رواية بين سلاسل العادات للكاتبة كفاية كاظم الفصل الثالث والخمسون
لا يمي وأحضنك وأخبط الروحين
ولا أنت البعيد ال ما ألك جية
سجى
حطام، دمار، فراق، انثى شرسة تبدأ بالانتقام
افكار بعقلي لاتعد ولا تحصى اكدر والله اكدر اساعدة واثبت برائتة اي برائتة رجلي مو قاتل عندي ثقة عمياء بية واعرف كل الزين بية مايسويها اعرف منو سوى كل هذا واعرف السبب بس محتاجة دعم محتاجة قوة وايد تنحط بيدي اني وهذا تفكير، مجتمعنا مانتناسب اذا اريد احقق غايتي لازم اتخلص من قيودهم...
اول خطوة خليتهم يخلولة محامي شاطر وكدر يأجل محاكمتة لان ماكو شي ملموس يدل هو القاتل غير الاعترافات من اقرب الناس الة وهو الوحيد العندة عداوة وياة ويكرها لحد الان ماكو دليل على القاتل وكان اختفى كلشي بس البيبان قبل لاتنسد افتحها
رجعت لبيتي اني وحبوبتي لان ادري هي الوحيدة التفتهمني وتسكت حلوكهم وتخليني اشتغل براحتي.
رجعت لبيتي اي رجعت حاملة باحشائي طفل منة جان هو الثاني مايريد يقاوم ويعوفني بداية الطريق بس استمسكت بية حالياً صحتة زينة وماعلية اي خطر...
هواي اشياء تغيرت بالبيت امة وصحتها جانت شبة عاقلة لعبت نفسي من كثر ماتذكر اسم عاصم الكلب سناء جانت مقيمة عدنا ماتتحرك من البيت هي وجهالها ورجلها يتناوب عليها بين فترة والاخرى.
جنت كاعدة اكلب بالموبايل اطلع على القضايا واشياء تخص الجرائم وهيج مواضيع اريد افتح عقلي اكثر رفعت راسي وكلت: -خيرر
سناء: -خير بوجهج
-شتريدين فضيني
-اريد فلوس اخذ امي لدكتور نفسي لمستشفى اذا تضل هيج تتسودن لو تموت ترة هي مريضة وانا خايفة عليها
-خافي عليها واخذيها للمستشفى ليش لا امج وعزيزة عليج من حقج انا شكو؟
-اريد فلوس جا عليمن اجيج.
-وااااات فلووس؟ شني هاي الفلوس تنوكل تنشرب هاااا استغفرالله تذكرت فلوس اي جا انا بنك حتى انطيج
-سجيووة لاتضلين تلفين وتدورين اريد فلوس اخذ امي شني ماتفتهمين
كمت صرت بوجها: -افتهم عزيزتي واعتقد انا ماواكفة بدربج واذا قصدج انا انطيج فلوس احب اكلج ربع دينار ماعندي
-وفلوس اخوي وين هنا والاوراق والمستمسكات؟
-وانا شمدريني ذاك اخوج وروحي اسالية مخليهن بجيبة بنك الله اعلم
-يعني هسة ماتدرين وين مخليهن.
-للاسف لا عود روحيله حتى يحولنة مبلغ نعيش بية
راحت وجهها مقتحن والغيظ ماكلها اكل تريد فلوس ومكانهن هي هاي غايتها تحصل فلوس لاهما امها ولا شي...
رحت وراها سمعتها تخابر برجلها رحت على السريع بدلت ورتبت شكلي كعدت بالمطبخ بيدي مبايلي حبوبتي بالاستقبال وهي جوة اعتقظ تنبش ماتدري خليتها براحتها لان ماجايبة شي وياي...
انتظرت دقيقة دقيقة يجي ومن سمعت فتحة الباب رفعت الموبايل اسوي روحي اخابر...
-والله ياحبيبتي مرتااااحة بعزز الخير هههههه وين جنت كاعد على انفاسي مخبلني الله خلصني منة لجج تخيلي صار كلشي باسمي وباسم ابنة همزين طلعت حامل حتى اثبت بالخير واعيش مددللة روحي بخيرة وهو بنص المستنقعات...
هذا كلة طلع من نصيبي ااااالله اي لج ادري بس اصبريلي كم شهر بس ينحكم اخلية يتنازل عن كلشي باسمي واسم ابنة وبس يصير هذا الشي اتزوج واعيش حياتي حرررة احححح مررتاحة.
يلة عيوني باي عود اذكرج وياي ما انساج اكيد
خليت الموبايل على الكاونتر وخليت رجل على رجل اتامل بالبيت كلشي متقصدة اسوية: -ابوسة للكتل عاصم ورط الاملح الغثيث
ذبيت نفس و التقت عيني بعينة القذرة ونضرتة الوصخة ابد مايغيرها بقة واكف بالباب وسلم
-وعليكم السلام اتفضل ادخل البيت بيتك.
-مشكورة ماتقصرين
اجة دخل كمت طلعت عصير، من الثلاجة ورحت جبت كلاص صبيتلة وخليتلة بصينية: -اتفضل اشرب.
ملامح الاستغراب والذهول انرسمت على وجهها الضاهر محد معاملة باحترام ابن المسموط اخذة من ايدي يتصفن خليت الصينية على الكاونتر ورجعت لمكاني مخلية رجل فوك رجل وشابكتهن بيدي وعيوني علية وهو مايتفسر شكلة عيونة اكلتني كون يشوفة ارفد الا يحط طلقة براسة ويدخل السجن من جديد...
-شلون رجلج
-بالسجن شلونة يتاقلم على الوضع شوية شوية
-هسة انتي ضايجة علية
-ااااح ليش اضوج احمم استغفرالله.
دخلت مرتة متفاجاة من وجودنا ضلت تباوعلي بنظرات استغراب وغيرة نسوان راحت تحجي وياة واني حجيت: -انتو شكد اعماركم؟
سناء التفتت علية مافاهمة ورجلها ابتسم بطرف شفتة وكال: -انا بنهاية الثلاثين
-واووووو ثلاثيني احلى عمررر
عفتهم بوضعهم ودخلت جوة اضحك وافر بيدي واسمع عركتهم كبت من طلعت من الغرفة لكيت البيت صنطة وهي ماكو رحت لحبوبتي ابتسمنا ثنينا وسويتلها بيدي اوكي
نوفة: -لوتية.
-اعجبج نوفة دربة سهل كلش سهل حتى ماتعب روحي وياة
-يلا كومي اتحضري نكمل البراسج
وابتسمت واحس روحي كلها طاقة وامل لبست على السريع ورجعت طلعنا اجرنا تكسي للمكان الكو بية جثة القذر وصلنا والتكسي انطيتة كروتة وخليتة ينتظرنا رحنة نفتر على المحلات القريبة من الجريمة وبداخلي اسال معقولة ماكو كامرات طارت وي حضي؟
دخلنا محل بنجرجية سلمت حبوبتي وكالتهم.
-خالة انا جاية عليكم واحنة بس نسوان ماعدنا والي وداخلين على الله وعليكم
-ابشري حجية عد عيناج
-يمة لية وليد ابن ابني الشهيد كبل فترة داعمتة سيارة وضاع فيارة(القاتل) ماعرفنا الة اثر واحنا نسوان ومالنة ولي غيرة واريد منكم تدلوني على كامرات بلكت مصورة شي يفيدنا
-والله ياحجية هسة العدة كامرات مايكول عدي يخاف يراويهن ويبتلي على عمرة من الناس ومن الشرطة بس يسمعون صاير شي يضمون الكامرات لو يكولون محتركة.
-وهسة شلون يمة مابيها مجال بس اسالي ياهو العندة كامرات حتى احنة نروحلة
-حجية وين ابنكم اندعم هنا لو بغير فرغ
جاوبتة بسرعة؛-هنا هنااا بهذا المجان يعني الكامرات قريبات منا
جاوب: -هذا المجان راح تصير علية سمعة حتى الناس صارت ماتطبلة ذاك اليوم انكتل بية واحد وابنكم اندعم والكبلها حادث بية
-يمة اسم الله يحبوبة شني ياهو الانكتل هذا.
-والله حجية اجينة نعزل وشفنة المقتل راسا بلغنة الشرطة واجو شالوة الكاتل كضوة حسبي الله ونعم الوكيل شلون دنيا
سجى: -الشرطة شافت الكاتل بالكامرات مو؟
-لا والله يختي ماعرف
-زين هو اكو واحد عدة كامرات
-اي اكو بيت صاير صفح حتى الشرطة ماراحتلة لان من زمان متروك واهلة مسافرين بين فترة وفترة يجون يشوفونة ويمشون
-زين تكدر تبلغهم نريد نشوف كامراتهم وتحجيلهم احنة بس نسوان وماعدنا غير الله والتسجيل.
-بالخدمة تامرن امر بس اشوفهم اشرحلهم حالتجن
انطيته رقمي حتى يتواصل وياي وحبوبتي تشكرتة
طلعنا من المكان لان يلعب النفس ختلات وزواية بية هواي صعدت لازمة راسي وبين افرح ولا اخاف تخرب فرحتي رجعني للواقع صوت حبوبتي وهي تكول...
-شفتي يحبوبة شلون يحجون وي المرة انا ليش ماردت ادخل ولدنا لان ادري بيهم ماينفعونة بشي لو زلمة هساع ويانة جان ماحاجونة هالكثر.
-اي انقهرو علينة عبالهم صدك ماعدنة احد مايدرون اذا تطلع ولدنا ويعرفون ا...
كطعت كلمتي وضليت ساكتة بين ماوصلنا للبيت لكيتة هوسة هي وجهالها مبسطة وتاكل حتى ماتباوعلنة هزيت بيدي ودخلت جوة افكر وارتاح
شربت علاجي وسويت اكل إلى ولحبوبتي هي ساكتة واني عقلي ينهش بالافكار عقلي صار يربط شي بشي ضحكت من اتذكرت الافلام الهندية وشلون يطلعون منها بسهولة من ورة سوالفهم.
-ضحكة خير ان شاءلله.
-ان شاءلله حبوبة الافلام مو بس نخلص وكت بيها لا طلعت نكدر نستفاد منها وبشكل كلش جبير
-شني بعقلج احجي
-لا شي ماينحجي ماكدر بس جنة هو الخلاص
كمت اضحك شبعانة مرتاحة اي مرتاحة لان الشي الراح يصير بصالحنا احنا التلاثة...
تمر الايام ورجل سناء نظراتي علية واني عمدة صرت اسلم علية واحجي وياة من بعيد من يجي يشوف مرتة بيوم جانت نايمة قيلولة عدهم حتى حبوبتي.
بس اني اعرف وكتة اندك الباب رحت فتحتة وعلى اعصابي امثل البرود دخلت للمطبخ وهو مثل الحيوان منتظر اشمرلة عظم هالكلب رحت وكفت وارتجيت على المعرض ونظراتنا متبادلة رفعت حاجبي وكتلة: -احجي الصراحة انا معجبة بيك اذا انت هم معجب ليش هالانتظار والنظرات المحرمة انا اخاف من الحرام نتزوج احس ها شكلت؟
-فتح عيونة بصدمة وكانة جاي يحلم مامصدك الكلام رجع يفرك بعيونة ابتسمت بشيطنة اذا ما اصحيك على زمانك لاتسميني باسمي: -ها شو ماسمعت قرارك اي لا؟
-لج شني اي شني لا انتي صدك تحجين انتي انتي ترضين بية!
-وليش مارضة بيك شني مو رجال؟ الصراحة انا ماكدر انتظرة عمر ابني ياهو اليربية انا ماكدر ادير الاملاك وحدي وابني شصير ارفد مامنة رجعة كلت اشوف حياتي وانت عجبتني اذا ترضة حتى ارفع قضية طلاك اخلية يطلكني لان مجبور بس كبلها ادير الاملاك باسمي واسم ابنة
فتح عيونة بذهول وكان هذا احلى خبر سمعة بحياتة مشيت خطوات للباب وهو واكف متجمد بس يبتسم طلعت ورجعت مديت راسي من الباب وكتلة: -بس بشرط اذا وافقت.
ردت اطلع وكال يهز براسة عدة مرات: -موافق موافق اكيد اوافق شبية مخبل حتى ارفضج شني الشرط كولي
رفعت حاجبي بانتصار وكتلة: -تطلك مرتك واخليها هي وجهالها بيت وحدهم يعيشون بية ومصرفهم عليك وانا هم اساعدك هاااا بس كبل لاتطلك لازم انا موجوده وهنا يصير الطلاك
عفتة ساكت ومستغرب رحت لغرفتي سديتها علية وافكر بالشي الراح يصير هل ياترى يصير مثل ما اريد لو العكس؟
مر اسبوع بعد مالمحت خلقتة بس مرتة رايحة راجعة عباتها على راسها ماتنزل ضاگ صدري من شفت الفترة طالت وكلشي ما استفاديت من جيتي صرت جثة بلا روح فوك الحجي الينكال علينة وماكو نتيجة.
ابوي متخبل شلون كاعدين بيت بدون رجال رجعيت اعيد الصار اول ما اجينا وبلغناهم راح نعيش هنا ابوي اول المعترضين جان.
-تعيشين بيت بدون زلمة وين صايرة هااااي.
-بيت رررجلي هذا لاحددد يتدخل وووين اريددد اكعدد اناااا مرررة متزووجة ررجلي هو اله حگ يفرض رأييية علية اما انتم بعد طلعت من ذمتكم مالكممم حگ علية
-ووانتيي يمةةة وانتيي شبيج مطابگتهااا
نوفة: -يمة حلال زلمتها يضل مطشر بيد العربان انا وياها بالف زلمة شني نسيت انا امك ربيت زلم
-يمة انا مالي شغل بيج اما انتي سجيوة اذا ماسمعتي حچيي اتبرااااااااااا منج.
جانت هاي اخر كلام بينا كمت حيلي مهدود طلعت ملابس سبحت ورجعت بدلت بلا نفس اخذت حبوبتي لازمتها مدري هي لازمتني: -حبوبة انروح للسيد نزور ونرجع
خابرت فارس اجة اخذنا محتاجة امام اريد ارتاح بس المشكلة الطريق طويل ياهو الياخذنة كلها عدها اشغال وصلنا للمكان مثل الجامع وبية ناس شي طابة وشي طالعة الباب متروس حنة وبيارغ.
دخلنا زرنا ورة فترة طلعنا نفسيتي تعبانة والجاي اسوية ماينحجي بية اذا سمع الصاحي كلامي يضحك علية واكيد يكلي لاتتاثرين بالمسلسلات لهذا السبب ماكلت لاحد بالبراسي وبقيت اتامل فرج ربي...
بين قرائة القرآن وبين الادعية والصلوات خلصت وقتي وقتلت الفراغ المميت كعدت على السجادة دموعي تجري: -يارب سويت كلشي بيدي الباقي عليك لاتعوفنا بنص درب كل واحد بصفحة مطشرين اكيد بعد فترة اهلي يرجعوني للبيت وينتهي كلشي...
تعب، خمول، فقدان طاقة، فقدان شغف، انعدمت الحياة وسبحان الله وحدة القادر يرجعها...
كاعدة اطبخ وارسل بالبنات بدون نفس يجاوبني وارد بكلمة لو كلمتين سديتة بعد ماشفت الكرج مال الجهال يفتر بالبيت وسناء دخلت بعدهم كالبة خلقتها وعبايتها نازلة من راسها دخلت حبوبتي بعدها قدمتلها كرسي كعدت رحت اجيبلها ماي ودخل رجلها سلم وعيونة على مرتة وعلية فتح الموضوع وكال...
-حجية وانتي شاهدة على الحجي سناء.
التفتت تباوعلة وتريد تعيط بية شتررريد صدمها كبل لاتجاوب كلها: -انتي طالگ
شهگت ولطمت على وجهها بعدهة ماصارخة ورجع كمل: -طالگ طالگ اليوم اجيب شيخ والج حقوقج بالكامل
وكعت بالكاع تدك وتلطم ملختتتتت رروحها تملخ تدعي وتتحسب علية حنجرتها راحت هو طلع وجهالة يفترون داير مدايرها لبست عبايتها وطلعت وراه تصيح: -شمسووية طلگتنيي بعد ماصاارت عدك فلووووس ووولك ليششش موو وياااااك بكل خطووة.
طلعت تركض مثل المسودنة واحنة بقينا ساكتين متحظرين للقنبلة الجبيرة هذا الحجي مايفيدنا رجعت اكمل بشغف استوى طفيتة وكعدت هزيت راسي بوعيد والله لبهذلكم مثل مابهذلتونة وطفيتو فرحتنة مثل ماهسة رجلي ماشايفة شكلة ولا سامعة صوتة اشهر شوفتة بنفسي ضالة اتنسى علية اخليج تكرهين شوفتة وتكرهين روحج لان ساعدتية بكلشي...
كمت صبيت اكل للجهال وحبوبتي واني نفسيتي مسدودة منتظرة الاخبار الزينة التفتح النفس كملو غسلت المواعين واتذكر عركاتنا عليهن وشكد يضل يحجي من يغسلهن مسحت دمعة نزلت من عيوني
تعال اني اغسلهن بعد ماخليك تسوي شي بس ارحع
دقايق وسمعت الباب يندفر ايدي صارت ترجف خليت عرفت راح يصير شي بس مادري مثل مامتوقعة لو غير شي شغلت التسجيل وخليت الموبايل بصدري.
دخلت صايرة كتلة من نار وجهها احمررر متروس خراميش خفت واني اشوف شكلها مجرمة تكتلني بدون رحمة لزمت السجينة وبلعت ريك خاااايفة بس ماابين...
اجت تمشي وتصيح بحرررگة: -لججج الس تاااااااخذين رررجلي منننننني لججج عرررفتتتج موو وجهههه ررراحة وارفد جااان شايلججج من السماااا نسيتية
-مجرررم ورراح للمجان اليستحقة.
لزمت السجينة زين واخذت وضعية الهجوم هي من شافتني خافت بقت واكفة بمكانها كلها نار حبيت استفزها اكثر ابتسمت بخباثة وكتلها: -شوكت نتزوج ماكلج
-لجججج عفتتي الناااااااااس كلهااااا افترريتي على رررررجليييي مو تدرررين بية ماعنديييي غيرررة
-شسوي هو رجلج مخلي عينة علية
-انتي وحدة نسيتي كلشي نسيتي رجلج ورحتي لواحد زبالة مثل رجلي لحكتيني على الزباااااااالة
-الزباالة التحجين عنة احسن من رجلي عاد مو مجرم.
-للللللج هوووو المجررررم هوووو الكتتتتتل ابووووي علموووود الخمسسس ملاييين وعلموووود اخذذذذ حصتتتتي من البيتتتتتتت بعددد ما اخووووي ينسجن
رجلية صارن خيوط احس جسمي ثلج فرحت وخففففت من شفتها سكتت فاكة عيونها على وسعهن كانها استوعبت كلامها ضربت علىى صدرها وهجمت علية ركضت بكل ماعندي للغرفة دخلتها وسديت الباب بكل قوتي صرت وراة ارجف وهي تددك بالباااب وتصيحح.
-اليووووم ماتطلعييين عاااايشة اندفنج بهاااي الغررفة ونكول نهبتتتت وي واحدددد
الساني انبلع احس جسمي يرجف طلعت موبايلي من صدري سديت التسجيل ورحت اتصل على فارس ضربت على كصتي بكل قوتي من لكيت الموبايل طافي شحن مو وكتتتك شلوون طفيت مو جنتت مشتغل رحت ضميتة بمكان بالغرفة حتى لو صار بية شي مايوصلون للتسجيل ويمسحونة...
خليت ايدي على كلبي من سمعتها تخابر وتصيح: -تعاااال وولك عررررفتتت كلشيييي ما لازززم تطلللع من الغرررررفة ندفنهااا بيهاااا
احس گلبي راح يوكف من الخوف عيوني صارن جمررر تربطت ادية ماكدر اسووي شي خفت على حبوبتي يكتلونها وخفت على روحي...
تقربت على الباب خليت اذني وصرررت ادددك بكل قوووتي واصييح عمتي لان حبوبتي ماتسمع الباب مقفول وهي نايمة ماكووو صووت حنجرتي انشلعت احس صوتي طبك وماكو جواب لا من عمتي ولا من حبوبتي...
ردت اطلع بس خفت تضربني وتموتني صح اني قوية بس ماكدرر اطلع بلعت ريك وايدي ترجف خليتها على يدة الباب اريد افتحها واسمع صوتة فحطان يكلها؛-ووووينهاااا شلوون عرررفت
-بالغلططط حجييت مووو وكتتتك تعااال نتخلللص منهااااا.
هدى
جسمي مكسر فلاونزة والحرارة تاكل بية نايمة على وجهي ماحس الا نرفع الغطا ودفرات بطني رفعت عيوني بوجع واذا اشوف زهراء تندس بية برجلها مديت ايدي وسحلت رجلها عضيتها بكل قوتي وهي كامت تصرخ وكعت من طولها لازمة رجلها...
زهراء: -اااااخ ووولج يييممة لييش هيج الخااااايسة
-انجبي ويلا ولي منااااااا
-شبيج هداوي شبيج
-قزززز القررررررط ووووليييي عوووفيني بضيمييي جلبببب وتندسين بية برجلججح ياااا زمااالة.
-اهووو هااي شلوون تفكر لج والله اجيت اكعدج مو كصدي شي
-تففففف عليج عوفينييي بلكتتتت اموووت واخلص من وجهجججج الاصفرررر
ضميت راسي بالبطانية محترك دمي محد سال علية واني مريضة وهاي تريد مصلحة ماجايتني على الخالي بلاش كلش غثتني بتصرفها مدري اني مغثوثة من كاعي...
سمعت صوت شهكاتها ماتحملت ورفعت الغطا عني لكيتها مغطية وجهها بثنين اديها وتبجي بذمة وضمير ذبيت نفس وزحفت الها وصلت قريب منها دغيتها برجلي على بطنها: -هيوو شبيج
رفعت عيونها كلهن دموع ضربتني على رجلي نزلتها وصحت بيها: -شبييييج شبييييج
-ااانتي شبييييج
-مررريضة ومقهووورة وواااااانتي
-متزززاعلة وي ابووو الزوزززز واريد اخذج وياي نصالحةةةةةة
-غسسسسل الغسلكمممممم
-شبييييج تصيحييييين لا يسمعوووونة.
سكتت ادية ترجف ذبيت نفس وحجيت بصوت ناصي: -بعد ماصيح شتريدين كولي
-كومي نروح فدوة
-وين نوووولي اششش اشش بعد ماصيح مررريضة مو بيدددي
كامت وسحبتني تجر بية جر الساعة بالعشرة بالليل البيت فارغ كلها تنام من وكت كل وحدة تاخذ جهالها وتدخل لغرفتها نزلت بملابس النوم حتى شال ما لابسة بهذلتني تبهذل مادري شتريد بالضبط نترت ايدها احس خلعت ايدي تركض وتسحب بية
-اكسررر راسج بس تسحليني.
-حبابة اعصابج انزلي على كيف لاتسمع امي لو ابوي
-هي بس امج وابوج موجودين بالبيت
نزلت اهز بيدي هي راحت كدامي جنها حرامي تمشي على اطراف اصابيعها لحد الان مامستوعبة شتريد مدت راسها بالمطبخ واجت علية لزمتني من ايدي نترتها: -لاتلزمينيييي
-اي بس اسكتي شوفي احنة راح نسولف بالمطبخ وانتي راقبي الوضع خاف يجي واحد بس صيحي باسمي
-تسولفون؟ شتسولفون بهليل تحجين صدك
-حبابة نسولف سوالف عادية اوكفي هنا فدوة.
راحت دخلت مديت راسي نزار واكف هي راحت كدامة مد ايدة ورة ضهرها وسحبها من خصرها علية
يعدل بشعرها ومن كد فرق الطول منزل راسة ركبتة تريد تنكسر...
خليت ايدي على حلكي اني اشوف واسمع كلشي صخام بعينها هاي شكو جايبتني حتى اشهد عليها وخرت ايدة وكالتلة: -نزنز ايدك عيب
-مو عيب مو عيب مرتي حلالي
-مو مدري شيصير بية من تلزمني
-شيصير؟
دنكت راسها رفعة يباوع بعيونها هايم عاشق فررحان.
-لج صايرة تنكرطيين اريد اكل منج.
-مو تعيب علية وتكلي الصفرة
-اجذب عليج انا حقير اريد احرك كلبج انتي غير تطكين بالكاع شنهي الجمال بوووية اريدد اتزززوج
-نزنز عطرك طيب
-اه صددك يبووو تعااي شميني
-شميت
-لا مو منا الشم
نزل راسة اكثر وخلة ركبتة كدامها وياشر باصبعة: -منا شميني
-لا ماريد عيب بطلت
-بداعتي شمي شمي
قربت خشمها لركبتة من بعيد شمت عطرة مغمضة عيونها دليل على عطرة طيب فتحت عيونها ذبلانة هالبت مدري شسوالها يكول شممها مخدرات مو عطر.
رفع راسة وبعدة مقيدها: -ها طيب
-اي اريد مثلة كلش طيب
-شتسوين بية مايصير ثنينة نخلي من نفس العطر
-عود ليش
-عود لان انا اريد اشمج وانتي هم لازم كل واحد عطرة مختلف بعدين تعرفين هسة خليني اشمج وافهمج
خلة راسة بركبتها ياخذ نفس غطيت حلكي بيدي وابتعدت اضرب رجلي بالكاع فوك ما اني مصخنة صخنت بالزاااايد حسيت روحي جمر وهما عادي وهاي الغبية بس جابتني امدااها الثوولة رجعت اباوع من اختف اصواتها...
لازكة بية الا درجة ومدري شيتهامسون اصواتهم مختفية وجهة بوجة ضليت فاكة حلكي ومركزة وياهم تركيز اكثر من الطبيعي نزيت من صاح نزار
-شوووكت اتززوج ولج گلبي طااااك يبووو وين يحسوون بية كل واحد نايم بحضن مررتة موو راح يخلوني اهج بيج
-لاتصيح لايسمعوك
-انا اريدهم يسمعوني اكلهم اريد مرتي حتى اخذج جدامهم شو بلة كولي نزنز
-نزنز هههههه.
-يبووو من اروح فدوة لنزنز اليتنزنز ولكم يبووو راح اطك واموت شدعي عليك المجسب مو حتى الله مايريد يسمع اسمك
-لاتحجي علية خطية
-خطاة المرض ان شاءلله ابو النسوان منين ما ملتي غرفتي مثل البيتها على الشط منا رغيدة ومنا هاي المسحولة روحها
-لا رغد ماتريدة راح يطلكها
-اي حل بية خل يضل بس على وحدة وشلون وحدة وجهها فاهي تفهي ان شاءلله يصيبك مغص من وراها.
رفع ايدية يدعي وهي تسحب بيهن وتكلة: -خطيه مايصير تدعي على الناس اخوي لاتدعي علية ما ارضة انا
-هسة المجسب حتى هنا لاحكني شعلية بية رغد كافي علية راح تجلطة
-اي والله رغد حتى ضربتة على صدرة همين وكتلت مرتة
-تربات سجيوة سوتها زومبي مو مرة شترجة منها ولج انتي ديري بالج تمشين وياها لو تسولفين اموتج بس اشوفج كاعدة وياها
-يا ليش رغد حبابة.
-هم جانت حبابة مثلج بس من رافجت سجيوة صارت مثلها الكاع ماحاملتها هسة انتي هم من تمشين وياها تصيرين اخس وانكس منها امشي وي هاي الفاهية هديوة هاي ثولة ماعدها شيطنة فطير
عضيت اصبعي وباوعتلة بغيض اني فاهية وثولة وفطير امداك اي والله درت وجهي من شفتة يريد يبوسها بعد الحرارة صعدت لراسي رحت اركض اصعد على الدرج بس خلصت وكفت لازمة المحجر الهث النفس ضاع مني من وراهم الفاسقين...
-شبيج بوية.
من سمعت هالكلمة ردت اطيح على ضهري جفي لوما لزمني وعتني علية صرت ارجف بيدة والساني نبلع اريد احجي ماكو تخيط الساني: -ع عبسي ها هاي هاي هاي
-شبيج شني الهاي
خليت ايدي على وجهي وصرت ابجي واناشغ لزمني متخبل ويتفحص بية: - هدوة شمالج بوية ليش تبجين ليش
رفع ايدي على وجهي يتفحص بية فتح عيونة على وسعهن كلبي نغزني عبالي شافهم نسيت احنة فوك
لزمتة من ايدي ارجف: -بس بس خل افهمك هاي هاي
-شتفهميييييني شصاير بيج.
لزمتة من ايدة كوة واكفة على طولي بالاصل اني دايخة ومريضة وخفت عقلي تخربط من صوتة بس دموعي تنزل يخلي ايدة على كصتي ويمسح بدموعي: -بووية راح تموتين الصخونة راح تموتج روحي لحجرتج انا اروح اجيب ماي بارد اسويلج كمادات
نزل بايتين وفتحت عيوني على وسعهن هسة يشوفهم شهكت ونزلت وراة: -عباااااس لااااااااااا.
التفت علية متفاجأ كلبت عيوني وشمرت روحي علية حتى ماكدرت اميز جاي امثل لو صدك اني تخربطت شالني ونزل بية يركض عتيتة من تشيرتة وصحت: -لاااااا عبااااااس لافدددوووة
خلص الدرج نزلنة صرت اضرب على كصتي راح ندخل عليهم لزمتة حيل من التشيرت: -فدوة صعدني فدوة
-بس خل اشوف ماااي اغسل وجهج اشربج دوة اخذذج للمضمدددد وين اصعدددج ترردين تموووتين
-لاتصييييح بوووجهي ليشششش تصيييح اااانا مو مررريضة؟
-بعد ماصيح توتررررت.
-زلم اخر ززمن تتوتررر
رجفة صارت بجسمي مو طبيعية فتحت عيوني من شفت دخلت المطبخ راسا ضميت راسي بحضنة ماريد اشوفهم بحالة الاستغفر الله ومن سمعت صوت نزار نار اشتعلت بية هسة اني شكو.
-شتسوي ولك
-هستوني اجيت انت شتسوي لا وانوب شايل الفرخة بحضنك شني شصاير.
-وولي من خلقتي البت مرريضة ولكمم داوية نار
-هاي اضن من شافت الاحمم دوت نار
-لاااتضل تلغي برراسييي ولييي مناااا
-وسسسم حتى سمم هسسة شسوويتلك امدااااكم.
نزلني على الميز خلاني ارجف اريد اسيطر على جسمي ماكو اجة يغسل بوجهي بماي بارد نشغت من البرودة احس جسمي نار غمضت عيوني وهو يغسل بوجهي وبركبتي وصلت الماي لصدري احسة اخذ ادية يغسل بيهم لحد العكس راح ورجع بيدة دوة فتح القبق ايدة ترجف كوة ترسة وشربني...
-ماايفيد خرب باهلة
-ياهو هذا
-الدوة مو خوش دوة
نزار: -اكلك عباس جعت اريد اكل
-تعااااال اكلللللني تعاااااال ماتشووفني صخاااام بووجة عباس.
نزار: -وهسة انت، ليش تصيح بيك مرض
-ااااي بية مررض ارررتاحيت
رجع علية يقيس بحرارتي ويصيح: -اااهتمام ماااكو مو بت واطلع من الحمام لافة راسي انشفة واكعد امشطةةة مو اخلييية ينكط على ضهررري الى متتتى اضلل اعلممم بيج الى متتتى
-رروح عنييي رروح تصييح علية وانا مريضة روحي ماحاملتها تعاال نزنززز اخذني
اباوع على نزار صفن بوجهي يبلع بريكة وعباس عاكد حواجبة ويهز بيدة: -نزنز مو نزنز.
فزينا ثنينا ونزار طفر من صاح عباس: -شنهيييي نزنززز نزززنز شنهييي هاي
اجة نزار يمشي برهاوة خايف: -بس خل افهمك هاي انا مو اسمي نزار يصيحولي نزنز لقب هذا هيج يعني
-طااح حضك وجيررة بفررركك زلمة شكبررة نزنز مكيف الاغممم
هز ايدة نزار شيسوي يريد يسلكها لايتسر المفضوح.
وعباس صاير اعصاب مدري شبية شهكت من رفعني شايلني يمشي بية سريع غمضت عيوني عطرة بخشمي احتركت روحي دموعي من الصخونة ينزلن بللن ملابسة بعد فترة فتحت عيوني من خلاني على الفراش اي هذا فراشة ضميت وجهي بالفراش روحي خاوية الحرارة تطلع من عيوني غفيت ومن كعدت اهذري وارجف: -بارردة فدوة باررردة غطوووني غطووني
ايدة باردة تضغط على ايدي بقوة: -سودة علية بوية بية ولا بيج اخذج للمستشفى خاف يصير، بيج شي.
-لا لاااا بردانة اريد اتدفة فدووة عبسي فدووة
لفلفت روحي بالبطانية الموجودة حيل ماكعد ادفة صحت باسمة مرة مرتين مايرد نهضت روحي متكسرة دورت علية بعيوني مالكيتة ملشت شعري وصحت دموعي تجري: -حتتتى ااانت عفتتني ووحدي محدد مهتتتم ضليييت وحدددي اخاااف والله اااخاف امووت ومحدد يمييي
اندفر الباب اجة يركض لزم ادية يمسح بوجهي وكلة يرجف دخلت امي تلف بشالها وراة والنوم بعيونها اجت تباوعلي
-حيل مصخنة.
عباس: -ناااار داااوية ناااار بتتتي
-خليها تسبح هسة تفكها الصخونة يلا كومي اسبحي
نزلت دموعي بهضم اريد احجي ماكدر اتحرك تعاي كوميني ومشيني للحمام مايصير شي والله غير انتي ااامي شالني عباس وكالها: -طلعيلها ملابس والحكيهااا
اخذني شايلني بحضنة تعلكت بركبتة ودفنت راسي بصدرة انحب: -لاتبجين بوية والحسين حركتيني اروحلج فدوه لاتبجين
-هاي مو انا هنا دموعي وحدهن ينزلن معلية بيهن
-الله لايوفقني ان شاء الله.
-وانت شعليك انا تمرضت وحدي
-انا السببب كوون مررض بية كووون محدد بحاالج اشوفج تذبلين وسااااكت
خلاني على الصبة وطلع اجت امي خلت الملابس بيدي وراحت بدون كلام من الرجفة طاحن من ايدي وتنكعن ماي شهكت واني ارجف: -ااارريد امووت يمممة وييينج يمممممة تعاااااي ايييدييي ايييدي
دخل عباس عبالي امي شهكت بزيادة تقرب شال الملابس خلاهن على صفحة واجاني: -اريد امي صيحها خل تجيني
-راحت امج استغفرالله بت...
شتريدين اجيبلج ملابس هسة اجيبلج جديدات لاتبجين هسة اجي
-وامي
-انا امج تذكرين من جنتي امشط شعرج واسويلج كصايب للمدرسة تكولين انت احسن من امي اني مو احسن منها لا انا ابدالها
مسح وجهي وشغل الدوش فوك راسي فزيت وضميت ادية لصدري ارجف راح هو ورجع بيدة ملابس علكهن وكفني جوة الدوش لازمني بثنين ادية لا اوكع وملابسة انترسن مي...
-كافي كافي بردت حيييل بردت.
لفني بالمنشفة واخذ ملابسي بالايد الثانية اخذني لغرفتة دخلني وخلاهن على الجرباية: -يلا بدلي هنا انا طالع اخذي راحتج لا تتستعجلين
طلع وسد الباب بدلت ارجف لميت ملابسي خليتهن بيدي وطلعت ماكدر اضل بغرفتة اكثر مقيدتة عيب علية صار بوجهي بيدة جكارة ياخذ منها نفس وشمرها داس عليها زفر الدخان: -وين بوية وين
-يم البنات امشي
-تؤ بعدج مصخنة ارجعي للحجرة من تصيرين زينة روحي
-لا لا امشي هناك.
مشيت حاضنة الملابس سحبني من ايدي دخلني للغرفة: -ماكدر بوية هناك رغد وزهراء ماكدر اشوفج بعدج مو زينة الحرارة ماتروح منج
خليت ايدي فوك ايدة المخليها على كصتي وهمست بتعب: -عباس
باوع بعيوني ذبلانات من المرض بس هو مادري منين ذبلن عيونة بعيوني حتى رمشة مايرمشن تقرب اكثر ومثل الوعى على روحة رفض عيونة ليفوك يمسح بوجهة ويردد بلسانة كلام...
اخذني اشرلي ودار وجهة: -نامي واذا صخنتي انا يمج.
تمددت ودرت وجهي نايمة بحافة الفراش تعبانة جسمي يوجعني خجلانة اي مادري رغم جنت زمان انام وياة بنفس الفراش بس يمكن طبيعي لان كبرت
وابتعدت شوية غفيت ودمعتي على خدي وكالعادة طول الليل سهران يسوي كمادات احس كلبي يوجعني من اشوفة كاعد يم راسي كل مافتح عيوني
-انت ليش تهتم بية؟ جاوبني حباب
-بنيتي اكو اب يهمل بنيتة
-اي ابوي وامي هم
-ذولة بس جاوبوج وانا اخذتج صرتلج اب وام واجبي اهتم بيج.
-ليش بس انت تهتم بية وانا لا
-انا زلمة مايبين علية مرض اطيح واكوم وحدي محد يدري اذا واحد يدري بمرضي صعب اتعالج
-مافهمت
-نامي بوية لادوخين روحج
-ليش ماتنام انت ماتعبت ها كلي ليش ضال كاعد مثل كل مرة وتسويلي كمادات اااااااامي نااااااايمة وشبعانة نوم كووم انت هم نااااام مثلها.
مسح على راسي ومسح دموعي دفعت ايدة: -لاتهتتتم بية هييييج شلووون رااااح اكمل حياااتي ها كلي شلون راح اقارن الناس كلها بيك امي وابوي حسيت باهمالهم بسبب اهتمامك وراح اشوف الناس كلها هاملتني من ورة اهتمامك راح ادور عليك بالناس لاتعودني عليك وتكسرني مثل ماصار وتزوجت حسيت روحي ضايعة يتيمة ماعندي اهل.
شايف من تكعد من النوم وتلكة اهلك عافوك كلهممممممممم هيج انا حسيت من تزوجت والله ردتلك السعادة ودعيتلك تعيش وترتاح ويصير عندك جهال بس هم ماردتك تعوفني انكسرت مرة ليش تقربني عليك وانكسر مليون مرة هااااااا ليششششش تسهرر وياي من اتمرررض عوفني ما امووووت لاتخاااف اكعد الصبح كلشي مابية انت بس لاتصير حنين لك الحنين اذا راح تضيع عووووفني عوووفني.
لزمني يسيطر علية واني شبة منهارة حضني يمسح يمسح على راسي ويبوس بية: -ماعوفج وحگ كل شوغة بروحي مادري والله مادري هيج راح يصير بوية هدوة انتي نفسي بلياج اختنك واموت لاتفكرين اعوفج الا اذا متت
-راح تعوفني واضل ادور عليك بين الناس راح افز من يصيحون اسمك واركض فاتحة ادية بس ما الكاك راح انجرح والنزف ياخذني ولنا اضل اتاني هسة تجي تلف اصبعي وتكول سودة علية بس ماتجي راح ا...
سد شفايفي بيدة وضمني اكثر بحضنة: -بسج بوية بسج الموت وحدة يفكرنا عزرائيل هو الينهي القصو بس هو غير لا سمعتي بس عزرائيل يفاركنا
نفسة يصعد وينزل خليت راسي على صدرة ودموعي تنزل بهدوء غفيت على هالوضع منا لمن صبح الصبح يلا كعدت مالكيتة كوة نهضت روحي رحت غسلت ونزلت جوة راسي مسطور كعدت على الكرسي اباوع على مرت عمي توكل بجهالها خليت راسي على الميز وغفيت.
البيت فارغ رغد وزهراء بالدوام وشروق بغرفتها والباقين طاشين حسيت بايد تمشي على شعري فزيت وذبيت نفس براحة من شفتة عباس
-اسم الله بوية شلون صرتي
-زينة لاتخاف
-يلا كومي اتريكي سويتلج ريوك
الابتسامة انرسمت على وجهي لا ارادي شعور حلو من شخص مهتم لكلشي بيك بوسط ناس كلمن حاير بروحة عدلت كعدتي وخلة الصينية كدامي حليب وصمون حار وكيمر عرب ابتسمت وصبلي الجاي خاطة وخلاة كدامي...
-ردت اسويلج بيض بس ادري ماتحبيتة
-اي.
-اكلي زين هذا صمون حار
-اممم
-الحليب اشربي يفيدج مادامة حار
اخذت شربت منة وكملت اتريك بس خلصت انطاني علاجي مجددة إلى شربتها وشلت الصينية غسلتهن ورجعت لغرفتي شفتة كدامي: -شكراً عبسي
-عيب بوية وينة وين الشكر استجني بعد لاتعيدينها
-ههههههههههههههه
-سبع فدوات لهل ضحكة.
دخلت اريد اقرا بس راسي ماذيني من الحادث بعد ما ارتاحيت منة عصرتة بيدي ونمت ومر اليوم والبعدة ملرايحة للدوام ولا اطلع من الغرفة بس على الشي الاريدة وارجع...
من شفت حالتي تحسنت داومت لان تراكمت علية المواد كعدت على صفحة بعيدة عن الطلاب خليت راسي على الميز اباوع بعيوني على صديقتي الواحد وحدة يحس نفسة غريب منا لمن اجت يلا طلع الساني وحجيت كملت الدوام ورجعت لكيت البيت هوسة وصوتة عاااااااالي...
نو
برود فضيع يحاوط حياتي ملل وروتين ممل ماعرف شلون الايام كاعد تمر علية مجاي افرح بشي لو عندي واهس وقتي دراسة دراسة نسيت روحي وضعت بهذا العالم المايخلص...
كاعدة بغرفتي بيدي كوب قهوة وملزمتي كدامي صافنة بيها وبالي راح لبعيد ليش هو الانسان لو ما الذكريات يكمل استرجع ايامي الحلوة بضحكتي العالية بروح المرح الجانت عندي ليش ماكدر ارجع مثل قبل شهلختلاف الصار بية صرت وحدة ثانية باردة مثل الجليد بس كلبي نارة ماتطفى يجي يوم ويضل رماد...
فزيت علية يلتف علية خليت ادية بشعرة الاعبة وهو مرتاح ذبيت نفس وجريت حسرة سحبتة لحضني وطلعت برا احس ماكدر اتنفس طفيت ضوة الكراج وكعدت بعتبة الباب مال المطبخ ماحب الضوة خليت البيت كلة ضلمة...
حابسة ميمو الجديد بحضني وهو الهدية الجانت كلش فرحت بيها على الاقل يفتر علية ويرجع ذكريات مو لازم اتذكرها قط بلون ثلجي مايشبة احد من العندي قبل...
-جوعان حبيبي.
دمعت عيوني الا درجة شوية وابجي بلعت غصتي مو شي جديد البجي مايعوفني هو شمريحني غير البجي تالي الليل كمت جبت اكل الة خليتة ياكل
رجعت نفسي ساندة جسمي على الحايط لامة رجلية لصدري اترقب تغيرات الجو بدت الدنيا تمطر واني اتخيل هسة بالمرجوحة العب وانهار يدفعني نتبلل بالمطر وندخل نضحك اشتاقيت لبيتي لكلشي الة گلبي طااااك ليش كل هذا الجفاء ضربت رجلي حيل.
وعضيت اصبعي بقهر ودموعي تنزل شنتظر ولج يمعزاية شنتظرين منة غير الطلاك ياشوفة بعد يابيت
خليت ايدي على وجهي ودموعي وشهكتي بعد ما اسيطر عليهن ليش كلشي حلو يفاركني بعد ما اتعود علية شكد شفت صعبات بس جذب اكو شي يجي بصعوبة المشتاك اااخ من العشگ وغرور العشاگ.
روحي تحترك تلتهب بنار مو بيدي والله مو بيدي من اذكرة ولا بيدي من اشتاكلة ليش مبتعد عني كل هالفترة معقولة طلع جذاب شلون يجذب اكو بشر يجذب بكلشيييي ويمثل ورحي تنمرد مشاتقتلة بس ماكدر اتواصل وياة شكلة ليش ماتريدني لو اختف محبتك وحبيت غيري؟
بجيت بجي حسيت عيوني ورمن وجسمي اشتعل نار كمت صرت جوة المطر مكسورة مقهورة ضايعة ماعرف شي اريد واحد يدليني طريقي ماكووو.
غسلني المطر بس ماطفة نار گلبي رفعت راسة للسما والمطر بوجهي بعدت شعري وناجيت ربي بكلب محرك: فدووة ياربي طلعة من كلبي تعبت والله تعبت من روحي من كلبي خلصني لاتخليني اتعذب وحدي تعب من الحب دمرني العشك دمرررني خلاني اشتعل واطفي ربي رحمتك علية طلعني وانتشلني من الاني بية...
تمر الايام مملللة لا حدث ولا حديث مجرد عايشين نجر نفس هملت كلشي بالدنيا والتهيت بدراستي.
جنت اقرا وراسي منسطر من القراية اندفر الباب طفرت من مكاني اصرخ متخبلة: -اااااااررريد اااااركز لليشش تخرررربون الجووو عليييي لييششششش اطلعععع برررررا مانااااقصة دووووخة رااااس
حجيت الكلام فرد نفس على جرة وحدة كمت صايرة نار من كلشي اتنرفز واصير عصبية دفعتة على الباب بقوة: -ااااذبحك بس توووصل لغرررفتي فااااهم
ضربني على راسي ردت اهجم علية وصاح
عبدالله: -ووولج الشكرررة هي وسرررى واختها بيتنا يريدنج جوووة.
بهتت ملامحي عكدت حواجبي وكتلة: -يا شكرة؟
مرتة مو مررتة؟
-هاي اي مدري شسمها
طلعت عبالي يجذب علية مامستوعبة كلامة نزلت للصالة اركض لكيتهن كاعدات وي امي وسرى تسولف عليها التفتتن علية واني باقية صافنة بوجوهن لا اخذ ولا انطي ماعبالي صدك اني منا دايخة واقرا عقلي قفل وحالي يفششششل شعري منكوش ولابسة تراك وجهي املح على اصفر وهنا كاشخات هسة لو سرى بس وحدها بيها مجال مو ذني...
بعد لا كدرت ارجع اضطريت انزل واكمل طريقي سلمت عليهن اعصابي ترجف من الصياح شلت الكلاص بية مي يرجف بيدي وهنا مركزات وياي شربت ونزلتة ماعندي اي كلمة احجيها بس اباوع بالوجوة...
سرى بقت تسالني واني اجاوبهة بكلمة مختصرة اباوع لسيلي بين فترة واخرى بطنها كبرانة غضيت بصر عنها وكمت اجيب الضيافة لكيت مهند محضرها بس اني اخذتها وهو راح للاستقبال قدمتلهن وكعدت
سرى: -شبيج نوف متغيرة
-تعبانة من الدراسة.
سرى: -وانتي ليش مركزة بيها هالكثر مو اني وياج على العموم اهتمي بصحتج منا وغاد
هزيت راسي وصرت احجي وي نهى انهدت بالسوالف الفطير ولا تغيرت هي تحجي واني مركزة وياها التفتت لسيلي من كالت: ماترجعين لبيتج نوف؟
-شعليج
-اسفة ادري ما لازم ادخل بس لان اعرف بسببي مبتعدة عن بيتج ورجلج لازم احجي الى متى تبقين كاعدة هنا مو كافي؟
-لا مو كافي راح نتطلك عن قريب
شهكت سرى ونهى كذلك ام هي ترجف صارت وتكول.
-ليش ليش تخربين حياتج والله اني مو يمج ولا يم رجلج حتى ماشايفتة كاعدة يم اهلي اسئلي البنات ابد مانلتقي لاتاخذين بالج اني ضرتج ومنافستج
بيش تريدين احلفلج ابتعد عن حياتكم بس اجيب هالطفل الحاولت اتخلص منة بكل الطرق واتخلص من روحي
حتى اسمي ماخليج تسمعينة ارجعي نوف لاتخربين كلشي بيتج رجلج ارجعيلهم لاتخلينهم مهجورات
سرى: -انمار يحبج والله العظيم ميت بيج وبطاريج يشوفج بالدنيا كلها ليش تضيعينة من ايدج.
نوف: -امور شخصية ماحب اناقش احد بيها
سكتن وانغلق هالموضوع والنقاش بية بقن فترة لعبت وي ابن سرى وبوستة شكد تمنيت عندي طفل هيج احبة وادارية راحن ورجع كلشي لمكانة
بين فترة وفترة ادخل على حساباتة كل صفحة اخر ضهر منذ كذا وين راح ليش مختفي معقولة انمار نسى شكر الجان عاشقها لا هايم بيها معقولة هيج نساها وهملها كل هالفترة...
بين كل تفكيري ارجع اكول مو جديدة علية العافني سنين صعبة علية يعوفني هسة وينساني...
الكبرياء البروحي كرهني بروحي كل ماريد اتصل ابطل ليش ماهو يتصل؟
حذفت الحسابات كلهن اليريدني يتصل علية رصيد
يوم بعد يوم تخلص السنين واحنا ماشفنا ولاضكنة طعم الراحة...
جان يوم جمعة رفيف يمنة اضحك واسولف وياهة فرحانة بيها اجة عبدالله يركض بيدة تليفوني يرن من بعد زمان طويل استغربت منو يتصل بية شفت المتصل سرى فتحت الاتصال واجة صوت زلزل المكان صوت خلاني املخ بروحي واصيح.
-لااااااااااااا يمممممممة لااااااااااا بيااااااا ذنبببببببب
حسبييييي الله ونعمممم الوكيييييل...