدة ضعيف ترة بتي تتنمر علية انا طلعت لابوها لقب الاملح هي سلبوح
سفانة: -ثجيوة ولي مني انا مرة فقيرة وانتي وبتج الكاع ماتحملجن مانريد ناسبكم هي كوة.
سجى: -اي كوة وبتي شام الك خوش
هدى: -حيل قديمة بعدج متعلقة بالافلام السورية ايباخ
تعاركن رغد وسفانة لان كرصتها حيل وسفانة سوت دهر بيها اخذتها سجيوة تكمللها وجهها...
سجى: -صدك لو كالو سبع صنايع والبخت ضايع
رغد: -وينهن سبايع صنايع سجيوة لاتحمين على كيفج
سجى: -خاب دولن تخربن الواهس ولا تشجعن الواحد.
كملت وجهها وللعصر كالو راح نروح للزيارة ماجرين كوستر اباوع للبنات تركض منا ومنا يبدل ويعدلن سجيوة تخابر بارفد جانت ماتحاجية وعلمود الزيارة خابرتة وتشيل روحها وتركعها بالكاع اخر شي قنع بس خوش حرك كلبها...
شروق كملت كبلهن كلهن لابسة عبايتها وكاعدة على الدرج ورحمن يحجي وياها يخليها تصير حمرة تضحك ويضحك على ضحكتها...
رغد جانت اكثر وحدة فرحانة ماتدري هاي الروحة تخرب كلشي بنتة...
طلعنا وضلت زهراء بالبيت لان جايتها الحبابة ومرة عمي هي وجهالها الصغار...
زهراء
راحو للزيارة وضل البيت فارغ مالي خلك اسوي شي تعبانة رحت تمددت ردت انام ماكو كمت احوس
نزلت جوة لابسة تراك وشعري لافتة شلون ماكان.
وجع بطني مو طبيعي ماخذة الدرب رايحة رادة الوب بروحي ودمعتي بطرف عيني رفعت راسي
شفت نزار واكف بباب المطبخ يباوعلي ماجنت منتبهتلة نزلت ايدي من بطني وعفست وجهي درت وجهي العب بالكاونتر...
فزيت من حاوط خصري بيدة رجف صوتي وهمست
-شبيك
-انتي شبيج.
غمضت عيوني نفسة بوجهي بلعت ريك وكلت...
-و. وخر عفية
مرر خشمة على خدي وايدة يمررها على بطني احس راح الوجع دارني علية ارجف بين ادية قربني علية وخلة راسة بركبتي يتنفس دفعتة من صدرة بخفة رجلية ماعانني ملت وسندني مرر ايدة على خدي وكال بضحكة...
-مو ماتريديني شو سحتي
-ع. عيب عليك لا تستغل الوضع.
ماحسيت علية يقبلني بحرارة اول قبلة بحياتي حتى ماعرفت شسوي انتهيت بيدة معدتي احس بيها شي غريب كعدني على الكرسي اتنفس بصعوبة راح شاف محد موجود ورجع يكول...
-خاب متت واخيرا جربت البوسة شني اريد كل شوية ابوس.
كمت من مكاني ردت اطلع من المطبخ وسحبني من ايدي...
لازم ايدي والثانية على خدي ترجف حتى صوتة يرجف همس بصوت ذايب...
-شسويتي بية كون فلك الفلكج يمگموعة هي هيج كالوها
-نزار عيب روح مني.
-هو شني العيب احترك نزار ياهو هذا
-اريد امشي عوفني
-شعدج رايحة ضلي يمي بدال ماروح اشوف مسلسل خل امثل
خزرتة بطرف عيني وسحبت روحي بعدني مامتحركة رجع سحبني عيونة على شفتي متت خوف شبية هذا تسودن مو جان مايكرب صوبي
-ش. شبيك نزار
-من امدة نزار لا خطبة مثل العالم ولا مرة بيها حظ فرصة هاي فرصة
-حرام والله عيب روح
-بس اسكتي شبيج راح تموتين
-ترة اصيح والله افضحك.
-محد موجود بس بت السطل ومدثرة هي وفروخها لو صواريخ تقصفها ماتكعد
-هسة شتريد مني عوف ايدي خليني امشي
-شبيج زهيران خليني استلذ بشفاج
سحبت روحي بقوة ورجعني علية اخذ شفافي انتهيت بيدة ماكدرت اقاوم اخذ خصلة من شعري لفها على اصبعة...
-خاب شني طلعتي صاكة صكوك ماشايفج زين حتى لميس مو هيج حلوة بكدج ايباخ شوف الشعر ناعم سبيب (حرير)
-جا عبالك صفرة
-لاعع انتي صفرة من صدك.
-على جمالك حتى تعيب علية يلا عوفني كوني صفرة شمالك لازك بية
-قلة نسوان ماكو بس انتي بت حاسبينج
دمعت عيوني حيل انهضمت من كلامة تلاويت وياة اريدة يعوفني ماكدرت لازمني بقوة نزلت دموعي ماتحملت اكثر...
-يلا عوفني اروح يلا
-شمالج هسة تبجين
-نزار عوف ايدي ماحبك اكرهكك
-وانا احبج.
هديت وباوعت بعيونة ودموعي على خدودي مسح دموعي بصبعة ورتب شعري رجعة ورة ضهري تقرب بهدوء غمضت عيوني بقوة ثواني وفتحتهن لكيتة بوجهي نفسة على خدة لشتي صارت ترجف همس
-بوسيني جربي تفوتج
-ماتستحي الا اكل لامي عليك
-كليلها بس بوسيني
-بطني توجعني اريد انام
-سودة علية بية ولا بيج
صفنت بوجهها وابتسمت: -شمالج تضحكين شني شكلت
فر عيونة وطككهن بوجهي: -لا مو بية شعلية انا الوجع يصير بية استغفرالله ربي واتوب اليك.
عاف ايدي احسه تفشل حسيتها فرصة ركضت لغرفتي بوجهي لفراشي طبيت جوة البطانية كلبي يدك بقوة اعيد ذيج اللحظات ماعرفت افسر شعوري بس جان حلو كل شوية اعيد الصار بدماغي الا ان نمت...
كعدت احس جسمي نار وبطني تموتني رحت لمرة عمي كلتلها على حباية راحت دور بالثلاجة كالت
بس بندول وهاي الحبوب ماعرف المن
-عيوني تحرگني حبابة انطيني شي اشربة
-شصابج مو جنتي مثل الوردة ولج مصخنة تجوين جوي.
كعدت نحلانة واحس الحرارة بعضامي انطتني طاسة ماي كلتلي اغسلي وجهج بين ما ادورلج مشروب خافض حرارة
غسلت وجهي وعيوني وحدهن يصبن دمعن حسيت على خرخشة التفتت بيدة علاكة صفن بوجهي راسا درت وجهي اجة خلة العلاكة على الميز وصار كبالي
نزار: -شمالج ولج بس لا من وراي تبجين زهيران على بختج ماصار شي وروح جدي الميت بكبرة
-مريضة مو وياك
دنكت راسي امسح بعيوني رفع راسي وايدة الباردة على وجهي...
نزار: -داوية نار دخيلك ربي بس لا صدك تموتين ربي جنت اتشاقة وياك جا انت مو تدري بية بس لسان عوف البت خطية فقيرة لاتموتها
-ررروح نزار مو بحالك تحشش
-خيبة مامحشس بس جاي اوضح سوء الفهم الصار
راح يركض صاح مرت عمي اجة يفتر فوك راسي
يصيح: -ولج زهيران انتي امانتي لاتموتين يذبونها براسي وثنينة مانتهنا
هسة شخليلها
-خل تسبح وامشي شوفلك طبيب جيبلها دوة
نزار: -دكومي يلا زهرة للحمام اسبحي بماي بارد
زهراء: -مابية حيل.
نزار: -دكومي امشي اسبحج
صاحت بية مرة عمي: -وين تسبحها
نزار: -جا اخليها تموت
-دمشي ما تموت بس لا تسودن البت هسة اخذها اسبحها
كوة سحبتني للحمام سبحت بماي بارد سن يطك بسن لفيت روحي بطانية ارجف مرت عمي ولا اجتني اسمع صوتها عالي تصيح على جهالها...
مرت دقايق ودفر باب الغرفة كمزني ضل واكف بالباب حسيتة متردد يدخل اول مرة يوصل لهنا
تحمحم ودخل كعد كدامي وخلة العلاكة بحضنة
نزار: -خابرت اخوج وكتلة عليج كال شوف شغلك.
-شوكت يرجعون
-بعدهم هسة ماعليج بيهم جبتلج دوة لاتموتين
طلع مشروب خافض حرارة شربني وطلع لزكات لزك وحدة على كصتي بقت وحدة بية مقلص عيونة مثل اليفكر: -اكلج هاي وين يخلونها
-من تخرب هاي نخليها
-متاكدة خاف الها اماكن اخرى
-مادري
-اكلج هسة انا شسوي
-اطلع برا
-لا ماكدر اخاف تموتين
-شخبصتني ما اموت بس لاتلح
-يلة خوش ما الح بعد لاتصير صدك.
رجعت تمددت وغمضت عيوني ضل يمي مثل العاقل وكل شوية خلة ايدة على كصتي يتفقد حرارتي ويحجي بصوت ناصي...
-مو بوسة طلعت علية حتى البت راح تموت من وراها امدة حضك ينزار
غفيت على هالحال كعدوني الجهال يطفرون بالغرفة ويصيحون: -كومي تعشي يلا تعشي
دورت عيوني بالغرفة مالكيتة مادري شوكت نازل سحبت اللزكة ذبيتها ردت اخلي الثانية لكيتها مخليها إلى يعني باقي يمي...
نزلت للمطبخ لكيتها عازلتلي ماعون كباب وقوطية ببسي كعدت اكل ومادري بيش الساعة شوية ودخلت رغد وجهها دم وعيونها مورمة من البجي...