رواية بين سلاسل العادات للكاتبة كفاية كاظم الفصل الثالث والأربعون
و دير بالك تنسى روحك من جديد!
و ترجع تغني لحزنهم
و تنذر چفوفك شمع يضوي بدربهم .
شروق: -سمعت برحمن ينزل كلت خل اغير بالغرفة بدلت البردة وجبت درج اصعد علية حتى اخلي نشرة على الكنتور جاي الزگ بالنشرة وماحس شلون طحت رجلية صارن ثنين صرخت بصوت عالي واحس ضهري انقسم نصين الالم موتتني والدم اخذني منين الدم تخبلت كلهن التمتن علية متخبلات يردن يشيلني اموت بيدهن كوة اخذني غيرت ثوبي الكلة دم واخذت احتياطاتي نص ساعة واحنا بالمستشفى
دموعي تنزل والالم موتني سجى لازمة ايدة بقوة وتهدي بية...
سجى: -حالتها تبجي بس تصرخ ماكدرت اتحمل طلعت عنها والخبر جان مفجع سقطت تؤم وضهرها الفقرة زالفة...
محد كللها على على شي حالتها ماتساعد للوحدة واجة رحمن يركض بملابس الدوام وجاسب يركض وراة يريد يلزمة مايشوف دربة عيونة ددددم اجة يمنة يرجف حتى مايكدر يحجي...
رضية: -مامقسوملكم غيرة بغيرة الله كريم ويعوضكم
رحمن: -مايهمني شي بس كون هي ماتتوجع كلشي ادفع بس لايخلوها تبجي.
نزلن دموعة ولزم جاسب اخذة لغرفتها اول مرة بحياتي اشوف رجال يبجي طلع منها وكعد بالگاع ينحب بصوت يفطر الكلب الناس كلها تباوعلة عبالهم ميتلة واحد جاسب كاعد كبالة يحجي وياه...
حبة الها وخوفة مايحتاج ينگال شروق كلشي خسرت وفازت برجال مثل رحمن...
مر هذا اليوم السيء وتلتها ايام شروق على العلاج ماتتحرك بس للضرورة وحالتها النفسية بوجود رحمن متعدلة كلش...
من بعد مانزلو غيرو مكان شغل جاسب لفترة مامعلومة شوكت ويرجعونة لمكانة على هذا القرار
اخذ شقة غريبة عن مكان دوامة المتوسط الولاية
رغد جانت متخوفة بشكل مو طبيعي خلال هالفترة متلهي بالشغل ولا يشوفها بعينة بس يتوعدلها بايام سوداوية هلبينة مالها حظ ابد كلشي صار ضدها
شايف حسن يم الامام عبالة تاخرت لان جانت تحجي وياه وموقف المطعم كفيل ياكد كلشي ضدها.
راحت وياة وداخلها يلطم ويبجي على حظها الاعوج البيت صار موحش عليها بشكل مو طبيعي بهاي الفنرة التهيت بالامتحانات الماتخلص...
رغد: -طلعت برجلية لكبري خايفة من هدوئة وسكوتة عني هالفترة كلها خفت يستغل وجودنة وحدة فرصة لتعذيبي وفعلا صار المتوقعتة.
الشقة جانت مرتبة بس من الخوف مو بعيني شي حرت واحتاريت شسوي وياة وشحجي اذا هو ناوي على اني خاينة...
اول يوم خلصتها اعزل غراض هلكت تعب ما تقربلي ولا باوع بشكلي خلاني اكرة روحي تعاملة وبرودة يخلني استوي على نار هادئة مر اسبوع كامل يجي من الدوام يسبح ويطلع يرجع ينام...
كعدت بالصالة حسيت الهوى ضاع مني لشوكت ابقة هيج اريد حل خو ما ابقة العمر كلة هيج اريد واحد يفهمني ويكلي غلطي الخلاني واكفة والناس تعبرني وتتقدم واني اشاهد بعيني.
بمجتمعنة الرجال كلشي اله مباح ومن حقة يسوي كلشي ومحد يكدر يحجي لان هذا رجال الا المرة ابسط شي يلزمونة عليها خاصة الرجال اذا لزم شي على زوجتة يبقة يعيرها بية وعلى مدى العمر يذكرها بهذا الغلط...
التفتت بخوف شفت ضلة وراي جان الضوة طافي تقدم شغلة واجة يمي مسحت دموعي وعدلت كعدتي العب بالحلقة، حجة واحس گلبي دك بقوة شكد قاسي حتى صوتك حارمني منه.
-ماتولين تنامين شمكعدج بنص الليل.
-النوم ماسير علية روحي نام عوفني سهرانة وي ضلي
-امشي جدامي انطمري تعبان اريد انام
-هههههههه نام رغد لاتخاف ما ادخل واحد لبيتك
اقتحن وجههة وقبض ايدة بقوة نطت شرارينها وبلحظة سحبني مشدد على رگبتي راص على سنونة
رخة ايدة مركز بعيوني
-لشوكت نبقة هيج اذا انت عاجبك الوضع انا مايعجبني ترخي وتشد ملييت ولعبت روحي
-من ايدج.
-بس اريد اعرف انت شني من بشر شسوي حتى تصدك لو جان عندك ذرة ثقة بية جان مالبسك الشك وعمة على عيونك
-عقلي رافض يصدگج وانا رجال دايس على گلبي بسطالي
-ابقة مثل ما انت لاتصدك خلص حدنا لهنا حالنة حال الالف البشر الماتفاهمو
رجعت ليورة ونزعت الحلقة خليتها بيدة ودموعي نزلت: -مثل مادخلنا بالمعروف نطلع بالمعروف لاتخليني اكرهك لحد الان مشاعر الكرة ماداخلة گلبي صوبك.
ماحس الا ضربني راجدي دار وجهي صفح من قوتة لزمت خدي نااار ودموعي تنزل لزمني من شعري مقربني علية خلة راسة ورة اذني وكال...
-موتج يصير على ايدي لو فكرتي بالسالفة ثاني مرة
-انطيني حل كافي لعبت روحي تعبت طاقتي خلصت اليوم بهاي باجر غيرها والاكبر منها خليني اعيش مثل البشر
عافني وتقدم يمشي للغرفة مارد علية بحرف صحت وراة بصوت عالي محترك گلبي: -جااسب.
دار وجهة مخلي اصبعة على شفتة: -اش اششش كلمة منج ماريد اسمع طلاگ ماكو انسي هاي الفكرة لو العالم يوكف على طلاگنا ماطلگج
-وتعوفني معلگة لا للسمة ولا للگاع مو تعبت ومليت ارييد اتنفس اعتقني
رجع علية كفخني طراگ گلبني على القنفة وراح للغرفة دموعي نار تحرگ خدي تعبت وطلعت روحي من الوضع ماكدر اتحمل اكثر ردت اتصل برحمن بس الوقت مايساعد انتظرت الصبح ثانية ثانية طلع الفجر عيوني ناشفة صليت وغفيت على كعدتي.
كعدت الساعة بالعشرة محد موجود بس اني بالشقة
الباب مقفول احس روحي بسجن روحي طلعت ردت اتصل بس موبايلي ماخذة من بعد الصار بفترة ضربت على گصتي وكعدت شايطة روحي محسب حساب لكلشي زين شني الغاية من الجاي يسوية!؟
وين يريد يوصل؟
مر الوقت روتين سويت غدة احس الريحة تخنگني هلكد ما لعبانة روحي حضرت ملابسة وضحكت بصوت عالي ودموعي نزلت: -خوش خدامة هالمهنة لايگتلي مو.
باوعت لروحي بالمراية شكلي من الاموات علكت الملابس ورحت ادور بملابسي طلعت دشداشة كصيفة وردنها ربع سبحت ورحت للمراية اعدل بشكلي اخفي ملامحي المتعوبة بالمكياج ابتسمت على النتيجة الاخيرة شيصير لو ملامحي تنورة السعادة...
طبع السعادة دهن وماي احنا ماننجمع
شما ننخبط ننعزل...
رشيت عطر ورحت اسويلي اكلة إلى على مشتهاي خفيفة رتبتلي صينية وطلعتلي كتاب قديم جايبتة وي غراضي اقرا واكل حسيت نفسيتي تغيرت 180.
درجة اندمجت بجوي اللطيف الصنعتة لنفسي لكن ماستمر هواي خرب واهسي بجيتة ونظراتة التستفزني خزرتة ورجعت اقرا هز ايدة وراح يسبح شفت موبايلة على الميز طفرت بسرعة فتحت رمزة حافظتة واتصلت برحمن اكثر من مرة يلة رد ايدي ترجف ودموعي كوة لازمتهن.
-الوو
-هلو رحمن شلونك
-هلا برغدة عاش من سمع صوتج شلونج شخبارج
-تعال اخذني مو زينة.
وكع الموبايل من ايدي من شفتة كدامي عيونة تريد تاكلني دنكت شلتة من الكاع وسحبة مني كطع الاتصال وقفلة صرت مثل السعفة كدامة بس ارجف شكد كرهت نفسي وشخصيتي وحظي بهاي اللحظة...
طگگ رگبتة وسحبني علية ارتطمت بصدرة جان هادء مو مثل ماتوقعت مرر ايدة على خدي قشعر بدني وصلت الشفتي يمرر اصبعة بحركة بطيئة
ذبت بلمساتة ما انكر هالشي: -تريدين تتطلگين
رديت بهمس: -احسن النة راسي وراسك يفوخ
-انتي تحبيني
-اي
-حلو.
-بس انت دمرت شخصيتي بتصرفاتك وبشككك
-زين انتي تعرفين عقوبة الخاين؟
-بس انا مو خاينة وبعمري ماراح اخون اي شخص بحياتي مو الا زو.
خلة اصبعة على شفتي: -اش اششش تأليف ماريد
نترت ايدة وابتعدت: -طلگنييي لاتضل تألف من راسك ااانا ما أألف ساعة السودة الشفت جهرتك انت ويااااة واحد انكسس من الثاااني كرهتووووني بروحي نااقصين رجوولة
مادري شلون نطقت هالجملة جنت فاقدة اعصابي وفقدتة اعصابة وانهار علية ضرب...
جسمي يون علية حرارتي عالية ماكدر افتح عيوني اسمع الباب يندك بقوة انرفعت من شعري فتحت عيوني بألم وجههة نااار وعيونة دم...
جاسب: -السانج اكصة بس تجيبين طااري الطلاگ والله يارغدد احط طلقة بنص گصتج وما طلگج
-عوووفني بس عووفني
شمرني وطلع غمضت عيوني واسمع صوت رحمن العالي نهضت روحي وگمت جامعة كل قوتي وكفت بالباب متصنمة اشوفهم يتمالخون واحد يضرب بالثاني...
رحمن: -شكمممم مررة كتلللك لاتمددد ايددك عليهاااا.
جاسب: -مرررتيييي لاتددخل شغلللة ماتخصككك
رحمن: -تهين اختي وترريد محد يحاجيك اشفتتني خنيثثث جددامك اختي ما احميييها مووو حذررتك وكتلك اخررر مرررة وكلت كفاااتك
لزمة من ياخذتة بقوة ورفع ايدة طحت من طولتي احس جسمي تكسر اخذني رحمن بحضنة رافعني من الگاع بعدها ماحسيت بشي...
فتحت عيوني يحرگني من الوجع لكيت ملابسي مغيرة لدشداشة مستورة عكس الجنت لابستها.
نهضت وعدلت كعدتي اجة رحمن سحبني لحضنة يبوس براسي: -شلون صرتي زينة
-اي بس طلعني منا
-يلا كومي حضري روحج
ساعدني كمت لميت ملابسي وجهزت روحي اخذ الجنطة مني وانطاني ايدة لزمتها شد عليها بقوة حسيت امان الكون موجود عندة...
طلعت من الغرفة وانصدمت بالمنظر الصالة عبارة عن دخان ماينشاف شكلة وتفاصيلة اخذني رحمن
وطلعنا.
كالعادة محد تدخل بالسالفة بس صارو يحجون علية لان ضاربني على سبب مايعرفونة، حالتي ازادت سوء بهاي الفترة الحرارة ماتفكني ماخليت كل يومية رايحة لدكتور اصير زينة وارجع اطيح...
البنات يقرن وسجى تعلم بعلي الكتابة ابتسمت واجة على صوبي حضني وباسني بخدي شايل حنية هالطفل مو طبيعية بستة خدة وطلع يركض
رجع بيدة خمسة وعشرينات تفاجات وسالتة
-منيلك ذني
علي: -من رجلج بدتهن بستة (بگتهن بسكتة).
رفعت عيوني لسجى: -من شوكت هنا
سجى: -مادري والله أصلاً هو مايجي هو ورحمن خراب وشغلة هناك
رغد: -ولا مرة اجة!
-لا يجي مرات دعوفية قابل يجيج
رجعت الفلوس بيد علي: -روح حبيبي رجعهن لمجانهن حرام
علي: -اروح اددة الج مو حلام (اروح اطگة الج مو حرام)
ابتسمت على شكلة عصبي عاكد حواحبة راح يركض جاعص الفلوس بيدة.
سجى: -يسمع من اهلة ويحترك گلبة عليج
-مو ضليت يمهم فترة تعلق بية فدوة عين الله علية.
دخلت سفانة كرشها كدامها كعدت عابسة وجهها
رغد: -شكو شبيج
سفانة: -ماكو شي جديد
سجى: -عبير وامج مو
سفانة: -ماكو غيرهن يحجن علية عود ما اضيف
رغد: -يخسة اليحجة هيج هاي ياهي التحجي
سفانة: عبير اجتني للبيت هي وجهالها والله ماخليت شي ما ضيفتلها الدنيا العصر ورحت سويتلها غدة
سجى: -ختولي جلبة مايفيد وياها لا تقهرين روحج غلسي عنهن
سفانة: -ثدك ماكتلجن شطلع بيه
سجى: -شطلللع
سفانة: -احزرن
سجى: -بنية
رغد: -ولد.
سفانة: -صح ولد هههههه فارس طار من الفرح هسه مدري وين راح وعافني
رغد: -تولدين بالسلامه تستاهلين كل خير
سجى: -يلة هذا نسيبي الجديد يجوز يطلع احلة من علي
رغد: -انتي ضلي تحجزين نسابة وبعدج مكابلة شكولنة
سجى: -ماضل شي هي بس الامتحانات تخلص واعرس الله يهلكها هلكتني هذا شكل وحده تعرس.
اخذتلي فترة زينة ورجعت انتكست من جديد كاعدة بغرفة البنات غرفتي ماشتيفتها ولا اوصلها اخذت علاجي واجة رحمن هو وشروق تحسنت صحتها والدكتور طمنها الفقرة راجعة بعدلها شوية.
لازم ايدها يمشي بيها بحذر ابتسمت وعدلت كعدتي اجو كعدو يمي يسولفون ويغيرون من جوي كل شوية يكرصني من خدي ويذكر موقف صار بالطفولة لو يذكر سوالف شريقة ويتنمر عليها من جانت صغيرة متت ضحك على شكلها صايرة عصبية وتكلة: -ها من شوكت اني طحت بالخيس ررحمن ليش تجذب
رحمن: -ما مجذب ولحد الان اتذكر الجلب يركض وراج ومن طحتي على وجهج خطية اخترع ضل صافن يمكن ضميرة انبة عافج وراح
شروق: -الله يذب الجذاب بالنار.
رحمن: -مايذبني لان مامجذب
شروق: -رغد لاتصدكين ترة يتشاقة
رحمن: -ماجاي اتشاقة هذا ماضي ان رضيتي او لا
بقو فترة وطلعو تمددت لازمة راسي شفتة رجع اجة سحب موبايلة ناسية او هو مخلية شال ايدي رفعها باسها وكال: -شسويلج حتى تصيرين زينة
-خل يطلگني الى متى ابقة على هاي الحالة ابسط شي وسواها شكبرها تعبت رحمن حتى نفسيتي تعبت
-اطلگج خلص بس امهليني فترة.
نوف
انصدمت من شفتة بيدة جنط بدون مااسلم علية كتلة بخوف: -وين رايح؟
سحبهن واجة باتجاهي ضليت جامدة بمكاني ماتحركت سحبني لحضنة باسني وشمني ابتعدت منة ولزمتة من قميصة: -حتعوفني هم!
-ياهو گال؟
-بعد مابية حيل فراگ نبقة سوى لاتروح وحدك
لزم وجهي بثنين ادية مركز عيونة الذبلانة بعيوني الماليها الخوف والقلق: -روحي لاهلج فترة بين ماصير زين
-ليش حتى اعوفك؟ تخجل مني لو شنو.
هزيتة من زندة ودموعي نزلن من عرفت البالة
-احنة واحد روح وجسد اكو واحد يخجل من روحة اعرف بهاي الفترة ترجع للماضي وحالتك النفسية تتعب بس اني يمك ماعوفك بهيج فترة تعدي ماطول
-مو هيج الحجي بس اخذي راحة يلة شكر امشي اوديج لاهلج تونسي يم اخوتج وشوفي امج
نترت ايدة الساحبتني بقوة وتقدمت للداخل: -ما اطلع من هذا البيت ولا اعوفك افتهم احنة واحد
-أذيج بدون ماحس ماتعرفين شي عني هاي لاشيء.
مريض انا مريض بالماضي واحداثة
تقربت علية لزمتة من وجهها: -نتخطة سوة ماعوفك انهار ماكدر والله روحي معلگة بيك
شلون اعوفك نتشارك الحلوة والمرة سوى المايشاركك المر ماينحسب شخص مهم بحياتك
حضنتة بقوة ودموعي تنزل مرت الايام كلها قلق الكوابيس ماتعوفة وماعرف شوكت ناوية تعوفة افز من النوم ما الگاة بالبيت كلة اموت قلق وين راح بهليل موبايلة يعوفة وراة...
كاعدة بالساحة اهز برجلي متوترة ساعة اقرش اضافيري البيت يخوف وحدي انفتح الباب طفرت حضنتة: -متت قلق كم مرة كتلك لاتعوفني
-هنا مارايح بعيد
عيونة حمر شعرة مخربط وجهها متعرق رفعت رجلية بستة بگصتة لزمت ايدة واخذتة حاضنتة
-تسبح
-تعبان
ماكدرت اخلية ينام لان اعرف حرارتة راح تنرفع فوك ماهي مرتفعة من الاساس راح للجرباية
سحبتة من ايدة: -اسبح ونام حباب
-والله تعبان من اكعد اذا تريدين انام بالكاع.
ذبيت نفس وهزيت راسي: -بيك شي بابا شنو اني تلعب نفسي منك هه غير ابدي اكلك بس اكول خطية
ابتسم بتعب سحبتة كوة سبحتة متمدد على الجرباية انشف بشعرة وعيونة بالسكف معلكة عدلت حواجبة بيدة وغمضت عيونة: -يلا نام كافي سهر مو زين حيطلع الصبح
نام صفح وسحبني لحضنة باسني بكصتي: -وجودج بحياتي نعمة رادلة شكر هواي
-وجودك بحياتي اكبر نعمة لو ابقة العمر كلة اشكر رب العالمين اكون مقصرة.
ضحك بتعب وكرص خدي: -صايرة ماينكدرلج لساان
-ههههه اعجبك حبيبي
باسني وغمص عيونة يردد بصوت ناصي: -هل ياترى لو مت انسى ما اجرى هل ياترى لو عندي غيركم قلبي اليكم ماسرى.
مسحت على خدة واني ارسم تفاصيلة: -كل مااكول ابدي من جديد وانسى تجي الايام ترجعني للصفر
-صير اقوة من الايام اغلبها لاتنغلب
-لايغرج شكلي ترة انا متعوب.
-يروح التعب والسواد البروح يتبدل والحزن يتحول فرح والراحو نشوفهم نجمة وسط سمانة ضاووين ويضوون ايامنة بنورهم نمر انت لاتنسى
ابتسم وحضني بقوة نام وبقيت مساهرة علية خاف ترتفع حرارتة وينشمر الحمدلله ماارتفعت صار الصبح كمت قبلة راجعت للامتحان وحضرت ريوك.
كل الفترة هو يسوي ويكعد قبلي بس هالفترة اني مكانة كلش ضايجة على نشاطة الطافي ماله واهس بشي بس ما الومة لان بعدني ماتخطيت منظر التابوت الخشب كل ما اشوفة تضلم الدنيا بعيني وارجع لذاك اليوم المشؤؤم مو هو شاف دمهم تارس الگاع...
كعدتة راح سبح: -مو قبل لتنام سبحت
-هسة خايفة على الماي اشو خير من الله
-مو هيج بس عبالي نسيت
كرص خدي وراح سبح لكاني افنر بيدي الملزمة كعد يتريك صاحني اكل: -ما اشتهي انت اكل.
مايفيد الكلام مارتاح الا خلاني اتريك شلت المواعين ردت اغسلهن وصار ورة ضهري مخلي راسة برگبتي: -عوفيهن انا اغسلهن
-مارادلهن شي هسة اكمل
لزم ايدي وباسني بقوة: -كاعد اليوم ماعندي شي وراج دوام لا تتاخرين
-حتبقى بالبيت
-اممم
-اجي قبل الغدة يعني متطلع
-اريد اكملي كم شغلة ما اطلع
دارني علية واخذ شفتي بين شفافة...
-شلونج بالامتحانات
-صعبة انهار والله مرات اريد ابجي من الصعوبة ليش هيج مسوينها طلاسم.
-غير حتى تصيرون صيادلة جا شلون ماكان حياة الناس مو لعبة
-هم صح بس مو هيجي والله تعب حيل حيل
-فترة وتخلص تحيرين بالوضيفة والدوام والزعاطيط
ابتسمت ابتسامة واسعة رفع حاجبة مستفسر سبب هالابتسامة: -شبيج يول
-هههه انت كلت زعاطيط فدوة اريد
-شني تريدين ترة هما مو لعابة نشتريها
-يحسسني طفلة ماعرف.
-خطر بابا الاطفال خطر عليج بعدج زغيرة هو انتي زعطوطة وتريدين زعاطيط حتى انا اشرد من البيت هي بس بزازينج كافي علية مخبلاتني
-عوف البزازين وخل نجيب جهال زغار حلوين يشبهونك بخدودهم رصاعات اااالله
غمضت عيوني بقوة اضحك واتخيل شكلهم: -شبيج تخلبتي شني سالفتج
-مدخلني اريد اطفال يشبهونك هيج حلوين
-منيلي حلو اشو املح اليسمعج يكول عيوني زرگ
-يا عيون زرگ يا شگر غير احلى منهم كلهم
-كافي تصبغين بية تجبرين بخاطري.
-والله انت مو مال غزل
-وانتي مو مال جهال يلا ولي لمدرستج بابا
-كلية اولا وثانيا يصير خير
طلعت للدوام امتحنت ورجعت تلاگاني انسة هموم وتعب الدنيا بحضنة لكيتة موصي على غدة تغدينا وعزلت المطبخ واخذتلة جاي لكيتة ناثر الكاع ملفات ويكتب والفون من جهة مفتوح يحجي وي واحد رحت نمت تعبانة وعفتة العصر طلع...
لليل حضرت نفسي وسويت اجواء سهرة فلم ونمنميات شفتة اجة رجعت شعري ليورة ورمشت بعيوني: -ها يول شدعواج تسطرين الواحد
خليت ايدي على حلكي اضحك اجة سحبني علية
-هواي علية كل هذا الجمال هسة لو تتقصدين بية
-لا كلة احسن
-كريمة مرتي مو بيدها
-شوف شسويتلك اجواء وسهرة وكذا
-هي بس الكذا تقوم بالواجب ابوس مرتي
-من حقك طبعاً.
ضحك على ضحكتي وبدت سهرتنا الدائما اسويها احسها تغير من نفسيتة كلش رجعت راسي لصدرة ومررت ايدي على شواربة: -حبيبي
-روحة
-انت مو كلت اريد طفل عادي اني قابلة خل نسوي
عكدت حواجبة بلل شفتة: -شذكرج بالسالفة
-ترة اني ما نسيتها حتى تندمت لان كتلك من حقك يصير عندك ينورون البيت
-منور بينا
-الاطفال ينورنه بضحكتهم بصوتهم يسوون جو مختلف وراح يحسسونة بالمسؤلية ويكملون علاقتنة ويقوونها
-قوية علاقتنا ماتحتاج.
-يعني شنو متريد صرت؟
-شلون ماريد بس مو هسة بعد وكت التهي بدراستج ماناقصج تعب واني هم شغلي مخربط مو وكت السالفة كلش
-يعني مراح يجون هسة بعد تسع اشهر يتغير الحال الى الف حال
-هسة شتريدين
-جهال
-يا سالفة الكشرة صوجي حجيت بالسالفة عمي اجذب عليج ماريد ماناقصني دوخة راس
-هسة صارو دوخت راس
كلامة نرفزني طفرت من مكاني عيوني مدمعة ماجنت متصورة ردة فعلة هيج راح تكون مو جان يريد شغير راية وتفكيرة!
كام سحبني مانعني اروح: -لا تخربين السهرة شكر
-انت الخربتها كاعد تلاحظ كلامك وياي ماتعرف شتحسسني
-اسف مو قصدي بس هالموضوع مو وكتة
-واني اشوف وقتة يمتها لعد يصيرون عندك من تدخل بالاربعين ترة اني علمودك ماريد شي بخاطرك اريد طفل تشوف بية نفسك تنطية الاشياء الانحرمت منها اني متاكدة راح تصير اب حنون الى درجة الكل يحسد جهالنا لان عدهم اب مثلك يمتلك حنية العالم.
بقة صافن بوجهي عيونة مدمعة اعرف هالكلام ياثر بية حضنت وجههة وبستة...
سرى
مخلية ايدي على بطني واقص لطفلي القصص الصارت وياي واسولفلة عن مشاعري الندفنت عن حب حياتي التركتني بداية الطريق اسولفلة واوصف ملامحة ضحكتة ساعة ابجي وساعة اضحك كل ما اتعب ارجع ورة فترة اكمل حديثي
احسة متشوق يعرف تكملة القصة وفعلا كملتها بس اكتشفت القصة مابيها نهاية بعدها مستمرة.
-حتكمل يا ماما تدري شوكت بحالتين اما ان يشرق وجهك المنير ويضيء عتمة ايامي اما ان ارحل تاركة معك احاديثي والنهاية ستكون انت.
الايام تمر تاخذ من صحتي وحيلي اخذت علاجي ورحت يم باهر لكيتة مستلقي على القنفة من شافني عدل كعدتة صرت مقابيلة مستمعلي بانصات...
-شلونج اليوم
-نفس كل يوم الحمدلله على كل حال اطلب منك طلب
-اعتبرية صار.
-شوف باهر اذا ولدت اني متاكدة طفلي يعيش لو مامتاكدة ماضحيت بروحي ازرع بية طيب راح يوفيلك عمر انطية الحب والحنان ينطيك روحة قربان سولفلة عني وعن العشتة واريدك تاخذة لقبر احمد وتحجيلة عن شبابة الماتهنة بيه گلة ياخذ اطباعة الحلوة مو بس اسمة راح وبقو اليحبونة بلوعة علية
سكتت احس الغصة خنگتني تنفست ورفعت عيوني اله: -امانتي يمك عفت الناس كلها وعفتها يمك لان ادري بيك رجال كد الحمل صيرلة اب وام.
-طفلج امانتج راح اصيرلة اب بس ماخذ دور الام لانج موجودة
-لاتعيشون على امل اعيش ترة اني منتهية ماكدر يادوب اجيبة سالم
-ترحين تزورين الامير على (ع)؟
-ماكدر ماعندي طاقة والطريق بعيد بس شذكرك بية
-مايرد طالب مكانتة جبيرة عند ربو فحل الفحول هذا اذا ادخلج علية تطلعين معافاية
ابتسمت ودنكت راسي: -والله اتمنى بس ماكدر مخافظات والامام تكدر تنخاة من اي مكان مو شرط الا تزورة.
ورة يوم اجت عمتي هي ونوف زارني نوف كل نهاية اسبوع يمي من غير الاتصالات ماعافتني ابد تبقة فوك الساعة تحجي كلام ايجابي ابقة مستمعتلها ومبتسمة على كلامها الحلو لو عركاتها وي انمار تاخذ سكر وتركض ورة الرجال...
-ولج نوف مو هيج مادام يخاف منهن عوفية لايشمرهن وانتي وياهن
-لا هو ميخاف بس تلعب نفسة هيج يتقزز رجلي ميخاف من شي
-كون تعرفين تلعب نفسة ليش هيج وياة
-مو هو يعيب علية
-حقة بس يعيب المفروض شمر بالشارع.
-اهوو هم انتي علية
-الا اگل لامج اخلي تشمر البزازين للجلاب
-لا عليج الله سرى والله بعد ما اعيدها استغفر الله راح ارجعهن لمكانهن
سديت الاتصال اضحك على سوالفهم بعدني مامتحركة واتصل رقم غريب عكد حواجبي منو هذا باهر وسيلي مسجلتهم عندي فتحتة واجة صوت اختي نهى احس گلبي يريد يطلع من مكانة
نهى: -الو سرى وياي تسمعيني
صابني الجمود كوة حركت الساني ونطقت: -نهاوي؟
-اي حبيبتي نهى اختج.
بجت بصوت وردت مكملة: -سرى حبابة لاتسدين الاتصال اسمعيني
-وين انتو
-بسوريا
-شوداكم لسوريا انتو بخير كلكم سالمين
-مابينة شي احنة الحمدلله بس ابوي مطلوب فلوس وشرد بينة ماكدرنة ناخذج ويانة لان ماعدنة فلوس يادوب عايشين
-صدك تحجين مجاي اصدك
-هو منو مصدك الجاي يصير شنسوي بعد هذا قدرنا انتي شلونج حملج زين
-منو كلج! وشلون حصلتي رقمي
-رجلج كلنة حامل
-باهر!
-اي هو كال اتصلو بيها
-شلونج نهى مشتاقتة اشوف وجهج.
-حتى اني والله متت قهر عليج والله كوة مشيت وعفتج وحدج بس ابوي كال ماعليها شي
-ابوي وامي شلونهم يمج هما
-انطيجياهم
-اي
روحي ردت من سمعت صوتهم وحجيت وياهم من البجي احس گلبي يريد يوكف اخذت سيلي الفون وكومتني تبجي وياي.
مااعرف شلون اشكر باهر على الشي الجاي يقدمة إلى صدك لو كالو الله مايكطع بعبدة ودزة إلى من اهلي عافوني...
اجتة مهمة وهلمهمة تطول شهر نوف من سمعت جلبت بية ابقى يمها وامها هم لحت اجي يمهم بس استحي من الولد بيت اهلة اتقيد كلش لان جوهم متوتر مايناسبني فكلت اروح يم نوف ماعارض الفكرة...
راح باهر داعيتلة تنجح هالمهمة الراحلها.
سيلي رجعت لبيتها واختفت اخبارها حتى من اتصل بيها جهازها مغلق ارجع اتصل بصفية تطمني عنها بس ولا مرة حجيت وياها وسمعت صوتها!
هسة حاليا اني بشهر السابع وبيوم كعدت اصرخ الم فضيع ماكدر احس راح اموت اخذوني للمستشفى وحالوني للعمليات محد يخاطر ويسويلي العملية الا ان اجة الحارث بشخصة الا قبلو بس انطو احتمالات اكيدة...
-موت الام ام الطفل.
خلصت امتحانات وبديت اجهز لعرسي الزواج الطالت مدتة كلش هواي...
البيت اجوائة هادئة البنات خلصن امتحانات من زمان ونجحن بس هدى لان وزاري بعدها سالفتها مطولة مريت منها تقرا وتهز: -دكافي لعبتي روحي علما تجي الامتحانات ندخل بيج مستشفى
هدى: -اهو بس عوفيني انا بيا حال
-انا بيا حال والدفان يغمزلي ولابسة اسود يعروسة وتطلب المرحوم بوسة عااع ذكرتيني بهاي الاغنية صدك عود ليش ما البس بدلة سودة والله اطلع فخمة.
-يافخمة تطلعين جنج غراب اسود حتى تخلسين الرجال
-خاب دولي مو صوجج صوجي انا اناقشح بواضيع مهمة.
رحت نزلت لحبوبتي صاحتني رحت كعدت يمها توصي بية: -يحبوبة الزلمة يريد الاكلة الزينة والهدم النضيف والمعطر كون صوتج مايطلع واسلوبج هذا تعدلينة هناك غير بيت الرجل مو مثل بيت الاهل هنا الج مطلق الحرية شتريدين تسوين سوي بس هناك لا مايصير صوتج يطلع رجلج شيكلج كليلة صار اذا تشوفينة عصبي اسكتي عنة بين مايبرد يردلج صيري مرة حوگ كون يحلفون بتربيتنة.
-صكد جذب اصلا اخليهم يمشوون ويصيحون ماكو مثل بيت افلان لاتخافين يمي
-ادري بيج نادرة وعاقللة بس اوصيج همتلة برجلج وبفلوسة مو تكضينها تطشر ديربالج على امة باكلتها بشربتها هم مرة جبيرة وتريد الاهتمام والمداراة
-تدلل ام الاملح اءءقصد ارفدي
ضليت اسمعلها لحد الاخر نص الكلام احس راح اسوية والنص الثاني لا والله ماكدر كلشي ولا الساني...
رحنة اني ورغد للصالون عدلنة وجوهنا ورغد ميشت شعرها ولعبت بشكلها طوبة طلعت تخبل بس كون المجسب يفك عنها ويخليها تشوف دربها
كملت كل التجهيزات من بدلات وصالون وغيرها
كلها ترتيب وتعدل وتشتري البيت كله مخبوص مو بس اني فتح غمض خلص الحنة واجة العرس الحنة جانت تخبل تونسنة بيها وركصنة ماخلينة اغنية تعتب علينة ماركصنا عليها...
الليل كلة اتكلب اريد انام من التوتر والقلق ماكدر تذكرت سالفة نوف وانمار ماتقربلها تمنيت ارفد يعوفني فد اسبوع بس وين هاي تصير رحت جبت موبايلي لكيتة مراسلني داز موجوده
-yes
-good
-
What do you want from me جاي تتخيل جهالنة النعمةالراح يعيشونها
-ابوهم وامهم انكريزيين جايين من امريكا
-فديتنا صددك ماكلت شتريد
-ماريد هسة بس كلت اذكرج بس هالليلة السانج طويل
-شقصدك تكصة
-لا بوية هو وحدة يختفي مو ينكص.
-هه هه هه اروح انطمر باجر لعبان نفس
-بسيطة ست
-انت زين؟
-انتي زينة؟
-لا اريد انام وماكدر يلة يلة باي الوكت راح هسة انا شلحگ
وفعلا طار الوكت وماحسيت الا واني لابسة البدلة البيضة ولازمة المراية بيدي اتاكد من شكلي والبنات مطاوقاتني هاي التكتب اسمها على البدلة والخ على الكعب واني بنار تندمت لان وافقت تمنيت اكدر انزع البدلة واكلهم ماريد بطلت بس وين تصير هاي...
بطني خبطت من كالو اجت الزفة دخل واحس اطرافي ثلجت سلم على حبوباتي وعلى امي ونسوان عمي وكف بصفي يعدل بشواربة كاتم ضحكتة على حالي اخواتة يهوسن ويركصن
انسطرت من الهلاهل والجكليت...
دخل ابوي سلمني الة ووصاة بية ماصدك راح اعوف هلبيت التربيت بية عمر صح اني احب ارفد بس ماريد اروح واعوف بيتنة لبسوني الكبوس وي كل خطوة اخطيها دموعي تنزل شعور صعب اوصفة صعدوني بالسيارة وجانت الزفة جبيرة.
وولد عمي كلهم موجودين لان اصدقائة.
داير. وجهة بسلم على الشيوخ كبار ويحجي وياهم درت وجهي للجامة شفت سيارة نزار بصفنة مطلع ايدة من الجامة بيدة مسدس رفعت الكبوس شوية اضحك احس كلبي برد من شفت واحد من العشيرة
باوعلي وكام يصفك ويهلهل رافع ادية للسمة يدعي ويصيح: -يارربي يووم الالييي ارريد اعررس شني هييي وكفتت للناس كلها بعراسها اريدهم يوكفولي.
رجعت الكبوس واحس بايد ارفد بمتني جنا ماخذين راحتنا لان السايق فارس همست: -شبييك
-السانج ماكصر
-انت شدكول
-بعدة راح يجي وكتة
-لا عبالك اخاف ترة اسوي الدم للركاب بالمزهرية طبعاً
-شو ولج خوفتيني خاف لا صيتي بالقنوات الشاب الذي قتلتة زوجتة في ليلة الدخلة
فارس سمعت ترة هددتني تخلي دمي للركاب رجعها الكم اريد شبابي
فارس: -لا بتنا حبابة وينها وي هاي السوالف بت فقيرة وردة مال الله.
اخذو الطريق يسولفون ويصنفون وخلوني احجي وياهم لان لساني انبلع خلصت الزفة وخلصت الهوسة...
واكفة افتر بدلتي وافكر شلون اخلص روحي من هلورطة شلون بية هسة اهوو هسة اني المن تزوجت وعفت نسوان عمي الحبابات
انفتح الباب كمزت: -اسم الله شبيج كمزتي
-هيج لان جانت هدوء اكول اريد الحمام هاي البدلة خنگتني
نزع السترة علگها وفتح ازاررات ايدة رفعهن اجة يضحك: -جا انتي حتى هنا عبالي اشوفج خجلانة.
-هسة وكت خجل جوعانة ونعسانة وراسي صاير طبل
-خليج ريلكس
-اي بس اريد ابدل
سحبني من خصري احس كلبي يدك ببلعومي صرت ارجف مثل السعفة اريد اجمعلي حرفين واحجي الساني صدك اختفة ضحك وكال: -شبيج احجي
-ترة مو خرسة
-شبيج راح تبجين
درت وجهي احس دموعي راح تنزل دار وجههي علية وبوز شفتة: -افاا مو سبعة وسبعة طلعتي فارة
-شتريد مني
-سلامتج
-جا عوفني
-جا بكيفج بس خل استطعم شفتج لان اخر مرة صار هواي
اخذني مقبل شفتي وتمم زواجنة.
مر اسبوعين على زواجنة كاي زوجين عشاق وماتخلة من المناكر جنت بالمطبخ اريد اسوي غدة ما اسمع اله الباب تعطر رحت اركض اشوف شكو واحس نغزني من سمعتها تصيح الحگي رجلج.